|
KHO linnjjii kuåivâslää´jj suåvvtumuuâst sä´mmlai dommvuu´dest |
|
|
|
Pââimõs halltõsvuõiggâdvuõtt lij ouddam ee´ǩǩ-ǩe´rjjtu´mmstõõǥǥ ođđ kuåivâslää´jj suåvvtumuuâst sä´mmlai dommvuu´dest.
Sää´mte´ǧǧ lij läittam Tukes miõttmõõ mainõsttum kå´llkuäivvamloo´vi diõtt. Ruä´vnjaarǥ vaaldemvuõiggâdvuõ´tte (ânnjõ Tâ´vv-Lää´ddjânnam vaaldemvuõiggâdvuõtt) kuåivâslää´jj vuâsttlânji, tõn diõtt ko Tukes ij leämma čiõ´lggääm låå´v mie´lddla tuåimmjumuu vaikktemvuõđi diõtt sää´mkulttuu´re. Vaaldemvuõiggâdvuõtt priimi sää´mtee´ǧǧ läittmõõid. Tukes da låå´voocci le´jje läittam tu´mmstõõǥǥi diõtt Pââimõs halltõsvuõiggâdvuõ´tte. Pââimõs halltõsvuõiggâdvuõtt õõ´ni vaaldemvuõiggâdvuõđ tu´mmstõõǥǥ viõǥǥâst da jaukkii Tukes tu´mmstõõǥǥ lää´jjvuâsttli´en priimee´l loopplânji sää´mtee´ǧǧ läittmõõ Ruä´vnjaarǥ vuõiggâdvuõ´tte.
Tät lij jõnn vuäittmõ sä´mmlaid da čuä´jad, to kuåivâslää´jj õõlǥtõõzzid ij vuei´t håiddad sä´mmlai dommvuu´dest pâi ciâlkâlmmõõntõõllmõõivui´m. Kuåivâslää´ǩǩ lij pohttam ođđ õõlǥtõõzzid da tõk â´lǧǧe vä´ldded tuõđâst. Kuåivâslää´ǩǩ lij sää´mtegga ođđ ä´ da mee´st mõõni äi´ǧǧ čiõ´lǧǧeed mâi´d kuåivâslää´jj tiu´ddepiijjmõ tuõttvuõđâst ooudald da ou´ddelgo vuäǯǯaim raajjâd ää´est tuåimmjeei õhttsatuâjjmaallid paalǥâskoo´ddi, sää´mjie´llemvue´jj vue´ǩǩnee´ǩǩi da siidivui´m. Läittmõõid valmtõõli mee´st tuâjj-joukk, koozz ku´lle mä. ää´ ou´ddepu´htti Inga-Briitta Magga, lää´ǩǩpiisar Aimo Guttorm da vuâllaǩee´rjtam. Leäm toottva, to mij tuâjj o´nnsti puârast, saaǥǥjåå´đteei Näkkäläjärvi maainast.
Sää´mte´ǧǧ räukk saaǥǥstõõllmõõid kuåivâslää´jj suåvtumuuâst Tukes jåå´đteei tuâjj- da jie´llemvue´ǩǩmini´stteriain di jee´rben Tukesin. Mâ´ŋŋlubust sää´mte´ǧǧ jordd riââd kuåivâslää´jj suåvvtumuuâst õhttsasåbbar, koozz kååččat paalǥâskoo´ddi, ve´rǧǧnee´ǩǩi, nuõrttsaa´mi sijddsåbbar da Tukes võboree´ǩǩid linnjjeed kuåivâslää´jj suåvvtumuuâst da čõõnõsjoouki õhttsatuâjast.
Lij ǩeâhssai to läittamprosess lij pettam nääi´t kuu´ǩǩ. Sää´mte´ǧǧ lij e´tǩǩääm, to Tukes suåvvte´či Ruä´vnjaarǥ vaaldemvuõiggâdvuõđ tu´mmstõõǥǥ låå´ppvue´jj tõn räjja, ko Pââimõs halltõsvuõiggâdvuõđâst vuäǯǯče ää´est linnjjumuu. Tukes ij leäkku nääi´t tuejjääm. Åå´n kuåivâsve´rǧǧnee´ǩǩ tuåimmjumu lij tuejjääm pâi´lmeä´rrsa vääi´v låå´v ooccja, sää´mtegga, ve´rǧǧnee´ǩǩid da paalǥâskoo´ddid. Tuäivam, to tu´mmstõõǥǥ mie´ldd õhttsatuâjj Tukesin õõdči tõnnallem, mä´htt lää´jjiõtteei lij jorddam. Sää´mte´ǧǧ lij vaalmâ õhttsatuõjju kuåivâslää´jj õõlǥtõõi tiuddumuui diõtt, saaǥǥjåå´đteei Näkkäläjärvi linnjad.
Parlame´ntt priimi vue´ssmannust kuåivâslää´jj 169 § mie´lddla muttâz, koon mie´ldd Tukes vuäitt vuâđđõttum määi´nest ooʒʒi raukkmõõâst malmmooccâmlåå´v le´be kå´llku´lljeemlåå´v viõǥǥâståårram juätkkjumuu le´be kuåivâslåå´v le´be kuåivâs-staanvuõđlåå´v kuõskki tu´mmstõõǥǥâst mie´rreed, to låå´vest õhttlõvvõttum tuåimmtuâjaid vuei´tet läittmõõâst huõlǩâni riõmmâd låå´pptu´mmstõõǥǥ jää´ǩǩtee´l.Parlamee´nt tuejjeem muuttâs leäi teâpstum da sää´mte´ǧǧ tuejjii e´tǩǩõõzz veâl vaaldemvä´lljkåå´dd kuullâm õhttvuõđâst, to ou´ddelgo kuåivâslää´jj riõmât mu´tted, vue´rtet Pââimõs halltõsvuõiggâdvuõtt linnjjumuu kuåivâslää´jj tiu´ddepiijjmõõâst. Miõlstan parlamee´nt tu´mmstõk leäi teâpstum lokku vää´ldee´l Pââimõs halltõsvuõiggâdvuõđ tu´mmstõõǥǥ, särnn saaǥǥjåå´đteei Näkkäläjärvi.
|
|
Viimeksi päivitetty ( 26.06.2014 )
|