Vuõiggâdvuõttministeria lij puättam vuâstta ǩee´rjin, kåå´tt kuâskk takai rä´tǩǩumuužž äiggavuäǯǯam diõtt saa´mi vuõiggâdvuõttstattuuzz pue´reem diõtt jee´res vaaldšemvuu´din da lää´jjšiõttõõzzâst. Sää´mtee´ǧǧ halltõs lij ââlmtam ministeria årra obbžurrvuõđes tõõzz, što ILO 169-suåppmõõžž priimm’muš i´llakku peäggtum riikk vuõss’sâjjsen täävtõssân.

Halltõs lij vasttõõzzstes ministeria årra huântam vuõssnaroodvuõiggâdvuõđi ouddnem äjjasvuõđ da raukkâm riikksåbbrest õhttsažsåbbar sää´mtee´ǧǧ halltõõzz, vä´lddminister da ää´šš kuõskki vääžnai ministeerivui´m. Saaǥǥjåå´đteei Klemetti Näkkäläjäu´rr maainsti sää´mtee´ǧǧ 24.6. noorõõttââm tiuddsåbbra ääi´jpoddsai aa´ššin. Son tuõtti Vanhasen nuu´bb halltõõzz tuåimmääi´jest, što lij mõõnnâm ju´n pâ´jjel peä´lest, ijga halltõs leäkku ooudâsviikkâm vuõssnaroodvuõiggâdvuõđid nu´tt mä´htt halltõsprogra´mme lij ǩee´rjtum.

Vuõssnaroodää´šš ouddne pirrõsvaaldšem beä´lnn

Pirrõsministeria lij nõõmtam ǩie´ssmannu aalǥâst vuõssnaroodi ä´rbbteâđai ǩiõtt’tõõllâm ä´šštobddituâjjä´rttel. Tõn tuâjjan lij ǩiõtt’tõõllâd biodiversiteettsuåppmõ´šše kuulli aartikla, kåå´tt kuâskk vuõssnarood ä´rbbteâđ suåvtumuužž. Sää´mtee´ǧǧ saaǥǥjåå´đteei uu´di teâttan pue´rr miõlâst, što sää´mtee´ǧǧest lij šiõǥǥ ee´ttkâ´sttemvue´ǩǩ tuâjjä´rttlest. Son jiõčč tuåimmai saaǥǥjåå´đteejan. Sää´mtee´ǧǧ võborše´ǩǩen mie´ldd liâ uccjooǥǥ ååraš dåhttar, sää´mtee´ǧǧ vuässlaž Heidi Eriksen da puäʒʒee´žžed J. Antti Magga Enontekiöst.