Nr 108
Valdiasåbbar asetõs sääʹmǩiõll'lääʹjj tiuʹddepiijjmõõžžâst
Uʹvddum Heʹlssnest täʹlvvmannu 12 peeiʹv 2004
Valdiasåbbar tuʹmmstõõǥǥ mieʹldd, kååʹtt lij rajjum vuõiggâdvuõttministeeria čuäʹjtõõzzâst, šiõtt'teet rosttovmannu 15 peeiʹv 2003 uʹvddum sääʹmǩiõll'lääʹjj (1086/2003) 29 §:z 1 momeent da 33 §:z mieʹldd:
1 §
Teʹl ko veʹrǧǧneǩ âlgg uʹvdded sääʹmǩiõll'lääʹjj (1086/2003) mieʹldd sääʹmǩiõllsaž tuåimtemǩeeʹrj leʹbe alggpuäđlaž lääʹdd- leʹbe ruõccǩiõllsaž äʹššǩeeʹrjest sääʹmǩiõllsaž jåårǥlâttmõõžž leʹbe tõõzz uʹvddum sääʹmǩiõllsaž äʹššǩeeʹrjest lääʹdd- lebe ruõccǩiõllsaž jåårǥlâttmõõžž, tõt vuäitt raajjâd leʹbe jåårǥlâʹtted äʹššǩeeʹrj jiõčč, ko mâka tõn reâuǥast lij sääʹmǩiõllsaž ooumaž. Veʹrǧǧneǩ vuäitt haʹŋǩǩeed jåårǥlâttmõõžž sääʹmǩiõll'lääʹjj 26 §:sest mierruum sääʹmǩiõllkonttrest leʹbe veeʹrjlaž jåårǥlõʹttjest, ǩeäʹst lij vuõiggâdvuõtt jåårǥlâʹtted sääʹmǩiõlâst leʹbe sääʹmǩiõʹlle.
2 §
Sääʹmǩiõllkoontâr leʹbe jåårǥlâttmõõžž raajjâm ooumaž âlgg tuõđšted ooudbu sarnnum jåårǥlâttmõõžž vuõiggân.
3 §
Veʹrǧǧneeʹǩǩ, kooi tuâjjǩiõll lij sääʹmǩiõll, vuäiʹtte ââʹnned sääʹmǩiõl sij ǩeeʹrjin, kook lie čuäjtum sääʹmǩiõll'lääʹjj 2 §:z 1—3 momeentin sarnnum veʹrǧǧneeʹǩǩid.
4 §
Sääʹmǩiõllkoontâr oudd õõutsââʹjest sääʹmǩiõllsåbbrin juõʹǩǩ vaalpoodd sääʹmǩiõll'lääʹjj 29 §:z 1 momenttist mierruum mainnâz, kååʹtt âlgg õhtteed sääʹmteeʹǧǧest uʹvddum lääʹjj (974/1995) 7 §:sest mierruum sääʹmteeʹǧǧ mainnsa valdiasåbbra.
5 §
Tät asetõs šâdd viõʹǩǩe pâʹzzlâšttammannu 1 peeiʹv 2004.
Heʹlssnest täʹlvvmannu 12 peeiʹv 2004
Vuõiggâdvuõttminister Johannes Koskinen
Lääʹjjšiõtteemduumšeǩ Eero J. Aarnio