Europarlamentneǩ Nils Torvalds lij kåččam Lää´ddjânnam Sää´mtee´ǧǧ såbbrõõššâd Bryssel –gåårda da tobdstõõttâd EU:n tuåimmjumu´šše. 

– Tät lij histoorlaž podd. Vuõssmõs vuâra saa´mi parlamentaarlaž organ såbbrââšš Euroop parlameentest sää´mtee´ǧǧ såbbar da kõ´ll’jumuš parlameentest veeidad da čuõvat ǩiõččâmvue´jjid di oudd saa´mid vuäittmõõžž lee´d da vaikkted Eu:n tää´zzest. Haa´leep tän tää´zzest EU:n o´dinakai alggmeeran pu´htted õlmmsa mij da še jee´res vä´lddkulttuur kõõskâst jie´lli meerai da joouki taarbid, maainast Sää´mtee´ǧǧ saaǥǥjåå´đteei Klemetti Näkkäläjärvi.

 

Euroop union lij čõnnõõttâm aartklaž teâđouddmõõžžstes saaǥǥstõõllmõ´šše alggmeeraivui´m. Saaǥǥstõõllmõš lij jeâllum ålggkõskkvuõđkomissaar Catherine Ashtonin, te´l suu

Lää´ddjânnmest kõ´ll’jem õhttvuõđâst ee´jj 2011 äi´ǧǧen. 

– Mudoi sââǥǥstõõllmõš lij kuâđđjam vää´nnbeälla, maainast Näkkäläjärvi. Leäm tuõđi

vie´sslõs miõlâst, što Nils Torvalds lij kåččam mi´jjid Bryssel –gåårda da son lij vuõssmõsân europarlamentne´ǩǩen tuõđi ooudâsviikkmen saaǥǥstõõllmõõžž EU:n da alggmeerai kõskkân. Tät tuåimmai miõlstan šiõǥǥ ouddmiârkkan še EU- komissiaa´je tõ´st, što tõt âlgg vä´ldded saaǥǥstõõllmõõžž alggmeeraivui´m tuõđsânji. 

- Saa´mi demokraatlânji va´lljuum organ tuåimmai še ouddmiârkkan Euroopâst. Liâ veâl jiânnai meer, koin jiâ leäkku ni tõk vuõiggâdvuõđ, mä´htt Lää´ddjânnam saa´min liâ. Leâ´ša tän ij vuäǯǯ särnnad jiõččrää´ǩǩes miõlin, tuâtt europarlamentneǩ Torvalds. Mee´st liâ veâl jiânnai pue´reemnalla åårrai ää´šš. 

Sää´mte´ǧǧ saaǥǥstââll ǩõ´ll’jem poodd aainâs saa´mi ǩiõll'laž, kulttuursaž da jie´llemvue´jji vuõiggâdvuõđi diõtt Eu:nâst. Sää´mtegga lij riõššum tobdstõõttmõš Euroop Unioon da komissia tuåimmjumu´šše da vuei´nnlõõttmõš ekonomiikomissaar Olli Rehnin. 

Sää´mte´ǧǧ tobdstââtt še Lää´ddjânnam põõšši ee´ttkâ´sttõõzz tuåimmjumu´šše Bryssel – gåårdest da kaaunââtt EU-suåvtõõzz ooumažvuõiggâdvuõtt-tuâjj-joouki võboršee´ǩǩivui´m. 

- Tuäivvap tän kõ´ll´jumuužžâst jiânnai. Vääžnmõs täävtõssân lij raajjâd põõšši saaǥǥstõõllâmvuäittmõõžžid EU:nin da vuäǯǯad sää´mkõõččmõõžži lokku vä´lddmõõžž pue´rben EU:n politiikkâst. Takai täävtõssân lij staaneed EU:n Interreg Sää´mjânnam –teäggtemprograamm seillmõš jiijjâs programmân, tõn teäggtõõzz staanumuš da prograamm vaaldšem da byrokratii ǩeä´ppumuš. Viõkksõs vaikktõs le´čči se´rdded prograamm vaaldšumuš vuõi´ǧǧest sää´mtegga. 

Tuäivvap, što näu´ddpolitiikk ooudâsviikkmõš ouddan EU:n tää´zzest nu´tt, što nääu´di suõ´jjõs da sää´mpuäʒʒhååid âânnmõš le´čče tää´sstiäddast da nääi´t jie´llemvue´jj ââ´nnem suejj puä´đči lee´d staanuum, saaǥǥjåå´đteei Näkkäläjärvi tuâtt.

Lââ´ssteâđaid: 

Saaǥǥjåå´đteei Klemetti Näkkäläjärv i