Iivangkiiliu Matthæusip allagaa.
Jiisusi-Kristusip, Daavip ernerata, Aaperaap ernerata, eqqarliisa allassimaffiat.
Aaperaap ernertaaraa Iisaaq, Iisaap Jaaku, Jaakup Juda qatanngutaalu.
Judap Tamarimik ernertaarai Peresi Zeralu, Peresip ernertaaraa Hesroni, Hesronip Rami, Ramip Amminadabi, Amminadabip Nakshoni, Nakshonillu Salmoni.
Salmonip Rahabimik ernertaaraa Boazi, Boazip Ruthimik ernertaaraa Obedi, Obedip ernertaaraa Isaji, Isajip ernertaaraa kunngi Daavi.
Daavip Uriap nulianik ernertaaraa Salomo, Salomop ernertaaraa Rehabeami, Rehabeamip Abija, Abijap Asafi, Asafip Joshafati, Joshafatip Jorami, Joramip Uzzija, Uzzijap Jotami, Jotamip Akazi, Akazip Hizkija, Hizkijap Manasse, Manassep Amosi, Amosip Josija, Josijap Jekonja qatanngutaalu Babylonimut aallarussaanerup nalaani.
Babylonimut aallarussaanerup kingornagut Jekonjap ernertaaraa Shealtieli, Shealtielip Zerubbabeli, Zerubbabelip Abiudi, Abiudip Eljakimi, Eljakimip Azori, Azorip Sadoki, Sadokip Akimi, Akimip Eliudi, Eliudip Eleazari, Eleazarip Mattani, Mattanip Jaaku, Jaakup Josefi, Mariap uia.
Mariap ernertaaraa Jiisusi, Kristusimik taasaq.
Taamaalillutik Aaperaamiit Daavimut kinguaariissoqatigiit katillutik 14-iupput, Daavimiit Babylonimut aallarussaanerup tungaanut kinguaariissoqatigiit 14-iullutik, Babylonimullu aallarussaanermiit Kristusimut kinguaariissoqatigiit 14-iullutik.
Jiisusi-Kristusillu inunngornera ima pivoq: Anaanaa Maria Josefilu aappassiariipput, inooqatigiilersinnagilli malunnarsivoq Maria Anersaakkut Illernartukkut naartusoq.
Uissaali Josefi assuarnaatsuugami nuliassilu tusagaanerlutsikkumannginnamiuk, eqqarsaatigaa malunnaatsumik qimanniarlugu.
Taama eqqarsaateqartillugu, takuat, Naalakkap inngiliata sinnattukkut saqqummerfigaa oqarfigalugulu: »Josefi, Daavip ernera, Mariap nulissiunnissaa nangaassutigissanngilat naartua Anersaakkut Illernartukkut ilumiugineqalermat.
Ernertaarumaarpoq, taannalu Jiisusimik atsissavat, innuttani annaatissammagit ajortaannit.« Tamakku tamarmik pipput Naalakkap pruffiitikkut oqaaserisaa eqquuteqqullugu, oqarmat: »Takuat, niviarsiaq naartulissaaq ernertaassallunilu, atsissavaallu Immanuelimik« – imaappoq: Guuti ilagaarput.
Josefi iterami Naalakkap inngiliata inassutaa naammassivaa Marialu nuliartaaralugu.
Ernertaartinnaguli tutinneq ajorpaa.
Nukappiararlu Jiisusimik atserpaa.
Iivangkiiliu Matthæusip allagaa.
Jiisusi Betlehemimi Judæamiittumi Herodesi kunngiutillugu erniummat ilisimasut Kangiamiut Jerusalemimut pipput aperalutillu: »Juutit kunngiat inoorlaaq sumiippa? Ulloriaa nuisoq takugatsigu pallorfigiartorparput.« Kunngip Herodesip tamanna tusaramiuk annilaarpoq, Jerusalemimiullumi tamarmik annilaarput.
Palasiunerit inuiaqatigiillu allakkanik ilisimasortaat tamaasa katersortippai siunersiorlugillu Kristusi sumi inunngortussaanersoq.
Akivaat: »Betlehemimi Judæamiittumi, pruffiitikkut ima allassimammat: Illit Betlehemi Judap nunaani, Judap naalagaanerini minnersaanngilluinnarputit.
Ilinnit pissaaq siulersuisoq, innuttannik Israelikkunnik paarsisussaq.« Taava Herodesip ilisimasut taakku isertortumik qaaqquai apersuutigeqqissaarlugulu ulloriaq taanna qanga takkussimanersoq.
Betlehemimullu aallartippai oqarfigalugillu: »Meeraq apersuutigeqqissaarniarsiuk.
Nanigussiullu nalunaarfigigisinga, uangattaaq pallorfigiartussagakku.« Kunngip oqaasii tusareeramikkit aallarput ulloriaq nuisoq takusimasartik siuleralugu; ulloriarlu meeqqap inaata qulaanut pigami unippoq.
Ulloriaq takugamikku tipaatsungaaleqaat.
Illumullu iserput takullugulu meeraq anaanamini Mariamiittoq, seeqqumiarlutillu pallorfigaat, illerfisillu mapperlugit taassumunnga tunissutissatik sassaappaat tassaasut kuulti, tipigissaat myrralu.
Sinnattukkulli saqqummerfigineqarput ilisimatinneqarlutik Herodesimut uteqqunagit, aqqutikkullu allakkut nunaminnut angerlarput.
Aallareermata Naalakkap inngiliata Josefi sinnattukkut saqqummerfigaa oqarfigalugulu: »Makillutit, meeraq anaanaalu ilagalugit Egyptenimut qimaagit, tassaniigillu uannit oqarfigineqarserlutit.
Herodesimmi meeraq ujarniarpaa toqukkumallugu.« Taava makeriarluni unnuaatillugu meeraq anaanaalu ilagalugit Egyptenimut aallarpoq.
Tassaniipporlu Herodesi toqutserlugu, tassa Naalakkap pruffiitikkut oqaaserisaa eqquuteqqullugu, oqarmat: »Ernera Egyptenimit qaaqquara.« Herodesip paasigamiuk ilisimasunit salloqittarneqarluni kamattorsuanngorpoq; Betlehemimilu eqqaanilu tamani nukappiaqqat marlunnik ukiullit nukarliusullu toqorartippai meeqqap qanga inunngorneranik ilisimasut oqaatigisaat tunngavigalugu.
Taamaalillutik eqquupput pruffiitip Jeremiap oqaasii imaattut: Ramami tusarsaavoq nillianeq, upippalunneq kappialanersuarlu.
Rakelip qitornani upippai tuppallersagassaananilu, peerussimammatami.
Herodesi toqummat Naalakkap inngiliata Egyptenimi Josefi sinnattukkut saqqummerfigaa oqarfigalugulu: »Makillutit meeraq anaanaalu ilagalugit Israelip nunaanut aallarit meeqqamik toqutsiniartut toqoreermata.« Makillunilu meeraq anaanaalu ilagalugit aallarpoq Israelillu nunaanut pilluni.
Tusaramiulli Arkelaosi ataatani Herodesi kingoraarlugu Judæami kunnginngorsimasoq tassunnarnissani siooragilerpaa.
Sinnattukkulli saqqummerfigineqarluni oqarfigineqarpoq Galilæaliaqqullugu, tassungalu pigami illoqarfimmi Nazaretimik atilimmi najugassippoq eqquuteqqullugu pruffiititigut oqaaserisaq: »Nazaræerimik taaneqassaaq.« Ulluni taakkunani Johannesi Kuisisoq saqqummerpoq, Judæallu inoqajuitsuani ima oqaluussisalerpoq: »Allamik isumataaritsi, Qilaap Naalagaaffia qanillimmat.« Taannaavoq pruffiitikkut Esajakkut oqaatigineqartoq, oqarmat: Inoqajuitsumi suaartoqarpoq: Naalakkap aqqutissaa iluarsarsiuk, aqqusininnguit ingerlavissai nalimmatsersigit! Johannesi taanna qallersaateqarpoq qatigattuup meqquinik sanaamik qiteruteqarlunilu amiusumik, inuussutigaalu pillertat tungusunnitsuullu nunaannarmi nassaaq.
Taava Jerusalemimiut Judæamiullu Jordanillu eqqaamiut tamarmik Johannesi ornippaat, kuussuarmilu Jordanimi taassumunnga kuisipput ajortitik anngiiaatigalugit.
Takugamigilli farisiiarit saddukiiarillu amerlasuut imminit kuineqarumallutik orniguttut, oqarfigai: »Paarmortorujuit piaraat, kia isumaqalersikkamisi kamannissaq nalliuttussaq ingalassinnaagissi? Taamaattumik allamik isumataarnermut naapertuuttunik inerititaqaritsi, isumaqaqinasilu ima oqaannarsinnaallusi: Aaperaat ataatagaarput.
Oqarfigaassimi: Guutip ujaqqanik makkuninnga uummartitsilluni Aaperaat qitornassarsisinnaavaa.
Ulimaat orpiit mannguinut tutsereerpoq.
Orpik sunaluunniit ajunngitsunik inerititaqanngitsoq ulimallugu uppitinneqassaaq innermullu iginneqarluni.
Uanga imermik kuivassi allamik isumataaqqullusi; kingunikkulli tikiuttussaq uannit nakuuneruvoq, uangalu qinngaqquppunga taassuma aloqutaanik tigumiarnissamut.
Taassuma Anersaamik Illernartumik innermillu kuissavaasi.
Nivaattani teqqalatitsissut tigumiarpaa, karrertaajaaffini salinniarlugu; qajuusiassaatini quimut katersorumaarpai, qalipakuilu ikuallassavai innermi qamiuitsumi.« Taamani Jiisusi Galilæamit Jordanimukarpoq Johannesimut, taassumunnga kuisikkumalluni.
Johannesili pinaaseraluarpoq oqarluni: »Uangaana ilinnut kuisittussaagaluartunga, illilli ornipparma!« Jiisusilli akivaa: »Akueriinnannga! Taamatummi iluartussaq tamarmiusoq naammassisariaqarparput.« Taava akueraa.
Jiisusili kuisereerluni erniinnaq imermit qaqimmat qilaat qulaagut ammarput, takuaalu Guutip anersaavata tuisut illuni aqqarfigigaani quliminut pilluni, nipilu qilannit tutsiuppoq: »Tassa ernera asasara, nuannarisara.« Taava Jiisusi Anersaamit inoqajuitsumut ingerlanneqarpoq Diaavulumit usserneqaqqullugu.
Ullullu 40-t unnuallu 40-t iisaqannginnami kiisa perlilerpoq.
Ussiisullu ornippaa oqarfigalugulu: »Guutip ernerippatit ujaqqat makku timiusanngoqqukkit.« Akivorli: »Allassimavoq: ›Inuup timiusaannaq inuussutissarinngilaa, oqaaserli sunaluunniit Guutip qarnanit anisoq‹.« Taava Diaavulup Jiisusi illoqarfimmut illernartumut ingerlaqatigaa, naalaffiullu inngianut pisippaa oqarfigalugulu: »Guutip ernerippatit taava samunga nakkarit.
Allassimavormi: Inngilini peqqussavai, taakkualu kissumiassavaatsit isikkat ujaqqamut sumulluunniit kalluteqqunagu.« Jiisusillu oqarfigaa: »Allassimavortaaq: ›Naalagaq Guutit misilissanngilat‹.« Maanna Diaavulup Jiisusi qaqqamut portusoorsuarmut ingerlaqatigaa qimerloortillugillu silarsuarmi naalagaaffiit tamaasa taakkualu alutornassusiat, Diaavulullu oqarfigaa: »Tamakku tamaasa ilinnut tunniutissavakka pallorfigigumma.« Taava Jiisusip oqarfigaa: »Nigorit, Saatani! Allassimavormi: ›Naalagaq Guutit pallorfigissavat taannalu kisiat kiffartuullugu‹.« Taava Diaavulup Jiisusi qimappaa; takuallu, inngilit ornippaat kiffartorfigalugulu.
Jiisusip Johannesi parnaarunneqartoq tusaramiuk Galilæamukarpoq.
Nazaretilu qimallugu Kapernaumimi tasersuup sinaani Zebulonip Naftalillu nunaanni nunassippoq eqquuteqqullugu pruffiitikkut Esajakkut oqaaserisaq imaattoq: Zebulonip nunaa Naftalillu nunaa, Imaq sinerlugu Aqqusineq, Nuna Jordanip ungataaniittoq Galilæalu Inuiaqatigiit najugaat, inuiaat taarsiortut qaamasorsuaq takuaat, qaamasullu nuiffigai toqup nunaani taartitaanilu ittut.
Taamanernit aallarnerluni Jiisusi ima oqaluussisalerpoq: »Allamik isumataaritsi, Qilaap Naalagaaffia qanillimmat.« Jiisusi Galilæap Tasersuata sinaagut ingerlagami takuai qatanngutigiit marluk, Siimuut Petrusimik taasaq qatanngutaalu Andreasi, qassusersortut, aalisartuugamimmi.
Oqarfigai: »Qaallusi malissinga, taava inunnik aalisartunngortissavassi.« Erniinnarlu qassutitik ilaginnaannarlugit malippaat.
Tassannga ingerlaqqikkami takuai qatanngutigiit allat marluk, Jaaku Zebedæusip ernera qatanngutaalu Johannesi ataatartik Zebedæusi ilagalugu umiatsiaami qassutit passukkaat.
Jiisusip qaaqquai, erniinnarlu umiatsiaq ataatartillu qimallugit malilerpaat.
Jiisusip Galilæa tamaat angalaarfigaa, synagogiini ajoqersuisarluni, Naalagaaffimmik iivangkiiliu oqaluussissutigisarlugu, inuiaqatinilu nappaataannik anniaataannillu tamanik ajorunnaarsittarlugit.
Tusaamaneqalerporlu Syriami tamarmi; taassumunngalu aggiuttarpaat ajuutillit tamaasa, tassa assigiinngitsunik nappaatillit anniaateqartullu, anersaapilullit, noqartartut nukillaarsimasullu; ajorunnaarsittarpaalu.
Inuppassuillu Galilæamit, Dekapolisimit, Jerusalemimit, Judæamit Jordanillu ungataanit Jiisusi malippaat.
Jiisusip inuit takugamigit qaqqamut majuarpoq ingillunilu, ajoqersugaasalu ornippaat.
Taava oqalulerpoq ajoqersorlugillu: »Pilluarput anersaakkut piitsut, taakkuami Qilaap Naalagaaffia pigaat.
Pilluarput aliasuttut, taakkumi tuppallersarneqassapput.
Pilluarput qanilaartut, taakkuami nunarsuaq kingornutissavaat.