Nuõrisuåvtõs lij õhtt Sääʹmteeʹǧǧ luʹvddkooʹddin, koon pââimõs tuejjan lij õõuʹdeed sääʹmnuõri kiõllsallaš da kulttuurlaž vuõiggâdvuõđid di nââneed sääʹmnuõri identiteeʹtt. Lââʹssen suåvtõs valmštââll Sääʹmteeʹǧǧ čuäʹjtõõzzid, alttõõzzid, ceâlklmid da sääʹmnuõrid kuõskki jeeʹres beäʹlvälddmõõžžid. Nuõrisuåvtõʹsse koʹlle ânnʼjõõžžâst vitt 18-25-ekksaž vuäzzliʹžžed di juõʹǩǩ vuäzzliʹžže lij jiiʹjjes-i vääʹrrneǩ da lââʹssen vitt 15-17-ekksaž äʹšštobddivuäzzliʹžžed.

Nuõrisuåvtõs lij raajjâm Sääʹmtegga čuäʹjtõõzz pââʹjeed suåvtõõzz vuäzzlažmieʹr čiččma da muʹtted  vuäzzlaid kuõskki ââʹǩǩrääʹjtõõzz 18-28 ekka. Mâŋŋa muttsest äʹšštobddivuäzzla leʹčči vaʹlljeemnalla jäänmõsân vitt. Ääʹššest tuʹmmad Sääʹmteeʹǧǧ sååbbar 21.12. Jõs suåvtõõzz čuäʹjtõs priimât, vaʹlljeet suåvtõʹsse pueʹtti pââjas čuäʹjtõõzz meâldlânji 7 vuäzzliʹžžed di juõʹǩǩ vuäzzliʹžže jiiʹjjes-i vääʹrrniiʹǩǩid. Jõs eʹpet suåvtõõzz čuäʹjtõõzz jeät primmu, vaʹlljeet vuäzzliʹžžen vitt 18-25-ekksaž nuõrrâd, mâʹte rän räjja.

Suåvtõõzz vuäzzla jie taarbâž leeʹd Sääʹmteeʹǧǧ vuäzzla, ij-ga seeʹst taarbâž jälsted sääʹmvuuʹdest. Ij ni sääʹmǩiõll jieʹnnǩiõllân leäkku taarblaž, peʹce sääʹm ǩiõl täidd lij tuåivvmest. Nuõrisuåvtõõzz vaʹlljummšest puäʹđet väʹldded lokku, što vuäzzla eeʹttkâʹstte veiddsubun kääʹtteeʹl sääʹmvuuʹd obbnes da jeeʹres ǩiõlljooukid. Vaʹlljummšest jääʹǩǩtet še sooǥǥbieʹli kõskksaž tääʹssäärv.

Nuõrisuåvtõs oudd Sääʹmteeʹǧǧ halltõʹsse eʹtǩǩõõzz vaʹlljeemnalla åårrai vuäzzlain, da loopplaž tuʹmstõõǥǥ tuejjad Sääʹmteeʹǧǧ sååbbar.

Vueiʹttveʹted eeʹtǩed miõlsteed nuõrisuåvtõʹsse suåvlaž 18-28-ekksaid aktiivlaž sääʹmnuõrid da äʹšštobddivuäzzliʹžžen suåvlaž 15-17-ekksaid nuõrid. Eʹtǩǩõõzzid vuâđđõõttmõõžžineez âlgg vuõltteed Sääʹmteeʹǧǧ nuõripiisra 11.1.2016 mõõneeʹst.

Eʹtǩǩõõzz da lââʹssteâđ:

Kaisa Tapiola-Länsman

kaisa.tapiola-lansman(at)samediggi.fi

+358 50 382 51 79