Nr 276
Lääʹǩǩ sääʹmlääʹjj muʹttmest
Uʹvddum Heʹlssnest njuhččmään 16 peeiʹv 2004
Riikkpeeiʹvi meäʹrrõõzz mieʹldd kååʹmtet täʹlvvmannu 24 peeiʹv 1995 uʹvddum sääʹmlääʹjj (253/1995) 50 § di muʹtteet 18 da 20 §, 39 §:z 3 momentt, 55 §, 57 §:z 2 momentt da 65 § nåkamnallšem ko tõin lij 39 §:z 3 momentt lääʹjjest 1289/1996, nääiʹtaa:
18 §
Lääin da veäʹǩǩvuõđ ooccmõš da miõttmõš 
Lääinaid da veäʹǩǩvuõđid meâtt ooccmõõžžâst Sääʹmjânnam tuâjjviõkk- da jieʹllemvueʹǩǩkõõskõs. Ooccmõš âlgg raajjâd pâi ǩeʹrjjteeʹl da tõt âlgg vuâllaǩeʹrjjted. Tõn cõõggkani, što mâiʹd jeeʹresåʹrnn lääʹjjest šiõtt'teet, âlgg ooccmõõžž vuâllaǩeʹrjjted.
Ouddâl ko tuâjjviõkk- da jieʹllemvueʹǩǩkõõskõs meärrad lääin leʹbe veäʹǩǩvuõđ miõttmest, vueiʹtet ooccmõõžžâst haʹŋǩǩeed kååʹdd jânnampäiʹǩǩjieʹllemvueʹǩǩveʹrǧǧneeʹǩǩ ceälkkmuužž di jeeʹres ceälkkmuužžid še. Ceälkkmušmõõntõõllmuužžâst vueiʹted uʹvdded tääʹrǩab šiõtt'tõõzzid mädd- da meäʹcctäällministeeria asetõõzzin.
20 §
Kååccmuš
Mädd- da meäʹcctäällministeriast, mädd- da meäʹcctäällministeeria teâttkääzzkõskõskksest da tuâjjviõkk- da jieʹllemvueʹǩǩkõskksest lij vuõiggâdvuõtt uʹvdded sij tuâjast åårai veʹrǧǧoummui tuâjjân raajjâd ooudpeäʹlnn iʹlmmtekani tän lääʹjjest mieʹrruum veäʹǩǩvuõđi, lääinai da jeeʹres tuäʹrjjõõzzi miõttmõʹšše, mähssmõʹšše da âânmõʹšše kuulli oudldõõzzi da määinai jäkktõõllmuužž vuâppmõõžžâst taʹrbbeš taʹrǩǩumuužžid.
Täʹrjjõõzz vuäǯǯai âlgg koʹrvvõõzztää čuäiʹjted taʹrǩǩeeja pukid taarbšeei tiill- da jeeʹres äʹššǩeeʹrjid, koin juuʹrdet še autmaattlaž teâđai ǩiõtt'tõõllmuužž veäkka leʹbe jeeʹresnalla rajjum leʹbe seilltum vaʹstteei aunnsid da še jeeʹresnalla veäʹǩǩted taʹrǩǩõõzzâst. Taʹrǩǩeejast lij vuõiggâdvuõtt vuâppamtuâi oudldam veeidâsvuõđâst taʹrǩǩeed tuäʹrjjõõzz vuäǯǯaja kuulli žeevti aassâmpääiʹǩid, šâddmääddaid, puuʹt'tem- da valmštemstrooitlid, ääiʹtid, kaaupšempääiʹǩid da jeeʹres tuäʹrjjõõzz miõttmõʹšše da mähssmõʹšše vaikkteei  åårrmõõžž. Taʹrǩǩumuš vuäitt kuõskkâd seämmanlla tuäʹrjjõõzz vuäǯǯja leʹbe tuäʹrjjõõzz tuåimteeja. Taʹrǩǩumuužž ij vueiʹt kuuitõǥ tueʹjjeed dommrääuh vuâlaž põõrtin.
39 §
Veäʹǩǩvuõđi väʹsttpeʹrrjummuš
Veäʹǩǩvuõtt âlgg peʹrrjed mååust mååžna ääiʹj seʹst lokku vääʹldeeʹl väʹsttpeʹrrjumuužž määiʹn da oummu mäʹhssemoodd. Valdiasåbbar asetõõzzin vueiʹtet šiõtt'teed tääʹrǩben tõn ääiʹjest, koonn seʹst veäʹǩǩvuõtt âlgg peʹrrjed mååust. Veäʹǩǩvuõđ ij vuäǯǯ teänab mieʹrreed väʹsttpeʹrrjumuužž vuâlla tõn mâŋŋa, ko 10 eeʹǩǩed lij mõõnnâm tõʹst, ko veäʹǩǩvuõđ mââimõs mähss lij mahssum. Peʹrrjumuužž vuäǯǯat tueʹjjeed piiđi åålǥasmettumuužžâst mieʹrruum vueʹjjest. 
55 §
Tiuʹddepiijjâmveʹrǧǧneeʹǩǩ
Mädd- da meäʹcctäällministeria, Sääʹmjânnam tuâjjviõkk- da jieʹllemvueʹǩǩ-kõõskõs, mädd- da meäʹcctäällministeeria teâttkääzzkõskõõskõs Aanar kååʹdd jânnampäiʹǩǩjieʹllemvueʹǩǩveʹrǧǧneǩ da Meäʹcchalltõs âʹnne huõl tän lääʹjj tiuʹddepiijjâm diõtt. Meäʹcchalltõõzz Pâʹjj-Sääʹmjânnam luâđhåiddvuʹvdd âânn huõl valdia mädd- da čääʹccvuuʹdi håiddmest sääʹmvuuʹvdest da tõõi ââʹnnmest šõddi jeeʹres tuåimin, koid tät lääʹǩǩ oudldâstt. Mädd- da meäʹcctäällministeeria asetõõzzin vueiʹtet taarbi mieʹldd uʹvdded tääʹrǩab meäʹrrõõzzid mõõntõõlmin, mâid jäkktõõlât tän lääʹjj tiuʹddepiijjmest. 
Tän lääʹjj mieʹlddlaž tuâjain vueiʹtet, tõn mieʹldd ko valdiasåbbar asetõõzzin tääʹrǩben šiõtt'teet, ââʹnned veäʹǩǩen Sääʹmjânnam läänhalltõõzz da jeeʹres valdia veʹrǧǧneeʹǩǩid.
57 §
Kuuli koʹrvvummuš
Saaʹmi ouddoummu da suu veäʹǩǩen reâuggai piisar tuâjai hoiʹddmest määuʹset pääʹlǩ da kuuli koʹrvvõõzz mäddtääll ooudâsviikkâm-foond vaaʹrin tõn mieʹldd ko mädd- da meäʹcctäällministeria jeerab meärrad.
65 §
Tääʹrǩab šiõttʹtõõzz da nââneei äʹššǩeʹrjjkääʹvv
Valdiasåbbar asetõõzzin vueiʹtet šiõtt'teed tääʹrǩben tuäʹrjjeemvueʹjjin, tuäʹrjjõõzz miõttâmvuâđain, tuäʹrjjõõzzi jäänbõsmieʹrin da suåppmõʹšše vuâđđai tuäʹrjjõõzzi takai määiʹnin da tõʹst, što mäʹhtt tuäʹrjjõs vuäitt leeʹd jeeʹresnallšem vuuʹdi mieʹldd.
Mädd- da meäʹcctäällministeeria asetõõzzin vueiʹtet uʹvdded tääʹrǩab šiõtt'tõõzz tuäʹrjjõõzz uʹvddmest da tuäʹrjjeemtaaʹzzin, ko mõõk lie tän lääʹjjest da tõn mieʹldd uʹvddum asetõõzzâst. Mädd- da meäʹcctäällministeria raavâd še kaupp- da veäʹlǧǧǩeeʹrji kääʹvid, ooccâm- da tuʹmmjemkääʹvid da jeeʹres kääʹvid, koid taarbšet tän lääʹjj âânnmõõžž diõtt.
Tät lääʹǩǩ šâdd viõʹǩǩe kiđđmannust 1 peeiʹv 2004.
Ko tät lääʹǩǩ šâdd viõʹǩǩe, viõǥǥâst åårram šiõtt'tõõzzid da meärrõõzzid ââʹnet kuuitâǥ tõn räjja ko jeeʹreld mieʹrreet.
Heʹlssnest njuhččmään 16 peeiʹv 2004
Tääʹssvääʹld Presidentt Tarja Halonen
Mädd- da meäʹcctäällminister Juha Korkeaoja