Tâ´vv-Lää´ddjânnam sosialvuu´d siltteemkõõskõs (Poske) lij bie´ǩǩ vä´lddkååddlaž siltteemkõõskõõzzsääi´m. Vä´lddkååddlânji siltteemkõõskõstuåimmjumuužž kuõskki lää´ǩǩ (1230/2001) da asetõs (1411/2001) lij šõddâm viõ´ǩǩe ee´jj 2002 aalǥâst. Poske Lij Sää´mjânnam õllškooul, Sää´mtee´ǧǧ, Kolpene kääzzkâ´sttemkõõskõõzz kå´ddkonsern da Oulu vuu´d ämmatõllškooul årjâ´ttem suåppmõšvuâđđsaž organisaatia, koon vuä´ppast da jåå´đat saaǥǥstõõllâmkå´dd. Poske lij õhtt õhttsaž tuåimmjemnallšem õhttnašvuõtt, kåå´tt årjââtt kolmmen vooudlaž tuåimmjemõõutilååǥǥast: Sää´mjânnam da Tâ´vv-Vuâđđmäädd tuåimmjemõõutilååǥǥast di Saa´miõõutilååǥǥast. Saa´miõõutilååkk va´sttad saa´mi pue´rrjie´llemkääzzkõõzzi ooudâsviikkmest, kåå´tt lij Tâ´vv-Lää´ddjânnam sosialvuu´d siltteemkõõskõõzz vä´lddkååddlaž spesialtuâjj.

Tâ´vv-Lää´ddjânnam sosialvuu´d siltteemkõõskõõzz tuâjjan lij ooudâsviikkâd:

- oobbe´ld sosialvuu´d säi´mmnallšem, määŋgämmatlaž da määŋgtuåimmjemnallšem kääzzkâ´sttemåå´blǩid, tuâjjmõõntõõllmõõžžid, konsultaatia di tõõzz kuulli ǩiččlõddâmtuåimmjumuužž,

- sosialvuu´d praksiizz tuâi, škoou´l’jemriâššmõõžži õhttsažtuâi di vuâđđ-, juätkk- da tiuddeemškou´l´jumuužž,

- ođđteknologii beä´lnn juõ´ǩǩ sâjja vuällai ââ´nnemvä´lddmõõžž sosialvuu´dest,

- mäddkååddlaž sosiaalaž vaikktõõzzi ärvvtõõllâm da pue´rrjie´llemstrategiiztaž tuâi di

- sää´mǩiõllsai sosialvuu´d kääzzkõõzzi ooudâsviikkmõõžž.

Tâ´vv-Lää´ddjânnam sosialvuu´d siltteemkõõskõõzz saa´miõõutilååkk

Tâ´vv-Lää´ddjânnam sosialvuu´d siltteemkõõskõõzz (Poske) vä´lddkååddlaž spesialtuâjjan lij meä´rtõllum sää´mǩiõllsa narood kääzzkâ´sttemtaarbi lokku vä´lddmõš taarbšemnallšem tuâjain. Saa´mi pue´rrjie´llemkääzzkõõzzi ooudâsviikkmõš, tõõzz kuulli tu´tǩǩumuš, škooul´j’umuš da ärvvõs liâ spesialvu´vdden Poske tuâjjǩee´ddest. Vaaldšemvuõđlânji Sää´mtee´ǧǧ õhttvuõđâst tuåimmjeei Sää´mõõutilååkk âânn huõl täin tuâjain.

Saa´miõõutilååǥǥ tuåimmjemvu´vdden liâ ââldmõssân sää´mvu´vdd da õhttsažtuåimmjemsäimma kuulli Tâ´vv-Lää´ddjânnam sosialvuu´d siltteemkõõskõõzz tuåimmjemõõutilååǥǥai lââ´ssen kåå´dd, organisaatiad, õllškooul da mättjemstrooitee´l di sää´mǩiõllsai kääzzkõõzzid kuulli puu´t’teem kruuggnee´ǩǩ Taarrâst da Ruõccâst.

Saa´miõõutilååǥǥ täävtõssân lij vääžne´ld sää´m siõrrekksaišõddeem, puärrsihuõl da sä´mmlai sosialtuâi ooudâsviikkmõš di sosialkääzzkõõzzi siisklaž da šlaajjsaž ooudâsviikkmõš nu´tt, što kääzzkõõzzi tää´ss da vuäǯǯamvuõtt vuei´tet staannâd sää´mnaroo´de.

Poske tuåimmjumuužžâst vää´ldet lokku Sää´mtee´ǧǧ täävtõõzzid sosial- da tiõrvâsvuõđhuõlâst. Sää´mte´ǧǧ lij piijjâm täävtõssân sosial- da tiõrvâsvuõttvuu´dest što sä´mmlaid jurddum sosialvuu´d kääzzkõõzz liâ plannum miârkkšõõvee´l saa´mi jii´jjes kulttuur šõddâmaalǥin, sä´mmlai ä´rbbvuõtt äärv da jie´llemvue´ǩǩ lokku vää´ldee´l da što kääzzkõõzz čõõđtet sää´mǩiõlin da saa´mi jii´jjesvaaldšem vuâđast.