Sää´mte´ǧǧ reäšš seminaar He´lssnest, koon teemmen lij sää´m- da maorǩiõl jeälltumuš da veâhssumuš. Seminaar ju´rddmõššân lij lee´d bie´ǩǩ mätt’tõs- da kultturministeria altteem sää´mǩiõl jeälltemprograamm da tuärjjeed tõn plaanumuužž da čõõđtumuužž. Ju´n alttuum jeälltemprograamm täävtõssân lij ooudâsviikkâd da ooudâsjuä´tǩǩed sää´mǩiõl di maaccted mååusat sää´mǩiõl sä´mmlaid, kook liâ tõn mõõntam di tuejjeed ǩiõlâst sää´mõhttsažkåå´dd kuõ´ddi ǩiõll.

Seminaar sää´m da maorǩiõl jeäll’tumuužžâst riâžžât He´lssnest 13.9. čiâss 9.00 – 15.00. Seminaar ââ´nnempäi´ǩǩ vaajtââvv Ee´ttiǩkåå´dd u´ccparlamentta. Jåå´ttemaddrõs lij Arkadiankatu 3. Seminaa´re âlgg i´lmmtõõttâd 7.9. mõõnee´st. Sää´mǩiõl da maorǩiõl jeälltumuš -seminar programm 13.9.2011.

Seminaar õhttân ju´rddmõššân lij teâđted sää´mtee´ǧǧ täävtõõzzin da tuåimin seeilted da ooudâs- viikkâd sää´mǩiõl di ooudâsjuä´tǩǩed tõn jie´llemviõkkvuõđ. Täävtõssân lij še pu´htted ou´dde positiivlaž maall Ođđ Seelaantâst jälsteei alggmeer, maornee´ǩǩi ǩiõl jeälltem- da veâhsseemtuåimin. Maorǩiõll vuäǯǯai veerjlaž staattuuzz ouddâl sää´mǩiõl ee´jjest 1987. Maornee´ǩǩi ǩiõllpie´ss da jee´res jeälltemha´ŋǩǩõõzz liâ vuäǯǯam pirr maai´lm šiõǥǥ maacctõõzzid da slääv ǩiõlltuâi o´nnstem äiggavuäǯǯmõõžžeezvui´m. Tõn diõtt lij vääžnmõs äi´ǧǧ vuäǯǯad kuullâd maornee´ǩǩi jiijjâz maainstumužžân maorǩiõl ođđsumuš ha´ŋǩõõzzâst da ânn’jõžäiggsaž teknologii âânnmõõžžâst maorǩiõl jeälltem diõtt. Seminaarâst kuulât še sää´mǩiõli mâ´te aanarsää´mǩiõl jeälltemha´ŋǩǩõõzzin da tõi äiggavuäǯǯmõõžžin.

Tän seminaarâst sää´mte´ǧǧ tätt še vuäǯǯad mie´ldd da sme´llkâ´tted jee´res kruuggid tuõjstõõllâd sää´mǩiõl nââneem diõtt. Seämmast lij vuäittmõš saaǥǥstõõllâd sää´mǩiõl da kulttuur puõ´ttiääi´j ooudâsviikkâmvuäittmõõžžin. Sää´mte´ǧǧ tätt staaneed sää´mǩiõl puõ´ttiääi´j nu´tt sä´mmlai dommvuu´dest ko še tõn åålǥbeä´lnn.

 Lää´ddjânnmest maainstet kolmm sää´mǩiõl, tâ´vv-, aanar- da nuõrttsää´mǩiõl. Puk sää´mǩiõl ko´lle vaarvuâlaž kiõli jou´ǩǩe. Jõs sää´mǩiõl läppje, läppai še seämmanalla ko´rvveete´mes vuä´ss kulttuurâst da luõttu kuulli ää´rbvuâlaž teâtt, tõnnalla ǩiõll, kulttur da luâtt ko´lle kõskkneez õ´htte.

Seminaa´re âlgg i´lmmtõõttâd 7.9. mõõnee´st:
ǩiõllstaanpiizar siiri.jomppanen(at)samediggi.fi, puh 010 839 3111 le´be
vs. ǩiõllaa´ššipiisar outi.paadar(at)samediggi.fi, puh 010 839 3119

Lââ´ssteâđaid:

Sää´mtee´ǧǧ I vää´rsaaǥǥjåå´đteei Irja-Seurujärvi-Kari irja.seurujarvi-kari(at)helsinki.fi

le´be
ǩiõllstaanpiizar Siiri Jomppanen siiri.jomppanen(at)samediggi.fi