Tuâjj-joukk e´tǩǩõs sää´mǩiõl jeälltem tuåimmtuâjjprogrammân käunnai tä´st.

Mätt’tõs- da kultturministeria 2.3.2012:

Tuâjj-joukk e´tǩǩad sää´mǩiõl jeälltem diõtt määŋgbeällsaž tuåimmtuâjaid

Sää´mǩiõli ânn’jõžvue´jj da jeälltumuužž smiõttâm tuâjj-joouk mie´ldd puk kolmm lää´ddjânnmest mainstum sää´mǩiõl – tâ´vvsää´mǩiõll, aanarsää´mǩiõll da nuõrttsää´mǩiõll- liâ vaarvuâlaž. Tuâjj-joouk mie´ldd sää´mǩiõl jeälltumuš ooudald määŋgaid tuåimmtuâjaid. Tuâjj-joouk vääžnmõš tuâjjan leäi smiõttâd ri´jttjeei sää´mǩiõl da sää´mǩiõllsaž mätt’tem da pei´vvhååid staanumuužž ânn’jõžvue´jj mie´ldd, da jee´res vuu´di põ´stti da sää´mǩiõl maainstee´ji ämmat-tuâjjlai vää´nnvuõđ da sä´mmlai meädda vuâlggmõõžž dommvuu´dstes, kook liâ vaikktam miârkkšõõvee´l sää´mǩiõli luânddlaž ǩiõllââ´nnempirrõõzzi occnumu´šše. Tuâjj-joukk uu´di e´tǩǩõõzzes piâtnâc pâ´zzlâšttam-mannu 2. peei´v da e´tǩǩõõzz vuâsttava´lddjen le´jje mätt’t õsminister Jukka Gustafsson ja kulttur- da sporttminister Paavo Arhinmäki.

Sää´mǩiõl jeällten diõtt tuâjj-joukk e´tǩǩad jee´rbi mie´ldd, što ǩiõllpie´zztuåimmjumuš puä´đči lee´d põõššinallšem da tõn tuåimmjumuš õõlǥči veiddeed. Ǩiõllpie´ss lij ǩiõll’laž minoritettnee´ǩǩid le´be alggmeeraid jurddum tuåimmjumuš, ko´st puk tuåimmjumuš âlgg lee´d tå´lǩ kõõččmõõžžâst åårrai meersažǩiõlin, hå´t vuässõõtti jiâ siltte´či mainsted ǩiõl ni võõ´ps. Lââ´ssen âlgg kõskkeed sää´mǩiõllsaž pei´vvhååid tarjjumu´šše lää´jj oudldemnalla, ko tõ´st jåått mie´ldd vääžnai sää´mǩiõl jeälltem da kulttuur jie´llemviõkksaž tuâi kaggmõš da ravvumuš. Tuâjj-joouk mie´ldd âlgg ooudâs viikkâd sää´mǩiõl mätt’tõõzz obb jânnmest da jeä´need sää´mǩiõl mainstee´ji da põ´stti vuõsspeâmmam- da mätt’tempersonkoo´ddi meä´r.

Tuâjj-joouk mie´ldd sää´m ǩiõll-lää´jj teâddjumuš tiuddmie´reld ooudald ve´rǧǧnee´ǩǩi sää´mǩiõl ââ´nnem lââ´zztumuužž, jeä´rben saa´mi dommvuu´dest. Lââ´ssen tuâjj-joukk e´tǩǩad sää´mǩiõllsaž radia-, tv- da interne´tt-siiskai ta´rjjeem lââ´zztumuužž, ânn’jõõžžâst veâl jäänab, da sää´m ǩiõllhuõl, ruõkkmõõžž da tu´tǩǩumuužž ooudâs viikkmõõžž di sää´mčie´pp da kulttuur tuärjjõõzz lââ´zztumuužž. Saa´mi dommvuu´d lââ´ssen lij vääžnai kõskkeed ǩiõl tuä´rjjeem tuåimmtuâjaid še jânnam jee´res paai´ǩid, ko´st meä´r mie´ldd jäänmõs saa´min ânn’jõõžžâst jäälast.

Vaarvuâlaž ǩiõl, koin lij lä´ppjemvaarr puõ´ttiääi´jest liâ nuõrttsää´mǩiõll da aanarsää´mǩiõll. Sää´mǩiõlin jeälltemvue´jj vue´lnn åårrai nuõrttsää´mǩiõll, lij võõ´ps lä´ppje´mmen. Tuâjj-joukk e´tǩǩad spesialtuåimmtuâjaid ǩiõl jeälltem diõtt, štõ ǩiõl âânnmõš, mainsteei mie´rr da mättjumuš lâssneškuâ´đče.

Tuâjj-joouk valmštõõlli tuåimmtuâjjprogramm âânn se´st sää´mǩiõl jeälltem arvvlõõžž Lää´ddjânnmest mainstum sää´mǩiõli ânn’jõžvue´jjest, ǩiõl seillmõõžž da ooudâs viikkâm vääžnmõs tuâjaid, visio sää´mǩiõl jeälltem diõtt ee´jj 2025 mõõnee´st di konkreettnallšem tuåimmtuâjaid vue´jj pue´reem diõtt. Tuâjj-jooukpõ´mmai lij lookkâmnalla mätt’tõs- da kultturminiteria säi´mmseeidain www.minedu.fi/OPM/Julkaisut/2012/Saamen_kieli.html .

Lââ´ssteâđaid:

- spesialplaaneei Mikko Cortés Téllez, te´l. 09 160 77022

- mätt’tõsduumšeǩ Maija Innola te´l, 09 160 77051