Gedanken vegn dem ershtn mol

Ojb du host nisht gehat kejn seksuele batsiungen mit kejn tsvejter perzon, kerstu hobn farshejdene gedanken vegn dem, vi azoj du vest zich filn, vi azoj du vilst es zol forkumen, un ven dos vet geshen. Du host efsher gehert fun chavejrim vos hobn vegn dos geret, tsi gezen filmen, gelejent tsajtungen oder gehert vos es zol nisht zajn vos ruft baj dir arojs gedanken vegn vi azoj dos darf forkumen.

Gevejntlech zenen dos gedanken vegn vaginalen seks. Anketes un forshung hobn gevizn az a sach mentshn hobn nisht kejn vaginale seksuele batsiung farn farendikn di gimnazie. Derojf kenen zajn alerlej sibes: tsum bajshpil, vajl me vil nisht, vajl me hot nisht gehat kejn gelegenhejt dertsu, vajl me hot beser lib seksuele batsiungen mitn zelbn min oder vajl men iz farintresirt tsu hobn seksuele batsiungen ojf an ander ojfn.

Du alejn bashlist

Es treft, me zol zich filn gedrikt oder getsvungen tsu hobn seksuele batsiungen, chotsh me vil nisht in der emesn oder me filt zich noch nisht grejt dertsu.

S'ken ojch zajn, me zol muzn tsuvartn mitn seksueln akt, chotsh me bagert dos.

Dos gefil az du verst getsvungen tsu hobn seksuele batsiungen oder zej optsulejgn ken zich nemen fun a gezelshaftlechn druk mitsad dajn krajz chavejrim, oder fun dervartungen fun dajn mishpoche, tsum bajshpil.

Nor es iz vichtik tsu gedenken az du darfst ton dos, vegn vos du filst alejn az es iz gut far dir.

Du alejn bashlist:

  • vegn dajn kerper;
  • tsi du vilst un ven du vilst hobn seksuele batsiungen;
  • ojf voser ojfn du vilst es ton;
  • mit vemen du vilst es ton.

Tsi iz faran an elter-grenets far seksuele batsiungen?

Me ken nisht bashtimen kejn genojen elter ven a mentsh iz grejt tsu hobn seksuele batsiungen mit a tsvejtn. Du muzt dos alejn filn. Ober es iz faran a gezets vos farvert a mentshn iber 15 jor alt tsu hobn velche nisht iz seksuele batsiungen mit emetsn unter 15 jor. Nor inem gezets shtejt ojch geshribn az me vert nisht farmishpet ojb es iz kentik nisht geven kejn onfal.

Di machriedike aspektn zenen der untershejd in elter, tsi der untershejd in der antviklung fun bejde tsdodim vos hobn gehat seksuele batsiungen iz klejn, un tsi dos iz forgekumen mit der fuler haskome fun bejde tsdodim. Dos gezets batsit zich glajch tsu bejde minim. Zajn tsvek iz tsu bashitsn kinder fun dervaksene, velche kenen zej tsvingen tsu ton zachn kegn zejer viln. Lojt gezets hot kejner nisht kejn recht ontsuvarfn seksuele aktn ojf a tsvejtn, kegn jenems viln.

Ejtses farn hobn seksuele batsiungen mit a tsvejtn

Gevejntlech, zenen di seksuele batsiungen dos ershte mol gor andersh vi me hot zich forgeshtelt. Es ken afile blajbn a gefil az dos iz geven a durchfal, vajl es iz nisht geven azoj vi m'hot dervart.

Vi a sach andere zachn in lebn, iz seks epes in vos me darf zich genitn, kedej es zol zich beemes gut bakumen. Zeltn ven ken emetser ojsshpiln zajn balibst lid ojf der gitare, nisht visendik fun kejn akord un nisht hobndik kejn mol gehaltn afile dem instrument in di hent! Ejder es kumt dos ershte mol, iz do a rej zachn tsu haltn in zinen un zachn tsum praktitsirn.

  • Pruv ojs baj tsajtns farshejdene formen fun masturbatsie, vet es dir helfn visn vos du host lib.
  • Kedej tsu gefinen ajngeneme erter ojf jenems kerper: redt ejner mitn andern, zucht, filt un git tsu visn.
  • Me ken gletn, kushn un ton a sach andere ajngeneme zachn kedej zich kegnzajtik untertsugebn seksueln chejshek.
  • Banits zich mit a prezervativ oder mit a lateks-tichl kedej zich tsu bashitsn, un praktitsir frier vi azoj zich tsu banitsn dermit.
  • Hobn seksuele batsiungen ojf a zicher ort ken helfn zich tsu filn ruik un ojsgeshpant.

Psuledikejt

A mol hert men nitsn dos vort "psuledik" vegn emetsn vos hot nisht gehat kejn seksuele batsiungen. Der ojsdruk ken batajtn az der mentsh hot nisht gehat kejn vaginale seksuele batsiung oder kejn seksuele batsiung biklal.

Tejl mentshn hobn nisht lib tsu nitsn verter vi "psuledikejt" (ojf shvedish "umshuld"). Efsher vajl dos sugerirt a shuld ven men iz nisht psuledik, elehej me volt zich badarft shemen vos me hot gehat seksuele batsiungen.

Nor s'rov mentshn vos nitsn dos vort "psuledikejt" trachtn nisht azoj. Zej mejnen poshet tsu zogn az me hot noch nisht gehat kejn seksuele batsiungen. Noch di ershte seksuele batsiung zogt men gevejntlech az me iz poter gevorn der psuledikejt oder az me hot zi ongevojrn. Aza moment ken farshafn gefiln fun shtolts oder tsufridnkejt.

Jeder ejner hot dos recht tsu bashlisn in velchn moment er vil hobn di ershte seksuele batsiung. Dos iz nisht kejnems ejsek. Es zet zich nisht on fun drojsn, tsi me hot gehat seksuele batsiungen tsi nisht. Afile a dokter oder an akusherke kenen dos nisht bamerkn.

Mejdlshaft-hajtl?

Ven men redt vegn psulim oder mejdlshaft-hajtl, mejnt men di efenung tsvishn der drojsendiker vagine un der inevejnikster. Di dozike efenung hot a mol an umregulere forem un der breg derfun ken a mol zajn a bisl geknejtsht oder gefalbt. Di efenung brejtert zich ojs un vert elastisher bes der pubertet, ober zi vert kejn mol nisht farshvundn. Dos hejst, az s'iz nishto kejn shum membran tsi hojt vos zol tsudekn di vagine.

Azoj vi s'iz nishto kejn membran, iz ojch nishto kejn shum zach vos ken tserisn vern bajm hobn seksuele batsiungen. Fun destvegn treft az gevise mejdlech blutikn ven hobn vaginale seksuele batsiungen tsum ershtn mol, nor di merste blutikn nisht.

Di sibe fun der blutikung ken zajn az der breg fun der efenung fun der vagine iz zejer eng. Ober es kenen zajn noch andere sibes, tsum bajshpil, a tsu grojse geshpantkejt oder a nisht genugendike onregung.