Tâ´vvjânnamlaž sää´msuåppmõõžž valmstõõllmõš da ouddnumuš lij leämmaž ku´ǩes prosess da tõt lij valmštõllum tâ´vvjânnamlaž ä´šštobddiä´rttlest kolmm ee´jj. Suåppmõšvuõssǩee´rjtõõzz mâŋŋa ouddmõõžž ee´jjest 2005 tâ´vvjânnamlaž sää´msuåppmõõžž ooudâsviikkmõš puuđi valdiai kõskksaž õhttsažtuâjast määŋg eeǥǥas. Åå´n saaǥǥstõõllâm suåppmõõžž priimmâm diõtt ä´lǧǧe Ruõcc, Lää´ddjânnam da Taar valdiai da sää´mtee´ǧǧ õhttsažtuâjjan ee´jjest 2011 ää´ljee´l. Tän tu´mmješ Ruõcc, Lää´ddjânnam da Taar sää´maa´ššin vastee´ji ministeerji da kõõččmõõžžâst åårrai jânnmi sää´mtee´ǧǧ presideenti õhttsažsåbbrest tä´bbe 22.11.2010 Tukholmast.

Tâ´vvjânnamlaž sää´msuåppmõõžž priimm’mõš lij suåppum viikkâd tu´mmstõ´ǩǩe viiđ ee´jj sizz. Sää´mtee´ǧǧ liâ tuäivvam, što saaǥǥstõõllmõõžž vuäitčeš jie´lled sõõrǥab äi´ǧǧtaaulin, leša vääžnmõš lij ää´šš ouddnumuš. Saaǥǥstõõllmõõžž liâ vuârddmõõžžâst vä´ǯǯlõs. Suåppmõš le´čči histoorlaž da tõn priimm’mõš miârkkšõõvvči maai´lm vuõssmõš valdiasuåppmõõžž šõddmõõžž, koon jurddân lij pue´reed määŋg valdia vuu´dest jälsteei vuõssnarood, saa´mi staattuuzz.

Ruõcc, Lää´ddjânnam da Taar Sää´mtee´ǧǧ di Ruõšš saa´mi õhttsažtuâjjorgan, Saa´mi Parlamentaarlaž Suåvtõs (SPN), vuârdd tâ´vvjânnamlaž sää´msuåppmõõžž ooudâsviikkâd saa´mi raajid pâ´jjel mõõnni õhttsažtuâj veâl pue´rab årra, lââ´zztee´l saa´mi õ´httekuullmõõžž da raajjâd SPN:st saa´mi õhttsaž pââimõs võboršeǩǩnallšem orgaan jiijjâz-i vaaldšemraajõõzzin. Hå´t sää´mtee´ǧǧ liâ tâ´vvjânnamlaž sää´msuåppmõõžž priimmânsaaǥǥstõõllmõõžžin bie´ǩǩen valdiai ee´ttkâ´sttõõzz, saa´mi jiõnn lij õhttsaž. SPN saaǥǥstââll õhttân vu´vdden tâ´vvjânnamlaž sää´msuåppmõõžž priimmâm diõtt. SPN ouddlâstt, što tâ´vvjânnamlaž sää´msuåppmõš saaǥǥstõõlât obbvuõđstes da puk suåppâmvuõssǩee´rjtõõzz stannum vuõiggâdvuõđ teâuddje.

Ruõcc sää´mtee´ǧǧ halltõõzz saaǥǥjåå´đteei Ingrid Inga särnn, što lij pue´rr kuullâd, što kolmm sää´mtee´ǧǧ vuässâ´tte tää´ssärvvsen vuä´sspie´llen saaǧǧstõõllmõõžžin tâ´vvjânnamlaž sää´msuåppmõõžžâst. Vue´lǧǧep tõ´st, što Sää´mtee´ǧǧ oudldõõzz vuässõõttâd saaǥǥstõõllmõõžžid staaneet kõõččmõõžžin åårrai valdiai tuåimest. Tõt ä´šš što saaǥǥstõõllmõõžž â´lǧǧe puuttâd viiđ ee´jj se´st, miârkksââvv še, što Ruõcc tän ee´jj äi´ǧǧen vuäitt i´lmmted, što jordd ravveed da staaneed saa´mi vuõiggâdvuõđ jiõččmie´rrummu´šše da jânnmi da čaa´ʒʒi da luâttree´ǧǧesvuõđi vaaldšumu´šše meeraikõskksaž vuõiggâdvuõđ vuâđđjurddji mie´lddsânji.

Lää´ddjânnam sää´mtee´ǧǧ saaǥǥjåå´đteei Klemetti Näkkäläjärvi särnn, što sää´mtegga saaǥǥstõõllmõõžž tâ´vvjânnamlaž sää´msuåppmõõžž primm’mõš lij aaibâs vääžnai, tõ´nt ko Lää´ddjânnam joudd tâ´vvjânnamlaž sää´msuåppmõõžž pääi´ǩ staaneed sää´mjie´llemvue´jji da –kulttuur suõi veâl pue´rbuben, rä´tǩǩeed saa´mi vuõiggâdvuõđid jânnma da čäcca di staaneed sää´mtegga ri´jttjeei resuursid tuåimmjed. Lää´ddjânnam valdia lij piijjâm mäŋggsab lååi ee´jj ääi´j täävtõssân vuäǯǯad meersaž rä´tǩǩumuš saa´mi mädd- da čää´ccvuõiggâdvuõđin, leša rä´tǩǩem ooccmõš i´lla veâl ni alttuum. Lää´ddjânnam ij vuei´t teänab lõõmmâd meersaž rä´tǩǩeem ooccmõõžž tuâkka. Lää´ddjânnam valdia âlgg rä´tǩǩeed saa´mi mä´dd- da čää´ccvuõigâdvuõđid mââimõõžžâst bie´ǩǩen tâ´vvjânnamlaž sää´msuåppmõõžž, â´te viiđ ee´jj sizz.

Taar sää´mtee´ǧǧ presidentt Egil Olli särnn, što lij kuärǥast tõ´st, što saaǥǥstõõllmõõžž peä´sse åå´n ä´lǧǧed.”Mâ´te tie´ttep, što liâ leämmaž mõõn-ne vee´rd jee´resmiõllsažvuõđ saaǥǥstõõllâmplaanâst, jeärben Taarrâst, leša ko mij åå´n tie´ttep, što Lää´ddjânnam da Ruõcc sää´mtee´ǧǧ da tõõi jânnmi halltõõzzi kõõskâst lij õhttmiõllsažvuõtt, nu´tt alttumuš ij vuäǯǯ lee´d Taarrâst ǩidd. Hää´lääm ââ´nned tän poodd äu´ǩǩen ǩei´ttad Lää´ddjânnam da Ruõcc tän poddsaž šiõǥǥ proseezzâst. Da vuârdam ää´lšest, što ä´lǧǧep tuejjeed tuâj tän histoorlaž ää´šš pirr, le´be nu´tt, što vuäǯǯap äigga sää´msuåppmõõžž kolmmen jânnmest, ko´st jälstep”, juä´tkk Egil Olli.

Ingrid Inga Klemetti Näkkäläjärvi Egil Olli       Ruõcc sää´mte´ǧǧ Lää´ddjânnam sää´mte´ǧǧ Taar sää´mte´ǧǧ 070 – 773 7762 +358 50 5242109 +47 78 47 40 00