- Na juo. Dál ii ábut šat heađáštuvvat.
Muhtinlágan Stállu njávká iežas roaŋke sealggi ja moddjesta.
- Doai fertebeahtti orrut dáppe dassáigo dálki buorrána.
Márkanii eahppi beasa.
Nuolli njuoska biktasiid ja čohkkadeahkki dohko loidui duljiid ala.
Soai nuolaiga gápmagiid, olgguldasbuvssaid ja báiddiid ja čohkkedeigga.
Muhtinlágan Stállu giessá stuorra ránu sudno birra.
De son viežžá liegga liema ruittus mii lea oapmana alde.
- Gea, juhkki vel liema vai liegganeahppi sihke siskkáldasat ja olgguldasat.
Muhtinlágan Stállu cáhpá goikebierggu sudnuide ja dáhttu mánáid boradit.
Go leaba liegganan ja boradan, de máná-guovttos nu váibaba nu váibaba.
Veahá áiggi maŋŋá Ánne lea juo oađđimin duljiid alde Muhtinlágan Stálu goađis gos nu meahcis, rátnu vel alde.
Arnii maid bahkkejit nahkárat.
Dattetge ii veaje oađđit.
Naba jos eadni lea sudno ohcamin, iige gávnna.
Ja mo jos Muhtinlágan Stálu ustibat bohtet fitnat.
- Eai suige stálut bala borggas? Arne smiehtasta.
Arne ii fuobmán ahte uks leahkkasii.
Muhto fáhkka lea nubbi stállu vel goađis.
Dat lea stuoris ja ropmi.
Gieđat leat stuorrát dego steikepánnot ja guolgan.
Guhkes njunis leat spárttut dievva ja das heaŋgájit stuorra snuolggat.
Stuorra stálu gurut oalggis čohkka uhca stáloš. Da čearsá nu ahte miskan bánit vel oidnojit. Skávžá lea buot soalsin ja njuoskkas.
- Maid don jurddašit.
Leatgo okto áigumin herskkostallat? uhcastáloš jievžá.
- Ho, hoi, láhttesta Muhtinlágan Stállu.
Son lea njulgen čielggi, ja lea nuorra ja searra.
Dat geahččá nuppiid stáludie girkes čalmmiiguin ja reašká romet.
- Gal hal jurddašin ahte doai haksibeahtti olbmo vara.
Lean vel borahan sudno dan mađe, ahte eat dárbbaš guoros čovjjiid borrat.