Mätt´tõsminister Gustafsson õõ´ni sää´mǩiõl ââ´nnemjurddi vääžnmõs puõ´ttiääi´j tuâjjan, jie´llemvue´ǩǩraajõõzz mottjumuužž, ǩiõllvaajtemooudâsviikkmõõžž da meädda vuâlggmõõžž saa´mi dommvuu´dest. – Vue´jjest, ko´st ju´n 70 % sää´mpäärnain da – nuõrin jälste jee´res paai´ǩin ko saa´mi dommvuu´dest, tõõzz taarbšet ođđ tuåimid da jeä´rben jiijjâz ǩiõl mätt’tem vuäǯǯmõõžž. Gustafsson õõ´ni vääžnai ä´ššen tõn, što ǩiõl mätt’tem riâššmõš õõlǥči lee´d obb jânnmest. -Tuåimmjem ouglõhttvuõđi ââ´nnem mätt’tõõzz äu´ǩǩumuš lij vääžnai tå´ben, ko´st sää´mǩiõl â´lddmättõ´šše jiâ leäkku vuäittmõõžž, tuõtti Gustafsson. Mätt’tõs- da kultturministeria alttad ǩiiđ mie´ldd čiõ´lǧǧeemtuâi, sää´mǩiõl vuäittmõššân tuejjeed â´lddmättõõzzid.

Kulttur- da sporttminister Paavo Arhinmäki mu´šttii tõ´st, što maai´lmest lä´ppai õhtt ǩiõll kuei´t neä´ttel kõõskin, oummi kõskkvuõđâst. – Maai´lmest nu´tt 6000 ǩiõlâst, sâ 90 % liâ vaarrvue´lnn voo´ps lä´ppjed. Tõt miârkksââvv maa´ilm vääivtõõvvmõõžž da õõutbeällsaž jättâ´ttmõ´šše kuâđđjumuužž da maai´lm alggmeerai ǩiõ´lle ruõkkõõvvâm kaallšõs kultturteâđ lä´ppjumuužž, tuõtti Arhinmäki. Son ååskti tõn, štõ halltõs stäänn kultturipolitiikk tuâjast še sää´m kulttur seillmõõžž. – Sää´mǩiõl da kulttuur liâ mõõnni ee´jji mie´ldd ravsmam pue´rab årra, tuõtti Arhinmäki.

Sää´mtee´ǧǧ saaǥǥjåå´đteei Klemetti Näkkäläjärvi spä´ssbõõžži tuâjj-joouk tän o´nnstam tuâjast da tuäivai sää´mǩiõl jeälltemtuåimmtuâi ouddnumuužž da teäggtõõzz vuäǯǯmõõžž tän tuõjju. – Sää´mtee´ǧǧest da sää´mõhttsažkåå´ddest liâ jõnn vuârddmõõžž ǩiõlljeälltemprograammâst. Täävtõssân lij põõšši maall äiggavuäǯǯmõš ǩiõll jeälltem da suõjjeem diõtt, tuõtti Näkkäläjärvi.

Ha´ŋǩǩõõzz vuä´pstemjoouk vuässlaž Irja Seurujärvi-Kari tuõtti, što lij spä´ssebvuõđlaž ǩiõlljeälltem tuåimmtuâiprograamme´tǩǩõõzz valmštumuužžâst. – Vääžnmõs ǩiõl jeälltem o´nstumu´šše lij positiivlaž mie´ldd åårrmõš, takai tättamvue´ǩǩ da õhttsaž visio, tuõtti Seurujärvi-Kari.