Euroop Suåvtõõzz ooumažvuõiggâdvuõttåskkooumaž au´ǯǯai Lää´ddjânnam pue´reed saa´mi vuõiggâdvuõđid |
![]() |
![]() |
Euroop Suåvtõõzz ooumažvuõiggâdvuõttåskkooumaž Nils Muiznieks kõ´ll´ji Lää´ddjânnmest 11-13.6.2012. Ooumažvuõiggâdvuõttåskkooumaž lij ouddam tä´bbe kue´ssreeis poodd tuejjuum rapoort ra´vvjõõzzineez Lää´ddjânnam rii´ǩǩe. Åskkooumaž kaaunõõđi kue´ssreeis poodd Lää´ddjânnam riikk ouddoummi, jee´res ministeeriai võboršee´ǩǩid da Lää´ddjânnam sää´mtee´ǧǧ saaǥǥjåå´đteei, Klemetti Näkkäläjääu´r. Åskkooumaž au´ǯǯai Lää´ddjânnam ratifâ´stted ILO 169-suåppmõõžž alggmeerai vuõiggâdvuõđi diõtt, kook se´st liâ.
” Ooumažvuõiggâdvuõttåskkoummu raportt lij vääžnai saakk Lää´ddjânnma pue´reed saa´mi vuõiggâdvuõđid. Mu´st leäi rämm kaaunõõttâd ooumažvuõiggâdvuõttåskkoummin da saaǥǥstõõllâd sui´n. Lää´ddjânnam saa´mi staattuuzzâst da saa´mi staattuuzz da lää´jjšeâttmõõžž ooudâsviikkâm taarbi diõtt. Åskkooumaž tiõđi puârast Lää´ddjânnam saa´mi vue´jjest da son haa´lii ooudâsviikkâd saa´mi staattuuzz Lää´ddjânnmest”. maainsti saaǥǥjåå´đteei Näkkäläjärvi.
Euroop Suåvtõõzz ooumažvuõiggâdvuõttåskkooumaž lij jiõččnaž da Euroop Suåvtõõzz vuâlaž instituutt. Åskkoummu tuâjjan lij ooudâsviikkâd tie´ttemvuõđ da ooumažvuõiggâdvuõđi slävvõõttmõõžž Euroop Suåvtõõzz 47 vuä´ssbie´lljânnmest. Åskkooumaž tuejjad kue´ssreeisaid Euroop Suåvtõõzz vuä´ssbie´lljânnmid čiõlggeem diõtt riikk ooumažvuõiggâdvuõttvue´jj. Åskkooumaž oudd kue´ssreeisast tuejjuum rapoort ra´vvjõõzzineez riikk ooumažvuõiggâdvuõttvue´jj pue´reem diõtt. Åskkooumaž ǩiõtt’tââll rapoortâst Lää´ddjânnam saa´mid kuõskki lää´jjšeâttmõõž, Lää´ddjânnam meeraikõskksaž õõlǥtumuužžid, saa´mi vuõiggâdvuõđid, tâ´vvjânnmlaž sää´msuåppmõõžž di sää´m-meärtõõzz.
” Åskkooumaž õõlǥti Lää´ddjânnam staanâd saa´mi võboršee´ǩǩid Ilo-suåppmõõžž ratifâ´sttemproseessest. Saa´mi diõtt åskkoummu auʒʒjumuš lij nåkam, štõ Ilo-suåppmõõžž ratifâ´sttem õhttvuõđâst âlgg toobdsted saa´mi vuõiggâdvuõtt, ââ´nned puäǯǯhååid ää´rbvuâlaž vue´jjnalla, kåå´tt lij vääžnai, ko ânn’jõžääi´jest lää´dd puäʒʒhåiddlää´jjšeâttmõš ǩicclââtt tuejjeed õõutmie´lddsânji sää´m puäʒʒhååid. Lij tiõttum, što åskkooumaž vuârdd tõn, što Lää´ddjânnam ta´rǩǩad puäʒʒhååid kuõskki lää´jjšeâttmõõžž” maainsti Näkkäläjärvi.
Ooumažvuõiggâdvuõttåskkooumaž au´ǯǯai Lää´ddjânnam čuõvted saa´mi vuõiggâdvuõđ jânnma. Meä´cchalltõõzz vaaldšem-mall oođumuš ta´rjjad vuäittmõõžž rä´tǩǩeed saa´mi mäddvuõiggâdvuõđid. Hå´t järrsi vuõiggâdvuõđ saa´mi dommvuu´dest â´lǧǧe vä´ldded lokku, ij tät leäkku åskkoummu mie´ldd nollsummiigr.
”Leä´m šiõǥǥ miõlâst tõ´st, što åskkooumaž lij välddam saaǥǥstõõllmõõžžâst da sää´mtee´ǧǧ tuejjuum e´tǩǩõõzzid mie´ldd lokku vä´lddmõõžžâst da ra´vvjõõzzid rapo´rtte. Ââ´nam, što tõt lij jiijjâsnalla vääžnai, što åskkooumaž au´ǯǯii Lää´ddjânnam riikk tu´mmjed tuõđsânji sää´mtee´ǧǧ tuejjuum e´tǩǩõõzz, vuâđđeed Lää´ddjânnam parlameentt da Sää´mtee´ǧǧ võboršee´ǩǩid, što õhttsaž tuâjj-joukk valmštââll Ilo- suåppmõõžž ratifâ´sttmõžž. Tuäivam, što åskkoummu saakk vää´ldet tu´mmjem vuâlla riikksuåvtõõzzâst, ko tõt saaǥǥstââll tän čõõuč Ilo-suåppmõõžž ratifâ´sttmõõžžâst”, maainsti saaǥǥjåå´đteei.
|
|
Viimeksi päivitetty ( 25.09.2012 ) |