Čõõuč 2015 sääʹmteʹǧǧvaali lopp-puåđõõzz diõtt lie tuejjuum šiõttuum mieʹrrääiʹjest õhttsiʹžže vitt vuõiǥeemkaiʹbbjõõzz. Vuõiǥeemkaiʹbbjõõzzin lie kaiʹbbjam jeäʹrbi mieʹldd vaali puåđõõzz jaukkummuž da ođđ vaali tuåimtummuž. Halltõs saǥǥstõõli ääʹššest da tuʹmmji seʹrdded ääʹšš ǩiõttʼtõõllmõõžž juätkksåbbra, koon såbbrõõžžât Aanrest 18.11.2015 čiâss 16.30 ääʹljeeʹl.

Halltõs saǥǥstõõli Sääʹmteeʹǧǧ tuâjjriâššmõõžž oođummšest. Halltõs nõõmti čõhččmannust 2014 tuâjj-joouk, koon tuâjjan leäi Sääʹmteeʹǧǧ tuâjjriâššmõõžž oođummuš. Tuâjj-joukk lij såbbrin 28.9.2015 da 5.10.2015 ǩiõttʼtõõllâm luʹvddkooʹddin di Sääʹmteeʹǧǧ tuâjjlažkååʹddest vuäǯǯam eʹtǩǩõõzzid tuâjjriâššmõõžž oođeem diõtt da täi vuâđald raajjâm hämmaz Sääʹmteeʹǧǧ ođđ tuâjjriâššmõššân. Häämas lij eʹtǩǩuum Sääʹmteeʹǧǧ tuâjjlažkådda tuâjjlažkåʹddsåbbrest 3.11.2015. Tuâjjlažkååʹddest di luʹvddkooʹddin leäi vueiʹttemvuõtt eʹtǩǩeed muttsid hämmsa. Halltõs ǩiõttʼtõõli tuâjjriâššmõšhämmaz aalǥ 21e § räjja da siiʹrdi tuâjjriâššmõšhämmaz loopp ǩiõttʼtõõllâm (22 – 89 §) pueʹtti såbbra.

Halltõs saǥǥstõõli Sääʹmteeʹǧǧ mieʹrrteäʹǧǧeʹtǩǩõõzz taʹrǩǩummšest eeʹjjid 2017 – 2020. Sääʹmteeʹǧǧ halltõs priimi såbbreʹstes 4.9.2015 mieʹrrteäʹǧǧeʹtǩǩõõzz eeʹjjid 2017 – 2020 tuåimtem nalla vuõiggâdvuõttministeriaaʹje. Vuõiggâdvuõttministeria, riikkvääraiministeria da Sääʹmteeʹǧǧ budjeʹttsaǥǥstõõllmõõžž leʹjje Heʹlssnest 21.10.2015. Riikktääl čouggum raamm oudldâstt kuuitâǥ Sääʹmteeʹǧǧ eʹtǩǩõõzzi oʹđđest ärvtõõllmõõžž da priorisâsttmõõžž. Priorisõsttum tuåimmân eʹtǩǩeet sääʹmǩiõllõhttsažtuâj ooudummuž di sääʹmjieʹllemvuõʹjji da jeeʹres määddâânnmõõžž õʹhttesuânnʼjummuž. Halltõs uuʹdi vääʹld saaǥǥjååʹđtejja da mä. vaaldšemjååʹđtejja raajjâd loopplaž eʹtǩǩõõzz.

Lââʹssteâđaid oudd Sääʹmteeʹǧǧ saaǥǥjååʹđteei Tiina Sanila-Aikio teʹl. puh. 050 300 1780, tiina.sanila-aikio(at)samediggi.fi