Sää´mte´ǧǧ õ´lmmad ooccâmnalla õhttsažtâ´vvjânnmlaž sää´mǩiõl ämmat- da resursskõõskõõzz, Sää´m Ǩiõllka´lddi mie´rräiggsaž tâ´vvsää´m ǩiõlltuâjjla tuâi. Tuâjj älgg tâ´lles da poott 31.5.2014. Ǩiõlltuâjjla tuõjju ko´lle ǩiõlhuõll, ǩiõl ooudâsviikkmõš, terminologiituâjj, normmumuš da teâđtem- di vuä´pstemtuâjj. Ǩiõlltuâjjli´žže vuei´tet mie´rreed še jee´res tuåimid, kook ko´lle õhttsažtâ´vvjânnmlaž sää´mǩiõl ämmat/resursskõõskõõzz vuâđđeemha´ŋǩǩõsse.

Šiõttõsvuâđđlaž ââ´ntemõõlǥtõssân lij tuâi ooudldem škoou´l’jumuš da lââ´ssen õõlǥtet sää´mǩiõl silttõõzz. Ǩiõlltuâjjlaž lij tuâjjkõskkvuõđâst Lää´ddjânnam sää´mtegga da pä´lǩǩmõš meä´rrââtt sää´mtee´ǧǧ pä´lǩǩriâššâm õõlǥtemtää´zz V/II - IV/IV mie´ldd (vuâđđpä´lǩǩ lij 2079,95-2425,08 eu´rred/mp). Vuâđđpää´lǩ lââ´ssen määu´set 24 %:tt sää´mvuu´d lââ´ss da tuâjjtobddmõõžž mie´ldd vuâđđâ´vve ä´šštobddâmlââ´zz.

Tuåimmpäi´ǩǩ sâjjdââ´tt ko´st-ne Sää´mtee´ǧǧ tuåimmpaai´ǩin le´be ko´st-ne suåppmõõžž mie´ldd. Ooccmõõžž mie´lddõõzzineez â´lǧǧe tuåimted Lää´ddjânnam sää´mtee´ǧǧ piizarkådda 17.5.2013 čiâss 16.00 mõõnee´st addrõõzzin: Sajos, 99870 Aanar.

Lââ´ssteâđaid tuâjast oudde projektjåå´đteei Marko Marjomaa 050 438 2484 da ǩiõllstaanpiisar Siiri Jomppanen 050 493 9018.