Nr 8
Riikksåbbar asetõs kuäʹcǩǩmi tueʹjjuum skääđai korvvummuš puäʒʒoummid
Uʹvddum Heʹlssnest ođđeeʹjjmannu 3 peeiʹv 2002
Riikksåbbar tuʹmmstõõǥǥ mieʹldd, kååʹtt lij rajjum pirrõsministeria čuäʹjtõõzzâst, šiõtteet valdia täällarvvlõõzzâst ǩiđđmannu 13 peeiʹv 1988 uʹvddum lääʹjj (423/1988) 7c§:z 1 momeent mieʹldd, nåkamnallšem ko tõt lij lääʹjjest 689/2001:
1 §
Suåvtemvueʹǩǩ
Kuäʹcǩǩmi puäʒʒtallu tueʹjjuum skääđai puäʒʒhåiddlääʹjjest (848/1990) mieʹrruum puäʒʒhåiddvuuʹdest koʹrvveet valdia budjeett vaaʹri mieʹldd valdia vaaʹrin tõn mieʹldd ko tän asetõõzzâst šiõtteet.
2 §
Koʹrvvõõzz vuâđđ
Korvvõõzz vuâđđan lij kuäʹcǩǩmi porrmõõžžân kåʹddum puõcci arvvlum mieʹrr (laʹsǩǩeemnallšem skääđđ). Koʹrvvõs šâdd ǩuäʹcǩǩmi pieʹss'sââi da ââʹlji vuâđđan laʹsǩǩuum reviir mieʹlddlaž ǩeârddõõzz vuâđđan.
3 §
Koʹrvvõõzz mieʹrr
Koʹrvvõõzz teäʹǧǧmeäʹr vuâđđan lij laʹsǩǩeemnallšem skääđđ ärvv ǩeârdduum 2 momenttist, 4 §:z 2 momenttist leʹbe 5 §:z 1 momenttist mieʹrruum ǩeârddõõzzin. Laʹsǩǩeemnallšem skääđ ärvv ǩeârddõõzzin õhtt lij 549 eurrod. 
Reviir mieʹlddlaž ǩeârddõs kuäʹcǩǩem jälstem reviirist lij õhtt jeeʹresåʹrnn ko 4 §:sest sarnnum paalǥâskooʹddi vuuʹdin. Teʹl ko kuäʹcǩǩem jälstem reviirist lie ââʹlj, ǩeârddõs lij kuuitâǥ koumm.
4 §
Pââjuum koʹrvvõs
Tän ceäkksest mieʹrruum pââjuum ǩeârddõõzzin vääʹldet lokku puõccui šuurab vuäʹzz kuäʹcǩǩmi porrmõõžžâst 3 momenttista sarnnum paalǥâskooʹddi vuuʹdin.
Pââjuum ǩeârddõs kuäʹcǩǩem jälstem reviirist lij kueʹhtt. Teʹl ko kuäʹcǩǩem jälstam reviirist lie ââʹlj, ǩeârddõs lij kuuitâǥ vitt.
Pââjuum ǩeârddõõzz ââʹnet teʹl, ko laʹsǩǩeet koʹrvvõõzz meäʹr tääi paalǥâskooʹddi åårai kuäʹcǩǩmi reviirin:
1) Pääʹnntuõddâr,
2) Âʹvvel,
3) Kaldoaivi,
4) Kyrö
5) Käsivarsi,
6) Lappi,
7) Muddusjäuʹrr,
8) Muotkatuõddâr,
9) Näkkälä,
10) Njauddâm,
11) Paaččjokk,
12) Paistuõddâr
13) Sallivääʹrr,
14) Väʹččer.
5 §
Koʹrvvõs raajjvuuʹdest
Reviir mieʹlddlaž ǩeârddõs Lääʹddjânnam da nuuʹbb jânnam raai kuhttu peälla vuälteei reviirist, koʹst åårrai pieʹss lij nuuʹbb valdia vuuʹdest, lij 4 §:sest sarnnum paalǥâskooʹddi peäʹlnn täujja kueʹhtt da jeeʹres paalǥâskooʹddi peäʹlnn täujja õhtt.
Puäʒʒhåiddvuuʹd raai saujjpeälla vuälteei kuäʹcǩǩem reviirist määuset vuäʹzz koʹrvvõõzzâst.
6 §
Koʹrvvõõzz mähssmõš paalǥâskooʹddid 
Korʹvvõs määuset paalǥâskådda pukin tõn vuuʹdest åårai 3, 4 leʹbe 5 §:sin mieʹrruum kuäʹcǩǩmi reviirai diõtt. 
Reviir mieʹlddlaž koʹrvvõõzz jueʹjjet paalǥâskooʹddi kõõskâst teʹl, ko ǩiõččât, što reviir kuäʹcǩǩem påʹrre puõccuid määŋg paalǥâskooʹddi vuuʹdest. Teʹl ko revirr lij vuäʹssen 4 §:z 3 momenttist mieʹrruum paalǥâskååʹdd vuuʹdest, laʹsǩǩeet koʹrvvõõzz ââʹneeʹl 4 §:z 1 momenttist mieʹrruum ǩeârddõõzz obb reviirist.
Sääʹmjânnam pirrõskõõskõs meärrad koʹrvvõõzzin da mähss koʹrvvõõzzid paalǥâskooʹddid pirrõsministeria tän diõtt ouddum vaaʹrin. Koʹrvvõs määuset juõʹǩǩ eeʹjj mââimõsân kålggmannu 31 peeiʹv.
7 §
Koʹrvvõs mieʹrǩǩuum puõʒʒust
Paalǥâskåʹdd mähss tõn koʹrvvõõzzâst, koon lij vuäǯǯam, puõccu vuämsteeja raukkmõõzzâst suʹnne koʹrvvõõzz nåkam mieʹrǩǩuum puõccu diõtt, koonn kuäʹcǩǩem lij kåʹddam leʹbe muđoi raannâm tõn nuʹtt, što tõt âlgg looppted.
8 §
Čiõlǥtõõzz da taʹrǩǩumuužž
Meäʹcchalltõs čiõlǥad juõʹǩǩ eeʹjj kuäʹcǩǩmi pieʹss'sõõʹjid da ââʹlji meäʹr 3 §:z 1 momenttist mieʹrruum reviir mieʹlddlaž ǩeârddõõzzi laʹsǩǩeem vääras da čiõlǥad da ärvtââll taarbi mieʹldd nuuʹbb jânnam vuuʹdest Lääʹddjânnam raai ââlda åårai reviirai lååkkmeäʹr.
Taarbi mieʹldd Meäcchalltõs vuäitt jäʹrjsted puõccu vuämsteeja raukkmõõzzâst skääđđpääiʹǩest taʹrǩǩumuužž, što vueiʹtet praavâd, što mõõnn diõtt mieʹrǩǩuum puäʒʒ lij kåddjam.
9 §
Viõʹǩǩepueʹttem
Tät asetõs šâdd viõʹǩǩe ođđeeʹjjmannu 15 peeiʹv 2002. Tän asetõõzzin kååʹmtet kuäʹcǩǩmi puäʒʒtallu tueʹjjuum skääđai koʹrvvõõzzâst pâʹzzlâšttammannu 18 peeiʹv 1999 uʹvddum riikksåbbar tuʹmmstõõǥǥ (373/1999) tõzz mâʹŋŋa tueʹjjuum muʹttõõzzivuiʹm.
Heʹlssnest ođđeeʹjjmannu 3 peeiʹv 2002
Pirrõsministedr Satu Hassi
Halltõsduumšeǩ Hannu Karjalainen