Sää´mnuõri čeä´ppvuõđpeei´v ärvstõõlljen tuåimmje zumbafitness o´hhjeei Bigga Aikio (video) Koutokeinost da tanssu´čtee´l Merja Leinonen Suä´đjlest. Ävstõõllâmlu´vddkå´dd ǩeei´tai Eanodaga powerdancers – joouk puârast valmštõllum čuä´jtõõzzâst, kåå´tt vaa´ldi ǩiiččee´jid mie´ldd. Koreografia leäi määŋgpeällsaž da jeä´rben ta´nssjee´ji pihttsin looppâst šõddâm sää´mlipp vuâǯǯai spä´ssbõõžžid. Čuä´jtõõzz leäi o´hhjääm Rosa Pietikäinen da tõ´st ta´nssje Britt-Inger Ruotsala, Susan Löf, Anni-Sofia Löf, Kristen Anne Ruotsala, Petra Ikonen da Sofia Kallionlähde.

 

 

 

 

 

 

 

 

 

 

 

 

 

 

 

 

Suä´đjelnee´ǩǩi Jutatokka –joukk čuä´jti ǩeâštast taans, koon nõmm leäi Boazu (poro). Čuä´jtõõzz spä´ssbõ´šše šiõǥǥ musiikkâst da feertak liikkumuužžâst da loomminallšem toobdlmest. Tanss suei´mkrõõsti ärvvstõõllji miõlâst puârast puõccu, kåå´tt leäi õhttu da čiõkkrest. Lââ´ss-spä´ssbõõžžid vuåǯǯu vuõddji âânnmõõžžâst, kook le´jje čuä´jtõõžžâst pihttsen. Čuä´jtõõzz leäi o´hjjääm Riina Lindberg da tõ´st ta´nssje Ada Heikkilä, Nella Nikula, Elina Pulkkinen, Lotta Tervo, Eliisa Vaarala da Laura Kaaretkoski. 

 

 

 

 

 

 

 

 

 

 

 

 

 

 

 

 

Cisttpeäggtõõzz da stipee´nd vuäǯǯam Giehtaruohttasa mánát (Käsivarren päärna) –joouk leäi o´hhjääm Karesuvanto škooul u´čtee´l Taina Syväjärvi. Čuä´jtõõzzâst leäi hää´sǩâ´ttem miõll da tõ´st pue´đi õlmmsa sää´m kulttur. Lââ´ssen jooukâst leäi šiõǥǥ õhttvuõtt ǩiiččee´jid da čuä´jtõs leäi puârast hää´sǩõtti. 

 

 

 

 

 

 

 

 

 

 

 

 

 

 

 

 

Cisttpeäggtõõzz da stipee´nd vuâǯǯai še Karigasnjaarǥâst nuõri Gangstajunkkát hiphop-joukk. čuä´jtõõzzineez Trift Shop. Čuä´jtõõzz leäi o´hhjääm Ville Köngäs, tõt vuâǯǯai ǩiiččee´jid loŋŋned mie´ldd, ta´nssjee´jin leäi šiõǥǥ hooddlaž musiikk mie´ldd ta´nssjumuš da koreografia leäi šiõttlânji vä´ǯǯlõs.  

 

Sää´mnuõri čeä´ppvuõđpeei´v rie´ššeš vuõssmõs vuâra Suä´đjel ceerkavsiidâst. Podd kooll vä´lddkååddli´žže  Nuori Kulttuuri  –po´dde da tõn vä´lddriâššjen tuåimmai sää´mte´ǧǧ. Suä´đjel po´dde vuässõ´tte õhttse´žže pâ´jjel 400 oummud da ǩiõšttu vuä´ssõ´tte 12 tanssjoukkâd.

 

 

 

 

Ee´jj 2015 sää´mnuõri čeä´ppvuõđpei´vv riâžžât Uccjooǥǥâst da tõn vä´lddkååddlaž teemmen lij musikk. Sää´m palddlõsteemmest teâđtet mâ´ŋŋlubust. Suä´đjel čeä´ppvuõđpeivva kuulli karttǩeâst ciistid jue´jjet škoouli ǩiđđprää´žnǩest.

Snimldõõǥǥ Mika Saijets.