SáFá –ouddčiõ´lǧǧeemha´ŋǩǩõs õhttsažtâ´vvjânnmlâž sää´mǩiõl tu´tǩǩeem- da ämmat/resursskõõskõõzz altteem diõtt Sää´m parlamentaarlaž suåvtõõzz siâssmõõžžâst Lää´ddjânnam, Taarr da Ruõcc sää´mtee´ǧǧ liâ alttääm ee´jj 2011 aalǥâst Interreg -teäggtemvuâlaž SáFá -ouddčiõ´lǧǧeemha´ŋǩǩõõzz da tän alttõõzz jurddân lij õhttsažtâ´vvjânnmlâž sää´mǩiõl tu´tǩǩeem- da ämmat/resursskõõskõõzz aalǥtumuš.

Tue´ǩǩen lij sää´mǩiõl ooudâsviikkmõš da lâssnam ǩe´rjjlaž âânnmõš, kåå´tt lij šõddääm ǩiõl huõl, ooudâsviikkmõõžž, tu´tǩǩumuužž di normmeemtuâi taarb pukin sää´mǩiõlin. Näkam õhttsaž sää´m ǩiõllkõõskõs, koozz puä´đet noorrâd sää´mǩiõl kääzzkõõzzid, tõt veä´ǩǩte´či teâđai ooccmõõžžâst. Lââ´ssen ǩiõllkõõskõs ravve´či sää´mǩiõli kõskksaž saakkumuužž da õhttsažtuâi. Kõõskõõzz tuâi le´čči jee´rbi mie´ldd ǩiõlltu´tǩǩumuš, ǩiõllhuõll, ǩiõlooudâsviikkmõš, terminologiituâjj, normm’mumuš, nõmmõskääzzkõs, pääi´ǩnõmmõs da teâđtemtuåimmjumuš sää´m ǩiõllämmatlaž kõjldõõzzin.

Ha´ŋǩǩõsäi´ǧǧ lij 6 mannu da ha´ŋǩǩõõzz mie´rräiggsaž projektšuurmõssân pa´lǩǩeeš hum.kand. Hanna Mattila ää´ljee´l 28.3.2011. SáFá ouddčiõ´lǧǧeemha´ŋǩǩõõzz ju´rddmõššân lij čiõlggeed ǩiõllkõõskõõzz altteem- da teäggtemoudldõõzzid. Täävtõssân lij raajjâd čiõlǥtõs õhttsažtâ´vvjânnmlâž sää´mǩiõl tu´tǩǩeem- da ämmat/resursskõõskõõzz altteem diõtt da raajjâd Interreg –juätkkteäggtemooccmõš kõõskõõzz ǩiõččlõddâmha´ŋǩǩõõzz diõtt. Ouddčiõ´lǧǧeemha´ŋǩǩõõzz obb-budjett lij 45 385 € da vä´lddteäggteei liâ Interreg IV A Tâ´vv, Troms fylkeskommune, Länsstyrelsen Norrbotten da Taarr sää´mte´ǧǧ.

Interreg IV A Tâ´vv lij EU-programm, koin tuärjjeet pâ´jjel raaji mõõnni õhttsažtuâi programmpââ´jest 2007–2013. Prograamm täävtõssân lij vä´lddkåå´dd pâ´jjel raaji mõõnni õhttsažtuâi pääi´ǩ tuärjjeed ekonomiilaž da sosiaalaž ooudâsviikkmõõžž da staaneed ǩeâšttõõttâmooddid da õ´httekuullmõõžž programmvuu´dest. Programm fi´ttjâtt Tâ´vv-Ruõcc, Tâ´vv-Lää´ddjânnam da Tâ´vv-Taarr di Sää´mvuu´did. Programm teäggat pâ´jjel raaji mõõnni ha´ŋǩǩõõzzid nelljen jee´res prioriteettvuu´dest, koin SáFá -ouddčiõ´lǧǧeemha´ŋǩǩõs kooll vuä´ssprogra´mme 4. Raaite´mes ooudâsviikkmõš – Sää´mjânnam. Interreg IV A Tâ´vv prograamm vaaldšemve´rǧǧne´ǩǩen tän programmpââ´jest tuåimmai Norrbotten läänhalltõs.

Lââ´ssteâđaid:

SáFá -ouddčiõ´lǧǧeemha´ŋǩǩõõzz mä. projektšuurmõs Hanna Mattila Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen.

sää´m vs. ǩiõllaa´ššipiizar Outi Paadar Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen.

SáFá -förstudieprojekt