Sää´mte´ǧǧ veekk ooudâs parlamentnee´ǩǩi čõõđtumuužži teâuđđjumuužž tâ´vvjânnmlaž sää´msuåpmõõžž juä´tkksaaǥǥstõõllmõõžžin. Sää´m parlamentaarlaž suåvtõs riâžži kuämad sää´mparlamentnee´ǩǩi konfereenss Ǩeârkknjaarǥâst 10. skamm-mannu 10. peei´v 2011. Sää´mparlamentnee´ǩǩi konferenss noori õ´htte sää´mtee´ǧǧivui´m va´lljuum vuä´sslaid da Ruõšš saa´mi võboršee´ǩǩid. Konfereenss teemmen le´jje ää´rbvuâlaž teâtt da aartklaž ää´šš. Lââ´ssen ta´rǩǩeeš tâ´vvjânnmlaž sää´msuåppmõõžž da ärvvtõ´lleš ooudbuž parlamentnee´ǩǩi konfereenssi čõõđtõõzzi äiggavuäǯǯmõõžžid. Konfereenss looppâst primmeš sää´mparlamentnee´ǩǩi õhttsaž Ǩeârkknjaarǥ čõõđtõõzz.

Tâ´vvjânnmlaž sää´msuåppmõš ouddan

Sää´mtee´ǧǧ saaǥǥjåå´đteei Klemetti Näkkäläjärvi peäggat mõõnni saaǥǥjåå´đtempââi da saa´mi õhttsažtuâi, što tõk liâ miârkkšõõvvi ooudâsviikkâmlääu´ǩ, jeä´rben tâ´vvjânnmlaž sää´msuåppmõõžž juä´tǩǩsaaǥǥstõõllmõõžži älggmõõžžâst. - Čõõđtumuužži teâuddjumuš lij ra´vvsânji čõnnsest sää´mtee´ǧǧ resuurssid da valdiai tättmõ´šše ooudâsviikkâd saa´mi vuõiggâdvuõđid. Sää´mtee´ǧǧ vekka ooudâs čõõđtumuužži teâuddjumuužž tâ´vvjânnmlaž sää´msuåppmõõžž juä´tǩǩsaaǥǥstõõllmõõžžin, juätkk Näkkäläjäu´rr.

Näkkäläjäu´rr gåårâ´tt tõn, što sää´m patlamentaarlaž suåvtõõzz tuåimmjumuužž lij vaigg’gâttam resurssvää´nn. - Sää´m parlamentaarlaž suåvtõõzzâst ij vuäǯǯ šõddâd tå´lǩ saaǥǥstõõllâmsie´br, a taarbšep čõnnõttmõõžž, õhttsaž piizarkåå´dd da sää´mtee´ǧǧ vaaldšeemid põõššinallšem õhttsažtuâi patlamentaarlaž suåvtõõzz tu´mmstõõǥǥi tuåimmepiijjmõ´šše da še såbbri valmštõõllâm diõtt, muštt’tat Näkkäläjäu´rr.

Looǥ Klemetti Näkkäläjääu´r mainnâz obbvuõđstes Sää´mparlamentnee´ǩǩi konfereenssi čõõđtõõzz teâddjumuužžâst (lääddas da tâ´vvsäämas)

Saa´mi kultturpreddan suõ´jjumu´šše taarbšet õhttsaž vuâđđjurddjid

Näkkäläjäu´rr rämmaš tõ´st, što saa´mi ää´rbvuâlaž teâtt da tõn suõ´jjumuužž liâ kaggõõttâm mõõnni ääi´jin raa´veld ou´dde sää´m õhttsažkåå´ddest. Sää´m parlamentaarlaž suåvtõõzzin da sää´mtee´ǧǧin õõlǥči lââ´zzted vaikktõõzzid tuâjes ää´rbvuâlaž teâđ suõ´jjeem diõtt. – Taarbšep õhttsaž vuâđđjurddjid mä´htt sää´m kultturpreddan âlgg suõ´jjeed da eettlaž vuâđđjurddid suõ´jjeetd sää´mkulttuur, što vââi´čep tuåimmjed õõutsââ´jest åålǥbeä´lnn puõ´tti vaar vuâstta, tuâtt Näkkäläjäu´rr.

Looǥ Klemetti Näkkäläjääu´r mainnâz obbvuõđstes konfereensâst 10.11.2011: Ää´rbvuâlaž teâđ suõ´jjeem tuâi (lääddas da tâ´vvsäämas)

Ruõšš sää´m tiuddmie´reld vuä´ssli´žžen mie´ldd tuåimmjumu´šše

Näkkäläjääu´r miõlâst puõ´tti Sää´m parlamentaarlaž suåvtõõzz tuåimmpââjest fe´rttai aainâs vä´ldded lokku Ruõšš saa´mi staattuuzz staanmõš, što Ruõ´šš saa´mi staattus puârne´či. – Mee´st fe´rttai u´vdded tuärjjõs Ruõšš saa´mid, što sij vue´itte ooudâsviikkâd jiijjâz võboršee´ǩǩnallšem organisaatiaz Ruõ´šše da pue´tted tiuddmie´reld mie´ldd SPS:zz tuåimmjumu´šše, tuâtt Näkkäläjäu´rr. Vuõssmõs sää´mparlamentaarnee´ǩǩi sååbbar rie´ššeš Ruõcc Jokkmokist tä´lvvmannu 24. peei´v 2005. Nuu´bb sää´mparlamentnee´ǩǩi sååbbar rie´ššeš Ruä´vnjaarǥâst kålggmannu 29. peei´v ee´jjest 2008. Sää´m parlamentaarlaž suåvtõs lij vuâđđuum 2000-lååǥǥ aalǥâst da tõt tuåimmai Tâ´vvjânnmlaž sää´mtee´ǧǧi õhttsažtuâjjorgannân. Ruõšš sää´m še vuässâ´tte suåvtõõzz tuõjju.

Lââ´ssteâđaid Lää´ddjânnam beä´lnn

Sää´mtee´ǧǧ saaǥǥjåå´đteei Klemetti Näkkäläjäu´rr

klemetti.nakkalajarvi(at)samediggi.fi