Daate Bueriesaernie Jeesus Kristusen, Jupmelen Baernien bijre, naemhtie aalka:
 Pråffete Jeesajan gærjesne tjaalasovveme:
Vuartesjh, manne dijre-guedtijem dov åvtelen seedtem, gie edtja dutnjien geajnoem røønjedh.
 Miehtjies dajvesne gylje: Jolkesjh Jupmielasse geajnoem, jih riektedh altasasse baalkah!
 Nimhtie Jååhannese, laavkoje, eelki dennie miehtjies dajvesne almetjidie øøhpehtidh edtjieh jarkedh jih lååvkesovvedh jih jijtsh sådtojste luajhtasovvedh.
 Gaajhkh almetjh abpe Juvdejistie jih Jeerusalemmeste altese gåajkoe bøøtin. Dejtie Jåårdanen johkesne laavkoej juktie jijtsh sådtojde byjhkesjin.
 Jååhannesen vaarjoe lij kaamelen-goelkeste njåetsie maam garhtse-beelhtine gårrestamme. 
 Kraesie-njålhtjah jih håannegh byøpmedi.
 Naemhtie boejhkeli: Mov mænngan båata dihte gie manneste veaksahkåbpoe. 
 Im leah manne dan vyørteges guktie altese gaameh-garhtsem maahtam noeledh.
 Manne leam tjaetsine dijjem lååvkeme, dihte jis galka Aejlies Voejkeninie laavkodh.
 Dennie gaskesne Jeesuse Naasaredteste, Gaalijlistie bøøti, jih Jååhannese altemse Jåårdanisnie laavkoej.
 Dallah goh Jeesuse tjaetseste tjuedtjele, dellie vuajna Elmie rihpesåvva jih Voejkene altasasse goh ledtie suaja.
 Jih dellie giele Elmeste govloe: Datne leah mov gieries Baernie, gie øøvre mov mielesne
 Dan mænngan Voejkene Jeesusem miehtjies dajvese voelhkehti, jih Jeesuse debpene njielje luhkie biejjieh årroej, jih Saatane sijhti Jeesusem giehtjelidh. 
 Vaejsjiej luvnie jogresti; jih eengkelh altemse viehkiehtin.
 Goh Jååhannesem lin geeremegåatan tsaakeme, dellie Jeesuse Gaalijlasse bøøti jih Jupmelen Bueriesaerniem øøhpehti, jih naemhtie jeehti: Biejjie lea jæjhteme, Jupmelen rijhke lea gietskesne. 
 Jarkajidie jih jaehkiejidie Bueriesaerniem!
 Ikth goh Gaalijlen jaevrien gaedtiebealam vaedtsieminie, dellie Sijmonem jih altese viellem Aandrejasem vuajnije goh ligan viermieh jadtehteminie, juktie gøølijh ligan.
 Dellie Jeesuse jeahta: Dåeriedidien mannem; edtjem dotnem almetje-gøølijinie darjodh!
 Dallah viermide luejhtieligan jih Jeesusem dåeriedigan.
 Goh Jeesuse ånnetji guhkiebasse båata, dellie Seebedevusen elkide, Jaahke gonnoeh Jååhannesem vuejnije. 
 Dah lægan vinhtsesne viermieh doengeminie.
 Dejtie jijtse gåajkoe gohtje, jih dah jis Seebedevusem, aehtjemesem, vinhtsese laehpielægan triengkigujmie ektesne, jih Jeesusem dåeriedægan.
 Kafar-Naahumasse bøøtin vaedtsien. 
 Goh saabate sjidti, dellie synnagovgese tjaangi jih almetjidie øøhpehti.
 Dah jis eevre geagkarin dehtie øøhpehtimmeste, juktie faamojne øøhpehti, idtji guktie dah tjaalege-ååhpetjh.
 Dennie synnagovgesne jis akte alma maam doenh-aajmoe doerelamme. 
 Dihte jis gæljede:
 Maam edtjh datne, Naasaredten Jeesuse, mijjine? 
 Dagke båateme leah mijjem mirhkedh? Daajram gujht gie leah; Jupmelen eejleskodtje!
 Jeesuse jis doenh-aajmoem aejhteste: Årroeh sjeavehth, jih luejhtieh daam almetjem!
 Jih dihte doenh-aajmoe dam almetjem struvkie, snjæjroen daaresje, luejhtele jih vualka.
 Gaajhkesh alvoehtovvin jih sinsitniem gihtjin: Mij amma daate jis? 
 Orre faamoes jih veaksehke bihkedasse? 
 Doenide aaj byødte guktie luvrieh.
 Jih såalhtjese dan bijre abpe Gaalijlem juhtiej.
 Dehtie synnagovgeste vaadtsajin Sijmone gonnoeh Aandrejasen gåajkoe. 
 Jaahke gonnoeh Jååhannesh dåeriedigan.
 Desnie Sijmonen vuanove skiemtjes, vaejline gællan.