Sää´mkulttuurkõõskõõzz nõmmǩeâšttõõttmõš |
![]() |
![]() |
Sää´mte´ǧǧ reäšš äävai åårrmen nõmmǩeâštõõttmõõžž koonn jurddân lij kaunnâd Aanar ceerkavsi´jdde ee´jjest 2012 valmštõõvvi Sää´mkulttuurkõõskõ´sse tõn miârkkšõõvvmõõžž da tuåimmuužž mie´lddsaž nõmm. Ǩeâštõõttâmäi´ǧǧ lij 8.10.– 9.11.2009.
SÄÄ´MKULTTUURKÕÕSKÕÕZZ NÕMMǨEŠTÕÕTTMÕŠ;ha´ŋǩǩõõzz tuâkkaž da ǩeâštõõttâm šeâttmõõzz
Sää´mkulttuurkõõskõõzz čuäjtõõllmõs
Aanar ceerkavsiid Juutuajooǥǥ riddu tuejjeemnalla šõddi sää´mkulttuurkõõskõ´sse šâ´dde tuåimmpääi´ǩ Sää´mtegga, sää´mkulttuu´re kuulli määŋgpeällsa tuåimmjumu´šše di sää´m mätt’tõs da tu´tǩǩeemtuåimmjumu´šše. Lââ´ssen põõrt vääžnmõs pääi´ǩ liâ määŋgtuåimm- da kääzzkâ´sttempääi´ǩ pirr juâkkõõttâm õhttsažpääi´ǩ: Čuäjtõõllâm-, sååbbar- da määŋgtuåimmpääi´ǩ di restrantt. Õhttsažpaai´ǩi âânnmõš lij vääžnai vuä´ss puk tän kulttuurkõõskõõzz tuåimmjumuužžin.
Sää´mkulttuurkõõskõõzz jurddâm lij raajjâd saa´mid pue´rab ouldõõzzid jii´jjesnalla ââ´nned da ooudâsviikkâd ǩiõles, kulttuures da jie´llemvue´ǩǩtuejjumuužžâs, håiddad da ooudâsviikkâd kulttuurjiõččvaaldšemes di staannâd saa´mi takai jie´llemvue´jji šõddmõõžžid ooudee´l. Lââ´ssen kõõskõõzz jurddân lij pue´reed vuäittmõõžžid liâvted da vuäǯǯad teâđaid saa´min vuõssnaroodân.
Sää´mkulttuurkõõskõs lij vuõss’sââjest jurddum saa´mi jii´jjes ââ´nnem diõtt. Tõ´st lij mie´rr šõddâd Lää´ddjânnam saa´mi jii´jjesvaaldšem di jie´lli da ooudâsmõõnni sää´mkulttuur symbool, koonn vääžmõsssân tuåimmjee´es jurddân lij ââ´nned huõl ä´rbbvuõttân seillam kulttuurest da ooudâsviikkâd da oođeed saa´m õhttsažkå´ddjie´llem.
Čiõlgguum vä´lddveârlažmeä´r kuâŋŋad kulttuurkõõskõs ta´rjjad šõõrab, ođđäiggsai da tää´zzõõlǥtem õhttsažââ´nnempaai´ǩi (sååbbar-, auditoria-, määŋgtuåimm- da čuäjtõõttâmpaaiǩi di studiapääi´ǩ) diõtt šiõǥǥ vuäittmõõžž riâššât o´dinakainallšem pirrõõžžâst määŋgnallšem såbbrid, konfereensid da jee´resnallšem pooddid.
Sää´mkulttuurkõõskõs lij tännalla seämmaäiggsânji Lää´ddjânnam saa´mi parlamenttpõrtt da kulttur-, škoou´l’jumuužž- da siltteemkõõskuum da še riõššum pooddipõrtt jee´resnallšem såbbrineez, musiikk-, jie´llikartt- da tea´tterčuäjtõõzziineez. Nu´bb nobba luämmlõõžžee´l täk vuä´sstuåim tue´rjjee nuu´bbeez sii´sǩe´ld da pääi´ǩineez.
Kulttuurkõõskõõzz tuejjad da vuä´mast Senaatt-ǩiiddõs da tõn bruttošorrõs lij nu´tt 4 800 m². Raajjâmha´ŋǩǩõõzz teä´ǧǧââ´nnemarvvlõs lij nu´tt 12 miljoon eu´rred, ko´st EU-teäggtõõzz vuässõs lij 5 miljoon eu´rred. Kulttuurkõõskõõzz tuejjumuš älgg ǩeâđđa 2010 da tõt õõlǥči valmštõõvvâd ee´jj 2012 aalǥ mõõnee´st.
Sää´mkulttuurkõõskõõzz vä´lddposttše´ǩǩen tuåimmai Sää´mte´ǧǧ, kåå´tt vuåkrai ooudâs paai´ǩid jee´res õõ´nnjid. Sää´mvuu´d škoou´l’jemkõõskõs lij Sää´mtee´ǧǧ kuâŋŋad põõrt nu´bb vä´lddõõ´nni. Jee´res põõrt õõ´nni liâ Aanar kåå´dd ǩe´rjjpõõrttuåimm, Sámi Duodji ry (sää´mǩiõtt’tuâjjlai seä´rvv), SámiSoster ry (saa´mi sosial- da tiõrvâsvuõttvuu´d seä´rvv), Sää´mjânnam läänhalltõs di a´ltteem vue´lnn åårrai Sää´markiiv da restrantt.
Nõmmǩeâšttõõttmõõžž šeâttmõõžž:
1. Ǩeâšttõõttmõõžž jurddân lij kaunnâd Aanar ceerkavsi´jdde raajjâmnalla åårrai sää´mkulttuurkõõskõ´sse tõn miârkkšõõvvmõõžž da tuåimmuužž mie´lddsaž nõmm.
2. Ǩeâšttõõttmõõžž riâššjen tuåimmai Sää´mte´ǧǧ.
3. Ǩeâšttõõttmõš lij pukid äävai.
4. Ǩeâštõõttâmäi´ǧǧ lij 8.10. – 9.11.2009. Ǩeâštõõttâme´tǩǩõõzz â´lǧǧe lee´d vuõlttuum 9.11.2009 čiâss 16.00 mõõnee´st šeâttmõõžži 5. pääi´ǩest peäggtum addrõõzzâst. Mâŋŋa mie´rrääi´j puättam e´tǩǩõõzzid jeät valddu lokku.
5. Ǩeâšttõõttmõ´šše vuässõõđât påå´št pääi´ǩ vuõlttee´l nõmme´tǩǩõs da vuässõõ´tti õhttsažteâđ addrõ´sse. Saamelaiskäräjät, Angelintie 696, 99870 Inari. Konfeârtta ǩee´rjtet koodd ”Nimikilpailu”. Paa´rtite´mvuõđ staannâm diõtt vuässõõ´tti õhttsažteâđaid le´be nõmm, addrõs, te´lfon-nââmar da ne´ttpåå´št õhtteet e´tǩǩõ´sse ođđ, ǩidd pijjum konfeârtâst, kåå´tt ää´vet ärvstõõllâm looppâst da mâŋŋa ǩeâšttõõttmõõžž loppšõddmõõžž siâlggnem. Jee´resnalla vuõlttuum e´tǩǩõõzz heelǥeet.
6. Personteâđaid ǩiõtt’tõõlât tå´lǩ nõmmǩeâštõõttâm poodd, jeät-ka tõid u´vddu ooudâs. Puk teâđ jaukkeet mâŋŋa ǩeâšttõõttâm looppâst.
7. Ǩeâšttõõttmõ´šše vuäitt vuässõõžžâd mäŋggsab ku õõutin e´tǩǩõõzzin da tõid vuäitt vuõltteed seämma konfeârtâst.
8. Nõmme´tǩǩõs âlgg lee´d sää´mǩiõllsaž, tuäivvmõssân lij, što nõmm lij tâ´vv-, aanarle ´be nuõrttsää´mǩiõllsaž. E´tǩǩõõzz vuäitt čiõlggeed še lääddas.
9. Nõ´mme pijjum õõlǥtõõzz
a. Nõmmǩeâšttõõttmõõžžin ooccât sää´mkulttuurkõõskõ´sse vuä´nkõs, âppšeei, miõ´llepâššneei da jeärsmeei sää´mǩiõllsaž nõõm, kåå´tt čiõlggad kulttuurkõõskõõzz - kulttuur ju´rddemvuâđ da miârkkšõõvvmõõžž, - sää´m jii´jjesnallšemvuõđ, - kookkas vuällai da määŋgpeällsa tuåimmjumuužž di tõn - arkktehtsaž åå´bleǩǩiõl.
b. E´tǩǩõõzzin âlgg vä´ldded lokku nõõm ǩee´rjtemvue´ǩǩ da ceä´lǩǩmõš. Nõmm âlgg lee´d hie´lǩe´ld jee´res ǩiõlin ceä´lǩǩemnallšem da luânddlânji soojtemnallšem. Tõn tuäivat suåppâd še meeraikõskksaž da liâggsaž âânnmõ´šše.
c. Nõmme´tǩǩõõzz â´lǧǧe čiõlggeed.
10. Cisttlu´vddkå´dd
a. Ǩeâšttõõttmõõžž rä´tǩǩad 10-vuässlažnee´ǩǩi cisttlu´vddkå´dd, koozz kooll õhtt võboršeǩ juõ´ǩǩ kulttuurkõõskõõzz õõ´nniorganisaatiast (õhttse´žže 8 võborše´ǩǩed) di võboršeǩ Senaatt-ǩiiddõõzzin da kulttuurkõõskõõzz arkktehtǩeâštõõttmõõžž vuäittam plaanraajjiä´rttlest.
b. Cisttlu´vddkå´dd va´lljad kõskkstes saaǥǥjåå´đteei da vää´rsaaǥǥjåå´đteei da nõõmad jiõccses piisar.
c. Lu´vddkå´dd vuäitt nõõmted kõskkstes tuâjjvälljkåå´dd. Lu´vddkå´dd da tõn mååžna tuâjjvälljkå´dd vuei´tte taarbše´mmen ââ´nned tuâistes ä´šštobddjid.
11. Ǩeâštõõttâme´tǩǩõõzz ärvstõõlât nõõmitää. Vuõi´ttjen va´lljeet pue´rmõssân nõ´mme pijjum õõlǥtõõzzid tiuddi e´tǩǩõs. Ǩeâšttõõttmõõžž riâššjest lij seârvvna nu´t haa´lee´ld vuõiggâdvuõtt lee´d va´lljeeǩâni vuõi´ttjen ni mõõnn e´tǩǩõõžž.
12. Ciist
a. Vuõ´ttivõboršee´ǩǩ tuejjeei sǩiâŋkat 1 000 eeu´rin. Nu´bben puättam e´tǩǩõs låånat 200 eeu´rin da kuälmeen puättam 100 eeu´rin.
b. Te´l ko mäŋŋsab vuässõõ´tti liâ e´tǩǩõõssâm seämma nõõm, cistt jue´jjet sij kõõsk.
13. Ǩeâšttõõttmõõžž riâšši vuäǯǯ puk vuõiggâdvuõđid kolmmen vuõssmõssân va´lljuum e´tǩǩõ´sse. Riâššjest lij vuõiggâdvuõtt mu´tted le´be lee´d âânǩâni nõõm.
14. Ǩeâšttõõttmõõžž kuõskki kõõččmõõžž â´lǧǧe tuåimted ne´ttpåå´št pääi´ǩ sää´mkulttuurkõõskõsha´ŋǩǩõõžž projektšuu´rmõs Juha Guttorm addrõ´sse Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen. 15.10.2009 čiâss 16.00 mõõnee´st. Vastõõzz kõõččmõõžžid vuõltteet kõõčči i´lmmtum ne´ttpåå´štaddrõ´sse 21.10.2009 mõõnee´st.
Õhttõõzz: Sää´mkulttuurkõõskõõzz arkktehtǩeâštõõttmõõžž programm da ǩeâštõõttmõõžž ärvstõõllâmpå´rddǩe´rjj di mââimõõzz vuõss’snimldõõǥǥ da –piirstõõzz arkktehtǩeâštõõttmõõžž vuäittam ađa –nõmmsaž e´tǩǩõõzzâst |
|
Viimeksi päivitetty ( 08.10.2009 ) |