Sää´mǩiõllsaž musikk šääi´jj da čâustõõǥǥ šoovte, ko pukin šõõrmõs sää´mnuõri čeä´ppvuõđpei´vv (Sámenuoraid dáiddadáhpáhus- Sää´mnuõri čeä´ppvuõđpei´vv) älgg tä´bbe Aanrest seärad 28.3. Tät pei´vv älgg da hooddââvv njuärstem- da njuärstee´lčuõiggâmǩeâlbain Aanar čuõiggânstadioonâst čiâss 13.30. Jeä´ǩǩää noorõõttâp čeä´ppvuõđpeei´v ää´veempo´dde, ođđ sää´mnuõri joouk Irdon konsertta da ciistjue´ǩǩem po´dde Sajo´sse čiâss 18. Riâšši vue´rdde pääi´ǩ ool pâ´jjel 400 vuässõõttjed. 29.03. čiâss 9.55-17 http://yle.fi/livestream/saamevideo.asx  

Sää´mnuõri čeä´ppvuõđpeei´vid leät riõššum 1970-lååǥǥast ää´ljee´l da čeä´ppvuõđpei´vv lij põõžžtam pääi´ǩes da staattuuzzes bie´ǩǩen sää´mvuu´d škoouli tuâjjprogra´mme da sää´mtee´ǧǧ tuåimmjumu´šše. Čeä´ppvuõđpeei´v riâššât vuâree´jji saa´mi dommvuu´d koo´ddin, õhttsažtuâjast pääiklaž škooul da pääiklaž sää´mõhttõõzzivui´m. Tän ee´jj riâššõõttâm tuõjju liâ vuässõõttâm sää´mtee´ǧǧ lââ´ssen Aanar škooul, Sää´mvuu´d škoou´l’jemkõõskõs da pääiklaž sää´mseä´rvv Anára Sámi searvi.

Seärad nuõr ǩeâšt’te njuärstem- da njuärstee´lčuõiggâmǩeâlbain koummân jee´res âkksaid jurddum klaassâst. Njuärstem- da njuärstee´lčuõiggâmǩeâlb reä´šše õhttsažtuâjast Sää´mvuu´d škoou´l’jemkõõskõs luâtt- da skååttrdeeili´nnjnee´ǩǩ di Inarin yritys da Anára Sámi searvi liikkee´es oummin. Ǩeâlb jåå´đtee´jen tuåmmai Áslak Paltto.

Jiõčč čeä´ppvuõđpei´vv lij Njeljdpei´vv, te´l ođđ sää´mkultturkõõskõs Sajoozz teknikk da jõnn auditoria liâ vuõssmõs vuâra tiudd âânnmõõžžâst. Kue´rnec teâuddai čeä´ppvuõđpei´vven Nuorgam, Uccjooǥǥ, Taarr Sirma, Karigasnjaarǥ, Če´vetjääu´r, Hetta, Karesuvanto, Ruä´vnjaarg, Suä´đjel, Vuõccu, ´vvel, Törmänen- siid da ´vvel, da Aanar ceerkavsiid nuõrr vuässõõđjin da lââ´ssen sij mie´ldd puõ´tti peâmmjin da u´čtee´lin. Nuõr liâ valmštõõllâm čeä´ppvuõđpeei´v prograammid škooulin da staarjõõttâmjooukin ju´n mäŋgg mannu. Čeä´ppvuõđpeivva vuässõõđji mie´rr čuä´jad, što sää´mǩiõllsaž musikkstaarjõš lij siõssum nuõri kõõskâst.

Njeljdpeei´v prograammâst åårrai musikk-ǩiõčlmõ´šše liâ i´lmmtõõttâm õhttse´žže 20 bänddâd da voddõõttijoouk sää´mvuu´d pukin päi´ǩǩkoo´ddin da siidin di Ruä´vnjaarǥ gåårdin. Ärvstõõllâmlu´vddkå´dd va´lljad vuässõõđji jooukâst sää´mnuõri võboršee´ǩǩid vä´lddkåå´ddlaž Nuõri Kulttur Sounds – po´dde, kåå´tt riâššât Turku-gåårdest vue´ssmannust. Ǩeâlbbklaassi kolmm pue´rmõõzz ciistât stipeendivui´m. Ärvstõõllâmlu´vddkåå´ddest nuõrttsää´mǩiõl da rock-musiikk ee´ttkâstt Tiina Sanila-Aikio, aanarsää´mǩiõl da määŋgaid musikkšlaajid ee´ttkâstt Heikki Nikula, tâ´vvsää´mǩiõl rap-musiǩneǩ Áilu Valle da ää´rbvuâlaž juõi´ǥ juõikkčeä´pp Inga-Máret Gaup- Juuso.

Čeäppvuõđpeei´v tekniikkâst va´sttee sää´mtee´ǧǧ kääzzkõsjuâkkaz tekniikkåumma Joonas Saari da Janne Lappalainen, Sää´mvuu´d škoou´l’jemkõõskõõzz Erkki Feodoroff da Tuupa Recordsin Heikki Isokoski. Poddtekniikk riâššmõ´šše vuässââtt še Yle Sámi radio. Sajoozz Dolla-auditoria oudd čeäppvuõđpeivva fijnnâz raammid, ko âânnmõõžžâst liâ tea´tter- da konserttpõõrt jiõnn- da čuõvvteknikk lââ´zztõõzzineez.

Sää´mte´ǧǧ lij riâššâm buss-säättaid, stuällõõttmõõžžid da innsââ´jj aazzõõttmõõžžid pukid ´vvel Törmänen-siidâst vue´ljee´l, kuu´ǩǩab maa´tǩi tue´ǩǩen puõ´tti vuõssõõđjid. Čeäppvuõđpeei´v rgaaflaž vie´sslõs da eunnai kärttõõõzz (teäddkartt, vuässõõttâmtuõđštõõzz, logo da čeäppvuõđpeei´v påå´štkortt) lij plaanääm Tanja Sanila. Čeäppvuõđpeei´v riâššmõ´šše vuõǯǯum riikkveä´ǩǩvuõtt lij mätt’tõs- da kulttuurministeeriast.

Čeäppvuõđpeei´v äi´ǧǧtaull käunnai tä´st da musikk-ǩeâšttõõttâm voddõõttâmpå´reâd tä´st.

Lââ´ssteâđaid:

- čeä´ppvuõđpeei´vpiisar Heli Huovinen, 050-401 8009

- čeä´ppvuõđpeei´v-va´stteei Anni Näkkäläjärvi, 040-511 1821

- vs. nuõripiisar Inka Nuorgam, 050-382 5179

- škoou´l’jempiisar Ulla Aikio-Puoskari, 040-767 3101 .