Mielenterveystalo.fi-õhttsažtuejjhaʹŋǩǩõõzz neʹttkääzzkõs âânn seʹst depressio Jiõččhåidd-prograamm tâʹvvsääʹmǩiõʹlle. Ǩiõlltuejj–ciistin sääʹm ǩiõllsuåvtõs haaʹlad puhtted õuʹdde tõn, što Mielenterveystalo.fi-õhttsažtuejjhaʹŋǩǩõs lij čõõđtam sääʹm ǩiõlʼlaž kääzzkõõzzid ođđäiggsaž vuõʹjjin, kååʹtt tääʹvat jõnn joouk sääʹmǩiõllsaid oummid.

 Mielenterveystalo.fi-õhttsažtuejjhaʹŋǩǩõõzz neʹttõõʹlmtõs Jiõččhåiddam-vuäʹppes (Deprešuvnna iešdikšun-prográmma, Omahoito-opas) da tõn âânnmõš jie leäkku čõnnum äigga da päikka. Jiõččhåiddam-vuäʹppes tääʹvat neʹttõõʹlmtõssân sääʹmǩiõllsaž oummid nuʹtt sääʹmvuuʹdest ko tõn oolǥbeäʹlnn. Interneeʹttest toimmjummuš da vuäppsi da brosyyri čõõđtummuš neeʹttest lie ânnʼjõšäiggsa kääzzkâʹsttemvueʹjj, koid âlgg õinn lââʹssted ânnʼjõõžži kääzzkâʹsttemvuõʹjji lââʹssen.

Neʹttõõʹlmtõssân Jiõččhåiddam-vuäʹppes tääʹvat pueʹrben jeeʹrben sääʹmǩiõllsaž nuõrab oummid, ǩeäk lie mättjam håiddad aaʹššid neeʹttest da ââʹnned liâdglaž kääzzkõõzzid. Sääʹmǩiõllsaž Jiõččhåiddam-vuäʹppes oudd vuäʹpstõõzz jiiʹjjes piʹrǧǧeem tuäʹrjjummša da vuäppsa vuäitt tobdstõõttâd jiõčč ääiʹjldes pääiʹǩest huõlǩani. Sääʹm ǩiõllsuåvtõs âânn täʹrǩǩen, što tõt vuäǯǯjââvv še sääʹm ǩiõlivuiʹm.

Sääʹmǩiõllsai neʹttõõʹlmtõõzzi raajjmeʹst âlgg vuâmmšed, što õõʹlmtõs lij aʹlǩǩânji kaunnâmnalla. Håt-i Jiõččhåiddam-prograʹmme ij leäkku vuõigg liŋkk Mielenterveystalo.fi-seiddõõzzâst, tõt käunnai kuuitâǥ Mielenterveystalo.fi-seiddõõzz Jiõččhåiddam-vuäppsid ǩiõččeeʹl.

Jiõččhåiddam-vuäppaz tooimtummuš internee´ttest tâʹvvsääʹmǩiõʹlle lij sääʹmǩiõllsai kääzzkõõzzi taʹrjjummšest tõn-nallšem äävummuš, koon sääʹm ǩiõllsuåvtõs tuäivv smeʹllkâʹttem še jeärrsid jäʹrjsted sääʹmǩiõllsaid kääzzkõõzzid nee´ttest.

Ååʹn õõʹlmtum Jiõččhåiddam-vuäʹppes lij vuõssmõs Mielenterveystalo.fi-õhttsažtuejjhaʹŋǩǩõõzz tâʹvvsääʹmǩiõllsaž neʹttõõʹlmtõs. Sääʹm ǩiõllsuåvtõs tuäivv Ǩiõlltuejj-ciist älšmâʹttem ciistvuäǯai veeideed tâʹvvsääʹmǩiõllsaž taʹrjjõõzzid di tooiʹmtem neʹttmateriaal vueiʹttmes mieʹldd še aanarsääʹmǩiõʹlle da nuõrttsääʹmǩiõʹlle.