Uccjooǥǥâst pâzzlâšttam-mannust 25.-26. peei´v riõššum Sääʹmnuõri čeäʹppvuõđpeiʹvv leäi eʹpet sääʹmnuõri da –uʹčteeʹli euʹnnreeʹǧǧes čeäʹppvuõđčuäʹjtõs. Šõddmõõžž väʹlddteeʹmmen leämmaž musiikk čuâjai Uccjokknjääʹlm škooul kueʹrncest joikkân, laulljen da räppen, koi tueʹǩǩen čuõʹjje määŋg nuõri jiiʹjjes bäänd. Sääʹmteʹǧǧ spässpââžž pukid čeäʹppvuõđpeeiʹvi riâššmõʹšše jeeʹresnalla vuässõõttâm oummid ooʹnstam šõddmõõžžâst!

Sääʹmnuõri eʹtǩǩeejen väʹlddkååddlaž SOUNDS-šõddmõʹšše Porvoo-gåårda vaʹlljee Villat-joouk Uccjooǥǥâst da Čagaldahttit-joouk Âʹvvlest. Villat-joukk vuâlgg väʹlddkååddlaž šõddmõʹšše čuäʹjtõõzzines Dan man oainnát, koon oʹhjjeejen toimmai Niilo Rasmus. Âʹvvel vueʹllškooul joukk Čagaldahttit vuâlgg Porvoo šõddmõʹšše čuäʹjtõõzzines Čagaldahttin, koon oʹhjjeejen toimmje Maarit Niittyvuopio, Laura Niittyvuopio da Hannu Huumonen.

Čeäʹppvuõđpeiʹvv noori Uccjokknjääʹlm škooul kueʹrnec ruõbdeezz mieʹldd tiuʹdde nelljdpeeiʹv 26.3. Pääiʹǩ âʹlnn leʹjje sääʹmnuõr uʹčteeʹlineez, peâmmjineez da ǩiõččjineez pâʹjjel 400 ooumžed. Vuässõõtti pueʹtte õhtsiʹžže pâʹjjel 15 jeeʹres škooulâst sääʹmvuuʹdest da tõn oolǥbeäʹlnn. Säʹmmlai dommvuuʹdest vuässõõtti pueʹtte âʹldd juõʹǩǩ škooulâst. Sääʹmvuuʹd oolǥbeäʹlnn vuässõõtti leʹjje Heʹlssnest da Ruäʹvnjâârǥâst.

Nuʹt pieʹll čeäʹppvuõđpeivva vuässõõttâm nuõrin vuässõõđi tuâjjpõõrteid da ääʹveempoʹdde, kook riõššeš juʹn seärad 25.3. Tuâjjpõõrtei väʹlddteeʹmmen leäi eeʹjj 2016 šõddmõõžž õuddlõʹstti teaʹtter. Ǩeeuʹniǩteaʹtter oʹhjjii ǩiõllpieʹssjååʹđteei da musiikkneǩ Heli Aikio da jeeʹres tuâjjpõõrteid jieʹllikarttoʹhjjeei Pauliina Feodoroff, musiikkneǩ-čuäʹjtõõtti Sverre Porsanger, čuäʹjtõõtti-toimteei Heli Huovinen da päärnai TV-prograammâst Unna Junnást toobdâs čuäʹjtõõtti Irene Länsman. Vueʹss nuõrin vuäǯǯai vuäʹpstõõzz räiddkartt-tuõjju karttčeäʹppneeʹǩǩ Sunna Kitti jååʹđteʹmen. Vueʹss nuõrin vuäǯǯâi mättʼtempoodd sääʹmǩiõllsaž räpmusiikk määttʼtaid musiikkneǩ Ailu Valle vuäʹpstemen.

Sääʹmnuõri čeäʹppvuõđpeiʹvv jeäll juʹn viiđad lååi eeʹjjes da tõst lij lååʹjji iiʹjji mieʹldd šõddâm tääʹrǩes areena määŋgaid nuõrid čeäppõõžž staarjõõttjid. Eeʹjj kõõski šõddi čeäʹppvuõđpeiʹvv oudd tääʹrǩes čuäʹjtõõttâmpaaiʹǩid da mii tääʹrǩmõs, jiiʹjjesǩiõllsaž ǩiõččjeejid. Sääʹmnuõri čeäʹppvuõđpeeiʹv ǩiõllân Uccjooǥǥâst toimmje puk kolmm Lääʹddjânnmest mainstum sääʹmǩiõl. Šõddmõõžž jååʹđteeʹjen toimmje nuõrttsääʹmǩiõllsaž Anna-Katariina Feodoroff, aanarsääʹmǩiõllsaž Martta Alajärvi da tâʹvvsääʹmǩiõllsaž Tuomo Laiti.

Šõddmõõžž tuomren toimmje nuõrttsääʹmǩiõllsaž Anna Lumisalmi, aanarsääʹmǩiõllsaž Heli Aikio da tâʹvvsääʹmǩiõllsaž Ailu Valle. Õhtt čeäʹppvuõđpeeiʹvi vuâđđjurddjin lij, što tõn puk čuäʹjtõõzz lie sääʹmǩiõllsa.

Sääʹmnuõri čeäʹppvuõđpeeiʹv riâššjen lij sääʹmteʹǧǧ õõutveäkka Uccjokknjääʹlm škooulin. Šõddmõõžž teäggad mättʼtõs- da kulttuurministeria. Sääʹmnuõri čeäʹppvuõđpeiʹvv lij vueʹss väʹlddkååddlaž Nuori kulttuuri -šõddmõõžž. Šõddmõõžž tekniikkâst vaʹsttii Tuupa Records Jussi Isokoski jååʹđteʹmen.

Čeäʹppvuõđpeeiʹvin stipeeʹndivuiʹm paʹlǩǩuum joouk:

Gáktenieiddat: Mánu luohti

Karigasnjaarǥ škooul 6-9-ekksa, jååʹđteei Kaaren Kitti

Hearvaduottar: Máttuid árbi

Hetta škooul 10-15-ekksa, jååʹđteei Inga-Máret Gaup-Juuso da Anne-Maria Kukkonen

Janita & band: Iežas geaidnu

Âʹvvel pâʹjjtääʹss, 10-15-ekksa, jååʹđteei Katri Kittilä

SKT: Jåågar lij jie´lli, One of Us, Duna Duna

Čeʹvetjääuʹr škooul, 10-15-ekksa, jååʹđteei Erkka Antila da Seija Sivertsen

Giehtaruohttasa mánát: Buot jagiáiggit

Karesuvanto škooul, 10-15-ekksa, jååʹđteei Ulla Magga da Taina Syväjärvi

Puállâm váimu: Ääših maid monâttáim tuulân

Âʹvvel lukio, 16-20-ekksa, jååʹđteei Petra Kuuva

Villat: Dan man oainnát

Uccjokknjääʹlm škooul, 16-20- ekksa, jååʹđteei Niilo Rasmus

Čagaldahttit: Čagaldahttin

IvÂʹvvel vueʹllškooul, 10-15- ekksa, jååʹđteei Maarit Niittyvuopio, Laura Niittyvuopio da Hannu Huumonen

Ǩiõčč täʹst ČEÄʹPPVUÕĐPEEIʹV SNIMLDÕÕǤǤID, snimldõõǥǥ Terhi Tuovinen.

Eeʹjj 2016 Sääʹmnuõri čeäʹppvuõđpeiʹvv riâššât Aanar Sajoozzâst teeʹmmen teaʹtter.

Viimeksi päivitetty ( 02.04.2015 )