Sää´m Parlamentaarlaž Suåvtõs, kåå´tt lij Tâ´vvjânnmlaž sää´mtee´ǧǧ õhttsažtuâjjorgan, tu´mmji ǩiõllõhttsažtuâi ođđest riâššmõõžžâst da vaiddâz ǩiõllõhttsažtuâjjha´ŋǩǩõõzz alttumuužžâst ee´jjest 2008. Lää´ddjânnam sää´mtee´ǧǧ vää´rrsaaǥǥjåå´đteei Heikki Paltto maainsti ǩiõllõhttsažtuâi altteemseminaarâst, što leä´m rämmvuõttam tõ´st, što Lää´ddjânnam sää´mte´ǧǧ lij vuäǯǯam tue´jjen, jåå´đtet ääi´j mie´ldd šõddâm, pukin šuurmõõzz vä´lddkåå´dd raaji pâ´jjel mõõnni ǩiõllha´ŋǩǩõõzz.

- Tuäivam, što ha´ŋǩǩõs vuäi´tči ravveed da ooudâs viikkâd pukid maainstum sää´mǩiõlid da lââ´zzted õhttsažtuâi vä´lddkoo´ddi raaji pâ´jjel. Tuõtt lij, što sää´mǩiõli terminologii da sää´nnree´ǧǧesvuõtt šâ´dde tä´st peäggtum jânnmin, kåå´tt koon årra da sää´mǩiõl maainsteei jiâ teänab vuei´t fi´ttjed kuei´mm kuei´meez, ko ǩiõll lij veersmam maainstee´ji kõskkvuõđâst, maainsti Paltto.

Sää´m Parlamentaarlaž Suåvtõõzz saaǥǥjåå´đtee´jen tuåimmjeei Taarr sää´mtee´ǧǧ saaǥǥjåå´đteei Egil Olli puu´ti õlmmsa saaǥǥstõõllâm vuârast, što ha´ŋǩǩõõzz vääžnmõs tuâjj lij õhttsaž kiõli ruõkkmõš seeiltee´l da ooudâsviikkmõš. - Re´ttlâ´sttep tõn ou´dde, što fi´ttjep kuei´mm kuei´meen riikk raaji pâ´jjel še puõ´ttiääi´jest, maainsti Olli.

Ha´ŋǩǩõõzz jåå´đteei Anne-Maria Magga maainsti, što ha´ŋǩǩõs nåårr õhttsažtuõjju vitt sää´mǩiõl da ååu´c ä´šštobddituâjain tuåimmjeei ǩiõlltuâjjla, kook ee´ttkâ´stte pukid ha´ŋǩǩõõzz kiõlid. Lââ´ssen Lää´djânnam da Taarr sää´mtee´ǥǥest liâ muä´dd ha´ŋǩǩõõzz tuâjaid håiddai vaaldšemtuâjjla. – Sámi Giellagáldu, Sää´m ǩiõllka´lddi ij leäkku ni voo´ps õhttân päikka čõnnum kõõskõs pâ ǩiõllõhttsažtuâi õhtteei Lää´ddjânnam, Ruõcc da Taarr sää´mtee´ǧǧi kõõskâst. Ođđ tuâjjla re´ttlâ´stte sää´mtee´ǧǧi persoonkoo´ddin, maainsti Magga. 

Snimldõõǥǥâst Sámi Giellagáldun Sää´m ǩiõllka´lddi ǩiõlltuâjjla, vuä´pstemjoouk vuä´ssla da Lää´ddjânnam da Taarr sää´mtee´ǧǧ jåå´đteei. Ođđ ǩiõlltuâjjla kaaunõ´tte vuõssmõs vuâra Sajoozz parlamenttkue´rnec Soljust riõššum ha´ŋǩǩõõzz ää´veempoodd seminaarâst.

Snimldõõǥǥâst Lää´ddjânnam sää´mtee´ǧǧ vää´rrsaaǥǥjåå´đteei Heikki Paltto, ha´ŋǩǩõõzzjåå´đteei Anne-Maria Magga da Taarr sää´mtee´ǧǧ da SPS:zz saaǥǥjåå´đteei Egil Olli.

Lââ´ssteâđaid ha´ŋǩǩõõzzâst da Sajoožžâst 20.-21.2.2013 riõššum altteemseminaarâst:

- Egil Olli  tä´st

- Heikki Paltto  tä´st

- Anne-Maria Magga tä´st

- Ante Aikio tä´st

- Nils Øivind Helander tä´st

- Marja-Liisa Olthuis tä´st.