Čõõđtum ikkni sää´vesǩ plaaneemǩeâšttõõttmõõžžin o´cceš sää´mkultturkõõskõs Sajos põ´rtte šiõǥǥšlajjsaž da mooccâd, põõrt ju´rddemvue´jj mie´lddsa tobddmõõžž da sää´mvuõđ pu´htti unikk sää´vesǩaaunâsheä´rvv (printtheä´rvv), kåå´tt tobddai da rääjj põõrt sii´sǩbeälla jiijjâsnallšemvuõđ. Sää´vesǩhie´rv le´be – hie´rvi mie´ldd puõ´tti Sajos luândd da saa´mi jiijjâsnallšemvuõtt âlgg tobddjed da čuõvted puõ´ttiäigga Sajos miârkktõõzz da tuäimmjumuužž. Sää´vesǩ liâ plaanuum konttâr ikknid.

Plaaneemǩeâšttõõttmõõžž čõõđteš tä´lvv- da pâ´zzlâšttammannust 2011 da ǩeâšttõõttmõõžžid le´jje vuässõõttâm õhttse´žže 31 printthie´rv plaaneei. Cisttlu´vddkåå´ddest le´jje Sajos õõnniorgansaatiain nårrjam õhttsažtuåimmjemorgan da arkktehttkonttrest võboršeǩ da sij pri´mme ärvstõõllâm diõtt puättam 30 printtheä´rvved. Lu´vddkå´dd heelǥii õõut (1) ǩeâšttõõttâmehdtõõzz, tõn diõtt ko tõt leäi tuåimtum lu´vddkådda ǩeâšttõõttâm šeâttmõõžži vuâsttsânji.

Tää´rǩes ärvvtõõllmõõžž äiggavuäǯǯmõššân cisttlu´vddkå´dd tu´mmji õõutmiõ´lle čõõđted kue´htt printthie´rv, kook le´jje nõmmtiõđi tue´ǩǩen ”Eloa ikkunassa” da ”Riskuna” nu´tt täk printthie´rv šõ´dde plaaneemǩeâšttõõttmõõžž vuõi´ttjen da šeâttmõõžži mie´lddsânji täid låånat á 500 eu´rred tuâjj. Ǩeâšttõõttmõõžži mie´ldd cisttlu´vddkå´dd va´lljii kue´htt (2) printthie´rv, kook õõlǥtõõzzi mie´ldd tiu´dde pue´rmõssân ehdtõõzz låånnam diõtt. See´st leäi šeâttmõõžži mie´ldd vuõiggâdvuõtt heelǥeed puk ehdtõõzzid le´be låånnad tå´lǩ õhtt tuâjj.

Cisttlu´vddkå´dd tu´mmji siâssõõllâd, što heä´rvvehdtõõzz ”Eloa ikkunassa” puä´đet ââ´nnet 1. riâdd ikknin da ehdtõõzz ”Riskuna” 2. da 3. riâdd ikknid.