- Äi´ǧǧ lij vaalmâš tâ´vvjânnamlaž sää´msuåppmõõžž kuõskki saaǥǥstõõllmõõžži alttumu´šše. Tâ´vvjânnamlaž sää´mtee´ǧǧi saaǥǥjåå´đteei da valdiai sää´maa´ššin va´stteei ministeer noorâ´tte Oslost vue´ssmannu 25. peei´v suåppât saaǥǥstõõllmõõžži äi´ǧǧtaaulâst da mõõntõõllâmvue´jjin.

Snimldõõǥǥin Lää´ddjânnam sää´mtee´ǧǧ vuäzzla Tuomas Aslak Juuso da Asko Länsman di vää´rrsaaǥǥjåå´đteei Erkki Lumisalmi. Snimldõõǥǥ: Sára Márjá Magga. 

– Vuei´ttep rämmšed tõ´st, što sää´msuåppmõõžž kuõskki saaǥǥstõõllmõõžž ä´lǧǧe da ä´šš ouddan, maainsti Taar sää´mtee´ǧǧ vää´rrpresidentt Laila Susanne Vars sää´m parlamenttaarla suåvtõõzz såbbrest Ruä´vnjaarǥâst 14.4.

Sää´m parlamenttaarlaž suåvtõõzz sååbbar priimi õõlmâsceälkkmõõžž tâ´vvjânnamlaž sää´msuåppmõõžž ouddnumuužžâst saaǥǥstõõllâm ä´lggem poodd. Maadârdõs Lää´ddjânnam, Ruõcc ja Taar õhttsaž tâ´vvjânnamlaž sää´msuåppmõžžân valmštõõvi täid valdiaid da sää´mtee´ǧǧ ee´ttkâ´sttem ää´šštobddituâjjä´rttel tuâj äiggavuäǯǯmõžžân ee´jjest 2005. Parlamenttaarlaž suåvtõs ouddlâstt åå´n, što a´lǧǧi saaǥǥstõõllmõõžžid õõlǥči piijjâd põõšši da priimmâmnallšen äi´ǧǧtaull.

Parlamenttaarlaž suåvtõs čiõlggad veâl tõn, što te´l ko sää´msuåppmõš sõõddeš primmum, tõt lij veâl seârvvna peä´l rää´jest nu´tt kuu´ǩǩ ko Ruõšš sä´mmla liâ tõn åålǥbeä´lnn. Parlamenttaarlaž suåvtõs tuärjjad Ruõšš saa´mi ǩiõččlõõttmõõžžid jiijjâz võboršeǩnallšem orgaan vuâđđeem diõtt da ouddlâstt še Lää´ddjânnam, Ruõcc da Taar halltõõzzid tuärjjeet Ruõšš saa´mi ǩiõččlõõttmõõžžid.

Tâ´vvjânnamlaž sää´msuåppmõõžž jurddân lij jm. õhtteed saa´mi vuõiggâdvuõtt-stattuuzz jiijjâz valdiai beä´lnn da nââneed saa´mi vuäittmõõžžid tuåimmjed valdiai raaji pâ´jjel da põõššâd õhttân naroodân.