Snimldõõǥǥin Ruõcc sää´mtee´ǧǧ halltõõzz saaǥǥjåå´đteei Sara Larsson, Taar sää´mtee´ǧǧ vää´rrsaaǥǥjåå´đteei Laila Susanne Vars da Lää´ddjânnam sää´mtee´ǧǧ saaǥǥjåå´đteei Klemetti Näkkäläjärvi. Snimldõõǥǥ: Sára Márjá Magga. 

– Lij rämm luõvted saaǥǥjåå´đtemvuõtt vue´jjest, ko´st sää´mää´šš liâ pue´ttmen jii´jjesnallšem ta´rǩǩeem täävtõssân YK:st, maainsti Ruõcc sää´mtee´ǧǧ saaǥǥjåå´đteei Sara Larsson parlamenttaarla suåvtõõzz såbbrest Ruä´vnjaarǥâst 14.4.

Saa´mi parlamenttaarlaž suåvtõs lij vuâđđuum 2000-lååǥǥ aalǥâst da tõt tuåimmai Tâ´vvjânnamlaž sää´mtee´ǧǧ õhttsažtuâjjorgaanân. Ruõšš sää´m še liâ vuässõõttâm suåvtõõzz tuõjju. Parlamenttaarlaž suåvtõs noorââtt Ruä´vnjaarǥâst da vuäǯǯ kue´ssen YK vuõssnaroodi ooumažvuõiggâdvuõđi spesialteâđteei James Anayan. Spesialteâđteei lij vuõssmõs vuâra ooumažvuõiggâdvuõđriâššâm histoorâst valmšte´men spesialnallšem teâđtõõzz naroodâst, kåå´tt jäälast neellj valdia vuu´dest. Ooumažvuõiggâdvuõtt-teâđtõõzz liâ ääi´jab leämmaž valdia mie´lddsa.

Spesialteâđteei kue´ssreissu kuõskee´l Ruä´vnjaarǥâst riâžžât saa´mi ooumažvuõiggâdvuõđid da jii´jjesvaaldšem teâuddjumuužž ǩiõtt’tõõlli konferenss seärad 15.4. Tâ´vvjânnamlaž sää´mtee´ǧǧ teâđte saa´mi staattus diõtt jiijjâz dommvaldiai beä´lnn. Valdia halltõõzzi võboršee´ǩǩ liâ konfereensest maadârde´men valdiai ǩiõččâmvue´jj da va´stte´men sää´mtee´ǧǧ maadârdum kõõččmõõžžid da saaǥǥstõõllmõõžžid.

Piâtnâc 16.4. še sää´m meerlažõhttsažkå´dd le´be sää´m organisaatiad liâ koččum maadârdet jiijjâz vuei´ne´lmid spesialteâđtejja. Spesialteâđteei kue´ssreissu kuõskki meeraikõskksa konfereens ä´ššen liâ saa´mi jiõččmie´rreemvuõiggâdvuõtt vuõssnaroodân, mädd-, čää´cc- da luâđree´ǧǧesvuõiggâdvuõđ, päärna da nuõr eärben ǩiõl da mätt´tõõzz vuei´ne´lm diõtt di ooumažvuõiggâdvuõttsuåppmõõžži valvvâm da mie´rräiggsažteâđtumuš jee´res valdiain.