Nr 575
Lääʹǩǩ sääʹmlääʹjj muʹttmest
Ouddum Naantalist ǩieʹssmannu 19 peeiʹv 1997
Eeʹttikååʹdd riâššâm mieʹldd muʹttet täʹlvvmannu 24 peeiʹv 1995 uvddum sääʹmlääʹjj (253/1995) 63 § 3 momentt, 64 § da 68 § 1 momentt da lââʹzztet 63 §:sa ođđ 4 momentt da läʹǩǩe ođđ 63 a § tännalla:
63 §
Muttâz ooccmuš
Veinnamluʹvddkååʹdd 36–39 §:in peäggtum ääʹššest lebe jiõččvälddsaž veäʹlǧǧsaneerammuužž lebe jeeʹres mäʹhssǩeäʹppõõzz jõskkmen kuõskki ääʹššest ouddam riâššma vuäǯǯ ooccâd muttâz veeineel pââjmõs vaaldšemvuõiggâdvuõiʹtte tõnnalla ko vaaldšemlääʹjjââʹnnemlääʹjjest (586/1996) šiõtt’teet. Muđoi veinnamluʹvddkååʹdd tän lääʹjjest meärruum ääʹššest ouddam riâššma vuäǯǯ ooccâd muttâz pâi tâʹl, jõs pââjmõs vaaldšemvuõiggâdvuõtt meâtt veinnamlååʹv. Lååʹv vueiʹtet miõttâd jõs:
1) lääʹjj suåvtõõlâm diõtt jeeʹres seämmanallšem aaʹššin lebe vuõggâdvuõttpraktiikka õõutnallšemvuõđ diõtt lij vääžnai, što äʹšš viiǥǥat vaaldšemvuõiggâdvuõʹtte räʹtǩǩem vääras;
2) ääʹšš viikkmen pââjmõs vaaldšemvuõiggâdvuõiʹtte räʹtǩǩeem vääras lij vääžnai ääʹššest šõddâm čiõlgg vââʹjj diõtt; lebe
3) lååʹv miõttmušše lij jeeʹres loʹsses vieʹrr.
Aaʹššikuulli ministeria tän lääʹjj mieʹldd ouddâm riâššma vuäǯǯ ooccâd muttâz veeineel pââjmõs vaaldšemvuõiggâdvuõiʹtte tõnnalla ko vaaldšemlääʹjjââʹnnemlääʹjjest šiõtt’teet.
63 a §
Riâššâm teâttânouddmuš
Veäʹǩǩvuõđ lebe muuđa tuärrjjõõz lebe mäʹhssemǩeäʹppõõz kuõskki ooccmest ouddum riâššâm vueiʹtet tuåimmted ooccja teâttân pååʹšt mieʹldd takai ǩeʹrjjen. Ko ij jeeʹresnalla čuäʹjtet, ǩiõččât, šo oocci lij vuäǯǯam teâđ riâššmest čiiččâd peivven tõn mâŋŋa, ko riâššâm lij ouddum pååʹšt jååʹđtet.
64 §
Ǩiõtt’tõõllâmmääus peʹrrjumuš
Tän lääʹjj mieʹldd uvddum riâššmin peʹrrjet määus nuʹt mähtt määusai peʹrrjemmest jeeʹrab šiõtt’teet. Veäʹlǧǧsaneerammuužž da jeeʹres lääini mäʹhssemǩeäʹppõõzzi di veäʹǩǩvuõʹđ da jeeʹres tuärjjõõzz miõttem kuõskki jânnâmpäiʹǩǩjieʹllemvueʹǩǩkruuǥǥ riâššâm lie šeža määustemmes. Veäʹlǧǧsaneerammuužž da jeeʹres mäʹhssemǩeäʹppõõzz kuõskki jânnampäiʹǩǩjieʹllemvueʹjji veinnamluʹvddkååʹdd riâššâm lie määustemmes še.
68 §
Måttam õõudbu lääʹjjšiõtt’tõõzz vuâlla kuulli tuåim da vuõiggâdvuõttkõskkvuõđ
Måtam saaʹmi jeälstââʹttmest uvddum lääʹjj (273/1955), saaʹmi määddpoʹreâdlääʹjj (593/1969) da kååʹmtum sääʹmlääʹjj mieʹldd riikk da veârrâmstrooitel vuäǯǯmuužž väʹsttmäʹhssemäigga da koʹrǧǧe di jeeʹres määinain jääʹǩǩtet tän lääʹjj viõʹǩǩe pueʹttmest viõǥǥâst leʹddi šiõtt’tõõzzid da tõid vuâđđeeja suåppmušmääinaid. Mâŋŋa tän lääʹjj viõʹǩǩepueʹttemest šõddi kååʹmtum sääʹmlääʹjj šiõtt’tõõzzid. Jõs õõudpeäʹlnn peäggtum lääʹjjvuâlaž riikklääinin da kaaupšemhâʹddvuäǯǯmuužžin vääʹldet pâʹjjel kueʹhttpieʹlin proseent koorǥ eeʹjjest, korgg lij kuuitâǥ skamm’mannu 1 peeiʹvest 1996 rosttovmannu 31 peivva 2001 kueʹhttpieʹlin proseent. Jälstempõrttlääini korggân peʹrrjet peäggtum ääiʹjest jääʹnmõsân nellj proseent ekksaž koorǥ.
Tät lääʹǩǩ puätt viõʹǩǩe ǩieʹssmannu 25 peeiʹv 1997.
Lääʹjj 68 § 1 momeent šiõtt’tõõzzid ââʹnet riikk kaaupšemhâʹddvuäǯǯmuužži da riikklääini koorǥin skamm’mannu 1 peeiʹvest 1996 njuhččmannu 30 peivva 1997 tõn vuäʹzzest ko koorǥ lie laʹsǩǩuum njuhččmannu 30 peivven 1997 veäʹlǧǧtteägga, kååʹtt iʹlla võl maʹhssum. Leigga valddum korgg määuset veäʹlǧǧnekka kålggmannust 1997. Momeent šiõtt’tõõzzid ââʹnet muđoi vueʹssmannu 1 peeiʹvest 1997.
Naantalist ǩieʹssmannu 19 peeiʹv 1997
Tääʹssvääʹld Presidentt Martti Ahtisaari
Mädd- da meäʹcctäällminister Kalevi Hemilä