Ikth lij ohtje kaarretje, jih dihte lij Jense. Dan lin baenieh njaelmesne, jih dam hov gaajhkesh utnebe. 
Men Jensen aktene baenesne lij raejkie, jih desnie lin gøøkte nierretjh årroeminie maj nomme Karijuse jih Baktuse. 
Die maa onterligksh nommh, ih goh tuhtjh, men die ligan onterligksh nierretjh aaj. 
Dah ligan dan øøvre onne guktie idtjigan dejtie maehtieh vuejnedh barre stueriedehtije klaasen tjirrh.
   Dan akten lin tjeehpes voepth jih dan mubpien lin røøpses voepth, jih gåabpatjahkh barre sieties aatijste veasoejikan, jih dejstie die nuekies åadtjoejigan. 
   Laavloejigan jih tuhtjigan luste, jih gosse idtjigan åerieh jallh byøpmedh, die heehkigan jih beenghkigan dam baeniem guktie dihte gaetie edtja stoerre jih tjeekeds sjidtedh.
   Akten biejjien dellie dihte akte tuhtji, men die maa åådtje nuekies årrodh.
Dellie jeehti: «Karijuse, die lean heehkeme jih heehkeme.
Manne tuhtjem daate monnen gåetie nuekies stoerre.
» Men dejnie ij lij Karijuse latjkes. 
Jih dellie jeehti: «Månnoeh tjuerien gåetiem sagke stuerebe utnedh. 
Mujhtedh vielle, gosse månnoeh dan jijnjh gåahtah jih karamelh biejjegi byøpmedien, die tæjmoste måbpan stuerebe sjidtien. 
Guktie vielle Baktuse, giehtelh maa!»
   «Jaa jaa, nåå giehtelien vij.»
Ånnetji die Baktuse viht aalka funterdidh. 
Klaasen tjirrh olkese goevli doj veelkes baeniej gåajkoe, jih dellie maam akt bøøti ussjedidh.
   Jih dellie jeehti: «Karijuse!»
   Karijuse: «Mij dellie?»
   Baktuse: «Manne ussjedem - ean goh månnoeh gåetiem maehtieh tseegkedh bijjene dunnie skaavhtebaenesne. 
Manne lim debpene buerebe murriedamme enn vuelnie daennie kråavesne.»
    «Ih onne-vielle datne maam guarkah. 
Ih goh måjhtijh ahte månnoeh daesnie sagke seadtoesåbpoe årroen.
Guktie vienhth jis dohte baenie-saehpie sååjhtoe båetedh!»
Men die maa Baktuse føørhkedi: «Ho ho ho - baenie-saehpie!
Ij Jense naan aejkien jijtse baenieh skubph.»
«Åå, aellieh seadtosne årroeh.» 
Karijuse jeehti, «manne veele måjhtam ihke ikth hov baenide skubpi.»
«Jaavoe ikth. 
Gellie våhkoeh nåhkeme dan mænngan. 
Manne edtjem jiehtedh.