Sää´mte´ǧǧ reäšš ođđ aanar- da tâ´vvsää´mǩiõllsai abbsi õlmmeempoodd Aanrest Siida auditoriast mââibaarǥ 07.09.2010 čiâss 12.00. Õlmmeempooddâst čuä´jtet ođđ aanarsää´m- da tâ´vvsää´mǩiõllsaid abbsid. Aanarsää´mǩiõllsa ǩee´rtjeei da tâ´vvsää´mǩiõllsa aabbâs ǩiõttǩee´rtjeei, kärt-teei da kue´sttemnalla piijji liâ pääi´ǩ â´lnn da maainte abbsest da tõn valmštõõllâmtuâjast.

Muu aabis, čohčâ

Matti Morottaja ǩee´rjtum da uŋŋarla Daniel Gelencsér kärttuum Muu aabis, čohčâ –čõhččaabbâs lij jurddum 1. klaass čõhččlookkâmpââi aanarsää´m jie´nnǩiõl mätt’temǩe´rjjen. Ǩerjja valmštââvv veâl ǩiđđvuä´ss da mätt’teemǩe´rjj.

Åå´n aanarsää´m ǩiõllpie´sstuåimmjumuužž poddân šõ´dde aanarsää´mǩiõllsa klaass, leäi ju´n taarbi mie´lddsaž äi´ǧǧ raajjâd še mätt´tem-materiaalid jie´nnǩiõl alggmätt’tõõttâm diõtt. Ääi´jben rajjum mätt´tem-materiaal le´jje ǩee´rjtemvue´jj beä´lnn vuämmnam, tõid jeät vuei´ttum teänab ââ´nned mätt’temtuâjast. Matti Morottaja ǩiõttǩee´rjtemtuâj šõddmõõžžâst čõõđtet åå´n digitaalteädldõkkân Muu aabbâs, čõhčč-ǩe´rjj.

Aanarsää´m abbâz liâ õčndõõttâm hää´rveld: vuõssmõs aanarsää´m aabbâs lij ceerkavšurr Edvard Wilhem Borgi tuåimmtum Anar sämi kiela aapis ǩe´rjj, koon teä´ddeš Oulust ee´jjest 1857. Ǩee´rjest va´lddeš pâ´jjel 100 ee´ǩǩed mâŋŋa oođuumteädldõõǥǥ ee´jjest 1983. Ee´jjest 1990 očndõõđi aanarsäämas tâ´vvsää´mǩiõlâst jåårǥlõttum Aabis 2-ǩiđđaabbâs.

Áppes – Min meahci máidnasat

Samai čõhččmannu alggpeei´vin vuäǯǯap teädldõõǥǥâst Inga Guttorm ǩee´rjtum da Salli Parikka kärttuum Áppes – Min meahci máidnasat - abbâz. Ǩee´rj kue´sttemnalla piijjmõõžžâst va´sttad Minna Saastamoinen. Ǩerjja valmštââvv škooulekka ee´jjest 2011 lââ´ssen mätt’teemǩe´rjj.

Ǩiõttǩee´rjteei Inga Guttorm lij vue´llškooul u´čtee´l, kåå´tt lij tuõjjstõõllâm ee´jjid sää´mǩiõllsa alggmät´tõõzz beä´lnn Uccjooǥǥâst. Ǩee´rj kärtteei, Salli Parikka (Wahlberg), lij kärttääm määŋgaid pärnaid da nuõrid jurddum ǩee´rjid (www.salliparikka.com). Kue´sttemnalla piijji Minna Saastamoinen lij sää´mǩiõl siltteejan kää´zzkâsttam mätt’temǩe´rjjma´hssjid lââ´ssen Taarrâst.

Oou´dbuž Áppes 1 da 2 –aabbâs čõõđtes Lää´ddjânnmest 1980 –lååǥǥast. .

Nuõrttsää´mǩiõl aabbâstuâjj lij alttuum

Tän ǩiiđ lij alttuum še nuõrttsää´mǩiõllsa abbâz ǩiõttǩee´rjtemtuâjj.Tiina Sanila-Aikio lij valmštõõllâm ǩiõttǩe´rjtõõzz da tuâj valmmša vuäǯǯam äi´ǧǧ le´čči loppee´jjest. Nuõrttsää´m ǩiõllpie´sstuåimmjumuužž šõddmõõžžâst lij vue´rddemnalla, što ođđ vuõssklassnee´ǩǩ liâ pue´ttmen čâhčča 2011 nuõrttsää´mǩiõl mätt’tõ´sse. Täävtõssân lij vuäǯǯad aabbâs vuõssklassnee´ǩǩi âânnmõ´šše.

Õlmmeempodd lij pukid äävai, ǩeäk peerste abbsin. Media diõtt lij va´rrjum vuäittmõš tuejjeet kõõččmõõžžid raajj’jid da mahssja. Õlmmeempoodd lij kaa´fstõõllmõš.

Hannu Kangasniemi, mätt’tem-materialpiizar

Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen. , 010-839 3115

Lââ´ssteâđaid: www.samediggi.fi > Čõõđtumuužž > mätt’temaunnâz