Saa´min lij ǩiõlddum čue´đee´jji mââiårra jiõččmeä´rreemvuõiggâdvuõtt di vuõiggâdvuõtt maddu di čäcca. Sä´mmlain liâ veâl määŋgas nåkam vue´jjest, kook jiâ vuei´t ââ´nned ooumažvuõiggâdvuõđeez da to´bdde ouddkä´ddmõõžžid da rasii´sm, da Tâ´vvjânnmlaž saa´min liâ õhttsaž tobddmõõžž serddaazztumuužžâst da čårstumuužžâst, kook liâ valdiai ââ´nnem politiikk seu´rrjõõzz. Åå´n leä´p nåkam vue´jj ooudâst, ko´st saa´mi ǩiõll, kulttur da jie´llemvue´ǩǩ liâ lä´ppje´mmen.

Lää´ddjânnam, Ruõcc da Taarr kõskksaž tâ´vvjânnmlaž sää´msuåppmõõžžâst jeä´let saaǥǥstõõllmõõžžid. Jurddân lij, što suåppmõõžžâst meä´rtet da tõin staanât vuõiggâdvuõđ, kook saa´min liâ meeraikõskksaž vuõiggâdvuõđ mie´lddlânji. Tõ´st toobdstet saa´mi vuõiggâdvuõđid alggmeeran, da tõn vue´lǧǧemalggân lij jorddmõš tõ´st, što saa´mi vuõiggâdvuõđ mâ´nne täi koolm jânnam meersaž ouddõõzzi ou´dde. ÕM:i alggmeerai (vuõiggâdvuõđi) James Anaya muštt’tad tõn, što lij vääžnai, ko sää´mtee´ǧǧ vuässâ´tte ǩiõtt’tõõllmõõžžâst åårrai tuõjju da što Lää´ddjânnam, Ruõcc da Taarr radifiiâ´dde suåppmõõžž.  

Õõlǥtep politiikk, koon vue´lǧǧemalggân liâ saa´mi vuõiggâdvuõđ alggmeeran da kåå´tt čorrnââvv ânn´jõž čårsteei raajõõzzin. Tõnnalla valdia vuäitt staanâd saa´mi ǩiõli, kulttuuri da jie´llemvue´jji seillmõõžž da ooudâsviikkmõõžž meeraivuõiggâdvuõđi mie´lddlânji. Ǩiččâp, što tâ´vvjânnmlaž sää´msuåppmõõžž radifiimõš vuäitt ooudâsviikkâd ođđ riâššmõõžž, ko´st saa´min lij vuäittmõš vuässõõttâd da vaikkted tu´mmstõktuõjju si´jjid kuõskki aa´ššin da pukin Tâ´vvjânnmlaž taa´zzin.  

 Tâ´vvjânnmlaž sää´msuåppmõõžž radifiimõš lij vääžnai podd, jåå´đted tät jått’tum ä´šš ooudårra. Muštt’tep tä´bbe koolm Tâ´vvjânnmlaž saaǥǥstõõllâmparlameentid čuä´jtum õhttsaž ǩee´rjtumuužžâst, što mä´htt da mõõn vääžnai lij radifiiâd suåppmõšte´kstt, koin staanât saa´mi ooumažvuõiggâdvuõđid. Muštt’tep veâl tõn, što mõ´nt lij vääžnai viikkâd saaǥǥstõõllmõõžžid ooddeld ooudårra, što vuei´tet põõššâd i´lmmtum viiđ ee´jj äi´ǧǧtaaulâst.

 Egil Olli

Taarr sää´mtee´ǧǧ saaǥǥjåå´đteei

Klemetti Näkkäläjärvi

Lää´djânnam sää´mtee´ǧǧ saaǥǥjåå´đteei

Sara Larsson

Ruõcc sää´mtee´ǧǧ saaǥǥjåå´đteei

Susanne Nour

Daansk ooumažvuõiggâdvuõttinstituutt tää´ssärvvjuâkkaz jåå´đteei

Eva Biaudet

Lää´ddjânnam minoritettåskkooumaž

Pirkko Mäkinen

Lää´ddjânnam tää´ssärvvåskkooumaž

Kristina Winther Poulsen

Tää´ssärvvåskkooumaž Fäärsaaret

Poul Hansen

Ruânnjânnam tää´ssärvvsuåvtõõzz saaǥǥjåå´đteei

Kristín Ástgeirsdóttir

Islaand tää´ssä´rvvkõõskõõzz jåå´đteei

Sunniva Ørstavik Taarr

tää´ssä´rvv- da minoritettåskkooumaž

Agneta Broberg

Ruõcc čårstemåskkooumaž

Veronica Larpes-Papadopoulou

Ahvenanmaa čårstemä´ššooumaž