Outi Pieski sei´nnreliefi lij pijjum parlamenttkue´rnec Solju seinna. Tuejjõs nårrai määŋgain kå´lluum da viõlggkå´lluum stää´lltiiskin, kook rä´jje määŋgtää´zzaž kumccõõtti vee´rd kue´rnec seinna da maainsteeikrii´lcže. Õhttân tuejjõõzz visualaž vue´lǧǧema´lggân lij neezzan määccka kuulli laustõkzääpneǩ. Tuejjõõzz vuä´zz liâ tiiskmallsa da tõin repččai kåškknjõõzz liâ pâ´sttmen. Ǩeramiikk pâ´sttmi åå´bleǩǩiõll puätt sää´m ää´rbvuâlaž tä´httpâ´sttmest. ”Tuejjõõzz tuejje´mmen leäm smiõttâm puõlvvõõǥǥi vee´rd ääi´jest di õ´httekuullmõõžž, ko´st ve´rdd poorat juâkksa mee´st”, maainast čeä´ppneǩ.

Marja Helander kuei´tvuäzzas tuejjõs lij pijjum Sajoozz sää´mǩe´rjjpõ´rtte. Tuejjõõzz vuõssmõs vuä´ss nårrai 30:st ânn’jõžpeei´v sämmlaid snimmum snimldõõǥǥâst, kook liâ snimmum juõ´ǩǩ å´rnn Lää´ddjânnam. Persoon liâ klasstõllum tuejjõõzzâst jälstempääi´ǩ, ââ´jj da jie´nnǩiõl mie´ldd.

Tuejjõõzz nu´bb vuä´ss lij jõnn snimldõk, ko´st liâ tuõddârkue´stelm ool snimmum sâddnorldõk sââdd. ”Tõk rä´jje heä´rvvǩe´rjjõsnallšem oo´le, kook õõŋtõõlee´l pâ´jjlab ââ´lm årra, piâzzee meädda meä´rtum da klasstõllum nuä´đest ”, mä´htt čeä´ppneǩ jiõčč maainast tuejjõõzzeez pirr. Helander kuälmad tuejjõs ´Tuõddrest´ lij pijjum Sajoozz vä´ldduus pââibeä´lnn åårrai ikkân ou´dde da tuejjõs maainast luâđast šuuvvi piõggǩiõlin, piõgg pååssam õhttu šõddi tuõddârsue´jji pirr.

Čeä´ppneǩ Marja Helander tuejjõõzzid ǩiõtt’tõõlli pressteâđtõs tä´st.

Čeä´ppneǩ Outi Pieski tuejjõõzzid ǩiõtt’tõõlli pressteâđtõs tä´st.