- Vierttibihtte dáppe årrot dasik dálkke buorrán.
Sijddaj æhppe dal ájn besa.
Nuolle dajt luvva biktasijt ja tjåhkkidihtte luojdduj duoljij nali.
Ja de nuollaba gábmagijt, ålgoldisbåvsåjt ja skirtojt, ja tjåhkkidibá.
Soames áddjá stuor ránov sunnu birra giessá.
Ja de liegga juptsav viedtjá rujtas mij la vuoná nanna.
Na juhkke dal juptsav vaj bivvábihtte ålgolt ja sisŋelt.
Soames áddjá gåjkkebiergov sunnuj tsáhpá ja gåhttuj mánájt bårråt.
Gå de bivvám ja bårråm libá, de máná nav nagerduvvaba.
Ja oanegasj, de Ánni njálgugit duoljij nali ráno vuolláj oaddá soames ádjá goaden juonná miehtsen.
Nahkára Arnev aj råhttiji.
Valla ij sån oattjo oadet.
Usjudallá jus ieddne le sunnuv åhtsåmin, ja de ij sunnuv gávna gå oademin libá, ja gåktu de jus soames ádjá rádna båhti.
- E gus stálo åvvånis guoldos balá? usjudallá Arne.
Arne ij vuojne gå uksa rahpas.
Valla hæhkkat la gåjt de nubbe áddjá aj goaden.
Stuorak ja vasste le.
Gieda li stuoraga dagu státtjo, ja guolggan.
Guhka njunnje le, várdojs dievva, ja lik snuolggan.
Stuor stálo gåro oalgen tjåhkkåj unna stálusj ja miesskam bánij måjudallá ja soalssu skávtjájt ållu luvvasin.
- Majt usjudalá?
Aktu gus dal ájgo herskudallat? javllá unna stálusj.
- Hå, håj, javllá hæhkkat soames áddjá.
Tjavelgav la njuolggim ja nuorra ja gievrra le.
Tjielgga tjalmij duon guovte stálluj gæhttjá ja riek vastet sunnuj tjajmmá.
- Árvvediv ulmutja varáv happsebihtte.
Lev dal sunnuv dan madev biebbmam vaj ep dárbaha guoros tjåjvijt bårråt.
Soames áddjá viedtjá nijbev boassjos.
Ja dav de riek snivva dábttjagoahtá.
- Dájna dal dåhkki sunnuv giehtadallat, tjajmmá stuor stállo.