Sääʹmǩiõl da – kulttuur tuʹtǩǩeemsieʹbr, vuõssmõs sääʹmǩiõllsaž tuʹtǩǩeemseäʹbrr, altteeš Heʹlssnest 15.6.2014.
Sieʹbr jurddân lij
- Nââneed sääʹmǩiõl da kulttuur tuʹtǩǩummuž da ooudeed tän paradigma tobddmõõžž Lääʹdd meer seʹst da meeraikõõsǩeld;
- Raajjâd nåkam tuʹtǩǩummuž, kååʹtt veekk ooudâs oummui da tuʹtǩǩeejai kõskksaž tääʹssärvvsaž vuârrvaikkteeʹm, da lââʹzzat sääʹmkulttuur da jeeʹres kulttuuri kõskksaž fiʹttjummuž;
- Lââʹzzted teâđ da tobddmõõžž minoritet- da alggmeerai ǩiõli da kulttuuri pirr;
- Viikkâd ooudâs sääʹmǩiõl nâânummuž da maacctummuž ceâlai Lääʹddjânnmest;
- Altteed sääʹmǩiõllsaž ǩiõll- da kultturpirrõõzzid, kook veäʹǩǩte sääʹmǩiõl seillmõõžž ceâlai jânnmest;
- Lââʹzzted sääʹmǩiõl ââʹnnmõõžž da maaccted ǩiõl tok, koʹst tõt jeeʹresnallšem ǩiõl ââʹnnemvuuʹdin lij läppjam leʹbe occnam;
- Nââneed kueiʹtǩiõllsa- da määŋgǩiõllsavuõđ raajeeʹl nåkkmid sääʹmǩiõl ââʹnnempooddid, koin mainstet säämas pâʹjjel raaji da piʹrǧǧeed ânnʼjõž õhttsažkååʹdest, kååʹtt lij šõddâm jeänab da jeänab määŋgǩiõllsiʹžžen.
Sieʹbr tuejjummuž vuâđđjurddi da ǩiõl jeälltummše da kulttuuʹre koolli tuåim jie vuâđđõõv etnlažvuõʹtte, a tuejjummuš vuâđđââvv tiõđlaž tuejjummše, jeärben ǩiõʹlle da ǩiõlljeälltummše jeeʹres konteekstin da persoon di joouk leʹbe ǩiõllõhttõõzz tääʹzzest.