Dát lea Jesus Kristusa , Dávveda bártni ja Abrahama bártni , sohka . Abrahamii riegádii Issát , Issáhii riegádii Jáhkot , Jáhkobii Juda ja su vieljat , Judai Peres ja Sera , geaid eadni lei Tamar , Peresii riegádii Hesron , Hesronii riegádii Aram , Aramii riegádii Amminadab , Amminadabii riegádii Nakšon , Nakšonii riegádii Salma , Salmai riegádii Boas , gean eadni lei Rahab . Boasii riegádii Obed , gean eadni lei Rut , Obedii riegádii Isai , ja Isajii riegádii Dávvet , gonagas .
Dávvedii riegádii Salomo , gean eadni lei Uria áhkká , Salomoi riegádii Rehabeam , Rehabeamii riegádii Abia , Abiai riegádii Asaf , Asafii riegádii Jošafat , Jošafatii riegádii Joram , Joramii riegádii Ussia , Ussiai riegádii Jotam , Jotamii riegádii Akas , Akasii riegádii Hiskia , Hiskiai riegádii Manasse , Manassei riegádii Amos , Amosii riegádii Jošia , Jošiai riegádii Jekonja ja su vieljat dan áiggi go álbmot fievrriduvvui veagal Babylonii .
Babylona fáŋgavuođa áiggi maŋŋil Jojakinii riegádii Šealtiel , Šealtielii riegádii Serubbabel , Serubbabelii riegádii Abihud , Abihudii riegádii Eljakim , Eljakimii riegádii Asur , Asurii riegádii Sadok , Sadokii riegádii Akim , Akimii riegádii Elihud , Elihudii riegádii Eleasar , Eleasarii riegádii Mattan , Mattanii riegádii Jáhkot , ja Jáhkobii riegádii Jovsset , Márjjá boadnjá .
Márjá riegádahtii Jesusa , guhte gohčoduvvo Kristusin .
Nu leat nappo oktiibuot njealljenuppelot sohkabuolvva Abrahama rájes Dávveda rádjái , njealljenuppelot sohkabuolvva Dávveda rájes Babylona fáŋgavuođa rádjái , ja njealljenuppelot sohkabuolvva fáŋgavuođa rájes Kristusa rádjái .
Jesus Kristusa riegádeapmi dáhpáhuvai ná : Su eadni Márjá lei lohpádallan Jovssehiin ; muhto ovdal go soai leigga ealligoahtán ovttas , de šattai albmosii ahte Márjá lei máná vuostái Bassi Vuoiŋŋa bokte .
Jovsset , su irgi , gii lei rehálaš olmmái ii ge hálidan heahppašuhttit su , áiggui earránit sus suoli .
Go Jovsset dal lei jurddašeamen dán , de Hearrá eŋgel almmustuvai sutnje niegus ja celkkii : « Jovsset , Dávveda Bárdni ! Ale bala váldimis Márjjá ruktosat áhkkán . Dasgo mánná mii lea su siste , lea sahkanan Bassi Vuoiŋŋa bokte .
Son riegádahttá bártni , ja don galggat gohčodit su Jesusin , dasgo son beastá álbmogis sin suttuin . »
Buot dát dáhpáhuvai vai ollašuvašii dat maid Hearrá lei cealkán profehta bokte : Geahča , nieida šaddá máná vuostái ja riegádahttá bártni , ja son gohčoduvvo Immanuelin – dat mearkkaša : Ipmil lea minguin .
Go Jovsset morihii nahkáriinnis , de son dagai nugo Hearrá eŋgel lei gohččon , ja válddii Márjjá lusas áhkkán .
Muhto ii son eallán suinna ovttas ovdal go Márjá lei riegádahttán bártnis ; ja Jovsset gohčodii bártni Jesusin .
Go Jesus lei riegádan Betlehemas , Judeas , gonagasa Herodesa áiggi , de bohte muhtun viisát nuortan Jerusalemii ja jerre : « Gos lea dat juvddálaččaid gonagas gii dál lea riegádan ?
Dasgo mii oinniimet su nástti badjáneamen iđitgukso áiggi ja leat boahtán gudnejahttit su . »
Go gonagas Herodes gulai dán , de son suorganii , ja oppa Jerusalem suinna .
Son gohčui čoahkkái buot bajitbáhpaid ja álbmoga čálaoahppavaččaid ja jearai sis gos Messias galggai riegádit .
Sii vástidedje : « Betlehemas , Judeas , dasgo ná lea čállojuvvon profehta girjái : Don Betlehem Juda eatnamis , it leat eisege heajumus Juda ráđđejeddjiid gaskkas . Dasgo dus boahtá oaivámuš gii lea mu álbmoga Israela báimman . »
Dalle Herodes gohčui suoli viisáid lusas ja jearahalai sis áiggi goas násti lei ihtán .
Dasto son vuolggahii sin Betlehemii ja dajai : « Mannet dal ja guorahallet dárkilit dán máná hárrái ! Ja go lehpet gávdnan dan , de dieđihehket munnje , vai mun ge beasašin gudnejahttit su . »
Go sii ledje gullan gonagasa sániid , de vulge .
Násti man sii ledje oaidnán badjáneamen , manai sin ovddas , dassážii go bisánii dan báikki badjelii gos mánná lei .
Go sii oidne nástti , de illudedje sakka .
Sii manne vissui ja oidne máná etniinis Márjjáin , ja sii luoitádedje ja gudnejahtte dan .
De sii rahpe giissáideaset ja bukte skeaŋkkaid mánnái : golliid , suovvasiid ja myrra .
Muhto niegus sii várrejuvvojedje máhccamis Herodesa lusa , ja sii manne eará luotta ruoktot eatnamasaset .
Go sii ledje vuolgán , de almmustuvai Hearrá eŋgel Jovssehii niegus ja celkkii : « Čuožžil , váldde máná ja su eatni fárrui ja báhtar Egyptii , ja oro doppe dassážii go mun dieđihan ! Dasgo Herodes lea ohcamin máná goddit dan . »
Ja son čuožžilii , válddii máná oktan su etniin ja vulggii Egyptii seammá ija .
Doppe son orui gitta dassážii go Herodes lei jápmán , vai ollašuvašii dat maid Hearrá lea cealkán profehta bokte : Egyptas mun rávken bárdnán .
Go Herodes árvidii ahte viisát ledje beahttán su , de moaráhuvai ; ja son gohčui goddit buot bárdnemánáid Betlehemas ja oppa dan guovllus geat ledje guovttejahkásaččat ja nuorabut , dan áiggi mielde maid Herodes lei gullan viisáin .
Dalle ollašuvai dat maid profehta Jeremia lei sárdnon : Čuorvvas gullo Ramas , čierrun ja garra bárgun : Rakel čierru mánáidis dihtii ii ge beroš jeđđehusas , dasgo sii eai leat šat .
Go Herodes lei jápmán , de almmustuvai Hearrá eŋgel Jovssehii niegus Egyptas ja celkkii : « Čuožžil , váldde máná ja su eatni fárrui ja mana Israela eatnamii !
Dasgo sii geat bivdet máná heakka , leat jápmán . »
Ja son čuožžilii , válddii máná ja su eatni fárrui ja vulggii Israela eatnamii .
Muhto go Jovsset gulai ahte Arkelaos lei šaddan Judea gonagassan áhčis Herodesa maŋŋil , de son ii duostan vuolgit dohko .
Muhto niegus son rávvejuvvui geassádit Galileai , ja doppe son ásaiduvai gávpogii man namma lei Nasaret .
Nu dáhpáhuvai vai ollašuvašii dat mii lea celkojuvvon profehtaid bokte , ahte son gohčoduvvo nasaretlažžan .
Daid beivviid gásttašeaddji Johanas bođii ja sárdnidišgođii Judea meahcis : « Jorgalehket , dasgo almmiriika lea boahtán lahka ! »
Son lea dat gean birra profehta Jesaja sárdnu go cealká : Jietna čuorvu meahcis : Válmmaštehket geainnu Hearrái , njulgejehket su bálgáid !
Johanas anii kamelguolgabiktasiid ja náhkkeboahkána alimiiddis birra , ja su borramuš lei rásselohkut ja meahccehonnet .
Su lusa bohte olbmot Jerusalemis ja oppa Judeas ja Jordana guovlluin . Sii dovddastedje suttuideaset , ja son gásttašii sin Jordaneanus .
Muhto go Johanas oinnii ahte ollu farisealaččat ja saddukealaččat bohte su lusa gásttašuvvot , de son celkkii sidjiide : « Gearpmaščivggat ! Gii lea cuigen din báhtarit boahttevaš moarreduomus ?
Šaddadehket jorgalusa dohkálaš šattuid !
Allet ge gátte ahte sáhttibehtet dadjat : Min áhčči han lea Abraham !
Dasgo mun cealkkán didjiide : Ipmil sáhttá čuoččáldahttit Abrahamii mánáid vaikko dáin geđggiin ge .
Ákšu lea juo muoraid máddagis ; juohke muorra mii ii šaddat buriid šattuid , čullojuvvo ja bálkestuvvo dollii .
Mun gásttašan din čáziin jorgaleapmái , muhto son gii boahtá mu maŋŋil , lea gievrrat go mun , in ge mun leat dohkálaš guoddit su gápmagiid ge .
Son gásttaša din Bassi Vuoiŋŋain ja dolain .
Sus lea goaivu gieđas ja áigu ráidnet gortniidis gordneráidnehagas ja čohkket nisuid láhtui .
Muhto sáđuid son boaldá čáskatmeahttun dolas . »
Dalle Jesus vulggii Galileas Jordangáddái Johanasa lusa vai Johanas gásttašivččii su .
Muhto Johanas eastadii su ja celkkii : « Mun han galggašin oažžut dus gástta , ja don boađát mu lusa ! »
Jesus vástidii sutnje : « Mieđit dal dán !
Dán láhkái moai fertejetne ollašuhttit buot vanhurskkisvuođa . » De Johanas mieđihii dan sutnje .
Go Jesus lei gásttašuvvon , de son dakkaviđe čuožžilii čázis .
Dalle albmi rahpasii , ja son oinnii Ipmila Vuoiŋŋa boahtimin vuolás iežas badjelii duvvá hámis .
Ja almmis gullui jietna : « Dát lea mu Bárdni gean mun ráhkistan ; son lea mu miela mielde . »
Das maŋŋil Vuoigŋa doalvvui Jesusa meahccái , vai beargalat geahččalivččii su .
Go Jesus lei atnán borakeahttáivuođa njealljelot beaivvi ja njealljelot ija , de nealgugođii loahpas .
De geahččaleaddji bođii su lusa ja dajai : « Jos don leaččat Ipmila Bárdni , de gohčo dáid geđggiid šaddat láibin ! »
Muhto Jesus vástidii sutnje : « Lea čállojuvvon : Olmmoš ii eale dušše láibbis , muhto juohke sánis mii boahtá Ipmila njálmmis . »
Dasto beargalat válddii su bassi gávpogii ja bijai su alimussii tempela geađgemuvrra ala ja dajai : « Jos leaččat Ipmila Bárdni , de bálkestahte dás vuolás !
Dasgo lea čállojuvvon : Son gohčču eŋgeliiddis várjalit du ; sii guddet du gieđaideaset alde , amat norddastit juolggát geađgái . »
Jesus celkkii sutnje : « Lea maiddái čállojuvvon : It galgga geahččalit Hearrá Ipmilat . »
Beargalat válddii su fas mielddis muhtun hui alla várrái ja čájehii sutnje buot máilmmi riikkaid ja daid hearvásvuođa ja dajai : « Buot dáid mun attán dutnje , jos don fal luoitádat ja gudnejahtát mu . »
De Jesus celkkii sutnje : « Sáhtán , gáidda eret !
Dasgo lea čállojuvvon : Hearrá Ipmilat galggat gudnejahttit , ja aivvestassii su bálvalit . »
De beargalat guđii su , ja eŋgelat bohte ja bálvaledje su .
Go Jesus gulai ahte Johanas lei biddjojuvvon giddagassii , de manai ruovttoluotta Galileai .
Son vulggii Nasaretas ja ásaiduvai Kapernaumii mii lea Galileajávregáttis , Sebulona ja Naftali guovlluin , vai ollašuvašii dat mii lea celkojuvvon profehta Jesaja bokte : Sebulona eanan ja Naftali eanan , eanan jávregáttis , ja eanan nuppi bealde Jordana , báhkiniid Galilea : Dat álbmot mii ássá seavdnjadasas , lea oaidnán stuora čuovgasa .
Sin badjel geat orrot jápmima eatnamis ja suoivanis , lea ihtán čuovggas .
Dan áiggi rájes Jesus sárdnidišgođii : « Jorgalehket , dasgo almmiriika lea boahtán lahka ! »
Go Jesus lei vázzimin Galileajávregátti , de oinnii guokte vieljaža : Simmona , guhte gohčoduvvui Biehtárin , ja su vielja Ándarasa .
Soai leigga suohppumin nuohti jávrái , dasgo soai leigga guollebivdit .
Jesus celkkii sudnuide : « Čuovvu mu , de mun dagan dudno olmmošbivdin ! » Dan seammás soai guđiiga firpmiideaskka dasa ja čuovuiga su .
Go Jesus lei vázzán veahá gaskka , de oinnii guokte eará vieljaža , Jáhkoba , Sebedeusa bártni , ja su vielja Johanasa . Soai leigga čohkkámin fatnasis áhčiineaskka ja čiktimin firpmiid .
Son rávkkai sudno , ja dallánaga soai guđiiga fatnasa ja áhčiska ja čuovuiga su .
Dasto Jesus vádjolii miehtá Galilea ; son oahpahii sin synagogain , sárdnidii evangeliuma riikka birra ja buoridii olbmuid buot buozalvasain ja vigiin .
Sáhka su birra viidánii miehtá Syria , ja sii bukte su lusa buot buhcciid geain ledje buot lágán buozalvasat ja givssit , sin geain ledje bahá vuoiŋŋat , sin geain lei mánnováddu , ja lápmásiid , ja son buoridii sin .
Stuora olmmošjoavkkut čuvvo su Galileas ja Dekapolisas , Jerusalemis ja Judeas ja nuppi bealde Jordana .
Go Jesus oinnii olmmošjoavkkuid , de son manai várrái .
Son čohkkedii , ja máhttájeaddjit čoahkkanedje su birra .
Son sárdnugođii ja oahpahii sin ná : Ávdugasat sii geat leat váivvážat vuoiŋŋasteaset , dasgo almmiriika lea sin .
Ávdugasat sii geat leat morrašis , dasgo sii ožžot jeđđehusa . Ávdugasat sii geat leat vuollegaččat , dasgo sii árbejit eatnama .
Ávdugasat sii geain lea vanhurskkisvuođa nealgi ja goiku , dasgo sii gallehuvvojit . Ávdugasat sii geat leat váibmoláđđásat , dasgo sii ožžot váibmoláđisvuođa .
Ávdugasat sii geat leat buhttásat váimmus , dasgo sii besset oaidnit Ipmila .
Ávdugasat sii geat duddjojit ráfi , dasgo sii gohčoduvvojit Ipmila mánnán .
Ávdugasat sii geat doarrádallojit vanhurskkisvuođa dihtii , dasgo almmiriika lea sin .
Ávdugasat lehpet dii go sii bilkidit ja doarrádallet din mu dihtii , gielistit din ala ja hállet baháid din birra juohke láhkái .
Illudehket ja ávvudehket , dasgo din bálká lea stuoris almmis .
Nu sii doarrádalle maiddái profehtaid ge ovdal din .
Dii lehpet eatnama sálttit !
Muhto jos sálttit veagahuvvet , mainna dalle sáhttá sáltet ?
Eai dat dohkke šat maninge , muhto bálkásit ja duolmmahallet olbmuide .
Dii lehpet máilmmi čuovggas !
Gávpot mii lea vári alde , ii sáhte leat čihkosis . Ja go olmmoš cahkkeha gintala , de ii bija dan gári vuollái , muhto baicca ginttaljuolgái , vai dat báitá buot viesu olbmuide .
Nu báitos din čuovggas ge olbmuide , vai sii oidnet din buriid daguid ja máidnot Áhčádet guhte lea almmis !
Allet gátte ahte mun lean boahtán gomihit lága dahje profehtaid !
Mun in leat boahtán gomihit , muhto ollašuhttit .
Duođaid , mun cealkkán didjiide : Lágas ii duššaduvvo oktage bustávaš dahje čuoggáš , ovdal go albmi ja eanan duššet , ovdal go buot lea dáhpáhuvvan .
Jos nappo muhtun gomiha ovttage dáin uhcimus báhkkomiin ja oahpaha olbmuid dan láhkái , de son gohčoduvvo uhcimussan almmi riikkas .
Muhto dat guhte doallá daid ja oahpaha daid , gohčoduvvo stuorisin almmiriikkas .
Mun cealkkán didjiide : Jos din vanhurskkisvuohta ii šatta mihá stuoribun go čálaoahppavaččaid ja farisealaččaid vanhurskkisvuohta , de ehpet eisege beasa almmiriikii .
Dii lehpet gullan ahte lea celkojuvvon máddariidda : It galgga goddit , ja dat guhte dahká dan , gártá duopmostuolu ovdii .
Muhto mun cealkkán didjiide : Dat guhte suhttá oskuguoibmásis , gártá duopmostuolu ovdii ; dat guhte cealká oskuguoibmásis : Don doavki ! dat gártá Alla Ráđi ovdii , ja dat guhte cealká : Don ipmilmeahttun jalla !
dat lea sivalaš helveha dollii . Jos don leat buktimin oaffara áltárii ja de fuomášat ahte oskuguoimmistat leat váidaleamit du vuostái , de guođe oaffarskeaŋkkat dasa áltára ovdii ja mana vuos soabadit suinna . Buvtte dasto oaffarskeaŋkkat !
Doama soabadit vuostebeliinat diggái manadettiin . Muđuid son addá du duopmárii , ja duopmár fáktii , ja don bálkestuvvot giddagassii .
Duođaid , mun cealkkán dutnje : Don it beasa doppe olggos ovdal go leat máksán maŋimuš evrre ge .
Dii lehpet gullan celkomin : It galgga rihkkut náittosdili .
Muhto mun cealkkán didjiide : Dat guhte geahččá nissonii anistumiin , lea juo rihkkon náittosdili váimmustis .
Jos du olgeš čalbmi vearránahttá du , de gaikket dan olggos ja bálkes eret !
Dutnje lea buoret ahte don massát ovtta lahtu , go ahte oppa rumaš bálkestuvvo helvehii .
Ja jos du olgeš giehta vearránahttá du , de čuohpa dan rastá ja bálkes eret !
Dutnje lea buoret massit ovtta lahtu , go ahte oppa rumaš manná helvehii .
Lea celkojuvvon : Dat guhte earrána áhkástis , galgá addit sutnje earrogirjji .
Muhto mun cealkkán didjiide : Juohkehaš guhte earrána áhkástis mange eará sivas go fuorrávuođas , dagaha su rihkkut náittosdili . Ja dat guhte náitala earránan nissoniin , rihkku náittosdili .
Dii lehpet gullan ahte lea celkojuvvon máddariidda : It galgga dahkat vearreváli , ja : Don galggat doallat dan maid leat vurdnon Hearrái .
Muhto mun cealkkán didjiide : Allet eisege vuortno , allet almmi bokte , dasgo dat lea Ipmila truvdnu , allet ge eatnama bokte , dasgo dat lea su julggiid vuloš , allet ge Jerusalema bokte , dasgo dat lea stuora gonagasa gávpot .
Ale ge vuortno oaivvát bokte , dasgo don it máhte dahkat ovttage vuoktačalmmi vielgadin dahje čáhppadin .
– go biehttalehpet , de dadjet dušše : Ii !
Dat mii leš eanet go dát , boahtá bahás .
Didjiide lea oahpahuvvon nu : Čalbmi čalmmis ja bátni bánis .
Muhto mun cealkkán didjiide : Allet vuostálastte su gii dahká didjiide bahá .
Jos muhtun doške du olgeš nirrii , de jorgal sutnje nuppi ge .
Jos muhtun hálida lágastit du vuostái váldit du báiddi , de atte sutnje gávttát ge .
Jos muhtun bágge du vázzit duhát lávkki iežas fárus , de vácce suinna guokte duhát lávkki .
Atte sutnje gii sihtá dus juoidá , ale ge jorggit selggiid sutnje gii bivdá dus loanas .
Didjiide lea oahpahuvvon : Don galggat ráhkistit lagamuččat ja vašuhit vašálaččat .
Muhto mun cealkkán didjiide : Ráhkistehket vašálaččaideattet , buressivdnidehket sin geat garuhit din , dahket buriid sidjiide geat vašuhit din , ja rohkadallet sin ovddas geat doarrádallet din , vai livččiidet almmálaš Áhčádet mánát .
Dasgo son diktá beaivvážis badjánit sihke baháide ja buriide ja diktá arvit sihke vanhurskásiid ja vanhurskkismeahttumiid ala .
Jos dii ráhkistehpet dušše sin geat ráhkistit din , ánssášehpet go dalle das bálkká ?
Eai go tuollárat ge daga nu ?
Jos dii buorástahttibehtet ustitlaččat dušše oskuguimmiideattet , lea go dat nu erenoamáš ?
Eai go báhkinat ge daga aiddo nu ?
Bissot ollisin , nugo almmálaš Áhččádet ge lea ollis .
Váruhehket dahkamis buriid daguid olbmuid oaidnut , vai sii fuomášivčče din .
Dalle ehpet oaččo bálkká áhčisteattet guhte lea almmis .
Go don attát attáldagaid gefiide , de ale daga dan rábmomiin nugo guoktilaččat dahket synagogain ja šiljuin , vai olbmot gudnejahtášedje sin .
Duođaid , mun cealkkán didjiide : Sii leat juo ožžon bálkkáset .
Muhto go don attát gefiide , de ale divtte gurut gieđat diehtit maid olgeš giehta dahká , vai du attáldat bissu čihkosis .
Ja Áhččát , guhte oaidná čihkosis , bálkkaša du
Go dii rohkadallabehtet , de allet daga nugo guoktilaččat .
Sii liikojit čuožžut synagogain ja gáhtačiegain rohkadallamin , vai olbmot fuomášit sin .
Duođaid , mun cealkkán didjiide : Sii leat juo ožžon bálkkáset .
Muhto go don rohkadalat , de mana gámmárat sisa ja gidde uvssa ja rohkadala Áhččásat guhte lea čihkosis .
Ja Áhččát , guhte oaidná čihkosis , bálkkaša du
Go dii rohkadallabehtet , de allet lohkal dušše bođu sániid nu mo báhkinat dahket ; sii gáddet ahte sin rohkosat gullojuvvojit go sii geavahit ollu sániid .
Allet leage sin láhkásaččat ! Dasgo Áhččádet diehtá maid dii dárbbašehpet ovdal go lehpet sihtan ge sus dan .
Rohkadallet dasto ná : Áhččámet , don guhte leat almmis !
Basuhuvvos du namma .
Bohtos du riika .
Šaddos du dáhttu , mo almmis nu maiddái eatnama alde .
Atte midjiide odne min beaivválaš láibbi .
Ja atte midjiide min suttuid ándagassii , nugo mii ge ándagassii addit velggolaččaidasamet .
Ale ge doalvvo min geahččalussii , muhto beastte min bahás eret .
Dasgo du lea riika ja fápmu ja gudni agálašvuhtii .
Amen .
Jos dii addibehtet olbmuide ándagassii sin rihkkumiid , de maiddái almmálaš Áhččádet addá didjiide ándagassii .
Muhto jos ehpet atte olbmuide ándagassii , de Áhččádet ge ii atte didjiide ándagassii din rihkkumiid .
Go dii atnibehtet borakeahttáivuođa , de allet ane morašlaš hámi nugo guoktilaččat . Sii nuppástuhttet ámadajuset , vai buohkat fuomášit ahte sii atnet borakeahttáivuođa .
Duođaid , mun cealkkán didjiide : Sii leat juo ožžon bálkkáset .
Muhto go don anát borakeahttáivuođa , de vuoidda oaivvát ja basa muođuidat , amaset olbmot oaidnit du adnimin borakeahttáivuođa , muhto dušše Áhččát guhte lea čihkosis .
Ja Áhččát gii oaidná čihkosis , bálkkaša du
Allet čohkke alcceseattet dávviriid eatnama ala , gos muohcu ja ruosta bilida , ja gos suollagat gaikot viesuide ja suoládit .
Muhto čohkkejehket alcceseattet dávviriid albmái , gos ii muohcu ii ge ruosta bilit eai ge suollagat gaikko viesuid ja suolát .
Dasgo gos du dávvir lea , doppe lea du váibmu ge .
Čalbmi lea rupmaša čuovga .
Jos du čalbmi lea dearvvaš , de oppa rumaš čuvgejuvvo .
Muhto jos du čalbmi lea buozas , de oppa du rumaš lea seavdnjadas .
Jos nappo čuovggas mii lea du siste , lea seavdnjadas , man seavdnjat lea dalle seavdnjadas !
Ii oktage sáhte bálvalit guokte isida .
Son vašuhivččii nuppi ja ráhkistivččii nuppi , dahje bisošii nuppi luhtte ja badjelgeahčašii fas nuppi .
Ehpet dii sáhte bálvalit sihke Ipmila ja mammona .
Danne mun cealkkán didjiide : Allet moraš heakkadet dihtii ahte dis lea maid borrat ja juhkat , allet ge rupmaša dihtii ahte leat biktasat .
Ii go heagga leat eanet go borramuš ja rumaš eanet go biktasat ?
Gehččet almmi lottiid ! Eai dat gilvve eai ge láddje eai ge čohkke láđuide , muhto din almmálaš Áhčči biebmá daid .
Ehpet go dii leat ollu mávssolaččabut go dat ?
Guhtemuš ba dis sáhttá buot morrašiiddisguin lasihit ovtta állana ge eallinguhkkodahkasis ?
Ja manne moraštehpet biktasiid dihtii ?
Gehččet gietti liđiid , mo dat šaddet ! Eai dat bargga eai ge bane , muhto mun cealkkán didjiide : Ii oppa Salomo ge buot hearvásvuođainis lean gárvvohuvvon nugo okta sis .
Jos Ipmil gárvvoha gietti rásiid nu čábbát , daid mat odne leat ceaggámin ja ihttin bálkestuvvojit oapmanii , ii go son ollu eanet gárvvohivčče din , dii uhccán oskkolaččat ?
Allet nappo moraš ja cealkke : Maid mii dál borrat ?
dahje : Maid juhkat ?
dahje : Mainna gárvodit ?
Buot dáid háhpohallet báhkinat , muhto din almmálaš Áhčči diehtá juo ahte dii dárbbašehpet buot dáid .
Ohcet baicca vuos Ipmila riikka ja su vanhurskkisvuođa , de buot dát addojuvvojit didjiide .
Allet nappo moraš ihtáš beaivvi dihtii ; gal ihtáš beaivi buktá morrašiiddis .
Juohke beaivvis leat doarvái iežas váivvit .
Allet dubme , amadet ieža dubmejuvvot !
Dasgo dii dubmejuvvobehtet ieža dan duomu mielde mainna dubmebehtet earáid , ja didjiide mihtiduvvo seammá mihtuin mainna ieža ge mihtidehpet .
Manne oainnát riba oskuguoimmát čalmmis , muhto it fuomáš hirssa iežat čalmmis ?
Dahje mo sáhtát dadjat oskuguoibmásat : Divtte mu váldit eret riba du čalmmis , go iežat čalmmis lea hirsa ?
Guoktilaš ! Váldde vuos eret hirssa iežat čalmmis !
Easkka dalle oainnát čielgasit ja sáhtát váldit eret riba oskuguoimmát čalmmis .
Allet atte beatnagiidda dan mii lea bassi , allet ge bálkes bearraliiddádet spiinniid ovdii , amaset dat duolbmat daid , jorggihit din vuostái ja gaikkodit din .
Átnot , de oažžubehtet .
Ohcet , de gávdnabehtet .
Goalkkuhehket , de didjiide rahppojuvvo uksa .
Dasgo juohkehaš guhte átnu , oažžu , ja son guhte ohcá , gávdná , ja guhte goalkkuha , sutnje rahppojuvvo uksa .
Lea go ba din gaskkas oktage gii attášii bárdnásis geađggi go son sihtá sus láibbi , dahje attášii sutnje gearbmaša go son sihtá sus guoli ?
Go vel dii ge , geat lehpet bahát , áddebehtet addit buriid attáldagaid mánáidasadet , ii go Áhččádet , guhte lea almmis , ollu eanebut attáše buriid attáldagaid sidjiide geat átnot sus .
Buot maid dii dáhttubehtet earáid dahkat alcceseattet , dahket dii ge sidjiide .
Dasgo nu lea láhka ja profehtat .
Mannet sisa baskkes poarttas !
Dasgo dat poarta lea gallji ja dat geaidnu lea govdat mii doalvu gáđohussii , ja olusat mannet dakko .
Muhto dat poarta lea baski ja dat geaidnu lea seaggi mii doalvu eallimii , ja hárvásat gávdnet dan .
Váruhehket vearri profehtain !
Sii bohtet din lusa sávzza hámis , muhto siskkáldasat sii leat nealgi gumppet .
Šattuin dii dovdabehtet sin .
Sáhttá ba viidnemurjjiid gal čoaggit bastilislánjáin dahje fiikkoniid gáskálasain ?
Buorre muorra šaddada buriid šattuid , ja heajos muorra šaddada heajos šattuid .
Buorre muorra ii sáhte šaddadit heajos šattuid ii ge heajos muorra buriid šattuid .
Juohke muorra mii ii šaddat buriid šattuid , čuhppojuvvo eret ja bálkestuvvo dollii .
Šattuin dii nappo dovdabehtet sin .
Ii juohkehaš guhte dadjá munnje : Hearrá , Hearrá ! beasa almmiriikii , muhto dohko beassá dat guhte dahká mu almmálaš Áhči dáhtu .
Olusat dadjet munnje dan beaivvi : Hearrá , Hearrá ! Eat go mii leat profehtastallan du nammii ja ádján olggos bahá vuoiŋŋaid du nammii ja dahkan ollu fámolaš daguid du nammii ?
Muhto dalle sii ožžot mus dán vástádusa : Mun in leat goassege dovdan din .
Gáidet eret , dii verrošeaddjit !
Juohkehaš guhte gullá dáid mu sániid ja dahká daid mielde , lea jierpmálaš olbmá láhkásaš guhte huksii viesus bávtti ala .
Arvi šoalai , jogat dulve ja biekkat bosso ja čuhce viesu njeaiga . Muhto dat ii gahččan , dasgo dat lei huksejuvvon bávtti ala .
Muhto juohkehaš guhte gullá dáid mu sániid ii ge daga daid mielde , lea jierpmehis olbmá láhkásaš guhte huksii viesus sáddo ala .
Arvi šoalai , jogat dulve ja biekkat bosso ja čuhce viesu njeaiga . Dalle dat gahčai ja bieđganii visot .
Go Jesus lei heaitán sárdnideames , de olbmot hirpmástuvve su oahpaheamis , dasgo son oahpahii sin isitvuođain ii ge nugo sin čálaoahppavaččat .
Jesus njiejai váris , ja stuora olmmošjoavku čuovui su .
De bođii muhtun spihtálaš , luoitádii su ovdii ja dajai : « Hearrá , jos don dáhtožat , de sáhtát buhtistit mu . »
Jesus geigii gieđas , guoskkahii su ja celkkii : « Mun dáhtun , šatta buhtisin ! »
Dakkaviđe olmmái buhtistuvvui spihtálvuođas .
Jesus celkkii sutnje : « Várut dadjamis maidege geasage dán birra ! Muhto mana čájehit iežat báhppii ja oaffaruša dan maid Movsses lea gohččon . Dat lea olbmuide duođaštussan . »
Go Jesus lei joavdamin Kapernaumii , de bođii muhtun offiseara su lusa ja dáhtui sus veahki : « Hearrá , mu bálvaleaddji lea veallámin lámisin ruovttus , ja sus leat garra bákčasat . »
Jesus celkkii : « Mun boađán buoridit su . »
Muhto offiseara vástidii sutnje : « Hearrá , mun in leat dohkálaš ahte don boađášit mu vissui .
Muhto cealkke dušše ovtta sáni , de mu bálvaleaddji dearvvašmuvvá .
Dasgo mun lean ieš gohčohallama vuloš , ja iežan vuolde gis leat soalddáhat .
Jos dajan nubbái : Mana ! de son manná , ja nubbái : Boađe !
de son boahtá , ja bálvaleaddjásan : Daga dán ! de son dahká dan . »
Jesus ovddošii go gulai dán ja celkkii daidda geat ledje čuovvumin su : « Duođaid , mun cealkkán didjiide : Dákkár nana oskku in leat gávdnan velá Israelis ge .
Mun cealkkán didjiide : Eatnagat bohtet nuortan ja oarjin ja čohkkájit almmiriikka beavddis Abrahamain ja Issáhiin ja Jáhkobiin .
Muhto riikka árbbolaččat bálkestuvvojit olggobeallái seavdnjadassii ; doppe sii čirrot ja gižahit bániid . »
Jesus celkkii offiserii : « Mana ruoktot ! Šaddos nugo don oskot . »
Ja bálvaleaddji dearvvašmuvai seammá bottus .
Das maŋŋil Jesus bođii Biehtára geahčai ja oinnii ahte Biehtára vuoni lei veallámin seaŋggas heajos buohccin .
Jesus guoskkahii su gieđa , ja dávda luittii su . Nisu čuožžilii ja bálvališgođii su .
Go šattai eahket , de sii bukte su lusa olusiid geain ledje bahá vuoiŋŋat .
Son ájii vuoiŋŋaid olggos sániidisguin ja buoridii buot buhcciid , vai ollašuvašii dat mii lea celkojuvvon profehta Jesaja bokte : Son válddii eret min vigiid ja guttii min buozalvasaid .
Go Jesus oinnii olmmošjoavkku iežas birra , de gohčui doalvut iežas nuppi beallái jávrri .
Muhtun čálaoahppavaš bođii su lusa ja dajai : « Oahpaheaddji , mun áiggun čuovvut du gosa ihkinassii manažat . »
Jesus vástidii : « Riebaniin leat biejut , ja almmi lottiin leat beasit , muhto Olbmobártnis ii leat sadji gos vuoiŋŋastahtášii oaivvis . »
Muhtun su máhttájeddjiin dajai sutnje : « Hearrá , suova mu vuos mannat ruoktot hávdádit áhččán . »
Muhto Jesus celkkii sutnje : « Čuovo mu , anne jábmit hávdádit jábmiideaset ! »
Jesus loaiddastii dál fatnasii , ja su máhttájeaddjit čuvvo su .
De šattai garra riđđu jávrái , nu ahte fanas measta jávkkai báruid sisa .
Muhto Jesus ieš lei oađđimin .
Dalle sii bokte su ja dadje : « Hearrá , beastte min !
Mii heavvanit ! »
Son cealká sidjiide : « Manne dii ballabehtet ? Dii uhcán oskkolaččat ! »
De son čuožžilii ja šikkui biekka ja jávrri , ja šattai vuodjagoalki .
Olbmot ovddošedje ja jerre : « Gii son lea go sihke biegga ja jávri jeagadit su . »
Go Jesus joavddai nuppi beallái jávrri Gadarena guvlui , de bohte su ovddal guokte bosttahuvvon olbmá hávderokkiin .
Soai leigga nu váralaččat ahte ii oktage beassan dakko meattá geaidnoráigge .
Soai gilljugođiiga : « Ipmila Bárdni , mii dus lea munnuin dahkamuššan ?
Leat go boahtán deike ovdal áiggi givssidit munno ? »
Veahá gaskka das eret lei stuora spiidneeallu guohtumin .
Bahá vuoiŋŋat ánuhedje sus : « Jos áját min olggos , de bija min spiidneellui . »
Jesus celkkii : « Mannet dohko ! »
ja dat vulge olbmáguoktás ja manne spiinniid sisa .
Dalle oppa eallu hurgalii báktedardda badjel vuolás jávrái ja heavvanii .
Spiidneguođoheaddjit viehkaledje báhtui , ja go bohte gávpogii , de muitaledje buot , maiddái dan mii lei dáhpáhuvvan bosttahuvvon olbmáide .
Olles gávpot vulggii dál Jesusa ovddal , ja go sii deive su , de ánuhedje su vuolgit eret sin guovllus .
Jesus manai fatnasii ja vulggii rastá jávrri iežas gávpogii .
Doppe sii bukte su lusa lámis olbmo gii lei veallámin guoddinseaŋggas .
Go Jesus oinnii sin oskku , de celkkii lápmásii : « Bárdnán , leage dorvvolaš , du suttut leat dutnje ándagassii addojuvvon . »
Muhtun čálaoahppavaččat jurddašedje dalle : « Dát olmmái bilkida Ipmila . »
Muhto Jesus diđii maid sii jurddašedje ja celkkii : « Manne dis leat diekkár bahás jurdagat din váimmuin ?
Goappá lea álkit dadjat , jogo : Du suttut leat dutnje ándagassii addojuvvon , dahje : Čuožžil ja vázzil ?
Muhto vai dii dieđášeiddet ahte Olbmobártnis lea fápmu eatnama alde addit suttuid ándagassii » – ja dál son sárdnu lámis olbmái : « Čuožžil , váldde seaŋggat ja mana ruoktot ! »
Ja olmmái čuožžilii ja manai ruoktot .
Muhto olbmot ballagohte go oidne dán , ja sii máidno Ipmila gii lei addán olbmuide dakkár fámu .
Go Jesus vulggii eret das , de oinnii olbmá čohkkámin tuolloviesus ; su namma lei Matteus .
Jesus celkkii sutnje : « Čuovo mu ! »
Ja son čuožžilii ja čuovui su .
Go Jesus lei guossin Matteusa geahčen , de bohte ollu tuollárat ja suttolaččat ja čohkkájedje beavddis Jesusiin ja su máhttájeddjiiguin .
Farisealaččat oidne dán , ja sii jerre su máhttájeddjiin : « Manne din oahpaheaddji borada tuolláriiguin ja suttolaččaiguin ? »
Go Jesus gulai dan , de celkkii : « Eai dearvvaš olbmot dárbbaš dálkkasteaddji , muhto buohccit .
Vulget ja ohppet maid dát mearkkaša : Váibmoláđisvuođa mun dáhtun , in ge oaffariid , dasgo in leat boahtán rávkat vanhurskásiid , muhto suttolaččaid . »
De Johanasa máhttájeaddjit bohte Jesusa lusa ja jerre : « Mii ja farisealaččat atnit borakeahttáivuođa , muhto manne du máhttájeaddjit eai daga dan ? »
Jesus vástidii : « Sáhttet go headjaguossit moraštit dan botta go irgi lea sin luhtte ?
Muhto áigi boahtá go irgi váldojuvvo sis eret , ja daid beivviid go dat dáhpáhuvvá , de sii atnet borakeahttáivuođa .
Ii oktage bija duohpakeahtes duogŋasa boares biktasii .
Dasgo dakkár duokŋas gaiku biktasa , ja ráigi šaddá velá stuoribun .
Ii ge leaikko varas viinni boares náhkkeseahkaide .
Dasgo dalle seahkat gaikánit , viidni heavvašuvvá ja seahkat billašuvvet .
Muhto varas viidni leikojuvvo ođđa náhkkeseahkaide ; dalle guktot leat áimmuin . »
Dan botta go son ain lei sárdnumin sidjiide , bođii synagoga ovddasčuožžu ja luoitádii su ovdii ja dajai : « Mu nieida lea aiddo jápmán , muhto boađe bidjat gieđat su ala , de son ealáska fas . »
Jesus čuožžilii ja vulggii su fárrui oktan máhttájeddjiidisguin .
Das lei muhtun nisu geas ledje leamaš vardimat guoktenuppelot jagi . Son lahkanii Jesusa maŋil ja guoskkahii su bivttasdiehpi , dasgo son jurddašii : « Jos mun dušše beasašin guoskkahit su biktasa ge , de dearvvašmuvašin . »
Jesus jorggihii , ja go son fuomášii su , de celkkii : « Nieidan , leage dorvvolaš ! Du osku lea beastán du »
Ja nisu dearvvašmuvai seammá bottus .
Go Jesus ollii synagoga ovddasčuožžu vissui ja oinnii njurggonasčuojaheddjiid ja šlámaideaddji joavkku , de dajai : « Mannet olggos !
Ii nieida leat jápmán , son lea oađđimin . »
Sii boagustedje su .
Go olmmošjoavku lei áddjon olggos , de Jesus manai sisa ja válddii nieidda gihtii , ja nieida čuožžilii .
Sáhka dán birra viidánii miehtá dan guovllu .
Go Jesus vulggii doppe , de guokte čalmmeheami čuovvuleigga su ja čuorvvuiga : « Dávveda bárdni , árpmit munno ! »
Ja go Jesus bođii ruoktot , de čalmmeheamit manaiga sisa su lusa , ja son jearai sudnos : « Oskubeahtti go ahte mun sáhtán dahkat dán ? »
Soai vástideigga : « Hearrá , de osko . »
De son guoskkahii sudno čalmmiid ja celkkii : « Šaddos nu mo doai oskubeahtti . »
Ja sudno čalmmit rahpasedje .
Jesus gilddii sudno garrasit : « Alli almmut dán geasage . »
Muhto soai manaiga olggos ja viiddideigga sága su birra miehtá dan guovllu .
Go olbmát leigga mannan , de buktojuvvui Jesusa lusa gielahis olmmái geas lei bahá vuoigŋa .
Jesus ájii olggos bahá vuoiŋŋa , ja gielaheapmi sárdnugođii .
Olbmot ovddošedje ja dadje : « Ii oktage leat goassege oaidnán dákkáriid Israelis ! »
Muhto farisealaččat dadje : « Bahá vuoiŋŋaid oaivámučča fámuin son ádjá olggos bahá vuoiŋŋaid . »
Jesus vádjolii dál buot gávpogiin ja giliin .
Son oahpahii sin synagogain , sárdnidii evangeliuma riikka birra ja buoridii buot buozalvasaid ja vigiid .
Go son oinnii olmmošjoavkku , de árkkášii sin njuorrasit , dasgo sii ledje goarránan ja bieđganan , dego sávzzat geahčči haga . Dalle son celkkii máhttájeddjiidasas : « Ládju lea stuoris , muhto bargit uhcán .
Rohkadallet dan dihtii láju isida vuolggahit bargiid lájuidasas . »
Son rávkkai lusas guoktenuppelot máhttájeaddjis ja attii sidjiide fámu ráđđet buhtismeahttun vuoiŋŋaid ja fámu ádjit olggos daid ja buoridit buot buozalvasaid ja vigiid .
Dát leat guoktenuppelot apoastala namat : Vuosttažettiin Simmon , gii gohčoduvvui Biehtárin , de su viellja Ándaras , Jáhkot , Sebedeusa bárdni , ja su viellja Johanas , Filip ja Bartolomeus , Duomás ja tuollár Matteus , Jáhkot , Alfeusa bárdni , ja Taddeus , Simmon Kananeus ja Judas Iskariot guhte behtii su .
Dán guoktenuppelohkása Jesus vuolggahii ja rávvii sin : Allet mana báhkiniid guovlluide , allet ge mana samarialaččaid gávpogiidda !
Mannet baicca Israela álbmoga láhppon sávzzaid lusa ja sárdnidehket : Almmiriika lea boahtán lahka !
Buoridehket buhcciid , bajásčuoččáldahttet jábmiid , buhtistehket spihtálaččaid ja ádjet olggos bahá vuoiŋŋaid . Dii lehpet ožžon dan nuvttá , de addet dan nuvttá !
Allet váldde mielddádet ruđaid boahkániin , allet golli , allet silbba dahje veaikki .
Allet ge váldde mielddádet lávkka mátkái , allet guokte gávtti , allet gápmagiid dahje soappi ge .
Dasgo bargi ánssáša biepmus .
Go boahtibehtet gávpogii dahje gillái , de gávnnahehket gii lea dohkálaš váldit din vuostái , ja orrot su luhtte dassážii go vuolgibehtet fas .
Ja go boahtibehtet vissui , de dearvvahehket dan ráfiin . Jos viessu lea dohkálaš , de ráfi orru dan badjel , muhto jos viessu ii leat dohkálaš , de máhccos ráfi didjiide fas .
Jos muhtumat eai dáhto váldit din vuostái eai ge gullat din sániid , de guđđet dan viesu ja gávpoga ja savdnjilehket sádduid julggiineattet .
Duođaid , mun cealkkán didjiide : Sodoma ja Gomorra eatnamii geavvá geahppaseabbot duopmobeaivvi go dan gávpogii .
Mun vuolggahan din dego sávzzaid gumppiid gaskii .
Lehket dan dihtii gávvilat dego gearbmašat ja vigiheamit dego duvvát !
Váruhehket olbmuin !
Dasgo sii addet din duopmostuoluide ja spihččejit din synagogaineaset , ja dii dolvojuvvobehtet eananhearráid ja gonagasaid ovdii mu dihtii , vai duođaštehpet sidjiide ja báhkiniidda .
Muhto go sii addet din eiseválddiide , de allet bala mo sárdnubehtet dahje maid dadjabehtet . Dasgo dat mii lea dárbbašlaš dadjat , addojuvvo didjiide dammanaga bottus . Ehpet dii leat ieža sárdnumin , muhto Áhčádet Vuoigŋa sárdnu din bokte .
Viellja beahttá vieljas jápmimii , ja áhčči mánás ; ja mánát čuožžilit vánhemiiddiset vuostái ja goddet sin .
Ja buohkat vašuhit din mu nama dihtii .
Muhto dat gii bissu oskkáldassan loahpa rádjái , bestojuvvo .
Muhto go sii doarrádallet din nuppi gávpogis , de báhtarehket nuppi gávpogii !
Duođaid , mun cealkkán didjiide : Dii ehpet joavdda buot Israela gávpogiidda ovdal go Olbmobárdni boahtá .
Máhttájeaddji ii leat stuorit go oahpaheaddjis , ii ge bálvaleaddji stuorit go isidis .
Máhttájeaddji galgá leat duhtavaš jos sutnje geavvá nugo su oahpaheaddjái , ja bálvaleaddji galgá leat duhtavaš jos oažžu seammá dili go hearrás .
Jos dáluisit lea gohčoduvvon Beelsebulan , sáhttet go su dáluolbmot vuordit maidge buorebu ?
Allet bala sis !
Dasgo ii mihkkege leat gokčojuvvon mii ii almmustuva , ii ge mihkkege čihkkojuvvon mii ii boađe albmosii .
Dan maid mun sártnun didjiide seavdnjadasas , sárdnot dii dan čuovgadin ; dat mii savkaluvvo didjiide bealljái , čurvot dan dáhkiid alde .
Allet bala sis geat goddet rupmaša , muhto eai sáhte goddit sielu .
Ballet baicca sus gii sáhttá heavahit sihke sielu ja rupmaša helvehii .
Eai go guokte cizáža vuvdojuvvo ovtta skillegii ?
Muhto ii oktage dain gahča eatnamii almmá Áhčádet dieđekeahttá .
Ja dis leat velá buot oaivvi vuoktačalmmit ge lohkkojuvvon .
Allet dan dihtii bala ! Dii han lehpet eanet veara go ollu cizážat .
Guhte dovddasta mu olbmuid ovddas , su mun ge dovddan Áhččán ovddas guhte lea almmis .
Muhto guhte biehttala mu olbmuid ovddas , su mun ge biehttalan Áhččán ovddas guhte lea almmis .
Allet gátte ahte mun lean boahtán buktit ráfi eatnama ala .
In leat boahtán buktit ráfi , muhto miehki .
Mun lean boahtán bidjat soahpameahttunvuođa bártni ja áhčis gaskii , nieidda ja eatnis gaskii , manji ja vuotnáma gaskii , ja dáluolbmot šaddet isida vašálažžan .
Dat guhte ráhkista áhčis dahje eatnis eanebut go mu , ii dohkke munnje . Dat guhte ráhkista bártnis dahje nieiddas eanebut go mu , ii dohkke munnje .
Ja dat guhte ii váldde ruossas ja čuovo mu , ii dohkke munnje .
Dat guhte lea gádjon heakkas , massá dan . Muhto dat guhte lea massán heakkas mu dihtii , gádju dan !
Dat guhte váldá din vuostái , váldá mu vuostái ; ja dat guhte váldá mu vuostái , váldá vuostái su guhte lea vuolggahan mu .
Dat guhte váldá profehta vuostái , danne go son lea profehta , oažžu profehta bálkká , ja dat guhte váldá vuostái vanhurskkis olbmá , danne go son lea vanhurskkis , oažžu vanhurskása bálkká .
Ja dat guhte addá geasage dáin uhcahaččain dušše guvssi dievva ge galbma čázi , danne go son lea máhttájeaddji , duođaid , mun cealkkán didjiide : Son ii eisege masse bálkkás .
Go Jesus lei geargan rávvemis guoktenuppelot máhttájeaddjis , de vulggii doppe oahpahit ja sárdnidit biras gávpogiin .
Go Johanas gulai giddagasas maid Kristus dagai , de son vuolggahii muhtumiid máhttájeddjiinis jearrat sus : « Leat go don dat guhte galgá boahtit , vai galgat go mii vuordit muhtun eará ? »
Jesus vástidii sidjiide : « Mannet muitalit Johanassii maid gullabehtet ja oaidnibehtet . Čalmmeheamit oidnet , lápmásat vázzet , spihtálaččat buhtistuvvojit ja bealjeheamit gullet , jábmit bajásčuoččáldahttojuvvojit ja evangelium sárdniduvvo váivvážiidda ; ja ávdugas lea dat guhte mus ii vearrán . »
Go sii ledje mannan , de Jesus sárdnidišgođii olbmuide Johanasa birra : « Manne dii manaidet meahccái ?
Oaidnit skáhčira sojadeamen biekkas ?
Ehpet !
Manne manaidet dohko ?
Oaidnit čábbát gárvodan olbmá ?
Sii guđet gárvodit čáppa biktasiiguin , leat gonagasaid šloahtain .
Manne de manaidet dohko ?
Oaidnit profehta ?
Áibbas riekta , ja mun cealkkán didjiide : Eanet go profehta ! Son lea dat gean birra lea čállojuvvon : Geahča , mun vuolggahan áirasan du ovddabeale , son ráhkada dutnje geainnu .
Duođaid , mun cealkkán didjiide : Sin gaskkas geat leat riegádan nissonis , ii leat almmustuvvan oktage stuorit go gásttašeaddji Johanas , muhto vel uhcimus ge almmiriikkas lea stuorit go son .
Gásttašeaddji Johanasa beivviid rájes gitta dássážii leat olbmot bahkken veagal almmiriikii , ja sii geat bahkkejit dohko , gaikot dan alcceseaset .
Dasgo buot profehtat ja láhka leat einnostan Ipmila riikka gitta Johanasa rádjái .
Jos oskkožehpet dan : Son lea Elia gii galggai boahtit .
Geas ležžet bealjit , son gullos !
Muhto mainna mun veardidan dán sohkagotti ?
Dat lea mánáid láhkásaš geat čohkkájit šiljus ja čurvot guhtet guimmiidasaset : Mii čuojaheimmet didjiide njurggonasa , ehpet ge dii gárron dánsut .
Mii lávlluimet morašlávlagiid , ehpet ge dii gárron luoibmat .
Dasgo Johanas bođii ; ii son bora ii ge juga , ja olbmot dadjet : Sus lea bahá vuoigŋa .
Olbmobárdni bođii ; son sihke borrá ja juhká , ja olbmot dadjet : Gehččet , man vuovdás ja viidnejuhkkis olmmái , tuolláriid ja suttolaččaid ustit !
Muhto Viisodaga dagut duođaštit viisodaga . »
Dalle Jesus moaitigođii daid gávpogiid gos son lei dahkan eanas fámolaš daguidis , danne go sii eai lean dahkan jorgalusa : « Vuoi du , Korasin !
Vuoi du , Betsaida !
Jos dat oavdudagut mat leat dahkkojuvvon dudno guovllus , livčče dáhpáhuvvan Tyrosis dahje Sidonis , de dat livččiiga áigá juo dahkan jorgalusa ja gárvodan seahkaiguin ja gunaiguin .
Mun cealkkán dudnuide : Tyrosii ja Sidonii geavvá geahppaseabbot duopmobeaivvi go dudnuide .
Ja don , Kapernaum , guhte dáhtošit bajiduvvot gitta almmi rádjái , don norddastuvvot vuolás jábmiid riikii !
Jos dat oavdudagut mat leat dahkkon du luhtte , livčče dahkkon Sodomas , de dat livččii bisson gitta dán beaivvi rádjái .
Mun cealkkán : Sodoma eatnamii geavvá geahppaseabbot duopmobeaivvi go dutnje . »
Dan áiggi Jesus sárdnugođii ja celkkii : « Áhččán , mun rámidan du , almmi ja eatnama Hearrá , danne go leat čiehkan dán viisáin ja jierpmálaččain , muhto leat almmustahttán dan uhcahaččaide .
Duođaid , Áhččán , nu lei du buorre dáhttu .
Buot lea Áhččán oskkildan munnje .
Ii oktage dovdda Bártni earet go Áhčči ; ii ge oktage dovdda Áhči earet go Bárdni ja son geasa Bárdni dáhttu almmustahttit dan .
Bohtet mu lusa , buohkat geat rahčabehtet ja guoddibehtet lossa nođiid , de attán didjiide vuoiŋŋadusa .
Váldet mu geassá badjelasadet ja ohppet mus , dasgo mun lean gierdavaš ja vuollegaš váimmus , dalle gávdnabehtet vuoiŋŋadusa sieluidasadet .
Dasgo mu geasis lea buorre , ja mu noađđi lea geahpas . »
Dan áiggi Jesus lei oktii vázzimin gordnebealdduid čađa sábbáhin .
Su máhttájeaddjit ledje nelgon ja čoaggigohte gordneoivviid ja borre .
Farisealaččat oidne dán ja dadje sutnje : « Geahča ! Du máhttájeaddjit dahket dan mii ii leat lobálaš sábbáhin ! »
Dalle son celkkii sidjiide : « Ehpet go dii leat lohkan maid Dávvet dagai go son ja su olbmát ledje nealgumin ?
Son manai Ipmila vissui ja borai oaffarláibbiid maid sus ii lean lohpi borrat ii ge su olbmáin , muhto duššefal báhpain .
Dahje ehpet go leat lohkan lágas ahte báhpat juohke sábbáha barget tempelis ja nu rihkkot lága , ja dattege leat sivaheamit ?
Mun cealkkán : Dá lea dat mii lea stuorit go tempel .
Jos dii livččiidet ádden maid dát sátni mearkkaša : Váibmoláđisvuođa mun dáhtun , in ge oaffara , de ehpet livčče dubmen sivahemiid .
Dasgo Olbmobárdni lea sábbáha hearrá . »
De Jesus vulggii das ja bođii sin synagogii .
Doppe lei olmmái geas lei ástan giehta .
Vai farisealaččat sáhtášedje váidit Jesusa , sii jerre sus : « Lea go sábbáhin lohpi buoridit ? »
Son vástidii : « Guhtemuš dis , geas lea okta sávza , ii dohppeše dan ja geasáše dan bajás , jos dat gahčašii roggái sábbáhin ?
Man ollu eanet veara lea olmmoš go sávza !
Danne lea lohpi dahkat buriid sábbáhin . »
Ja son celkkii olbmái : « Geige gieđat ! »
Son geigii dan , ja giehta šattai seammá dearvvašin go nubbi ge .
Muhto farisealaččat manne olggos ja lihtodišgohte Jesusa vuostái mo sii sáhtášedje goddit su .
Go Jesus oaččui diehtit dan , de vulggii doppe eret .
Stuora olmmošjoavkkut čuvvo su , ja son buoridii sin buohkaid . Muhto son gilddii sin garrasit muitaleames geasage iežas birra , vai ollašuvašii dat mii lea celkojuvvon profehta Jesaja bokte : Geahča , dát lea mu bálvaleaddji gean mun lean válljen ; su mun ráhkistan , ja son illudahttá mu sielu .
Mun bijan Vuoigŋan su ala , ja son gulaha álbmogiidda vuoigatvuođa .
Ii son bealkke ii ge čuorvvo , ii ge oktage gula su jiena gáhtaid alde .
Doddjon skáhčira son ii cuvke , suovasteaddji veaikka son ii jáddat , dassá go son ollašuhttá vuoigatvuođa vuoitun .
Ja su namma addá álbmogiidda doaivvu .
Dasto sii dolvo Jesusa lusa muhtun čalmmehis ja gielahis olbmá geas lei bahá vuoigŋa .
Jesus buoridii su , nu ahte olmmái sihke hálai ja oinnii .
Ja buot olbmot imaštalle sakka ja jerre : « Leažžá go son Dávveda Bárdni ? »
Muhto go farisealaččat gulle dan , de sii dadje : « Beelsebula iežas , bahá vuoiŋŋaid oaivámučča fámuin son ádjá olggos bahá vuoiŋŋaid . »
Muhto Jesus diđii sin jurdagiid , ja celkkii sidjiide : « Juohke riika mii lea soahpameahttun iežainis , duššaduvvo , ii ge oktage gávpot dahje ruoktu mii lea soahpameahttun iežainis , sáhte bissut .
Jos dál Sáhtán ádjá olggos Sáhtána , de son lea soahpameahttun iežainis .
Mo sáhttá su riika dalle bissut ?
Jos mun áján olggos bahá vuoiŋŋaid Beelsebula fámuin , gean fámuin din iežadet oahppit ádjet olggos daid ?
Dan dihtii sii šaddet din duopmárin .
Muhto jos mun áján olggos bahá vuoiŋŋaid Ipmila Vuoiŋŋa fámuin , dalle han Ipmila riika lea boahtán din lusa .
Dahje mo sáhttá oktage mannat gievrras olbmá dállui ja rievidit su opmodagaid , ovdal go son vuos čatná su ?
De son easkka sáhttá stajidit su viesu .
Dat guhte ii leat mu beale , lea mu vuostái ; dat guhte ii čohkke muinna , biđge .
Danne mun cealkkán didjiide : Buot suddu ja bilkádus addojuvvo olbmuide ándagassii , muhto bilkádus Vuoiŋŋa vuostái ii addojuvvo ándagassii .
Guhte sárdnu Olbmobártni vuostái , sutnje addojuvvo ándagassii . Muhto dat guhte sárdnu Bassi Vuoiŋŋa vuostái , sutnje ii addojuvvo ándagassii , ii dálá máilmmis ii ge boahtti máilmmis ge .
Jos muorra lea buorre , de dan šattut ge leat buorit , muhto jos muorra lea headju , de dan šattut ge leat heajut . Muora dovdá dan šattuin .
Dii gearpmaščivggat ! Mo dii geat lehpet bahát sáhttibehtet dadjat maidege buriid ?
Dasgo mas váibmu lea dievva , dan han njálbmi sárdnu .
Buorre olmmoš buktá buriid buorrevuođa rájustis , ja bahás olmmoš buktá baháid bahávuođa rájustis .
Mun cealkkán didjiide : Juohke duššálaš sáni ovddas maid olbmot dadjet , fertejit sii vástidit duopmobeaivvi .
Dasgo sániidat mielde don dahkkojuvvot friddjan , ja sániidat mielde dubmejuvvot . »
Muhtun čálaoahppavaččat ja farisealaččat sárdnugohte Jesusii : « Oahpaheaddji , mii hálidivččiimet oaidnit du dahkamin oavdumearkka . »
Muhto son vástidii sidjiide : « Bahás ja oskkáldasmeahttun sohkabuolva gáibida mearkkaid , muhto dat ii oaččo eará mearkka go profehta Jona mearkka .
Dasgo nugo Jona lei golbma beaivvi ja golbma ija stuora guoli čoavjjis , nu Olbmobárdni ge galgá leat golbma beaivvi ja golbma ija eatnama ozas .
Ninive olbmot bajásčuožžilit duopmobeaivvi oktan dán sohkabuolvva olbmuiguin ja váidalit sin . Dasgo Jona sárdnidettiin sii dahke jorgalusa , muhto dás lea eanet go Jona !
Duopmobeaivvi lullieatnama dronnet bajásčuoččáldahttojuvvo oktan dán sohkabuolvva olbmuiguin ja váidala sin . Dasgo son bođii gitta eatnama gežiin guldalit Salomo viissisvuođa , muhto dás lea eanet go Salomo !
Go buhtismeahttun vuoigŋa vuolgá olbmos , de dat vádjola ávdin duoddariid badjel ohcamin vuoiŋŋastanbáikki , muhto ii gávnna . De dat dadjá : Mun áiggun máhccat vissosan man guđđen .
Dat boahtá dohko ja gávdná dan guorusin , suohpalastojuvvon ja čiŋahuvvon . Dalle dat vuolgá viežžat čieža eará vuoiŋŋa vel , bahábuid go son ieš , ja sii fárrejit sisa ja ássagohtet doppe .
Ja dan olbmo dilli šaddá vearrábun go ovddit dilli .
Nu geavvá dáinna bahás sohkabuolvvain ge . »
Go Jesus lei ain sárdnumin olbmuide , de su eadni ja su vieljat bohte .
Sii ledje čuožžumin olggobealde ja hálidedje háleštit suinna . De muhtun dajai sutnje : « Du eadni ja du vieljat leat olggobealde jearaheamen du »
Jesus vástidii sutnje gii lei jearran sus : « Gii lea mu eadni , ja geat leat mu vieljat ? »
Ja son čujuhii gieđain máhttájeddjiidasas ja celkkii : « Gehččet , dá leat mu eadni ja mu vieljat .
Dasgo juohkehaš gii dahká mu almmálaš Áhči dáhtu , lea mu viellja ja oabbá ja eadni . »
Seammá beaivvi Jesus manai olggos ja čohkánii jávregáddái .
Su birra čoahkkanedje nu ollu olbmot ahte son fertii mannat fatnasii .
Son čohkkái das , ja olbmot čužžo jávregáttis .
Ja son sárdnidii sidjiide ollu veardádusaiguin ja celkkii : « Gilvi vulggii gilvit .
Ja gilvvedettiin gahčče muhtun čalmmit geaidnogurrii , ja lottit bohte ja borre daid .
Muhtun čalmmit gahčče geađgás eatnamii gos ii lean ollu muolda , ja dat ihte johtilit , dasgo eanan lei asehaš .
Muhto go beaivváš badjánii , de dat bulle ja goldne go dain ii lean ruohtas .
Muhtun čalmmit gahčče bastilislánjáid gaskii , ja bastilislánját šadde ja hávkadedje daid .
Muhto muhtun čalmmit gahčče šattolaš eatnamii ja šaddadedje šattuid : muhtumat šaddadedje čuođigeardásaččat , muhtumat guhttalotgeardásaččat ja muhtumat golbmalotgeardásaččat .
Geas ležžet bealjit , son gullos ! »
Máhttájeaddjit bohte su lusa ja jerre : « Manne don sártnut sidjiide veardádusaiguin ? »
Son vástidii sidjiide : « Didjiide lea addojuvvon dovdat almmi riikka čiegusvuođaid , muhto sidjiide ii leat addojuvvon .
Dasgo sutnje geas lea , addojuvvo , ja son oažžu valljugasat . Muhto geas ii leat , sus váldojuvvo eret velá dat ge mii sus lea .
Danne mun sárdnidan sidjiide veardádusaiguin . Dasgo oainnedettiineaset sii eai oainne , ja guladettiineaset sii eai gula eai ge ádde .
Dáinna lágiin sii dál ollašuhttet dán Jesaja einnostusa : Guladettiineattet dii gullabehtet ehpet ge ádde , oainnedettiineattet dii oaidnibehtet ehpet ge fuobmá .
Dasgo dán álbmoga váibmu lea buoššuduvvon , illá sii gullet beljiiguin , ja čalmmiideaset sii leat čárven , amaset sin čalmmit oaidnit , sin bealjit gullat , sin váibmu áddet , nu ahte eai jorgalivčče vai mun beasašin buoridit sin .
Muhto ávdugasat din čalmmit mat oidnet ja din bealjit mat gullet .
Duođaid , mun cealkkán didjiide : Ollu profehtat ja vanhurskásat leat áibbašan oaidnit dan maid dii oaidnibehtet , eai ge beassan oaidnit dan , ja gullat dan maid dii gullabehtet , eai ge beassan gullat dan .
Gullet dál , maid veardádus gilvi birra mearkkaša : Álo go muhtun gullá sáni riikka birra ii ge ádde dan , de bahákas boahtá ja dohppe dan mii lea gilvojuvvon su váibmui .
Dát lea dat mii gilvojuvvui geaidnogurrii .
Dat mii gilvojuvvui geađgás eatnamii , lea son gii vuostáiváldá sáni iluin go gullá dan . Muhto sus ii leat ruohtas ja son bissu dušše muhtun áiggi .
Go dasto áŧestus ja doarrádallojupmi boahtá sáni dihtii , de son hilgáda dallánaga .
Dat mii gilvojuvvui bastilislánjáid gaskii , lea son gii gullá sáni , muhto dálá máilmmi váivvit ja riggodaga fillehus hávkada sáni , nu ahte dat ii šaddat šattuid .
Muhto dat mii gilvojuvvui šattolaš eatnamii , lea son gii gullá sáni ja ádde dan ja šaddada šattuid : čuođigeardásaččat , guhttalotgeardásaččat dahje golbmalotgeardásaččat . »
Son muitalii sidjiide nuppi veardádusa ja celkkii : « Almmiriika lea olbmá láhkásaš gii lei gilván buriid nisuid beldosis .
Ja buohkaid oađedettiin bođii su vašálaš ja gilvvii árvvohis rásiid nisuid gaskii ja manai eret .
Go gortnit šaddagohte ja bidjagohte gihpuid , de ihte maiddái árvvohis rásit ge .
Bálvaleaddjit manne dalle isideaset lusa ja jerre : Hearrá ! It go lean gilván buriid nisuid beldosat ?
Gos bohtet árvvohis rásit ?
Son vástidii : Vašálaš lea dahkan dan .
De bálvaleaddjit jerre sus : Dáhtut go ahte mii gaikut daid eret ?
Son vástidii : In dáhto , amadet gaikut nisuid bajás oktan árvvohis rásiiguin .
Diktet goappašagaid šaddat bálddalagaid gitta láddjenáigái .
Go láddjenáigi boahtá , de mun cealkkán ládjobargiide : Čohkkejehket vuos árvvohis rásiid ja čatnet gihppun boaldima várás , muhto čohkkejehket nisuid mu láhtui . »
Son muitalii sidjiide maiddái dán veardádusa : « Almmiriika lea sennetsiepmana láhkásaš man olmmái gilvvii beldosis .
Dat lea uhcit go buot eará siepmanat ; muhto go dat šaddá ja stuorru , de šaddá stuoribun go eará gilvvašattut ja šaddá stuora muorran , nu ahte almmi lottit bohtet ja ráhkadit besiid dan ovssiide . »
Son muitalii sidjiide dán veardádusa vel : « Almmiriika lea suvrradáiggi láhkásaš man nisu soatká golmma mihtu jáffuid sisa , ja de suvru buot . »
Buot dáid Jesus sártnui olbmuide veardádusaiguin . Almmá veardádusaid haga son ii oppa sárdnon ge sidjiide maidege . Nu ollašuvai dat mii lea celkojuvvon profehta bokte : Mun raban njálbmán ja sártnun veardádusaiguin ; mun almmuhan dan mii lea leamaš čihkosis máilmmi sivdnideami rájes .
Dasto Jesus guđii olmmošjoavkkuid ja máhcai vissui .
Ja su máhttájeaddjit bohte su lusa ja dadje : « Čilge midjiide veardádusa bealddu árvvohis rásiid birra ! »
Son vástidii sidjiide : « Dat gii gilvá buriid gilvagiid , lea Olbmobárdni .
Bealdu lea máilbmi . Buorit gilvagat leat riikka mánát , muhto árvvohis rásit leat bahákasa mánát .
Vašálaš gii gilvvii árvvohis rásiid , lea beargalat .
Gordneládju lea dálá máilmmi loahppa , ja ládjobargit leat eŋgelat .
Nugo árvvohis rásit čohkkejuvvojit ja boldojit dolas , nu geavvá dálá máilmmi loahpas ge : Olbmobárdni vuolggaha eŋgeliiddis , ja sii čohkkejit ja dolvot eret su riikkas buot daid guđet vearránahttet ja dahket vearrivuođaid , ja bálkestit sin dollaoapmanii ; doppe sii čirrot ja gižahit bániid .
Muhto vanhurskásat báitet dego beaivváš Áhčiset riikkas .
Geas ležžet bealjit , son gullos !
Almmiriika lea dávvira láhkásaš mii lei čihkkojuvvon beldui .
Olmmái gávdná dan , čiehká dan fas , ja ilustis son vuovdá buot opmodagas ja oastá bealddu .
Almmiriika lea maiddái gávpeolbmá láhkásaš gii lea ohcamin čáppa bearraliid .
Go son gávdná divrras bearrala , de vuovdá buot opmodagas ja oastá dan .
Almmiriika lea maiddái nuohti láhkásaš mii suhppejuvvo jávrái ja bivdá juohke lágán guliid .
Go dat lea dievva , de bivdit gesset dan gáddái . Sii čohkánaddet ja čohkkejit buriid guliid lihtiide , muhto bálkestit eret fuones guliid .
Nu geavvá dálá máilmmi loahpas ge : Eŋgelat vulget olggos ja rátket baháid vanhurskásiin ja bálkestit sin dollaoapmanii ; doppe sii čirrot ja gižahit bániid .
Lehpet go ádden buot dán ? »
Sii vástidedje : « De leat . » Dalle son celkkii sidjiide : « Danne lea juohke čálaoahppavaš gii lea šaddan almmiriikka máhttájeaddjin , dáluisida láhkásaš guhte buktá ovdan rájustis sihke ođđa ja boares vuorkkáid . »
Go Jesus lei geargan muitaleames dáid veardádusaid , de vulggii doppe ja bođii ruovttugávpogasas .
Son oahpahii olbmuid sin synagogas , nu ahte sii hirpmástuvve ja jerre : « Gos son lea ožžon dán viisodaga ja fámu dahkat dákkár oavdudaguid ?
Ii go son leat dat dimbbarolbmá bárdni ?
Ii go su eatni namma leat Márjá , ja su vieljaid namat Jáhkot , Jovsset , Simmon ja Judas ?
Eai go buot su oappát ása dáppe min searvvis ?
Gos ba son lea ožžon buot dán ? »
Ja sii vearránedje sus eai ge dáhtton maidege dahkamušaid suinna .
Muhto Jesus celkkii sidjiide : « Ii profehta badjelgehččojuvvo eará báikkis go iežas ruovttugávpogis ja ruovttus . »
Ja sin eahpeoskku dihtii son ii dahkan doppe eatnat oavdudaguid .
Dan áiggi guovllugonagas Herodes gulai sága Jesusa birra . Son dajai bálvaleddjiidasas : « Dat lea gásttašeaddji Johanas . Son lea bajásčuoččáldahttojuvvon jábmiid luhtte ; danne sus leat dakkár fámut . »
Dasgo Herodes lei váldán Johanasa gitta , čatnan su ja bidjan su giddagassii Herodiasa , vieljas Filipa áhká , dihtii . Dasgo Johanas lei cealkán Herodesii : « Ii dus leat lohpi váldit su alccesat áhkkán . »
Herodes livččii hálidan goddit su , muhto son balai olbmuin , geat atne Johanasa profehtan .
Muhto go Herodes lei doallamin riegádanbeaivvis , de Herodiasa nieida dánssui gussiid ovddas . Herodes liikui dasa nu bures ahte vuordnumiin lohpidii sutnje maid ihkinassii son dáhtoš .
Dalle eadni hálahii nieiddas dadjat : « Atte munnje gásttašeaddji Johanasa oaivvi gári siste . »
Gonagas šattai fuones millii , muhto vuordnumis ja gussiid dihtii son gohčui addit niidii dan , ja son bijai sáni giddagassii ja gohčui steavlidit Johanasa .
Oaivi buktojuvvui sisa gári siste ja addojuvvui niidii gii dasto attii dan eadnásis .
Muhto su máhttájeaddjit bohte viežžat liikka ja hávdádedje dan ja de sii manne ja muitaledje buot Jesusii .
Go Jesus gulai dán , de son vulggii eret fatnasiin muhtun oktonas báikái , gos sáhtii leat okto .
Muhto olbmot gulle dan , ja olusat vulge gávpogiin ja bohte vácci su maŋis .
Go Jesus dál manai gáddái , de oinnii stuora olmmošjoavkku . Son árkkášii sin njuorrasit ja buoridii buot buhcciid .
Muhto go šattai eahket , de máhttájeaddjit bohte su lusa ja dadje : « Dát báiki lea ávdin , ja lea juo maŋŋit .
Vuolggat olbmuid dáppe eret vai besset mannat giliide oastit alcceseaset borramuša . »
Muhto Jesus vástidii sidjiide : « Eai sii dárbbaš vuolgit dáppe .
Addet dii sidjiide borramuša ! »
Sii dadje sutnje : « Mis leat dušše vihtta láibbi ja guokte guoli dás . »
Son celkkii : « Buktet daid munnje ! »
De gohčui olbmuid čohkánit rássegieddái , válddii dan vihtta láibbi ja guokte guoli , geahčai almmi guvlui ja rohkadalai giittusrohkosa .
Son doadjalii láibbiid ja attii máhttájeddjiide , ja máhttájeaddjit juogadedje daid olbmuide .
Ja buohkat boradedje ja gallánedje .
Maŋŋil čohkkejuvvojedje báhcán bihtát ja dat devde guoktenuppelot veaddelihti .
Birrasiid vihttaduhát olbmá ledje boradan das , earet nissoniid ja mánáid .
Dakkaviđe dán maŋŋil son gohčui máhttájeddjiidis mannat fatnasii ja vuolgit ovddas nuppi beallái , dan botta go ieš vuolggahii eret olmmošjoavkkuid .
Go son lei dahkan dán , de manai sierranassii várrái rohkadallat .
Go šattai eahket , de son lei doppe okto .
Fanas lei juo guhkkin eret gáttis , ja dat ražai garrasit báruid vuostái , dasgo lei vuostebiegga .
Muhto njealját idjagohcinvuorus son bođii vácci jávrri alde sin lusa .
Go máhttájeaddjit oidne su vázzimin jávrri alde , de suorganedje ja dadje : « Diet lea gobmi ! »
ja sii huike balus .
Muhto dan seammás Jesus sártnui sidjiide : « Lehket roahkkadat , mun dat lean . Allet bala ! »
De Biehtár dajai sutnje : « Hearrá , jos dat leaččat don , de gohčo mu boahtit lusat jávrri ala . »
Jesus celkkii : « Boađe ! »
Biehtár loaiddastii eret fatnasis ja váccii jávrri alde Jesusa lusa .
Muhto go son fuomášii man garas biegga lei , de ballái , ja son vuodjugođii ja čurvii : « Hearrá , beastte mu ! »
Dan seammás Jesus geigii gieđas , dohppii su ja celkkii : « Man uhcán osku dus lea ! Manne eahpidit ? »
Go soai loaiddasteigga fatnasii , de biegga ložžii .
Muhto sii geat ledje fatnasis , luoitádedje su ovdii ja dadje : « Don leat duođaid Ipmila Bárdni ! »
Go sii ledje ollen jávrri rastá , de láddejedje Gennesaretii .
Doppe olbmot dovdájedje su ja dieđihedje dan miehtá guovllu , ja sii bukte su lusa buot buhcciid .
Sii ánuhedje sus beassat dušše guoskkahit su bivttasdiehpi , ja buohkat geat dahke dan , dearvvašmahttojuvvojedje .
De bohte farisealaččat ja čálaoahppavaččat Jerusalemis Jesusa lusa ja jerre : « Manne du máhttájeaddjit rihkkot máddariid árbevieruid ?
Sii eai basa gieđaideaset ovdal go boradit . »
Son vástidii : « Naba dii , manne dii ieža rihkkubehtet Ipmila báhkkomiid ja čuovvubehtet iežadet árbevieruid ?
Dasgo Ipmil lea cealkán : Don galggat gudnejahttit áhčát ja eatnát , ja : Dat guhte garuha áhčis dahje eatnis , galgá jápmit .
Muhto dii oahpahehpet ná : Jos guhtege dadjá áhččásis dahje eadnásis : Dan maid don galggašit oažžut mus veahkkin , lean lohpidan oaffarin tempelii , de son ii dárbbaš gudnejahttit áhčis dahje eatnis .
Nu dii lehpet dahkan Ipmila sáni duššin árbevieruideattet dihtii .
Dii guoktilaččat ! Jesaja einnostii riekta din birra go celkkii : Dát álbmot gudnejahttá mu baksamiiguin , muhto sin váibmu lea guhkkin mus eret .
Duššás sii bálvalit mu , dasgo dat maid sii oahpahit , leat olbmuid árbevierut . »
Son gohčui olmmošjoavkku lusas ja celkkii : « Guldalehket mu ja áddejehket : Dat mii boahtá njálmmi sisa , ii daga olbmo buhtismeahttumin . Muhto dat mii manná olggos njálmmis , dahká olbmo buhtismeahttumin . »
De máhttájeaddjit manne su lusa ja dadje : « Dieđát go ahte farisealaččat vearránedje go gulle dán ? »
Son vástidii sidjiide : « Juohke šaddu man mu almmálaš Áhčči ii leat gilván , gaikkihuvvo ruohttasiin .
Allet beroš sis !
Sii leat čalmmehis oahpisteaddjit ; ja go čalmmeheapme láide čalmmeheami , de guktot gahččaba roggái . »
Biehtár dajai sutnje : « Čilge midjiide dán veardádusa ! » Jesus celkkii : « Ehpet go dii ge velá ádde maidege ?
Ehpet go ádde ahte buot mii boahtá njálmmi sisa , manná vuolás čoavjái ja luonddu mielde olggos fas ?
Muhto dat mii manná olggos njálmmis , boahtá olbmo váimmus , ja dat dahká olbmo buhtismeahttumin .
Dasgo váimmus bohtet bahás jurdagat , olmmošgoddin , náittosdilirihkkun , fuorrávuohta , suolavuohta , vearreduođaštusat ja bilkádusat .
Dákkárat dat dahket olbmo buhtismeahttumin .
Boradeapmi basakeahtes gieđaiguin ii daga olbmo buhtismeahttumin . »
Jesus vulggii doppe Tyrosa ja Sidona guovlluide .
Muhtun kanaanlaš nisu gii lei dain guovlluin eret , bođii su ovddal ja čuorvvui : « Hearrá , Dávveda bárdni , árpmit mu !
Bahá vuoigŋa givssida mu nieidda garrasit . »
Muhto ii son vástidan nissonii sáni ge .
Máhttájeaddjit jorggihedje sutnje ja dáhtto : « Daga juoidá ; son boahtá čuorvvu min maŋis ! »
Muhto Jesus vástidii sidjiide : « In mun leat vuolggahuvvon earáid go Israela álbmoga láhppon sávzzaid várás . »
De nisu bođii ja luoitádii Jesusa ovdii ja dajai : « Hearrá , veahket mu ! »
Jesus vástidii sutnje : « Ii leat riekta váldit láibbi mánáin ja bálkestit dan beatnagiidda . »
Nisu vástidii : « Hearrá , dat lea duohta , muhto beatnagaččat han besset borrat daid moaluid mat gahččet isidiiddiset beavddis . »
De Jesus celkkii sutnje : « Nisu , du osku lea stuoris .
Šaddos nugo don dáhtut . »
Ja nieida dearvvašmuvai seammá bottus .
Jesus vázzái ja bođii Galileajávregáddái , gos son manai várrái ja čohkánii .
Stuora olmmošjoavkkut bohte su lusa lápmásiiguin ja skierpmáiguin , čalmmehemiiguin , gielahemiiguin ja ollu earáiguin ja bidje sin su julggiid ovdii .
Son buoridii sin , ja olbmot ovddošedje go gulle gielahemiid hállamin ja oidne skierpmáid dearvvašmuvvamin , lápmásiid vázzimin ja čalmmehemiid oaidnimin .
Ja sii máidno Israela Ipmila .
Jesus gohčui máhttájeddjiidis lusas ja celkkii : « Mun árkkášan njuorrasit olbmuid , dasgo sii leat leamaš mu luhtte juo golbma beaivvi , ii ge sis leat maid borrat .
In mun dáhto vuolggahit sin borakeahttá ruoktot amaset vuoimmehuvvat geainnu ala . »
Máhttájeaddjit dadje sutnje : « Gos mii dáppe meahcis fidnet nu ollu láibbiid gallehit dákkár stuora joavkku ? »
Jesus jearai : « Galle láibbi dis leat ? »
Sii vástidedje : « Čieža , ja vel moadde uhca guoláža . »
Son gohčui olbmuid čohkánit eatnamii .
De válddii dan čieža láibbi ja guliid , rohkadalai giittusrohkosa , doadjalii daid ja attii máhttájeddjiide , ja máhttájeaddjit juogadedje daid olbmuide .
Buohkat boradedje ja gallánedje .
Maŋŋil čohkkejuvvojedje báhcán bihtát , čieža veaddelihti dievva .
Sii geat ledje boradan , ledje njealljeduhát olbmá , earet nissoniid ja mánáid .
De Jesus luittii olbmuid mannat ruoktot , loaiddastii fatnasii ja vulggii Magadana guovlluide .
De bohte Jesusa lusa muhtun farisealaččat ja saddukealaččat geat dáhtto geahččalit su ja bivde su čájehit alcceseaset mearkka almmis .
Muhto son vástidii sidjiide : « Eahkedis dadjabehtet : Šaddá buorre dálki , dasgo albmi roađđida , ja iđedis dadjabehtet : Odne šaddá garra dálki , dasgo albmi roađđida ja lea seavdnjat .
Almmi hámi gal máhttibehtet árvidit , muhto ehpet áiggiid mearkkaid .
Bahás ja oskkáldasmeahttun sohkabuolva gáibida mearkka , muhto dat ii oaččo eará mearkka go Jona mearkka . »
De son guđii sin ja vulggii .
Go máhttájeaddjit jovde nuppi beallái jávrri , de ledje vajáldahttán váldimis láibbi .
Jesus celkkii sidjiide : « Váruhehket farisealaččaid ja saddukealaččaid suvrradáiggis ! »
Sii árvališgohte gaskaneaset ja dadje : « Dat lea danne go mii eat leat váldán láibbi mieldámet . »
Muhto Jesus fuobmái dán ja celkkii : « Man uhcán osku dis lea ! Manne árvalehpet gaskaneattet ahte dis ii leat láibi ?
Ehpet go velá árvit maidege ?
Ehpet go muitte dan vihtta láibbi mat ledje doarvái viđa duhát olbmui , ja galle veaddelihti dievva dii dalle čohkkiidet ?
Dahje dan čieža láibbi mat ledje doarvái njealji duhát olbmui , ja galle veaddelihti dievva dii dalle čohkkiidet ?
Manne ehpet ádde ahte in sárdnon didjiide láibbi birra ?
Muhto váruhehket farisealaččaid ja saddukealaččaid suvrradáiggis . »
Dalle áddejedje ahte son ii lean rávvemin sin láibbi suvrradáiggis , muhto farisealaččaid ja saddukealaččaid oahpus .
Go Jesus bođii Cæsarea Filippi guovlluide , de jearai máhttájeddjiinis : « Geanin olbmot dadjet Olbmobártni ? »
Sii vástidedje : « Muhtumat dadjet gásttašeaddji Johanassan , earát dadjet Elian , ja earát gis dadjet Jeremian dahje muhtumin profehtain . »
Son jearai sis : « Naba dii , geanin dii dadjabehtet mu ? »
Simmon Biehtár vástidii sutnje : « Don leat Messias , ealli Ipmila Bárdni . »
De Jesus celkkii sutnje : « Ávdugas leat don , Simmon , Jona bárdni . Dasgo dán ii leat oažži ii ge varra almmustahttán dutnje , muhto Áhččán almmis .
Ja mun cealkkán dutnje ahte don leat Biehtár ; ja dán bávtti ala mun huksen girkon , ja jápmima riikka poarttat eai vuoitte dan .
Mun attán dutnje almmiriikka čoavdagiid ; maid don čanat eatnama alde , lea čadnojuvvon almmis , ja maid don čoavddát eatnama alde , lea čovdojuvvon almmis . »
Ja son gilddii máhttájeddjiidis garrasit muitaleames geasage ahte son lei Messias .
Dan áiggi rájes Jesus čilgegođii máhttájeddjiidasas ahte son ferte mannat Jerusalemii , gos son šaddá gillát vuorrasiid , bajitbáhpaid ja čálaoahppavaččaid gieđaid gaskkas . Son goddojuvvo , muhto bajásčuoččáldahttojuvvo goalmmát beaivvi .
De Biehtár válddii su sierra ja cuiggodišgođii su : « Ipmil várjalivččii du , Hearrá !
Dát ii oaččo dáhpáhuvvat dutnje ! »
Muhto Jesus jorggihii ja celkkii Biehtárii : « Sáhtán , gáidda mu duohkái !
Don leat munnje vearránussan , dasgo du jurdagat eai leat Ipmila jurdagat , muhto olbmuid jurdagat . »
Dasto Jesus celkkii máhttájeddjiidasas : « Jos guhtege dáhttu boahtit mu maŋis , de biehttalehkos iežas , váldos ruossas ja čuvvos mu .
Dasgo dat guhte viggá gádjut heakkas , massá dan . Muhto dat guhte massá heakkas mu dihtii , gádju dan .
Mii ávkkiid lea olbmui jos vuoitá ge oppa máilmmi , muhto massá heakkas ?
Dahje maid sáhttá olmmoš addit máksun heakkas ovddas ?
Dasgo Olbmobárdni boahtá eŋgeliiddisguin Áhčis hearvásvuođas , ja dalle máksá juohkehažžii dan mielde maid dat lea dahkan .
Duođaid , mun cealkkán didjiide : Muhtumat sis geat leat čuožžumin dás , eai muosát jápmima ovdal go oidnet Olbmobártni boahtimin riikkainis . »
Guhtta beaivvi das maŋŋil Jesus válddii fárrosis Biehtára , Jáhkoba ja su vielja Johanasa , ja doalvvui sin alla várrái , gos sii ledje iehčanassii .
Doppe son nuppástuvai sin čalmmiid ovddas ; su ámadadju báittii dego beaivváš , ja biktasat šadde šearradin dego čuovga .
Dan seammás Movsses ja Elia iđiiga sin ovdii ja sártnodeigga suinna .
De Biehtár báhkkoda Jesusii : « Hearrá , lea buorre go mii leat dáppe .
Jos dáhtut , de mun ceggen golbma goađi , ovtta dutnje , ovtta Movssesii ja ovtta Eliai . »
Go son ain lei sárdnumin , de šerres balva suoivanasttii sin , ja jietna gullui balvvas : « Dát lea mu Bárdni , gean mun ráhkistan ; son lea mu miela mielde .
Guldalehket su ! »
Go máhttájeaddjit gulle dan , de bálkestahtte eatnamii gopmut ja ballájedje sakka .
Muhto Jesus manai ja guoskkahii sin ja celkkii : « Čuožžilehket , allet ge bala ! »
Ja go sii geahčastedje bajás , de eai oaidnán ovttage earet Jesusa okto .
Njiejadettiin váris Jesus celkkii sidjiide : Allet muital geasage dán oainnáhusa birra ovdal go Olbmobárdni lea bajásčuoččáldahttojuvvon jábmiid luhtte .
De máhttájeaddjit jerre : « Manne čálaoahppavaččat dalle dadjet ahte Elia vuos ferte boahtit ? »
Son vástidii sidjiide : « Elia gal boahtá dahkat buot fas ođđasit .
Muhto mun cealkkán didjiide ahte Elia lea juo boahtán , eai ge sii dovdan su , muhto dahke sutnje maid hálidedje .
Seammá láhkái ferte maiddái Olbmobárdni ge gillát sin gieđaid gaskkas . »
De máhttájeaddjit áddejedje ahte son sártnui sidjiide gásttašeaddji Johanasa birra .
Go sii máhcce olbmuid lusa , de bođii muhtun olmmái Jesusa lusa , luoitádii su ovdii ja dajai : « Hearrá , árpmit mu bártni !
Sus lea mánnováddu ja son giksašuvvá garrasit , dasgo dávjá son gahččá dollii ja dávjá čáhcái .
Mun dolvon su du máhttájeddjiid lusa , muhto sii eai máhttán buoridit su . »
Jesus vástidii sutnje : « Eahpeoskkolaš ja jorggu sohkagoddi !
Man guhká ferten leat din luhtte ?
Man guhká ferten gierdat din ?
Buktet bártni mu lusa ! »
Ja Jesus šikkui bahá vuoiŋŋa , ja dat vulggii bártnis . Ja bárdni dearvvašmuvai dammanaga bottus .
Dasto máhttájeaddjit bohte iehčanassii Jesusa lusa ja jerre : « Manne mii eat veadján ádjit dan olggos ? »
Son vástidii : « Dan dihtii go dis lea nu uhcán osku .
Duođaid , mun cealkkán didjiide : Jos dis livččii osku sennetsiepmana veardde ge , de sáhtášeiddet dadjat dán várrái : Sirdás dáppe duohko !
Ja dat sirdašuvašii , ii ge mihkkege livčče didjiide veadjemeahttun .
Dát šládja áddjojuvvo olggos dušše rohkosiin ja borakeahttáivuođain . »
Go sii ledje ain čoahkis Galileas , de Jesus celkkii sidjiide ja sii goddet su , ja goalmmát beaivvi son bajásčuoččáldahttojuvvo fas . »
Dalle sii šadde morrašii .
Go sii jovde Kapernaumii , de tempelvearrogáibideaddjit manne Biehtára lusa ja jerre : « Ii go din oahpaheaddji mávsse tempelvearu ? »
Biehtár vástidii : « De máksá . »
Go son bođii ruoktot , de Jesus ollásii Biehtáriin : « Simmon , mo du mielas orru : Geas gáibidit máilmmi gonagasat tuolu ja vearu ? Mánáineaset vai vierrásiin ? »
Son vástidii : « Vierrásiin . » De Jesus celkkii sutnje : « Dalle han mánát besset máksimis .
Muhto amamet vearránahttit sin , de mana jávregáddái , šlivge vuokkat ja váldde vuosttaš guoli mii dohppe , ja go don rabat dan njálmmi , de gávnnat statera .
Váldde dan ja mávsse vearrun sihke mu ja iežat ovddas . »
Aiddo dalle máhttájeaddjit bohte Jesusa lusa ja jerre : « Gii lea stuorimus almmiriikkas ? »
De son rávkkai uhca mánáža lusas , divui dan sin gaskii ja celkkii : Duođaid , mun cealkkán didjiide : Muđuid go jorgalehpet ja šaddabehtet mánáid láhkásažžan , de ehpet eisege beasa almmiriikii .
Dat guhte vuolida iežas ja šaddá dán máná láhkásažžan , lea stuorimus almmiriikkas .
Dat guhte vuostáiváldá dákkár uhca mánáža mu nammii , vuostáiváldá mu .
Muhto sutnje gii vearránahttá ovtta dáin uhcahaččain geat oskot munnje , livččii buoret jos millogeađgi heaŋggastuvvošii su čeabeha birra , ja son vuodjuduvvošii meara čikŋodahkii .
Vuoi dán máilmmi ja dan vearránusaid !
Vearránusat gal fertejit boahtit , muhto vuoi dan olbmo gean bokte vearránusat bohtet !
Jos du giehta dahje juolgi vearránahttá du , de čuohpa dan ja bálkes eret !
Dutnje lea buoret mannat rámbin dahje lámisin eallimii , go bálkestuvvot agálaš dollii guvttiin gieđain dahje julggiin .
Ja jos du čalbmi vearránahttá du , de gaikkit dan olggos ja bálkes eret !
Dutnje lea buoret mannat eallimii čalbmetbeallin go bálkestuvvot helveha dollii guvttiin čalmmiin .
Váruhehket badjelgeahččamis ovttage dáin uhcahaččain !
Dasgo mun cealkkán didjiide : Sin eŋgelat almmis oidnet álo mu almmálaš áhči muođuid .
Olbmobárdni lea boahtán beastit dan gii lea láhppon .
Mo orru din mielas ? Jos muhtun olbmás leat čuođi sávzza , ja okta dain láhppo , ii go son dalle guođe dan ovccilogiovcci várrái ja vuolgge ohcat dan mii lea láhppon ?
Ja jos son gávdná dan , de illuda eanebut dan ovtta dihtii go dan ovccilogiovcci dihtii mat eai lean láhppon .
Seammá láhkái lea din almmálaš Áhči dáhttu ahte ii oktage dáin uhcahaččain láhppoše .
Jos du oskuguoibmi sudduda du vuostái , de mana su lusa ja cuiggot su guovttágaskan .
Jos son guldala du , de don leat vuoitán oskuguoimmát .
Muhto jos son ii guldal , de váldde fárrui ovtta dahje guoktása , dasgo juohke ášši nannejuvvo guovtti dahje golmma duođašteaddji sániin .
Jos son ii guldal sudno ge , de muital searvegoddái .
Muhto jos son ii dáhto guldalit searvegotti ge , de ane su báhkinin dahje tuollárin .
Duođaid , mun cealkkán didjiide : Buot maid dii čatnabehtet eatnama alde , lea čadnojuvvon almmis , ja buot maid čoavdibehtet eatnama alde , lea čovdojuvvon almmis .
Ja vel cealkkán didjiide dán ge : Buot dan maid guovttis dis dáppe eatnama alde šiehtadeahppi átnut , oažžubeahtti mu almmálaš Áhčis .
Dasgo gos guovttis dahje golmmas leat čoagganan mu nammii , doppe mun lean sin gasku .
De Biehtár manai Jesusa lusa ja jearai : « Hearrá , gallii ferten addit ándagassii oskuguoibmásan go son sudduda mu vuostái ?
Nu eatnat go gitta čieža geardái ? »
Jesus vástidii : « It gitta čieža geardái , muhto mun cealkkán dutnje : gitta čiežalot geardde čieža geardái ! »
« Danne almmiriika lea gonagasa láhkásaš guhte dáhtui dahkat logu bálvaleddjiidisguin .
Go son dahkagođii logu , de buktojuvvui su ovdii muhtun gii lei sutnje velggolaš logi duhát taleantta .
Sus ii lean mihkkege mainna máksit , ja isit gohčui su vuvdojuvvot oktan áhkáinis ja mánáidisguin ja buot opmodagainis , ja vealggi máksojuvvot .
Muhto bálvaleaddji luoitádii su ovdii ja ánuhii : Leage gierdavaš , de mun mávssán visot .
De isit árkkálmasttii dán bálvaleaddji , luittii sutnje vealggi ja divttii su mannat .
Muhto go bálvaleaddji manai olggos , de deaivvai muhtuma bálvalanguimmiinis gii lei sutnje velggolaš čuođi denara .
Son dohppii su čoddagii ja dajai : Mávsse vealggát !
Muhto bálvalanguoibmi luoitádii su ovdii ja ánuhii : Leage gierdavaš , de mun mávssán dutnje .
Muhto nubbi ii miehtan dasa . Son manai ja bijahii su giddagassii dassážii go máksá vealggis .
Go eará bálvaleaddjit oidne dan mii dáhpáhuvai , de sii atne dan bahán , manne isideaset lusa ja muitaledje buot .
Dalle isit gohčui bálvaleaddji fas lusas ja celkkii : Don bahás bálvaleaddji ! Mun luiten dutnje oppa vealggi go don ánuhit mus.
It go don ge livčče berren árpmihit bálvalanguoimmát , nugo mun ge árpmihin du ?
Ja isit moaráskii ja bijai bálvaleaddji givssideddjiid háldui , dassážii go lei máksán oppa vealggis .
Nu almmálaš Áhččán ge dahká juohkehažžii dis jos ehpet atte ándagassii oskuguoibmáseattet oppa váimmusteattet . »
Go Jesus lei geargan sárdnideames , de vulggii Galileas Jordana nuortaguovlluid čađa Judeai .
Ollu olbmot čuvvo su , ja son buoridii sin .
Maiddái farisealaččat ge bohte , ja sii jerre geahččalan dihtii su : « Lea go olbmás lohpi earránit áhkástis man sivas ihkinassii ? »
Son vástidii sidjiide : « Ehpet go leat lohkan ahte Sivdnideaddji álggus sivdnidii sudno olmmájin ja nisun ja celkkii : Dan dihtii olmmái guođđá áhčis ja eatnis ja bissu áhkás luhtte , ja dat guovttis šaddaba oktan oažžin .
De eaba leat šat guovttis , muhto okta .
Maid Ipmil nappo lea ovttastahttán , dan ii olmmoš galgga earuhit . »
Sii jerre sus : « Manne Movsses lea gohččon boatnjá addit earrogirjji go earrána áhkástis ? »
Son vástidii : « Din váimmuid garasvuođa dihtii Movsses suovai din earránit áhkás , muhto álggu rájes ii lean nu .
Mun cealkkán didjiide : Dat gii earrána áhkástis mange eará go fuorrávuođa sivas , ja náitala ođđasis , dahká náittosrihkkuma . »
Máhttájeaddjit dadje sutnje : « Jos nu leažžá olbmá ja su áhká gaskkas , de lea buoret orrut náitalkeahttá . »
Son vástidii : « Eai buohkat sáhte áddet dán sáni , dušše sii geaidda dat addojuvvo .
Dasgo leat muhtumat geat ellet náitalkeahttá danne go sii riegádedje dohkkemeahttumin náittosdillái , earát danne go olbmot leat dahkan sin dohkkemeahttumin dasa ; muhto leat maiddái muhtumat geat ieža leat dahkan iežaset dohkkemeahttumin náittosdillái almmiriikka dihtii .
Áddejehkos dan , dat guhte sáhteš . »
Uhca mánážat guddojuvvojedje Jesusa lusa , vai son bijašii gieđaidis daid ala ja rohkadalašii , muhto máhttájeaddjit šiggo olbmuid .
De Jesus celkkii : « Diktet uhca mánážiid leat ráfis , allet ge hehtte sin boahtimis mu lusa .
Dasgo almmiriika gullá dakkáraččaide . »
Ja son bijai gieđaidis sin ala , ja dasto son vulggii doppe eret .
De bođii olmmái Jesusa lusa ja jearai : « Oahpaheaddji , maid buriid mun galggan dahkat , vai árbešin agálaš eallima ? »
Jesus vástidii : « Manne don gohčodat mu buorrin ?
Dušše okta lea buorre .
Muhto jos dáhtut beassat eallimii , de doala báhkkomiid ! »
Son jearai : « Guđiid báhkkomiid ? »
Jesus vástidii : « It galgga goddit , it galgga rihkkut náittosdili , it galgga suoládit , it galgga cealkit vearreduođaštusa , don galggat gudnejahttit áhčát ja eatnát , ja don galggat ráhkistit lagamučča nugo iežat . »
Nuorra olmmái dajai sutnje : « Buot dáid lean doallan , mii mus velá váilu ? »
Jesus vástidii : « Jos dáhtut leat ollis , de mana ja vuovdde buot opmodagat , ja atte visot váivvážiidda . Dalle oaččut dávvira almmis .
Boađe dasto ja čuovo mu ! »
Go nuorra olmmái gulai dan , de manai eret moraš mielain , dasgo son lei hui rikkis .
Jesus celkkii máhttájeddjiidasas : « Duođaid , mun cealkkán didjiide : Rikkis olbmui lea váttis beassat almmiriikii .
Mun cealkkán didjiide : Lea álkit kamelii mannat nállošalmmi čađa go riggái beassat Ipmila riikii . »
Go máhttájeaddjit gulle dan , de hirpmástuvve ja jerre : « Gii dalle sáhttá bestojuvvot ? »
Jesus geahčai sidjiide ja celkkii : « Olbmuide dát gal lea veadjemeahttun , muhto Ipmilii buot lea vejolaš . »
De Biehtár dajai : « Mo dalle mii ? Mii leat guođđán visot ja čuvvon du
Maid mii oažžut ? »
Jesus vástidii sidjiide : « Duođaid , mun cealkkán didjiide : Go máilbmi riegáda ođđasis ja Olbmobárdni čohkána hearvásvuođa truvdnui , de dii ge geat lehpet čuvvon mu , oažžubehtet čohkkát guoktenuppelot truvnnus dubmemin Israela guoktenuppelot čeardda .
Ja juohkehaš gii lea guođđán ruovttus dahje vieljaid dahje oappáid dahje áhči dahje eatni dahje mánáid dahje bealdduid mu nama dihtii , son oažžu máŋggageardásaččat ruoktot ja árbe agálaš eallima .
Muhto olusat geat leat vuosttažin , šaddet maŋimužžan , ja maŋimuččat vuosttažin .
Dasgo almmiriika lea dáluisida láhkásaš gii vulggii olggos árrat iđedis bálkáhit láigobargiid viidnegárdásis .
Son soabai bargiiguin ovtta denaras beaivebálkán , ja de vuolggahii daid viidnegárdái bargat .
Goalmmát diimmus manai fas olggos ja oinnii muhtumiid čuožžumin joavdelassan márkanšiljus .
Son dajai sidjiide : Mannet dii ge mu viidnegárdái !
Mun mávssán didjiide dan mii lea vuoigat .
Ja sii manne dohko .
Guđat diimmus ja ovccát diimmus son manai fas olggos ja dagai seammá láhkái .
Go son oktanuppelogát diimmus manai olggos , de gávnnai velá muhtumiid čuožžumin das , ja jearai sis : Manne dii čuožžubehtet dás joavdelassan geažos beaivvi ?
Sii vástidedje : Danne go ii oktage leat bálkáhan min .
Son dajai sidjiide : Mannet dii ge mu viidnegárdái .
Go šattai eahket , de viidnegárdeisit dajai dállodoallásis : Gohčo bargiid boahtit ja atte daidda bálkká !
Álgge maŋimuččaiguin ja joatkke gitta vuosttamuččaide .
Sii geat ledje bálkáhuvvon oktanuppelogát diimmus , bohte ja ožžo ovtta denara guhtege .
Go vuosttamuččat bohte , de gádde oažžut eanet , muhto sii ge ožžo ovtta denara .
Sii vuostáiválde dan , muhto nimmorišgohte isida ala ja dadje : Sii geat bohte maŋimužžan , leat bargan dušše ovtta diimmu , ja don dagat daid min dássásažžan , min geat leat gillán beaivvi noađi ja báhka .
Son jorggihii muhtumii sis ja dajai : Ustiban , in mun daga dutnje vearrut .
It go don leat soahpan muinna ovtta denaras ?
Váldde dan mii gullá dutnje ja mana !
Mun hálidan addit maŋimužžii seammá ollu go dutnje ge .
Ii go mus leat lohpi dahkat iežan opmodagain mo ieš dáhtun ?
Vai lea go du čalbmi bahá go danne go mun lean buorre ?
Nu maŋimuččat šaddet vuosttamužžan , ja vuosttamuččat maŋimužžan . »
Go Jesus vulggii bajás Jerusalemii , de válddii guoktenuppelot máhttájeaddjis sierra dohko manadettiin ja celkkii : « Gehččet , mii mannat bajás Jerusalemii , ja Olbmobárdni addojuvvo bajitbáhpaid ja čálaoahppavaččaid gieđaide .
Sii dubmejit su jápmimii ja addet su báhkiniid háldui , ja son bilkiduvvo , spihččejuvvo ja russiinávlejuvvo .
Ja goalmmát beaivvi son bajásčuoččáldahttojuvvo . »
Dasto Sebedeusa bártniid eadni bođii Jesusa lusa oktan bártniidisguin , luoitádii čippiid ala ja siđai sus juoidá .
Jesus jearai : « Maid don dáhtut ? » Nisu vástidii : « Cealkke ahte dát mu bártniguovttos beassaba čohkkát du bálddas du riikkas , nubbi olgeš gieđat bealde ja nubbi gurut gieđat bealde . »
Jesus celkkii bártniide : « Eahppi doai dieđe maid sihtabeahtti .
Sáhttibeahtti go doai juhkat dan geara man mun jugan ? »
Soai vástideigga : « De sáhtte . »
Jesus celkkii sudnuide : « Mu geara šaddabeahtti gal juhkat ; muhto mun in mearrit saji olgeš ja gurut giehtan bealde ; dat lea sidjiide geaid mu Áhčči lea mearridan dasa . »
Go dat logis gulle dán , de moaráhuvve vieljašguoktái .
Muhto Jesus gohčui sin lusas ja celkkii : « Dii diehtibehtet ahte ráđđejeaddjit leat álbmogiid hearrát , ja ahte riikkaid bajimuččat dollet álbmogiid garra válddi vuolde .
Nu ii galgga leat din gaskkas .
Muhto dat guhte din gaskkas áigu leat stuoris , galgá leat din bálvaleaddji , ja dat guhte din gaskkas áigu leat njunušin , galgá leat din šlávva , nugo Olbmobárdni ge ii leat boahtán bálvaluvvot , muhto bálvalit ja addit heakkas lonástussan eatnagiid ovddas . »
Go sii vulge Jerikos , de ollu olbmot čuvvo su .
Geaidnoguoras ledje čohkkámin guokte čalmmeheami , ja go soai gulaiga Jesusa vázzimin meattá , de čurviiga : « Hearrá , Dávveda bárdni , árpmit munno ! »
Olbmot šiggo sudno vai soai jávohuvašeigga , muhto soai čuorvvuiga vel jitnoseabbot : « Hearrá , Dávveda bárdni , árpmit munno ! »
De Jesus orustii , gohčui sudno boahtit lusas ja jearai sudnos : « Maid doai dáhttubeahtti mu dahkat alcceseatte ? »
Soai vástideigga : « Hearrá , divttášit munno čalmmiid rahpasit ! »
Jesus árkkálmasttii sudno ja guoskkahii sudno čalmmiid .
Dallánaga oaidnigođiiga , ja soai čuovuiga su .
Go sii lahkanedje Jerusalemii ja bohte Betfagii mii lea Oljovári lahka , de Jesus vuolggahii guoktása máhttájeddjiin ja celkkii sudnuide : « Manni gillái mii lea dudno ovdalis ! Dallánaga go boahtibeahtti dohko , de gávdnabeahtti čadnojuvvon ásena mas lea vársá . Čoavdi daid ja bukti mu lusa !
Ja jos oktage jearaš , de daddji : Hearrá dárbbaša daid , muhto son vuolggaha daid dakkaviđe ruovttoluotta . »
Dát dáhpáhuvai vai ollašuvašii dat mii lea celkojuvvon profehta bokte : Celket Siona niidii : Geahča , du gonagas boahtá du lusa , vuollegažžan , riide áseniin , fievrošibiha várssáin .
Máhttájeaddjiguovttos vulggiiga ja dagaiga nugo Jesus lei gohččon sudno .
Soai vieččaiga ásena ja várssá ja bijaiga olgguldasbiktasiiddiska daid ala , ja Jesus čohkánii ásena ala .
Olusat lebbo biktasiiddiset geainnu ala , earát čuhppe ovssiid muorain maiguin duorggastedje geainnu .
Ja olbmot guđet vázze ovddas ja čuvvo maŋis , čurvo : Hosianna , Dávveda bárdni !
Buressivdniduvvon lehkos son guhte boahtá Hearrá nammii !
Hosianna allagasas !
Go son manai Jerusalemii , de oppa gávpot lihkadišgođii , ja buohkat jerre : « Gii son lea ? »
Ja olbmot vástidedje : « Son lea Jesus , profehta , Nasaretas Galileas eret . »
Das maŋŋil Jesus manai tempelšilljui ja ájii eret buohkaid geat ledje vuovdimin ja oastimin das .
Son gomihii ruhtacuvkeheddjiid bevddiid ja duvvávuvdiid beaŋkkaid , ja celkkii sidjiide : « Lea čállojuvvon : Mu viessu lea rohkadallanviessu .
Muhto dii dahkabehtet dan rievvárbiedjun . »
Čalmmeheamit ja lápmásat bohte su lusa tempelšiljus , ja son buoridii sin .
Muhto go bajitbáhpat ja čálaoahppavaččat oidne daid oavdudaguid maid son dagai , ja gulle mo mánát čurvo tempelšiljus : « Hosianna , Dávveda bárdni ! » de sii moaráskedje ja jerre sus : « Gulat go maid sii dadjet ? »
Jesus vástidii : « De gulan , muhto ehpet go goassege leat lohkan : Mánáid ja njuoratmánáid njálmmis don leat háhkan alccesat máidnuma ! »
De son guđii sin ja manai olggos gávpogis Betaniai ja idjadii doppe .
Go son árrat iđedis lei mannamin gávpogii , de nealgugođii .
Son oinnii fiikkonmuora geaidnoguoras ja manai dan lusa , muhto ii gávdnan das eará go lasttaid .
De son celkkii murrii : « It goassege šat galgga šaddadit šattuid ! »
Dan seammás muorra ásttai .
Máhttájeaddjit ovddošedje go oidne dán ja jerre : « Mo fiikkonmuorra sáhtii ástat nu fargga ? »
Jesus vástidii sidjiide : « Duođaid , mun cealkkán didjiide : Jos dii oskkošeiddet ehpet ge eahpidivčče , de ehpet sáhtáše dušše dahkat dan maid mun dahken fiikkonmurrii , muhto dii sáhtášeiddet maiddái dadjat dán várrái : Loktan ja bálkestahte iežat merrii ! Ja dat dáhpáhuvašii .
Ja buot maid ihkinassii dii átnubehtet rohkosiinnádet , oažžubehtet , jos oskubehtet . »
Go Jesus lei boahtán tempelšilljui ja lei oahpaheamen , de bajitbáhpat ja álbmoga vuorrasat bohte su lusa ja jerre : « Gean fámuin dagat don dán ?
Gii lea addán dutnje dákkár fámu ? »
Jesus vástidii sidjiide : « Mus ge lea gažaldat didjiide . Jos dii vástidehpet munnje , de mun cealkkán didjiide gean fámuin mun dagan dán .
Johanasa gásta , gos dat bođii ?
Almmis vai olbmuin ? »
Sii árvaladde gaskaneaset : « Jos mii vástidit : Almmis , de son jearrá : Manne dalle ehpet oskon sutnje ?
Muhto jos mii vástidit : Olbmuin , de fertet váruhit olbmuin , dasgo buohkat atnet Johanasa profehtan . »
Danne sii vástidedje Jesusii : « Mii eat dieđe . »
De son celkkii sidjiide : « De in mun ge cealkke didjiide gean fámuin mun dagan dán . »
« Maid dii dás árvalehpet : Muhtun olbmás ledje guokte bártni .
Son manai nuppi lusa ja dajai : Bárdnán , mana odne viidnegárdái bargat .
Son vástidii : In mana , mun in hálit ! Muhto maŋŋil son gáđai ja manai .
De áhčči manai nuppi bártni lusa ja dáhtui su dahkat seammá .
Son vástidii : De manan , hearrá . Muhto son ii mannan .
Goabbá sudnos dagai áhčiska dáhtu mielde ? »
Sii vástidedje : « Vuosttaš bárdni . »
Jesus celkkii sidjiide : « Duođaid , mun cealkkán didjiide : Tuollárat ja fuorát mannet Ipmila riikii ovdal din .
Dasgo Johanas bođii din lusa ja oahpahii didjiide vanhurskkisvuođa geainnu , ehpet ge oskon sutnje , muhto tuollárat ja fuorát osko sutnje .
Ja vaikko dii oinniidet dan , de ehpet gáhtan maŋŋil ge , ehpet ge oskon sutnje . »
« Gullet eará veardádusa ! Eanadoalli gilvvii viidnegárddi ja áiddui dan , rokkai viidneduolmmahaga dasa ja huksii geahččotoartna .
De son láigohii viidnegárddis muhtun viidnegárdebargiide ja vulggii olgoriikii .
Go čoaggináigi lahkanišgođii , de son vuolggahii bálvaleddjiidis viidnegárdebargiid lusa , vai oččošii oasis šattuin .
Muhto viidnegárdebargit válde gitta su bálvaleddjiid ja cábme ovtta , godde ovtta ja geađgádedje ovtta .
Fasttain son vuolggahii eará bálvaleddjiid , eanebuid go vuosttaš geardde , muhto sii dahke seammá láhkái singuin .
Loahpas son vuolggahii bártnis sin lusa , dasgo son jurddašii : Mu bártni sii goittot atnet árvvus .
Muhto go viidnegárdebargit oidne bártni , de dadje guhtet guoibmáseaset : Diet lea árbbolaš !
Bohtet , goddot su , de mii oažžut su árbbi .
Sii dohppejedje su , bálkestedje su viidnegárddis olggos ja godde su .
Go viidnegárdeisit boahtá , maid son dahká dáidda viidnegárdebargiide ? »
Sii vástidedje : « Son addá daidda bahás olbmáide bahás loahpa ja láigoha viidnegárddis earáide , geat addet sutnje su oasi šattuin rivttes áigái . »
Jesus celkkii sidjiide : « Ehpet go leat goassege lohkan čállagiin : Dat geađgi man huksejeaddjit hilgo , lea šaddan váldočiehkageađgin .
Dát lea Hearrá iežas dahku , ja dat lea ovddolaš min čalmmiide .
Danne mun cealkkán didjiide : Ipmila riika váldojuvvo dis eret ja addojuvvo dakkár álbmogii mii šaddada dan šattuid .
Ja dat gii gahččá dán geađggi ala , roasmmuhuvvá , ja dat gean ala geađgi gahččá , cuovkana . »
Go bajitbáhpat ja farisealaččat gulle su veardádusaid , de áddejedje ahte son sártnui sin birra .
Sii vigge váldit su gitta , muhto balle olbmuin , dasgo dat atne su profehtan .
Jesus sártnui fas sidjiide veardádusaiguin : « Almmiriika sáhttá veardiduvvot gonagasain gii lágidii heajaid bárdnásis .
Son vuolggahii bálvaleddjiidis rávkat bovdejuvvon gussiid heajaide , muhto sii eai dáhtton boahtit .
De son vuolggahii eará bálvaleddjiid ja gohčui sin cealkit bovdejuvvon gussiide : Mun lean lágidan headjamállásiid ; mu vuovssát ja buoiddes gálbbit leat njuvvojuvvon , ja buot lea gárvvis .
Bohtet heajaide !
Muhto sii eai beroštan das ja manne eret , muhtun beldosis ja muhtun gávpásis .
Muhtumat dohppejedje su bálvaleddjiid , illástedje ja godde sin .
Dalle gonagas suhtai ja vuolggahii soahteveagas , gottii dáid olmmošgoddiid ja buolláhii sin gávpoga .
De son celkkii bálvaleddjiide : Headjamállásat leat lágiduvvon , muhto bovdejuvvon guossit eai lean dohkálaččat heajaide .
Mannet dan dihtii geaidnoearuide ja bovdejehket heajaide buohkaid geaid deaivabehtet .
Ja bálvaleaddjit manne geainnuid mielde ja čohkkejedje buohkaid geaid deive , sihke baháid ja buriid , nu ahte headjalatnja dievai gussiin .
Muhto go gonagas bođii sisa dearvvahit gussiid , de oinnii muhtuma geas eai lean headjabiktasat badjelis .
Son jearai sus : Ustiban , mo don leat beassan deike headjabiktasiid haga ?
Muhto son orui jávohaga .
De gonagas celkkii bálvaleddjiide : Čatnet su gieđaid ja julggiid ja bálkestehket su olggobeallái seavdnjadassii ; doppe sii čirrot ja gižahit bániid .
Dasgo eatnagat leat bovdejuvvon , muhto hárvásat leat válljejuvvon . »
De farisealaččat vulge ja ráđđádalle mo sii sáhtášedje giellat su sániiguin .
Sii vuolggahedje máhttájeddjiideaset su lusa oktan herodialaččaiguin , ja sii dadje : « Oahpaheaddji , mii diehtit ahte don leat vuoiggalaš ja oahpahat Ipmila geainnu duohtavuođa mielde beroškeahttá das maid earát oaivvildežžet , dasgo don it geahča olbmo hámi beallái .
Cealkke danne midjiide maid don oaivvildat : Lea go riekta máksit vearu keaisárii vai ii ? »
Muhto Jesus árvidii sin bahávuođa ja celkkii : « Dii guoktilaččat , manne geahččalehpet mu ?
Čájehehket munnje ruđa mainna máksibehtet vearudet . »
Sii geigejedje sutnje denara , ja son jearai : « Gean govva ja namma lea dás ? »
Sii vástidedje : « Keaisára . »
De son celkkii sidjiide : « Addet dalle keaisárii dan mii keaisárii gullá , ja Ipmilii dan mii Ipmilii gullá . »
Go sii gulle dan , de ovddošedje ja guđđe su .
Seammá beaivvi bohte su lusa muhtun saddukealaččat , sii geat čuoččuhit ahte bajásčuožžileapmi ii leat .
Sii jerre sus : « Oahpaheaddji , Movsses lea cealkán : Jos olmmái jápmá mánáheapmin , de su viellja galgá náitalit leaskkain ja addit vielljasis náli .
Min gaskkas ledje čieža vieljaža .
Vuosttaš náitalii , muhto jámii , ja go lei mánáheapmi , de guđii leaskka vielljasis .
Dat seammá dáhpáhuvai nubbái ja goalmmádii ja buot čiehččasii .
Loahpas jámii nisu ge .
Gean áhkká son lea bajásčuožžileamis ?
Buohkat han leat leamaš náitalan suinna . »
Muhto Jesus vástidii sidjiide : « Dii čádjidehpet , danne go ehpet dovdda čállagiid ehpet ge Ipmila fámu .
Dasgo bajásčuožžileamis eai náital eai ge náitojuvvo , muhto sii leat dego eŋgelat almmis .
Ja jábmiid bajásčuožžileami hárrái , ehpet go leat ge lohkan maid Ipmil lea cealkán didjiide : Mun lean Abrahama Ipmil ja Issáha Ipmil ja Jáhkoba Ipmil .
Ii son leat jábmiid Ipmil , muhto ealli olbmuid Ipmil . »
Go olmmošjoavkkut gulle dán , de ovddošedje sakka su oahpu .
Go farisealaččat gulle ahte Jesus lei buđđon saddukealaččaid njálmmi , de sii čoahkkanedje . Muhtun sis , muhtun láhkadovdi , hálidii geahččalit su ja jearai : « Oahpaheaddji , guhtemuš báhkkon lea lága stuorimus báhkkon ? »
Son vástidii : « Don galggat ráhkistit Hearrá Ipmilat oppa váimmustat ja oppa sielustat ja oppa mielastat .
Dát lea stuorimus ja mávssolaččamus báhkkon .
Muhto nubbi lea seammá stuoris : Don galggat ráhkistit lagamuččat nugo iežat .
Dán guovtti báhkkoma alde orru oppa láhka ja profehtat . »
Go farisealaččat ledje ain čoahkis , de Jesus jearai sis : « Maid dii árvalehpet Messiasa birra ?
Gean bárdni son lea ? »
Sii vástidedje : « Dávveda . »
Son celkkii sidjiide : « Mo de Dávvet sáhttá Vuoiŋŋa bokte gohčodit su hearrán ja cealkit : Hearrá celkkii mu hearrái : Čohkán mu olgeš gieđa beallái dassážii go mun bijan du vašálaččaid du julggiid vuollái .
Jos dál Dávvet gohčoda Messiasa hearrán , mo son de sáhttá leat Dávveda bárdni ? »
Muhto ii oktage sáhttán vástidit sutnje sáni ge . Ja dan beaivvi rájes ii oktage duostan šat jearrat sus maidege .
Das maŋŋil Jesus sárdnugođii olmmošjovkui ja máhttájeddjiide : Movssesa stuolus čohkkájit čálaoahppavaččat ja farisealaččat .
Dahket ja jeagadehket dan dihtii buot dan maid sii oahpahit didjiide .
Muhto allet daga sin daguid mielde , dasgo sii eai daga iežaset sániid mielde .
Sii čatnet lossa nođiid maid olbmot illá vedjet guoddit , ja bidjet daid olbmuid hárduid ala , muhto ieža eai hálit lihkastahttit daid suorbmagežiin ge .
Buot daguideaset sii dahket dušše danne vai olbmot oainnášedje daid .
Sii háhket alcceseaset govda rohkoscecciid ja stuora bivttasdihpiid ; sii liikojit čohkkát boaššumusas go leat guossis ja synagogaid buoremus sajiin , ja sii dáhttot áinnas olbmuid buorástahttit sin márkanšiljuin ja gohčodit sin rabbin .
Muhto allet divtte iežadet gohčoduvvot rabbin , dasgo okta lea din oahpaheaddji , ja dii lehpet buohkat oskuguimmežat .
Allet ge gohčot ovttage dáppe eatnama alde áhččineattet , dasgo okta lea din Áhčči , son gii lea almmis .
Allet ge divtte ovttage gohčodit din oahpisteaddjin , dasgo okta lea din oahpisteaddji , Kristus .
Dat guhte din gaskkas lea stuorimus , galgá leat din bálvaleaddji .
Dat guhte bajida iežas , vuoliduvvo , ja dat guhte vuolida iežas , bajiduvvo .
Vuoi din , čálaoahppavaččat ja farisealaččát ! Dii guoktilaččat ! Dii dahppabehtet olbmuide almmiriikka .
Ieža ehpet mana sisa ehpet ge suova mannat sisa sin geat áinnas dáhtošedje .
Vuoi din , čálaoahppavaččat ja farisealaččat !
Dii guoktilaččat ! Dii háhpohallabehtet leaskkaid dáluid ja lohkabehtet guhkes rohkosiid ; dan dihtii oažžubehtet garraset duomu .
Vuoi din , čálaoahppavaččat ja farisealaččat ! Dii guoktilaččat ! Dii johtibehtet eatnamiid ja čáziid mielde , vai vuoittášeiddet ovtta áidna olbmo juvddálaš oskui .
Ja go dat menestuvvá , de dahkabehtet su helveha oapmin , guovtti geardái bahábun go dii ieža .
Vuoi din , čalmmehis oahpisteaddjit ! Dii dadjabehtet : Jos guhtege vuordnu tempela bokte , de ii dat leat mihkkege ; muhto jos guhtege vuordnu tempela golliid bokte , de vuortnus čatná .
Dii čalmmehis jallat ! Goabbá lea stuorit , golli vai tempel mii basuha golli ?
Dii dadjabehtet : Jos guhtege vuordnu áltára nammii , de ii dat leat mihkkege ; muhto jos guhtege vuordnu oaffarskeaŋkka bokte mii lea áltára alde , de vuortnus čatná .
Dii čalmmeheamit ! Goabbá lea stuorit , oaffarskeaŋka vai áltár mii basuha skeaŋkka ?
Dat gii vuordnu áltára nammii , vuordnu sihke dan ja buot daid bokte mat leat áltára alde .
Dat gii vuordnu tempela nammii , vuordnu sihke dan ja su bokte gii orru das .
Ja dat gii vuordnu almmi nammii , vuordnu Ipmila truvnnu ja su bokte gii čohkká dan alde .
Vuoi din , čálaoahppavaččat ja farisealaččat ! Dii guoktilaččat ! Dii addibehtet logádasa minttain , dillain ja gárveniin , muhto ehpet beroš das mas lea eanet deaddu lágas : vuoigatvuođas , váibmoláđisvuođas ja oskkáldasvuođas .
Dáid berrešeiddet dahkat , vajáldahtekeahttá eará báhkkomiid .
Dii čalmmehis oahpisteaddjit ! Dii sillebehtet eret čuoikka , muhto njielastehpet kamela !
Vuoi din , čálaoahppavaččat ja farisealaččat ! Dii guoktilaččat ! Dii buhtistehpet geara ja gári olggul , muhto siskkil lea dievva rievádus ja mearihisvuohta .
Čalmmehis farisealaš ! Buhtis vuos geara siskkil , de dat buhtásmuvvá olggul ge !
Vuoi din , čálaoahppavaččat ja farisealaččat ! Dii guoktilaččat ! Dii lehpet dego vielgadin kálkejuvvon hávddit , olggul dat gal orrot čábbát , muhto siskkil leat dievva jámešdávttit ja juohkelágán buhtismeahttunvuohta .
Seammá láhkái dii gis orrubehtet vanhurskásat olbmuid čalmmiin , muhto siskkildasas lea dievva guoktilašvuohta ja lágahisvuohta .
Vuoi din , čálaoahppavaččat ja farisealaččat ! Dii guoktilaččat ! Dii huksebehtet hávdemuittuid profehtaide ja čiŋahehpet bassi olbmuid hávdemearkkaid ja dadjabehtet : Jos mii livččiimet eallán máddariiddámet áiggi , de eat livčče searvan goddit profehtaid .
Dáinna dii duođaštehpet ieža ahte dii lehpet sin mánát guđet godde profehtaid .
Jotket dasto dan maid din máddarat álggahedje , dassá go mihttu dievvá .
Dii gearbmašat ja gearpmaščivggat ! Mo dii sáhttibehtet vealtat dubmejuvvomis helvehii ?
Danne mun vuolggahan din lusa profehtaid , viisáid ja čálaoahppavaččaid .
Muhtumiid dii goddibehtet ja russiinávlebehtet , earáid dii spihččebehtet din synagogain ja doarridehpet gávpogis gávpogii .
Nu boahtá din badjelii buot vigihis varra mii lea golggahuvvon eatnama alde , vanhurskkis Abela vara rájes gitta Sakarja , Barakja bártni , vara rádjái , gean dii gottiidet tempela ja áltára gaskii .
Duođaid , mun cealkkán didjiide : Dát buolva gártá vástidit buot dáid ovddas !
Jerusalem , Jerusalem , don guhte gottát profehtaid ja geađgádat sin geat leat vuolggahuvvon du lusa !
Man dávjá mun livččen dáhtton čohkket du mánáid , dego vuonccis čohkke čivggaidis soajáidis vuollái . Muhto ehpet dii dáhtton .
Gehččet , din tempel guđđojuvvo ávdimin !
Dasgo mun cealkkán didjiide : Dás maŋás ehpet eisege oainne mu ovdal go dadjabehtet : Buressivdniduvvon lehkos son guhte boahtá Hearrá nammii !
Go Jesus vulggii tempelis ja lei mannamin olggos , de su máhttájeaddjit bohte su lusa ja čujuhedje tempelviesuide .
Muhto son celkkii : « Oaidnibehtet go buot dáid ? Duođaid , mun cealkkán didjiide : Dás ii báze geađgi geađggi ala , muhto buot gaikkoduvvo . »
Go son lei čohkkámin Oljováris eai ge lean earát das , de máhttájeaddjit bohte su lusa ja jerre : « Muital midjiide , goas dát dáhpáhuvvá , ja mii lea du boahtima ja dálá máilmmi loahpa mearka ? »
Jesus vástidii sidjiide : Váruhehket amas oktage čádjidahttit din !
Dasgo olusat bohtet mu nammii ja dadjet : « Mun lean Messias . » Ja sii čádjidahttet olusiid .
Dii gullabehtet soahtešláma ja sođiid birra . Váruhehket amadet suorganit !
Dasgo dát ferte dáhpáhuvvat , muhto loahppa ii leat vel boahtán .
Álbmot čuožžila álbmoga vuostái ja riika riikka vuostái , ja ollu báikkiin šaddá nealgi ja eatnandoarggástusat .
Muhto buot dát leat dušše ávttaid álgu .
De sii bidjet din áŧestusaide ja goddet din , ja buot álbmogat vašuhit din mu nama dihtii .
Eatnagat vearránit ja behttet ja vašuhit guhtet guimmiideaset .
Ollu vearri profehtat čuožžilit ja fillejit olusiid .
Ja dan dihtii go lágahisvuohta lassána , eanemusaid ráhkisvuohta čoasku .
Muhto dat guhte bissu nanusin gitta loahpa rádjái , bestojuvvo .
Ja dát riikka evangelium sárdniduvvo duođaštussan buot álbmogiidda , ja de boahtá loahppa .
Go dii oaidnibehtet čuožžumin bassi báikkis bilideaddji fastivuođa , man birra profehta Dánel lea sárdnon , – vuhtiiváldos lohkki dan !
– dalle fertejit sii geat leat Judeas , báhtarit váriide ; dat gii lea dáhki alde , ii galgga njiedjat viežžat maidege viesustis , ii ge dat gii lea bealddus galgga máhccat ruoktot viežžat biktasis .
Vuoi áhpehemiid ja njamaheddjiid daid beivviid !
Rohkadallet amadet dárbbašit báhtarit dálvet dahje sábbáhin .
Dasgo dalle šaddet dakkár stuora áŧestusat mat eai leat leamaš máilmmi álggu rájes gitta otnážii , ja mat eai šatta šat goassege .
Jos dat áigi ii oaniduvvoše , ii šattaše oktage olmmoš bestojuvvot .
Muhto sin dihtii geat leat válljejuvvon , oaniduvvo diet áigi .
Jos oktage dadjá didjiide : « Gea , dá lea Messias ! » dahje : « Duo son lea ! » de allet oskko dasa !
Dasgo vearri messiasat ja vearri profehtat čuožžilit ja dahket stuora mearkkaid ja oavdudaguid jos de mat čádjidahtášedje sin ge geat leat válljejuvvon .
Gullet , mun lean cealkán didjiide dan ovddalgihtii !
Jos sii nappo dadjet didjiide : « Gea , son lea meahcis » , de allet mana dohko , dahje : « Gea , son lea gámmáriin » , de allet oskko dasa .
Dasgo seammá láhkái go álddagas boahtá nuortan ja šleađgu gitta oarjjás , nu lea Olbmobártni boahtin .
Gos rábbi lea , dohko čoahkkanit goaskimat .
Muhto dallánaga daid beivviid áŧestusaid maŋŋil beaivváš sevnnjoda ii ge mánnu báitte , násttit gahččet vuolás almmis , ja almmi fámut lihkahuvvojit .
Dalle Olbmobártni mearka ihtá albmái , ja buot máilmmi olmmoščearddat luibmet , ja sii oidnet Olbmobártni boahtimin almmi balvvaid alde fámuin ja stuora hearvásvuođain .
Son vuolggaha eŋgeliiddis alla básonšuoŋain , ja sii čohkkejit njealji máilbmečiegas sin geaid son lea válljen , almmi nuppi ravddas gitta nuppi ravdii .
Ohppet veardádusa fiikkonmuoras : Go dan oavssit ožžot állosa ja lasttaid , de diehtibehtet ahte lea geassumin .
Nu diehtibehtet maiddái dii , go oaidnibehtet buot dáid dáhpáhuvvamin , ahte son lea lahka ja čuožžumin uvssa ovddas .
Duođaid , mun cealkkán didjiide : Dát buolva ii noga ovdal go buot dát dáhpáhuvvet .
Albmi ja eanan duššet , muhto mu sánit eai goassege dušša .
Muhto dan beaivvi ja diimmu ii oktage dovdda , eai almmi eŋgelat ii ge Bárdni , muhto duššefal Áhčči .
Nugo lei Noa beivviid , nu lea maiddái go Olbmobárdni boahtá .
Ovdal stuoradulvvi sii borre ja juhke , náitaladde ja náite gitta dan beaivvi rádjái go Noa manai árkka sisa , eai ge sii ádden maidege ovdal go dulvi bođii ja válddii eret sin buohkaid .
Nu lea maiddái go Olbmobárdni boahtá .
Dalle leat guokte olbmá bealddus ; nubbi vižžojuvvo , ja nubbi báhcá .
Guokte nissona ferdneba milluin ; nubbi vižžojuvvo , ja nubbi báhcá .
Gohcet dan dihtii , dasgo dii ehpet dieđe guđe beaivvi din Hearrá boahtá .
Muhto dán dii diehtibehtet : Jos dáluisit dieđášii guđe idjagohcinvuorus suola boahtá , de gozášii ii ge divttáše su gaikut iežas viesu .
Lehket nappo dii ge gárvásat , dasgo Olbmobárdni boahtá dan diimmu go ehpet leat vuordimin .
Gii lea dalle oskkáldas ja jierpmálaš bálvaleaddji , gean isit lea gohččon bearráigeahččat eará bálvaleddjiid , vai son attášii sidjiide borramuša rivttes áigái ?
Ávdugas dat bálvaleaddji gean isit gávdná dahkamin dán go son máhccá .
Duođaid , mun cealkkán didjiide : Isit bidjá su bearráigeahččat buot opmodagaidis .
Muhto jos bálvaleaddji lea fuotni ja dadjá : « Ii mu isit boađe vel » , ja son huškugoahtá eará bálvaleddjiid ja borragoahtá ja juhkagoahtá juhkkiiguin , de dan bálvaleaddji isit boahtá dan beaivvi go son ii leat vuordimin ja dan diimmu go son ii dieđe , ja časká su jámas ja bidjá su guoktilaččaid seahká ; doppe sii čirrot ja gižahit bániid .
Almmiriika sáhttá veardiduvvot logiin nuorra nieiddain geat válde lámppáset ja vulge olggos irggi ovddal .
Viđas sis ledje jallat ja viđas jierpmálaččat .
Jallat válde mielde lámppáset , muhto eai oljju .
Jierpmálaččat válde mielde lámppáset oktan oljolihtiin .
Go irgi ádjánii , de sii buohkat oađestuvvagohte ja nohkke .
Muhto gaskaija áiggi gullui čuorvvas : « Irgi boahtá ! Mannet su ovddal ! »
De buot nieiddat morihedje ja gárvvistedje lámppáset .
Jallat dadje jierpmálaččaide : « Addet midjiide oljjusteattet , dasgo min lámppát jáddagohtet . »
Muhto jierpmálaččat vástidedje : « Eat atte , ii leat doarvái olju sihke alcceseamet ja didjiide ; mannet baicca gávpeolbmá lusa oastit ! »
Dan botta go sii ádjánedje gávppis , irgi bođii , ja sii geat ledje ráhkkanan , manne suinna heajaide , ja uksa giddejuvvui .
Maŋŋil eará nieiddat ge bohte ja dadje : « Hearrá , hearrá , rabas uvssa midjiide ! »
Muhto son vástidii sidjiide : « Duođaid , mun cealkkán didjiide : Mun in dovdda din . »
Gohcet dan dihtii , dasgo dii ehpet dieđe beaivvi ehpet ge diimmu .
Dalle geavvá ná : Olmmái lei vuolgimin olgoriikii . Son gohčui bálvaleddjiidis lusas ja oskkildii sidjiide opmodagas : Muhtumii son attii vihtta taleantta , muhtumii guokte ja muhtumii fas ovtta , juohkehažžii su fiehtuid ektui .
De son vulggii .
Son gii lei ožžon vihtta taleantta , manai dallánaga ja gávppašii daiguin ja dinii vihtta taleantta vel .
Son gii lei ožžon guokte taleantta , dagai seammá ja dinii guokte taleantta vel .
Muhto son gii lei ožžon ovtta taleantta , rokkai ráiggi eatnamii ja čiegai isidis ruđa dohko .
Go lei vássán guhkes áigi , de bálvaleddjiid isit máhcai ja dahkagođii logu singuin .
Son gii lei ožžon vihtta taleantta , buvttii vihtta taleantta lassin ja dajai : « Hearrá , don oskkildit munnje vihtta taleantta ; gea , mun lean dinen vihtta vel . »
Su isit vástidii : « Bures dahkkon ! Don leat buorre ja oskkáldas bálvaleaddji .
Don leat leamaš oskkáldas uhcánaččain , mun attán ollu du háldui .
Boađe sisa isidat illui ! »
Maiddái son gii lei ožžon guokte taleantta , bođii ja dajai : « Hearrá , don oskkildit munnje guokte taleantta ; gea , mun lean dinen guokte vel . »
Ja su isit vástidii : « Bures dahkkon ! Don leat buorre ja oskkáldas bálvaleaddji .
Don leat leamaš oskkáldas uhcánaččain , mun attán ollu du háldui .
Boađe sisa isidat illui ! »
Loahpas bođii son gii lei ožžon ovtta taleantta , ja dajai : « Hearrá , mun dihten ahte don leat garra olmmái gii láddjet doppe gosa it leat gilván , ja čohkket doppe gosa it leat biđgen .
Danne mun ballájin ja čihken du taleantta eatnamii .
Gea , dá lea dat mii lea du »
Muhto isit vástidii sutnje : « Don heajos ja láikkes bálvaleaddji ! Don dihtet ahte mun láddjen doppe gosa in leat gilván , ja čohkken doppe gosa in leat biđgen .
Dan dihtii livččet berren addit mu ruđa ruhtalonuheddjiide , de livččen ožžon dan ruovttoluotta reanttuiguin go máhccen .
Váldet danne sus taleantta ja addet dan sutnje geas leat logi !
Dasgo juohkehažžii geas lea , addojuvvo ja son oažžu valljugasat ge . Muhto geas ii leat , sus váldojuvvo vel dat ge eret mii sus lea .
Ja bálkestehket dán gealbbohis bálvaleaddji olggobeallái seavdnjadassii ; doppe sii čirrot ja gižahit bániid . »
Go Olbmobárdni boahtá hearvásvuođastis , ja buot eŋgelat suinna , de son čohkána hearvásvuođa truvdnui .
Buot álbmogat čohkkejuvvojit su ovdii , ja son rátká sin , dego geahčči rátká sávzzaid gáiccain ; sávzzaid bidjá olgeš beallái ja gáiccaid gurut beallái .
De gonagas cealká daidda geat leat su olgeš bealde : « Bohtet deike , dii geaid mu Áhčči lea buressivdnidan , ja árbejehket dan riikka mii lea ráhkaduvvon didjiide máilmmi vuođđudeami rájes .
Dasgo mun ledjen nealggis , ja dii attiidet munnje borrat ; mun ledjen goikkus , ja dii attiidet munnje juhkat ; mun ledjen amas , ja dii válddiidet mu vuostái ; mun ledjen álás , ja dii gárvvoheiddet mu ; mun ledjen buohcamin , ja dii galliidet mu ; mun ledjen giddagasas , ja dii bođiidet mu lusa . »
De vanhurskásat vástidit sutnje : « Hearrá , goas mii oinniimet du nealgumin ja attiimet dutnje borrat , dahje goikkus ja attiimet dutnje juhkat ?
Goas oinniimet du amasin ja válddiimet du vuostái , dahje álásin ja gárvvoheimmet du ?
Goas oinniimet du buohcamin dahje giddagasas , ja galliimet du ? »
Ja gonagas vástida sidjiide : « Duođaid , mun cealkkán didjiide : Buot maid dii lehpet dahkan oktii dáin mu uhcimus vieljažiin , dan lehpet dahkan munnje . »
Dasto son cealká sidjiide geat leat su gurut bealde : « Mannet eret mu luhtte , dii geat lehpet garuhuvvon , agálaš dollii , mii lea ráhkaduvvon beargalahkii ja su eŋgeliidda .
Dasgo mun ledjen nealggis , ehpet ge dii addán munnje borrat ; mun ledjen goikkus , ehpet ge addán munnje juhkat ; mun ledjen amas , ehpet ge váldán mu vuostái ; mun ledjen álás , ehpet ge gárvvohan mu ; mun ledjen buohcamin ja giddagasas , ehpet ge gallen mu . »
Dalle sii vástidit sutnje : « Hearrá , goas oinniimet mii du nelgon dahje goikan dahje amasin dahje álásin dahje buohcamin dahje giddagasas veahketkeahttá du ? »
Dalle son vástida sidjiide : « Duođaid , mun cealkkán didjiide : Buot maid dii ehpet leat dahkan oktii dáin uhcimusain , dan ehpet leat dahkan munnje ge . »
Ja dát mannet eret agálaš ráŋggáštussii , muhto vanhurskásat agálaš eallimii .
Go Jesus lei geargan sárdnideames , de celkkii máhttájeddjiidasas : « Dii diehtibehtet ahte beassážat leat guovtti beaivvi geažes , ja dalle Olbmobárdni addojuvvo russiinávlejuvvot . »
Bajitbáhpat ja álbmoga vuorrasat čoahkkanedje dál bajimušbáhpa Kaifasa gárdimii ja lihtodedje váldit Jesusa gitta gávvilvuođain ja goddit su .
Sii dadje : « Muhto allot dattege fal basiid áiggi , amaset olbmot stuimmáskit . »
Go Jesus lei Betanias , spihtálaš Simmona viesus , de bođii su lusa nisu geas lei divrras hádjavuoiddas alabástalihti dievva . Son leikii dan Jesusa oaivái go son lei čohkkámin beavddis .
Máhttájeaddjit oidne dán ja suhtte . Sii dadje : « Masa lea diekkár skihtardeapmi ávkin ?
Vuoidasa han livččii sáhttán vuovdit buori haddái ja addit ruđaid gefiide . »
Muhto Jesus fuobmái dán ja celkkii sidjiide : « Manne dii vuorjabehtet su ?
Son lea dahkan munnje buori dagu .
Geafit gal leat álo din luhtte , muhto mun in leat álo din luhtte .
Go son leikii dán vuoidasa mu rupmaša badjel , de son vuoiddai mu hávdádeami várás .
Duođaid , mun cealkkán didjiide : Gos ihkinassii oppa máilmmis dát evangelium sárdniduvvo , muitaluvvo maiddái dát dahku su muitun . »
Dalle okta dan guoktenuppelohkásis , gean namma lei Judas Iskariot , manai bajitbáhpaid lusa ja dajai : « Man ollu mávssášeiddet munnje jos mun attášin su din háldui ? »
Sii mákse sutnje golbmalogi silbaruđa .
Ja dan rájes son ohcagođii liibba beahttit su .
Suvrrokeahtes láibbiid basiid vuosttaš beaivvi máhttájeaddjit bohte Jesusa lusa ja jerre : « Gosa don hálidat min lágidit alccesat beassášmállásiid ? »
Jesus vástidii : « Mannet gávpogii , dan olbmá lusa gean diehtibehtet ja dadjet sutnje : Oahpaheaddji cealká : Mu diibmu lea lahkaneamen ; du luhtte mun hálidan borrat beassášmállásiid máhttájeddjiidanguin . »
Máhttájeaddjit dahke nugo Jesus lei gohččon sin ja ráhkadedje beassášmállásiid .
Eahkedis son čohkánii beavdái dainna guoktenuppelohkásiin .
Go sii ledje boradeamen , de son celkkii : « Duođaid , mun cealkkán didjiide : Muhtun dis beahttá mu . »
De sii šadde morrašii , ja okta nubbi jearragođii sus : « Almma mun gal in leat dat , Hearrá ? »
Muhto Jesus vástidii sidjiide : « Dat gii buonjostii láibbi lihtis muinna oktanaga , lea dat guhte beahttá mu .
Olbmobárdni vuolgá eret , nugo lea čállojuvvon su birra , muhto vuoi dan olbmo guhte beahttá Olbmobártni !
Dan olbmui livččii buoret jos ii livčče goassege riegádan . »
Judas , guhte behtii su , jearai : « Almma mun gal in leat dat , rabbi ? »
Jesus vástidii : « Ieš han don dadjet dan . »
Go sii ledje boradeamen , de Jesus válddii láibbi , rohkadalai giittusrohkosa , doadjalii dan , attii máhttájeddjiidasas ja celkkii : « Váldet ja borret ! Dát lea mu rumaš . »
Ja son válddii geara , giittii Ipmila , attii sidjiide ja celkkii : « Juhket buohkat dás !
Dasgo dát lea mu varra , lihtu varra , mii golggahuvvo eatnagiid ovddas suttuid ándagassii addojupmin .
Ja dán mun cealkkán didjiide : Dán rájes mun in juga šat dán viidnemuora šattus ovdal go dan beaivvi go mun jugan varas viinni dinguin Áhččán riikkas . »
Go sii ledje lávlon máidnunlávlaga , de manne olggos Oljovárrái .
Doppe Jesus celkkii sidjiide : « Otná ija dii buohkat vearránehpet mus , dasgo lea čállojuvvon : Mun časkkán geahčči , ja eallu bieđgana .
Muhto maŋŋil go mun lean bajásčuoččáldahttojuvvon , de mun manan din ovdalis Galileai . »
Biehtár dajai sutnje : « Vaikko buohkat de vearránivčče dus , de mun goittot in goassege daga dan . »
Jesus vástidii : « Duođaid , mun cealkkán dutnje : Otná ija , ovdal go vuoncávaris biškkáda , don biehttalat mu golbmii . »
Biehtár dajai sutnje : « Vaikko vel jámášin duinna , de in eisege biehttal du »
Nu buot eará máhttájeaddjit ge dadje .
Dasto Jesus bođii Getsemane-nammasaš báikái oktan máhttájeddjiidisguin , ja son celkkii sidjiide : « Čohkánehket dása dan boddii go mun manan rohkadallat . »
De son válddii fárrosis Biehtára ja Sebedeusa bártniguovtto , ja son moraštišgođii ja ballagođii sakka .
Son celkkii sidjiide : « Mu siellu lea lossa morrašis jápmima rádjái .
Báhcet dása ja gohcet muinna ! »
Son manai veaháš guhkkelii , luoitádii eatnamii muođuidis ala ja rohkadalai : « Áhčážan ! Jos leažžá vejolaš , de divtte dán geara mannat mu meattá .
Allos dattege šaddo nugo mun dáhtun , muhto nugo don dáhtut . »
Son máhcai máhttájeddjiidis lusa ja gávnnai sin oađđimin , ja son celkkii Biehtárii : « Ehpet de nagadan gohcit muinna ovttage diimmu .
Gohcet ja rohkadallet amadet šaddat geahččalussii !
Vuoigŋa gal lea geargat , muhto oažži lea headju . »
Son manai nuppádassii fas eret ja rohkadalai : « Áhčážan ! Jos dát gearra ii sáhteš mannat jugakeahttá mu meattá , de šaddos du dáhttu ! »
Go son bođii ruovttoluotta , de gávnnai sin fas oađđimin , dasgo sin čalmmit ledje lossadat nahkáriin .
Dál son guđii sin ja manai fas eret goalmmádassii ja rohkadalai , seammá sániiguin go ovdal ge .
De bođii fas máhttájeddjiid lusa ja celkkii : « Lehpet go dii ain oađđimin ja vuoiŋŋasteamen ?
Diibmu lea boahtán go Olbmobárdni addojuvvo suttolaččaid gieđaide .
Čuožžilehket , vulgot !
Gehččet , son guhte beahttá mu , lea lahka . »
Go son lei ain sárdnumin , de bođii Judas , okta dan guoktenuppelohkásis , ja su fárus stuora joavku mas ledje miehkit ja soappit .
Sii bohte bajitbáhpaid ja álbmoga vuorrasiid luhtte .
Beahtti lei šiehtadan singuin mearkka : « Dat gean mun cummistan , son dat lea .
Váldet su ! »
Ja dan seammás son manai Jesusa lusa ja dajai : « Bures , rabbi ! » ja cummistii su .
Muhto Jesus celkkii sutnje : « Ustiban , daga dan man várás don leat boahtán ! »
De earát ge bohte su lusa ja dohppejedje Jesusa ja válde su gitta .
Okta sis geat ledje suinna , rohttii dalle miehkis ja čuolastii bajimušbáhpa bálvaleaddji ja čuohpai sus bealji eret .
Jesus celkkii sutnje : « Nahket miehkát fas dohppii .
Dasgo son guhte dorvvasta miehkkái , gahččá miehki ovddas .
Jáhkát go don ahte mun in sáhtáše jearrat Áhčistan , ja son vuolggahivččii munnje eanet go guoktenuppelot legiona eŋgeliid .
Muhto mo ollašuvašedje dalle čállagat mat celket ahte dát galgá dáhpáhuvvat ? »
Dan seammás son celkkii dan jovkui mii lei boahtán : « Dii lehpet vuolgán mihkiiguin ja soppiiguin váldit mu gitta , dego livččen rievvár .
Mun čohkkájin tempelšiljus ja oahpahin beaivválaččat , ehpet ge dii váldán mu gitta .
Muhto buot dát lea dáhpáhuvvan vai profehtaid čállagat ollašuvašedje . »
De buot máhttájeaddjit guđđe su ja báhtaredje .
Sii geat ledje váldán Jesusa gitta , dolvo su dál bajimušbáhpa Kaifasa lusa , gosa čálaoahppavaččat ja vuorrasat ledje čoahkkanan .
Biehtár oavnnjildii Jesusa gitta bajimušbáhpa gárdimii ; doppe son manai šilljui ja čohkánii fávttaid gaskii geahččat mo loahpas geavvá .
Bajitbáhpat ja oppa Ráđđi oččodedje vearri duođaštusa Jesusa vuostái , vai beasašedje dubmet su jápmimii .
Muhto eai sii gávdnan maidege , vaikko máŋga vihtana bukte vearri duođaštusaid .
Loahpas bohte guovttis geat dajaiga : « Dát olmmoš lea cealkán : Mun máhtán gaikkodit Hearrá tempela ja hukset dan fas golmma beaivvis . »
Dalle bajimušbáhppa čuožžilii ja jearai sus : « Ii go dus leat mihkkege dadjamušaid sudno áššáskuhttimiidda ? »
Muhto Jesus orui jávohaga .
Bajimušbáhppa dajai : « Ealli Ipmila bokte mun vuortnuhan du cealkit midjiide : Leat go don Messias , Ipmila Bárdni ? »
Jesus vástidii : « Ieš han don dadjet dan .
Muhto mun cealkkán didjiide : Dás duohko dii beassabehtet oaidnit Olbmobártni čohkkámin Fámu olgeš gieđa bealde ja boahtimin almmi balvvaid alde . »
Dalle bajimušbáhppa gaikkihii biktasis guovdat ja dajai : « Son lea bilkidan Ipmila !
Maid mii dál vihtaniiguin ?
Dii lehpet gullan bilkádusa .
Maid dii oaivvildehpet ? »
Sii vástidedje sutnje : « Son lea sivalaš jápmit . »
De sii čolge su muođuid njeaiga ja čorbme su . Earát spežžo su muođuide ja dadje : « Messias , einnos dal midjiide ! Gii čorpmai du ? »
Dan botta Biehtár čohkkái olggobealde šiljus .
Muhtun biigá bođii su lusa ja dajai : « Don han maid ledjet dainna galilealaččain Jesusiin . »
Muhto Biehtár biehttalii buohkaid gullut ja dajai : « Mun in ádde maid don hálažat . »
Go son manai poartalatnjii , de eará biigá oinnii su ja dajai daidda geat ledje čuožžumin das : « Diet lei nasaretlaččain Jesusiin . »
Biehtár fas biehttalii ja vuortnui : In mun dovdda dien olbmo .
Veahá maŋŋelaš bohte sii geat ledje čuožžumin das , Biehtára lusa ja dadje : « Duođaid , don leat maid okta sis ! Dat han gullo du suopmanis . »
De son riemai garrudit ja vuordnut : « Mun in dovdda dien olbmo . »
Dan seammás vuoncávaris biškkádii .
De Biehtár muitái maid Jesus lei cealkán sutnje : « Ovdal go vuoncávaris biškkáda , don biehttalat mu golbmii . » Ja son manai olggos ja čierui bahččagit .
Árrat iđedis buot bajitbáhpat ja álbmoga vuorrasat čoahkkanedje ja mearridedje goddit Jesusa .
Sii čatne su , dolvo su eret ja adde su eananhearrá Pilatusa háldui .
Go Judas gii lei beahttán Jesusa , oinnii ahte Jesus lei dubmejuvvon , de son gáđai ja doalvvui dan golbmalogi silbaruđa ruovttoluotta bajitbáhpaide ja vuorrasiidda ja dajai : « Mun lean suddudan ja beahttán vigihis vara . »
Sii vástidedje : « Mii ba das guoská midjiide ?
Diet lea du iežat ášši . »
De son bálkestii ruđaid tempelii ja manai ja harcii iežas .
Bajitbáhpat válde silbaruđaid , muhto dadje : « Ii leat lobálaš bidjat daid tempelbumbái , go dat leat varraruđat . »
De sii mearridedje oastit láirálihttedahkki bealddu daiguin ja geavahit dan vierrásiid hávdebáikin .
Dan dihtii dat bealdu gohčoduvvo Varrabealdun vel otná beaivvi ge .
Nu ollašuvai dat mii lea celkojuvvon profehta Jeremia bokte : Sii válde dan golbmalogi silbaruđa , hatti , masa israellaččat árvvoštalle dán olbmá , ja daiguin sii oste láirálihttedahkki bealddu , nugo Hearrá lei gohččon mu .
Jesus dolvojuvvui dál eananhearrá ovdii .
Ja eananhearrá jearai sus : « Leat go don juvddálaččaid gonagas ? »
Jesus vástidii : « Ieš han don dadjet dan . »
Muhto go bajitbáhpat ja vuorrasat váidaledje su , de son ii vástidan maidege .
Dalle Pilatus jearai sus : « It go don gula man garrasit sii sivahallet du ? »
Muhto Jesus ii vástidan sáni ge , ja eananhearrá imaštalai sakka .
Basiid áiggi eananhearrá lávii luoitit luovus ovtta fáŋgga , gean olmmošjoavku dáhtui .
Dan áiggi lei giddagasas muhtun bahábeakkálmas olmmái gean namma lei Barabbas .
Pilatus jearai dál sis geat ledje čoahkkanan : « Goappá dii dáhttubehtet mu luoitit luovus , Barabbasa vai Jesusa , gii gohčoduvvo Messiasin ? »
Dasgo son árvidii ahte sii ledje addán Jesusa su háldui gáđašvuođas .
Go Pilatus lei čohkkámin duopmárstuolus , de bođii sátni sutnje su áhkás : « Ale daga maidege dán vanhurskkis olbmái !
Dasgo mus ledje surgadis niegut mannan ija su dihtii . »
Muhto bajitbáhpat ja vuorrasat hálahedje olbmuid gáibidit Barabbasa luovus ja goddit Jesusa .
Go eananhearrá jearai sis : « Goappá dii dáhttubehtet mu luoitit luovus ? »
de sii vástidedje : « Barabbasa . »
Pilatus jearai : « Maid mun dalle dagan Jesusii , gii gohčoduvvo Messiasin ? »
Buohkat čurvo sutnje : « Russiinávle su ! »
Son jearai : « Maid baháid ba son lea dahkan ? »
Muhto sii huike ain jitnoseabbot : « Russiinávle su ! »
Go Pilatus oinnii ahte son ii sáhte šat dahkat maidege , ja ahte stuibmi lassánii , de son válddii čázi ja basai gieđaidis olbmuid oaidnut . Son dajai : « Mun lean vigiheapmi dán olbmá varrii .
Dát lea din ovddasvástádus . »
Oppa joavku vástidii sutnje : « Bohtos su varra min ja min mánáid badjelii ! »
De son luittii Barabbasa luovus , muhto Jesusa son spihččehii ja attii russiinávlejuvvot .
Eananhearrá soalddáhat válde Jesusa mielddiset ladnái ja čohkkejedje oppa fáktaveaga su birra .
Sii nuolahedje su ja heŋgejedje skárllatrukses soalddátbiktasa su olggiid ala , bárgidedje bastilislátnjákruvnnu ja bidje dan su oaivái ja bidje soappi su olgeš gihtii .
Sii luoitádedje su ovdii , bilkidedje su ja dadje : « Dearvva dutnje , juvddálaččaid gonagas ! »
Ja sii čolge su njeaiga , dohppejedje soappi ja časke su oaivái .
Go sii ledje bilkidan su , de nulle sus soalddátbiktasa ja cogge sutnje fas iežas biktasiid .
De sii dolvo Jesusa russiinávlejuvvot .
Dohko manadettiin sii deive kyrenelaš olbmá gean namma lei Simmon , ja bággejedje su guoddit Jesusa ruossa .
Go sii bohte dan báikái mii gohčoduvvo Golgatan , mii mearkkaša Oaivegállobáiki , de adde Jesusii viinni masa lei seaguhuvvon sáhppi , muhto go son máisttii dan , de ii dáhtton juhkat .
Go sii ledje russiinávlen su , de vuorbádedje su biktasiid ja juogadedje daid gaskaneaset . De čohkkájedje das ja fáktejedje su .
Su oaivvi bajábeallái sii ledje bidjan áššáskuhttinčállosa : « Dát lea Jesus , juvddálaččaid gonagas . »
Oktan suinna sii russiinávlejedje maiddái guokte rievvára , nuppi su olgeš ja nuppi su gurut beallái .
Sii geat vázze meattá , bárde oaivvi ja bilkidedje su : « Don gii gaikkodat tempela ja hukset dan fas ođđasit golmma beaivvis ! Beastte dál iežat , jos leaččat Ipmila Bárdni , ja njieja ruossas ! »
Seammá láhkái bajitbáhpat oktan čálaoahppavaččaiguin ja vuorrasiiguin bilkidedje su ja dadje : « Earáid son gal lea beastán , muhto iežas ii sáhte beastit .
Ii ba son leat Israela gonagas ? Njidjos dal ruossas , de mii oskut sutnje .
Son lea dorvvastan Ipmilii ; gádjos dal Ipmil su , jos son ráhkisteš su .
Dasgo son lea cealkán ahte son lea Ipmila Bárdni . »
Seammá láhkái hiddjideigga su rievvárguovttos ge geat leigga russiinávlejuvvon oktan suinna .
Guđat diimmu rájes šattai seavdnjadas miehtá eatnama , gitta ovccát diimmu rádjái .
Ovccát diimmus Jesus čuorvvui alla jienain : « Eli , Eli , lema sabaktani ? »
Dat lea : « Ipmilan , Ipmilan , manne don leat mu guođđán ? »
Muhtumat sis geat čužžo das , gulle dan ja dadje : « Son čuorvu Elia . »
Ja muhtun sis viegai dakkaviđe su lusa , válddii guobbarasa ja láktadii dan suvrra viinniin , bijai dan soabbegeahčái ja attii sutnje juhkat .
Muhto earát dadje : « Ale vuos , gehččot boahtá go Elia gádjut su . »
Muhto Jesus čurvii fas alla jienain ja attii vuoiŋŋas .
Dalle tempela ovdaloavdda gaikánii guovdat , badjeravddas gitta vuolleravdii .
Eanan doarggistii ja bávttit luoddanadde .
Hávddit rahpasedje , ja ollu jápmán bassi olbmuid rupmašat bajásčuoččáldahttojuvvojedje . Sii bohte olggos hávddiineaset Jesusa bajásčuožžileami maŋŋil ja manne bassi gávpogii , gos olusat oidne sin .
Muhto go offiseara ja earát geat ledje fáktemin Jesusa , vásihedje eatnandoarggástusa ja dan mii dáhpáhuvai , de sii suorganedje sakka ja dadje : « Duođaid , son lei Ipmila Bárdni ! »
Veahá gaskka das eret ledje maiddái máŋga nissona geahččamin .
Sii ledje čuvvon Jesusa Galilea rájes ja bálvalan su . Sin searvvis ledje Márjá Magdalena , Jáhkoba ja Jovsseha eadni Márjá , ja Sebedeusa bártniid eadni .
Go šattai eahket , de bođii dasa Jovsset , rikkis arimatealaš , gii maiddái lei Jesusa máhttájeaddji .
Son manai Pilatusa lusa ja siđai Jesusa rupmaša .
Ja Pilatus gohčui addit dan sutnje . Jovsset válddii rupmaša , giesai dan buhtes liinni sisa ja bijai dan ođđa hávdái , man son lei čuolahan alccesis báktái .
Son fierahii stuora geađggi ráiggi ovdii ja vulggii eret .
Muhto Márjá Magdalena ja nubbi Márjá leigga das ja čohkkáiga aiddo hávddi buohta .
Nuppi beaivvi , sábbáha ráhkkananbeaivvi maŋŋil , bajitbáhpat ja farisealaččat manne searválagaid Pilatusa lusa ja dadje : « Hearrá , midjiide lea boahtán jurdagii maid dát verrošeaddji dajai ealedettiinis : Golmma beaivvi geažes mun bajásčuoččáldahttojuvvon .
Gohčo dan dihtii atnit hávddi dárkilis geahčus goalmmát beaivvi rádjái , amaset su máhttájeaddjit beassat suoládit su ja dadjat álbmogii ahte son lea bajásčuoččáldahttojuvvon jábmiid luhtte .
Dalle dat maŋit fillehus šattašii bahábun go ovddit . »
Pilatus vástidii : « Dá leat didjiide fávttat .
Mannet ja gáhttejehket nu bures go sáhttibehtet . »
Sii manne ja gáhttejedje hávddi sihke fávttaiguin ja seaillain man sii bidje geađgái .
Go sábbát lei vássán ja vahku vuosttaš beaivi čuvggodišgođii , de Márjá Magdalena ja nubbi Márjá manaiga geahččat hávddi .
Fáhkka šattai garra eatnandoarggástus , dasgo Hearrá eŋgel njiejai almmis , manai hávddi lusa ja fierahii geađggi eret ja čohkánii dan ala .
Son lei šearrat dego álddagas , ja biktasat ledje vielgadat dego muohta .
Fávttat doarggistedje balus go oidne su , ja gahčče dego jápmán .
Muhto eŋgel sárdnugođii nissoniidda : « Alli bala !
Mun dieđán ahte doai ohcabeahtti Jesusa , gii russiinávlejuvvui .
Son ii leat dás , son lea bajásčuoččáldahttojuvvon , nugo celkkii .
Boahtti geahččat báikki gos son veallái !
Doapmaleahkki su máhttájeddjiid lusa ja daddji ahte son lea bajásčuožžilan jábmiid luhtte ja manná Galileai din ovdalis ; doppe dii oaidnibehtet su .
– Dál lean cealkán dan dudnuide . »
Soai doapmaleigga eret hávddi luhtte balus ja stuora ilus , ja viehkaleigga muitalit dan su máhttájeddjiide .
Dalle Jesus bođii sudno ovddal ja dearvvahii sudno .
Soai manaiga ja fátmmasteigga su julggiid ja gopmirdeigga su .
Jesus celkkii sudnuide : « Alli bala !
Manni muitalit mu vieljaide ahte sii galget mannat Galileai .
Doppe sii oidnet mu . »
Go nissonat ain leigga mannamin , de muhtumat fávttain bohte gávpogii ja muitaledje bajitbáhpaide mii lei dáhpáhuvvan .
Bajitbáhpat čoahkkanedje vuorrasiiguin , ja sii mearridedje addit soalddáhiidda ollu ruđaid . Sii dadje soalddáhiidda : « Dadjet ahte su máhttájeaddjit bohte ihkku ja suoládedje su din oađedettiin .
Jos eananhearrá gulaš dán , de mii soažžudit su nu ahte dii oažžubehtet leat ráfis . »
Sii válde vuostái ruđaid ja dahke nugo gohčohalle .
Ja dát sáhka lea viidánan juvddálaččaid gaskii gitta dán beaivvi rádjái .
Buot oktanuppelot máhttájeaddji vulge Galileai dan várrái gosa Jesus lei gohččon sin boahtit .
Go sii oidne su , de luoitádedje čippiid ala ja gudnejahtte su , muhto muhtumat eahpidedje .
Jesus loaiddastii sin ovdii ja sártnui sidjiide : « Munnje lea addojuvvon buot fápmu almmis ja eatnama alde .
Vulget dan dihtii ja dahket buot álbmogiid máhttájeaddjin gásttašettiin sin Áhči ja Bártni ja Bassi Vuoiŋŋa nammii ja oahpahettiin sin doallat buot dan maid mun lean gohččon din doallat .
Ja gehččet , mun lean dinguin buot beivviid gitta dálá máilmmi loahpa rádjái . »
Dás álgá Jesus Kristusa , Ipmila Bártni , evangelium .
Profehta Jesaja girjái lea čállojuvvon : Geahča , mun vuolggahan áirasan du ovddabeale , son ráhkada dutnje geainnu .
Jietna čuorvu meahcis : Válmmaštehket geainnu Hearrái , njulgejehket su bálgáid !
Nu gásttašeaddji Johanas sárdnidišgođii meahcis ahte olbmot galge dahkat jorgalusa ja gásttašuvvot suttuid ándagassii addojupmin .
Oppa Judea ja buot Jerusalema ássit vulge su lusa . Sii dovddastedje suttuideaset , ja Johanas gásttašii sin Jordaneanus .
Johanasas ledje badjelis kamelguolgabiktasat ja sus lei náhkkeboagán alimiiddis birra , ja su borramuš lei rásselohkut ja meahccehonnet .
Son sárdnidii : « Mu maŋŋil boahtá son gii lea gievrrat go mun ; mun in leat dohkálaš njahkalit nuollat su gámavuoddagiid ge .
Mun lean gásttašan din čáziin , muhto son gásttaša din Bassi Vuoiŋŋain . »
Daid beivviid bođii Jesus Nasaretas Galileas , ja Johanas gásttašii su Jordaneanus .
Dakkaviđe go Jesus čuožžilii čázis , de oinnii almmi leahkkaseamen ja Vuoiŋŋa boahtimin su badjelii duvvá hámis .
Ja almmis gullui jietna : « Don leat mu Bárdni gean mun ráhkistan , don leat mu miela mielde . »
Dallánaga Vuoigŋa ájii su meahccái . Doppe son lei njealljelot beaivvi , ja Sáhtán geahččalii su .
Son elii spiriid gaskkas , ja eŋgelat bálvaledje su .
Maŋŋil go Johanas lei biddjojuvvon giddagassii , Jesus bođii Galileai sárdnidit Ipmila evangeliuma . Son celkkii : « Áigi lea dievvan , Ipmila riika lea boahtán lahka .
Jorgalehket ja oskot evangeliumii ! »
Go son lei vázzimin Galileajávregátti , de oinnii Simmona ja su vielja Ándarasa suohppumin nuohti jávrái , dasgo soai leigga guollebivdit .
Jesus celkkii sudnuide : « Čuovvu mu , de mun dagan dudno olmmošbivdin ! » Dan seammás soai guđiiga firpmiideaskka ja čuovuiga su .
Go Jesus lei vázzán veahá gaskka , de oinnii Jáhkoba , Sebedeusa bártni , ja su vielja Johanasa . Soai leigga čohkkámin fatnasis ja čiktimin firpmiid .
Dallánaga son rávkkai sudno , ja soai guđiiga áhčiska Sebedeusa fatnasii láigobargiiguin ja čuovuiga su .
Sii bohte Kapernaumii , ja sábbáhin son manai synagogii ja oahpahišgođii .
Olbmot hirpmástuvve su oahpaheamis , dasgo son oahpahii isitvuođain ii ge nugo čálaoahppavaččat .
Sin synagogas lei dalle olmmái geas lei buhtismeahttun vuoigŋa . Son čuorvugođii : « Mii dus lea minguin dahkamuššan , nasaretlaš Jesus ?
Leat go boahtán duššadit min ?
Mun dieđán gii don leat , Ipmila Bassi ! »
Muhto Jesus šikkui vuoiŋŋa ja celkkii : « Jávohuva ja vuolgge sus olggos ! »
Ja buhtismeahttun vuoigŋa gaikkui olbmá ja vulggii gilju sus olggos .
Buohkat suorganedje ja dadje oktiinjálmmiid : « Mii dát lea ?
Son buktá ođđa oahpu isitvuođain !
Son han gohčču vel buhtismeahttun vuoiŋŋaid ge , ja dat jeagadit su . »
Ja sáhka su birra viidánii fargga miehtá Galilea .
Go sii vulge synagogas , de bohte Simmona guoktá Ándarasain geahčai oktan Jáhkobiin ja Johanasain .
Doppe Simmona vuoni lei veallámin seaŋggas heajos buohccin , ja sii muitaledje dan dakkaviđe Jesusii .
Son manai su lusa , dollii su gihtii ja čuoččáldahtii su .
Dávda luittii su , ja son bálvališgođii sin .
Go šattai eahket ja beaivváš lei luoitádan , de sii bukte su lusa buot buhcciid ja bosttahuvvon olbmuid , ja oppa gávpot lei čoagganan uvssa ovdii .
Son buoridii olusiid geain ledje máŋggalágán dávddat , ja ájii olggos máŋga bahá vuoiŋŋa .
Muhto son ii suovvan bahá vuoiŋŋaid dadjat maidege , dasgo dat dihte gii son lei .
Árrat nuppi iđida , go ain lei seavdnjat , son lihkai ja manai olggos ávdin báikái ja rohkadalai doppe .
Simmon ja su guoimmit doapmaledje maŋŋái , ja go gávdne su , de dadje : « Buohkat leat ohcamin du ! »
Muhto Jesus vástidii : « Vulgot eará giliide dáppe birrasiin , vai mun beasan sárdnidit doppe ge .
Danne mun lean boahtán deike . »
De jođašii miehtá Galilea , sárdnidii sin synagogain ja ájii olggos bahá vuoiŋŋaid .
Muhtun spihtálaš bođii Jesusa lusa , luoitádii su ovdii ja dajai sutnje : « Jos don dáhtožat , de sáhtát buhtistit mu ! »
Jesus árkkášii su njuorrasit . Son geigii gieđas , guoskkahii su ja celkkii sutnje : « Mun dáhtun , šatta buhtisin ! »
Dakkaviđe jávkkai spihtálvuohta , ja olmmái buhtistuvvui .
Muhto Jesus vuolggahii su dakkaviđe eret ja celkkii sutnje garrasit : « Várut dadjamis maidege geasage dán birra ! Muhto mana čájehit iežat báhppii ja oaffaruša buhtástusat ovddas dan maid Movsses lea gohččon . Dat lea olbmuide duođaštussan . »
Muhto olmmái manai eret ja muitališgođii buohkaide dan mii lei dáhpáhuvvan , nu ahte Jesus ii sáhttán šat boahtit albmosit mange gávpogii . Son orui gávpogiid olggobealde , ávdin báikkiin .
Liikkáge olbmot bohte su lusa juohke guovllus .
Muhtun beivviid geažes Jesus bođii fas Kapernaumii , ja de beaggigođii ahte son lei ruovttus .
Dohko čoagganedje nu ollu olbmot ahte dat eai čáhkan sisa eai ge uvssa ovdii ge , ja son sárdnidii sidjiide sáni .
Sii bukte lámis olbmá su lusa ; njeallje olbmá gudde su .
Muhto go olbmuid eatnatvuođa dihtii eai beassan Jesusa lusa , de gaiko dáhki dakko buohta gokko Jesus lei .
Go ledje dahkan ráiggi , de luite vuolás guoddinseaŋgga man alde lámis olmmái lei veallámin .
Go Jesus oinnii sin oskku , de celkkii lápmásii : « Bárdnán , du suttut leat dutnje ándagassii addojuvvon . »
Muhto muhtun čálaoahppavaččat ledje čohkkámin das , ja sii jurddašedje váimmuineaset : « Mo ba son sáhttá sárdnut ná ?
Son bilkida Ipmila !
Gii sáhttá addit suttuid ándagassii earet go Ipmil ? »
Jesus dovddai dakkaviđe vuoiŋŋastis ahte sii jurddašedje nie , ja son celkkii sidjiide : « Manne dis leat diekkár jurdagat din váimmuin ?
Goabbá lea álkit dadjat lápmásii , jogo : Du suttut leat dutnje ándagassii addojuvvon , dahje : Čuožžil , váldde seaŋggat ja vázzil ?
Muhto vai dii dieđášeiddet ahte Olbmobártnis lea fápmu eatnama alde addit suttuid ándagassii » – ja son sárdnu lámis olbmái , – « de mun cealkkán dutnje : Čuožžil , váldde seaŋggat ja mana ruoktot ! »
Ja olmmái čuožžilii , válddii dallánaga seaŋggas ja váccii olggos buohkaid oaidnut , nu ahte buohkat imaštedje sakka ja máidno Ipmila ja dadje : « Dakkára mii eat leat goassege oaidnán . »
Dasto Jesus manai fas jávregáddái .
Oppa olmmošjoavku bođii su lusa , ja son oahpahii sin .
Go lei vuolgimin doppe , de oinnii Levi , Alfeusa bártni , čohkkámin tuolloviesus . Jesus celkkii sutnje : « Čuovo mu ! »
Ja son čuožžilii ja čuovui su .
Maŋŋil Jesus lei guossin Levi geahčen , ja ollu tuollárat ja suttolaččat ledje čohkkámin beavddis Jesusiin ja su máhttájeddjiiguin , dasgo eatnagat čuvvo su .
Go farisealaččaid čálaoahppavaččat oidne ahte son boradii suttolaččaiguin ja tuolláriiguin , de sii jerre su máhttájeddjiin : « Mo son sáhttá boradit tuolláriiguin ja suttolaččaiguin ? »
Jesus gulai dán ja celkkii sidjiide : « Eai dearvvaš olbmot dárbbaš dálkkasteaddji , muhto buohccit .
Mun in leat boahtán rávkat vanhurskásiid , muhto suttolaččaid . »
Johanasa máhttájeaddjit ja farisealaččat atne borakeahttáivuođa , ja muhtumat bohte Jesusa lusa ja jerre : « Johanasa máhttájeaddjit ja farisealaččaid máhttájeaddjit atnet borakeahttáivuođa , muhto manne du máhttájeaddjit eai daga dan ? »
Jesus vástidii : « Sáhttet go headjaguossit atnit borakeahttáivuođa dan botta go irgi lea sin luhtte ?
Nu guhká go irgi lea sin luhtte , eai sáhte atnit borakeahttáivuođa .
Muhto áigi boahtá go irgi váldojuvvo sis eret , ja daid beivviid go dat dáhpáhuvvá , de sii atnet borakeahttáivuođa .
Ii oktage bija duohpakeahtes duogŋasa boares biktasii .
Dasgo dalle ođđa duokŋas gaiku bihtá boares biktasis ja ráigi šaddá velá stuoribun .
Ii ge oktage leaikko varas viinni boares náhkkeseahkaide . Dasgo dalle viidni ludde seahkaid , ja sihke viidni ja seahkat billašuvvet .
Leaikko varas viinni ođđa náhkkeseahkaide ! »
Muhtun sábbáha Jesus lei vázzimin gordnebealdduid čađa , ja vaccedettiin máhttájeaddjit čoaggigohte gordneoivviid .
Farisealaččat dadje sutnje : « Geahča ! Manne sii dahket dan mii ii leat lobálaš sábbáhin ? »
Son vástidii : « Ehpet go dii leat goassege lohkan maid Dávvet dagai go lei heađis ja nealgumin , son ja su olbmát ?
Son manai Ipmila vissui , go Abjatar lei bajimušbáhppan , ja borai oaffarláibbiid maid ii oktage eará go báhpat oaččo borrat , ja son attii maiddái sidjiide geat ledje suinna . »
Ja Jesus lasihii : « Sábbát šattai olbmo dihtii , ii ge olmmoš sábbáha dihtii .
Danne lea Olbmobárdni sábbáha hearrá ge . »
Son manai fas synagoga sisa . Doppe lei olmmái geas lei ástan giehta .
Ja farisealaččat atne Jesusa čalmmis oaidnit buorideažžá go son olbmá sábbáhin , vai sii beasašedje váidit su .
Muhto son celkkii olbmái geas lei ástan giehta : « Čuožžil ja boađe deike ! »
Ja son jearai sis : « Lea go sábbáhin lobálaš dahkat buriid dahje dahkat baháid , gádjut heakka dahje goddit ? »
Muhto sii orro jávohaga .
Son geahčai birra buohkaide , dievva moaris ja morrašis sin garra váimmuid dihtii , ja celkkii olbmái : « Geige gieđat ! »
Son geigii dan , ja giehta dearvvašmuvai .
Muhto farisealaččat manne dakkaviđe olggos ja lihtodišgohte Herodesa čuovvuiguin Jesusa vuostái mo sáhtášedje goddit su .
Dasto Jesus geassádii eret jávregáddái máhttájeddjiidisguin , ja ollu olbmot Galileas čuvvo sin .
Maiddái Judeas , Jerusalemis ja Idumeas , Jordana nuorttabealde ja Tyrosa ja Sidona guovlluin bohte ollu olbmot su lusa , dasgo sii ledje gullan buot maid son dagai .
Jesus dáhtui máhttájeddjiidis doalahit sutnje fatnasa gárvvisin olbmuid eatnatvuođa dihtii , amaset bahkket su ala .
Dasgo son buoridii olusiid , ja buohkat geain ledje vigit , bahkkejedje su ala vai beasašedje guoskkahit su .
Go buhtismeahttun vuoiŋŋat oidne su , de luoitádedje su ovdii ja čurvo : « Don leat Ipmila Bárdni ! »
Muhto son gilddii sin garrasit muitaleames geasage iežas birra .
Jesus manai bajás várrái ja rávkkai lusas muhtumiid geaid lei válljen , ja sii bohte su lusa .
Son válljii guoktenuppelohkása geat galge čuovvut su ja vuolggahuvvot sárdnidit ja su fámuin ádjit olggos bahá vuoiŋŋaid .
Dat guoktenuppelogis geaid son válljii , ledje Simmon , geasa son bijai liigenamman Biehtár , Jáhkot , Sebedeusa bárdni , ja su viellja Johanas – dán guoktá son gohčodii Boanergesin , mii mearkkaša bajánbártnit – ja Ándaras , Filip ja Bartolomeus , Matteus , Duomás ja Jáhkot , Alfeusa bárdni , Taddeus ja Simmon Kananeus , ja Judas Iskariot , guhte behtii su .
De Jesus bođii ruoktot , ja olbmot čoahkkanedje fas dohko , nu ahte son ja su máhttájeaddjit eai ožžon borrandili ge .
Go su fuolkkit gulle dan , de manne viežžat su , dasgo sii dadje ahte son lei áibbas dájáskan .
Muhto čálaoahppavaččat geat ledje boahtán Jerusalemis , dadje : « Sus lea Beelsebul ! Bahá vuoiŋŋaid oaivámučča fámuin son ádjá olggos bahá vuoiŋŋaid ! »
De Jesus gohčui sin lusas ja sártnui sidjiide veardádusaiguin : « Mo sáhtášii Sáhtán ádjit olggos Sáhtána ?
Jos riika lea soahpameahttun iežainis , de dat ii sáhte bissut .
Ja jos ruoktu lea soahpameahttun iežainis , de dat ruoktu ii sáhte bissut .
Jos Sáhtán lea čuožžilan iežas vuostái ja lea soahpameahttun iežainis , de son ii sáhte bissut , muhto dat lea su loahppa .
Ii ge oktage sáhte mannat gievrras olbmá dállui rievidit su opmodagaid ovdal go son vuos čatná su . Dalle sáhttá rievidit su viesu .
Duođaid , mun cealkkán didjiide : Buot suttut addojuvvojit ándagassii olbmuide , velá bilkádusat ge , man ollu dal de bilkidežžet .
Muhto dat gii bilkida Bassi Vuoiŋŋa , ii goassege oaččo ándagassii , dasgo son lea sivalaš agálaš suddui . »
Dán son celkkii danne go sii ledje dadjan : « Sus lea buhtismeahttun vuoigŋa . »
De bohte Jesusa eadni ja su vieljat .
Sii ledje čuožžumin olggobealde , muhto bidje sáni ja rávke su .
Ollu olbmot ledje čohkkámin su birra , ja sii dadje sutnje : « Du eadni ja du vieljat leat olggobealde jearaheamen du »
Son vástidii sidjiide : « Gii lea mu eadni ja geat leat mu vieljat ? »
Ja son geahčai sidjiide geat ledje čohkkámin su birra , ja celkkii : « Gehččet , dá leat mu eadni ja mu vieljat !
Dat gii dahká Ipmila dáhtu , lea mu viellja ja oabbá ja eadni . »
Jesus oahpahišgođii fas olbmuid jávregáttis , ja su birra čoahkkanii stuora olmmošjoavku .
Danne son fertii mannat fatnasii ja čohkkát das jávrri alde , ja olbmot čužžo gáttis .
Son sárdnidii sidjiide guhká veardádusaiguin ja oahpahii sin ná : « Gilvi vulggii gilvit .
Ja gilvvedettiin gahčče muhtun čalmmit geaidnogurrii , ja lottit bohte ja borre daid .
Muhtun čalmmit gahčče geađgás eatnamii gos ii lean ollu muolda , ja dat ihte johtilit , dasgo eanan lei nu asehaš .
Muhto go beaivváš badjánii , de dat bulle ja goldne danne go dain ii lean ruohtas .
Muhtun čalmmit gahčče bastilislánjáid gaskii , ja bastilislánját šadde ja hávkadedje daid , nu ahte eai šaddadan šattuid .
Muhto muhtun čalmmit gahčče šattolaš eatnamii . Dat ihte ja šadde ja šaddadedje šattuid : muhtumat šaddadedje golbmalotgeardásaččat , muhtumat guhttalotgeardásaččat ja muhtumat čuođigeardásaččat . »
Ja son celkkii : « Geas ležžet bealjit , son gullos ! »
Go son bázii okto guoktenuppelohkásiin ja earáiguin geat ledje suinna , de sii jearahedje sus veardádusaid birra .
Son vástidii : « Didjiide lea addojuvvon Ipmila riikka čiegusvuohta , muhto sidjiide geat leat olggobealde , almmuhuvvo buot veardádusaiguin , vai sii oainnedettiineaset oidnet eai ge fuobmá , ja guladettiineaset gullet eai ge ádde , amaset jorgalit ja oažžut ándagassii . »
Ja son celkkii sidjiide : « Jos dii ehpet árvit dán veardádusa , mo dalle sáhttibehtet áddet eará veardádusaid ?
Gilvi gilvá sáni .
Sátni gahččá geaidnogurrii sin gaskii guđet gullet dan , muhto Sáhtán boahtá dakkaviđe ja váldá eret sáni mii lea gilvojuvvon sidjiide . Earáiguin lea nu ahte sátni gahččá geađgás eatnamii ; sii gal gullet ja vuostáiváldet dan iluin , muhto sis ii leat ruohtas , ja sii bissot dušše muhtun áiggi . Go dasto áŧestus ja doarrádallojupmi boahtá sáni dihtii , de sii hilgádit dallánaga .
Earáiguin lea nu ahte sátni gahččá bastilislánjáid gaskii ; sii gal gullet sáni , muhto dán máilmmi váivvit , riggodaga fillehus ja buotlágán anistumit hávkadit sáni , nu ahte dat ii šaddat šattuid .
Muhto sátni lea gilvojuvvon šattolaš eatnamii sin gaskii guđet gullet sáni , vuostáiváldet dan ja šaddadit šattuid , muhtumat golbmalotgeardásaččat , muhtumat guhttalotgeardásaččat ja muhtumat čuođigeardásaččat . »
Son celkkii sidjiide : « Buktá go olmmoš gintala ja bidjá dan gári dahje seaŋgga vuollái ? Ii go bija dan ginttaljuolgái ?
Ii mihkkege leat čihkosis mii ii almmustuva , ii ge mihkkege leat čihkkojuvvon mii ii boađe albmosii .
Geas ležžet bealjit , son gullos ! »
Ja son lasihii : « Vuhtiiváldet dan maid gullabehtet !
Dainna mihtuin mainna ieža mihtidehpet , mihtiduvvo didjiide , ja velá eanet addojuvvo didjiide .
Dasgo sutnje geas lea , addojuvvo . Muhto geas ii leat , váldojuvvo eret vel dat ge mii sus lea . »
Son celkkii : « Ná lea Ipmila riikkain : Olmmái gilvá gilvagiid eatnamii .
Son oađđá ja lihkká , šaddá idja ja šaddá beaivi , ja gilvagat ihtet ja šaddet ii ge son dieđe mo nu geavvá .
Ieš alddes eanan šaddada šattuid : vuos rásiid , de gordneoivviid ja loahpas láddan gortniid oivviide .
Go gortnit leat láddan , de son boahtá dallánaga sirppiin , dasgo láddjenáigi lea boahtán . »
Son celkkii : « Manin veardidivččiimet mii Ipmila riikka ?
Dat lea sennetsiepmana láhkásaš . Go dat biddjojuvvo eatnamii , de lea uhcit go buot eará gilvagat eatnama alde , muhto go dat lea gilvojuvvon , de dat šaddá , ja šaddá stuoribun go buot eará gilvvašattut ja oažžu nu stuora ovssiid ahte almmi lottit sáhttet ráhkadit besiid dan suoivanii . »
Máŋggain dakkár veardádusaiguin son sártnui sidjiide sáni , dađe mielde go sii vedje ipmirdit .
Almmá veardádusaid haga son ii sárdnon sidjiide . Muhto go son lei iehčanassii máhttájeddjiidisguin , de čilgii sidjiide buot .
Seammá beaivvi eahketbeallái Jesus celkkii sidjiide : « Vulgot don beallái jávrri . »
Sii guđđe olmmošjoavkku , ja válde su fárrui dainna fatnasiin mas son lei juo čohkkámin . Eará fatnasat ge serve .
De bođii garra jorribiegga , ja bárut šávgo fatnasii nu ahte dat goasii devdui .
Muhto Jesus lei oađđimin guottá alde fatnasa maŋágeahčen .
Sii bokte su ja dadje sutnje : « Oahpaheaddji , it go beroš go mii leat heavvaneamen ? »
De son čuožžilii , šikkui biekka ja celkkii jávrái : « Jávohuva !
Oro jaska ! »
Ja biegga ložžii ja šattai vuodjagoalki .
Jesus celkkii sidjiide : « Manne dii nu ballabehtet ?
Ii go dis leat velá osku ? »
Muhto sii ledje sakka suorganan ja dadje guhtet guimmiidasaset : « Gii son lea ?
Sihke biegga ja jávri jeagadit su . »
Sii bohte nuppi beallái jávrri Gerasa guvlui .
Go Jesus loaiddastii fatnasis , de su ovddal bođii hávderokkiin olmmái geas lei buhtismeahttun vuoigŋa .
Son ásai hávderokkiin ii ge oktage veadján čatnat su šat , ii oppa láhkkiiguin ge .
Dasgo son lei dávjá čadnojuvvon juolgeruvddiiguin ja láhkkiiguin , muhto láhkkiid son gaikkui eret , ja juolgeruvddiid son cuvkii . Ii oktage veadján lodjudit su .
Ijatbeaivvi son huikkii hávderokkiin ja váriin ja huškkui iežas geđggiiguin .
Go son dál oinnii Jesusa guhkkin , de bođii viega , luoitádii su ovdii ja čuorvvui alla jienain : « Jesus , Alimus Ipmila Bárdni , mii dus lea muinna dahkamuššan ?
Mun vuortnuhan du Ipmila bokte , ale givssit mu ! »
Dasgo Jesus lei cealkán sutnje : « Don buhtismeahttun vuoigŋa , vuolgge olbmás ! »
Jesus jearai : « Mii du namma lea ? »
Son vástidii : « Mu namma lea Legion , dasgo mii leat olusat . »
Ja son ánuhii Jesusa ahte ii ájáše sin eret guovllus .
Stuora spiidneeallu lei guohtumin vári lahka , ja buhtismeahttun vuoiŋŋat ánuhedje sus : « Vuolggat min spiinniid lusa , vai mii beassat mannat daid sisa ! »
Dan son suovai sidjiide .
Ja buhtismeahttun vuoiŋŋat vulge olbmás ja manne spiinniid sisa , ja oppa eallu , sullii guokteduhát spiinni , hurgalii báktedardda badjel vuolás jávrái ja heavvanii dohko .
Guođoheaddjit viehkaledje gávpogii ja lagas báikkiide muitalit buot dáid , ja olbmot bohte geahččat mii lei dáhpáhuvvan .
Sii bohte Jesusa lusa ja oidne bosttahuvvon olbmá čohkkámin . Son geas ledje leamaš buot buhtismeahttun vuoiŋŋat , lei gárvodan ja olles mielaid alde . De sii suorganedje .
Sii geat ledje oaidnán visot , muitaledje mo lei geavvan bosttahuvvon olbmáin ja spiinniiguin .
Dalle sii ánuhedje Jesusa vuolgit eret sin guovlluin .
Go Jesus manai fatnasii , de son geas ledje leamaš buhtismeahttun vuoiŋŋat , dáhtui beassat su mielde .
Muhto Jesus ii suovvan su ja celkkii : « Mana ruoktot olbmuidat lusa ja muital sidjiide makkár stuora daguid Hearrá lea dahkan dutnje , ja ahte son lea árpmihan du »
Olmmái vulggii ja almmuhišgođii buohkaide Dekapolisa guovllus man stuora daguid Jesus lei dahkan sutnje . Ja buohkat ovddošedje .
Go Jesus lei fas mannan fatnasiin nuppi beallái , de stuora joavku čoahkkanii su birra .
Dan botta go son lei das jávregáttis , bođii synagoga ovddasčuožžu gean namma lei Jairos .
Go son oinnii Jesusa , de luoitádii su julggiid ovdii ja ánuhii sus : « Mu uhca nieiddaš lea jápmimin .
Boađe bidjat gieđaidat su ala , vai son dearvvašmuvvá ja beassá eallit . »
Jesus vulggii su mielde , ja stuora joavku čuovui maŋis ja bahkkejedje su lahka .
Das lei nisu geas ledje leamaš vardimat guoktenuppelot jagi .
Son lei leamaš ollu dálkkasteddjiid luhtte ja lei gillán ollu , ja lei golahan buot opmodagas ii ge lean ávkkuhan ; son lei baicca hedjonan .
Son lei gullan Jesusa birra , ja dál son bođii olbmuid gaskka ja guoskkahii su biktasa maŋil , dasgo son jurddašii : « Jos beasašin juobe guoskkahit su biktasiid ge , de dearvvašmuvašin . »
Dakkaviđe orustii vardámuš , ja son dovddai ahte son lei dearvvašmahttojuvvon givssiinis .
Dan seammás Jesus dovddai ahte sus vulggii fápmu , ja son jorggihii olbmuid gaskkas ja jearai : « Gii guoskkahii mu biktasiid ? »
Máhttájeaddjit dadje sutnje : « Don oainnát mo olbmot bahkkejit du birra , ja de jearat vel gii guoskkahii du »
Muhto Jesus geahčai birrasis oaidnin dihtii su gii lei dahkan dan .
Nisu doarggistii balus , dasgo son diđii mii lei dáhpáhuvvan suinna , ja son bođii ja luoitádii su ovdii ja muitalii buot .
De Jesus celkkii sutnje : « Nieidan , du osku lea beastán du
Mana ráfái !
Don leat dearvvašmahttojuvvon givssiinat . »
Go son lei ain sárdnumin , de muhtumat bohte synagoga ovddasčuožžu viesus ja dadje : « Du nieida lea jápmán !
Manne ain vuorjjat oahpaheaddji ? »
Muhto beroškeahttá das maid sii dadje Jesus celkkii synagoga ovddasčužžui : « Ale bala , duššefal oskko ! »
Dál son ii suovvan geange boahtit mielddis earet Biehtára , Jáhkoba ja Johanasa , Jáhkoba vielja .
Go sii bohte synagoga ovddasčuožžu vissui , de Jesus oinnii šlámaideaddji olmmošjoavkku čierrumin ja fuoikumin , ja son manai sisa ja celkkii sidjiide : « Manne dii šlápmabehtet ja čierrubehtet ?
Mánná ii leat jápmán , son lea oađđimin . »
Sii boagustedje su .
Muhto son ájii buohkaid olggos , ja son válddii mielddis máná áhči ja eatni ja sin geat ledje su mielde , ja manai sisa gos mánná lei veallámin .
De válddii máná gihtii ja celkkii : « Talita kum ! »
Dat mearkkaša : « Nieida , mun cealkkán dutnje : Lihka ! »
Dakkaviđe nieida čuožžilii ja váccašišgođii , dasgo son lei guoktenuppelotjahkásaš .
Ja sii hirpmástuvve sakka . Muhto Jesus gilddii sin garrasit muitaleames geasage dan mii lei dáhpáhuvvan , ja gohčui sin addit niidii borrat .
Maŋŋil Jesus vulggii doppe ja bođii ruovttugávpogasas , ja su máhttájeaddjit čuvvo su .
Go sábbát bođii , de son oahpahišgođii synagogas , ja buohkat geat gulle su , ovddošedje ja dadje : « Gos son lea ožžon buot dáid ?
Mii viisodagaid lea addojuvvon sutnje go sáhttá dahkat dakkár fámolaš daguid gieđaidisguin ?
Ii go son leat dimbbarolmmái , Márjjá bárdni , Jáhkoba , Jovssesa , Judasa ja Simmona viellja ?
Eai go su oappát ge leat dáppe min searvvis ? »
Nu sii jorgaledje su vuostái .
Jesus celkkii sidjiide : « Ii profehta badjelgehččojuvvo eará báikkis go iežas ruovttugávpogis , fulkkiidis searvvis ja ruovttustis . »
Ii son sáhttán dahkat doppe maidege ovddolaš daguid ; son bijai dušše gieđaidis muhtun buhcciid ala ja buoridii sin .
Ja son imaštalai sin eahpeoskku .
De son váccii dan guovllu giliin ja oahpahii .
Son rávkkai lusas dan guoktenuppelohkása ja vuolggahišgođii sin , guoktása ain fárrolagaid , ja attii sidjiide fámu ráđđet buhtismeahttun vuoiŋŋaid .
Son gohčui sin ahte eai galgan váldit mielddiset maidege mátkái earet go soappi – eai láibbi , eai lávkka , eai veaikeruđaid boahkánii , muhto sis galge leat gápmagat juolggis ii ge galgan leat badjelis eambbo go okta gákti .
Ja son celkkii sidjiide : « Gos ihkinassii bođežehpet vissui , de orrot das dassážii go vuolgibehtet fas .
Jos muhtun báikkis eai váldde din vuostái eai ge dáhto guldalit din , de vulget das eret ja savdnjilehket sádduid julggiineattet sidjiide duođaštussan . »
De sii vulge ja sárdnidedje ahte buohkat fertejit dahkat jorgalusa . Sii ádje olggos ollu bahá vuoiŋŋaid ja vuoiddadedje ollu buhcciid oljjuin ja buoridedje sin .
Gonagas Herodes gulai Jesusa birra , dasgo su namma lei dál šaddan dovddusin . Muhtumat dadje : « Gásttašeaddji Johanas lea bajásčuoččáldahttojuvvon jábmiid luhtte ; danne sus leat dákkár fámut . »
Earát dadje : « Son lea Elia . » Earát fas : « Son lea profehta , aiddo dego muhtun boares profehtain . »
Muhto go Herodes gulai dan , de dajai : « Dat Johanas , geas mun čuohpahin eret oaivvi , lea bajásčuoččáldahttojuvvon . »
Dasgo Herodes lei bidjan olbmuid váldit Johanasa gitta ja lei bidjan su giddagassii Herodiasa , vieljas Filipa áhká , dihtii .
Herodes lei náitalan suinna , muhto Johanas lei cealkán sutnje : « Ii dus leat lohpi váldit vieljat áhká . »
Danne Herodias lei vašuhišgoahtán Johanasa ja hálidii goddit su , muhto ii sáhttán dan , dasgo Herodes balai Johanasas .
Son diđii ahte Johanas lei vanhurskkis ja bassi olmmái ja várjalii su .
Ja juohke háve go Herodes gulai su , de ráfehuvai ii ge diehtán maid dahkat , muhto dattege guldalii su mielastis .
Muhto de šattai liiba go Herodes doalai riegádanbeaivvis ja dagai heajaid bajimus virgeolbmáidasas ja offisearaide ja Galilea alimus olbmáide .
Herodiasa nieida bođii sisa ja dánssui , ja Herodes ja su guossit liikojedje dasa nu bures ahte gonagas dajai niidii : « Siđa mus maid hálideaččat , de áiggun addit dutnje dan . »
Son vuortnui dan ja lohpidii : « Maid ihkinassii dal dáhtožat , mun attán dutnje , vaikko de livččii bealli riikkastan . »
Nieida manai olggos ja jearai eatnistis : « Maid mun galggan sihtat ? »
Eadnis vástidii : « Siđa gásttašeaddji Johanasa oaivvi . »
Dakkaviđe son doapmalii sisa gonagasa lusa ja dajai maid son dáhtui : « Mun hálidan du dállánaga addit munnje gásttašeaddji Johanasa oaivvi gári siste . »
Dalle gonagas šlunddui sakka , muhto danne go son lei vurdnon gussiid gullut , son ii dáhtton biehttalit sus dan . Ja gonagas bijai dakkaviđe muhtuma fávttain olggos ja gohčui viežžat Johanasa oaivvi .
Fákta manai ja čuohpastii Johanasa oaivvi giddagasas , buvttii oaivvi gári siste ja attii niidii , ja son attii dan eadnásis .
Go Johanasa máhttájeaddjit gulle dán , de bohte viežžat liikka ja hávdádedje dan .
Apoastalat čoahkkanedje fas Jesusa lusa ja muitaledje sutnje buot maid ledje dahkan ja maid ledje oahpahan olbmuide .
Ja son celkkii sidjiide : « Bohtet mielde oktonas báikái gos mii beassat leat iehčanassii , ja vuoiŋŋastehket veahá ! »
Dasgo ledje nu olusat geat bohte ja vulge ahte sii eai astan boradit ge .
De sii vulge fatnasiin oktonas báikái gos sáhtte leat iehčanassii .
Muhto olusat oidne sin vuolgimin ja dovdájedje sin , ja olbmot bohte vácci buot gávpogiin ja jovde dohko sin ovdal .
Go Jesus dal manai gáddái , de oinnii stuora olmmošjoavkku , ja son árkkášii sin njuorrasit , dasgo sii ledje dego sávzzat geahčči haga . Son oahpahišgođii sin ja sártnui sidjiide guhká .
Go lei juo viehka maŋŋit beaivet , de su máhttájeaddjit bohte su lusa ja dadje : « Dát báiki lea ávdin ja lea juo maŋŋit .
Vuolggat olbmuid dáppe eret vai sii besset mannat lagas dáluide ja báikkiide oastit alcceseaset borramuša . »
Muhto Jesus vástidii sidjiide : « Addet dii sidjiide borramuša ! »
Sii dadje sutnje : « Galgat ba mii oastit láibbi guovttečuođi denara ovddas , vai sii besset boradit ? »
Son jearai : « Galle láibbi dis leat ?
Mannet geahččat ! »
Go sii ledje dahkan dan , de dadje : « Vihtta láibbi ja guokte guoli . »
Jesus dáhtui sin gohččut olbmuid čohkánit doahkkálagaid ruonas rásiid ala .
Ja sii čohkánadde joavkkuide , muhtumat čuođis ja muhtumat vihttalogis .
De son válddii dan vihtta láibbi ja guokte guoli , geahčai almmi guvlui ja rohkadalai giittusrohkosa , doadjalii láibbiid ja attii máhttájeddjiidasas , vai sii juogadivčče daid .
Dan guovtti guolis ge son juogadii buohkaide .
Ja buohkat boradedje ja gallánedje . Maŋŋil čohkkejedje láibe- ja guollebázahasaid , guoktenuppelot veaddelihti dievva .
Das ledje boradan vihtta duhát olbmá .
Dakkaviđe dán maŋŋil son gohčui máhttájeddjiidis mannat fatnasii ja vuolgit ovdal nuppe beallái , Betsaida guvlui , dan botta go ieš vuolggahii eret olmmošjoavkku .
Go son lei váldán sis earu , de manai várrái rohkadallat .
Go šattai eahket , de fanas lei guovdu jávrri ja Jesus lei okto gáttis .
Son oinnii ahte sii rahče suhkamiin , dasgo sis lei vuostebiegga .
Njealját idjavuorus son bođii vácci jávrri alde sin lusa .
Son lei aiddo mannamin sin meattá , muhto go sii oidne su vázzimin jávrri alde , de sii gádde su gobmin ja huikigohte , dasgo buohkat oidne su ja suorganedje .
Muhto dan seammás Jesus sártnui sidjiide : « Lehket roahkkadat , mun dat lean .
Allet bala ! »
Son loaiddastii fatnasii sin lusa , ja biegga ložžii .
Muhto sii hirpmástuvve sakka , dasgo sii eai lean ádden dan mii lei dáhpáhuvvan láibbiiguin ; sin váibmu lei baicca buoššuduvvon .
Go sii ledje ollen jávrri rastá , de bohte Gennesareta gáddái ja čatne fatnasa dasa .
Seammás go loaiddastedje fatnasis , de olbmot dovdájedje su ja doapmaledje buot siidaguimmiid mielde ja guoddigohte buhcciid guoddinseaŋggaiguin dohko gos gulle su leamen .
Ja gosa ihkinassii son bođii giliide , gávpogiidda dahje dáluide , sii bidje buhcciideaset šiljuide ja ánuhedje ahte dát beasašedje juobe guoskkahit su bivttasdiehpi ge .
Ja buohkat geat guoskkahedje su , dearvvašmahttojuvvojedje .
Farisealaččat ja muhtun čálaoahppavaččat geat ledje boahtán Jerusalemis , čoahkkanedje Jesusa birra . Sii oidne muhtumiid su máhttájeddjiin boradeamen eahpebassi gieđaiguin , dat mearkkaša basakeahtes gieđaiguin .
Dasgo farisealaččat ja juvddálaččat eai oppanassii bora ovdal go leat bassan gieđaideaset máddariid árbevieruid mielde . Ja go sii bohtet šiljus , de eai borat ovdal go leat basadan .
Sis leat maiddái ollu eará vierut main dollet gitta , nugo doidit juhkanlihtiid ja láirálihtiid ja veaikeruittuid .
Danne farisealaččat ja čálaoahppavaččat jerre sus : « Manne du máhttájeaddjit eai čuovo máddariid árbevieruid , muhto boradit eahpebassi gieđaiguin ? »
Jesus vástidii sidjiide : « Jesaja einnostii riekta din guoktilaččaid birra , nugo lea čállojuvvon : Dát álbmot gudnejahttá mu baksamiiguin , muhto sin váibmu lea guhkkin mus eret .
Duššás sii bálvalit mu , dasgo dat maid sii oahpahit , leat olbmuid árbevierut .
Dii lehpet hilgon Ipmila báhkkomiid ja čuovvubehtet olbmuid árbevieruid . »
Ja son jotkkii : « Man čeahpit dii lehpet hilgut Ipmila báhkkomiid , vai beassabehtet čuovvut iežadet árbevieruid !
Movsses lea gal cealkán : Don galggat gudnejahttit áhčát ja eatnát , ja : Dat guhte garuha áhčis dahje eatnis , galgá jápmit .
Muhto dii oahpahehpet ná : Jos guhtege dadjá áhččásis dahje eadnásis : Dat maid don galggašit oažžut mus veahkkin , lea korban , dat mearkkaša attáldat tempelii , de ehpet suova su veahkehit iežas áhči dahje eatni .
Nie dahkabehtet Ipmila sáni duššin árbevieruideattet dihtii maid lehpet čuvvon ja oahpahan .
Ja dii dahkabehtet ollu eará dakkár daguid . »
Son gohčui fas olmmošjoavkku lusas ja celkkii : « Guldalehket buohkat mu ja áddejehket !
Ii mihkkege mii boahtá olbmo sisa olggobealde , daga su buhtismeahttumin .
Muhto dat mii manná olggos olbmos , dahká olbmo buhtismeahttumin . »
Geas ležžet bealjit , son gullos !
Go son lei boahtán muhtun vissui ja guođđán joavkku , de máhttájeaddjit jerre sus dán veardádusa birra .
Ja son celkkii sidjiide Ii han dat boađe váibmui , muhto manná čoavjái ja dasto luonddu mielde olggos fas . »
Dainna son dagai čielggasin ahte buot borramuš lea buhtis .
Ja son lasihii : « Dat mii manná olggos olbmos , dahká olbmo buhtismeahttumin ! Dasgo siskkildasas , olbmo váimmus , bohtet bahás jurdagat : fuorrávuohta , suolavuohta , olmmošgoddin , náittosdilirihkkun , ruhtaváibmilvuohta , bahávuohta , behtolašvuohta , badjelmearálašvuohta , gáđašvuohta , bilkádus , čeavláivuohta ja jierpmehisvuohta .
Buot dát bahát bohtet siskkildasas ja dahket olbmo buhtismeahttumin . »
Jesus vulggii fas doppe ja bođii Tyrosa guovlluide .
Doppe son manai guossin muhtun dállui ii ge hálidan ovttage diehtit dan , muhto dat ii lean čiegadeames .
Muhtun dan guovllu nissonis lei nieida geas lei buhtismeahttun vuoigŋa . Dakkaviđe go son gulai Jesusa birra , de bođii ja luoitádii Jesusa julggiid ovdii .
Dát nisu lei báhkin syrialaš-fenikialaš nális .
Son dáhtui Jesusa ádjit olggos bahá vuoiŋŋa nieiddas , muhto Jesus celkkii sutnje : « Divtte mánáid vuos gallánit .
Ii leat riekta váldit láibbi mánáin ja bálkestit dan beatnagiidda . »
Nisu vástidii : « Hearrá , dat lea duohta , muhto beatnagaččat ge beavddi vuolde borret mánáid bázahas moaluid . »
De Jesus celkkii sutnje : « Go don vástidit ná , de mana ruoktot ; bahá vuoigŋa lea vuolgán nieiddastat . »
Nisu manai ruoktot ja gávnnai mánás veallámin seaŋggas ; bahá vuoigŋa lei guođđán su .
Dasto Jesus guđii fas Tyrosa guovlluid ja vulggii Sidona ja Dekapolisa guovlluid čađa Galileajávrái .
Doppe sii dolvo su lusa olbmá gii lei bealjeheapmi ja illá sáhtii hállat , ja sii dáhtto su bidjat gieđa su ala .
Jesus válddii olbmá mielddis guovttágaskan olmmošjoavkkus eret .
Son bijai suorpmaidis su beljiide , čolgadii ja guoskkahii su njuokčama ; de loktii čalmmiidis almmi guvlui , šuohkihii ja celkkii sutnje : « Effata ! »
– dat mearkkaša : « Rahpas ! »
Dallánaga olbmá bealjit rahpasedje , ja njuovčča čovdojuvvui , nu ahte son hálai čielgasit .
Jesus gilddii sin muitaleames geasage dán birra , muhto mađe eanebut son gilddii , dađe eanebut sii almmuhedje dan .
Olbmot imaštalle sakka ja dadje : « Buot maid son lea dahkan , lea buorre . Son dahká bealjehemiid gullin ja gielahemiid hállin . »
Dán áiggi dáhpáhuvai fas ahte stuora olmmošjoavku lei čoagganan , ii ge sis lean maid borrat .
De Jesus gohčui máhttájeddjiidis lusas ja celkkii : « Mun árkkášan njuorrasit dáid olbmuid , dasgo sii leat leamaš mu luhtte juo golbma beaivvi , ii ge sis leat maid borrat .
Jos mun vuolggahan sin borakeahttá ruoktot , de vuoimmehuvvet mátkkis , ja muhtumat han bohtet guhkkin ge . »
Su máhttájeaddjit vástidedje : « Gos mii fidnet nu ollu láibbiid gallehit buot dáid dáppe meahcis ? »
Son jearai sis : « Galle láibbi dis leat ? »
Sii vástidedje : « Čieža . »
Dalle son gohčui olbmuid čohkánit eatnamii .
De válddii dan čieža láibbi , rohkadalai giittusrohkosa , doadjalii daid ja attii máhttájeddjiide , vai sii juogadivčče daid , ja sii juogadedje daid olmmošjovkui .
Sis ledje moadde smávva guoláža ge .
Son buressivdnidii daid ja gohčui daid ge juogaduvvot .
Sii boradedje ja gallánedje .
Maŋŋil čohkkejuvvojedje báhcán bihtát , čieža veaddelihti .
Das ledje sullii njealljeduhát olbmo .
Son luittii sin mannat ja manai dasttán fatnasii máhttajeddjiidisguin ja bođii Dalmanuta guovlluide .
Farisealaččat bohte ja ákkastallagohte suinna .
Geahččalan dihtii su sii dáhtto sus mearkka almmis .
Dalle son šuohkihii lossadit ja celkkii : « Manne gáibida dálá sohkabuolva mearkka ?
Duođaid , mun cealkkán didjiide : Dát sohkabuolva ii oaččo makkárge mearkka . »
De son guđii sin , manai fas fatnasii ja vulggii nuppi beallái jávrri .
Máhttájeaddjit ledje vajáldahttán váldimis láibbi . Sis lei dušše okta láibi mielde fatnasis .
Jesus rávvii sin : « Váruhehket farisealaččaid suvrradáiggis ja Herodesa suvrradáiggis ! »
Muhto sii árvališgohte gaskaneaset ahte sis ii lean láibi .
Jesus fuomášii dán ja celkkii sidjiide : « Manne dii árvalehpet gaskaneattet ahte dis ii leat láibi ?
Ehpet go árvit dahje ádde velá maidege ?
Leat go din váimmut nu buoššuduvvon ?
Leat go dis čalmmit ehpet ge oainne ? Leat go dis bealjit ehpet ge gula ?
Ehpet go muitte galle veaddelihti dievva dii čohkkiidet báhcán láibebihtáid go mun doadjalin dan vihtta láibbi ja adden daid viđa duhát olbmui ? »
Sii vástidedje : « Guoktenuppelohkái . »
« Ja go doadjalin dan čieža láibbi dan njealji duháhii , galle veaddelihti dievva dii dalle čohkkiidet láibebihtáid ? »
Sii vástidedje : « Čieža . »
De son celkkii sidjiide : « Ehpet ge velá ádde ? »
Sii bohte Betsaidai , ja muhtumat bukte čalmmehis olbmo Jesusa lusa ja dáhtto Jesusa guoskkahit su .
Son válddii čalmmeheami gihtii ja láidii su gávpoga olggobeallái .
De čolggai su čalmmiide ja bijai gieđaidis su ala ja jearai sus : « Oainnát go maidege ? »
Son geahčai bajás ja vástidii : « Mun oainnán olbmuid , dasgo mun oainnán dego muoraid váccašeamen . »
Jesus bijai fas gieđaidis su čalmmiid ala ; dál čielggai oaidnu , ja olmmái lei buoriduvvon ja oinnii buot čielgasit .
Jesus vuolggahii su ruoktot ja celkkii : « Ale mana gávpogii ! »
Jesus ja su máhttájeaddjit vulge Cæsarea Filippi biras giliide .
Váccedettiin son jearai máhttájeddjiinis : « Geanin olbmot dadjet mu ? »
Sii vástidedje : « Muhtumat dadjet gásttašeaddji Johanassan , earát dadjet Elian , ja earát gis dadjet muhtumin profehtain . »
Son jearai : « Naba dii , geanin dii dadjabehtet mu ? »
Biehtár vástidii sutnje : « Don leat Messias . »
Muhto son gilddii sin garrasit muitaleames dán geasage .
Dasto Jesus oahpahišgođii sidjiide ahte Olbmobárdni ferte gillát ollu , ja vuorrasat , bajitbáhpat ja čálaoahppavaččat áigot hilgut su . Son goddojuvvo , muhto bajásčuožžila golmma beaivvi geažes .
Dán birra son sártnui njulgestaga .
De Biehtár válddii su sierra ja cuiggodišgođii su .
Muhto Jesus jorggihii ja geahčai máhttájeddjiidasas ja celkkii garrasit Biehtárii : « Sáhtán , gáidda mu duohkái !
Dasgo du jurdagat eai leat Ipmila jurdagat , muhto olbmuid jurdagat . »
Jesus gohčui olmmošjoavkku ja máhttájeddjiidis lusas ja celkkii sidjiide : « Jos guhtege dáhttu boahtit mu maŋis , de biehttalehkos iežas , váldos ruossas ja čuvvos mu .
Dasgo dat guhte viggá gádjut heakkas , massá dan . Muhto dat guhte massá heakkas mu ja evangeliuma dihtii , gádju dan .
Mii ávkkiid lea olbmui jos vuoitá ge oppa máilmmi , muhto massá heakkas ?
Maid olmmoš sáhttá addit buhtadussan heakkas ovddas ?
Dat guhte heahpanaddá mus ja mu sániin dán oskkáldasmeahttun ja suttolaš sohkagottis , sus heahpana Olbmobárdni ge go son boahtá Áhčis hearvásvuođas bassi eŋgeliiguin . »
Ja son lasihii : « Duođaid , mun cealkkán didjiide : Muhtumat sis geat leat čuožžumin dás , eai muosát jápmima ovdal go oidnet ahte Ipmila riika lea boahtán fámuin . »
Guhtta beaivvi das maŋŋil Jesus válddii fárrosis Biehtára , Jáhkoba ja Johanasa ja doalvvui sin alla várrái gos sii ledje iehčanassii .
Doppe son nuppástuvai sin čalmmiid ovddas , ja su biktasat šadde šearradin , vielgadeabbon go giige eatnama alde sáhtášii báitohit daid .
Elia oktan Movssesiin iđii sin ovdii , ja soai sártnodeigga Jesusiin .
De Biehtár báhkkoda Jesusii : « Rabbi , lea buorre go mii leat dáppe .
Ceggejehkot golbma goađi , ovtta dutnje , ovtta Movssesii ja ovtta Eliai . »
Son ii diehtán maid son galggai dadjat , dasgo sii ledje suorganan sakka .
Dan seammás bođii balva ja suoivvanasttii sin , ja jietna gullui balvvas : « Dát lea mu Bárdni , gean mun ráhkistan .
Guldalehket su ! »
Ja fáhkkestaga go sii geahčastedje birraseaset , eai oaidnán šat ovttage iežaset luhtte earet Jesusa okto .
Njiejadettiin váris Jesus gilddii sin muitaleames geasage maid sii ledje oaidnán , ovdal go Olbmobárdni lei bajásčuožžilan jábmiid luhtte .
Sii vurkejedje dán sáni ja árvaledje gaskaneaset maid mearkkašii bajásčuožžilit jábmiid luhtte .
Ja sii jerre sus : « Manne čálaoahppavaččat dadjet ahte Elia vuos ferte boahtit ? »
Son vástidii : « Elia gal boahtá vuos ja ráhkada visot gárvvisin .
Muhto manne de lea čállojuvvon Olbmobártni birra ahte son gártá gillát ollu ja badjelgehččojuvvot ?
Mun cealkkán didjiide ahte Elia lea juo boahtán , ja sii dahke sutnje maid hálidedje , nugo lea čállojuvvon su birra . »
Go sii máhcce eará máhttájeddjiid lusa , de oidne stuora olmmošjoavkku čoagganan sin birra ja muhtun čálaoahppavaččaid nákkáhallamin áŋgirit singuin .
Go olbmot áice Jesusa , de hirpmástuvve ja viehkaledje su lusa dearvvahit su .
Son jearai sis : « Man birra nákkáhallabehtet ? »
Muhtun olmmái olmmošjoavkkus vástidii : « Oahpaheaddji , mun lean buktán bárdnán du lusa ; sus lea vuoigŋa mii dahká su gielaheapmin .
Go dat dohppe su , de dat bálkesta su veallut , ja son soalssida ja gižaha bániid ja stirdu .
Mun sihten du máhttájeddjiid ádjit olggos dan , muhto eai sii veadján dahkat dan . »
De Jesus vástidii : « Eahpeoskkolaš sohkagoddi !
Man guhká mun ferten leat din luhtte ?
Man guhká ferten gierdat din ?
Buktet bártni deike mu lusa ! »
Sii bukte su Jesusa lusa , muhto dan seammás go vuoigŋa oinnii Jesusa , de gaikugođii bártni , nu ahte son gahčai eatnamii ja fieradii soalssidettiin .
Jesus jearai su áhčis : « Man guhká son lea leamaš diekkár ? »
Áhčči vástidii : « Gitta mánnávuođa rájes . Máŋgga háve vuoigŋa lea bálkestan su sihke dollii ja čáhcái goddin dihtii su .
Muhto jos don veaját maidege , de árpmit min ja veahket min ! »
Jesus celkkii sutnje : « Jos veaján ?
Buot lea vejolaš dasa guhte osku . »
Dallánaga čurvii bártni áhčči : « Mun oskkun , veahket mu eahpeoskkustan ! »
Go Jesus oinnii olmmošjoavkku čoahkkaneamen iežas birra , de šiggugođii buhtismeahttun vuoiŋŋa ja celkkii : « Gielahis ja bealjehis vuoigŋa , mun gohčun du : Vuolgge sus , ale ge goassege šat mana su sisa ! »
Dalle dat bárggádii , gaikulii bártni ja vulggii sus .
Bárdni šattai dego livččii jápmán , ja eatnagat dadje : Son lea jápmán .
Muhto Jesus válddii su gihtii ja veahkehii su julggiid ala , ja son čuožžilii .
Go Jesus lei boahtán vissui , de su máhttájeaddjit jerre sus iehčanassii : « Manne mii eat veadján ádjit olggos dan ? »
Son vástidii : « Dát šládja ii sáhte áddjojuvvot olggos earet rohkosiin . »
Sii vulge eret doppe ja vádjoledje Galilea čađa .
Jesus ii dáhtton earáid diehtit dan , dasgo son lei oahpaheamen máhttájeddjiidis .
Son celkkii sidjiide : « Olbmobárdni addojuvvo olbmuid gieđaide , ja sii goddet su , ja go son lea goddojuvvon , de bajásčuožžila golmma beaivvi geažes . »
Muhto sii eai ádden dán eai ge duostan jearrat sus .
Sii jovde Kapernaumii , ja go Jesus lei boahtán ruoktot , de jearai sis : « Maid dii hálešteiddet mátkkis ? »
Muhto sii orro jávohaga , dasgo sii ledje háleštan dan birra gii lea stuorimus .
De son čohkánii , gohčui dan guoktenuppelohkása lusas ja celkkii sidjiide : « Jos guhtege hálida leat vuosttamuš , de ferte leat buot maŋimuš ja buohkaid bálvaleaddji . »
De válddii uhca mánáža ja divui dan sin gaskii , salastii dan ja celkkii sidjiide : « Dat guhte vuostáiváldá dákkár uhca mánáža mu nammii , vuostáiváldá mu .
Ja dat guhte vuostáiváldá mu , ii vuostáiváldde mu , muhto su gii lea vuolggahan mu . »
Johanas dajai sutnje : « Oahpaheaddji , mii oinniimet muhtuma ádjimin olggos bahá vuoiŋŋaid du nammii , ja mii geahččaleimmet hehttet su , go son ii leat min searvvis . »
Muhto Jesus vástidii : « Allet hehtte su !
Dasgo ii oktage gii dahká oavdudagu mu nammii , sártno dallánaga baháid mu birra .
Dat guhte ii leat min vuostái , lea min beale .
Dat guhte addá didjiide guvssidievva čázi juhkat danne go dii gullabehtet Kristusii , duođaid , mun cealkkán didjiide : Son ii eisege masse bálkkás .
Muhto sutnje gii vearránahttá ovtta dain uhcahaččain geat oskot munnje , livččii buoret jos millogeađgi heaŋggastuvvošii su čeabeha birra , ja son bálkestuvvošii merrii .
Jos du giehta vearránahttá du , de čuohpa dan eret !
Dutnje lea buoret mannat lámisin eallimii go mannat helvehii guvttiin gieđain , čáskatmeahttun dollii , gos máhtu ii jáme ii ge dolla čáskaduvvo .
Jos du juolgi vearránahttá du , de čuohpa dan eret !
Dutnje lea buoret mannat skierbmán eallimii go mannat helvehii guvttiin julggiin , gos máhtu ii jáme ii ge dolla čáskaduvvo .
Ja jos du čalbmi vearránahttá du , de gaikkit dan olggos !
Dutnje lea buoret mannat čalbmetbeallin Ipmila riikii go bálkestuvvot helvehii guvttiin čalmmiin , gos máhtu ii jáme ii ge dolla čáskaduvvo .
Dasgo juohkehaš sáltejuvvo dolain , ja juohke oaffar sáltejuvvo sálttiin .
Sálttit leat ávkkálaččat , muhto jos sálttit veagahuvvet , mainna dalle sáhttá sáltet ?
Atnet sálttiid duohkineattet , ja dollet ráfi gaskaneattet ! »
Jesus vulggii eret doppe ja bođii Judeai Jordana nuortaguovlluide .
Olmmošjoavkkut čoagganedje ohpit su lusa , ja son oahpahii sin nugo lávii .
Maiddái farisealaččat ge bohte , ja sii jerre geahččalan dihtii su : « Lea go boatnjás lohpi earránit áhkástis ? »
Son vástidii sidjiide : « Maid Movsses lea gohččon din ? »
Sii dadje : « Movsses lea mieđihan boatnjá čállit earrogirjji ja earránit áhkás . »
De son celkkii sidjiide : « Movsses čálii dán mearrádusa danne go dis leat nu garra váimmut .
Muhto sivdnideami álggus Ipmil sivdnidii sudno olmmájin ja nisun .
Dan dihtii olmmái guođđá áhčis ja eatnis , ja bissu áhkás luhtte , ja dat guovttis šaddaba oktan oažžin .
De eaba leat šat guovttis , muhto okta .
Maid Ipmil nappo lea ovttastahttán , dan ii olmmoš galgga earuhit . »
Go sii bohte fas ruoktot , de máhttájeaddjit jerre sus dán birra , ja son celkkii sidjiide : « Dat gii earrána áhkástis ja náitala ođđasis , dahká náittosrihkkuma su vuostái . Ja jos nisu earrána boatnjástis ja náitala ođđasis , de dahká náittosrihkkuma . »
Sii gudde uhca mánážiid Jesusa lusa vai son guoskkahivččii daid , muhto máhttájeaddjit šiggo sin .
Go Jesus oinnii dan , de moaráhuvai ja celkkii sidjiide : « Diktet uhca mánážiid boahtit mu lusa , allet ge hehtte sin ! Dasgo Ipmila riika gullá dakkáraččaide .
Duođaid , mun cealkkán didjiide : Dat guhte ii vuostáiváldde Ipmila riikka nugo uhca mánáš , ii eisege beasa dan sisa . »
Ja son válddii sin sallasis , bijai gieđaidis sin ala ja buressivdnidii sin .
Go Jesus lei vuolgimin , de bođii muhtun olmmái viega , luoitádii su ovdii ja jearai : « Buorre oahpaheaddji , maid mun galggan dahkat vai árbešin agálaš eallima ? »
Jesus vástidii : « Manne don gohčodat mu buorrin ?
Ii oktage leat buorre , earet go Ipmil .
Don dovddat báhkkomiid : It galgga goddit , it galgga rihkkut náittosdili , it galgga suoládit , it galgga cealkit vearreduođaštusaid , it galgga ovttage beahttit , don galggat gudnejahttit áhčát ja eatnát . »
Olmmái dajai sutnje : « Oahpaheaddji , buot dáid mun lean doallan nuorravuođa rájes juo . »
Jesus geahčai sutnje ja anii su ráhkisin ja celkkii : « Velá okta váilu dus : Mana dál ja vuovdde buot opmodagat , ja atte visot váivvážiidda . Dalle oaččut dávvira almmis .
Boađe dasto ja čuovo mu ! »
Muhto son šattai lossa millii dán vástádusa dihtii ja manai eret moraš mielain , dasgo son lei hui rikkis .
Jesus geahčai birrasis ja celkkii máhttájeddjiidasas : « Man váttis lea sidjiide geain lea ollu opmodat , beassat Ipmila riikii . »
Máhttájeaddjit imaštalle Jesusa sániid . Muhto son geardduhii : « Mánát , man váttis lea beassat Ipmila riikii sidjiide geat luhttet riggodagaidasaset !
Lea álkit kamelii mannat nállošalmmi čađa go riggái beassat Ipmila riikii . »
De sii hirpmástuvve vel eanebut ja dadje guhtet guoibmáseaset : « Gii dalle sáhttá bestojuvvot ? »
Jesus geahčai sidjiide ja celkkii : « Olbmuide gal lea veadjemeahttun , muhto ii Ipmilii .
Ipmilii buot lea vejolaš . »
De Biehtár sártnui sutnje : « Mo dalle mii ? Mii leat guođđán visot ja čuvvon du »
Jesus vástidii sutnje : « Duođaid , mun cealkkán didjiide : Juohkehaš gii lea guođđán ruovttus dahje vieljaid dahje oappáid dahje eatni dahje áhči dahje mánáid dahje bealdduid mu ja evangeliuma dihtii , son oažžu čuođigeardásaččat ruoktot ; dáppe dálá máilmmis oažžu ruovttu , vieljaid , oappáid , etniid , mánáid ja bealdduid , ja velá doarrádallamiid ge , ja agálaš eallima boahttevaš máilmmis .
Muhto olusat geat leat vuosttažat , šaddet maŋimužžan , ja maŋimuččat vuosttamužžan . »
Sii ledje dál jođus bajás Jerusalemii , ja Jesus manai sin ovddabeale .
Máhttájeaddjit ledje suorganan , ja sii geat čuvvo mielde , balle .
Dalle son válddii fas dan guoktenuppelohkása sierra ja sárdnugođii sidjiide dan birra mii galggai dáhpáhuvvat sutnje : « Gehččet , mii mannat bajás Jerusalemii , ja Olbmobárdni addojuvvo bajitbáhpaid ja čálaoahppavaččaid gieđaide .
Sii dubmejit su jápmimii ja addet su báhkiniid háldui , ja sii bilkidit ja čolget su , spihččejit su ja časket su jámas . Ja golmma beaivvi geažes son bajásčuožžila . »
Jáhkot ja Johanas , Sebedeusa bártnit , manaiga ovdan Jesusa lusa ja dajaiga : « Oahpaheaddji , moai siđašeimme du dahkat munnuide juoidá . »
Jesus jearai : « Maid sihtabeahtti mu dahkat dudnuide ? »
Soai vástideigga : « Divtte munno čohkkát du bálddas hearvásvuođastat , nubbi olgeš gieđat bealde ja nubbi gis gurut gieđat bealde . »
Jesus celkkii sudnuide : « Eahppi doai dieđe maid sihtabeahtti .
Sáhttibeahtti go juhkat dan geara man mun jugan , dahje gásttašuvvot dainna gásttain mainna mun gásttašuvvon ? »
Soai vástideigga : « De sáhtte . »
Jesus celkkii sudnuide : « Dan geara man mun jugan , šaddabeahtti doai ge juhkat , ja dainna gásttain mainna mun gásttašuvvon , šaddabeahtti doai ge gásttašuvvot .
Muhto mun in mearrit saji olgeš dahje gurut giehtan bealde ; dat lea sidjiide geaidda dat lea mearriduvvon . »
Go dat logis gulle dán , de moaráhuvvagohte Jáhkobii ja Johanassii .
Muhto Jesus gohčui sin lusas ja celkkii : « Dii diehtibehtet ahte sii geat adnojit ráđđejeaddjin , leat álbmogiid hearrát , ja ahte sin riikkaid bajimuččat dollet álbmogiid garra válddi vuolde .
Nu ii galgga leat din gaskkas .
Muhto dat guhte din gaskkas áigu leat stuoris , galgá leat din bálvaleaddji , ja dat guhte din gaskkas áigu leat njunušin , galgá leat buohkaid šlávva .
Dasgo Olbmobárdni ii leat boahtán bálvaluvvot , muhto bálvalit ja addit heakkas lonástussan eatnagiid ovddas . »
Sii bohte Jerikoi , ja go Jesus vulggii gávpogis máhttájeddjiidisguin ja stuora olmmošjoavkkuin , de Bartimeus , Timeusa bárdni , čalmmehis gearjideaddji , lei čohkkámin geaidnoguoras .
Go son gulai ahte das lei nasaretlaš Jesus , de čuorvugođii : « Jesus , Dávveda bárdni , árpmit mu ! »
Olusat šiggo su vai son jávohuvašii , muhto son čuorvvui vel jitnoseabbot : « Dávveda bárdni , árpmit mu ! »
De Jesus orustii ja celkkii : « Rávket su deike ! »
Sii rávke čalmmeheami ja dadje sutnje : « Leage dorvvolaš !
Čuožžil ! Son rávká du »
Olmmái nuolastii eret olgguldasbiktasis , njuikii bajás ja bođii Jesusa lusa . Jesus jearai sus : « Maid don dáhtut mu dahkat alccesat ? »
Čalmmeheapmi vástidii : « Rabbuni , attášit munnje oainnu ! »
Jesus celkkii sutnje : « Vázzil ! Du osku lea beastán du »
Dallánaga son oaidnigođii , ja son čuovui Jesusa mátkkis .
Go sii lahkanedje Jerusalemii ja bohte Betfagii ja Betaniai Oljovári vuolde , de Jesus vuolggahii guoktása máhttájeddjiinis ja celkkii sudnuide : « Manni gillái mii lea dudno ovdalis !
Dallánaga go boahtibeahtti dohko , de gávdnabeahtti čadnojuvvon ásenvárssá man alde ii leat vel oktage olmmoš čohkkán .
Čoavdi dan ja bukti deike !
Ja jos oktage jearaš dudnos manne doai dahkabeahtti dan , de vástideahkki : Hearrá dárbbaša dan , ja son vuolggaha dan dakkaviđe fas deike . »
Soai vulggiiga ja gávnnaiga várssá čadnojuvvon uksagurrii olgun geainnu alde , ja soai čoavdigođiiga dan .
Muhtumat geat ledje čuožžumin das , jerre sudnos : « Maid doai dahkabeahtti ?
Čoavdibeahtti go várssá ? »
Soai vástideigga nugo Jesus lei gohččon , ja sii luite sudno mannat várssáin .
De doalvvuiga várssá Jesusa lusa ja lebbiiga olgguldasbiktasiiddiska dan ala , ja son čohkánii dan ala .
Olusat lebbo biktasiiddiset geainnu ala , earát čuhppe lastaovssiid gittiin ja duorggastedje geainnu .
Ja sii guđet vázze ovddas ja čuvvo maŋis , čurvo : Hosianna !
Buresivdniduvvon lehkos son guhte boahtá Hearrá nammii !
Buressivdniduvvon lehkos min áhči Dávveda riika mii lea boahtimin !
Hosianna allagasas !
Nu Jesus bođii Jerusalemii ja manai tempelšilljui .
Doppe geahčadii visot , muhto go lei juo oalle maŋŋit , de son manai olggos Betaniai guoktenuppelot máhttájeddjiinis .
Nuppi beaivvi go sii vulge Betanias , de Jesus nealgugođii .
Guhkkin juo oinnii fiikkonmuora lasttaiguin , ja son vulggii geahččat leat go das šattut .
Muhto go bođii dan lusa , de ii gávdnan das eará go lasttaid , dasgo ii lean fiikkoniid áigi .
Son celkkii murrii : « Ii oktage galgga goassege šat borrat du šattuid . »
Su máhttájeaddjit gulle dán .
Go sii bohte Jerusalemii , de Jesus manai tempelšilljui ja ádjigođii eret sin geat ledje vuovdimin ja oastimin doppe .
Son gomihii ruhtacuvkeheddjiid bevddiid ja duvvávuvdiid beaŋkkaid ii ge suovvan geange guoddit maidege tempelšilju rastá .
Ja son oahpahii sin : « Ii go leat čállojuvvon : Mu viessu gohčoduvvo buot olmmoščearddaid rohkadallanviessun ?
Muhto dii lehpet dahkan dan rievvárbiedjun . »
Bajitbáhpat ja čálaoahppavaččat gulle dán , ja sii árvaledje mo sáhtášedje goddit su , dasgo sii balle sus , danne go buot olbmot ovddošedje sakka su oahpu .
Eahkedis Jesus ja su máhttájeaddjit manne olggos gávpogis .
Nuppi iđida sii vázze fiikkonmuora meattá ja oidne ahte dat lei ástan gitta ruohttasa rájes .
Biehtár muittii dan mii lei dáhpáhuvvan ja dajai Jesusii : « Rabbi , geahča ! Fiikkonmuorra man don garuhit , lea ástan ! »
Jesus vástida sidjiide : « Oskot Ipmilii !
Duođaid , mun cealkkán didjiide : Dat guhte dadjá dán várrái : Loktan ja bálkestahte iežat merrii !
ii ge eahpit váimmustis , muhto osku ahte dat maid son dadjá , dáhpáhuvvá , sutnje dat dáhpáhuvvá .
Danne mun cealkkán didjiide : Buot dan maid dii átnubehtet rohkadaladettiin , oskot ahte dii lehpet juo ožžon dan , de oažžubehtet .
Muhto go dii čuožžubehtet rohkadallamin , de addet ándagassii jos dis lea mihkkege unohasvuođaid guđege vuostái , vai maiddái din Áhčči almmis attášii didjiide ándagassii din rihkkumiid .
Muhto jos ehpet atte ándagassii , de almmálaš Áhččádet ge ii atte didjiide ándagassii din rihkkumiid . »
Sii bohte fas Jerusalemii .
Go Jesus lei vázzimin tempelšiljus , de bajitbáhpat , čálaoahppavaččat ja vuorrasat bohte su lusa ja jerre : « Gean fámuin dagat don dán ?
Dahje gii lea addán dutnje fámu dahkat dán ? »
Jesus vástidii sidjiide : « Mus lea gažaldat didjiide ; vástidehket dan , de mun cealkkán didjiide gean fámuin mun dagan dán .
Johanasa gásta , bođii go dat almmis vai olbmuin ?
Vástidehket munnje dan ! »
Dán sii árvaladde gaskaneaset : « Jos mii vástidit : Almmis , de son jearrá : Manne dalle ehpet oskon sutnje ?
Vai sáhttit go mii vástidit : Olbmuin ? »
Muhto dan sii eai duostan olbmuid dihtii , go juo buohkat oaivvildedje ahte Johanas duođaid lei profehta .
Danne sii vástidedje : « Mii eat dieđe . »
De Jesus celkkii sidjiide : « De in mun ge cealkke didjiide gean fámuin mun dagan dán ! »
Jesus sárdnugođii sidjiide veardádusaiguin : « Olmmái gilvvii viidnegárddi ja áiddui dan , rokkai viidneduolmmahaga ja huksii geahččotoartna .
Dasto son láigohii viidnegárddis viidnegárdebargiide ja vulggii olgoriikii .
Go áigi dievai , de son vuolggahii muhtun bálvaleaddji viidnegárdebargiid lusa , vai oččošii oasis viidnegárddi šattuin .
Muhto sii válde su gitta , cábme su ja luite su mannat ruoktot guoros gieđaid .
Maŋŋil son vuolggahii nuppi bálvaleaddji sin lusa ; su sii časke oaivái ja hiddjidedje .
De son vuolggahii nuppi vel ; su sii godde .
Ja son vuolggahii eatnat earáid ; muhtumiid sii cábme , ja muhtumiid gis godde .
Dál sus lei dušše okta vel , iežas ráhkis bárdni .
Loahpas son vuolggahii bártnis sin lusa , dasgo son jurddašii : Mu bártni sii goittot atnet árvvus .
Muhto viidnegárdebargit dadje guhtet guoibmáseaset : Diet lea árbbolaš !
Bohtet , goddot su , de mii oažžut su árbbi .
Sii dohppejedje ja godde su ja bálkestedje olggos viidnegárddis .
Maid dál viidnegárdeisit dahká ?
Son boahtá ja duššada viidnegárdebargiid ja addá viidnegárddi earáide .
Ehpet go leat lohkan dán čálasáni : Dat geađgi man huksejeaddjit hilgo , lea šaddan váldočiehkageađgin .
Dat lea Hearrá iežas dahku ja dat lea ovddolaš min čalmmiide . »
Ráđđehearrát vigge váldit su gitta , muhto balle olbmuin . Sii áddejedje ahte son muitalii dán veardádusa sin vuostái .
Dan dihtii sii guđđe su ja manne eret .
Dasto sii bidje su lusa muhtun farisealaččaid ja herodialaččaid , vai sii gielašedje su sániiguin .
Sii bohte ja dadje : « Oahpaheaddji , mii diehtit ahte don leat vuoiggalaš it ge beroš das maid earát oaivvildežžet .
Dasgo don it geahča olbmo hámi beallái , muhto oahpahat Ipmila geainnu duohtavuođa mielde .
Muital midjiide : Lea go riekta máksit vearu keaisárii vai ii ?
Galgat go mii máksit vai eat ? »
Muhto Jesus dovddai sin guoktilašvuođa ja celkkii sidjiide : « Manne dii geahččalehpet mu ?
Buktet munnje denara vai beasan geahččat dan ! »
Sii adde sutnje dan , ja son jearai : « Gean govva ja namma lea dás ? »
Sii vástidedje : « Keaisára . »
De Jesus celkkii sidjiide : « Addet keaisárii dan mii keaisárii gullá , ja Ipmilii dan mii Ipmilii gullá ! »
Ja sii ovddošedje su sakka .
De bohte Jesusa lusa muhtun saddukealaččat , guđet čuoččuhit ahte ii leat bajásčuožžileapmi , ja sii jerre sus : « Oahpaheaddji ! Movsses lea čállán midjiide ahte jos muhtumis lea viellja gii jápmá ja sus báhcá áhkká ii ge oktage mánná , de galgá son náitalit leaskkain ja addit vielljasis náli .
Ledje čieža vieljaža .
Vuosttaš válddii alccesis áhká , muhto jámii mánáheapmin .
De nubbi náitalii leaskkain , muhto son ge jámii mánáheapmin , ja nu goalmmát ge .
Ii oktage dan čiehččasis ožžon máná .
Loahpas jámii nisu ge .
Muhto go sii bajásčuožžilit bajásčuožžileami beaivvi , gean áhkká son de lea ?
Dasgo buot čiežas han leat leamaš náitalan suinna . »
Jesus vástidii : « Ehpet go čádjit danne go ehpet dovdda čállagiid ehpet ge Ipmila fámu ?
Dasgo go jábmit bajásčuožžilit , de eai náital eai ge náitojuvvo , muhto sii leat dego eŋgelat almmis .
Muhto ahte jábmit bajásčuoččáldahttojuvvojit , dan han gal lehpet lohkan Movssesgirjjis muitalusas bastilislánjá birra , mo Ipmil cealká Movssesii : Mun lean Abrahama Ipmil ja Issáha Ipmil ja Jáhkoba Ipmil .
Ii son leat jábmiid Ipmil , muhto ealli olbmuid Ipmil .
Dii lehpet ollásit čádjidan . »
Muhtun čálaoahppavaš gii gulai sin nákkáhallama ja fuomášii man bures Jesus lei vástidan , manai su lusa ja jearai : « Guhtemuš báhkkon lea buot mávssolaččamus ? »
Jesus vástidii : « Mávssolaččamus báhkkon lea dát : Gula , Israel ! Hearrá Ipmileamet , Hearrá lea áidna Ipmil ; ja don galggat ráhkistit Hearrá Ipmilat oppa váimmustat ja oppa sielustat ja oppa mielastat ja oppa fámustat .
Nubbi lea dát : Don galggat ráhkistit lagamuččat nugo iežat .
Ii mihkkege báhkkomiid leat stuorit go dát guokte . »
Čálaoahppavaš dajai sutnje : « Oahpaheaddji , dat lea riekta !
Lea duohta maid don cealkkát ahte Hearrá lea áidna Ipmil , ja ahte ii leat eará Ipmil go son .
Ja go ráhkista su oppa váimmus ja oppa jirpmiin ja oppa fámuin , ja go ráhkista lagamučča nugo iežas , de dat lea eanet veara go buot boaldinoaffarat ja njuovvanoaffarat . »
Jesus gulai man jierpmálaččat son vástidii ja celkkii sutnje : « Don it leat guhkkin eret Ipmila riikkas . »
Ii ge oktage duostan šat jearrat sus .
Oahpahettiin tempelšiljus Jesus sárdnugođii ja jearai : « Mo čálaoahppavaččat sáhttet dadjat ahte Messias lea Dávveda bárdni ?
Dávvet han ieš cealká Bassi Vuoiŋŋa bokte : Hearrá celkkii mu hearrái : Čohkán mu olgeš gieđa beallái , dassážii go mun bijan du vašálaččaid du julggiid vuollái .
Dávvet ieš nappo gohčoda Messiasa hearrán ; mo son de sáhttá leat Dávveda bárdni ? »
Ollu olbmot guldaledje su mielasteaset , ja oahpahettiin sin son celkkii : « Váruhehket čálaoahppavaččain ! Sii áinnas váccašit guhkes biktasiiguin ja hálidit ahte olbmot buorástahttet sin márkanšiljuin . Sii dáhttot čohkkát synagogaid buoremus sajiin ja boaššumusas go leat guossis .
Sii háhpohallet leaskkaid dáluid ja lohket guhkes rohkosiid .
Muhto sii ožžot dađe garraset duomu . »
Jesus čohkánii aiddo tempelbumbbá buohta ja oinnii mo olbmot bidje ruđaid bumbái .
Máŋga riggá adde ollu .
De bođii geafes leaska ge gii bijai guokte šlántte , moatti evrre veara .
Jesus gohčui máhttájeddjiidis lusas ja celkkii : « Duođaid , mun cealkkán didjiide : Dát geafes leaska lea addán eanet go buot earát geat bidje ruđaid tempelbumbái .
Dasgo sii buohkat adde valljivuođasteaset , muhto son attii geafivuođastis buot dan mii sus lei , buot dan maid son dárbbašii eallin várás . »
Go Jesus lei mannamin olggos tempelis , de muhtun su máhttájeddjiin dajai sutnje : « Oahpaheaddji ! Gea , makkár čáppa geađggit ja ráhkkanusat ! »
Jesus vástidii : « Oainnát go dáid stuora ráhkadusaid ?
Das ii báze geađgi geađggi ala , muhto visot gaikkoduvvo . »
Go son lei čohkkámin Oljováris tempela buohta , de Biehtár , Jáhkot , Johanas ja Ándaras jerre sus iehčanassii : « Muital midjiide goas dát dáhpáhuvvá , ja mii lea mearkan dasa ahte buot dát ollašuvvá ? »
Jesus sárdnugođii sidjiide : Váruhehket amas oktage čádjidahttit din !
Olusat bohtet mu nammii ja dadjet : « Mun dat lean ! » ja sii čádjidahttet olusiid .
Go dii gullabehtet soahtešláma ja sođiid birra , de allet dalle ballá !
Dasgo dát ferte dáhpáhuvvat , muhto loahppa ii leat velá boahtán .
Álbmot čuožžila álbmoga vuostái ja riika riikka vuostái , ja ollu báikkiin šaddet eatnandoarggástusat ja nealgi ge .
Dát lea dušše ávttaid álgu .
Váruhehket !
Sii addet din duopmostuoluide , spihččejit din synagogain ja dolvot din eananhearráid ja gonagasaid ovdii mu dihtii duođašteaddjin sidjiide .
Muhto evangelium ferte vuos sárdniduvvot buot álbmogiidda .
Go sii dolvot din ja addet din eiseválddiide , de allet moraš ovddalgihtii maid galggašeiddet sárdnut . Sárdnot dan mii addojuvvo didjiide dammanaga bottus ! Dasgo ehpet leat dii geat sárdnubehtet , muhto Bassi Vuoigŋa .
Viellja diktá vieljas dubmejuvvot jápmimii , ja áhčči mánás , ja mánát čuožžilit vánhemiiddiset vuostái ja diktet sin dubmejuvvot jápmimii .
Ja dii vašuhuvvobehtet mu nama dihtii .
Muhto dat guhte bissu nanusin gitta loahpa rádjái , bestojuvvo .
Go dii oaidnibehtet bilideaddji fastivuođa čuožžumin dakko gos dat ii galgga čuožžut – vuhtiiváldos lohkki dán ! – dalle fertejit sii geat leat Judeas , báhtarit váriide ; dat gii lea dáhki alde , ii galgga njiedjat viežžat maidege viesustis , ii ge dat gii lea bealddus galgga máhccat ruoktot viežžat biktasis .
Vuoi áhpehemiid ja njamaheddjiid daid beivviid !
Rohkadallet amadet dárbbašit báhtarit dálvet !
Dasgo daid beivviid šaddet dakkár áŧestusat mat eai leat leamaš dan rájes go Ipmil álggus sivdnidii máilmmi , ja mat eai šatta šat goassege .
Jos Hearrá ii oanidivčče daid beivviid , de ii gáddjojuvvoše oktage olmmoš .
Muhto sin dihtii geaid son lea válljen , lea son oanidan dan áiggi .
Jos oktage dadjá didjiide : « Gea , dá lea Messias ! » dahje : « Gea , duo son lea ! » de allet oskko dasa !
Dasgo vearri messiasat ja vearri profehtat čuožžilit ja dahket mearkkaid ja oavdudaguid jos de mat čádjidahtášedje sin geat leat válljejuvvon .
Váruhehket !
Mun lean cealkán didjiide buot ovddalgihtii .
Muhto daid beivviid , dán áŧestusa maŋŋil , beaivváš sevnnjoda ii ge mánnu báitte ; násttit gahččet vuolás almmis , ja almmi fámut lihkahuvvojit .
Dalle sii oidnet Olbmobártni boahtimin balvvain stuora fámuin ja hearvásvuođain .
Ja dalle son vuolggaha eŋgeliiddis ja čohkke njealji máilbmečiegas sin geaid son lea válljen , eatnama ravddas gitta almmi ravdii .
Ohppet veardádusa fiikkonmuoras : Go dan oavssit ožžot állosa ja lasttaid , de diehtibehtet ahte lea geassumin .
Nu diehtibehtet maiddái dii , go oaidnibehtet dán dáhpáhuvvamin , ahte son lea lahka ja čuožžumin uvssa ovddas .
Duođaid , mun cealkkán didjiide : Dát buolva ii noga ovdal go buot dát dáhpáhuvvet .
Albmi ja eanan duššet , muhto mu sánit eai goassege dušša .
Muhto dan beaivvi dahje diimmu ii oktage dovdda , eai almmi eŋgelat ii ge Bárdni , muhto duššefal Áhčči .
Váruhehket ja gohcet ! Dasgo dii ehpet dieđe goas dat áigi boahtá .
Dat lea dego olmmái gii manai olgoriikii . Go vuolgá ruovttustis , de addá dállodoalu bálvaleddjiidis háldui , juohkehaš oažžu sierra barggu , ja son gohčču uksafávtta gohcit .
Gohcet de ! Dasgo dii ehpet dieđe goas dáluisit boahtá , šaddá go eahkedis , gaskaija , vuoncávarrása biškunáiggi dahje iđedis .
Gohcet , amas son boahtit fáhkkestaga ja gávdnat din oađđimin .
Dan maid mun cealkkán didjiide , dan cealkkán buohkaide : Gohcet !
Beassážiidda ja suvrrokeahtes láibbiid basiide ledje guokte beaivvi .
Bajitbáhpat ja čálaoahppavaččat smihtte mo juonalašvuođain válddášedje ja gottášedje su .
Sii dadje : « Allot dattege fal basiid áiggi , amaset olbmot stuimmáskit . »
Go Jesus lei Betanias Simmon spihtálačča luhtte ja lei čohkkámin beavddis , de bođii sisa nisu geas lei buhtes ja divrras nardusvuoiddas alabástalihtis .
Son cuvkii lihti ja leikii vuoidasa Jesusa oaivvi badjelii .
Muhtumat geat ledje das , suhtte ja dadje guhtet guoibmáseaset : « Manne nie skihtarda vuoidasa ?
Livččii sáhttán vuovdit dan badjel golmmačuođi denarii ja addit ruđaid gefiide . »
Ja sii skuldojedje nissona .
Muhto Jesus celkkii : « Diktet su ráfis !
Manne dii vuorjabehtet su ?
Son lea dahkan munnje buori dagu .
Geafit gal leat álo din luhtte ja sidjiide sáhttibehtet dahkat buriid nu dávjá go dáhttubehtet , muhto mun in leat álo din luhtte .
Son dagai maid sáhtii . Ovddalgihtii son lea vuoiddadan mu rupmaša hávdádeami várás .
Duođaid , mun cealkkán didjiide : Gos ihkinassii oppa máilmmis evangelium sárdniduvvo , muitaluvvo maiddái dát dahku su muitun . »
Muhto Judas Iskariot , okta dan guoktenuppelohkásis , manai bajitbáhpaid lusa beahttin dihtii Jesusa .
Sii illosedje go gulle dan ja lohpidedje sutnje ruđaid , ja dan rájes son ohcagođii liibba beahttit Jesusa .
Suvrrokeahtes láibbiid basiid vuosttaš beaivvi , go beassášláppis njuvvojuvvui , máhttájeaddjit jerre sus : « Gosa don hálidat min mannat ráhkadit dutnje beassášmállásiid ? »
De son vuolggahii guokte máhttájeaddji ja celkkii sudnuide : « Manni gávpogii !
Doppe deaivabeahtti olbmá gii lea guoddimin čáhcelihti .
Čuovvu su , ja go son manná sisa , de daddji dáluisidii : Oahpaheaddji jearrá : Gos lea latnja gos mun beasašin borrat beassášmállásiid máhttájeddjiidanguin ?
De son čájeha dudnuide stuora lanja badjegearddis gos visot lea gárvvis .
Ráhkadeahkki midjiide mállásiid dohko . »
Máhttájeaddjiguovttos vulggiiga ja bođiiga gávpogii . Soai gávnnaiga buot nu mo Jesus lei cealkán ja ráhkadeigga beassášmállásiid .
Eahkedis Jesus bođii dohko dainna guoktenuppelohkásiin .
Go sii ledje čohkkámin beavddis boradeamen , de son celkkii : « Duođaid , mun cealkkán didjiide : Muhtun dis beahttá mu , muhtun gii lea boradeamen muinna . »
Dalle sii šlundo , ja okta nubbi jearragođii sus : « Almma mun gal in leat dat ? »
Muhto son vástidii : « Lea muhtun dán guoktenuppelohkásis , muhtun gii buonjosta lihtis muinna oktanaga .
Olbmobárdni vuolgá eret , nugo lea čállojuvvon su birra , muhto vuoi dan olbmo guhte beahttá Olbmobártni !
Dan olbmui livččii buoret jos son ii livčče goassege riegádan . »
Go sii ledje boradeamen , de Jesus válddii láibbi , rohkadalai giittusrohkosa , doadjalii dan , attii sidjiide ja celkkii : « Váldet dán , dát lea mu rumaš . »
Ja son válddii geara , giittii Ipmila , attii sidjiide , ja sii juhke buohkat das .
Son celkkii : « Dát lea mu varra , lihtu varra , mii golggahuvvo eatnagiid ovddas .
Duođaid , mun cealkkán didjiide : In juga šat viidnemuora šattus ovdal go dan beaivvi go jugan varas viinni Ipmila riikkas . »
Go sii ledje lávlon máidnunlávlaga , de manne olggos Oljovárrái .
Jesus celkkii sidjiide : « Dii buohkat vearránehpet mus , dasgo lea čállojuvvon : Mun časkkán geahčči , ja eallu bieđgana .
Muhto maŋŋil go mun lean bajásčuoččáldahttojuvvon , de manan din ovdalis Galileai . »
Biehtár dajai sutnje : « Vaikko buohkat vearránivčče dus , de mun goittot in goassege daga dan . »
Jesus vástidii : « Duođaid , mun cealkkán dutnje : Otná ija , ovdal go vuoncávaris biškkáda guktii , don biehttalat mu golbmii . »
Muhto Biehtár nannii velá garrasit : « Vaikko vel jámášin duinna , de in eisege biehttal du ! »
Aiddo nu buohkat dadje .
Sii bohte báikái man namma lea Getsemane , ja son celkkii máhttájeddjiidasas : « Čohkánehket dása dan boddii go mun rohkadalan ! »
De son válddii fárrosis Biehtára , Jáhkoba ja Johanasa , ja son doarggistišgođii ja ballagođii sakka .
Son celkkii sidjiide : « Mu siellu lea lossa morrašis jápmima rádjái .
Báhcet dása ja gohcet ! »
Son manai veahá guhkkelii , luoitádii eatnamii ja rohkadalai ahte dat diibmu manašii su meattá , jos livččii vejolaš .
Son celkkii : « Abba , Áhčážan !
Buot lea dutnje vejolaš .
Váldde mus eret dán geara !
Allos dattege šatta nugo mun dáhtun , muhto nugo don dáhtut . »
Son máhcai ja gávnnai sin oađđimin ja celkkii Biehtárii : « Simmon , oađát go ?
It go nagadan gohcit ovttage diimmu ?
Gohcet ja rohkadallet amadet šaddat geahččalussii !
Vuoigŋa gal lea geargat , muhto oažži lea headju . »
Son manai fas eret ja rohkadalai seammá sániiguin .
Go son bođii ruovttoluotta , de gávnnai sin fas oađđimin , dasgo sin čalmmit ledje lossadat nahkáriin , eai ge sii diehtán maid vástidit .
Son bođii sin lusa goalmmádassii ja celkkii : « Ain go lehpet oađđimin ja vuoiŋŋasteamen ?
Dál lea doarvi .
Diibmu lea boahtán . Olbmobárdni addojuvvo dál suttolaččaid gieđaide .
Čuožžilehket , vulgot !
Gehččet , son guhte beahttá mu , lea lahka . »
Dan seammás , go son lei ain sárdnumin , bođii Judas , okta dan guoktenuppelohkásis , ja su fárus joavku mas ledje miehkit ja soappit . Sii bohte bajitbáhpaid , čálaoahppavaččaid ja vuorrasiid luhtte .
Beahtti lei šiehtadan singuin mearkka : « Dat gean mun cummistan , son dat lea .
Váldet su ja dolvot su eret sihkkaris geahčuin . »
Ja go son bođii , de manai dan seammás Jesusa lusa ja dajai : « Rabbi ! » ja cummistii su .
De sii dohppejedje Jesusa ja válde su gitta .
Okta sis geat ledje das , rohttii miehkis ja čuolastii bajimušbáhpa bálvaleaddji ja čuohpai sus bealji eret .
Jesus celkkii sidjiide : « Dii lehpet vuolgán mihkiiguin ja soppiiguin váldit mu gitta , dego livččen rievvár .
Beaivválaččat ledjen dinguin ja oahpahin tempelšiljus , ehpet ge dii váldán mu gitta !
Muhto dát dáhpáhuvai vai čállagat ollašuvašedje . »
De buohkat guđđe su ja báhtaredje .
Muhtun nuorra olmmái lei Jesusa fárus ; sus lei dušše liidnegiesastat álás rupmašis birra .
Sii dohppejedje su , muhto son luoitilii liidnegiesastaga ja báhtarii álásin .
Sii dolvo Jesusa bajimušbáhpa lusa , ja buot bajitbáhpat , vuorrasat ja čálaoahppavaččat čoahkkanedje .
Biehtár oavnnjildii Jesusa gitta bajimušbáhpa gárdimii . Das son čohkkái fávttaid gaskkas ja liekkadalai dollagáttis .
Bajitbáhpat ja oppa Ráđđi oččodedje duođaštusa Jesusa vuostái vai beasašedje dubmet su jápmimii , muhto eai gávdnan maidege .
Olusat bukte vearri duođaštusaid , muhto sin duođaštusat eai boahtán ovttaide .
De muhtumat čuožžiledje ja bukte dán vearri duođaštusa su vuostái : « Mii leat gullan su cealkimin : Mun áiggun gaikkodit dán tempela mii lea huksejuvvon gieđaiguin , ja golmma beaivvis hukset nuppi mii ii leat huksejuvvon gieđaiguin . »
Muhto eai dás ge boahtán sin duođaštusat ovttaide .
Dalle bajimušbáhppa čuožžilii ja jearai Jesusis : « Ii go dus leat mihkkege dadjamušaid sin áššáskuhttimiidda ? »
Muhto son orui jávohaga ii ge vástidan maidege .
Bajimušbáhppa jearai fas : « Leat go don Messias , buressivdniduvvon Ipmila Bárdni ? »
Jesus vástidii : « De lean , ja dii oažžubehtet oaidnit Olbmobártni čohkkámin Buotveagalačča olgeš gieđa bealde ja boahtimin almmi balvvaiguin . »
Dalle bajimušbáhppa gaikkihii biktasis guovdat ja dajai : « Maid mii dál vihtaniiguin ?
Dii lehpet ieža gullan ipmilbilkádusa .
Maid oaivvildehpet ? »
Buohkat dubmejedje su sivalažžan jápmit .
Muhtumat čolgagohte su , ja sii gokče su muođuid , čorbme su ja dadje : « Einnos dal ! »
Maiddái fávttat huško su soppiiguin .
Dan botta lei Biehtár vuollin šiljus .
Muhtun bajimušbáhpa biigá bođii meattá , ja go son fuomášii Biehtára gii lei liekkadallamin , de geahčai sutnje ja dajai : « Don maiddái ledjet dáinna nasaretlaččain Jesusiin . »
Muhto Biehtár biehttalii ja dajai : « Mun in ádde in ge ipmir maid don hálažat ; » de son manai olggos poartalatnjii .
Ja vuoncávaris biškkádii .
Muhto biigá áiccai su das ja dadjagođii sidjiide geat ledje čuožžumin birra : « Diet lea okta sis . »
Biehtár fas biehttalii .
Veahá maŋŋelaš sii ge geat ledje čuožžumin das , dadje Biehtárii : « Duođaid , don leat okta sis . Don han leat galilealaš . »
Muhto son garrudišgođii ja vuordnugođii : « In mun dovdda dien olbmá gean birra dii hállabehtet . »
Dan seammás vuoncávaris biškkádii nuppádassii .
De Biehtár muitái maid Jesus lei cealkán sutnje : « Ovdal go vuoncávaris biškkáda guktii , don biehttalat mu golbmii . »
Ja son čirrosii .
Dakkaviđe iđedis bajitbáhpat , vuorrasat ja čálaoahppavaččat čoahkkanedje , ja oppa Ráđđi dagai mearrádusas .
Sii čatne Jesusa , dolvo su eret ja adde su Pilatusa háldui .
Pilatus jearai sus : « Leat go don juvddálaččaid gonagas ? »
Jesus vástidii sutnje : « Ieš han don dadjet dan . »
Bajitbáhpat váidaledje sakka su . De Pilatus jearai fas : « It go don vástit maidege ?
Gula , mo sii áššáskuhttet du ! »
Muhto Jesus ii vástidan sáni ge , ja Pilatus imaštalai .
Basiid áiggi Pilatus lávii luoitit luovus ovtta fáŋgga , gean olmmošjoavku gáibidii .
Muhtun , gean namma lei Barabbas , lei giddagasas eará stuibmideddjiiguin ; sii ledje sorbmen olbmuid stuimmiid siste .
Olmmošjoavku bođii Pilatusa lusa ja siđai su dahkat nugo lávii .
Ja son vástidii sidjiide : « Dáhttubehtet go mu luoitit juvddálaččaid gonagasa ? »
Dasgo son árvidii ahte bajitbáhpat ledje váidán Jesusa gáđašvuođas .
Muhto bajitbáhpat hálahedje olmmošjoavkku nu ahte sii baicca dáhtto bidjat Barabbasa luovus .
Pilatus jearai fas : « Maid mun dalle dagan suinna gean dii gohčodehpet juvddálaččaid gonagassan ? »
Sii čurvo sutnje : « Russiinávle su ! »
Pilatus jearai : « Maid baháid ba son lea dahkan ? »
Muhto sii huike vel jitnoseabbot : « Russiinávle su ! »
Ja Pilatus , guhte hálidii dahkat olbmuid miela mielde , luittii Barabbasa luovus , muhto Jesusa son spihččehii ja attii russiinávlejuvvot .
Soalddáhat dolvo Jesusa ladnešilljui ja gohččo čoahkkái oppa fáktaveaga .
Sii cogge sutnje purpurbiktasa , bárgidedje bastilislátnjákruvnnu ja bidje su oaivái .
De sii dearvvahišgohte su ja dadje : « Dearvva dutnje , juvddálaččaid gonagas ! »
Sii huško su oaivái soppiin , čolge su njeaiga ja luoitádedje su ovdii ja gopmárdalle su .
Go sii ledje bilkidan su , de nulle sus eret purpurbiktasa ja cogge sutnje fas iežas biktasiid . De sii dolvo Jesusa olggos russiinávlejuvvot .
Jesusa ruossa sii bággejedje muhtun olbmá guoddit ; son lei kyrenelaš Simmon , Aleksandrosa ja Rufusa áhčči , gii lei aiddo boahtimin meahcis .
Sii dolvo Jesusa dan báikái man namma lea Golgata , jorgaluvvon « Oaivegállobáiki » .
Sii áigo addit sutnje viinni masa lei seaguhuvvon myrra , muhto son ii váldán dan .
De sii russiinávlejedje Jesusa ja juogadedje su biktasiid vuorbádallamiin maid giige galggai oažžut .
Lei goalmmát diibmu go russiinávlejedje su .
Ledje čállán váidalusa su vuostái ná : « Juvddálaččaid gonagas . »
Oktan suinna sii russiinávlejedje guokte rievvára , nuppi su olgeš ja nuppi su gurut beallái .
Nu ollašuvai dat čálasátni mii cealká : Son lohkkojuvvui láhkarihkkuid searvái .
Sii geat vázze meattá , bárde oaivvi ja bilkidedje su Beastte dál iežat ja njieja ruossas ! »
Seammá láhkái bajitbáhpat ja čálaoahppavaččat ge bilkidedje su ja dadje guhtet guimmiidasaset : « Earáid son gal lea beastán , muhto iežas ii sáhte beastit !
Messias , Israela gonagas , njidjos dal ruossas , vai mii beassat oaidnit ja oskut ! »
Maiddái soai geat leigga russiinávlejuvvon oktan suinna , hiddjideigga su .
Go guđat diibmu dievai , de bođii seavdnjadas oppa riikka badjel , ja dat bisttii gitta ovccát diimmu rádjái .
Ovccát diimmus Jesus čuorvvui alla jienain : « Eloi , Eloi , lema sabaktani ? »
Dat lea : « Ipmilan , Ipmilan , manne don leat mu guođđán ? »
Muhtumat sis geat čužžo das , gulle dan ja dadje : « Gullet , son čuorvu Elia . »
De muhtun viegai ja njuoskadii guobbarasa ettetviinniin , bijai dan soabbegeahčái ja attii sutnje juhkat .
Son dajai : « Ale vuos , gehččot boahtá go Elia váldit su vuolás . »
Muhto Jesus čurvii alla jienain ja attii vuoiŋŋas .
Ja tempela ovdaloavdda gaikánii guovdat , badjeravddas gitta vuolleravdii .
Go offiseara gii čuoččui aiddo su buohta , oinnii mo son attii vuoiŋŋas , de dajai : « Duođaid , dát olmmoš lei Ipmila Bárdni ! »
Veahá gaskka das eret ledje maiddái muhtun nissonat geahččamin . Sin searvvis lei Márjá Magdalena , Márjá , nuorat Jáhkoba ja Jovssesa eadni , ja Salome .
Sii ledje čuvvon Jesusa ja bálvalan su go son lei Galileas .
Das ledje čuožžumin maiddái ollu eará nissonat geat ledje boahtán bajás Jerusalemii oktan suinna .
Go lei juo šaddan eahket , ja go lei ráhkkananbeaivi , dat mearkkaša beaivvi ovdal sábbáha , de bođii arimatealaš Jovsset , alla ráđđehearrá , gii ieš lei vuordimin Ipmila riikka .
Son arvvai mannat Pilatusa lusa ja siđai Jesusa rupmaša .
Pilatus imaštii ahte Jesus lei juo jápmán ja gohčui offiseara lusas ja jearai sus guhká go Jesus lei leamaš jápmán .
Go offiseara lei duođaštan sutnje dán , de son attii Jovssehii rupmaša .
Jovsset osttii fiinna liinni , válddii Jesusa vuolás , giesai su liinni sisa ja bijai su hávdái mii lei čullojuvvon báktái . Ráiggi ovdii fierahii geađggi .
Márjá Magdalena ja Márjá , Jovssesa eadni , oinniiga gosa Jesus biddjojuvvui .
Go sábbát lei vássán , de Márjá Magdalena ja Márjá , Jáhkoba eadni , ja Salome oste njálggahájat vuoidasiid , vai besset vuolgit vuoiddadit su .
Hui árrat vahku vuosttaš beaivvi sii bohte hávddi lusa , go beaivváš badjánii .
Sii dadje guhtet guimmiidasaset : « Gii fieraha eret geađggi hávddi ovddas ? »
Muhto go sii geahčastedje , de oidne ahte geađgi lei fierahuvvon eret ; dat lei sakka stuoris .
Sii manne hávddi sisa ja oidne nuorra olbmá čohkkámin olgeš bealde , gárvodan vilges , guhkes biktasiin , ja sii suorganedje .
Muhto son celkkii sidjiide : « Allet bala !
Dii lehpet ohcamin nasaretlačča Jesusa , guhte russiinávlejuvvui .
Son lea bajásčuoččáldahttojuvvon , ii son leat dás .
Gehččet , die lea báiki gosa sii bidje su !
Muhto mannet muitalit su máhttájeddjiide ja Biehtárii ahte son manná din ovdalis Galileai ; doppe dii beassabehtet oaidnit su , nugo son celkkii didjiide . »
De sii manne olggos ja báhtaredje eret hávddi luhtte , dorggiidan ja suorganan .
Eai ge muitalan maidege geasage , dasgo sii balle .
Go Jesus lei bajásčuožžilan árrat vahku vuosttaš beaivvi , de son almmustahtii iežas vuos Márjá Magdalenai , geas son lei ádján olggos čieža bahá vuoiŋŋa .
Márjá manai muitalit dan sidjiide geat ledje leamaš su mielde , ja geat dál moraštedje ja čirro .
Muhto go sii gulle ahte Jesus lei eallimin , ja ahte Márjá lei oaidnán su , de eai luohttán dasa .
Das maŋŋil Jesus almmustahtii iežas eará hámis guoktásii sis , go soai leigga vázzimin geaidnoráigge eret gávpogis .
Soai manaiga maiddái muitalit earáide , muhto eai sii jáhkkán sudnuide ge .
Loahpas son almmustahtii iežas oktanuppelohkái máhttájeddjiidasas go sii ledje čohkkámin beavddis . Son cuiggodii sin eahpeoskku ja garra váimmuid go eai lean jáhkkán sidjiide geat ledje oaidnán su bajásčuožžileami maŋŋil .
De son celkkii sidjiide : « Vulget oppa máilbmái ja sárdnidehket evangeliuma buot sivdnádusaide !
Dat guhte osku ja gásttašuvvo , bestojuvvo , muhto dat guhte ii oskko , dubmejuvvo .
Ja dát mearkkat čuvvot sin geat oskot : Sii ádjet olggos bahá vuoiŋŋaid mu nammii , sii sárdnot ođđa gielaid , ja sii dohppejit gearbmašiid gieđaideasetguin . Jos sii jugažit ge jámolaš mirkko , de dat ii vahágahte sin . Sii bidjet gieđaideaset buhcciid ala , ja dat dearvvašmahttojuvvojit . »
Go Hearrá Jesus lei sárdnon sidjiide dán , de váldojuvvui bajás albmái ja čohkánii Ipmila olgeš gieđa beallái .
Muhto sii vulge ja sárdnidedje juohke sajis , ja Hearrá ieš doaimmai singuin ja duođaštii sáni oavdomearkkaiguin .
Olusat leat riepman govvidit daid dáhpáhusaid mat leat ollašuvvan min gaskkas , dan mielde maid sii geat álggu rájes ledje čalmmálaš duođašteaddjit ja sáni bálvaleaddjit , leat muitalan midjiide .
Go mun ge dál lean suokkardan dárkilit buot dáhpáhusaid gitta álggu rájes , de lean mearridan čállit daid dutnje , alla árvosaš Teofilos , vai don áddešit man luohtehahtti dat oahpahus lea maid don leat ožžon .
Dan áiggi go Herodes lei Judea gonagassan , lei doppe Sakarja-nammasaš báhppa gii gulai Abia báhppaossodahkii .
Su áhkká lei maiddái Arona sogas , ja su namma lei Elisabet .
Soai leigga guktot vanhurskásat Ipmila ovddas ja eliiga láitemeahttumin Hearrá báhkkomiid ja njuolggadusaid mielde .
Soai leigga mánáheamit , dasgo Elisabet ii sáhttán oažžut máná ; ja guktot leigga juo eallilan olbmot .
Muhtun beaivvi Sakarja lei bálvaleamen báhppan Ipmila ovddas , dasgo dál lei su joavkku vuorru . Vieru mielde vuorbáduvvui báhpaid gaskkas , ja nu šattai Sakarja vuorbi mannat Hearrá tempelii oaffaruššat suovvasa áltára alde .
Oaffaruššama botta buot olbmot ledje olggobealde rohkadallamin .
De Hearrá eŋgel almmustuvai sutnje , suovasáltára olgeš bealde .
Sakarja suorganii go oinnii su , ja sutnje bođii ballu .
Muhto eŋgel celkkii sutnje : « Ale bala , Sakarja ! Dasgo Ipmil lea gullan du rohkosa .
Du áhkká Elisabet riegádahttá dutnje bártni , ja don galggat gohčodit su Johanassan .
Son šaddá dutnje illun ja ávvun , ja olusat illudit su riegádeami dihtii .
Dasgo son šaddá stuorisin Hearrá ovddas .
Viinni dahje garra juhkamuša son ii juga , ja eatnis heakka rájes son lea dievva Bassi Vuoiŋŋas . Son jorgalahttá olusiid Israelas ruovttoluotta Hearrái Ipmilasaset .
Son manná Hearrá ovddabealde Elia vuoiŋŋain ja fámuin , jorgalan dihtii áhčiid váimmuid mánáide ja addin dihtii eahpegulolaččaide vanhurskkis miela , ja ná son ráhkkanahttá álbmoga Hearrái . »
Sakarja jearai eŋgelis : « Mo sáhtán mun diehtit ahte dáhpáhuvvá ná ?
Mun han lean boaris , ja mu áhkká lea maid juo eallilan olmmoš . »
Eŋgel vástidii : « Mun lean Gabriel gii čuoččun Ipmila muođuid ovddas . Mun lean vuolggahuvvon sárdnut dutnje ja buktit dán illusága .
Muhto don šattat gielaheapmin it ge sáhte hállat ovdal go dan beaivvi go dát dáhpáhuvvá , danne go it oskon mu sániide mat ollašuvvet go áigi dievvá . »
Olbmot vurde Sakarja ja ovddošedje manne son ádjánii tempelis .
Go son bođii olggos , de ii máhttán hállat , ja sii árvidedje ahte son lei oaidnán oainnáhusa tempelis .
Son dušše nuvkkihii sidjiide ja bisui gielaheapmin .
Go su bálvalusáigi lei nohkan , de son manai ruktosis .
Veahá maŋŋelaš šattai su áhkká Elisabet máná vuostái , ja son čiehkádii viđa mánnui olbmuid ovddas .
Son dajai : « Dán lea Hearrá dahkan munnje .
Dál son lea geahččan munnje ja luvven mu eret olbmuid bilkkus . »
Go Elisabet lei guđat mánus , de Ipmil vuolggahii eŋgel Gabriela muhtun Galilea gávpogii man namma lei Nasaret , nieidda lusa gii lei lohpádallan Jovssehiin , Dávveda sogalaččain ; nieidda namma lei Márjá .
Eŋgel bođii su lusa ja celkkii : « Dearvva dutnje , don guhte leat ožžon árpmu !
Hearrá lea duinna ! »
Son suorganii sakka eŋgela sániid dihtii ja imaštii maid dát buorástahttin mearkkašivččii .
Muhto eŋgel celkkii sutnje : « Ale bala , Márjá ! Dasgo Ipmil lea čájehan dutnje árpmu .
Geahča , don šattat máná vuostái ja riegádahtát bártni ja bijat sutnje nama Jesus .
Son šaddá leat stuoris ja gohčoduvvo Alimusa Bárdnin .
Hearrá Ipmil addá sutnje su áhči Dávveda truvnnu , ja son ráđđe agálaččat Jáhkoba soga , ja su gonagasriika ii noga goassege . »
Márjá jearai eŋgelis : « Mo dát sáhttá dáhpáhuvvat go in leat leamaš ovttainge olbmáin ? »
Eŋgel vástidii : « Bassi Vuoigŋa boahtá du badjelii , ja Alimusa fápmu suoivanastá du badjel .
Dan dihtii lea bassi dat mánná gii riegáda ja gohčoduvvo bassin ja Ipmila Bárdnin .
Ja fuolkát Elisabet han lea maiddái vuordimin bártni , vaikko lea boaris .
Daddjojuvvui ahte son ii sáhte oažžut máná , muhto dál son lea juo guđat mánus . Dasgo ii mihkkege leat veadjemeahttun Ipmilii . »
Dalle Márjá celkkii : « Mun lean Hearrá bálvaleaddji .
Šaddos munnje nugo don leat cealkán . »
Ja eŋgel guđii su .
Moadde beaivvi maŋŋil Márjá vulggii ja doamai várregiliide , muhtun Judea gávpogii .
Son manai Sakarja vissui ja buorástahtii Elisabeta .
Go Elisabet gulai Márjjá buorástahttima , de mánná lihkastii su siste ja Bassi Vuoigŋa devddii su .
Elisabet čuorvvui alla jienain : « Buressivdniduvvon leat don nissoniid gaskkas , ja buressivdniduvvon lea du heakka šaddu .
Gii ba mun leaččan , ahte Hearrán eadni boahtá mu lusa ?
Dasgo dalle go mun gullen du buorástahttima , de mánná lihkastii ávuin mu siste .
Ja ávdugas son guhte oskkui , dasgo dat maid Hearrá lea cealkán sutnje , ollašuvvá . »
Dalle Márjá celkkii : Mu siellu rámida Hearrá , ja mu vuoigŋa ávvuda Ipmila , mu beasti , dihtii . Dasgo son lea geahččan vuollegis bálvaleaddjásis .
Dás duohko buot sogat rámidit mu ávdugassan , dasgo buotveagalaš Ipmil dahká munnje stuora daguid , bassi lea su namma . Sogas sohkii son árkkálmastá sin geat ballet sus .
Su gievrras gieđat dahket fámolaš daguid ; son biđge sin geain leat čeavlás jurdagat sin váimmuin , ja nordada ráđđejeddjiid eret truvnnuin ja bajida smávváid .
Son biebmá nelguid buriid attáldagaiguin , muhto riggáid son vuolggaha eret iežas luhtte guoros gieđaid .
Son veahkeha bálvaleaddjis Israela ii ge vajáldahte árpmiheames su , nugo lohpidii min máddariidda , Abrahamii ja su sohkii , agálaš áigái .
Márjá orui Elisabeta luhtte sullii golbma mánu , ja de máhcai ruoktot .
Dál dievai áigi goas Elisabet galggai riegádahttit , ja son riegádahtii bártni .
Go su siidaguoimmit ja fuolkkit gulle ahte Hearrá lei čájehan sutnje nu stuora árpmu , de sii illudedje suinna .
Gávccát beaivvi sii bohte birračuohppat bártni . Sii hálidedje gohčodit su Sakarjan áhčis mielde , muhto eadnis dajai : « Ii , su namma galgá leat Johanas . »
Sii vástidedje : « Ii han ovttasge du sogas leat dat namma . »
De sii nuvkkihedje áhččái manin son dáhtui gohčodit máná .
Son siđai távvala ja čálii : « Su namma lea Johanas . » Dalle buohkat ovddošedje , muhto dan seammás Sakarja oaččui fas hállannávccaid , ja son máidnugođii Ipmila .
Buot sudno ránnjáid badjelii bođii ballu , ja sáhka dan birra mii lei dáhpáhuvvan , viidánii Judea várregiliide .
Buohkat geat gulle dan , vurkejedje dan váimmuidasaset ja jerre : « Mii son dán mánás boahtá ? »
Ja Hearrá giehta láidii su .
Bassi Vuoigŋa devddii Sakarja , ja son sártnui profehtalaččat : Máidnojuvvon lehkos Hearrá , Israela Ipmil , dasgo son oahppaladdá álbmogis ja lonista dan .
Son čuoččáldahttá midjiide bestojumi čoarvvi bálvaleaddjis Dávveda sogas , nugo son lohpidii dološ áiggi rájes bassi profehtaidis bokte , ahte mii bestojuvvošeimmet min vašálaččain , buohkain geat vašuhit min .
Nu son árpmiha min máddariid ja atná muittus bassi lihtus , dan váli maid son vuortnui min áhččái Abrahamii , ahte son gádju min eret min vašálaččain , vai mii balakeahttá beasašeimmet bálvalit su buhtisvuođas ja vanhurskkisvuođas su muođuid ovddas buot beivviideamet .
Ja don , mánážan , gohčoduvvot Alimusa profehtan , dasgo don manat Hearrá ovddas ja válmmaštahtát su geainnuid ja oahpásmahtát su álbmogii bestojumi suttuid ándagassii addojumiin , dasgo min Ipmil lea árbmugas ja váibmoláđis .
Son oahppaladdá min allagasas dego beaivváža badjáneapmi , báitin dihtii sidjiide geat orrot seavdnjadasas ja jápmima suoivanis , ja láiden dihtii min julggiid ráfi geidnui .
Ja bárdni šattai bajás ja gievrrui vuoiŋŋas .
Son orui mehciin , gitta dan beaivvi rádjái go son galggai loaiddastit Israela ovdii .
Daid beivviid bođii gohččun keaisár Augustusis ahte oppa máilbmi galggai čálihuvvot olmmošlohkui .
Dat lei vuosttaš čáliheapmi , ja dat dáhpáhuvai go Kvirinius lei Syria eananhearrá .
Buohkat vulge čálihit iežaset , iešguhtege gávpogasas .
Jovsset vulggii dalle Nasaret gávpogis bajás Judeai , Dávveda gávpogii Betlehemii , go son lei Dávveda sogas ja nális , čálihit iežas oktan Márjjáin , gii lei lohpiduvvon sutnje áhkkán ja gii lei máná vuostái .
Go soai leigga doppe , de dievai áigi go son galggai riegádahttit , ja son riegádahtii bártnis , vuosttašriegádeaddji , giesai su ja bijai su krubbái , dasgo sudnuide ii lean idjasadji .
Dan guovllus ledje sávzageahččit guođoheamen sávzaealuset ihkku .
Fáhkkestaga čuoččui Hearrá eŋgel sin ovddas , ja Hearrá hearvásvuohta báittii sin birra . Sii suorganedje sakka .
Muhto eŋgel celkkii sidjiide : « Allet bala !
Mun muitalan didjiide stuora illusága , mii šaddá illun oppa álbmogii : Didjiide lea odne riegádan beasti Dávveda gávpogis ; son lea Kristus , Hearrá .
Ja dát lea didjiide mearkan : Dii gávdnabehtet máná mii lea gissojuvvon ja veallámin kruppás . »
Ja fáhkkestaga lei eŋgela luhtte almmálaš veahka , mii máinnui Ipmila ja lávllui : « Gudni lehkos Ipmilii allagasas ja ráfi eatnama alde olbmuide geaid Ipmil árpmiha ! »
Go eŋgelat ledje guođđán sin ja máhccan albmái , de guođoheaddjit dadje guhtet guoibmáseaset : « Vulgot dal Betlehemii geahččat dan mii lea dáhpáhuvvan , ja man Hearrá lea almmuhan midjiide . »
Ja sii doapmaledje dohko ja gávdne Márjjá ja Jovsseha ja unna mánáža mii lei veallámin kruppás .
Go sii ledje oaidnán su , de muitaledje buot mii lei celkojuvvon sidjiide dan máná birra . Buohkat geat ledje gullamin , ovddošedje dan maid guođoheaddjit muitaledje .
Muhto Márjá vurkii visot váibmosis ja guorahalai dan .
Guođoheaddjit máhcce ruoktot , máinnodettiin ja rámidettiin Ipmila buot daid ovddas maid sii ledje gullan ja oaidnán ; buot lei nugo lei celkojuvvon sidjiide .
Gávccát beaivvi go son galggai birračuhppojuvvot , de son oaččui nama Jesus , nugo eŋgel lei gohččon ovdal go son sahkanii eatnis heggii .
Go dat áigi bođii go sii Movssesa lága mielde galge buhtistuvvot , de Jovsset ja Márjá válddiiga máná mielde bajás Jerusalemii guoddit su Hearrá ovdii . Dasgo Hearrá láhkii lea čállojuvvon ahte juohke vuosttašriegádan bárdnemánná galgá vihahuvvot Hearrái . Sii galge maiddái buktit oaffara nugo Hearrá láhka gohčču : turtelduvvápára dahje guokte duvváčivgga .
Jerusalemis ásai dan áiggi olmmái gean namma lei Simmon ; son lei vanhurskkis ja ipmilbalolaš ja vurddii Israela jeđđehusa .
Bassi Vuoigŋa lei su badjel , ja Vuoigŋa lei almmustahttán sutnje ahte son ii muosát jápmima ovdal go lea oaidnán su gean Hearrá lea vuoiddadan .
Vuoigŋa doalvvui su tempelii , ja go Jesusa vánhemat bođiiga sisa mánáin dahkan dihtii lága vieru mielde , de Simmon válddii máná sallasis , máinnui Ipmila ja celkkii : Hearrá , dál divttát bálvaleaddját vuolgit dáppe ráfis , nugo don leat cealkán . Dasgo mu čalmmit leat oaidnán du bestojumi man don leat ráhkadan buot álbmogiid oidnosis , čuovgasa mii šaddá almmustussan báhkiniidda ja gudnin du álbmogii Israelii .
Eadnis ja áhččis ovddošeigga dan mii daddjojuvvui máná birra .
Ja Simmon buressivdnidii sin ja dajai su eadnái Márjái : « Geahča , dát mánná lea biddjon jorralussan ja čuoččáldahttojupmin olusiidda Israelis ja mearkan mii vuostálastojuvvo , vai eatnat váimmuid jurdagat almmustuvašedje .
Muhto miehkki manná maiddái du sielu čađa . »
Das lei maiddái nisu gii lei profehta , Ánná , Fanuela nieida , Ašera čearddas .
Son lei hui boaris ; son lei náitalan nuorran ja lei eallán čieža jagi boatnjáinis . Dasto lei eallán leaskan , dassážii go son dál lei gávcciloginjeallje jagi boaris .
Son ii goassege guođđán tempela , muhto bálvalii Ipmila borakeahttáivuođain ja rohkosiiguin ijat beaivái .
Dál son ge bođii ovdan ja máinnui Ipmila ; ja son sártnui máná birra buohkaide geat ledje vuordimin Jerusalema lonástusa .
Go Jovsset guovttos Márjjáin leigga ollašuhttán buot dan mii lei mearriduvvon Hearrá lágas , de máhcaiga Galileai , ruovttugávpogii Nasaretii .
Ja bárdni stuorui ja gievrrui , ja son lei dievva viissisvuođas , ja Ipmila árbmu lei su badjel .
Juohke jagi Jesusa vánhenguovttos láviiga mannat Jerusalemii beassášbasiide .
Go Jesus lei guoktenuppelot jagi boaris , de sii manne dohko bajás , nugo lei vierru basiid áiggi .
Muhto go bassebeaivvit ledje vássán , ja sii vulge fas ruoktot , de bárdni bázii Jerusalemii , almmá vánhemiiddis dieđekeahttá .
Soai gáttiiga ahte son lei sin fáru mielde , ja olles beaivi manai ovdal go jearahišgođiiga fulkkiin ja ustibiin .
Go soai eaba gávdnan su , de máhcaiga Jerusalemii ohcat su doppe .
Golmma beaivvi geažes gávnnaiga su tempelis . Son lei čohkkámin oahpaheddjiid gaskkas , guldalii sin ja jearahalai sis .
Buohkat geat gulle su , imaštalle su jierpmi ja vástádusaid .
Vánhenguovttos hirpmástuvaiga sakka go oinniiga su , ja su eadni dajai sutnje : « Mánážan , mo don sáhttet dahkat dán munnuide ?
Moai áhčiinat letne ohcan du baluin . »
Muhto son vástidii : « Manne doai ozaide mu ?
Eahppi go ipmirdan ahte mun ferten leat Áhččán viesus ? »
Muhto eaba soai árvidan maid son oaivvildii dáinna .
De son manai sudnuin vuolás Nasaretii ja lei jegolaš sudnuide .
Su eadni vurkii buot dáid váibmosis .
Ja Jesus ovdánii agis ja viissisvuođas ja lei illun Ipmilii ja olbmuide .
Lei keaisár Tiberiusa vihttanuppelogát ráđđenjagis ; Pontius Pilatus lei dalle Judea eananhearrán ; Herodes lei guovllugonagassan Galileas , su viellja Filip Itureas ja Trakonitisis , ja Lysanias lei guovllugonagassan Abilenes , ja Hannas ja Kaifas leigga bajimušbáhppan . Dalle Ipmila sátni bođii Johanassii , Sakarja bárdnái , meahcis .
Ja son jođii Jordana guovlluid miehtá ja sárdnidii jorgaleami gástta suttuid ándagassii addojupmin , nugo lea čállojuvvon profehta Jesaja girjái : Jietna čuorvu meahcis : Válmmaštehket geainnu Hearrái , njulgejehket su bálgáid !
Juohke leahki devdojuvvo , juohke várri ja dievvá dássejuvvo .
Moalkás bálgát njulgejuvvojit , geađgás geainnut jalgejuvvojit .
Ja buot olbmot ožžot oaidnit Ipmila bestojumi .
Go stuora olmmošjoavkkut bohte Johanasa lusa gásttašuvvot , de son celkkii sidjiide : « Gearpmaščivggat ! Gii lea dadjan didjiide ahte sáhttibehtet báhtarit boahttevaš moarreduomus ?
Šaddadehket jorgalusa dohkálaš šattuid !
Allet ge jurddašišgoađe : Min áhčči lea Abraham !
Dasgo mun cealkkán didjiide : Ipmil sáhttá čuoččáldahttit Abrahama mánáid dáin geđggiin .
Ákšu lea juo muoraid máddagis ; juohke muorra mii ii šaddat buriid šattuid , čullojuvvo ja bálkestuvvo dollii . »
Olbmot jerre sus : « Maid mii de dahkat ? »
Son vástidii : « Geas ležžet guokte báiddi , juogadehkos suinna geas ii leat oktage , ja geas lea borramuš , dahkos dan seammá . »
Muhtun tuollárat ge bohte gásttašuvvot , ja sii jerre sus : « Oahpaheaddji , maid mii galgat dahkat ? »
Son vástidii : « Allet gáibit eanet go lea lobálaš . »
Muhtun soalddáhat jerre sus : « Mo minguin gis , maid mii galgat dahkat ? »
Son vástidii sidjiide : « Allet rivve ruđaid geasge veahkaválddiin dahje gávvilvuođain , muhto duhtet dan bálkái man oažžubehtet . »
Álbmot lei dál dievva vuordámušain , ja buohkat jurddašedje váimmuineaset ahte Johanas vejii leat Messias .
Muhto Johanas attii sidjiide dán vástádusa : « Mun gásttašan din čáziin , muhto mu maŋŋil boahtá son gii lea gievrrat go mun ; mun in leat dohkálaš nuollat su gámavuoddagiid ge .
Son gásttaša din Bassi Vuoiŋŋain ja dolain .
Sus lea goaivu gieđas ja áigu ráidnet gortniidis gordneráidnehagas ja čohkket nisuid láhtui . Muhto sáđuid son boaldá čáskatmeahttun dolas . »
Dán ja máŋgga eará láhkái Johanas neavvui olbmuid ja sárdnidii sidjiide evangeliuma .
Muhto go son cuiggodii guovllugonagasa Herodesa go dat elii vieljas áhkáin , Herodiasain , ja dagai ollu eanet baháid , de Herodes dagai dasa lassin vel dan bahádagu ahte son bálkestii Johanasa giddagassii .
Ollu olbmot gásttašahtte iežaset . Maiddái Jesus gásttašuvvui , ja go son lei rohkadallamin , de albmi rahpasii , ja Bassi Vuoigŋa bođii su badjelii duvvá hámis . Ja almmis gullui jietna : « Don leat mu Bárdni gean mun ráhkistan , don leat mu miela mielde . »
Jesus lei sullii golbmalotjahkásaš go álggahii doaimmas .
Nugo gádde su áhčči lei Jovsset , gean áhčči lei Eli , gean áhčči lei Mattat , gean áhčči lei Levi , gean áhčči lei Melki , gean áhčči lei Jannai , gean áhčči lei Jovsset , gean áhčči lei Mattatja , gean áhčči lei Amos , gean áhčči lei Nahum , gean áhčči lei Hesli , gean áhčči lei Naggai , gean áhčči lei Mahat , gean áhčči lei Mattatja , gean áhčči lei Šimi , gean áhčči lei Josek , gean áhčči lei Joda , gean áhčči lei Johanan , gean áhčči lei Resa , gean áhčči lei Serubbabel , gean áhčči lei Šealtiel , gean áhčči lei Neri , gean áhčči lei Melki , gean áhčči lei Addi , gean áhčči lei Kosam , gean áhčči lei Elmadam , gean áhčči lei Er , gean áhčči lei Josva , gean áhčči lei Elieser , gean áhčči lei Jorim , gean áhčči lei Mattat , gean áhčči lei Levi , gean áhčči lei Simmon , gean áhčči lei Juda , gean áhčči lei Jovsset , gean áhčči lei Jonam , gean áhčči lei Eljakim , gean áhčči lei Melea , gean áhčči lei Menna , gean áhčči lei Mattata , gean áhčči lei Natan , gean áhčči lei Dávvet , gean áhčči lei Isaj , gean áhčči lei Obed , gean áhčči lei Boas , gean áhčči lei Salma , gean áhčči lei Nakšon , gean áhčči lei Amminadab , gean áhčči lei Admin , gean áhčči lei Arni , gean áhčči lei Hesron , gean áhčči lei Peres , gean áhčči lei Juda , gean áhčči lei Jáhkot , gean áhčči lei Issát , gean áhčči lei Abraham , gean áhčči lei Tera , gean áhčči lei Nahor , gean áhčči lei Serug , gean áhčči lei Rehu , gean áhčči lei Peleg , gean áhčči lei Eber , gean áhčči lei Šela , gean áhčči lei Kenan , gean áhčči lei Arpakšad , gean áhčči lei Sem , gean áhčči lei Noa , gean áhčči lei Lamek , gean áhčči lei Metušela , gean áhčči lei Henok , gean áhčči lei Jered , gean áhčči lei Mahalalel , gean áhčči lei Kenan , gean áhčči lei Enoš , gean áhčči lei Set , gean áhčči lei Áttán gii lei Ipmila bárdni .
Bassi Vuoiŋŋas dievva Jesus máhcai Jordanis , ja Vuoigŋa jođihii su njealljelogi beaivvi meahcis , gos beargalat geahččalattai su .
Dán áiggis son ii borran maidege , ja go dat beaivvit ledje vássán , de son nealgugođii .
Ja beargalat dajai sutnje : « Jos leaččat Ipmila Bárdni , de gohčo dán geađggi šaddat láibin ! »
Jesus vástidii : « Lea čállojuvvon : Olmmoš ii eale dušše láibbis . »
Beargalat doalvvui su muhtun alla báikái ja čájehii sutnje čalbmeravkalanbottus buot máilmmi riikkaid . Son dajai : « Mun attán dutnje buot dán , buot máilmmi ja dan hearvásvuođa . Dasgo dat lea addojuvvon mu gihtii , ja mun attán dan geasa dáhtun .
Jos don dušše luoitádat mu ovdii , de buot lea du »
Jesus vástidii sutnje : « Lea čállojuvvon : Hearrá Ipmilat galggat gudnejahttit , ja aivvestassii su bálvalit . »
Beargalat doalvvui su Jerusalemii ja bijai su alimussii tempela geađgemuvrra ala ja dajai : « Jos leaččat Ipmila Bárdni , de bálkestahte dás vuolás .
Dasgo lea čállojuvvon : Son gohčču eŋgeliiddis várjalit du Ja : Sii guddet du gieđaideaset alde , amat norddastit juolggát geađgái . »
Jesus vástidii sutnje : « Lea celkojuvvon : It galgga geahččalit Hearrá Ipmilat . »
Go beargalat lei geargan geahččaleames Jesusa juohke láhkái , de gáiddai eret su luhtte muhtun áigái .
Jesus máhcai Vuoiŋŋa fámus Galileai , ja sáhka su birra viidánii miehtá guovllu .
Son oahpahii sin synagogain , ja buohkat rámidedje su .
Son bođii maiddái Nasaretii gos lei bajásšaddan .
Sábbáhin son manai synagogii nugo lávii , ja son čuožžilii lohkat .
Sutnje geigejuvvui profehta Jesaja girji , ja son rabai girjegearu ja gávnnai báikki gosa lea čállojuvvon : Hearrá Vuoigŋa lea mu badjelis , dasgo son lea vuoiddadan mu sárdnidit illusága váivvážiidda .
Son lea vuolggahan mu gulahit friddjavuođa fáŋggaide ja oainnu čalmmehemiide , friddjan dahkat sordojuvvon olbmuid ja sárdnidit Hearrá árpmu jagi .
Son giesai fas girjegearu , geigii dan bálvaleaddjái ja čohkánii .
Buohkat geat ledje synagogas , gávke sutnje vuordámušain .
Son sárdnugođii sidjiide ná : « Odne lea dát čála ollašuvvan din guladettiin . »
Buohkat rábmojedje su ja ovddošedje daid árbmosániid mat bohte su njálmmis . Sii jerre : « Ii go son leat Jovsseha bárdni ? »
Jesus celkkii sidjiide : « Dii áigubehtet vissásit muittuhit munnje dán sátnevádjasa : Dálkkasteaddji , dálkkot iežat !
Mii leat gullan buot maid don leat dahkan Kapernaumis ; daga daid seammáid dáppe ruovttubáikkistat ! »
Ja son lasihii : « Duođaid , mun cealkkán didjiide : Ii oktage profehta dohkkehuvvo iežas ruovttugávpogis .
Mun dáhkidan didjiide : Ledje ollu leaskkat Israelas Elia áiggi , go albmi lei dahppojuvvon ii ge luoitán arvvi golmma jahkái ja guđa mánnui ja stuora nealgi šattai miehtá riikka .
Dattege Elia ii vuolggahuvvon sin lusa , earet go muhtun Sarepta leaskka lusa Sidona lahka .
Ja ledje ollu spihtálaččat Israelas profehta Eliša áiggi ; muhto ii oktage sis buhtistuvvon , earet go syrialaš Naaman . »
Buohkat geat ledje synagogas , moaráhuvve go gulle dan . Sii čuožžiledje ja ádje su olggos gávpogis , ceakkobávtti guvlui dan váris masa sin gávpot lei huksejuvvon , hoigadan dihtii su das vuolás .
Muhto son váccii olmmošjoavkku čađa ja manai eret .
Jesus manai Kapernaumii mii lea Galileas , ja doppe oahpahii olbmuid sábbáhin .
Sii hirpmástuvve su oahpaheamis , dasgo son sártnui isitvuođain .
Synagogas lei olmmái geas lei buhtismeahttun vuoigŋa . Son čuorvugođii alla jienain : « Mii dus lea minguin dahkamuššan , nasaretlaš Jesus ?
Leat go boahtán duššadit min ?
Mun diedán gii don leat , Ipmila Bassi ! »
Muhto Jesus šikkui vuoiŋŋa ja celkkii : « Jávohuva ja vuolgge sus olggos ! »
Bahá vuoigŋa njeiddii olbmá sin gaskii ja vulggii sus olggos dagakeahttá sutnje maidege vahágiid .
Buohkat suorganedje ja jerre guhtet guimmiineaset : « Makkár sátni lea dát ?
Isitvuođain ja fámuin gohčču son buhtismeahttun vuoiŋŋaid , ja dat vulget olggos . »
Ja sáhka su birra viidánii miehtá guovllu .
Dasto Jesus vulggii synagogas ja bođii Simmona dállui .
Doppe Simmona vuoni lei veallámin heajos buohccin , ja sii dáhtto Jesusa veahkehit su .
Son manai su lusa ja šikkui dávdda , ja dat luittii su .
Dakkaviđe nisu čuožžilii ja bálvališgođii sin .
Go beaivváš luoitádii , de buohkat bohte su lusa buhcciiguin geain ledje máŋggalágán vigit .
Son bijai gieđaidis juohkehačča ala ja buoridii sin .
Maiddái bahá vuoiŋŋat vulge eatnagiin olggos , ja dat gilljo : « Don leat Ipmila Bárdni ! »
Muhto son šikkui daid ja gilddii daid jienádeames , dasgo dat dihte ahte son lei Messias .
Iđedis nuppi beaivvi son vulggii gávpogis ávdin báikái .
Olbmot ohcagohte su , ja go sii gávdne su , de geahččaledje hehttet su guođđimis sin .
Muhto son celkkii sidjiide : « Mun ferten sárdnidit ilolaš sága Ipmila riikka birra eará gávpogiin ge .
Danne mun lean vuolggahuvvon . »
Ja son sárdnidii Judea synagogain .
Muhtun beaivvi go Jesus lei čuožžumin Gennesaretjávregáttis ja olbmot bahkkejedje su birra gullat Ipmila sáni , de fuomášii guokte fatnasa jávregáttis . Bivdit ledje mannan eret fatnasiin ja ledje doidimin firpmiideaset .
Jesus manai nuppi fatnasii mii gulai Simmonii , ja dáhtui su sirdilit veahá eret gáttis .
De čohkánii oahpahit olbmuid .
Go son lei geargan sárdnumis , de dajai Simmonii : « Suhket fávlelii ja suhppejehket firpmiideattet bivdit ! »
Simmon vástidii : « Oahpaheaddji , mii leat bargan geažos ija eat ge leat fidnen maidege .
Muhto du sáni mielde mun suhppen firpmiid . »
De sii dahke nu ja godde nu ollu guliid ahte fierpmit goasii gaikánedje .
Sii sevve guimmiidasaset nuppi fatnasis boahtit veahkkin .
Ja go sii bohte , de devde goappašiid fatnasiid , nu ahte measta vudjo .
Go Simmon Biehtár oinnii dan , de luoitádii Jesusa julggiid ovdii ja dajai : « Hearrá , guođe mu , danne go mun lean suttolaš olmmái . »
Dasgo son ja buohkat geat ledje su mielde , hirpmástuvve dan stuora sállašis man ledje fidnen . Nu maiddái Sebedeusa bártniguovttos , Jáhkot ja Johanas , geat leigga Simmona bivdoguoimmit .
Muhto Jesus celkkii Simmonii : « Ale bala !
Dás duohko don bivddát olbmuid . »
De sii suhke gáddái , guđđe buot ja čuvvo su .
Go Jesus lei muhtun gávpogis , de bođii su lusa olmmái gii lei dievva spihtálvuođas .
Son oinnii Jesusa ja luoitádii su ovdii muođut eatnamii ja ánuhii sus : « Hearrá , jos don dáhtožat , de sáhtát buhtistit mu . »
Jesus geigii gieđas , guoskkahii su ja celkkii : « Mun dáhtun , šatta buhtisin ! »
Dakkaviđe jávkkai spihtálvuohta .
Jesus gilddii su muitaleames dan geasage ja jotkkii : « Muhto mana čájehit iežat báhppii , ja oaffaruša buhtástusat ovddas nugo Movsses lea gohččon . Dat lea olbmuide duođaštussan . »
Sáhka su birra goit viidánii velá eambbo go ovdal , ja stuora joavkkut bohte su lusa gullat su ja buoriduvvot buohcuvuođaineaset .
Muhto son geahččalattai geassádit ávdin báikkiide rohkadallan dihtii .
Muhtun beaivvi go son lei oahpaheamen olbmuid , de muhtun farisealaččat ja láhkaoahpaheaddjit ledje das ; sii ledje boahtán buot Galilea giliin , Judeas ja Jerusalemis .
Jesusis lei Hearrá fápmu buoridit buhcciid .
Muhtun olbmát gudde dohko lámis olbmá guoddinseaŋgga alde . Sii vigge guoddit su sisa ja bidjat Jesusa ovdii .
Muhto go olbmuid eatnatvuođa dihtii eai sáhttán buktit su sisa , de sii manne dáhki ala , luvvestedje moadde diilageađggi ja luite su vulos , aiddo Jesusa ovdii .
Go Jesus oinnii sin oskku , de celkkii : « Olmmoš , du suttut leat dutnje ándagassii addojuvvon . »
Muhto čálaoahppavaččat ja farisealaččat jurddašišgohte : « Gii lea dát gii bilkida Ipmila ?
Gii sáhttá addit suttuid ándagassii earet go Ipmil ? »
Jesus diđii maid sii jurddašedje ja celkkii sidjiide : « Maid dii duođaid jurddašehpet váimmuineattet ?
Goappá lea álkit cealkit , jogo : Du suttut leat dutnje ándagassii addojuvvon , dahje : Čuožžil ja vázzil ?
Muhto vai dii dieđášeiddet ahte Olbmobártnis lea fápmu eatnama alde addit suttuid ándagassii » – ja son sárdnu lámis olbmái – « de mun cealkkán dutnje : Čuožžil , váldde seaŋggat ja mana ruoktot ! »
Ja dakkaviđe čuožžilii olmmái buohkaid oaidnut , válddii seaŋgga man alde lei veallán , ja manai ruoktot máinnodettiin Ipmila .
Buohkat imaštedje sakka ja máidno Ipmila . Sii šadde ballui ja dadje : « Odne mii leat oaidnán jáhkkemeahttuma ! »
Dasto Jesus manai olggos ja oinnii muhtun Levi-nammasaš tuollára čohkkámin tuolloviesus .
Jesus celkkii sutnje : « Čuovo mu ! »
Ja Levi guđii visot , čuožžilii ja čuovui su .
Levi ráhkadii sutnje guossemállásiid iežas viesus , ja ollu tuollárat ja earát ledje čohkkámin singuin beavddis .
Farisealaččat ja erenoamážit sin čálaoahppavaččat nimmoredje ja dadje máhttájeddjiide : « Manne dii boradehpet ja juhkabehtet tuolláriiguin ja suttolaččaiguin ? »
Muhto Jesus vástidii sidjiide : « Eai dearvvaš olbmot dárbbaš dálkkasteaddji , muhto buohccit .
Mun in leat boahtán rávkat jorgalussii vanhurskásiid , muhto suttolaččaid . »
Sii dadje sutnje : « Johanasa máhttájeaddjit atnet dávjá borakeahttáivuođa ja rohkadallet , ja nu dahket farisealaččaid máhttájeaddjit ge , muhto du máhttájeaddjit borret ja juhket . »
Jesus vástidii sidjiide : « Sáhttibehtet go gáibidit headjagussiid atnit borakeahttáivuođa dan botta go irgi lea sin luhtte ?
Muhto áigi boahtá go irgi váldojuvvo sis eret , ja daid beivviid go dat dáhpáhuvvá , de sii atnet borakeahttáivuođa . »
Son muitalii sidjiide veardádusa ge : « Ii oktage gaikko bihtá ođđa biktasis duokŋasin boares biktasii .
Dasgo dalle han gaikkoduvvo ođđa bivttas , ja ođđa biktasa duokŋas ii heive boares biktasii .
Ii ge oktage leaikko varas viinni boares náhkkeseahkaide . Dasgo dalle varas viidni ludde boares seahkaid , ja viidni golgá olggos ja seahkat billašuvvet .
Muhto leaikko varas viinni ođđa náhkkeseahkaide .
Ii ge oktage gii lea juhkan boares viinni , hálit varas viinni , dasgo son dadjá ahte boarráset lea buoret . »
Muhtun sábbáha Jesus lei vázzimin gordnebealdduid čađa .
Máhttájeaddjit čogge gordneoivviid , ruvvejedje daid gieđaiguin ja borre .
Muhtun farisealaččat dadje : « Manne sii dahket dan mii ii leat lobálaš sábbáhin ? »
Jesus vástidii sidjiide : « Ehpet go dii leat lohkan maid Dávvet dagai go son ja su olbmát ledje nealgumin ?
Son manai Ipmila vissui ja válddii oaffarláibbiid , borai ja attii maiddái sidjiide geat ledje suinna , vaikko lea ge dušše báhpain lohpi borrat daid . »
Ja Jesus lasihii : « Olbmobárdni lea sábbáha hearrá . »
Muhtun eará sábbáha son manai synagogii ja oahpahii .
Doppe lei olmmái geas olgeš giehta lei áibbas ástan .
Čálaoahppavaččat ja farisealaččat atne Jesusa čalmmis oaidnit buorideažžá go son sábbáhin , vai sis livččii mainna váidit su .
Muhto son diđii maid sii jurddašedje , ja celkkii olbmái geas lei ástan giehta : « Čuožžil ja boađe ovdan ! »
Son čuožžilii ja loaiddastii ovdan , ja Jesus celkkii sutnje : « Dál jearan dis , goabbá lea lobálaš sábbáhin ? Buriid dahkat vai baháid dahkat , gádjut olbmoheakka vai duššadit heakka ? »
Son geahčai buohkaide geat ledje čuožžumin das birra , ja celkkii olbmái : « Geige gieđat ! »
Son dagai nu , ja giehta dearvvašmuvai .
Dalle sii vašáskedje ja árvališgohte gaskaneaset maid sii sáhtášedje dahkat Jesusiin .
Dan áiggi son manai várrái rohkadallat ja lei doppe ija rohkadallamin Ipmilii .
Go beaivi bođii , de son gohčui máhttájeddjiidis lusas , ja sin gaskkas son válljii guoktenuppelohkása geaid son gohčodii apoasttalin . Dat ledje Simmon , gean son maiddái gohčodii Biehtárin , ja su viellja Ándaras , Jáhkot ja Johanas , Filip ja Bartolomeus , Matteus ja Duomás , Jáhkot , Alfeusa bárdni , ja Simmon gii gohčoduvvui selotan , Judas , Jáhkoba bárdni , ja Judas Iskariot gii šattai beahttin .
Dasto son njiejai váris singuin ja bisánii muhtun jalgadassii .
Dasa ledje čoahkkanan stuora joavku su máhttájeddjiin ja ollu olbmot oppa Judeas ja Jerusalemis ja mearragáttis Tyrosa ja Sidona lahka . Sii ledje boahtán gullat su ja buoriduvvot buozalvasaineaset .
Maiddái sii geain ledje buhtismeahttun vuoiŋŋat , dearvvašmahttojuvvojedje , ja olles joavku geahččalii guoskkahit su , dasgo sus bođii dakkár fápmu mii buoridii buohkaid .
Jesus loktii čalmmiidis , geahčai máhttájeddjiidasas ja celkkii : Ávdugasat dii váivvážat , dasgo Ipmila riika lea din .
Ávdugasat dii geat dál nealgubehtet , dasgo dii gallehuvvobehtet .
Ávdugasat dii geat dál čierrubehtet , dasgo dii oažžubehtet boagustit .
Ávdugasat lehpet dii go olbmot vašuhit din , go sii olgguštit din ja bilkidit din ja fasttášit din nama Olbmobártni dihtii !
Illudehket dan beaivvi ja njuikkodehket ávus , dasgo din bálká lea stuoris almmis .
Dan seammá han dahke sin máddarat ge profehtaide .
Muhto vuoi din riggáid , dasgo dii lehpet juo ožžon iludet .
Vuoi din , geat dál lehpet gallásat , dasgo dii šaddabehtet nealgut .
Vuoi din , geat dál boagustehpet , dasgo dii šaddabehtet moraštit ja čierrut .
Vuoi din , go buohkat rábmojit din , dasgo nu dahke sin máddarat ge vearri profehtaide .
Muhto didjiide geat guldalehpet , mun cealkkán : Ráhkistehket vašálaččaideattet , dahket buriid sidjiide geat vašuhit din , buressivdnidehket sin geat garuhit din , ja rohkadallet sin ovddas geat cielahit din .
Jos muhtun doške du nuppi nirrii , de jorgal sutnje nuppi ge .
Jos muhtun rivve dus gávtti , de ale gieldde sus báiddi ge .
Atte juohkehažžii gii sihtá dus juoidá ja jos guhtege váldá dus dan mii dutnje gullá , de ale gáibit dan ruovttoluotta .
Nugo dáhttubehtet earáid dahkat alcceseattet , nu dahket dii ge sidjiide .
Jos dii ráhkistehpet dušše sin geat ráhkistit din , lea go das giitámuš ?
Velá suttolaččat ge ráhkistit daid geat ráhkistit sin .
Ja jos dii dahkabehtet buriid daidda geat dahket didjiide buriid , lea go das giitámuš ?
Dan han dahket suttolaččat ge .
Ja jos dii lonebehtet sidjiide geain vuordibehtet oažžut fas ruovttoluotta , lea go das giitámuš ?
Suttolaččat ge lonejit suttolaččaide vai oččošedje seammá ollu fas ruovttoluotta .
Muhto ráhkistehket vašálaččaidet , dahket buriid ja lonejehket vuorddekeahttá maidege ruovttoluotta .
Dalle din bálká šaddá leat stuoris ja dii šaddabehtet Alimusa mánnán , dasgo son lea buorre sidjiide geat leat giitemeahttumat ja bahát .
Lehket váibmoláđđásat , nugo Áhččádet ge lea váibmoláđis .
Allet dubme , de ehpet dii ge dubmejuvvo .
Allet dubme gáđohussii , de ehpet dii ge dubmejuvvo gáđohussii .
Addet ándagassii , de didjiide ge addojuvvo ándagassii .
Addet , de oažžubehtet : Buori mihtu , šluvgojuvvon , dekčojuvvon ja ravddaid dási oažžubehtet askái .
Dasgo didjiide mihtiduvvo seammá mihtuin go ieža ge geavahehpet .
Son muitalii sidjiide veardádusa : Sáhttá ba čalmmeheapme oahpistit čalmmeheami ?
Eaba go guktot dalle gahča roggái ?
Máhttájeaddji ii leat stuorit go oahpaheaddjis , muhto go son lea ollásit oahppan , de šaddá nugo oahpaheaddjis .
Manne oainnát riba oskuguoimmát čalmmis , muhto it fuomáš hirssa iežat čalmmis ?
Ja mo sáhtát dadjat oskuguoibmásat : « Oskuguoibmi , divtte mu váldit eret riba du čalmmis ! » go it oainne hirssa iežat čalmmis ?
Don guoktilaš ! Váldde vuos eret hirssa iežat čalmmis !
Easkka dalle oainnát čielgasit ja sáhtát váldit eret riba oskuguoimmát čalmmis .
Buorre muorra ii šaddat heajos šattuid ii ge heajos muorra buriid šattuid .
Muora dovdá dan šattuin .
Dasgo fiikkoniid ii čoakke gáskálasain ii ge viidnemurjjiid bastilislánjáin .
Buorre olmmoš buktá buriid váimmus buorrevuođa riggodagas , ja bahás olmmoš buktá baháid váimmus bahávuođas .
Dasgo mas váibmu lea dievva , dan han njálbmi sárdnu .
Manne dadjabehtet munnje : Hearrá , Hearrá ! ehpet ge daga dan maid mun cealkkán ?
Mun muitalan didjiide gean láhkásaš lea son guhte boahtá mu lusa ja gullá mu sániid ja dahká daid mielde .
Son lea olbmá láhkásaš gii goaivvui čiekŋalassii ja bijai geađgejuolggi bávtti ala go huksii viesu .
Go dulvi bođii , de johka čuzii viesu njeaiga , muhto dat ii lihkkasan , danne go dat lei huksejuvvon bures .
Muhto dat guhte gullá ii ge daga dan mielde , lea olbmá láhkásaš gii huksii viesu njuolga eatnama ala almmá geađgejuolggi haga .
Johka čuzii viesu njeaiga , ja dat gahčai dakkaviđe , ja viessu duššaduvvui .
Go Jesus lei sárdnidan dán olbmuide , de manai Kapernaumii .
Muhtun offisearas lei bálvaleaddji gean son anii árvvus , muhto bálvaleaddji lei buohcamin jápmindávddas .
Go offiseara gulai Jesusa birra , de vuolggahii su lusa muhtun juvddálaččaid vuorrasiid oaččuhit su boahtit gádjut bálvaleaddji heakka .
Sii bohte Jesusa lusa ja ánuhedje su garrasit : « Son ánssáša ahte don dagašit dán sutnje , dasgo son lea min álbmoga ustit ja lea huksen midjiide synagoga ge . »
Jesus manai sin fárrui .
Muhto go son lei juo lahka viesu , de offiseara bijai muhtun ustibiid Jesusa lusa dáiguin sániiguin : « Hearrá , ale váivvit iežat !
Mun in leat dohkálaš ahte don boađášit mu vissui . Danne in arvan ieš ge boahtit du lusa .
Muhto cealkke dušše ovtta sáni , de mu bálvaleaddji dearvvašmuvvá .
Dasgo mun lean ieš gohčohallama vuloš ja iežan vuolde gis leat soalddáhat .
Jos dajan nubbái : Mana !
de son manná , ja nubbái : Boađe !
de son boahtá , ja bálvaleaddjásan : Daga dán ! de son dahká dan . »
Jesus ovddošii go gulai dán , ja son jorggihii ja celkkii jovkui mii čuovui su : « Mun cealkkán didjiide : In Israelas ge leat gávdnan dákkár oskku . »
Ja go sii guđet ledje vuolggahuvvon , máhcce vissui , de gávdne bálvaleaddji dearvvašin .
Veahá maŋŋelaš Jesus vulggii muhtun gávpogii man namma lea Nain .
Máhttájeaddjit ja ollu olbmot vulge su fárrui .
Go son lahkanii gávpotportii , de muhtun jábmi guddojuvvui olggos .
Son lei eatnis áidna bárdni , ja su eadni lei leaska .
Ollu olbmot mieđuštedje nissona olggos gávpogis .
Go Hearrá oinnii leaskka , de árkkálmasttii su ja celkkii : « Ale čiero ! »
Son loaiddastii guoddinmuoraid ovdii ja guoskkahii daid ; guoddit orustedje , ja son celkkii : « Nuorra olmmái , mun cealkkán dutnje : Lihka ! »
De čohkánii jábmi ja hállagođii , ja Jesus attii su su eadnái .
Buohkat ballájedje , ja sii rámidedje Ipmila . Sii dadje : « Stuora profehta lea čuoččáldahtton min gaskii , ja Ipmil lea oahppaladdan álbmogis . »
Ja dát sáhka viidánii Judea ja biras eatnamiid miehtá .
Johanasa máhttájeaddjit muitaledje oahpaheaddjáseaset visot dáid dáhpáhusaid birra .
Dalle son gohčui guoktása sis lusas ja vuolggahii sudno Hearrá lusa dáinna jearaldagain : « Leat go don dat guhte galgá boahtit , vai galgat go mii vuordit muhtun eará ? »
Go olbmáguovttos bođiiga Jesus lusa , de dajaiga : « Gásttašeaddji Johanas lea vuolggahan munno jearrat dus : Leat go don dat guhte galgá boahtit , vai galgat go mii vuordit muhtun eará ? »
Aiddo dalle Jesus buoridii olusiid buozalvasain ja givssiin ja bahá vuoiŋŋain ja attii oainnu ollu čalmmehemiide . Ja son vástidii sudnuide : « Manni muitalit Johanassii maid leahppi oaidnán ja gullan : Čalmmeheamit oidnet , lápmásat vázzet , spihtálaččat buhtistuvvojit , bealjeheamit gullet , jábmit bajásčuožžilit , ja evangelium sárdniduvvo váivvážiidda ; ja ávdugas lea dat guhte mus ii vearrán . »
Go Johanasa áirasat leigga mannan , de Jesus sárdnugođii olbmuide Johanasa birra : « Manne dii manaidet meahccái ?
Oaidnit skáhčira sojadeamen biekkas ?
Ehpet !
Manne manaidet dohko ?
Oaidnit čábbát gárvodan olbmá ?
Sii guđet gárvodit hearvás biktasiiguin ja ellet badjelmearálašvuođas , ásset šloahtain .
Manne de manaidet dohko ?
Oaidnit profehta ?
Áibbas riekta , ja mun cealkkán didjiide : Eanet go profehta ! Son lea dat gean birra lea čállojuvvon : Geahča , mun vuolggahan áirasan du ovddabeale , son ráhkada dutnje geainnu .
Mun cealkkán didjiide : Sin gaskkas geat leat riegádan nissonis , ii leat oktage stuorit go Johanas , muhto vel uhcimus ge Ipmila riikkas lea stuorit go son .
Buot olbmot geat guldaledje Johanasa , tuollárat ge , atne Ipmila duohtan ja gásttašuvvojedje Johanasa gásttain .
Muhto farisealaččat ja láhkaoahpaheaddjit biehttaledje su gástta ja badjelgehčče Ipmila dáhtu .
Mainna mun veardidan dán sohkagotti olbmuid ?
Gean láhkásaččat sii leat ?
Sii leat mánáid láhkásaččat geat čohkkájit šiljus ja čurvot guhtet guimmiidasaset : Mii čuojaheimmet didjiide njurggonasa , ehpet ge dii gárron dánsut .
Mii lávlluimet didjiide morašlávlagiid , ehpet ge dii gárron čierrut .
Dasgo gásttašeaddji Johanas bođii ; ii son bora láibbi ii ge juga viinni , ja dii dadjabehtet : Sus lea bahá vuoigŋa .
Olbmobárdni bođii ; son sihke borrá ja juhká , ja dii dadjabehtet : Gehččet , man vuovdás ja viidnejuhkkis olmmái , tuolláriid ja suttolaččaid ustit !
Muhto buot viisodaga mánát dovddastit duohtan Viisodaga . »
Muhtun farisealaččain bovdii Jesusa ruktosis boradit , ja son bođii su lusa ja manai beavdái .
Dan gávpogis lei nisu gii elii suttolaš eallima .
Go son fuomášii ahte Jesus lei farisealačča guossis , de son bođii dohko , alabástalihtti mielde mas lei fiinna vuoiddas . Son manai Jesusa duohkái su julggiid gurrii ja čierui .
Nisu láktadišgođii Jesusa julggiid gatnjaliiguin , ja sihkui daid vuovttaidisguin , cummástalai daid ja vuoiddai daid vuoidasiin .
Go farisealaš gii lei bovden Jesusa , oinnii dán , de jurddašii iežainis : « Jos dát olmmái livččii profehta , de dieđášii makkár nisu dat lea gii lea guoskkahallamin su , dasgo son eallá suttolaš eallima . »
De Jesus vástidii farisealažžii : « Simmon , mus lea dutnje juoga dadjamuš . »
Son vástidii : « Daja , oahpaheaddji . »
Jesus celkkii : « Guokte olbmá leigga velggolaččat ruhtalonejeaddjái .
Nubbi lei velggolaš vihttačuohte denara , nubbi gis vihttalogi .
Muhto go sudnos ii lean mainna máksit , de luittii guktuide vealggi .
Goabbá sudnos ráhkista su eanebut ? »
Simmon vástidii : « Ii go son dat geasa luittii eanemusat . »
Jesus celkkii : « Don dajat riekta . »
Son jorggihii nissona guvlui ja celkkii Simmonii : « Oainnát go dán nissona ?
Go mun bohten du vissui , de it addán munnje čázi bassat julggiidan , muhto son láktadii daid gatnjaliiguin ja sihkui daid vuovttaidisguin .
Don it addán munnje buresboahtincummá , muhto dan rájes go mun bohten , son ii heaitán cummástallamis mu julggiid .
Don it vuoidan mu oaivvi oljjuin , muhto son vuoiddai mu julggiid vuoidasiin .
Danne mun cealkkán dutnje : Sutnje leat ándagassii addojuvvon buot su ollu suttut , danne son ráhkista ollu .
Muhto geasa uhcán ándagassii addojuvvo , son ráhkista uhcán . »
Ja son celkkii nissonii : « Du suttut leat ándagassii addojuvvon . »
Su beavdeguoimmit imaštallagohte : « Gii dát lea , go vel suttuid ge ándagassii addá ? »
Muhto Jesus celkkii nissonii : « Du osku lea beastán du
Mana ráfái ! »
Čuovvovaš áiggi Jesus jođii gávpogiid ja giliid mielde , ja sárdnidii ilolaš sága Ipmila riikka birra .
Sus ledje mielde dat guoktenuppelogis , ja muhtun nissonat ge geat ledje buoriduvvon bahá vuoiŋŋain ja buozalvasain . Sii ledje Márjá , geas lei lassinamman Magdalena , ja geas ledje áddjojuvvon olggos čieža bahá vuoiŋŋa , Johánná , gii lei náitalan Kuzain , Kuza lei Herodesa ámmátolmmái , ja Susánná ja ollu earát ; sii veahkehedje sin opmodagaideasetguin .
Ollu olbmot vulge biras gávpogiin , ja go sii čoagganedje su lusa , de son muitalii veardádusa : « Gilvi vulggii gilvit gortniidis .
Ja gilvvedettiin gahčče muhtun čalmmit geaidnogurrii ; dat dulbmojuvvojedje , ja almmi lottit borre daid .
Muhtun čalmmit gahčče geađgás eatnamii , ja dat goldne seammás go ihte , dasgo daidda ii lean doarvái lávttas .
Muhtun čalmmit gahčče bastilislánjáid gaskii , ja bastilislánját šadde daiguin seahkalagaid ja hávkadedje daid .
Muhto muhtun čalmmit gahčče šattolaš eatnamii , ja dat šadde ja šaddadedje šattuid , gitta čuođigeardásaččat . »
Go son lei cealkán dán , de čurvii : « Geas ležžet bealjit , son gullos ! »
Máhttájeaddjit jearahedje sus maid dát veardádus mearkkašii . Son vástidii : Didjiide lea addojuvvon dovdat Ipmila riikka čiegusvuođaid . Muhto earát leat ožžon daid veardádusaiguin , amaset sii oainnedettiineaset oaidnit ja guladettiineaset áddet .
Veardádus mearkkaša dán : Gilvagat leat Ipmila sátni .
Geaidnoguoras leat sii geat gullet , muhto de beargalat boahtá ja váldá sáni eret sin váimmus , amaset sii oskut ja bestojuvvot .
Geađgás eatnamis leat sii geat vuostáiváldet sáni iluin go gullet dan .
Muhto sis ii leat ruohtas ja oskot dušše oanehis bottoža ; go sii geahččaluvvojit , de jorralit .
Bastilislánjáid gaskkas leat sii geat gal gullet sáni , muhto vádjolettiin eallima váivviid , riggodagaid ja návddašemiid čađa , sii hávkaduvvojit , nu ahte eai šaddat láddan šattuid .
Muhto šattolaš eatnamis leat sii geat gullet sáni , vurkejit dan buhtes ja buori váibmui ja šaddadit šattuid gierdavašvuođa bokte .
Ii oktage cahkket gintala ja bija dan lihti dahje seaŋgga vuollái ; muhto baicca ginttaljuolgái , vai sii geat bohtet sisa , oidnet čuovgga .
Dasgo ii mihkkege leat čihkosis mii ii almmustuva , ii ge mihkkege leat čihkkojuvvon mii ii boađe albmosii ja čuovgga ovdii .
Váruhehket dan dihtii mo dii gullabehtet ! Dasgo sutnje geas lea , addojuvvo . Muhto geas ii leat , sus váldojuvvo eret velá dat ge maid ieš gáddá alddis leat .
Su eadni ja su vieljat bohte dohko , muhto sii eai beassan Jesusa lusa ollu olbmuid dihtii .
Muhtumat dadje sutnje : « Du eadni ja du vieljat leat olggobealde ja hálidivčče háleštit duinna . »
Muhto son vástidii sidjiide : « Mu eadni ja mu vieljat , dat leat buohkat geat gullet Ipmila sáni ja ellet dan mielde . »
Muhtun beaivvi son manai fatnasii máhttájeddjiidisguin ja dajai sidjiide : « Vulgot don beallái jávrri . »
Sii vulge , ja borjjastettiin son nohkai .
Muhto jorribiegga bosui jávrri mielde , fanas devdogođii , ja sii šadde stuora heahtái .
Dalle sii bokte su ja čurvejedje : « Oahpaheaddji , oahpaheaddji , mii heavvanit ! »
Son čuožžilii ja šikkui biekka ja alla báruid , nu ahte dat lotkkodedje ja šattai fas goalki .
Son jearai sis : « Gos lea din osku ? »
Muhto dievva balus ja ovddošeamis sii dadje guhtet guimmiidasaset : « Gii son lea ?
Son šiggu sihke biekka ja čázi , ja dat jeagadit su . »
Dál sii láddejedje Gerasa lahka , mii lea aiddo Galilea buohta .
Go Jesus loaiddastii gáddái , de bođii muhtun dan gávpoga olmmái su ovddal geas ledje bahá vuoiŋŋat .
Guhkes áigái son ii lean gárvodan ii ge orron viesus , muhto hávderáiggiin .
Go son áiccai Jesusa , de gilljugođii , luoitádii su ovdii ja čuorvvui alla jienain : « Jesus , Alimus Ipmila Bárdni , mii dus lea muinna dahkamuššan ?
Mun ánuhan dus : Ale givssit mu ! »
Dasgo Jesus lei gohččon buhtismeahttun vuoiŋŋa vuolgit olbmás .
Son lei guhká leamaš bahá vuoiŋŋa hálddus .
Dávjá sii ledje čatnan su láhkkiiguin ja juolgeruvddiiguin ja fákten su , muhto son lei biđgen láhkkiid ja bahá vuoigŋa lei dolvon su meahccái .
Jesus jearai : « Mii du namma lea ? »
Son vástidii : « Legion , » dasgo ollu bahá vuoiŋŋat ledje namalassii mannan olbmá sisa .
Ja sii ánuhedje Jesusa ahte ii gohčoše sin mannat njillui .
Stuora spiidneeallu lei guohtumin vári lahka , ja bahá vuoiŋŋat ánuhedje sus ahte son suovašii sin mannat daid sisa , ja son suovai dan .
De bahá vuoiŋŋat vulge olbmás ja manne spiinniid sisa , ja oppa eallu hurgalii báktedardda badjel vuolás jávrái ja heavvanii .
Muhto go spiidneguođoheaddjit oidne mii lea dáhpáhuvvan , de viehkaledje muitalit gávpogis ja lagas báikkiin . Ja olbmot vulge geahččat mii lea dáhpáhuvvan .
Sii bohte Jesusa lusa ja gávdne olbmá geas bahá vuoiŋŋat ledje vuolgán . Son lei čohkkámin Jesusa julggiid guoras , gárvodan , ja olles mielaid alde . De sii suorganedje .
Muhto sii geat ledje oaidnán visot , muitaledje mo dat olmmoš geas ledje bahá vuoiŋŋat , lei gáddjojuvvon .
Buot gerasalaččat ja earát lagas guovlluin dáhtto Jesusa vuolgit eret , dasgo sii ledje sakka ballán .
Ja son manai dalle fatnasii ja vulggii ruovttoluotta . Olmmái geas bahá vuoiŋŋat ledje vuolgán , dáhtui beassat su mielde . Muhto Jesus luittii su mannat ja celkkii : « Mana ruoktot ja muital makkár stuora daguid Ipmil lea dahkan dutnje . »
Son vulggii ja almmuhii olles gávpogii man stuora daguid Jesus lei dahkan sutnje .
Go Jesus bođii ruovttoluotta , de olles joavku válddii su vuostái , dasgo buohkat ledje vuordimin su .
Dalle bođii muhtun olmmái gean namma lei Jairos ja gii lei synagoga ovddasčuožžu .
Son luoitádii Jesusa julggiid ovdii ja ánuhii su vuolgit ruoktot iežas mielde , dasgo su áidna nieida , gii lei birrasiid guoktenuppelotjahkásaš , lei jápmimin .
Dohko manadettiin bahkkejedje olbmot su ala juohke guovllus .
Das lei nisu geas ledje leamaš vardimat guoktenuppelot jagi .
Son lei golahan buot opmodagas dálkkasteddjiide , muhto ii oktage lean veadján buoridit su .
Son lahkanii Jesusii maŋil ja guoskkahii su bivttasdiehpi , ja vardimat orustedje dakkaviđe .
Jesus jearai : « Gii guoskkahii mu ? »
Muhto go ii oktage dovddastan dan , de Biehtár dajai : « Oahpaheaddji , olbmot hoiget ja bahkkejit juohke guovllus du ala . »
Muhto Jesus celkkii : « Muhtun guoskkahii mu , dasgo mun dovden alddán mannamin vuoimmi . »
Go nisu árvidii ahte ii lean čiegadeames , de bođii doarggis ovdan . Son luoitádii Jesusa ovdii ja muitalii sutnje buohkaid gullut manne son lei guoskkahan su ja mo son dakkaviđe lei dearvvašmahttojuvvon .
Jesus celkkii sutnje : « Nieidan , du osku lea beastán du
Mana ráfái ! »
Go son lei ain sárdnumin , de muhtun bođii synagoga ovddasčuožžu viesus ja dajai : « Du nieida lea jápmán .
Ale šat vuorjja oahpaheaddji ! »
Jesus gulai dan ja celkkii áhččái : « Ale bala , duššefal oskko , de son gáddjojuvvo . »
Go son bođii viesu lusa , de ii suovvan earáid sisa go Biehtára , Johanasa ja Jáhkoba , ja nieidda áhči ja eatni .
Buohkat ledje čierrumin ja luoibmamin nieidda dihtii .
Muhto Jesus celkkii : « Allet čiero !
Ii son leat jápmán ; son lea oađđimin . »
Sii boagustedje su , dasgo sii dihte ahte nieida lei jápmán .
Muhto Jesus válddii nieidda gihtii ja čurvii : « Mánná , lihka ! »
De sutnje bođii fas heagga , ja son čuožžilii dakkaviđe . Ja Jesus gohčui sin addit niidii borrat .
Nieidda vánhemat hirpmástuvaiga , muhto Jesus gilddii sudno muitaleames geasage dan mii lei dáhpáhuvvan .
Son rávkkai čoahkkái dan guoktenuppelohkása ja attii sidjiide fámu ja válddi ráđđet buot bahá vuoiŋŋaid ja fámu buoridit buozalvasaid .
Son vuolggahii sin sárdnidit Ipmila riikka ja buoridit buhcciid , ja son celkkii sidjiide : « Allet váldde mielddádet maidege mátkái , allet soappi dahje lávkka allet ge láibbi dahje ruđaid , allet ge eambbo go guokte gávtti .
Ja gos ihkinassii bođežehpet vissui , de orrot das dassážii go vuolgibehtet fas .
Muhto jos eai váldde din vuostái , de guđđet dan gávpoga ja savdnjilehket sádduid julggiineattet duođaštussan sin vuostái . »
Sii vulge ja johte báikkis báikái , ja juohke sajis sii sárdnidedje evangeliuma ja buoridedje buhcciid .
Guovllugonagas Herodes gulai buot dáid dáhpáhusaid birra , ii ge diehtán maid galggai jáhkkit .
Dasgo muhtumat dadje ahte Johanas lei bajásčuoččáldahttojuvvon jábmiid luhtte , earát ahte Elia lei almmustuvvan , earát fas ahte muhtun boares profehtain lei bajásčuožžilan .
Muhto Herodes dajai : « Johanasas mun lean diktán čuohppat oaivvi eret ; gii de lea dat gean birra mun gulan buot dáid ? »
Ja son geahččalii deaivvadit Jesusiin .
Apoastalat máhcce ja muitaledje Jesusii buot maid sii ledje dahkan .
Son válddii sin mielddis ja vulggii sierranassii muhtun gávpoga lahka man namma lea Betsaida .
Muhto olbmot fuomášedje dan ja bohte su maŋis .
Son válddii sin vuostái ja sártnui sidjiide Ipmila riikka birra , ja son buoridii sin geat dárbbašedje veahki .
Go veiggodišgođii , de dat guoktenuppelogis bohte su lusa ja dadje : « Vuolggat olbmuid dáppe eret , vai sii besset mannat gávpogiidda ja lagas dáluide , oažžut alcceseaset idjasaji ja biepmu ; dáppe han mii leat meahcis . »
Muhto Jesus vástidii : « Addet dii sidjiide borramuša ! »
Sii vástidedje : « Eai han mis leat eanet go vihtta láibbi ja guokte guoli , jos juo ieža eat manaše oastit borramuša buot dáidda olbmuide . »
Das ledje sullii vihtta duhát olbmá .
Ja son celkkii máhttájeddjiidasas : « Čohkánahttet sin joavkkuide , vihttalogis ain . »
Sii dahke nu ja gohččo buohkaid čohkánit .
Dasto son válddii dan vihtta láibbi ja guokte guoli , geahčai almmi guvlui ja rohkadalai giittusrohkosa .
Son doadjalii daid ja attii máhttájeddjiidasas , vai sii juogadivčče daid olbmuide .
Ja sii borre buohkat ja gallánedje , maŋŋil čohkkejedje báhcán bihtáid , oktiibuot guoktenuppelot veaddelihti .
Go son oktii lei rohkadallamin oktonassii , dušše máhttájeaddjit ledje suinna , de son jearai sis : « Geanin olbmot dadjet mu ? »
Sii vástidedje : « Muhtumat dadjet gásttašeaddji Johanassan , earát dadjet Elian , ja earát gis ahte muhtun boares profehtain lea bajásčuožžilan . »
Son jearai : « Na ba dii , geanin dii dadjabehtet mu ? »
De Biehtár vástidii : « Don leat Ipmila Messias . »
Muhto son gilddii sin garrasit muitaleames dán geasage , ja lasihii : « Olbmobárdni ferte gillát ollu , ja vuorrasat , bajitbáhpat ja čálaoahppavaččat hilgot su . Son goddojuvvo , muhto bajásčuoččáldahttojuvvo fas goalmmát beaivvi . »
Jesus celkkii buohkaide : « Jos guhtege dáhttu boahtit mu maŋis , de biehttalehkos iežas , váldos ruossas juohke beaivvi ja čuvvos mu .
Dasgo dat guhte viggá gádjut heakkas , massá dan . Muhto dat guhte massá heakkas mu dihtii , gádju dan .
Mii ávkkiid lea olbmui jos dat vel vuoitá ge oppa máilmmi , muhto massá heakkas ja duššá ?
Dasgo dat guhte heahpanaddá mus ja mu sániin , sus heahpana Olbmobárdni ge go son boahtá iežas ja Áhčis ja bassi eŋgeliid hearvásvuođas .
Duođaid , mun cealkkán didjiide : Muhtumat sis geat leat čuožžumin dás , eai muosát jápmima ovdal go oidnet Ipmila riikka . »
Sullii gávcci beaivvi maŋŋil go Jesus lei cealkán dán , son válddii fárrosis Biehtára , Johanasa ja Jáhkoba ja manai várrái rohkadallat .
Rohkadaladettiin su ámadadju nuppástuvai áibbas , ja su biktasat šadde vielgadin ja šearradin .
Fáhkka guokte olbmá , Movsses ja Elia , leigga sártnodeamen suinna .
Soai oidnuiga hearvásvuođas ja hálaiga suinna su jápmima birra , man son fertii ollašuhttit Jerusalemis .
Biehtár ja su guoimmit ledje lossadit nohkkan , muhto morihedje ja oidne su hearvásvuođa ja olbmáguovtto geat leigga čuožžumin su luhtte .
Go olbmát leigga guođđimin sin , de Biehtár dajai Jesusii : « Oahpaheaddji , lea buorre go mii leat dáppe .
Ceggejehkot golbma goađi , ovtta dutnje , ovtta Movssesii ja ovtta Eliai » .
Muhto ii son diehtán maid dajai .
Dan botta go Biehtár lei sárdnumin , bođii balva ja suoivvanasttii sin , ja go sii jávke balvva sisa , de máhttájeaddjit suorganedje .
Ja balvvas gullui jietna : « Dát lea mu Bárdni gean mun lean válljen .
Guldalehket su ! »
Maŋŋil go jietna lei sárdnon , de sii oidne Jesusa okto .
Máhttájeaddjit orro jávohaga eai ge dalle muitalan geasage maid ledje oaidnán .
Nuppi beaivvi , go sii njidje váris , de bođii stuora olmmošjoavku su ovddal .
Ja muhtun olmmái joavkkus čuorvvui : « Oahpaheaddji , mun ánuhan dus : Geahča mu bártni beallái , mu áidna bártni !
Vuoigŋa láve dohppet su , ja fáhkkestaga son gilljáda , ja dat gaiku ja givssida su nu ahte soalssida ; dat illásta su , ii ge dáhtoše luoitit su .
Mun sihten du máhttájeddjiid ádjit olggos vuoiŋŋa , muhto eai sii veadján dahkat dan . »
De Jesus vástidii : « Eahpeoskkolaš ja jorggu sohkagoddi !
Man guhká mun ferten leat din luhtte ja gierdat din ?
Buvtte bártnát deike ! »
Ovdal go bárdni joavddai Jesusa lusa , de bahá vuoigŋa rohttii su veallut ja gaikkodišgođii su .
Muhto Jesus šikkui buhtismeahttun vuoiŋŋa ja dearvvašmahtii bártni , ja son attii su fas áhččásis .
Ja buohkat ovddošedje Ipmila stuora fámu .
Dan botta go buohkat ledje ovddošeamen dan maid Jesus dagai , son celkkii máhttájeddjiidasas : « Dárkojehket dan maid mun dál cealkkán : Olbmobárdni addojuvvo fargga olbmuid gieđaide . »
Muhto sii eai ádden dán ; dat lei čihkkojuvvon sidjiide , vai sii eai áddeše dan , eai ge duostan jearrat sus maid son oaivvildii .
Máhttájeaddjit smiehttagohte guhtemuš sis leažžá stuorimus .
Muhto Jesus árvidii maid sii jurddašedje váimmuineaset . Dan dihtii válddii uhca mánáža , bijai dan báldasis ja celkkii sidjiide : « Dat guhte vuostáiváldá dán máná mu nammii , vuostáiváldá mu .
Ja dat guhte vuostáiváldá mu , vuostáiváldá su guhte lea vuolggahan mu .
Dasgo son guhte lea unnimus din buohkaid gaskkas , lea stuoris . »
Johanas sárdnugođii : « Oahpaheaddji , mii oinniimet muhtuma ádjimin olggos bahá vuoiŋŋaid du nammii , ja mii geahččaleimmet hehttet su , go juo son ii leat min searvvis . »
Muhto Jesus vástidii : « Allet hehtte su !
Dat guhte ii leat din vuostái , lea din beale . »
Go lahkanišgođii dat áigi goas Jesus galggai váldojuvvot albmái , de son dáhtui vuolgit Jerusalemii , ja son vuolggahii áirasiid ovddastis , ja sii vulge ja bohte muhtun Samaria gávpogii ohcat idjasaji Jesusii .
Muhto doppe eai dáhtton vuostáiváldit su , danne go lei johtimin Jerusalemii .
Go máhttájeaddjiguovttos Jáhkot ja Johanas gulaiga dán , de jearaiga : « Hearrá , dáhtut go munno rávkat dola almmis vuolás loahpahit sin nugo Elia dagai ? »
Muhto son jorggihii ja cuiggodii sudno : « Doai eahppi dieđe makkár vuoiŋŋas doai leahppi vuolggahuvvon . De sii jotke eará gávpogii .
Go sii ledje vádjoleamen geainnu mielde , de muhtun dajai sutnje : « Mun áiggun čuovvut du gosa ihkinassii manažat . »
Jesus vástidii : « Riebaniin leat biejut , ja almmi lottiin leat beasit , muhto Olbmobártnis ii leat sadji gos vuoiŋŋastahtášii oaivvis . »
Muhtun earái son celkkii : « Čuovo mu ! »
Muhto olmmái vástidii : « Hearrá , suova mu vuos mannat ruoktot hávdádit áhččán . »
Muhto Jesus celkkii sutnje : « Anne jábmit hávdádit jábmiideaset , muhto vuolgge sárdnidit Ipmila riikka ! »
Muhtun eará dajai : « Mun áiggun čuovvut du , Hearrá , muhto suova mu vuos dahkat dearvvuođaid ruovttu olbmuide . »
Muhto Jesus vástidii : « Ii oktage gii bidjá gieđas bealdoruovddi ala ja geahčasta maŋás , leat dohkálaš Ipmila riikii . »
Das maŋŋil Hearrá válljii velá čiežalogi earáid ja vuolggahii sin ovddastis iežas áirrasin , guoktása ain fárrolagaid , juohke gávpogii ja juohke báikái gos ieš áiggui fitnat .
Son celkkii sidjiide : Ládju lea stuoris , muhto bargit uhcán .
Rohkadallet dan dihtii láju isida vuolggahit bargiid lájuidasas .
Vulget ! Mun vuolggahan din dego lábbáid gumppiid gaskii .
Allet váldde mielde burssa , allet lávkka allet ge gápmagiid . Allet buorástahte ovttage mátkki alde .
Muhto go boahtibehtet muhtun vissui , de dadjet vuosttaš sátnin : « Ráfi lehkos dán ruktui ! »
Jos das lea muhtun gii váldá vuostái ráfi , de dat ráfi maid dii buktibehtet , bissu su badjel , muđuid dat máhccá didjiide .
Orrot dan viesus , ja borret ja juhket dan maid sii fállet didjiide ! Dasgo bargi lea bálkkás veara .
Allet jođe dálus dállui !
Go dii boahtibehtet muhtun gávpogii ja sii vuostáiváldet din , de borret dan maid sii fállet didjiide , buoridehket buhcciid geat leat das , ja dadjet ássiide : « Ipmila riika lea boahtán din lusa . »
Muhto go dii boahtibehtet muhtun gávpogii eai ge olbmot váldde din vuostái , de mannet olggos geainnuid ala ja dadjet : « Mii savdnjilit eret velá sádduid ge mat leat darvánan min julggiide din gávpogis , duođaštussan din vuostái .
Muhto fuomášehket dan : Ipmila riika lea boahtán lahka . »
Mun cealkkán didjiide : Sodomai geavvá geahppaseabbot duopmobeaivvi go dan gávpogii .
Vuoi du , Korasin !
Vuoi du , Betsaida !
Jos dat oavdudagut mat leat dahkkojuvvon dudno guovllus , livčče dáhpáhuvvan Tyrosis dahje Sidonis , de dat livččiiga áigá juo dahkan jorgalusa ja čohkkán gunaid siste seahkat badjelis .
Muhto Tyrosii ja Sidonii geavvá geahppaseabbot duomus go dudnuide .
Ja don Kapernaum , guhte dáhtošit bajiduvvot gitta almmi rádjái , don norddastuvvot vuolás jábmiid riikii !
Dat guhte gullá din , gullá mu , ja dat guhte hilgu din , hilgu mu .
Muhto dat guhte hilgu mu , hilgu su guhte lea vuolggahan mu .
Dat čiežalogis máhcce iluin ja dadje : « Hearrá , velá bahá vuoiŋŋat ge jeagadit min go mii namahit du nama ! »
Son vástidii : « Mun oidnen Sáhtána gahččamin vuolás almmis dego álddagas .
Duođaid , mun lean addán didjiide fámu duolbmat gearbmašiid ja skorpiovnnaid ja soardit buot vašálačča fámu , ii ge mihkkege vahágahte din .
Ja dattege : Allet illut das go vuoiŋŋat jeagadit din , muhto illudehket das ahte din namat leat čállojuvvon albmái . »
Dan seammás son ávvudii Bassi Vuoiŋŋas ja celkkii : « Mun rámidan du , Áhččán , almmi ja eatnama Hearrá , danne go leat čiehkan dán viisáin ja jierpmálaččain , muhto leat almmustahttán dan uhcahaččaide .
Duođaid , Áhččán , nu lei du buorre dáhttu .
Buot lea Áhččán oskkildan munnje .
Ii oktage dieđe gii Bárdni lea earet Áhči , ii ge oktage dieđe gii Áhčči lea earet Bártni ja dan geasa Bárdni dáhttu almmustahttit su . »
Go son lei okto máhttájeddjiidisguin , de celkkii sidjiide : « Ávdugasat dat čalmmit mat oidnet dan maid dii oaidnibehtet !
Dasgo mun cealkkán didjiide : Ollu profehtat ja gonagasat livčče hálidan oaidnit dan maid dii oaidnibehtet , eai ge beassan oaidnit dan , ja gullat dan maid dii gullabehtet , eai ge beassan gullat dan . »
Muhtun láhkadovdi bođii dasa ja hálidii geahččalit Jesusa . Son dajai : « Oahpaheaddji , maid mun galggan dahkat vai oččošin agálaš eallima ? »
Jesus jearai : « Mii lea čállojuvvon láhkii ?
Maid don logat das ? »
Son vástidii sutnje : « Don galggat ráhkistit Hearrá Ipmilat oppa váimmustat ja oppa sielustat ja oppa fámustat ja oppa mielastat , ja lagamuččat nugo iežat . »
Jesus celkkii : « Don vástidit riekta . Daga nu , de don oaččut eallit . »
Muhto nubbi vikkai dahkat iežas vanhurskkisin ja jearai : « Gii de lea mu lagamuš ? »
Dán jearaldahkii Jesus vástidii : Olmmái lei mannamin Jerusalemis vuolás Jerikoi , ja son šattai rievváriid gieđaid gaskii .
Sii gaiko sus biktasiid eret , cábme su ja guđđe su dasa bealleheggii .
De deaivvai báhppa boahtit seammá geainnu ; son oinnii su , muhto manai njuolga meattá .
Nu dagai maiddái muhtun levihtta ; son bođii , oinnii olbmá ja manai meattá .
Muhto muhtun samarialaš gii lei johtimin , bođii maid dakko gokko olmmái lei veallámin ; ja go son áiccai olbmá , de árkkálmasttii su váimmustis .
Son manai su lusa , čanai su háviid ja leaikkui oljju ja viinni daidda , loktii su ásenis ala ja doalvvui su guossevissui ja divššui su .
Nuppi iđida son válddii guokte denara , attii dáluisidii ja dajai : « Divššo su bures ; ja jos golaheaččat eambbo ruđaid , de mun mávssán go boađán ruovttoluotta . »
Guhtemuš dán golbmasis orui du mielas leamen rieviduvvon olbmá lagamuš ?
Son vástidii : « Dat gii čájehii sutnje váibmoláđisvuođa . »
Jesus celkkii : « Mana don ge ja daga nu . »
Vádjolettiin son bođii muhtun gillái , gos Mártá-nammasaš nisu vuostáiválddii su ruovttustis .
Márttás lei oabbá gean namma lei Márjá ; son čohkánii Hearrá julggiid ovdii ja guldalii su sániid .
Muhto Mártá lei doaimmas buot bargguiguin bálvalan dihtii gussiid .
Son bođii sudno lusa ja dajai : « Hearrá , it go beroš go mu oabbá diktá mu okto buot bargat ?
Daja sutnje ahte galgá veahkehit mu . »
Muhto Hearrá vástidii sutnje : « Mártá , Mártá ! Don muosehuvat ja ražat nu máŋggain áššiin . Muhto goit okta lea dárbbašlaš .
Márjá lea válljen buori oasi , ja dat ii váldojuvvo sus eret . »
Jesus lei rohkadallamin muhtun báikkis .
Go son lei geargan rohkadallamis , de muhtun su máhttájeddjiin dajai sutnje : « Hearrá , oahpat min rohkadallat , nugo Johanas oahpahii máhttájeddjiidis . »
Son vástidii : « Go rohkadallabehtet , de dadjet ná : Áhččámet , don guhte leat almmis ! Basuhuvvos du namma .
Bohtos du riika .
Šaddos du dáhttu mo almmis nu maiddái eatnama alde .
Atte midjiide juohke beaivvi beaivválaš láibbi .
Atte midjiide min suttuid ándagassii , dasgo mii gis addit ándagassii juohkehažžii guhte lea midjiide velggolaš .
Ale ge doalvvo min geahččalussii , muhto beastte min bahás eret . »
Son celkkii sidjiide : « Jos mat muhtun dis manná ustiba lusa gaskaija áiggi ja dadjá sutnje : Ustiban , lone munnje golbma láibbi , dasgo buorre ustit lea boahtán mu lusa mátkkistis , ii ge mus leat maid sutnje guossohit .
Jáhkkibehtet go ahte nubbi dalle vástida : Ale ráfehuhte mu !
Uksa lea juo gitta , ja sihke mánát ja mun ieš leat seaŋggas .
In mun sáhte lihkkat addit maidege dutnje .
Muhto mun cealkkán didjiide : Jos son ii lihkaše ge addit sutnje maidege ustitvuođa dihtii , de dagašii dan goittot su sihtavašvuođa dihtii , ja attášii sutnje buot maid dárbbaša .
Mun cealkkán didjiide : Átnot , de oažžubehtet .
Ohcet , de gávdnabehtet .
Goalkkuhehket , de didjiide rahppojuvvo uksa .
Dasgo dat guhte átnu , oažžu , ja dat guhte ohcá , gávdná , ja guhte goalkkuha , sutnje rahppojuvvo uksa .
Lea go ba din gaskkas áhčči gii attášii bárdnásis gearbmaša go dat sihtá sus guoli , dahje attášii sutnje skorpiovnna go dat sihtá sus moni ?
Go vel dii ge geat lehpet bahát , áddebehtet addit buriid attáldagaid mánáidasadet , ii go Áhččádet ollu eanebut attáše Bassi Vuoiŋŋa almmis sidjiide geat átnot sus ! »
Jesus ájii oktii bahá vuoiŋŋa olggos muhtun gielaheamis , ja go dat vulggii sus , de gielaheapmi sárdnugođii ja olbmot ovddošedje .
Muhto muhtumat sis dadje : « Son ádjá olggos bahá vuoiŋŋaid Beelsebula , bahá vuoiŋŋaid oaivámučča fámuin . »
Earát gáibidedje sus mearkka almmis geahččalan dihtii su .
Muhto son diđii sin jurdagiid ja celkkii sidjiide : Riika mii lea soahpameahttun iežainis , šaddá ávdimin , ja nubbi viessu gahččá nuppi ala .
Jos dál Sáhtán lea soahpameahttun iežainis , mo sáhttá su riika dalle bissut ?
Dasgo dii han dadjabehtet ahte Beelsebula fámuin mun áján olggos bahá vuoiŋŋaid .
Muhto jos mun dagan dan Beelsebula fámuin , gean fámuin din iežadet oahppit ádjet olggos bahá vuoiŋŋaid ?
Dan dihtii sii šaddet din duopmárin .
Muhto jos mun áján olggos bahá vuoiŋŋaid Ipmila suorpma bokte , dalle han Ipmila riika lea boahtán din gaskii .
Go gievrras , vearjuduvvon olmmái suodjala dálus , de su opmodat oažžu orrut ráfis .
Muhto jos muhtun boahtá gii lea velá gievrrat ja vuoitá su , dalle son váldá sus vel daid vearjjuid maidda nubbi lea luohttán , ja juogada sállaša earáide maid .
Dat guhte ii leat mu beale , lea mu vuostái ; dat guhte ii čohkke muinna , biđge .
Go buhtismeahttun vuoigŋa vuolgá olbmos , de dat vádjola ávdin duoddariid badjel ohcamin vuoiŋŋastanbáikki .
Muhto jos ii gávnna , de dadjá : « Mun áiggun máhccat vissosan man guđđen . »
Dat boahtá dohko ja gávdná dan suohpalastojuvvon ja čiŋahuvvon . De dat vuolgá viežžat čieža eará vuoiŋŋa vel , bahábuid go son ieš , ja sii fárrejit sisa ja ássagohtet doppe .
Ja dan olbmo maŋit dilli šaddá vearrábun go ovddit dilli .
Go Jesus lei sárdnumin , de muhtun nisu olbmuid gaskkas čuorvvui alla jienain : « Ávdugas dat eatniheagga mii guttii du ja čižži maid don njammet . »
Muhto Jesus vástidii : « Ávdugasat sii guđet gullet Ipmila sáni ja vurkejit dan . »
Go velá eanet olbmot čoagganedje su birra , de sárdnugođii : Dát sohkabuolva lea bahás sohkabuolva .
Dat gáibida mearkkaid , muhto ii dat oaččo eará mearkka go Jona mearkka .
Dasgo nugo Jona šattai mearkan Ninive olbmuide , nu Olbmobárdni ge šaddá mearkan dán sohkii .
Duopmobeaivvi lullieatnama dronnet bajásčuožžila oktan dán sohkabuolvva olbmuiguin ja váidala sin . Dasgo son bođii gitta eatnama gežiin guldalit Salomo viisodaga , muhto dás lea eanet go Salomo !
Ninive olbmot bajásčuožžilit dupmui oktan dán sohkabuolvva olbmuiguin ja váidalit sin . Dasgo Jona sárdnidettiin sii dahke jorgalusa , muhto dás lea eanet go Jona !
Ii oktage cahkket gintala ja bija dan geallárii dahje lihti vuollái , muhto ginttaljuolgái , vai sii geat bohtet sisa , oidnet dan báitimin .
Čalbmi lea rupmaša čuovga .
Go du čalbmi lea dearvvaš , de oppa du rumaš čuvgejuvvo . Muhto jos čalbmi lea buozas , de du rumaš ge lea seavdnjat .
Várut dasto amas čuovggas mii lea du siste , leat seavdnjadas !
Jos dál oppa du rumaš čuvgejuvvo ii ge oktage oassi das leat seavdnjadasas , de dat čuvgejuvvo ollásit , dego dalle go čuovgi ginttal báitá du ala .
Go son lei sárdnumin , de muhtun farisealaš bovdii su boradit , ja son vulggii mielde ja čohkánii beavdái .
Farisealaš ovddošii go oinnii ahte Jesus ii basadan ovdal mállásiid . Muhto Hearrá celkkii sutnje : « Dii farisealaččat buhtistehpet lihtiid ja gáriid aivve olggul , muhto siskkil dii lehpet dievva rievádusas ja bahávuođas .
Dii jallat ! Son gii lea sivdnidan olgguldasa , ii go son leat sivdnidan siskkáldasa ge ?
Addet baicca váivvážiidda dan mii lea din lihtiin ja gáriin , de buot šaddá didjiide buhtisin .
Muhto vuoi din , farisealaččat ! Dii addibehtet logádasa minttain , urttasšattuin ja juohkelágán ruttain , muhto vajáldahttibehtet vuoigatvuođa ja ráhkisvuođa Ipmilii .
Dán galggašeiddet dahkat , vajáldahtekeahttá nuppi .
Vuoi din , farisealaččat ! Dii dáhttubehtet čohkkát synagogaid buoremus sajiin ja hálidehpet olbmuid buorástahttit din márkanšiljus .
Vuoi din ! Dii lehpet dego dovdameahttun hávddit , eai ge olbmot dieđe go sii dulbmet daid . »
De muhtun láhkadovdiin dajai : « Oahpaheaddji , dakkár sániiguin hiddjidat maiddái min ge . »
Jesus vástidii : « Vuoi din , láhkadovdit !
Dii losiidahttibehtet olbmuid nođiiguin , muhto ieža dii ehpet guoskkat daid suorpmain ge .
Vuoi din ! Dii huksebehtet hávdemuittuid profehtaide geaid din máddarat godde !
Dan láhkái dii šaddabehtet duođašteaddjin geat dohkkehehpet dan maid din máddarat dahke . Dasgo sii godde profehtaid , ja dii huksebehtet sin hávdemuittuid .
Dan dihtii lea ge Ipmila viissisvuohta cealkán : Mun vuolggahan sin lusa profehtaid ja apoastaliid ; muhtumiid sis sii goddet , earáid sii doarrádallet .
Danne galgá dát sohka vástidit buot daid profehtaid varaid ovddas mat leat golggahuvvon gitta máilmmi vuođđudeami rájes , Abela goddima rájes gitta Sakarja goddima rádjái , gii goddojuvvui áltára ja tempela gaskkas .
Duođaid , mun cealkkán ahte dát buolva galgá vástidit daid ovddas .
Vuoi din , láhkadovdit ! Dii lehpet váldán eret dieđu čoavdaga .
Ieža dii ehpet mannan sisa , ja dii hehttiidet sin geat dáhtto mannat sisa . »
Go Jesus vulggii das , de čálaoahppavaččat ja farisealaččat bahkkegohte garrasit su ala juohkelágán gažaldagaiguin . Sii fáktejedje su ja geahččaledje oččodit su dadjat juoidá mainna sáhtášedje váidit su .
Dan botta čoahkkanedje duháhiid mielde olbmot , nu ahte goasii dulbme guhtet guimmiideaset .
Jesus sárdnugođii , ovddimustá máhttájeddjiidasas : Váruhehket farisealaččaid suvrradáiggis mii lea guoktilašvuohta !
Ii mihkkege leat gokčojuvvon mii ii almmustuva ii ge mihkkege čihkkojuvvon mii ii boađe albmosii .
Maid ihkinassii dii lehpet dadjan seavdnjadasas , gullo čuovgadin , ja dat maid dii lehpet savkalan olbmuid beljiide siskkimus lanjas , čurvojuvvo dáhkiid alde .
Ustibiiddán , mun cealkkán didjiide : Allet bala sis geat goddet rupmaša , muhto das maŋŋil eai veaje dađe eanet .
Mun čájehan didjiide geas dii galgabehtet ballat : Ballet sus geas vuos lea fápmu goddit ja dasto bálkestit helvehii .
Duođaid , mun cealkkán didjiide : Ballet sus !
Eai go vihtta cizáža vuvdojuvvo guovtti skillegii ?
Ii ge Ipmil vajáldahte ovttage dain .
Muhto velá juohke vuoktačalbmi din oaivvis lea lohkkojuvvon .
Allet bala , dii han lehpet eanet veara go ollu cizážat !
Mun cealkkán didjiide : Juohkehaš guhte dovddasta mu olbmuid ovddas , su dovdá Olbmobárdni ge Ipmila eŋgeliid ovddas .
Muhto dat guhte biehttala mu olbmuid ovddas , son biehttaluvvo Ipmila eŋgeliid ovddas .
Ja juohkehažžii guhte cealká ovtta sáni Olbmobártni vuostái , addojuvvo ándagassii . Muhto guhte bilkida Bassi Vuoiŋŋa , sutnje ii addojuvvo ándagassii .
Go sii dolvot din synagogaid , válddálaččaid ja eiseválddiid ovdii , allet dalle bala das mo bealuštehpet iežadet dahje maid dadjabehtet .
Dasgo Bassi Vuoigŋa oahpaha dan didjiide dammanaga bottus .
Muhtun olmmái olbmuid gaskkas dajai sutnje : « Oahpaheaddji , gohčo mu vielja juogadit árbbi muinna ! »
Muhto Jesus vástidii sutnje : « Olmmoš , gii lea bidjan mu din gaskii dubmet dahje juogadit ? »
Ja son celkkii buohkaide : « Váruhehket anistuvvamis máilmmálaš riggodagaide !
Dasgo opmodat ii atte eallima , vaikko leažžá ge vallji . »
Ja son muitalii sidjiide veardádusa : « Lei muhtun rikkis olmmái gean eanan lei šaddan bures , ja son jurddašii : Maid mun dál dagan ?
Mus ii leat sadji rádjat buot šattuidan .
Son dajai alccesis : Dán mun áiggun dahkat : Mun gaikkodan láđuidan ja huksen daid stuoribun , ja dohko čohkken gortniidan ja buot eará opmodagaidan .
De cealkkán alccesan : Dál don leat rádjan ollu buriid máŋgga jahkái .
Vuoiŋŋas , bora , juga , ja leage ilus !
Muhto Ipmil celkkii sutnje : Don jalla ! Otná ija gáibiduvvo dus heagga . Geasa gullá dat maid don leat čohkken ?
Nu geavvá sutnje gii čohkke dávviriid alccesis , ja geas ii leat riggodat Ipmila luhtte . »
Son celkkii máhttájeddjiidasas : Danne mun cealkkán didjiide : Allet moraš heakkadet dihtii ahte dis lea maid borrat , allet ge rupmaša dihtii ahte leat biktasat .
Heagga lea eanet go borramuš ja rumaš eanet go biktasat .
Gehččet gáranasaid ! Eai dat gilvve eai ge láddje , ii dain leat áiti ii ge láhtu , muhto Ipmil biebmá daid .
Man ollu eanet veara lehpet dii go lottit !
Guhtemuš ba dis sáhttá buot morrašiiddisguin lasihit ovttage állana eallinguhkkodahkasis ?
Go dii dalle ehpet veaje oppa dan uhcánačča ge , manne de váivvidehpet iežadet buot eará diŋggaiguin ?
Gehččet liljáid , mo dat šaddet ! Eai dat bargga eai ge bane , muhto mun cealkkán didjiide : Ii oppa Salomo ge buot hearvásvuođainis lean gárvvohuvvon nugo okta sis .
Muhto jos Ipmil gárvvoha gietti rásiid nu čábbát , daid mat odne leat ceaggámin ja ihttin bálkestuvvojit oapmanii , ii go son ollu eanebut gárvvohivčče din , dii uhcán oskkolaččat !
Allet jurddaš dušše mo fidnešeiddet borramuša ja juhkamuša , allet ge bala .
Dáid háhpohallet buot máilmmi álbmogat , muhto din Áhčči diehtá ahte dii dárbbašehpet dáid .
Ohcet baicca su riikka , de buot dát addojuvvo didjiide .
Ale bala , uhca čorragaš ! Dasgo Áhčádet buorre dáhttu lea addit riikka didjiide .
Vuvdet buot opmodagadet , ja addet ruđaid váivvážiidda .
Háhket alcceseattet burssaid mat eai noga , ja nohkameahttun dávvira albmái , gosa suollagat eai beasa , ii ge muohcu bilit .
Dasgo doppe gos du dávvir lea , doppe lea du váibmu ge .
Bidjet boahkána ja doalahehket lámppáineattet čuovgga .
Lehket nugo bálvaleaddjit geat vurdet isideaset ruoktot heajain , vai sii sáhtášedje rahpat sutnje uvssa dakkaviđe go son boahtá ja goalkkuha .
Ávdugasat dat bálvaleaddjit geaid isit gávdná gohcimin go boahtá !
Duođaid mun cealkkán didjiide : Son bidjá boahkána , gohčču sin beavdái ja bálvala sin ieš .
Jos son vel bođeš ge easkka nuppi dahje goalmmát idjagohcinvuorus ja gávdná sin gárvvisin , de ávdugasat dat bálvaleaddjit .
Muhto muitet dan : Jos dáluisit dieđášii goas suola boahtá , de son gozášii ja hehttešii su gaikumis vissosis .
Lehket dii ge gárvásat ! Dasgo Olbmobárdni boahtá dan diimmu go ehpet leat vuordimin .
Biehtár jearai : « Hearrá , muitalat go dán veardádusa dušše midjiide vai buohkaide ? »
Ja Hearrá vástidii : Gii lea oskkáldas ja jierpmálaš dállodoalli , dakkár gean isit bidjá bearráigeahččat eará bálvaleddjiid vai attášii sidjiide borramuša rivttes áigái ?
Ávdugas dat bálvaleaddji gean isit gávdná dahkamin dán go son boahtá !
Duođaid , mun cealkkán didjiide : Isit addá buot opmodagaidis su háldui .
Muhto jos mat dát bálvaleaddji dadjá alccesis : « Mu isit ádjána boahtimis » , ja de cábmigoahtá reaŋggaid ja biiggáid , ja borragoahtá ja juhkagoahtá gárremiidda , dalle isit boahtá muhtun beaivvi goas bálvaleaddji ii leat vuordimin su ja dan diimmu go son ii dieđe , ja isit čuohppá su guovtti oassái ja addá su dohko gos eahpeoskkolaččat leat .
Dat bálvaleaddji gii diehtá isidis dáhtu , ii ge dattege ráhkkan ja daga su dáhtu mielde , son cábmojuvvo garrasit .
Muhto dat gii dieđekeahttá dahká dakkáriid main ánssáša cápmáhallat , son beassá uhcibuin .
Geasa lea addojuvvon ollu , sus vurdojuvvo ollu . Ja geasa lea oskkilduvvon ollu , sus gáibiduvvo velá eanet .
Mun lean boahtán suhppet dola eatnama ala ; ja vare dat livččii juo buollán !
Gásttain ferten gásttašuvvot ; man stuora áŧestusaid siste mun lean dassážii go dat lea ollašuvvan !
Gáddibehtet go ahte mun lean boahtán buktit ráfi eatnama ala ?
Mun cealkkán didjiide , in leat boahtán buktit ráfi , muhto soahpameahttunvuođa .
Jos muhtun ruovttus leat viđas , de sii dás duohko riidalit : Golmmas guoktása vuostái ja guovttis golbmasa vuostái ; áhčči lea bártnis vuostái ja bárdni áhčis vuostái , eadni nieiddas vuostái ja nieida eatnis vuostái , vuoni manjis vuostái ja mannji vuotnámis vuostái .
Son celkkii maiddái olbmuide : Go dii oaidnibehtet ahte oarjin rohtte balvvaid , de dadjabehtet dakkaviđe : Dál boahtá arvi , ja nu šaddá .
Ja go dovdabehtet lullibiekka , de dadjabehtet : Dál boahtá báhkka , ja nu šaddá .
Guoktilaččat ! Eatnama ja almmi mearkkaid dii gal máhttibehtet árvidit , manne dalle ehpet máhte árvidit dán áiggi ?
Ja manne ehpet ieža rátkke dan mii lea riekta ?
Go don leat mannamin duopmostullui vuostálastiinat , de daga buot maid nagadat vai doai soabadivččiide dohko manadettiin .
Muđuid son geassá du duopmára ovdii , duopmár addá du fáktii , ja fákta bálkesta du giddagassii .
Mun cealkkán dutnje : Doppe don it beasa eret ovdal go leat máksán maŋimuš šlántte ge !
Dan áiggi bohte su lusa muhtumat ja muitaledje galilealaččaid birra geaid Pilatus lei goddán , nu ahte sin varra seahkanii dainna varain mii golggai sin oaffarspiriin .
Jesus vástidii sidjiide : « Oaivvildehpet go ahte dát galilealaččat ledje stuorit suttolaččat go buot eará galilealaččat , go sii gillájedje dán ?
Mun cealkkán didjiide : Eai , muhto jos dii ehpet daga jorgalusa , de dii buohkat duššabehtet nugo sii .
Dahje dat gávccenuppelogis geat sorbmašuvve go Siloatoardna gahčai sin ala , jáhkkibehtet go ahte sii ledje eanet sivalaččat go buot earát Jerusalemis ?
Eai eisege ! Mun cealkkán didjiide : Jos dii ehpet daga jorgalusa , de dii buohkat duššabehtet seammá láhkái go sii . »
Ja son muitalii dán veardádusa : « Muhtun olbmá viidnegárddis lei šaddamin fiikkonmuorra . Go son bođii ohcat šattuid das , de ii gávdnan ovttage .
Dalle son dajai viidnegárdeolbmái : Golbma jagi lean boahtán ohcat šattuid dán fiikkonmuoras gávnnakeahttá maidege .
Njeaidde dan !
Manne dat galgá goaridit eatnama duššás ?
Muhto viidnegárdeolmmái vástidii : Hearrá , divtte orrut velá dán jagi , de mun beasan goaivut dan birra ja duktet dan .
Veadjá dalle šaddadit šattuid boahtte jagi .
Jos ii , de oaččut njeaidit muora . »
Sábbáhin son lei oahpaheamen olbmuid muhtun synagogas .
Das lei nisu geas lei leamaš buozalvasvuoigŋa gávccenuppelot jagi ; son lei áibbas guvrragan , ii ge sáhttán njulget čielggis .
Go Jesus oinnii su , de son rávkkai su lusas ja celkkii : « Nisu , don leat čovdojuvvon buohcuvuođastat . »
Son bijai gieđaidis su ala , ja dan seammás nisu njulgii čielggis ja máinnui Ipmila .
Muhto synagoga ovddasčuožžu moaráskii danne go Jesus buoridii sábbáhin , ja son dajai olbmuide : « Guhtta beaivvi leat bargobeaivvit .
Bohtet dalle deike buoriduvvot , allet ge sábbáhin . »
Hearrá vástidii sutnje : « Guoktilaččat , guhtemuš dis ii čoavdde vuovssás dahje ásenis hiŋgalis sábbáhin ge , ja láide olggos jugahit dan ?
Muhto dá lea Abrahama nieida gean Sáhtán lea doallan čatnagasas gávccenuppelot jagi .
Ii go son galggaše čovdojuvvot dán čatnagasas sábbáhin ? »
Go son celkkii dán , de buot su vuostálastit heahpanedje , muhto oppa olmmošjoavku illudii buot ovddolaš daguid dihtii maid son dagai .
Son celkkii : « Man láhkásaš lea Ipmila riika ?
Manin mun veardidan dan ?
Dat lea sennetsiepmana láhkásaš man olmmái gilvá gilvvagárdásis ; ja dat stuorru ja šaddá muorran , nu ahte almmi lottit ráhkadit besiid dan ovssiide . »
Ja son jotkkii : « Mainna mun veardidan Ipmila riikka ?
Dat lea suvrradáiggi láhkásaš man nisu bidjá golmma mihtu jáffuid sisa , ja de suvru buot . »
Manadettiin Jerusalemii Jesus jođii gávpogiid ja giliid mielde ja oahpahii olbmuid .
Muhtun jearai sus : « Hearrá , leat go sii hárvát geat bestojuvvojit ? »
Son celkkii sidjiide : Gilvalehket vai beassabehtet sisa baskkes poarttas !
Mun cealkkán didjiide : Olusat geahččalit beassat sisa , muhto eai lihkostuva .
Go dáluisit lea čuožžilan ja gidden uvssa , de dii báhcibehtet olggobeallái , ja dii goalkkuhišgoahtibehtet uvssa ja dadjabehtet : « Hearrá , rabas midjiide ! » Muhto son vástida didjiide : « Mun in dovdda din , in ge dieđe gos dii bođežehpet . »
Dalle dadjabehtet : « Mii han leat boradan ja juhkan searválagaid duinna , ja don leat oahpahan min geainnuid alde . »
Muhto son vástida didjiide : « Mun in dovdda din in ge dieđe gos bođežehpet .
Gáidet eret , buot dii verrošeaddjit ! »
Das čierrubehtet ja gižahehpet bániid , go dii oaidnibehtet Abrahama ja Issáha ja Jáhkoba ja buot profehtaid Ipmila riikkas , muhto ieža dii lehpet bálkestuvvon olggobeallái .
Ja olbmot bohtet nuortan ja oarjin ja davvin ja lullin ja čohkkájit Ipmila riikka beavddis .
Dalle maŋimuččat šaddet vuosttamužžan , ja vuosttamuččat maŋimužžan .
Aiddo dalle muhtun farisealaččat bohte su lusa ja dadje : « Doapmal dáppe eret , dasgo Herodes áigu goddit du »
Muhto son vástidii : « Mannet dadjat dan riebanii : Odne ja ihttin mun áján olggos bahá vuoiŋŋaid ja buoridan buhcciid , ja goalmmát beaivvi mun ollašuhtán doaibman .
Muhto odne ja ihttin ja ovtta beaivvi velá ferten joatkit , dasgo ii leat riekta ahte profehta goddojuvvo eará báikkis go Jerusalemis .
Jerusalem , Jerusalem , don guhte gottát profehtaid ja geađgádat sin geat leat vuolggahuvvon du lusa !
Man dávjá mun livččen dáhtton čohkket du mánáid , dego vuonccis čohkke čivggaidis soajáidis vuollái . Muhto ehpet dii dáhtton .
Gehččet , din viessu guđđojuvvo ávdimin .
Mun cealkkán didjiide : Dii ehpet oainne mu ovdal go dan beaivvi go dadjabehtet : Buressivdniduvvon lehkos son guhte boahtá Hearrá nammii . »
Muhtun sábbáha Jesus lei farisealaš ráđđehearrá guossin , ja buohkat atne su čalmmis .
Dalle bođii su lusa olmmái geas lei čáhcedávda , ja Jesus jearai láhkadovdiin ja farisealaččain : « Lea go lobálaš buoridit sábbáhin vai ii ? »
Muhto sii orro jávohaga .
Dalle son guoskkahii olbmá , buoridii su ja divttii su mannat .
Ja son celkkii sidjiide : « Jos ovttasge dis lea bárdni dahje vuoksá mii gahččá gáivui , ii go son dakkaviđe rohtteše su bajás , vaikko lea ge sábbát ? »
Eai sii sáhttán vástidit maidege dása .
Son dárkui mo guossit válljejedje beavddi boaššumus sajiid ja muitalii sidjiide veardádusa : Go don bovdejuvvot heajaide , de ale čohkán boaššumussii , dasgo muhtun sáhttá leat bovdejuvvon gii lea alit go don .
Jos lea nu , de guossoheaddji , gii lea bovden dudno guktuid , boahtá ja dadjá dutnje : « Čáhkke saji dán guossái ! »
Dalle fertet mannat heahpadiin čohkánit uskimussii .
Muhto go don leat bovdejuvvon guossái , de čohkán uskimussii , vai guossoheaddji sáhtášii dadjat dutnje : « Ustit , boađe čohkánit boaššolabbui ! »
Dalle don gudnejahttojuvvot buot gussiid oaidnut .
Dasgo juohkehaš guhte bajida iežas , vuoliduvvo , ja dat guhte vuolida iežas , bajiduvvo .
Son celkkii maiddái sutnje gii lei bovden su : « Go don bovdet gussiid gaskabeai- dahje eahketmállásiidda , de ale bovde ustibiiddát ja vieljaidat ja fulkkiidat ja rikkis siidaguimmiid amaset sii gis bovdet du fas ja dáinna lágiin mákset dutnje .
Muhto go áiggut bovdet gussiid , de bovde váivvážiid ja rámbbiid , lápmásiid ja čalmmehemiid .
Dalle don leat ávdugas , dasgo sii eai sáhte addit dutnje maidege ruoktot , muhto dutnje máksojuvvo ruoktot go vanhurskásat bajásčuožžilit . »
Go muhtun gussiin gulai dán , de dajai sutnje : « Ávdugas dat gii beassá čohkkát Ipmila riikka beavddis . »
Jesus celkkii sutnje : Lei olmmái gii doalai stuora guossemállásiid , ja son bovdii olusiid .
Go guossemállásiid áigi bođii , de son vuolggahii bálvaleaddjis dadjat sidjiide guđet ledje bovdejuvvon : « Bohtet , dasgo buot lea gárvvis ! »
Muhto buohkat beasadallagohte . Muhtun dajai : « Mun lean oastán bealddu ja ferten vuolgit geahččat dan .
Attášit ándagassii go in sáhte boahtit . »
Nubbi dajai : « Mun lean oastán vihtta vuoksábára ja áiggun vuolgit geahččalit daid .
Attášit ándagassii go in sáhte boahtit . »
Ja goalmmát dajai : « Mun lean aiddo náitalan , danne in sáhte boahtit . »
Bálvaleaddji bođii ruovttoluotta ja muitalii dán isidasas . Dalle dáluisit suhtai ja dajai bálvaleaddjásis : « Mana dállánaga gávpoga luottaide ja bálgáide , ja viečča sisa váivvážiid ja rámbbiid ja čalmmehemiid ja lápmásiid . »
Fargga sáhtii bálvaleaddji dieđihit : « Hearrá , lea dahkkojuvvon nugo gohččot , muhto ain lea sadji . »
De isit dajai bálvaleaddjásis : « Mana olggos geainnuid ja máđijaid ala ja nágge olbmuid boahtit sisa , vai mu viessu dievašii .
Dasgo mun cealkkán didjiide ahte ii oktage sis guđet ledje bovdejuvvon , beasa mu guossemállásiidda . »
Stuora joavku čuovui su , ja son jorggihii ja dajai sidjiide : Jos guhtege boahtá mu lusa vašutkeahttá áhčis ja eatnis , áhkás ja mánáidis , vieljaidis ja oappáidis , ja velá iežas heakka ge , de son ii sáhte leat mu máhttájeaddji .
Dat guhte ii guotte ruossas ja čuovo mu , ii sáhte leat mu máhttájeaddji .
Jos oktage dis áigu hukset toartna , ii go son vuos rehkenasttáše maid dat máksá oaidnin dihtii lea go sus doarvái ruhta ollašuhttit dan .
Muđuid sáhttá dáhpáhuvvat ahte son ráhkada geađgejuolggi , ii ge suitte gárvvistit toartna , ja buohkat guđet oidnet dan , bilkidišgohtet su ja dadjet : « Dát olmmái huksegođii ii ge veadján ollašuhttit . »
Dahje jos muhtun gonagas áigu vuolgit soahtat eará gonagasa vuostái , ii go son vuos smiehta sáhttá go son logiduhát olbmáin mannat nuppi vuostái guhte boahtá su ovddal guoktelotduháhiin ?
Ja jos son ii sáhte dan , de vuolggaha áirasiid go vašálaš ain lea guhkkin eret ja bivdá ráfi .
Seammá láhkái ii oktage dis sáhte leat mu máhttájeaddji muđuid go luohpá buot opmodagastis .
Sálttit leat ávkkálaččat .
Muhto jos sálttit veagahuvvet , mainna dalle sáhttá sáltet ?
Dat eai dohkke eai beldui eai ge duktan , muhto bálkestuvvojit eret .
Geas ležžet bealjit , son gullos !
Tuollárat ja suttolaččat bohte Jesusa lusa gullan dihtii su .
Farisealaččat ja čálaoahppavaččat nimmoredje ja dadje : « Dát olmmái vuostáiváldá suttolaččaid ja borada singuin . »
De Jesus muitalii sidjiide dán veardádusa : Jos muhtumis dis leat čuođi sávzza , ja okta láhppo , ii go son dalle guođe dan ovccilogiovcci meahccái ja oza dan ovtta mii lea láhppon dassážii go gávdná dan ?
Ja go gávdná dan , de illosa ja lokte dan olggiidis ala .
Go son boahtá ruoktot , de čohkke ustibiiddis ja siidaguimmiidis ja dadjá sidjiide : « Illudehket muinna , dasgo mun lean gávdnan sávzan mii lei láhppon . »
Mun cealkkán didjiide : Seammá láhkái šaddá almmis ge stuorit illu ovtta suttolačča dihtii gii dahká jorgalusa , go ovccilogiovcci vanhurskása dihtii geat eai dárbbaš jorgalusa .
Dahje jos nissonis leat logi silbaruđa ja son láhppá ovtta , ii go son dalle cahkket čuovgga ja suohpalastte buot vistti ja oza dárkilit dassážii go gávdná dan ?
Ja go lea gávdnan dan , de gohčču čoahkkái ustibiiddis ja siidaguoibmenissoniid ja dadjá : « Illudehket muinna , go mun lean gávdnan ruđa man ledjen láhppán . »
Mun cealkkán didjiide : Seammá láhkái illudit Ipmila eŋgelat ovtta suttolačča dihtii guhte dahká jorgalusa .
Jesus celkkii : Muhtun olbmás ledje guokte bártni .
Nuorat dajai sutnje : « Áhčážan , atte munnje mu oasi opmodagastat . »
Áhččis jugii opmodagastis bártniidasas .
Eai gollan máŋga beaivvi ovdal go nuorat bárdni vuovdilii buot ja manai muhtun riikii menddo guhkkin . Doppe son skihtardii buot ruđaidis badjelmearálaš eallimiin .
Muhto go son lei loaktán buot , de bođii hirbmat nealgi dan eatnamii , ja son gillágođii heađi .
Dalle son álggii reaŋgan muhtun dan eatnama olbmái , ja olmmái bijai su meahccái spiidnegeahččin .
Nealggistis livččii hálidan borrat vel daid šattuid ge maid spiinnit borre , dasgo ii oktage addán sutnje maidege .
De son jierbmagođii ja dajai : « Buot mu áhči bargiin lea borramuš valjis , ja mun lean dáppe nealgumin jámas !
Mun vuolggán áhččán lusa ja dajan : Áhčážan , mun lean suddudan almmi vuostái ja du vuostái .
In mun leat šat dohkálaš gohčoduvvot du bárdnin .
Muhto váldde mu alccesat láigobargin . »
De son vulggii áhčis lusa .
Go son lei ain guhkkin , de áhččis áiccai su , ja sus njuorai váibmu . Son viegai bártnis ovddal , dollii su čeabeha birra ja cummistii su .
Bárdni dajai : « Áhčážan , mun lean suddudan Almmi vuostái ja du vuostái .
In mun leat šat dohkálaš gohčoduvvot du bárdnin . »
Muhto áhčči dajai bálvaleddjiide : « Dopmet ! Buktet čábbáseamos biktasiid ja gárvvohehket sutnje daid , addet sutnje suorbmasa gihtii ja gápmagiid juolgái .
Ja vižžet buoiddes gálbbi ja njuvvet dan , vai mii beassat boradit ja illudit .
Dasgo dát mu bárdni lei jápmán ja lea fas šaddan eallin ; son lei láhppon ja lea fas gávdnon . »
Ja sii ripme ávvudit ja illudit .
Boarráset bárdni lei dalle giettis .
Go son lei vázzimin ruoktot ja lahkanišgođii dállui , de gulai čuojaheami ja dánsuma .
Son čurvii muhtun bálvaleaddjái ja jearai mii lea dáhpáhuvvamin .
Bálvaleaddji vástidii : « Vielljat lea boahtán ruoktot , ja áhččát lea njuovvan buoiddes gálbbi danne go lea ožžon su fas ruoktot dearvan . »
Boarráset viellja suhtai ii ge hálidan mannat sisa .
Áhččis bođii olggos geahččalit sártnuhit su . Muhto son vástidii áhččásis : « Mun lean bálvalan du buot jagiid , in ge leat goassege dahkan du miela vuostái , muhto munnje it leat addán gihci ge vai livččen sáhttán bovdet ustibiiddán guossái .
Muhto dakkaviđe go dát bárdni boahtá ruoktot , son gii lea geavahan buot ruđaidis fuoráiguin , de njuovat sutnje buoiddes gálbbi ! »
Áhčči dajai sutnje : « Bártnážan ! Don leat álo mu luhtte , ja buot mii gulaš munnje , lea du
Muhto dál lea buorre sivva ávvudit ja illudit , dasgo vielljat lei jápmán ja lea fas eallán ; son lei láhppon ja lea fas gávdnon . »
Jesus celkkii maiddái máhttájeddjiidasas : Lei rikkis olmmái geas lei dállodoalli . Isit gulai earáin ahte dállodoalli skihtardii su opmodagaid .
Son gohčui su lusas ja dajai : « Maid mun gulan du birra ?
Daga rehkega dállodoalus , dasgo don it sáhte šat leat mus dállodoallin . »
Dállodoalli jurddašii : « Maid dál dagan , go isit bidjá mu eret barggus ?
In mun leat nu gievra ahte nagadan goaivut , ja mun heahpanattan gearjideames .
Na dál de dieđán maid dagan , vai olbmot vuostáiváldet mu ruovttuineaset go bijahalan eret barggustan . »
De son gohčui lusas isida velggolaččaid ovttaid mielde , ja jearai vuosttažis : « Man ollu don leat velggolaš mu isidii ? »
Son vástidii : « Čuohte lihti oljju . »
Dállodoalli dajai sutnje : « Dá lea du vealgečálus , čohkán dállánaga ja čále vihttalogi . »
Dasto son jearai nuppis gis : « Naba don , man ollu don leat velggolaš ? »
Son vástidii : « Čuohte fárpala nisuid . »
Dállodoalli dajai sutnje : « Dá lea du vealgečálus , čále gávccilogi . »
Isit rábmui behtolaš dállodoallis go lei lágidan alccesis nu viisát , ja dajai : Dán máilmmi mánát leat čeahpibut soabadit gaskaneaset go čuovgasa mánát .
Mun cealkkán didjiide : Háhket alcceseattet ustibiid vearri riggodagaid bokte , vai sii sáhtášedje vuostáiváldit din agálaš orrunsajiineaset go riggodagat nohket .
Dat guhte lea oskkáldas uhcánaččain , lea maid oskkáldas stuorráin , ja dat guhte lea behtolaš uhcánaččain , lea maid behtolaš stuorráin .
Jos dii ehpet leat oskkáldasat ruđain , maidda lea čadnon vearrivuohta , geat dalle oskkildit didjiide duohta riggodagaid ?
Ja jos dii ehpet leat oskkáldasat das mii gullá earáide , gii dalle addá didjiide maidege iežadet opmodahkan ?
Ii bálvaleaddji sáhte bálvalit guokte isida .
Son vašuhivččii nuppi ja ráhkistivččii nuppi , dahje bisošii nuppi luhtte ja badjelgeahčašii fas nuppi .
Ehpet dii sáhte bálvalit sihke Ipmila ja mammona .
Farisealaččat geat ledje ruhtaváibmilat , gulle buot dáid , ja sii bilkidedje Jesusa .
Son celkkii sidjiide : Dii jáhkihehpet olbmuide ahte lehpet vanhurskásat , muhto Ipmil dovdá din váimmuid .
Ja dat maid olbmot atnet allagin , lea fasti Ipmila čalmmiin .
Lága ja profehtaid áigi bisttii Johanasa rádjái .
Das maŋŋil sárdniduvvo Ipmila riikka evangelium , ja buohkat bahkkejit dan sisa .
Ovdal duššet albmi ja eanan , ovdal go lágas gahččá eret čuoggáš ge .
Juohkehaš guhte earrána áhkástis ja náitala earáin , rihkku náittosdili . Ja dat guhte náitala earránan nissoniin , rihkku náittosdili .
Lei rikkis olmmái gii gárvodii purpuriin ja fiinna liidnebiktasiiguin ja elii hearvásvuođas ja ilus juohke beaivvi .
Muhto su uvssa ovddas veallái geafes olmmái gean namma lei Lasarus .
Son lei dievva háviin ja hálidii gallehit iežas dušše dainna mii gahčai rikkis olbmá beavddis .
Maiddái beatnagat ge bohte ja njollo su háviid .
De geafes olmmái jámii , ja eŋgelat gudde su Abrahama askái .
Rikkis olmmái maid jámii ja hávdáduvvui .
Go son rabastii čalmmiidis jábmiid riikkas , gos son lei biinnus , de oinnii Abrahama guhkkin ja Lasarusa su bálddas .
Son čuorvvui : « Áhččán Abraham , árpmit mu ja vuolggat Lasarusa deike , vai son buonjostivččii suorbmageažis čázis ja láktadivččii mu njuokčama . Dasgo mun biidnašuvan dán dolas . »
Abraham vástidii : « Mánážan , muitte ahte don ožžot buriidat ealedettiinat , ja dalle Lasarus oaččui baháid .
Dál son jeđđejuvvo dáppe , muhto don biidnašuvat .
Dasa lassin lea min ja din gaskkas čiekŋalis njiellu , amas oktage dáppe beassat rastá din lusa , vaikko háliidivččii ge , ii ge oktage din bealde beasa deike min lusa . »
Rikkis olmmái dajai Abrahamii : « Mun ánuhan dus ahte vuolggahivččet su mu áhččán vissui .
Dasgo mus leat vihtta vielja , ja son ferte duođaštit sidjiide , amaset sii ge boahtit dán givssi báikái . »
Muhto Abraham dajai : « Sis leat Movsses ja profehtat ; gulloset daid . »
Rikkis olmmái vástidii : « Áhččán Abraham , eai sii guldal , muhto jos oktage jábmiid luhtte boađášii sin lusa , de sii jorgalivčče . »
Muhto Abraham dajai sutnje : « Jos sii eai guldal Movssesa ja profehtaid , de eai oskugoađe vaikko muhtun bajásčuožžilivččii ge jábmiid luhtte . »
Son celkkii máhttájeddjiidasas : « Lea vealtameahttun ahte vearránusat bohtet , muhto vuoi dan olbmo gean bokte dat bohtet !
Dan olbmui livččii buoret ahte millogeađgi heaŋggastuvvošii su čeabeha birra ja son bálkestuvvošii merrii , go ahte oktage dain uhcahaččain jorrala su geažil .
Váruhehket !
Jos du oskuguoibmi sudduda , de neavvo su , ja jos son gáhtá , de atte sutnje ándagassii .
Vaikko son suddudivččii du vuostái čieža geardde seammá beaivvi ja boađášii čieža geardde du lusa ja dajašii : Mun gáđan , de atte sutnje ándagassii . »
Apoastalat dadje Hearrái : « Atte midjiide nannoset oskku . »
Hearrá vástidii : « Jos dis livččii osku sennetsiepmana veardde ge , de sáhtášeiddet dadjat dán meahccefiikkonmurrii : Rohtte iežat bajás ja bija ruohttasiid merrii !
Ja dat jeagadivččii din .
Jos muhtumis lea bálvaleaddji boltumin eatnama dahje guođoheamen sávzzaid , dadjá go son dalle bálvaleaddjái go dat boahtá giettis : Boađe dál čohkkedit beavdái ?
Ii , son baicca dadjá : Ráhkat munnje mállásiid , čavge boahkána ja bálval mu dan botta go mun boran ja jugan . Maŋŋil beasat ieš gis boradit ja jugadit .
Giitá go son bálvaleaddji go dat dagai dan maid lei gohčohallan ? Ii !
Seammá láhkái dii ge : Go dii lehpet dahkan visot maid lehpet gohčohallan , de celket : Mii leat ávkkehis bálvaleaddjit ja leat dušše dahkan dan maid mii leimmet geatnegasat dahkat . »
Jerusalemii vádjolettiin son manai Samaria ja Galilea rádjeguovlluid čađa .
Go son lei mannamin muhtun gillái , de bohte logi spihtálačča su ovddal .
Sii bisánedje mealgadii eret ja čurvo : « Jesus , oahpaheaddji , árpmit min ! »
Go son oinnii sin , de celkkii : « Mannet čájehit iežadet báhpaide ! »
Ja dohko manadettiin sii buhtásmuvve .
Muhto okta sis máhcai go oinnii ahte lei dearvvašmahttojuvvon .
Son máinnui Ipmila jitnosit , luoitádii Jesusa julggiid ovdii ja giitalii su .
Dát olmmái lei samarialaš .
Jesus jearai sus : « Eai go buot logis buhtásmuvvan ?
Gos de leat dat ovccis ?
Eai go lean earát go dát amas olmmoš gii máhcai rámidit Ipmila ? »
Ja son celkkii sutnje : « Čuožžil ja mana ruoktot !
Du osku lea beastán du »
Go farisealaččat jerre Jesusis goas Ipmila riika boahtá , de vástidii sidjiide : « Ipmila riika ii boađe dainna lágiin ahte sáhttá oaidnit dan čalmmiiguin .
Ii oktage sáhte dadjat : Gea , dá dat lea , dahje : Duo de lea .
Dasgo Ipmila riika lea din gaskkas . »
Máhttájeddjiide son celkkii : Áigi boahtá goas dii áibbašehpet oaidnit ovtta Olbmobártni beivviin , ehpet ge beasa oaidnit dan .
Jos olbmot celket didjiide : « Gea , die son lea ! » dahje : « Dá son lea ! »
de allet mana dohko , allet ge čuovo sin !
Dasgo seammá láhkái go álddagas álddagastá ja šleađggiha almmiravddas almmiravdii , nu Olbmobárdni ge almmustahttá iežas almmustusbeaivvi .
Muhto son ferte vuos gillát ollu , ja dát buolva hilgu su .
Ja nu mo geavai Noa beivviid , nu lea maiddái Olbmobártni beivviid .
Sii borre ja juhke , náitaladde ja náitojedje , gitta dan beaivvi rádjái go Noa manai árkka sisa ja dulvi bođii ja heavahii sin buohkaid .
Dahje nu mo geavai Lota beivviid : Sii borre ja juhke , sii oste ja vuvde , gilve ja huksejedje . Muhto dan beaivvi go Lot guđii Sodoma , de riškkuhii dola ja rišša almmis ja duššadii sin buohkaid .
Seammá láhkái geavvá dan beaivvi go Olbmobárdni almmustuvvá .
Jos muhtun dan beaivvi lea čohkkámin dáhki alde ja sus leat biergasat viesus , de ii galgga njiedjat viežžat daid , ja dat gii lea bealddus , ii galgga máhccat ruoktot .
Muitet Lota áhká !
Dat guhte viggá gádjut heakkas , massá dan , muhto dat guhte massá dan , várjala dan .
Mun cealkkán didjiide : Dan ija guovttis veallába seammá seaŋggas ; nubbi vižžojuvvo , nubbi báhcá .
Guokte nissona ferdneba gortniid searválagaid ; nubbi vižžojuvvo , nubbi báhcá .
Guokte olbmá leaba bealddus , nubbi vižžojuvvo ja nubbi báhcá .
Máhttájeaddjit jerre sus
Son muitalii sidjiide veardádusa oahpahan dihtii sidjiide ahte sii galge álelassii rohkadallat eai ge váibat : Muhtun gávpogis lei duopmár guhte ii ballan Ipmilis ii ge beroštan olbmuin .
Seammá gávpogis lei leaska guhte ovtta nuppe geardde boahtá su lusa ja dadjá : « Veahket mu vuostálastán vuostái , vai oččošin vuoigatvuohtan . »
Guhká duopmár ii miehtan , muhto loahpas jurddašii : « Vaikko in bala Ipmilis in ge beroš olbmuin , de veahkehan dán leaskka su vuoigatvuhtii , dasgo son vuorjá mu , muđuid han gal váivvida mu álelassii . »
Ja Hearrá celkkii : « Gullet maid dát gudnehis duopmár dadjá !
Ii go Ipmil dalle veahkehivčče vuoigatvuhtii sin geaid son lea válljen , go sii čurvot sutnje ijatbeivviid ?
Ádjána go son veahkeheames sin ?
Mun cealkkán didjiide : Son addá sidjiide fargga sin vuoigatvuođa .
Muhto go Olbmobárdni boahtá , gávdná go son dalle oskku eatnama alde ? »
Son muitalii eará veardádusa dakkáriidda geat atne iežaset vanhurskkisin ja badjelgehčče earáid : Guokte olbmá manaiga bajás tempelii rohkadallat . Nubbi lei farisealaš , nubbi gis tuollár .
Farisealaš čuožžilii ovdan ja rohkadalai ná : « Ipmil , mun giittán du go in leat nugo eará olbmot , geat verrošit , dahket vearrivuođaid ja furrošit , dahje nugo duot tuollár .
Mun anán borakeahttáivuođa guktii vahkus ja attán logádasa buot dietnasiin . »
Tuollár čuoččui mihá vuollin ii ge jolggadan oppa čalmmiidis ge loktet almmi guvlui , muhto čorpmai raddásis ja dajai : « Ipmil , leage munnje suttolažžii árbmugas ! »
Mun cealkkán didjiide : Tuollár manai ruoktot vanhurskkisin , muhto nubbi ii .
Dasgo dat guhte bajida iežas , vuoliduvvo , ja dat guhte vuolida iežas , bajiduvvo .
Sii gudde maiddái njuoratmánáid Jesusa lusa vai son guoskkahivččii daid .
Go máhttájeaddjit oidne dán , de šiggo sin . Muhto Jesus rávkkai sin lusas ja celkkii : « Diktet mánážiid boahtit mu lusa , allet ge hehtte sin ! Dasgo Ipmila riika gullá dakkáraččaide .
Duođaid , mun cealkkán didjiide : Dat guhte ii vuostáiváldde Ipmila riikka nugo uhca mánáš , ii eisege beasa dan sisa . »
Muhtun juvddálaš oaivámuš jearai sus : « Buorre oahpaheaddji , maid mun galggan dahkat vai árbešin agálaš eallima ? »
Jesus vástidii : « Manne don gohčodat mu buorrin ?
Ii oktage leat buorre , earet go Ipmil .
Don dovddat báhkkomiid : It galgga rihkkut náittosdili , it galgga goddit , it galgga suoládit , it galgga cealkit vearreduođaštusa , don galggat gudnejahttit áhčát ja eatnát . »
Olmmái dajai : « Buot dáid mun lean doallan nuorravuođa rájes juo . »
Go Jesus gulai dan , de dajai : « Velá okta váilu dus : Vuovdde buot opmodagat , ja juogat visot váivvážiidda . Dalle oaččut dávvira almmis .
Boađe dasto ja čuovo mu ! »
Olmmái šattai morrašii go gulai dan , dasgo son lei hui rikkis .
Go Jesus oinnii dan , de celkkii : « Man váttis lea sidjiide geain lea ollu opmodat , beassat Ipmila riikii !
Lea álkit kamelii mannat nállošalmmi čađa go riggái beassat Ipmila riikii . »
Sii geat ledje guldaleamen , jerre : « Gii dalle sáhttá bestojuvvot ? »
Son vástidii : « Dat mii lea veadjemeahttun olbmuide , lea vejolaš Ipmilii . »
Biehtár jearai : « Mo dalle mii ? Mii han leat guođđán visot ja čuvvon du »
Jesus vástidii : « Duođaid , mun cealkkán didjiide : Juohkehaš gii lea guođđán ruovttus dahje áhká dahje vieljaid dahje vánhemiid dahje mánáid Ipmila riikka dihtii , son oažžu máŋggageardásaččat ruoktot dáppe dán máilmmis , ja agálaš eallima boahttevaš máilmmis . »
Son čohkkii dan guoktenuppelohkása lusas ja celkkii sidjiide : « Gehččet , mii mannat bajás Jerusalemii , ja doppe ollašuvvá buot maid profehtat leat čállán Olbmobártni birra .
Son addojuvvo báhkiniid háldui , ja sii bilkidit ja givssidit ja čolget su .
Sii spihččejit ja goddet su , muhto goalmmát beaivvi son bajásčuožžila . »
Dás sii eai ádden maidege .
Dat lei čihkkojuvvon sidjiide , eai ge sii árvidan maid son oaivvildii .
Go Jesus lahkanišgođii Jerikoi , de lei čalmmehis olmmái čohkkámin geaidnoguoras ja gearjideamen .
Olmmái gulai ollu olbmuid mannamin meattá ja jearai mii dat lea .
Sii vástidedje ahte nasaretlaš Jesus lea mannamin meattá . Dalle son čurvii : « Jesus , Dávveda bárdni , árpmit mu ! »
Sii geat vázze ovddas , šiggo su vai son jávohuvašii , muhto son čuorvvui vel jitnoseabbot : « Dávveda bárdni , árpmit mu ! »
Jesus orustii ja gohčui buktit čalmmeheami lusas . Go son bođii , de Jesus jearai sus : « Maid don dáhtut mu dahkat alccesat ? »
Son vástidii : « Hearrá , attášit munnje oainnu ! »
Jesus celkkii sutnje : « Šatta oaidnin !
Du osku lea beastán du »
Dallánaga son oaidnigođii , ja son čuovui Jesusa ja máinnui Ipmila .
Ja buot olbmot geat oidne dán , máidno Ipmila .
Son bođii Jerikoi ja manai gávpoga čađa .
Doppe lei olmmái gean namma lei Sakkeus ; son lei tuolláriid oaivámuš ja hui rikkis .
Son hálidii sakka oaidnit makkár olmmoš Jesus lea , muhto lei uhcci šattus ii ge beassan su lahka olbmuid dihtii .
De son viegai ovddabeallái ja gavccui muhtun meahccefiikkonmurrii vai beasašii oaidnit Jesusa , muhtun báikkis gokko Jesus lei mannamin meattá .
Ja go Jesus bođii dohko , de geahčastii bajás ja celkkii sutnje : « Sakkeus , doama vuolás ! Dasgo odne mun áiggun boahtit du dállui . »
Sakkeus doapmalii vuolás ja vuostáiválddii su iluin .
Muhto buohkat geat oidne dan , nimmoredje ja dadje : « Son manná guossin suttolaš olbmá dállui ! »
Muhto Sakkeus loaiddastii ovdan ja dajai Hearrái : « Hearrá , beali opmodagainan áiggun addit gefiide , ja jos leaččan váldán geasge ruđaid vearrivuođain , de attán daid fas sutnje njealjegeardásaččat . »
Jesus celkkii sutnje : « Odne lea bestojupmi boahtán dán vissui . Dasgo son ge lea Abrahama bárdni , ja Olbmobárdni lea boahtán ohcat ja beastit su gii lea láhppon . »
Go sii ledje guldaleamen , de Jesus muitalii maiddái veardádusa , dasgo son lei Jerusalema lahka , ja olusat gádde ahte Ipmila riika almmustuvvá fargga .
Son celkkii : Alla hearrá vulggii muhtun eatnamii guhkkin eret biddjojuvvot gonagassan ja de máhccat ruoktot .
Son gohčui lusas lohkása bálvaleddjiinis ja attii juohkehažžii ovtta butti ja dajai « Gávppašehket dáiguin ruđaiguin gitta dassážii go mun boađán fas . »
Muhto su riikka álbmot vašuhii su ja vuolggahii áirasa su maŋŋái cealkit : « Mii eat dáhto dán olbmá iežamet gonagassan . »
Go olmmái lei šaddan gonagassan ja bođii ruovttoluotta , de gohčui lusas daid bálvaleddjiid geat ledje ožžon ruđaid , gulaskuddat man ollu sii ledje dinen .
Vuosttaš bođii su ovdii ja dajai : « Hearrá , dat buddi man don addet munnje , lea lassánan logigeardásaččat . »
Isit vástidii : « Bures dahkkon ! Don leat buorre bálvaleaddji .
Danne go don leat leamaš oskkáldas uhcánaččain , de oaččut válddi ráđđet logi gávpoga . »
Nubbi bođii ja dajai : « Hearrá , dat buddi man don addet munnje , lea lassánan viđageardásaččat . »
Sutnje isit dajai : « Don galggat ráđđet vihtta gávpoga . »
De bođii nubbi gii dajai : « Hearrá , dá lea du buddi !
Mun ledjen giessan dan liinni sisa danne go mun ballen dus.
Don leat garra olmmái , gii válddát dan mii ii gula dutnje , ja láddjet dan maid it leat gilván . »
Isit vástidii : « Mun dubmen du iežat sániid mielde , don heajos bálvaleaddji !
Don dihtet ahte mun lean garra olmmái , gii válddán dan mii ii gula munnje , ja láddjen dan maid in leat gilván .
Manne dalle it bidjan mu ruđa ruhtalonejeaddji háldui , vai livččen ožžon dan ruovttoluotta reanttuiguin go máhccen ? »
Ja son dajai sidjiide guđet čužžo das : « Váldet sus butti ja addet dan sutnje geas leat logi ! »
Sii dadje : « Hearrá , sus han leat juo logi butti . » « Nu leat , muhto mun dajan : Juohkehažžii geas lea , addojuvvo , ja sus geas ii leat , váldojuvvo velá dat ge eret mii sus lea .
Muhto buktet deike mu vašálaččaid geat eai dáhtton mu gonagassan , ja goddet daid mu čalmmiid ovddas . »
Go son lei cealkán dán , de vulggii fas bajás Jerusalemii .
Ja go lahkanišgođii Betfagii ja Betaniai , dan várrái mii gohčoduvvo Oljovárrin , de vuolggahii guoktása máhttájeddjiinis ja celkkii : « Manni gillái mii lea dás ovdalis !
Go dohko boahtibeahtti , de gávdnabeahtti čadnojuvvon ásenvárssá man alde ii oktage olmmoš goassege leat čohkkán .
Čoavdi dan ja bukti deike !
Ja jos oktage jearaš dudnos : Manne dien čoavdibeahtti ? de vástideahkki : Hearrá dárbbaša dan . »
Soai vulggiiga , ja gávnnaiga buot nu mo son lei cealkán .
Go leigga čoavdimin várssá , de dan eaiggádat jerre : « Manne doai čoavdibeahtti várssá ? »
Soai vástideigga : « Hearrá dárbbaša dan . »
Soai láidiiga várssá Jesusa lusa , lebbiiga biktasiiddiska dan ala ja čohkánahtiiga su dan ala .
Ja go son bođii riide , de olbmot lebbo biktasiiddiset geainnu ala .
Son lei mannamin vuolás Oljováris ja lahkanišgođii juo gávpogii . Dalle olles máhttájeaddjijoavku rámidišgođii ja máidnugođii Ipmila alla jienain buot fámolaš daguid dihtii maid sii ledje oaidnán . Sii čurvo : « Buressivdniduvvon lehkos son , gonagas , guhte boahtá Hearrá nammii !
Ráfi almmis ja gudni allagasas ! »
Muhtumat farisealaččain geat ledje olbmuid gaskkas , dadje sutnje : « Oahpaheaddji , šikko eret máhttájeddjiidat ! »
Muhto son vástidii sidjiide : « Mun cealkkán didjiide : Jos sii jávohuvašedje , de geađggit čuorvugoađášedje . »
Go son bođii lagabuidda ja oinnii gávpoga , de čierrugođii dan dihtii ja celkkii : « Jos don ge áddešit odne mii buktá dutnje ráfi !
Muhto dat lea dál čihkkojuvvon du čalmmiid ovddas .
Beaivvit bohtet go du vašálaččat dahket čoma du birra , birastahttet du ja bahkkejit du ala juohke guovllus .
Sii časket du eatnamii oktan du ássiiguin , ii ge dus báze geađgi geađggi ala , danne go it dovdan oahppaladdanáiggát . »
Jesus manai tempelšilljui ja ádjigođii eret sin geat ledje gávppašeamen das . Son celkkii sidjiide : « Lea čállojuvvon : Mu viessu lea rohkadallanviessu .
Muhto dii lehpet dahkan dan rievvárbiedjun . »
Son oahpahii beaivválaččat tempelis .
Bajitbáhpat ja čálaoahppavaččat ja álbmoga oaivámuččat bivde goddit su , muhto eai diehtán mo dahkat dan , dasgo buot olbmot hálidedje guldalit su .
Muhtun beaivvi go son lei oahpaheamen olbmuid tempelšiljus ja sárdnideamen evangeliuma , de bajitbáhpat ja čálaoahppavaččat bohte su lusa oktan vuorrasiiguin ja jerre : « Muital midjiide : Gean fámuin dagat don dán ?
Gii lea addán dutnje dakkár fámu ? »
Muhto Jesus vástidii sidjiide : « Mus lea maiddái gažaldat didjiide .
Muitalehket munnje : Johanasa gásta , bođii go dat almmis vai olbmuin ? »
Sii árvaladde gaskaneaset ja dadje : « Jos mii vástidit : Almmis , de son jearrá : Manne dalle ehpet oskon sutnje ?
Muhto jos mii dadjat : Olbmuin , de fas olbmot geađgádit min , go sii han oskot nannosit ahte Johanas lei profehta . »
Danne sii vástidedje ahte eai dieđe gos dat leaččai boahtán .
De Jesus celkkii sidjiide : « De in mun ge cealkke didjiide gean fámuin mun dagan dáid daguid . »
Dasto son muitalii dán veardádusa olbmuide : « Olmmái gilvvii viidnegárddi ja láigohii dan viidnegárdebargiide , ja ieš vulggii olgoriikii guhkes áigái .
Go áigi dievai , de son vuolggahii muhtun bálvaleaddji viidnegárdebargiid lusa vai sii attášedje sutnje oasi viidnegárddi šattuin .
Muhto viidnegárdebargit cábme su ja luite su mannat ruoktot guoros gieđaid .
Eaiggát vuolggahii nuppi bálvaleaddji , muhto su ge cábme ja bilkidedje ja luite mannat ruoktot guoros gieđaid .
Son vuolggahii goalmmáda vel , ja su sii roasmmuhuhtte velá garraseabbot ja bálkestedje olggos .
De viidnegárdeeaiggát jurddašii : Maid mun dál dagan ?
Mun vuolggahan iežan ráhkis bártni . Almma su gal atnet árvvus .
Muhto go viidnegárdebargit oidne bártni , de ráđđádalle gaskaneaset ja dadje : Diet lea árbbolaš !
Goddot su , de mii oažžut su árbbi .
Ja sii bálkestedje su olggos viidnegárddis ja cábme su jámas .
Maid dál viidnegárdeisit dahká singuin ?
Son boahtá ja duššada viidnegárdebargiid ja addá viidnegárddi earáide . »
Go olbmot gulle dan , de dadje : « Dat ii oaččo dáhpáhuvvat ! »
Muhto son geahčai sidjiide ja celkkii : « Maid dasto mearkkaša dát mii lea čállojuvvon : Dat geađgi man huksejeaddjit hilgo , lea šaddan váldočiehkageađgin .
Juohkehaš guhte gahččá dán geađggi ala , roasmmuhuvvá , ja dat gean ala geađgi gahččá , cuovkana . »
Čálaoahppavaččat ja bajitbáhpat vigge váldit su gitta dakkaviđe , muhto sii balle olbmuin . Sii áddejedje ahte son muitalii dán veardádusa sin birra .
Sii atne su čalmmis ja vuolggahedje muhtumiid sovččadit su . Sii galge dahkaluddat vanhurskkisin ja geahččalit giellat su iežas sániide , vai besset luohpat su eananhearrái ja eiseválddiide .
Sii jerre sus : « Oahpaheaddji , mii diehtit ahte don sártnut ja oahpahat riekta : Don it geahča olbmo hámi beallái , muhto oahpahat Ipmila geainnu duohtavuođa mielde .
Muital midjiide : Lea go riekta máksit vearu keaisárii vai ii ? »
Muhto son árvidii sin bahás jurdagiid ja celkkii sidjiide : « Čájehehket munnje denara !
Gean govva ja namma lea dás ? »
Sii vástidedje : « Keaisára . »
De son celkkii sidjiide : « De addet keaisárii dan mii keaisárii gullá , ja Ipmilii dan mii Ipmilii gullá . »
Sii eai veadján giellat su iežas sániide olbmuid gullut ; sii ovddošedje su vástádusa ja jávohuvve .
Jesusa lusa bohte muhtun saddukealaččat , sii guđet biehttalit bajásčuožžileami . Sii bidje gažaldaga su ovdii : « Oahpaheaddji , Movsses lea čállán midjiide ahte jos olbmás lea náitalan viellja guhte jápmá mánáheapmin , de son galgá náitalit leaskkain ja addit vielljasis náli .
Ledje čieža vieljaža .
Vuosttaš válddii alccesis áhká , muhto jámii mánáheapmin .
Nubbi náitalii leaskkain , de goalmmát , ja nu buot čiežas , muhto buohkat jápme mánáheapmin .
Loahpas jámii nisu ge .
Gean áhká son lea bajásčuožžileamis ?
Buot čiežas han leat leamaš náitalan suinna . »
Jesus vástidii : « Dán máilmmi mánát náitalit ja náitojit . Muhto sii geat adnojit dohkálažžan oažžut oasi boahttevaš máilmmis ja bajásčuožžilit jábmiid luhtte , sii eai náital eai ge náitojuvvo . Sii han eai sáhte šat jápmit ; sii leat eŋgeliid láhkásaččat , ja sii leat Ipmila mánát , danne go sii leat bajásčuoččáldahttojuvvon jábmiid luhtte .
Ja dan , ahte jábmit bajásčuoččáldahttojuvvojit , lea Movsses ge čájehan muitalusas bastilislánjá birra , go son gohčoda Hearrá Abrahama Ipmilin ja Issáha Ipmilin ja Jáhkoba Ipmilin .
Son ii leat jábmiid Ipmil , muhto ealli olbmuid Ipmil , dasgo sutnje leat buohkat eallimin . »
De muhtumat čálaoahppavaččain dadje : « Oahpaheaddji , don leat vástidan bures . »
Dasgo ii oktage duostan šat jearrat sus eanet gažaldagaid .
Jesus jearai sis : « Mo sáhttá dadjat ahte Messias lea Dávveda bárdni ?
Dávvet han ieš cealká Sálmmaid girjjis : Hearrá celkkii mu hearrái : Čohkán mu olgeš gieđa beallái dassážii go mun bijan du vašálaččaid du julggiid vuložin .
Dávvet nappo gohčoda Messiasa hearrán ; mo son de sáhttá leat Dávveda bárdni ? »
Buot olbmuid gullut son celkkii máhttájeddjiidasas : « Váruhehket čálaoahppavaččain ! Sii áinnas váccašit guhkes biktasiiguin ja hálidit ahte olbmot buorástahttet sin márkanšiljuin ; sii dáhttot čohkkát synagogaid buoremus sajiin ja boaššumusas go leat guossis .
Sii háhpohallet leaskkaid dáluid ja lohket guhkes rohkosiid dušše oidnon dihtii .
Muhto sii ožžot dađe garraset duomu . »
Son geahčastii bajás ja oinnii riggáid guđet bidje attáldagaideaset tempelbumbái .
De fuobmái geafes leaskka gii bijai guokte šlántte , ja son celkkii : « Duođaid , mun cealkkán didjiide : Dát geafes leaska lea addán eanet go buot earát .
Dasgo sii buohkat bidje attáldagaid bumbái valljivuođasteaset , muhto son attii geafivuođastis buot dan mii sus lei mas eallit . »
Go muhtumat sárdno tempela birra , man čábbát dat lei čiŋahuvvon čáppa geđggiiguin ja tempelattáldagaiguin , de Jesus celkkii : « Boahtá beaivi go ii báze geađgi geađggi ala das maid dii oaidnibehtet , muhto visot gaikkoduvvo . »
Sii jerre sus : « Oahpaheaddji , goas dát dáhpáhuvvá , ja mii lea mearkan dasa ? »
Son vástidii : Váruhehket amadet čádjidahttojuvvot !
Dasgo olusat bohtet mu nammii ja dadjet : « Mun dat lean » , ja : « Áigi lea lahka » .
Muhto allet čuovo sin !
Ja go dii gullabehtet sođiid ja stuimmiid birra , de allet ballá !
Dasgo dát ferte vuos dáhpáhuvvat , muhto ii dat mearkkaš ahte loahppa boahtá dakkaviđe .
Ja son jotkkii : Álbmot čuožžila álbmoga vuostái ja riika riikka vuostái ; šaddet garra eatnandoarggástusat ja ollu báikkiin nealgi ja rohttudávddat , ja issoras dáhpáhusat šaddet ja stuora mearkkat almmustuvvet almmis .
Muhto ovdal go buot dát dáhpáhuvvá , sii doarrádallet din ja váldet din gitta , addet din synagogaid duopmostuoluide ja bálkestit din giddagassii ; dii dolvojuvvobehtet gonagasaid ja eananhearráid ovdii mu nama dihtii .
Dalle beassabehtet duođaštit sin ovddas .
Muitet ahte dii ehpet dárbbaš ovddalgihtii jurddašit mo bealuštehpet iežadet . Dasgo mun attán didjiide sániid ja viisodaga man vuostái ii oktage din vuostálastiin sáhte ceavzit dahje cealkit .
Muhto vánhemat , vieljat , fuolkkit ja ustibat behttet din , ja muhtumat dis gottáhallet .
Buohkat vašuhit din mu nama dihtii , muhto dii ehpet masse vuoktačalmmi ge oaivvis .
Jos bissubehtet nanusin , de vuoitibehtet eallima .
Go dii oaidnibehtet ahte soahteveagat birastahttet Jerusalema , de dihtet ahte gávpot fargga duššaduvvo .
Dalle fertejit sii geat leat Judeas , báhtarit váriide ; sii geat leat gávpogis , fertejit doapmalit eret , ja sii geat leat olggobealde gávpoga , eai galgga mannat dan sisa .
Dasgo ráŋggáštusa áigi lea boahtán , go buot ollašuvvá mii lea čállojuvvon .
Vuoi áhpehemiid ja njamaheddjiid daid beivviid !
Dasgo eatnama alde šaddá stuora heahti ; moarriduopmu deaivá dán álbmoga .
Sii gahččet miehki ávjju ovddas ja dolvojuvvojit fáŋgan buot olmmoščearddaid gaskii . Ja báhkinat dulbmet Jerusalema dassážii go sin áigi dievvá .
Mearkkat oidnojit beaivvážis ja mánus ja násttiin , ja eatnama alde álbmogat ballagohtet sakka dorvvuhisvuođas go áhpi ja bárut máraidišgohtet .
Olbmot vuoimmehuvvet balus dan botta go sii vurdet dan mii boahtá máilmmi badjel . Dasgo almmiviidodaga fámut lihkahuvvojit .
Dalle sii oidnet Olbmobártni boahtimin balvvas fámuin ja stuora hearvásvuođain .
Muhto go buot dát dáhpáhuvvagohtet , de gehččet bajás ja bajidehket oivviideattet , dasgo dalle din bestojupmi lahkanišgoahtá .
Son muitalii sidjiide veardádusa : Gehččet fiikkonmuora ja buot eará muoraid !
Go oaidnibehtet daid runiidišgoahtimin , de árvidehpet ahte lea geassumin .
Nu diehtibehtet maiddái dii , go oaidnibehtet dán dáhpáhuvvamin , ahte Ipmila riika lea lahka .
Duođaid , mun cealkkán didjiide : Dát buolva ii noga ovdal go buot dát dáhpáhuvvet .
Albmi ja eanan duššet , muhto mu sánit eai goassege dušša .
Váruhehket , amaset borešvuohta ja jugešvuohta dahje eallima váivvit losiidahttit váimmuideattet , nu ahte dat beaivi boahtá fáhkka din badjelii dego giella .
Dasgo dat boahtá buohkaid badjelii geat ásset miehtá eatnama .
Gohcet ja rohkadallet álelassii vai oččošeiddet fámu vealtat buot dain dáhpáhusain mat bohtet , ja bisošeiddet Olbmobártni ovddas .
Juohke beaivvi Jesus lei tempelis oahpaheamen álbmoga , muhto eahkedis manai dan alážii mii gohčoduvvo Oljovárrin ja idjadii doppe .
Árrat iđedis ollu olbmot bohte tempelšilljui guldalit su .
Dál lahkanišgohte suvrrokeahtes láibbiid basit , mat gohčoduvvojit beassážin .
Bajitbáhpat ja čálaoahppavaččat bivdigohte heakka Jesusis , dasgo sii balle olbmuin .
Dalle Sáhtán manai Judasa sisa , su geas lei Iskariot lassinamman . Son lei okta dan guoktenuppelohkásis .
Judas manai ja lihtodii bajitbáhpaiguin ja tempelfávtta offisearaiguin mo son sáhtášii beahttit Jesusa sidjiide .
Sii illosedje ja lohpidedje sutnje ruđaid .
Judas mieđai dasa , ja dan rájes son ohcagođii liibba beahttit Jesusa olbmuid dieđekeahttá .
De bođii suvrrokeahtes láibbiid beaivi go beassášláppis galggai njuvvojuvvot .
Jesus vuolggahii Biehtára ja Johanasa ja celkkii : « Manni ráhkadit midjiide beassášmállásiid , vai mii beassat borrat . »
Soai jearaiga sus : « Gosa don dáhtut munno ráhkadit daid ? »
Son vástidii : « Go boahtibeahtti gávpogii , de boahtá dudno ovddal olmmái gii lea guoddimin čáhcelihti .
Čuovvu su dan vissui gosa son manná sisa , ja daddji dáluisidii : Oahpaheaddji jearrá dus : Gos lea latnja gos mun beasan borrat beassášmállásiid máhttájeddjiidanguin ?
De son čájeha dudnuide stuora lanja badjegearddis mii lea gárvvistuvvon .
Ráhkadeahkki mállásiid dohko . »
Soai vulggiiga ja gávnnaiga buot nu mo son lei cealkán , ja soai ráhkadeigga beassášmállásiid .
Go áigi dievai , de Jesus manai beavdái apoastaliiguin .
Ja son celkkii sidjiide : « Mun lean váimmustan hálidan borrat dáid beassášmállásiid dinguin ovdal go gillán .
Dasgo mun cealkkán didjiide : In ollenge šat bora daid ovdal go dat leat ollašuvvan Ipmila riikkas . »
Son válddii geara , rohkadalai giittusrohkosa ja celkkii : « Váldet dán ja juogadehket gaskaneattet .
Dasgo mun cealkkán didjiide ahte dás duohko mun in juga šat viidnemuora šattus ovdal go Ipmila riika boahtá . »
Son válddii láibbi , giittii Ipmila ja doadjalii dan , attii sidjiide ja celkkii : « Dát lea mu rumaš , mii addojuvvo din ovddas .
Dahket dán vai atnibehtet mu muittus . »
Seammá láhkái son válddii geara ge mállásiid maŋŋil ja celkkii : « Dát gearra lea ođđa lihttu mu varas , mii golggahuvvo din ovddas .
Muhto geahča , son gii beahttá mu , sus lea giehta beavddi alde muinna oktanaga .
Dasgo Olbmobárdni manná dan geainnu mielde mii lea mearriduvvon ; muhto vuoi dan olbmo guhte beahttá su ! »
Dalle sii árvališgohte gaskaneaset guhtemuš sis leažžá dat gii áigu dahkat dan .
Sin gaskii šattai maiddái riidu guhtemuš sis adnojuvvui stuorimussan .
Dalle son celkkii sidjiide : « Gonagasat ráđđejit álbmogiiddiset , ja sii geain lea váldi , gohčoduvvojit buorredahkkin .
Dii ehpet galgga leat dakkárat . Muhto dat guhte lea stuorimus din gaskkas , lehkos dego nuoramus , ja dat guhte lea alimus , lehkos dego bálvaleaddji .
Dasgo goabbá lea stuorit , son gii čohkká beavddis vai son gii bálvala ?
Ii go leat son gii čohkká beavddis ?
Muhto mun lean din gaskkas dego bálvaleaddji .
Dii lehpet dat guđet lehpet bisson oskkáldassan mu luhtte miehtá mu geahččalusaid áiggi .
Áhččán lea addán munnje fámu ráđđet álbmogis , ja dál mun attán didjiide seammá fámu , vai dii mu riikkas beasašeiddet juhkat ja borrat mu beavddis ja čohkkát truvnnuin ja dubmet Israela guoktenuppelot čeardda .
Simmon , Simmon !
Sáhtán lea gáibidan beassat seavlut din dego nisojáffuid .
Muhto mun rohkadallen du ovddas ahte du osku ii beahtáše .
Ja go don fas jorgalat , de nanne vieljaidat . »
Biehtár vástidii : « Hearrá , duinna mun lean gárvvis mannat sihke giddagassii ja jápmimii . »
Muhto Jesus celkkii : « Mun cealkkán dutnje , Biehtár : Ovdal go vuoncávaris biškkáda dán ija , don leat biehttalan golbmii dovdamis mu . »
Dasto son jearai máhttájeddjiinis : « Go mun vuolggahin din burssa , lávkka ja gápmagiid haga , váillui go dis dalle mihkkege ? »
Sii vástidedje : « Ii mihkkege . »
Dalle son celkkii : « Muhto dál ferte son geas lea bursa , váldit dan mielde , nu son ge geas lea lávka ; ja geas ii leat miehkki , son vuvdos gávttis ja ostos miehki .
Dasgo mun cealkkán didjiide ahte dát sátni mii lea čállojuvvon , ferte ollašuvvat mu ala : Son lohkkojuvvui vearredahkkiid searvái . Dasgo dat mii lea mearriduvvon mu birra , dáhpáhuvvá dál . »
Máhttájeaddjit dadje : « Hearrá , gea , dá leat guokte miehki . »
Son vástidii : « Dál lea doarvi ! »
Dasto Jesus manai olggos gávpogis ja vulggii Oljovári guvlui , nugo lávii , ja máhttájeaddjit čuvvo su .
Go son bođii dohko , de celkkii sidjiide : « Rohkadallet amadet šaddat geahččalussii ! »
Ieš son geassádii eret sis birrasii geađgebálkestaga duohkái , luoitádii čippiidis ala ja rohkadalai : « Áhčážan , jos dáhtut , de váldde mus eret dán geara !
Allos dattege šaddo mu dáhttu , muhto du »
Dalle almmi eŋgel almmustuvai sutnje ja áhpásmahtii su .
Ja jápminbalus son rohkadalai vel áŋgireabbot , ja su bivastat šattai dego varra mii goaikkui vuolás eatnamii .
Go son čuožžilii rohkadallamis ja bođii fas máhttájeddjiid lusa , de gávnnai sin oađđimin , dasgo sii ledje morrašis . Son celkkii sidjiide : « Manne oađđibehtet ?
Čuožžilehket ja rohkadallet amadet šaddat geahččalussii ! »
Go son lei ain sárdnumin , de bođii stuora olmmošjoavku .
Sin oahpisteaddji lei Judas , okta dan guoktenuppelohkásis . Son bođii Jesusa lusa cummistit su .
Dalle Jesus celkkii : « Judas , beahtát go Olbmobártni cummáin ? »
Go sii geat ledje Jesusiin , áddejedje mii dál dáhpáhuvvá , de jerre : « Hearrá , dohppet go mii miehki ? »
Ja okta sis čuolastii bajimušbáhpa bálvaleaddji ja čuohpai sus eret olgeš bealji .
Muhto Jesus celkkii : « Allet daga nie ! » Ja son guoskkahii bálvaleaddji bealji ja buoridii su .
Dasto Jesus celkkii bajitbáhpaide ja tempelfávttaid offisearaide ja vuorrasiidda geat ledje boahtán váldit su gitta : « Dii lehpet vuolgán mihkiiguin ja soppiiguin , dego livččen rievvár .
Beaivválaččat ledjen dinguin tempelšiljus , ehpet ge dii lokten gieđaid mu vuostái .
Muhto dál lea din diibmu , ja dál lea seavdnjadas ráđđemin . »
Sii válde su gitta ja dolvo su bajimušbáhpa vissui . Biehtár čuovui guhkkin maŋábealde .
Gasku šilju sii ledje cahkkehan dola ja čohkánan dan birra , ja Biehtár čohkánii sin gaskii .
Muhtun biigá oinnii su čohkkámin das dollabáitagis , ja son gávkkai Biehtárii ja dajai : « Dát olmmái lei maiddái su fárus . »
Muhto Biehtár biehttalii ja dajai : « Mun in dovdda su ! »
Veahá maŋŋelaš lei nubbi gii áiccai su ja dajai : « Don leat maiddái okta sis . »
Muhto Biehtár vástidii : « In leat » .
Muhto diimmu maŋŋelis lei nubbi vel gii nannii : « Duođaid , dát olmmái lei maiddái suinna ! Son han lea galilealaš . »
Muhto Biehtár vástidii : « Mun in ádde maid don hálat . »
Ja dakkaviđe , go son lei ain sárdnumin , vuoncávaris biškkádii .
Dalle Hearrá jorggihii ja geahčai Biehtárii , ja Biehtár muitái maid Hearrá lei cealkán sutnje : « Ovdal go vuoncávaris biškkáda dán ija , don biehttalat mu golbmii . »
Ja son manai olggos ja čierui bahččagit .
Olbmát geat fáktejedje Jesusa , bilkidedje ja cábme su ; sii gokče su ámadaju ja dadje : « Einnos dal !
Gii cápmii du ? »
Máŋgga eará láhkái ge sii hiddjidedje su .
Go beaivi bođii , de čoahkkanedje álbmoga vuorrasat , sihke bajitbáhpat ja čálaoahppavaččat , ja sii bukte Jesusa sin ráđđečoahkkima ovdii . Sii dadje : « Jos don leaččat Messias , de cealkke dan . »
Muhto son vástidii : « Jos vel cealkkášin ge , de ehpet goittot oskkoše , ja jos jearašin dis , de ehpet vástidivčče .
Muhto dán rájes Olbmobárdni čohkká buotveagalaš Ipmila olgeš gieđa bealde . »
Dalle buohkat jerre : « De leat don nappo Ipmila Bárdni ? »
Son vástidii : « Dii dadjabehtet ieža ahte mun lean dat. »
Sii dadje : « Dárbbašit go mii eanet duođaštusaid ?
Mii han leat ieža gullan dan su iežas njálmmis . »
Oppa čoahkkin čuožžilii , ja sii dolvo su Pilatusa ovdii .
Doppe sii sivahallagohte su ja dadje : « Mii leat gávnnahan ahte dát olmmái fille min álbmoga .
Son cealká ahte mii eat galgga máksit vearu keaisárii , ja navdá iežas Messiasin , nappo gonagassan . »
Pilatus jearai sus : « Leat go don juvddálaččaid gonagas ? »
Jesus vástidii : « Ieš han don dadjet dan . »
Pilatus dajai bajitbáhpaide ja olmmošjovkui : « Mun in gávnna dán olbmá sivalažžan masage . »
Sii cealkigohte vel garraseabbot : « Son moivašuhttá álbmoga oahpuinis miehtá Judea , Galilea rájes gitta deike . »
Go Pilatus gulai dan , de son jearai lea go olmmái galilealaš , ja go oaččui diehtit ahte son gulai Herodesa válddi vuollái , de son bijai Jesusa su lusa , dasgo Herodes ge lei Jerusalemis daid beivviid .
Herodes illosii sakka go oinnii Jesusa , dasgo son lei gullan su birra ja lei guhká hálidan oaidnalit suinna . Dál son doaivvui beassat oaidnit Jesusa dahkamin mearkka .
Son jearahii su ollu , muhto Jesus ii vástidan sáni ge .
Bajitbáhpat ja čálaoahppavaččat ledje maid das ja váidaledje Jesusa garrasit .
Herodes ja su soalddáhat hiddjidedje ja bilkidedje su , bidje čáppa biktasa su birra ja vuolggahedje su fas Pilatusa lusa .
Dan beaivvi Herodes ja Pilatus soabadeigga , ovdal soai vašuheigga goappat guoimmiska .
Pilatus gohčui čoahkkái bajitbáhpaid , ráđđelahtuid ja olbmuid ja celkkii sidjiide : « Dii lehpet buktán dán olbmá mu ovdii váidalettiin ahte son fille álbmoga .
Dál mun lean dutkan su din gullut , in ge gávnnat ahte son livččii sivalaš masage mas dii sivahehpet su .
Ii Herodes ge dahkan dan , dasgo son lea vuolggahan su min lusa fas .
Ii son nappo leat dahkan maidege mas ánssášivččii jápminduomu .
Mun áiggun dan dihtii spihččehit su ja de luoitit su luovus . »
Basiid áiggi son fertii luoitit sidjiide luovus ovtta fáŋgga .
Muhto olles olmmošjoavku čuorvvui Barabbas lei olmmái guhte lei giddagasas stuimmiid ja olmmošgoddima dihtii .
Pilatus sárdnugođii fas sidjiide , dasgo son hálidii áinnas luoitit Jesusa .
Muhto sii čurvo sutnje : « Russiinávle ! Russiinávle su ! »
Pilatus celkkii sidjiide goalmmádassii : « Maid baháid ba son lea dahkan ?
In mun leat gávnnahan su áššálažžan masage mas ánssášivččii jápmima .
Mun spihččehan su , ja de luoittán su luovus . »
Muhto sii nággejedje ain ja gáibidedje alla čuorvasiiguin ahte son galggai russiinávlejuvvot .
Ja sin čuorvasat vuite . Pilatus dalle mearridii ahte galggai šaddat nugo sii gáibidedje .
Son luittii luovus dan gean sii dáhtto , son gii lei giddagasas stuimmiid ja olmmošgoddima dihtii .
Muhto Jesusa son attii sin háldui .
Go sii ledje doalvumin Jesusa eret , de dohppejedje muhtun kyrenelačča gean namma lei Simmon .
Son lei aiddo boahtimin meahcis , ja sii bággejedje su guoddit ruossa Jesusa maŋis .
Stuora olmmošjoavku čuovui mielde ; sin gaskkas ledje maiddái ollu nissonat geat fuiko ja čirro su dihtii .
Muhto Jesus jorggihii sin guvlui ja celkkii : « Jerusalema nieiddat ! Allet čiero mu dihtii , muhto čirrot iežadet ja mánáideattet dihtii .
Dasgo beaivvit bohtet goas olbmot dadjet : Lihkolaččat leat mánáheamit , dat nissonat geat eai riegádahte , ja dat čiččit mat eai njamat !
Dalle sii cealkigohtet váriide : Gahččet min ala ! ja dieváide : Čihket min !
Dasgo jos sii nu dahket ruonas muorain , mo dalle geavvá ástan muorain ? »
Guovttis earát ge , guokte vearredahkki , dolvojuvvuiga suinna oktanaga heakkahuhttojuvvot .
Ja go sii bohte dan báikái mii gohčoduvvo Oaivegállun , de sii russiinávlejedje sihke su ja vearredahkkiid , nuppi su olgeš ja nuppi fas su gurut beallái .
Muhto Jesus celkkii : « Áhčážan , atte sidjiide ándagassii , dasgo sii eai dieđe maid sii dahket . »
Sii vuorbádalle su biktasiid alde ja juogadedje daid gaskaneaset .
Olbmot čužžo ja gehčče , muhto ráđđehearrát hiddjidedje su ja dadje : « Earáid son gal lea beastán , bestos dal iežas gis , jos leažžá Messias , gean Ipmil lea válljen . »
Soalddáhat ge bilkidedje su ; sii geigejedje sutnje ettetviinni ja dadje : « Jos don leaččat juvddálaččaid gonagas , de beastte iežat ! »
Su bajábeallái ledje čállojuvvon sánit : « Dát lea juvddálaččaid gonagas . »
Nubbi vearredahkkiin gii heaŋgái das , bilkidii su ja dajai : « It go don leat Messias ?
Beastte dalle iežat ja munno ! »
Muhto nubbi cuiggodii su ja dajai : « It go don bala Ipmilis , don guhte leat seammá duomu vuolde ?
Moai gal ánssášetne dán duomu , dasgo moai ožžo ráŋggáštusa daguideame mielde .
Muhto dát olmmái ii leat dahkan baháid . »
Ja son dajai : « Jesus , muitte mu go boađát riikasat ! »
Jesus vástidii : « Duođaid , mun cealkkán dutnje : Odne juo don leat muinna Paradiásis . »
Lei juo guđat diibmu , ja dalle bođii seavdnjadas miehtá eatnama gitta ovccát diimmu rádjái , go beaivváš lei sevnnjodahtton .
Ja Jesus čuorvvui alla jienain : « Áhččán , du gieđaide mun bijan vuoigŋan ! » Go son lei cealkán dan , de attii vuoiŋŋas .
Muhto go offiseara oinnii dan mii dáhpáhuvai , de son máinnui Ipmila ja dajai : « Dát olmmoš lei duođaid vanhurskkis ! »
Ja buohkat geat ledje čoagganan geahččat , čorbme rattiset go oidne dan mii dáhpáhuvai ja vulge ruoktot .
Buot Jesusa ustibat čužžo guhkkelis ja oidne visot . Sin searvvis ledje dat nissonat ge geat ledje čuvvon su Galilea rájes .
Lei muhtun ráđđehearrá gean namma lei Jovsset . Son lei buorre ja vanhurskkis olmmái , ii ge lean mieđihan dasa maid earát ledje mearridan ja dahkan .
Son bođii Arimateas , muhtun Judea gávpogis , ja lei okta sis gii lei vuordimin Ipmila riikka boahtima .
Son manai Pilatusa lusa ja siđai Jesusa rupmaša .
Ja son válddii dan vuolás ruossas , giesai dan liinni sisa ja bijai su hávdái mii lei čullojuvvon báktái ja masa ii oktage lean velá biddjojuvvon .
Lei ráhkkananbeaivi , ja sábbát lei lahka .
Nissonat geat ledje boahtán Galileas searválagaid Jesusiin , čuvvo maŋis ja oidne hávddi ja mo su rumaš biddjojuvvui dohko .
Maŋŋil sii máhcce gávpogii ja gárvvistedje njálggahájat oljjuid ja vuoidasiid . Sábbáhin sii vuoiŋŋastedje , lága mielde .
Iđitguovssu áiggi vahku vuosttaš beaivvi bohte nissonat su hávddi lusa njálggahájat vuoidasiiguin maid sii ledje ráhkadan .
Dalle sii oidne ahte geađgi lei fierahuvvon eret hávddi ovddas , ja sii manne sisa , eai ge gávdnan Hearrá Jesusa rupmaša .
Eai sii diehtán maid galge jáhkkit , muhto fáhkka ledje sin luhtte guokte olbmá šerres biktasiiguin .
Nissonat ballagohte ja gopmirdedje , ámadadju eatnama vuostái . Muhto dat guovttis celkkiiga sidjiide : « Manne dii jábmiid gaskkas ohcabehtet su guhte lea eallimin ?
Ii son leat dás , son lea bajásčuoččáldahttojuvvon .
Muitet maid son sártnui didjiide go ain lei Galileas : Olbmobárdni galgá addojuvvot suttolaš olbmuid gieđaide ja russiinávlejuvvot ja bajásčuožžilit goalmmát beaivvi . »
De sii muitájedje Jesusa sániid .
Ja sii máhcce hávddi luhtte ja muitaledje buot dán dan oktanuppelot apoastalii ja buot earáide .
Dat nissonat ledje Márjá Magdalena , Johánná ja Márjá , Jáhkoba eadni oktan eará nissoniiguin geat muitaledje dán apoastaliidda .
Sii atne dáid sániid joavdelas sáhkan , eai ge luohttán sidjiide .
Muhto Biehtár manai olggos ja viegai hávddi lusa , ja go son njahkalii dan sisa , de ii oaidnán eará go liikaliinniid mat ledje čoahkis . Son manai ruoktot , ja imaštalai dan mii lei dáhpáhuvvan .
Seammá beaivvi ledje guovttis sis mannamin Emmaus-nammasaš gillái , guhttalot stadia Jerusalemis eret , ja soai sártnodeigga buot dan birra mii lei dáhpáhuvvan .
Go soai leigga ain sártnodeamen ja árvaladdamin dán birra , de Jesus bođii ieš ja váccii sudnuin .
Muhto soai eaba dovdán su , dasgo sudno čalmmit ledje dego dahppojuvvon .
Son jearai sudnos : « Man birra doai nu háleštallabeahtti ? »
Soai orusteigga ja geahčaiga morašlaččat bajás , ja nubbi , gean namma lei Kleopas , vástidii sutnje : « Leat go son don áidna vieris Jerusalemis gii it dieđe mii doppe lea dáhpáhuvvan dáid beivviid ? »
Son jearai : « Na mii lea dáhpáhuvvan ? »
Soai vástideigga : « Dát mii dáhpáhuvai nasaretlažžii Jesusii . Son lei profehta , daguin ja sániin fámolaš Ipmila ja oppa álbmoga ovddas . Muhto min bajitbáhpat ja oaivámuččat adde su dubmejuvvot jápmimii ja russiinávlejupmái .
Mii goittotge doaivvuimet ahte son livččii Israela lonisteaddji !
Muhto dál leat juo vássán golbma beaivvi dan rájes go dát dáhpáhuvai , ja dál soames nissonat geat gullet min searvái , leat suorggahan min .
Sii manne hávddi lusa odne árrat iđedis , muhto eai gávdnan su rupmaša . Sii bohte ruovttoluotta ja dadje ahte sii ledje oainnáhusas oaidnán eŋgeliid geat celke ahte son eallá .
Dalle soapmásat mis manne hávddi lusa ja gávdne dan nu mo nissonat ledje dadjan , muhto Jesusa gal eai oaidnán . »
De son celkkii sudnuide : « Man jallat dii lehpet , ja nu hilljánat oskut buot daid maid profehtat leat cealkán !
Ii go Messias ferten gillát buot dáid ja mannat hearvásvuohtasis ? »
Ja son čilgegođii sudnuide dan mii čuožžu su birra buot čállagiin , gitta Movssesa rájes ja buot profehtain .
Sii lahkanišgohte dál dan gillái gosa ledje mannamin , ja son dahkaluttai dego livččii mannamin guhkkeliidda . Muhto soai sártnuheigga su sakka : « Oro munno luhtte !
Dasgo lea juo eahketbeallái , ja beaivi lea vássimin . »
Dalle son manai sudnuin sisa ja orui sudno luhtte .
Ja go lei čohkkámin sudnuin beavddis , de válddii láibbi , logai giittusrohkosa , doadjalii dan ja attii sudnuide .
De rahpasedje sudnos čalmmit , ja soai dovdáiga su , muhto dan seammás son šattai sudnuide oaidnemeahttumin .
Soai dajaiga goappat guoibmáseaskka : « Eai go munno váimmut buollán go son sártnui munnuide vádjolettiin ja rabai čállagiid munnuide ? »
Ja soai vulggiiga dan seammás ja máhcaiga Jerusalemii .
Doppe soai gávnnaiga čoahkkanan dan oktanuppelohkása ja earáid geat gulle sin jovkui , ja dat dadje : « Hearrá lea duođaid bajásčuoččáldahttojuvvon ja lea almmustahttán iežas Simmonii . »
Ieža soai muitaleigga mii lei dáhpáhuvvan mátkkis , ja mo soai leigga dovdán su go son doadjalii láibbi .
Dan botta go sii ledje hálešteamen dán birra , čuoččui Jesus ieš fáhkkestaga sin gaskkas ja celkkii : « Ráfi lehkos dinguin ! »
Sii suorganedje ja ballájedje , dasgo sii gádde ahte oidne oainnáhusa .
Muhto son celkkii sidjiide : « Manne suorganehpet , ja manne badjána eahpádus din millii ?
Gehččet mu gieđaid ja mu julggiid ; mun dat lean !
Guoskkahehket ja gehččet mu ! Dasgo vuoiŋŋas ii leat oažži eai ge dávttit , nugo oaidnibehtet ahte mus lea . »
Ja son čájehii sidjiide gieđaidis ja julggiidis .
Muhto go sii eai velá ge oskon ilu ja imašteami dihtii , de son jearai sis : « Lea go dis mihkkege maid borrat ? »
Sii adde sutnje basson guollebihtá , ja son válddii dan ja borai sin oainnedettiin .
Son celkkii sidjiide : « Dán birra mun sárdnon didjiide go ain ledjen dinguin ja celken ahte buot fertii ollašuvvat mii lea čállojuvvon mu birra Movssesa láhkii , profehtaide ja sálmmaide . »
De son rabai sin jierpmi nu ahte sii áddejedje čállagiid , ja son jotkkii : « Nu lea čállojuvvon : Kristus galgá gillát ja bajásčuožžilit jábmiid luhtte goalmmát beaivvi , ja su nammii galgá sárdniduvvot jorgalus ja suttuid ándagassii addojupmi buot álbmogiidda ; dii galgabehtet álgit Jerusalemis .
Dii lehpet dáid dáhpáhusaid čalmmálaš duođašteaddjit .
Mun vuolggahan Áhččán lohpádusa din badjelii .
Muhto orrot gávpogis dassážii go gárvvohuvvobehtet fámuin allagasas . »
Son doalvvui sin olggos Betania guvlui , ja loktii gieđaidis ja buressivdnidii sin .
Buressivdnidettiin son earránii sis ja váldojuvvui bajás albmái .
Sii gudnejahtte su ja máhcce Jerusalemii stuora iluin .
Maŋŋil sii ledje álelassii tempelis ja rámidedje Ipmila .
Álggus lei Sátni .
Sátni lei Ipmila luhtte , ja Sátni lei Ipmil .
Sátni lei álggus Ipmila luhtte .
Buot lea dahkkojuvvon Sáni bokte ; almmá Sáni haga ii leat mihkkege dahkkojuvvon das mii lea .
Sáni siste lei eallin , ja eallin lei olbmuid čuovggas .
Čuovggas báitá seavdnjadasas , muhto seavdnjadas ii vuostáiváldán dan .
De lei olmmái gean Ipmil lei vuolggahan .
Johanas lei su namma .
Son bođii duođašteaddjin , čuovgasa duođašteaddjin , vai buohkat su bokte oskugoađášedje .
Ii son lean ieš čuovggas , muhto son lei čuovgasa duođašteaddji .
Duohta čuovggas mii čuvge juohke olbmo , lei boahtimin máilbmái .
Son lei máilmmis , ja máilbmi lea dahkkojuvvon su bokte , muhto máilbmi ii dovdan su .
Son bođii iežas olbmuid lusa , muhto su iežas olbmot eai vuostáiváldán su .
Muhto buohkaide geat vuostáiválde su , attii son vuoigatvuođa šaddat Ipmila mánnán – buohkaide geat oskot su nammii . Eai sii leat riegádan oaččis ja varas , eai rupmaša dáhtus eai ge olbmá dáhtus , muhto Ipmilis .
Ja Sátni šattai olmmožin ja ássagođii min luhtte , ja mii oinniimet su hearvásvuođa , dan hearvásvuođa man áidnoriegádan Bárdni lea ožžon Áhčistis , dievva árpmus ja duohtavuođas .
Johanas duođašta su birra ja čuorvu : « Son lea dat gean birra mun celken : Son guhte boahtá mu maŋŋil , lea stuorit go mun , dasgo son lea leamaš ovdal mu . »
Su dievasvuođas mii buohkat leat ožžon , árpmu árpmu badjelii .
Dasgo láhka addojuvvui Movssesa bokte , árbmu ja duohtavuohta bođii Jesus Kristusa bokte .
Ii oktage leat goassege oaidnán Ipmila , muhto áidnoriegádeaddji , guhte lea Ipmil , ja guhte lea Áhčis váimmu lahka , son lea čájehan midjiide gii son lea .
Dá lea dat duođaštus man Johanas attii go juvddálaččat vuolggahedje muhtun báhpaid ja levihtaid Jerusalemis su lusa jearrat : « Gii don leat ? »
Son vástidii roahkkadit ja dovddastii : « Mun in leat Messias . »
Sii jerre : « Gii don dalle leat , leat go Elia ? »
Son vástidii : « In leat . »
Sii jerre : « Leat go don dat lohpiduvvon profehta ? »
Son vástidii : « In leat . »
De sii dadje sutnje : « Gii don dalle leat , dasgo mii fertet addit vástádusa sidjiide geat vuolggahedje min .
Maid don cealkkát iežat birra ? »
Son celkkii : « Mun lean jietna mii čuorvu meahcis : Jalgejehket geainnu Hearrái , nugo profehta Jesaja lea cealkán . »
Sáttatolbmát geaid farisealaččat ledje vuolggahan , jerre sus : « Manne don dalle gásttašat , go juo it leat Messias , it Elia , it ge profehta ge ? »
Johanas vástidii : « Mun gal gásttašan čáziin .
Muhto din gaskkas čuožžu son gean dii ehpet dovdda , son gii boahtá mu maŋŋil .
Mun in leat dohkálaš nuollat su vuoddagiid ge . »
Dát dáhpáhuvai Betanias nuppi bealde Jordana , gos Johanas lei gásttašeamen .
Nuppi beaivvi son oaidná Jesusa boahtimin ja cealká : « Gehččet , die lea Ipmila láppis guhte guoddá máilmmi suttu .
Son lea dat gean birra mun celken : Mu maŋŋil boahtá olmmái gii lea stuorit go mun , dasgo son lea leamaš ovdal mu .
In mun dovdan su , muhto aiddo dan dihtii lean boahtán gásttašit čáziin , vai son almmustuvašii Israelii . »
Ja Johanas duođaštii ja celkkii : « Mun oidnen Vuoiŋŋa boahtimin almmis duvvá hámis , ja dat bisánii su ala .
In mun dovdan su , muhto son guhte vuolggahii mu gásttašit čáziin , celkkii munnje : Son gean ala don oainnát Vuoiŋŋa njiedjamin ja bisáneamen , son lea dat guhte gásttaša Bassi Vuoiŋŋain .
Mun lean oaidnán dan , ja dát lea mu duođaštus : Son lea Ipmila Bárdni . »
Nuppi beaivvi Johanas čuoččui fas das guoktásiin máhttájeddjiinis .
Dalle oinnii Jesusa vázzimin meattá ja celkkii : « Geahčči , die lea Ipmila láppis . »
Go máhttájeaddjiguovttos gulaiga maid son celkkii , de čuovvuleigga Jesusa .
Jesus jorggihii ja oinnii sudno čuovvumin iežas ja jearai : « Maid doai ohcabeahtti ? »
Soai vástideigga : « Rabbi , gos don orut ? » Rabbi lea seammá go oahpaheaddji .
Jesus celkkii : « Boahtti geahččat . »
Soai manaiga suinna ja oinniiga gos son orru , ja soai bisáneigga su luhtte dan beaivái .
Lei logát diimmu birrasiid .
Ándaras , Simmon Biehtára viellja , lei nubbi dan guoktás geat leigga gullan maid Johanas celkkii , ja geat leigga čuvvon Jesusa .
Ándaras gávnnai dál vuos vieljas Simmona ja dajai sutnje : « Moai letne gávdnan Messiasa . » Messias mearkkaša « Dat gii lea vuidojuvvon » .
De Ándaras doalvvui Simmona Jesusa lusa .
Jesus geahčai sutnje ja celkkii : « Don leat Simmon , Johanasa bárdni .
Du namma galgá leat Kefas . » Kefas lea seammá go Biehtár .
Nuppi beaivvi Jesus lei vuolgimin Galileai .
Son deaivvai Filipa ja celkkii sutnje : « Čuovo mu ! »
Filip lei Betsaidas eret , seammá gávpogis gos Biehtárguovttos Ándarasain ge .
Filip deaivvai Natanaela ja dajai sutnje : « Mii leat gávdnan su gean birra Movsses lea čállán láhkii , ja gean birra profehtat ge leat čállán : Dat lea nasaretlaš Jesus , Jovsseha bárdni . »
Natanael dajai : « Sáhttá ba Nasaretas boahtit mihkkege buriid ? »
Filip vástidii : « Boađe geahččat ! »
Go Jesus oinnii Natanaela boahtimin , de celkkii : « Gehččet , dá lea duohta israellaš , geas ii leat behtolašvuohta . »
Natanael jearai : « Mas don mu dovddat ? »
Jesus vástidii : « Mun oidnen du čohkkámin fiikkonmuora vuolde juo ovdal go Filip čurvii dutnje . »
Natanael dajai : « Rabbi , don leat Ipmila Bárdni , don leat Israela gonagas . »
Jesus celkkii : « Oskkut go danne go mun celken ahte mun oidnen du fiikkonmuora vuolde ?
Don oaččut oaidnit stuorit dáhpáhusaid ge go dán . »
Son jotkkii : « Duođaid , duođaid , mun cealkkán didjiide : Dii oažžubehtet oaidnit almmi rabasin ja Ipmila eŋgeliid badjáneamen ja njiedjamin Olbmobártni badjel . »
Goalmmát beaivvi ledje náittosheajat Kanas Galileas .
Jesusa eadni lei doppe , ja maiddái Jesus máhttájeddjiidisguin lei bovdejuvvon heajaide .
De nohkkogohte viinnis , ja Jesusa eadni dajai sutnje : « Sis ii leat šat viidni . »
Jesus celkkii : « Nisu , maid don áiggut muinna ?
Ii mu diibmu leat velá boahtán . »
Muhto su eadni dajai bálvaleddjiide : « Dahket buot maid son gohčču . »
Das ledje geađgečáhcelihtit , nugo vierru lei ge juvddálaččaid buhtistanmearrádusaid mielde . Ledje guhtta lihti , mat gesse guokte dahje golbma áŋkara guhtege .
Jesus celkkii : « Devdet lihtiid čáziin . »
Ja bálvaleaddjit devde daid ravddaid dási .
Son celkkii sidjiide : « Goivot das ja guddet heajaid ovddasčužžui . »
Sii gudde dan heajaid ovddasčužžui , ja son máisttii čázi mii lei šaddan viidnin .
Ii son diehtán gos dat leažžá boahtán , muhto bálvaleaddjit geat ledje goivon čázi , sii gal dihte .
De son gohčui irggi boahtit ja dajai : « Earát guossohit vuos buori viinni , ja go guossit juhkaluvvagohtet , de buktet fuonibu .
Muhto don leat seastán buori viinni dássážii . »
Dán vuosttaš mearkadagus Jesus dagai Kanas Galileas .
Son almmustahtii hearvásvuođas , ja su máhttájeaddjit osko sutnje .
Das maŋŋil son manai Kapernaumii etniinis , vieljaidisguin ja máhttájeddjiidisguin , ja doppe sii orro moadde beaivvi .
Juvddálaččaid beassážat lahkanedje , ja Jesus vulggii bajás Jerusalemii .
Tempelšiljus son deaivvai sin geat ledje vuovdimin vuovssáid , sávzzaid ja duvváid , ja ruhtacuvkeheddjiid geat ledje čohkkámin das .
De son ráhkadii spižá oaras ja ájii buohkaid olggos tempelis oktan sávzzaiguin ja vuovssáiguin .
Son háddjii ruhtacuvkeheddjiid ruđaid ja gomihii sin bevddiid .
Sidjiide geat vuvde duvváid , son celkkii : « Eret dáiguin , allet daga mu Áhči viesu márkanšilljun ! »
Su máhttájeaddjit muitájedje dan mii lea čállojuvvon : Buolli áŋgirvuohta du viesu dihtii duššada mu .
Juvddálaččat hállagohte ja jerre sus : « Makkár mearkkain čájehivččet midjiide ahte dus lea vuoigatvuohta dán dahkat ? »
Jesus vástidii sidjiide : « Gaikkodehket dán tempela , ja mun ceggen dan fas golmma beaivvis . »
Sii dadje : « Njealljelogiguhtta jagi leat ádjánan hukset dán tempela , ja don cegget dan fas golmma beaivvis ? »
Muhto son sártnui iežas rupmaša tempela birra .
Go son lei bajásčuoččáldahttojuvvon jábmiid luhtte , de máhttájeaddjit muitájedje ahte son lei cealkán dán , ja sii osko čállagii ja dan sátnái man Jesus lei sárdnon .
Go Jesus lei Jerusalemis beassášbasiid , de olusat oskugohte su nammii go sii oidne su mearkadaguid .
Ii Jesus gal dattege luohttán sidjiide , dasgo son dovddai sin buohkaid . Ii son dárbbašan earáid duođaštusaid ovttage olbmo birra , dasgo son diđii ieš mii orru olbmo siste .
Farisealaččaid searvvis lei olmmái gean namma lei Nikodemus ; son lei okta juvddálaččaid ráđđehearráin .
Son bođii Jesusa lusa ihkku ja dajai : « Rabbi , mii diehtit ahte don leat oahpaheaddji gii leat boahtán Ipmila luhtte , dasgo ii oktage máhtáše dahkat daid mearkadaguid maid don dagat jos Ipmil ii livčče suinna . »
Jesus vástidii sutnje : « Duođaid , duođaid , mun cealkkán dutnje : Dat guhte ii riegát ođđasis , ii beasa oaidnit Ipmila riikka . »
Nikodemus jearai sus : « Mo sáhttá boares olmmoš riegádit , ii han son sáhte beassat eatnis goaŧu sisa fas ja riegádit ođđasis ? »
Jesus vástidii : « Duođaid , duođaid , mun cealkkán dutnje : Dat guhte ii riegát čázis ja Vuoiŋŋas , ii beasa Ipmila riikii .
Dat mii lea riegádan oaččis , lea oažži , muhto dat mii lea riegádan Vuoiŋŋas , lea vuoigŋa .
Ale ovddoš go mun celken ahte dii fertebehtet riegádit ođđasis .
Biegga bossu gosa dáhttu ; don gulat dan šuvvamin , muhto it dieđe gos bođeš ja gosa manaš .
Nu lea maiddái juohkehaččas gii lea riegádan Vuoiŋŋas . »
Nikodemus jearai : « Mo dát lea vejolaš ? »
Jesus vástidii sutnje : « Don leat Israela oahpaheaddji , it ge dieđe dan !
Duođaid , duođaid , mun cealkkán dutnje : Mii sárdnidit dan maid diehtit , ja duođaštit dan maid leat oaidnán , muhto dii ehpet vuostáiváldde min duođaštusa .
Jos dii ehpet oskko go mun sárdnidan didjiide eatnanlaš áššiid , mo de sáhttibehtet oskut go mun sárdnidan almmálaš áššiid ?
Ii oktage leat mannan bajás albmái , earet go son gii njiejai almmis ; dat lea Olbmobárdni guhte lea almmis .
Ja nugo Movsses loktii gearbmaša sáttomeahcis , nu Olbmobárdni ge bajiduvvo , vai juohkehaš guhte osku sutnje , oažžu agálaš eallima .
Dasgo nu lea Ipmil ráhkistan máilmmi ahte son attii áidnoriegádan Bártnis , amas oktage guhte osku sutnje mannat gáđohussii , muhto vai son oažžu agálaš eallima .
Ipmil ii leat vuolggahan Bártnis máilbmái dubmet dan , muhto vai máilbmi bestojuvvošii su bokte .
Dat guhte osku sutnje , ii dubmejuvvo . Dat guhte ii oskko , lea juo dubmejuvvon , dan dihtii go ii leat oskon Ipmila áidnoriegádan Bártni nammii .
Ja dát lea duopmu , ahte čuovggas lea boahtán máilbmái , ja olbmot ráhkistedje seavdnjadasa eanebut go čuovgasa , dasgo sin dagut ledje bahát .
Dasgo juohke bahádahkki vašuha čuovgasa ii ge dáhto boahtit čuovgasa ovdii , amaset su dagut boahtit albmosii .
Muhto dat guhte čuovvu duohtavuođa , boahtá čuovgasa ovdii , vai boađášii albmosii ahte su dagut leat Ipmila dáhtu mielde . »
Das maŋŋil Jesus ja su máhttájeaddjit vulge Judeai .
Doppe son orui muhtun áiggi singuin ja gásttašii .
Maiddái Johanas ge gásttašii Ainonis Salima lahka , gos lei ollu čáhci , ja olbmot bohte dohko ja gásttašuvvojedje .
Dát lei ovdal go Johanas bálkestuvvui giddagassii .
Šattai riidu buhtisteami birra Johanasa máhttájeddjiid ja muhtun juvddálačča gaskii .
Máhttájeaddjit manne Johanasa lusa ja dadje sutnje : « Rabbi , dat olmmái gii lei duinna nuppe bealde Jordana , ja gean birra don duođaštit , son gásttaša dál , ja buohkat mannet su lusa . »
Johanas vástidii sidjiide : « Olmmoš ii sáhte oažžut maidege jos dat ii addojuvvo sutnje almmis .
Dii lehpet ieža mu duođašteaddjit dasa ahte mun celken : Mun in leat Messias , muhto lean vuolggahuvvon su ovddabeallái .
Irgi lea son geas lea moarsi .
Muhto irggi ustit gii čuožžu ja guldala su , illuda sakka go gullá irggi jiena .
Dál mun ge illudan , ja mu illu lea ollis .
Son galgá stuorrut , mun fas uhccut .
Son guhte boahtá badjin , lea buohkaid bajábealde .
Son guhte boahtá máilmmis , gullá máilbmái ja hállá máilmmálaš áššiid .
Son guhte boahtá almmis , lea buohkaid bajábealde . Son duođašta dan maid lea oaidnán ja gullan , muhto ii oktage vuostáiváldde su duođaštusa .
Dat guhte lea vuostáiváldán su duođaštusa , lea nannen ahte Ipmil sárdnu duohtavuođa .
Son gean Ipmil lea vuolggahan , sárdnu sániid mat bohtet Ipmilis , dasgo Ipmil addá Vuoiŋŋa olles mihtuin .
Áhčči ráhkista Bártni ja lea addán buot su gihtii .
Sus guhte osku Bárdnái , lea agálaš eallin .
Dat guhte ii jeagat Bártni , ii beasa oaidnit eallima , muhto Ipmila moarri orru su alde . »
Jesus bođii diehtit ahte farisealaččat ledje gullan ahte Jesus čohkkii eanet máhttájeddjiid ja gásttašii eanebuid go Johanas , vaikko rievtti mielde Jesus ii ieš gásttašan , muhto su máhttájeaddjit . Go Jesus gulai dien farisealaččaid birra , de son vulggii Judeas ja manai fas Galileai .
Son fertii johtit Samaria čađa , ja son bođii gávpogii mii gohčoduvvo Sykarin . Dat lea dan eananbihtá lahka man Jáhkot attii bárdnásis Jovssehii .
Doppe lei Jáhkoba gáivo .
Jesus lei váiban vázzimis , ja čohkánii gáivvo gurrii .
Dát lei guđat diimmu birrasiid .
De bođii Samaria nisu viežžat čázi .
Jesus cealká sutnje : « Atte munnje juhkat . »
Su máhttájeaddjit ledje mannan gávpogii oastit borramuša .
Nisu dadjá : « Mo don guhte leat juvddálaš , sáhtát bivdit juhkat mus , Samaria nissonis ? »
Dasgo juvddálaččat eai servvoštala samarialaččaiguin .
Jesus vástidii sutnje : « Jos don dovddašit Ipmila attáldaga ja dieđášit gii dat lea guhte dáhttu juhkat , de don bivddášit sus ja son attášii dutnje ealli čázi . »
Nisu dajai : « Hearrá , dus ii leat lihtti ge mainna geasášit bajás čázi , ja gáivo lea čieŋal .
Gos don dalle válddášit dan ealli čázi ?
It dal don leat stuorit go min máttar Jáhkot gii attii midjiide gáivvo ja ieš jugai das , nugo su bártnit ja su šibihat ge ? »
Jesus vástidii sutnje : « Juohkehaš guhte dán čázis juhká , son šaddá fas goikui .
Muhto dat guhte juhká dan čázis maid mun attán , ii goikka šat goassege .
Dat čáhci maid mun attán sutnje , šaddá su siste ájan mii álo golgá ja addá agálaš eallima . »
Nisu dadjá sutnje : « Hearrá , atte munnje dan čázi aman goassege šat goikat ja dárbbašit dáppe fitnat viežžamin čázi . »
Jesus celkkii sutnje : « Mana viežžat boatnját ge deike . »
Nisu vástidii : « Ii mus leat boadnjá . »
Jesus celkkii : « Duođa cealkkát go dajat ahte dus ii leat boadnjá , dasgo dus leat leamaš vihtta olbmá , ja dat gii dus dál lea , ii leat du boadnjá .
Die dadjet duođa . »
Nisu dajai : « Hearrá , mun oainnán ahte don leat profehta .
Min máddarat leat bálvalan Ipmila dán vári alde , ja dii dadjabehtet Jerusalema danin báikin gos olmmoš galgá rohkadallat . »
Jesus cealká sutnje : « Oskko munnje , nisu , áigi boahtá go ehpet bálval Ipmila ehpet dán vári alde ehpet ge Jerusalemis .
Dii bálvalehpet dan maid ehpet dovdda , muhto mii bálvalit dan maid dovdat , dasgo bestojupmi boahtá juvddálaččain .
Muhto áigi boahtá , ja lea dál juo , go duođalaš rohkadallit bálvalit Áhči vuoiŋŋas ja duohtavuođas .
Dasgo dakkár rohkadalliid Áhčči dáhttu .
Ipmil lea vuoigŋa , ja dat guhte bálvala su , ferte bálvalit vuoiŋŋas ja duohtavuođas . »
Nisu dajai : « Mun dieđán ahte Messias boahtá , » – Messias lea seammá go Kristus – « ja go son boahtá , de almmuha midjiide buot . »
Jesus cealká sutnje : « Mun dat lean , mun guhte sártnun duinna . »
Dan seammás bohte su máhttájeaddjit , ja sii ovddošedje go son lei hálešteamen nissoniin . Muhto ii oktage jearran maid son dáhtui dahje manne lei hálešteamen nissoniin .
Nisu guđii čáhcelihtis ja manai gávpogii ja dajai olbmuide : « Bohtet geahččat dan olbmá guhte lea muitalan munnje buot maid mun lean dahkan !
Ii go son dat leačča Messias ? »
Sii vulge dalle gávpogis ja bohte su lusa .
Dan botta máhttájeaddjit dadje Jesusii : « Rabbi , boađe boradit ! »
Son vástidii : « Mus lea borramuš maid dii ehpet dovdda . »
Sii dadje guhtet guoibmáseaset : « Lea go son giige buktán sutnje borramuša ? »
Muhto Jesus celkkii sidjiide : « Mu borramuš lea dahkat su dáhtu guhte lea vuolggahan mu ja ollašuhttit su daguid .
Ehpet go dii ieža daja : Ain leat njeallje mánu láju áigái .
Muhto mun cealkkán didjiide : Bajidehket čalmmiideattet ja gehččet bealdduid , dat leat juo vilggodan láddjenmuddui .
Láddjejeaddji oažžu bálkkás ja čohkke šattuid agálaš eallimii , vai gilvi ja láddjejeaddji illudivččiiga ovttas .
Dasgo dat sátni lea duohta ahte nubbi gilvá ja nubbi gis láddje .
Mun lean vuolggahan din láddjet dan mainna ehpet leat bargan .
Earát leat bargan , ja dii láddjebehtet sin barggu šattu . »
Olusat dán Samaria gávpoga ássiin ledje oskugoahtán Jesusii nissona duođaštusa dihtii : « Son lea cealkán munnje buot dan maid mun lean dahkan . »
Samarialaččat bohte su lusa ja dáhtto Jesusa orrut iežaset luhtte , ja son orui doppe guokte beaivvi .
Ollu eanebut oskugohte go gulle su sániid , ja sii dadje nissonii : « Dál mii eat oskko šat dušše du sániid dihtii .
Dasgo mii leat ieža gullan su , ja mii diehtit ahte son duođaid lea máilmmi beasti . »
Guokte beaivvi das maŋŋil Jesus vulggii doppe Galileai .
Son lei ieš duođaštan ahte profehta ii adnojuvvo árvvus ruovttubáikkistis .
Muhto go son bođii Galileai , de galilealaččat vuostáiválde su bures , dasgo sii ge ledje leamaš Jerusalemis basiid áiggi ja ledje oaidnán buot maid son lei dahkan doppe .
Jesus bođii fas Kanai Galileai gos son lei dahkan čázi viidnin .
Kapernaumis orui gonagaslaš virgeolmmái gean bárdni lei buohcamin .
Go son gulai ahte Jesus lei boahtán Judeas Galileai , de vulggii Jesusa lusa ja siđai su boahtit vulos buoridit bártnis , dasgo gánda lei juo jápmimin .
Jesus celkkii sutnje : « Mearkkaid ja oavdduid oainnekeahttá dii ehpet oskko . »
Virgeolmmái dajai : « Hearrá , boađe ovdal go mu bárdni jápmá ! »
Jesus celkkii sutnje : « Mana ruoktot , du bárdni lea eallimin ! »
Ja olmmái oskkui Jesusa sániide ja manai .
Ruoktot jođedettiin bohte bálvaleaddjit su ovddal ja muitaledje ahte su bárdni lei eallimin .
Son jearai goas bárdnis lei áđasman . Sii dadje : « Ikte čihččet diimmus dávda luittii su . »
Áhčči árvidii ahte dat lei dáhpáhuvvan aiddo dalle go Jesus celkkii sutnje : « Du bárdni lea eallimin ! » Ja son ja oppa su dálu veahka oskugohte .
Dát lei nubbi mearka maid Jesus dagai maŋŋil go lei boahtán Judeas Galileai .
Das maŋŋil ledje juvddálaččaid allabasit , ja Jesus vulggii bajás Jerusalemii .
Jerusalemis lea Sávzapoartta lahka láttu man namma hebreagillii lea Betesda .
Dan birra leat vihtta hálla , ja ollu buohccit ledje veallámin das : čalmmeheamit , lápmásat , rámbbit .
Sii vurde ahte čáhci lihkahuvvošii . Dasgo Hearrá eŋgel njiejai duollet dálle láddui ja lihkahahtii čázi .
Vuosttaš gii njiedjalii láddui maŋŋil go čáhci lei lihkahuvvon , dat dearvvašmuvai , mii ihkinassii dávddaid sus leaččai .
Das lei olmmái gii lei buohcan golbmalogigávcci jagi .
Go Jesus oinnii su veallámin das ja diđii ahte son lei buohcan guhká , de son celkkii sutnje Buohcci vástidii : « Hearrá , mus ii leat oktage gii veahkehivččii mu láddui go čáhci lea lihkahuvvon .
Ja go mun joavddan , de lea álo muhtun eará geargan njiedjalit dohko mu ovddabeallái . »
Jesus cealká sutnje : « Čuožžil , váldde seaŋggat ja vázzil ! »
Ja olmmái dearvvašmuvai dan seammás ; válddii seaŋggas ja vázzilii .
Muhto lei sábbátbeaivi , ja juvddálaččat dadje dearvvašmahttojuvvon olbmái : « Odne lea sábbát , ii ge dus leat lohpi guoddit seaŋgga . »
Son vástidii : « Son guhte dearvvašmahtii mu , celkkii munnje : Váldde seaŋggat ja vázzil ! »
Sii jerre : « Gii lea dat olmmái guhte gohčui du váldit seaŋggat ja vázzilit ? »
Dearvvašmahttojuvvon olmmái ii diehtán gii dat lei . Dasgo Jesus lei juo jávkan olbmuid sisa .
Maŋŋil Jesus gávnnai olbmá tempelšiljus ja celkkii sutnje : « Geahča , dál leat dearvvaš .
Ale šat suddut , amas mihkkege bahábuid dáhpáhuvvat dutnje . »
Olmmái manai ja muitalii juvddálaččaide ahte Jesus dat lei dearvvašmahttán su .
Juvddálaččat doarrádallagohte Jesusa danne go son dagai dákkáriid sábbáhin .
Muhto Jesus celkkii sidjiide : « Mu Áhčči bargá bisánkeahttá ; ja nu ferten mun ge . »
Das maŋŋil juvddálaččat geahččaledje velá áŋgireabbot goddit su . Son han ii rihkkon dušše sábbáha , muhto gohčodii Ipmila iežas áhččin ge ja dagai iežas Ipmila láhkásažžan .
Jesus vástidii sidjiide ná : Duođaid , duođaid , mun cealkkán didjiide : Ii Bárdni sáhte dahkat maidege iešalddes , earet dan maid son oaidná Áhčis dahkamin .
Maid Áhčči dahká , dan Bárdni ge dahká .
Dasgo Áhčči ráhkista Bártni ja čájeha sutnje buot maid ieš dahká . Ja son čájeha sutnje stuorit daguid go dán , vai dii ovddošehpet .
Dasgo nugo Áhčči bajásčuoččáldahttá jábmiid ja dahká sin eallin , nu Bárdni ge dahká eallin sin geaid son dáhttu .
Ii ge Áhčči dubme ovttage , muhto son lea addán buot dubmenválddi Bárdnái , vai buohkat gudnejahtášedje Bártni nugo Áhči ge .
Dat guhte ii gudnejahte Bártni , ii gudnejahte Áhči ge gii lea vuolggahan su .
Duođaid , duođaid , mun cealkkán didjiide : Dat guhte gullá mu sáni ja osku sutnje gii lea vuolggahan mu , sus lea agálaš eallin ; son ii boađe dupmui , muhto lea juo mannan jápmimis eallimii .
Duođaid , duođaid , mun cealkkán didjiide : Boahtá áigi , ja dat lea dál juo , go jábmit gullet Ipmila Bártni jiena , ja sii geat gullet , ožžot eallit .
Dasgo nugo Áhčis lea iešalddes eallin , de son lea maiddái suovvan Bárdnái ge ahte sus lea iešalddes eallin .
Áhčči lea addán sutnje dubmenválddi , danne go son lea Olbmobárdni .
Allet imaštala dan , dasgo dat áigi boahtá go buohkat geat leat hávddiin , gullet su jiena ja sii bohtet olggos . Sii geat leat dahkan buriid , bajásčuožžilit eallimii , muhto sii geat leat dahkan baháid , bajásčuožžilit dupmui .
In mun sáhte iešalddán dahkat maidege . Mun dubmen dađe mielde go gulan , ja mu duopmu lea vuoigatlaš . Dasgo in mun dáhto ovddidit iežan dáhtu , muhto su dáhtu gii lea vuolggahan mu .
Jos mun iežan birra duođaštan , de mu duođaštus ii leat duohta .
Muhto lea muhtun eará gii duođašta mu birra , ja mun dieđán ahte su duođaštus mu birra lea duohta .
Dii bijaidet sáni Johanassii , ja son duođaštii duohtavuođa .
In mun dárbbaš makkárge duođaštusa olbmuin , muhto cealkkán dán vai dii bestojuvvošeiddet .
Johanas lei buolli ja báiti čuovggas , muhto dušše oanehis áiggi dii hálideiddet illudit su čuovgasis .
Muhto mus lea stuorit duođaštus go dat man Johanas attii .
Dasgo dat dagut maid Áhčči lea addán munnje ollašuhttit , ja maid mun dagan , dat duođaštit ahte Áhčči lea vuolggahan mu .
Áhčči gii lea vuolggahan mu , lea ieš duođaštan mu birra .
Su jiena ehpet leat goassege gullan , ehpet ge oaidnán su hámi . Su sátni ii biso din siste , dasgo dii ehpet oskko sutnje gean son lea vuolggahan .
Dii guorahallabehtet čállagiid , danne go jurddašehpet dain gávdnat agálaš eallima .
Ja aiddo dat duođaštit mu birra ! Muhto dii ehpet dáhto boahtit mu lusa oažžut eallima .
Mun in vuostáiváldde gudni olbmuin , muhto mun dovddan din ja dieđán ahte din siste ii leat ráhkisvuohta Ipmilii .
Mun lean boahtán Áhččán nammii , ehpet ge dii vuostáiváldde mu .
Muhto jos muhtun eará boahtá iežas nammii , de su dii vuostáiváldibehtet .
Mo dii sáhttibehtet oskut , dii geat áinnas dáhttubehtet gudni guhtet guimmiineattet , ehpet ge oza gudni áidna Ipmilis ?
Allet jurddaš ahte mun sivahalan din Áhči ovddas .
Son gii sivahallá din , lea Movsses , geasa dii bidjabehtet iežadet doaivvu .
Jos dii livččiidet oskon Movssesii , de livččiidet oskon munnje ge , dasgo son lea čállán mu birra .
Muhto jos dii ehpet oskko su čállagiidda , mo de sáhttibehtet oskut mu sániide ?
Das maŋŋil Jesus manai nuppi beallái Galileajávrri , mii maiddái gohčoduvvo Tiberiasjávrin .
Ollu olbmot čuvvo su , danne go sii oidne daid mearkadaguid maid son dagai go dearvvašmahtii buhcciid .
Jesus manai várrái , ja čohkánii máhttájeddjiidisguin .
Beassážat , juvddálaččaid basit , ledje lahka .
Go Jesus geahčastii ja oinnii ollu olbmuid boahtimin su lusa , de celkkii Filipii : « Gos mii oastit láibbi , vai dát buohkat oččošedje borrat ? »
Dán son celkkii geahččalan dihtii Filipa , dasgo son diđii ieš maid áiggui dahkat .
Filip vástidii : « Ii guovtti čuođi denarii ge fidne dan mađe láibbi ahte juohkehažžii livččii bihtáš ge . »
Nubbi máhttájeaddji , Ándaras , Simmon Biehtára viellja , dajai sutnje : « Dás lea uhca gánddaš geas leat vihtta bivgeláibbi ja guokte guoláža , muhto mat dat leat nu olusiidda ? »
Jesus celkkii : « Gohččot olbmuid čohkánit . »
Das lei rássás báiki , ja sii čohkánadde . Olbmáid lohku lei birrasiid vihttaduhát .
Jesus válddii láibbiid , rohkadalai giittusrohkosa ja juogadii sidjiide geat ledje čohkkámin das , nu maiddái guliid ge , nu ollu go ieš guhtege hálidii .
Go sii ledje gallánan , de son dajai máhttájeddjiidasas : « Čogget báhcán bihtáid , amas mihkkege mannat duššás . »
Sii dahke nu ja devde guoktenuppelot veaddelihti bihtáiguin mat ledje báhcán dan viđa bivgeláibbis , maŋŋil go buohkat ledje boradan .
Go olbmot oidne dan mearkka maid Jesus lei dahkan , de dadje : « Dá lea duođaid dat profehta guhte galggai boahtit máilbmái ! »
Jesus diđii ahte sii áigo boahtit ja veagal dahkat su gonagassan . Danne son guđii sin ja manai várrái . Son manai dohko okto .
Go šattai eahket , de máhttájeaddjit bohte vuolás jávregáddái , manne fatnasii ja vulge nuppi beallái jávrri Kapernaumii .
Lei juo seavdnjat , ii ge Jesus lean velá boahtán sin lusa .
Jávrris ledje stuora bárut , dasgo biegga lei garas .
Go sii ledje suhkan vihttagoalmmátlot dahje golbmalot stadia , de oidne Jesusa boahtimin vácci jávrri alde ja lahkaneamen fatnasii .
Sii baláskedje sakka . Muhto Jesus celkkii sidjiide : « Mun dat lean , allet bala ! »
Sii áigo váldit su fatnasii , muhto dan seammás dat lei juo láddemin dan gáddái gosa ledje mannamin .
Nuppi beaivvi ledje ain ollu olbmot nuppi bealde jávrri . Sii ledje oaidnán ahte das lei dušše okta fanas ja ahte ii Jesus lean mannan fatnasii máhttájeddjiidisguin , muhto sii ledje vuolgán su haga .
Dál bohte eará fatnasat Tiberiasis ja cehkkejedje lahka dan báikki gos Hearrá lei rohkadallan giittusrohkosa ja sii ledje borran láibbi .
Go olbmot oidne ahte ii Jesus eai ge su máhttájeaddjit lean das , de manne fas fatnasiidda ja vulge Kapernaumii ohcat Jesusa doppe .
Sii gávdne su nuppi bealde jávrri ja jerre sus : « Rabbi , goas don bohtet deike ? »
Jesus vástidii sidjiide : « Duođaid , duođaid , mun cealkkán didjiide : Ehpet dii oza mu dan dihtii go lehpet oaidnán mearkkaid , muhto danne go boraidet láibbi ja galláneiddet .
Allet bargga dan borramuša ala mii nohká , muhto dan ala mii bistá ja addá agálaš eallima , dan man Olbmobárdni addá didjiide .
Dasgo Ipmil Áhčči lea merken su seaillainis . »
Sii dadje sutnje : « Mat leat dasto dat dagut maid Ipmil dáhttu min dahkat ? »
Jesus vástidii sidjiide : « Dát lea Ipmila dahku ahte dii oskubehtet sutnje gean Ipmil lea vuolggahan . »
Sii jerre : « Makkár mearkka de dagat , vai mii oainnášeimmet ja oskkošeimmet ?
Maid don dagat ?
Min máddarat borre mánna meahcis , nugo lea čállojuvvon : Láibbi almmis attii son sidjiide borrat . »
Jesus vástidii : « Duođaid , duođaid , mun cealkkán didjiide : Movsses ii addán didjiide láibbi almmis ; muhto mu Áhčči addá didjiide duohta almmi láibbi .
Ipmila láibi lea dat láibi mii boahtá vuolás almmis ja addá eallima máilbmái . »
Sii dadje sutnje : « Hearrá , atte midjiide álelassii dan láibbi . »
Jesus vástidii : « Mun lean eallima láibi .
Dat guhte boahtá mu lusa , ii goassege nealggo , ja dat guhte osku munnje , ii goassege goikka .
Muhto mun lean cealkán didjiide ahte dii lehpet oaidnán mu , ehpet ge vel oskko .
Buohkat geaid Áhčči addá munnje , bohtet mu lusa , ja dat gii boahtá mu lusa , su in eisege áje eret .
Dasgo mun in leat boahtán vuolás almmis dahkat dan maid ieš dáhtun , muhto su dáhtu , gii lea vuolggahan mu .
Ja dát lea mu vuolggaheaddji dáhttu , ahte mun in masse ovttage sis geaid son lea addán munnje , muhto bajásčuoččáldahtán sin maŋimuš beaivvi .
Dasgo dát lea Áhččán dáhttu , ahte juohkehaš guhte oaidná Bártni ja osku sutnje , oažžu agálaš eallima , ja mun bajásčuoččáldahtán su maŋimuš beaivvi . »
Juvddálaččat nimmoredje danne go son celkkii : « Mun lean láibi mii lea boahtán vuolás almmis . »
Ja sii jerre : « Ii go dát leat Jesus , Jovsseha bárdni .
Mii han dovdat sihke su áhči ja su eatni .
Mo son de sáhttá dadjat ahte son lea boahtán vuolás almmis ? »
Jesus vástidii sidjiide : « Allet nimmor !
Ii oktage sáhte boahtit mu lusa muđuid go ahte Áhčči , guhte lea vuolggahan mu , geassá su ; ja mun bajásčuoččáldahtán su maŋimuš beaivvi .
Profehtaid čállagiidda lea čállojuvvon : Sii buohkat šaddet Ipmila máhttájeaddjin .
Juohkehaš guhte guldala Áhči ja oahppá sus , boahtá mu lusa .
Ii oktage leat duođaid oaidnán áhči , earet su guhte boahtá Ipmila luhtte ; son lea oaidnán Áhči .
Duođaid , duođaid , mun cealkkán didjiide : Dat guhte osku , sus lea agálaš eallin .
Mun lean eallima láibi .
Din máddarat borre mánna meahcis , ja dattege sii jápme .
Muhto dát láibi boahtá vuolás almmis , ja dat guhte borrá dan , ii jáme .
Mun lean ealli láibi mii lea boahtán vuolás almmis .
Jos guhtege borrá dán láibbi , de son eallá agálaččat .
Dat láibi man mun attán , lea mu rumaš , ja mun attán dan vai máilbmi oččošii eallit . »
Dás maŋŋil juvddálaččat riidališgohte gaskaneaset ja dadje : « Mo sáhttá son addit midjiide rupmašis borrat ? »
Jesus celkkii sidjiide : « Duođaid , duođaid , mun cealkkán didjiide : Jos dii ehpet bora Olbmobártni rupmaša ja juga su vara , de dis ii leat eallin .
Muhto son guhte borrá mu rupmaša ja juhká mu vara , sus lea agálaš eallin , ja mun bajásčuoččáldahtán su maŋimuš beaivvi . Dasgo mu rumaš lea duohta borramuš , ja mu varra lea duohta juhkamuš .
Dat guhte borrá mu rupmaša ja juhká mu vara , bissu mu siste ja mun bisun su siste .
Nugo ealli Áhčči lea vuolggahan mu , ja mun ealán su bokte , nu maiddái son , guhte mu borrá , eallá mu bokte .
Dát lea dat láibi mii lea boahtán vuolás almmis , ii ge dat maid máddarat borre .
Sii leat jápmán . Muhto dat guhte borrá dán láibbi , eallá agálaččat . »
Dán son celkkii go lei oahpaheamen Kapernauma synagogas .
Olusat su máhttájeddjiin geat gulle dán , dadje dalle : « Dát leat garra sánit !
Gii gierdá guldalit diekkáriid ? »
Jesus diđii iešalddes ahte máhttájeaddjit nimmoredje , ja son celkkii : « Vearránahttá go dát din ?
Mo de jos oaidnibehtet Olbmobártni mannamin bajás dohko gos lei ovdal ?
Vuoigŋa dat lea guhte dahká eallin ; oaččis ii leat mihkkege ávkkiid .
Dat sánit maid mun lean sárdnon didjiide , leat vuoigŋa ja eallin .
Muhto dis leat muhtumat guđet eai oskko . »
Dasgo Jesus diđii álggu rájes geat eai oskon , ja gii beahtášii su .
Ja son lasihii : « Aiddo danne mun celken ge didjiide ahte ii oktage sáhte boahtit mu lusa jos Áhčči ii suova . »
Dán rájes olusat su máhttájeddjiin geassádedje eai ge šat vádjolan suinna .
De Jesus jearai dan guoktenuppelohkásis : « Dáhttubehtet go dii ge mannat eret ? »
Muhto Simmon Biehtár vástidii : « Hearrá , gean lusa mii manašeimmet ?
Dus leat agálaš eallima sánit , ja mii oskut ja diehtit ahte don leat Ipmila Bassi . »
Jesus celkkii sidjiide : « In go mun leat válljen din guoktenuppelohkása ?
Ja okta dis lea beargalat . »
Son sártnui Judasa , Simmon Iskariota bártni , birra . Dasgo son galggai beahttit Jesusa , vaikko son lei okta dan guoktenuppelohkásis .
Das maŋŋil Jesus vádjolii Galileas .
Son ii dáhtton leat Judeas , dasgo juvddálaččat vigge goddit su .
Go juvddálaččaid basit , lastagoahtebasit , ledje lahka , de su vieljat dadje sutnje : « Vuolgge eret dáppe ja mana Judeai , vai du máhttájeaddjit ge besset oaidnit du daguid !
Dasgo ii oktage daga maidege čihkosis jos dáhttu šaddat dovddusin .
Jos don sáhtát dahkat dákkár daguid , de čájet máilbmái gii don leat ! »
Dasgo eai su vieljat ge oskon sutnje .
Jesus celkkii sidjiide : « Mu áigi ii leat velá boahtán , muhto didjiide lea álo rivttes áigi .
Máilbmi ii sáhte vašuhit din , muhto mu dat vašuha , dasgo mun duođaštan ahte dan dagut leat bahát .
Mannet fal dii bajás basiide ; mun in vuolgge dáidda basiide , dasgo mu áigi ii leat velá boahtán . »
Dán son celkkii sidjiide ja bázii ieš Galileai .
Muhto maŋŋil go su vieljat ledje mannan ávvudemiide , de son ge vulggii , ii albmosit , muhto suoli .
Juvddálaččat ohce su basiid áigge ja jerre : « Gos son lea ? »
Ja olbmot savkkástalle ollu su birra . Muhtumat dadje : « Son lea buorre olmmoš . » Earát gis dadje : « Ii leat , son fille álbmoga ! »
Ii oktage hállan albmosit su birra , dasgo sii balle juvddálaččain .
Lei juo guovdelaš basiid go Jesus manai bajás tempelšilljui ja oahpahišgođii .
Juvddálaččat ovddošedje ja dadje . « Gos son lea ožžon oahpas , go ii leat oahpahuvvon ? »
Jesus vástidii sidjiide : « Mu oahppu ii leat mu , muhto su guhte vuolggahii mu .
Dat guhte dáhttu dahkat su dáhtu , oažžu dovdat lea go oahppu Ipmilis vai mus alddán .
Dat guhte sárdnida iešalddes , ohcá iežas gudni .
Muhto dat guhte bargá su gudni ala gii lea vuolggahan su , sárdnu duođa , ii ge sus leat mihkkege vearrivuođaid .
Ii go Movsses leat addán didjiide lága ?
Muhto ii oktage dis jeagat lága .
Manne dalle viggabehtet goddit mu ? »
Olbmot vástidedje : « Dus lea bahá vuoigŋa , gii ba du vikkašii goddit ? »
Jesus vástidii sidjiide : « Ovtta dagu mun lean dahkan , ja dii buohkat ovddošehpet dan .
Movsses lea addán didjiide birračuohpahusa – ii dat Movssesis gal boađe , muhto máddariin – ja dii birračuohppabehtet , vaikko livččii ge sábbát .
Jos dál olmmoš sáhttá birračuhppojuvvot sábbáhin , amas Movssesa láhka rihkkojuvvot , sáhttibehtet go dii dalle suhttat munnje dan dihtii go mun dahken olbmo ollásit dearvvašin sábbáhin ?
Allet dubme dan mielde mo áššit orrot leamen , muhto dubmejehket vuoigatlaččat ! »
Muhtumat geat orro Jerusalemis dadje : « Ii ba dá leat dat olmmoš gean juvddálaččat vigget goddit ?
Ja gehččet , dál son sárdnu albmosit , eai ge sii daja sutnje maidege .
Dáidet ráđđehearrát duođaid dohkkehit ahte son lea Messias ?
Muhto mii han diehtit gos dát olmmái lea eret . Go Messias boahtá , de ii oktage dieđe gos son boahtá . »
Oahpahettiin tempelšiljus Jesus čuorvvui : « Dii dovdabehtet mu ja diehtibehtet gos mun lean eret .
Mun in leat ieš mearridan boahtiman . Son guhte lea vuolggahan mu , lea luohtehahtti . Su dii ehpet dovdda .
Mun dovddan su , dasgo mun boađán su luhtte , ja son lea vuolggahan mu . »
Ráđđehearrát hálidedje váldit su gitta , muhto ii oktage bidjan gieđas su ala , dasgo su diibmu ii lean velá boahtán .
Muhto olusat olbmuin osko sutnje ja dadje : « Go Messias boahtá , dahká go son dalle eanet mearkkaid go dát olmmái ? »
Farisealaččat gulle ahte olbmot nie savkkástalle su birra , ja bajitbáhpat ja farisealaččat vuolggahedje dál olbmáideaset váldit su gitta .
Jesus celkkii : « Oanehis áiggi lean velá din luhtte , de mun manan su lusa gii lea vuolggahan mu .
Dalle dii ohcabehtet mu , muhto ehpet gávnna mu , dasgo doppe gos mun lean , dohko ehpet sáhte boahtit . »
De juvddálaččat jerre guhtet guimmiineaset : « Gosa son áigu mannat ? Manne mii eat gávnnaše su ?
Lea go son vuolgimin min álbmotguimmiid lusa geat ásset greikalaččaid gaskkas , ja áigu go sárdnidit greikalaččaide ge ?
Maid son oaivvilda go cealká : Dii ohcabehtet mu , muhto ehpet gávnna , ja dii ehpet beasa dohko gos mun lean ? »
Basiid maŋimuš beaivvi , stuora bassebeaivvi , Jesus čuožžilii ja čuorvvui : « Geas leažžá goiku , bohtos mu lusa ja juhkos !
Dat guhte osku munnje , su siskkildasas golget ealli čázi rávnnjit , nugo čála cealká . »
Dán son celkkii Vuoiŋŋa birra , gean sii ožžo geat osko sutnje .
Dasgo Vuoigŋa ii lean velá boahtán , danne go Jesus ii lean velá hearvásmahttojuvvon .
Muhtumat olbmuin dadje go gulle su sániid : « Dát ferte leat dat profehta . » Earát fas dadje : « Dat lea Messias ! »
De muhtumat dadje : « Ii han Messias gal boađe Galileas ?
Ii go čála cealkke ahte Messias boahtá Dávveda sogas ja Betlehemas , dan gávpogis gos Dávvet lei ? »
De šattai riidu olbmuid gaskii su geažil .
Muhtumat hálidedje váldit su gitta , muhto ii oktage bidjan gieđa su ala .
Go fávttat bohte ruovttoluotta , de bajitbáhpat ja farisealaččat jerre sis : « Manne dii ehpet buktán su deike ? »
Fávttat vástidedje : « Ii goassege leat oktage olmmoš sárdnidan nugo dát olmmái . »
Farisealaččat dadje : « Lehpet go dii ge fillehallan ?
Lea ba gal oktage ráđđehearrá velá oskon sutnje ? Dahje oktage farisealaš ?
Muhto dát joavku mii ii dovdda lága , lea garuhuvvon ! »
Nikodemus , muhtun sin searvvis , gii oktii ovdal lei boahtán Jesusa lusa , dajai : « Ii han min láhka dubme olbmo ovdal go son lea dutkojuvvon , ja lea čielggas maid son lea dahkan ? »
Sii vástidedje : « Dáiddát don ge leat Galileas eret ?
Guorahala čállagiid , de oahpat ahte ii oktage profehta boađe Galileas . »
muhto Jesus manai Oljovárrái . Árrat nuppi iđida son bođii fas tempelii .
Ollu olbmot čoagganedje su birra , ja son čohkánii ja oahpahišgođii sin .
De čálaoahppavaččat ja farisealaččat bukte muhtun nissona gii lei gávnnahallan furrošettiin , bidje su Jesusa ovdii
ja dadje : « Oahpaheaddji , dát nisu lea gávnnahallan furrošettiin .
Lágas Movsses lea gohččon geađgádit diekkár nissoniid .
Maid ba don cealkkát dasa ? »
Dán sii dadje geahččalan dihtii su , vai gávnnašedje juoidá mainna sivahallat su .
Muhto Jesus njahkalii ja čálii eatnamii suorpmain .
Go ain jearahalle , de čuožžilii fas ja celkkii sidjiide : « Dat din searvvis guhte leažžá suttuheapmi , bálkestehkos vuosttaš geađggi . »
De fas njahkalii ja čálii eatnamii .
Go sii gulle dán , de vulge eret , okta nuppi maŋis , boarráseamosat vuosttamužžan .
Loahpas lei Jesus báhcán okto nissoniin guhte lei čuožžumin das .
Jesus njulgestii iežas ja jearai : « Nisu , gos sii leat ?
Ii go oktage leat dubmen du ? »
Nisu vástidii : « Ii , Hearrá , ii oktage . »
Jesus celkkii : « In mun ge dubme du
Mana eret , ale ge šat suddut ! »
Jesus sártnui fas álbmogii ja celkkii : « Mun lean máilmmi čuovggas .
Dat guhte čuovvu mu , ii goassege vádjol seavdnjadasas , muhto sus lea eallima čuovggas . »
Farisealaččat dadje sutnje : « Don leat duođašteamen iežat birra , du duođaštus ii leat duohta . »
Jesus vástidii sidjiide : « Jos velá duođaštan ge iežan birra , de mu duođaštus lea dattege duohta , dasgo mun dieđán gos mun boađán ja gosa mun manan .
Muhto dii ehpet dieđe gos mun boađán ja gosa mun manan .
Dii dubmebehtet nugo olbmot dahket , muhto mun in dubme ovttage .
Muhto jos vel dubmešin ge , de mu duopmu livččii riekta , dasgo mun in leat okto . Son guhte lea vuolggahan mu , lea muinna .
Ja din iežadet láhkii lea čállojuvvon ahte guovtti olbmo duođaštus lea duohta .
Mun duođaštan iežan birra , ja Áhčči ge , guhte lea vuolggahan mu , duođašta mu birra . »
Sii jerre sus : « Gos du áhčči lea ? »
Jesus vástidii : « Dii ehpet dovdda mu ehpet ge mu Áhči .
Jos dovddašeiddet mu , de dovddašeiddet Áhččán ge . »
Dán Jesus sártnui tempelis oahpahettiin tempelbumbbá guoras .
Muhto ii oktage váldán su gitta , dasgo su diibmu ii lean velá boahtán .
Jesus sártnui fas sidjiide : « Mun manan eret , ja dalle dii ohcabehtet mu , muhto dii jápmibehtet suttuidasadet .
Dii ehpet beasa dohko gosa mun manan . »
Juvddálaččat dadje dalle : « Áigu go son sorbmet iežas go juo cealká : Dii ehpet beasa dohko gosa mun manan ? »
Son celkkii sidjiide : « Dii boahtibehtet vuollin , mun boađán badjin .
Dii gullabehtet dán máilbmái , mun in gula dán máilbmái .
Dan dihtii mun celken ahte dii jápmibehtet suttuidasadet .
Dasgo jos dii ehpet oskko ahte mun lean dat guhte lean , de jápmibehtet suttuidasadet . »
Sii jerre sus : « Gii don leat ? »
Jesus celkkii : « Manne mun oppa sártnun ge dinguin ?
Mus lea ollu dadjamuš din birra ja ollu man dihtii dubmet din .
Muhto son guhte lea vuolggahan mu , sárdnu duođa , ja maid mun lean gullan sus , dan cealkkán máilbmái . »
Eai sii ádden ahte son lei sárdnumin sidjiide Áhči birra .
Ja Jesus celkkii sidjiide : « Go dii lehpet bajidan Olbmobártni , de fuobmábehtet ahte mun lean dat guhte lean , in ge daga maidege iešalddán , muhto sártnun nugo Áhčči lea oahpahan munnje .
Ja son guhte lea vuolggahan mu , lea muinna .
Son ii leat guođđán mu okto , dasgo mun dagan álo buot su miela mielde . »
Go son sártnui nu , de ledje eatnagat geat osko sutnje .
Jesus celkkii dalle daid juvddálaččaide geat ledje oskugoahtán sutnje : « Jos dii bissubehtet mu sánis , de lehpet duođaid mu máhttájeaddjit .
Dalle dovddiidehpet duohtavuođa , ja duohtavuohta dahká din friddjan . »
Sii dadje sutnje : « Mii leat Abrahama nálli eat ge leat goassege leamaš geange šlávat .
Mo dalle sáhtát cealkit ahte mii šaddat friddjan ? »
Jesus vástidii : « Duođaid , duođaid , mun cealkkán didjiide : Juohkehaš guhte dahká suttu , lea suttu šlávva .
Šlávva ii biso viesus agibeaivái , muhto bárdni bissu das agibeaivái .
Jos Bárdni oažžu dahkat din friddjan , de šaddabehtet duođaid friddjan .
Mun dieđán ahte dii lehpet Abrahama nálli .
Muhto dii hálidehpet goddit mu , dasgo mu sátni ii oaččo saji din siste .
Mun sártnun dan birra maid lean oaidnán Áhči luhtte , ja dii gis dahkabehtet dan maid lehpet gullan áhčisteattet . »
Sii vástidedje : « Min áhčči lea Abraham . »
Jesus celkkii sidjiide : « Jos dii livččiidet Abrahama mánát , de dagašeiddet Abrahama daguid .
Muhto dál dii hálidehpet goddit mu – olbmá gii lea cealkán didjiide duohtavuođa man son lea gullan Ipmilis .
Nu Abraham ii dahkan .
Dii dahkabehtet nugo áhččádet . »
Sii dadje : « Eat mii leat riegádan fuorrávuođas .
Mis lea okta áhčči , dat lea Ipmil . »
Jesus vástidii : « Jos Ipmil livččii din áhčči , de dii ráhkistivččiidet mu . Dasgo mun lean vuolgán Ipmila luhtte ja lean boahtán din lusa .
In mun leat boahtán iešalddán , muhto son lea vuolggahan mu .
Manne dii ehpet ádde maid mun sártnun ?
Danne go ehpet gierdda gullat mu sáni !
Dis lea beargalat áhččin , ja dii hálidehpet dahkat áhččádet dáhtu mielde .
Son lea leamaš olmmošgoddi álggu rájes ja lea guhkkin eret duohtavuođas ; sus ii leat duohtavuohta .
Go son gielista , de sárdnu luonddus mielde , dasgo son lea gielis ja giellása áhčči .
Muhto mun sártnun duohtavuođa ja danne dii ehpet oskko munnje .
Guhtemuš dis sáhttá čájehit ahte mun lean dahkan suttu ?
Muhto jos mun sártnun duohtavuođa , manne dalle ehpet oskko munnje ?
Dat guhte boahtá Ipmilis , gullá Ipmila sáni .
Dii ehpet gula , dasgo ehpet boađe Ipmilis . »
Juvddálaččat dadje Jesusii : « Ii go leat duohta go mii dadjat du samarialažžan ja ahte dus lea bahá vuoigŋa ? »
Jesus vástidii : « Ii mus leat bahá vuoigŋa , muhto mun gudnejahtán Áhččán , ja dii badjelgeahččabehtet mu .
In mun oza iežan gudni . Muhto lea okta guhte dahká dan , ja son dubme .
Duođaid , duođaid , mun cealkkán didjiide : Dat guhte jeagada mu sáni , ii goassege muosát jápmima . »
Juvddálaččat vástidedje : « Dál mii diehtit ahte dus lea bahá vuoigŋa .
Abraham lea jápmán , ja nu leat profehtat ge , ja don cealkkát : Dat guhte doahttala mu sáni , ii goassege dovdda jápmima .
It dal don leat stuorit go áhččámet Abraham ?
Sihke son ja profehtat leat jápmán .
Geanin don anát iežat ? »
Buohkat vulge ruovttuidasaset , Jesus vástidii : « Jos mun gudnejahtášin iežan , de mu gudni ii livčče mange veara .
Muhto Áhččán gudnejahttá mu , son gean dii gohčodehpet iežadet Ipmilin .
Dii ehpet dovdda su , muhto mun dovddan su .
Jos mun dajašin ahte in dovdda su , de livččen gielis , nugo dii.
Muhto mun dovddan su ja doahttalan su sáni .
Áhččádet Abraham illudii go galggai beassat oaidnit mu beaivvi .
Son oinnii dan ja illudii . »
Juvddálaččat dadje : « It don leat vihttalot jagi ge ja leat oaidnán Abrahama ? »
Jesus vástidii : « Duođaid , duođaid , mun cealkkán didjiide : Ovdal go Abraham lei , mun lean leamaš . »
De sii válde geđggiid geđgen dihtii su , muhto Jesus čiehkádii ja manai olggos tempelis .
Go Jesus bođii vácci , de oinnii olbmá guhte lei riegádan čalmmeheapmin .
Máhttájeaddjit jerre : « Rabbi , gii lea dahkan suttuid maid sivas son lea riegádan čalmmeheapmin , son ieš vai su vánhemat ? »
Jesus vástidii : « Ii son eaba ge su vánhemat leat suddudan . Dat dáhpáhuvai vai Ipmila dagut almmustuvašedje go son dearvvašmahttojuvvo .
Nu guhká go lea beaivi , de mii fertet dahkat su daguid gii lea vuolggahan mu .
Idja boahtá , goas ii oktage sáhte bargat .
Nu guhká go mun lean máilmmis , de mun lean máilmmi čuovggas . »
Go Jesus lei cealkán dán , de čolgadii eatnamii ja dagai rábáha ja vuoiddai dan olbmá čalmmiide . De son celkkii sutnje : « Mana basadit Siloaláddos . »
Namma Siloa mearkkaša vuolggahuvvon .
Olmmái manai dohko ja bođii ruovttoluotta oaidnin .
Siidaguoimmit ja sii geat ledje oaidnán su ovdal gearjideamen , dadje : « Ii go dá leat dat olmmái gii lávii čohkkát ja gearjidit ? »
Muhtumat dadje ahte son dat lei , ja earát fas dadje : « Ii leat , lea dušše su vuohkái . »
Muhto ieš son dajai : « Mun dat lean . »
Sii jerre sus : « Mo dus rahpasedje čalmmit ? »
Son vástidii : « Muhtun gean namma lea Jesus , dagai rábáha muolddas , vuoiddai dan mu čalmmiide ja dajai : « Mana Siloaláddui ja basat . »
Mun mannen dohko , ja go ledjen basadan , de oaidnigohten . »
Sii jerre : « Gos dát olmmái lea ? »
Son vástidii : « In mun dieđe . »
Sii dolvo su gii lei leamaš čalmmeheapmi , farisealaččaid lusa .
Dan beaivvi lei sábbát go Jesus lei dahkan rábáha ja čalbmadan su .
Maiddái farisealaččat jerre sus mo son lei ožžon oainnu .
Olmmái muitalii : « Son bijai rábáha mu čalmmiid ala , de bassen čalmmiid , ja dál oainnán . »
Muhtun farisealaččat dadje : « Ii dat olmmái boađe Ipmila luhtte , go juo ii doala sábbáha . »
Earát dadje : « Mo suttolaš olmmái sáhttá dahkat diekkár mearkkaid ? »
Sii riidališgohte gaskaneaset dien alde . Danne jerre fas čalmmeheamis : « Maid don oaivvildat su birra , du čalmmiid han son rabai ? »
Olmmái vástidii : « Son lea profehta . »
Juvddálaččat eai jáhkkán ahte son lei leamaš čalmmeheapme ja lei oaidnigoahtán , ovdal go ledje viežžan su vánhemiid ja jearran sudnos : « Lea go dát dudno bárdni , gean dadjabeahtti riegádan čalmmeheapmin ?
Mo son dál sáhttá oaidnit ? »
Vánhemat vástideigga : « Moai dihte ahte dát lea munno bárdni , ja ahte son lea eamičalmmeheapmi .
Muhto mo son dál leš oaidnigoahtán , dan moai ean dieđe , ean ge dan , gii lea rahpan su čalmmiid .
Jerret sus alddes ! Son lea nu boaris ahte sáhttá vástidit ieš . »
Dán soai dajaiga danne go balaiga juvddálaččain .
Dasgo juvddálaččat ledje juo šiehttan ahte juohkehaš gii duođaštii ahte Jesus lei Messias , galggai čuldojuvvot eret synagogas .
Danne dajaiga vánhenguovttos : « Son lea doarvái boaris , jerret sus alddes ! »
Farisealaččat gohččo fas lusaset su gii lei leamaš čalmmeheapmi , ja dadje sutnje : « Atte gudni Ipmilii ja dovddas !
Mii diehtit ahte duot olmmái lea suttolaš . »
Son vástidii : « Leš go suttolaš , dan in dieđe .
Muhto ovtta mun dieđán : Mun ledjen čalmmeheapmi , ja dál mun oainnán . »
Sii jerre : « Maid son dagai dutnje ?
Mo son rabai du čalmmiid ? »
Olmmái vástidii sidjiide : « Mun lean juo dadjan dan didjiide , muhto dii ehpet guldal .
Manne fas dáhttubehtet gullat dan ?
Áiggošeiddet go dii ge su máhttájeaddjin ? »
Sii bilkidedje su ja dadje : « Don leat su máhttájeaddji , mii leat Movssesa máhttájeaddjit .
Mii diehtit ahte Ipmil lea sárdnon Movssesii , muhto dán olbmá mii eat dieđe gos son bođeš . »
Olmmái dajai : « Gal lea imaš ahte ehpet dieđe gos son bođeš , vaikko son lea rahpan mu čalmmiid .
Mii diehtit ahte Ipmil ii guldal suttolaččaid , muhto son guldala sin geat ballet sus ja ellet su dáhtu mielde .
Máilmmi álggu rájes ii leat goassege gullon ahte giige livččii rahpan eamičalmmeheami čalmmiid .
Jos dát olmmái ii boađáše Ipmila luhtte , de ii sáhtáše maidege dahkat . »
Sii vástidedje : « Don leat riegádan čađa suttolažžan , ja de vikkat oahpahit min ? »
Ja sii bálkestedje su olggos .
Jesus gulai ahte sii ledje bálkestan olbmá olggos , ja go son oinnii su , de jearai olbmás : « Oskkut go don Olbmobárdnái ? »
Olmmái vástidii : « Gii son lea , Hearrá , vai mun beasašin oskut sutnje ? »
Jesus vástidii : « Don leat oaidnán su ; son lea dat gii sárdnu duinna . »
Olmmái dajai : « Mun oskkun , Hearrá ! » ja luoitádii su ovdii .
Ja Jesus celkkii : « Mun lean boahtán dán máilbmái duopmun , vai čalmmeheamit oaidnigohtet , ja sii geat oidnet , čalmmehuvvet . »
Muhtun farisealaččat geat čužžo das , gulle dán ja dadje sutnje : « Dáidit mii ge leat čalmmeheamit ? »
Jesus vástidii : « Jos livččiidet čalmmeheamit , de dii livččiidet suttu haga .
Muhto dál dadjabehtet ahte oaidnibehtet , ja danne bissu din suddu . »
« Duođaid , duođaid , mun cealkkán didjiide : Dat guhte ii mana sávzzaid gárdái uksaráigge , muhto goargŋu eará báikki , son lea suola ja rievvár .
Muhto dat guhte manná sisa uksaráigge , lea sávzzaid geahčči .
Fákta rahpá sutnje , ja sávzzat gullet su jiena .
Son čuorvu sávzzaidis namain ja doalvu daid olggos .
Ja go son lea vuojehan olggos buot sávzzaidis , de manná daid ovddabeale , ja sávzzat čuvvot su , dasgo dat dovdet su jiena .
Muhto amas olbmo dat eai čuovo ; dat báhtarit sus , danne go eai dovdda amas olbmo jiena . »
Jesus muitalii sidjiide dán veardádusa , muhto sii eai ádden maid son oaivvildii .
Danne Jesus jotkkii : « Duođaid , duođaid , mun cealkkán didjiide : Mun lean uksa sávzzaid lusa .
Buohkat geat leat boahtán mu ovdal , leat suollagat ja rievvárat , muhto sávzzat eai leat guldalan sin .
Mun lean uksa .
Dat guhte manná sisa mu čađa , bestojuvvo , ja son beassá vázzit sisa ja olggos ja gávdná guohtuma .
Suola boahtá dušše suoládit , sorbmet ja stajidit .
Mun lean boahtán vai oččošedje eallima , valljugas eallima .
Mun lean buorre báimman .
Buorre báimman addá heakkas sávzzaid ovddas .
Dat guhte lea bálkáhuvvon , ii leat rivttes báimman , eai ge sávzzat gula sutnje . Son guođđá daid ja báhtara go oaidná gumppe boahtimin , ja gumpe rohkkáha daid ja biđge ealu .
Dasgo son lea dušše reaŋga ii ge ane fuola sávzzain .
Mun lean buorre báimman . Mun dovddan sávzzaidan , ja mu sávzzat dovdet mu , nugo Áhčči ge dovdá mu ja mun dovddan Áhči .
Mun attán heaggan sávzzaid ovddas .
Mus leat maiddái eará sávzzat , mat eai gula dán ellui .
Daid ge ferten láidestit ; dat gullet mu jiena , ja de šaddá leat okta eallu ja okta báimman .
Áhčči ráhkista mu danne go mun attán heaggan vai oaččun dan fas ruoktot .
Ii oktage váldde mu heakka , mun dagan dan iežan dáhtu mielde .
Dasgo mus lea fápmu addit heaggan ja fápmu váldit dan ruovttoluotta .
Dán gohččuma mun lean ožžon Áhčistan . »
De šattai fas riidu juvddálaččaid gaskii su sániid dihtii .
Olusat sis dadje : « Sus lea bahá vuoigŋa ! Son lea mielaheapmi !
Manne dii guldalehpet su ? »
Earát dadje : « Nie ii sártno olmmoš geas lea bahá vuoigŋa !
Sáhtášii go bahá vuoigŋa rahpat čalmmehemiid čalmmiid . »
De bohte tempelvihaheami allabasit .
Lei dálvi , ja Jesus váccašii geađgestoalppuid gaskkas Salomo tempelšiljus .
Juvddálaččat čoahkkanedje su birra ja jerre : « Man guhká áiggut doalahit min vissismeahttunvuođas ?
Jos don leaččat Messias , de cealkke midjiide njulgestaga ! »
Jesus vástidii : « Mun lean cealkán dan didjiide , muhto dii ehpet oskko .
Dat dagut maid mun dagan Áhččán namas , duođaštit mu birra .
Muhto dii ehpet oskko , dasgo dii ehpet leat mu sávzzat .
Mu sávzzat gullet mu jiena , mun dovddan daid , ja dat čuvvot mu .
Ja mun attán daidda agálaš eallima ; dat eai láhppo agálašvuođas ge , ii ge oktage gaikkit daid eret mu gieđas .
Áhččán , guhte lea addán daid munnje , lea stuorit go buohkat , ii ge oktage sáhte gaikkihit eret ovttage Áhččán gieđas .
Mun ja Áhčči letne okta . »
Juvddálaččat válde fas geđggiid geađgádan dihtii su .
Jesus celkkii sidjiide : « Mun lean čájehan didjiide ollu buriid daguid mat bohtet Áhčistan .
Man dagu dihtii dii geađgádehpet mu ? »
Juvddálaččat vástidedje : « Eat mii geađgát du mange buori dagu dihtii , muhto Ipmilbilkádusa dihtii , dasgo don guhte leat olmmoš , dagat iežat Ipmilin . »
Jesus vástidii : « Ii go din láhkii leat čállojuvvon : Mun lean cealkán ahte dii lehpet ipmilat ?
Láhka nappo gohčoda sin ipmilin guđet ožžo Ipmila sáni , ii ge čála sáhte dahkkojuvvot duššin .
Áhčči lea basuhan mu ja vuolggahan mu máilbmái . Mo sáhttibehtet dii čuoččuhit ahte mun bilkidan Ipmila go cealkkán ahte lean Ipmila Bárdni ?
Jos mun in daga Áhččán daguid , de allet oskko munnje .
Muhto jos mun dagan daid , de oskot goittot daguide , jos vel munnje ehpet oskkoš ge .
Dalle oaidnibehtet ahte Áhčči lea mu siste ja mun Áhči siste . »
Sii geahččaledje fas váldit su gitta , muhto son beasai sis báhtui .
Jesus manai fas nuppi beallái Jordana , dan báikái gos Johanas álggus gásttašii .
Doppe son orui muhtun áiggi . Olusat bohte su lusa ja celke : « Johanas ii dahkan maidege mearkadaguid , muhto buot maid son celkkii dán olbmá birra , lei duohta . »
Ja ollugat das oskugohte Jesusii .
Olmmái gean namma lei Lasarus , lei buohccán .
Son lei Betanias eret , dan gilis gos Márjá ja su oabbá Mártá oruiga .
Márjá lei son gii vuoiddai Hearrá julggiid njálggahájat vuoidasiin ja sihkui su julggiid vuovttaidisguin .
Lasarus , gii lei buohcamin , lei su viellja .
Oappášguovttos bijaiga sáni Jesusii : « Hearrá , du ráhkis ustit lea buohcci . »
Go Jesus gulai dan , de celkkii : « Dát ii leat jápmindávda , muhto dat lea Ipmilii gudnin , vai Ipmila Bárdni hearvásmahttojuvvošii dan bokte . »
Jesus ráhkistii Márttá ja su oappá ja Lasarusa .
Go Jesus dál gulai ahte Lasarus lei buohccán , de orui vel guokte beaivvi doppe gos lei . Dasto celkkii máhttájeddjiidasas : « Vulgot ruovttoluotta Judeai . »
Máhttájeaddjit dadje sutnje : « Rabbi , gieskat juvddálaččat geahččaledje geađgádit du , ja don vuolggát fas dohko ? »
Jesus vástidii : « Eai go beaivvis leat guoktenuppelot diimmu ?
Dat guhte vádjola beaivet , ii jorral , dasgo son oaidná dán máilmmi čuovgga .
Muhto dat guhte vádjola ihkku , vieggasa , danne go sus alddes ii leat čuovggas . »
Go son lei cealkán dán , de jotkkii : « Min ustit Lasarus lea nohkkan , muhto mun vuolggán boktit su . »
Máhttájeaddjit dadje : « Hearrá , jos son lea oađđimin , de son gal fas dearvvašmuvvá . »
Jesus oaivvildii ahte Lasarus lei jápmán , muhto sii gádde ahte son hálai dábálaš nahkáriid birra .
Danne Jesus celkkii njulgestaga : « Lasarus lea jápmán .
Ja din dihtii lean ilus go in lean doppe , vai dii oskugoađášeiddet .
Muhto vulgot su lusa . »
Duomás , gii gohčoduvvui Jumežin , dajai eará máhttájeddjiide : « Vulgot mii ge jápmit suinna oktan . »
Go Jesus joavddai , de gulai ahte Lasarus lei juo leamaš hávddis njeallje beaivvi .
Betania lea aiddo Jerusalema lahka , sullii vihttanuppelot stadia gávpogis eret , ja ollu juvddálaččat ledje boahtán jeđđet Márttá guoktá Márjjáin sudno morrašis vieljaska dihtii .
Go Mártá gulai ahte Jesus bođii , de vulggii su ovddal ; Márjá bázii ruoktot .
Mártá dajai Jesusii : « Hearrá , jos don livččet leamaš dás , de mu viellja ii livčče jápmán .
Muhto dál ge dieđán ahte maid ihkinassii don ánut Ipmilis , dan son addá dutnje . »
Jesus celkkii sutnje : « Du viellja bajásčuožžila . »
Mártá vástidii : « Mun dieđán ahte son lihkká bajásčuožžileamis maŋimuš beaivvi . »
Jesus cealká sutnje : « Mun lean bajásčuožžileapmi ja eallin ; dat guhte osku munnje , oažžu eallit vaikko vel jápmá ge .
Ii oktage guhte eallá ja osku munnje , jáme agálašvuođas ge .
Oskkut go dán ? »
Mártá dadjá : « De oskkun , Hearrá , mun oskkun ahte don leat Messias , Ipmila Bárdni , guhte galggai boahtit máilbmái . »
Go Mártá lei dadjan dan , de manai ja dáhtui oappás Márjjá boahtit ja dajai sutnje guovttá gaskan : « Oahpaheaddji lea dáppe ja gohčču du boahtit . »
Go Márjá gulai dan , de čuožžilii seammás ja manai su lusa .
Jesus ii lean vel boahtán gillái , muhto lei ain doppe gosa Mártá lei boahtán su ovddal .
Juvddálaččat geat ledje Márjjá dálus jeđđemin su , oidne ahte son fáhkka čuožžilii ja vulggii olggos , ja sii čuovvuledje su , danne go sii gádde ahte son lei mannamin hávddi lusa čierrut .
Go Márjá bođii Jesusa lusa ja oinnii su , de son luoitádii su julggiid ovdii ja dajai : « Hearrá , jos don livččet leamaš dáppe , de mu viellja ii livčče jápmán . »
Go Jesus oinnii čierrumin sihke Márjjá ja buot juvddálaččaid geat čuvvo su , de son moaráskii ja darragođii ja jearai : « Gosa dii lehpet bidjan su ? »
Sii vástidedje : « Hearrá , boađe geahččat . »
Jesus čierui .
Juvddálaččat dadje : « Geahča , man ráhkis son lei sutnje . »
Muhto muhtumat sis gis dadje : « Ii ba son gii rabai čalmmeheami čalmmiid , maiddái livčče sáhttán eastadit dán olbmá jápmimis ? »
Jesus moaráskii fas ja manai hávddi lusa . Hávdi lei bákteráigi , ja geađgi lei fierahuvvon ráiggi ovdii .
Jesus gohčui : « Váldet eret geađggi ! »
Mártá , jábmi oabbá , dadjá sutnje : « Hearrá , son bahčiida juo ; son han lea leamaš hávddis juo njeallje beaivvi . »
Jesus cealká : « In go mun cealkán dutnje ahte jos oskkut , de beasat oaidnit Ipmila hearvásvuođa ? »
De sii fierahedje eret geađggi . Ja Jesus bajidii čalmmiidis almmi guvlui ja celkkii : « Áhčči , mun giittán du go leat gullan mu .
Mun dieđán ahte don álo gulat mu . Muhto mun cealkkán dán olbmuid dihtii geat čužžot dás birra , vai sii oskot ahte don leat vuolggahan mu . »
Go son lei cealkán dán , de čurvii alla jienain : « Lasarus , boađe olggos ! »
Ja jábmi bođii olggos , gieđat ja juolggit gissojuvvon liikavárjjuid sisa ja liidni čadnojuvvon muođuid ovdii .
Jesus celkkii sidjiide : « Čovdet su ja diktet su mannat . »
Olusat dain juvddálaččain geat ledje boahtán Márjjá lusa ja ledje oaidnán maid Jesus dagai , oskugohte sutnje .
Muhto muhtumat sis manne farisealaččaid lusa ja muitaledje maid son lei dahkan .
Dalle bajitbáhpat ja farisealaččat gohččo čoahkkái Ráđi , ja dadje : « Maid mii dál dahkat ?
Dát olmmái dahká ollu mearkadaguid .
Jos mii diktit su ain joatkit , de fargga buohkat oskugohtet sutnje . De romalaččat bohtet ja váldet sihke min bassi báikki ja min álbmoga . »
Okta sis , Kaifas , gii lei bajimušbáhppan dan jagi , dajai dalle : « Dii ehpet ádde maidege .
Ehpet go dii jurddaš ahte lea buoret ahte okta olmmoš jápmá álbmoga ovddas go ahte oppa álbmot duššá . »
Dán son ii dadjan iešalddes , muhto go son lei bajimušbáhppan dan jagi , de son einnostii ahte Jesus galggai jápmit álbmoga ovddas , ii ge dušše álbmoga ovddas , muhto oktii čohkken dihtii daid Ipmila mánáid geat leat bieđganan juohke guvlui .
Dán beaivvi rájes sii ráđđádallagohte goddit su .
Danne Jesus ii johtán šat albmosit juvddálaččaid gaskkas , muhto vulggii eret doppe ja manai muhtun báikái meahci lahka , Efraim-nammasaš gávpogii .
Doppe son orui máhttájeddjiidisguin .
Juvddálaččaid beassášbasit lahkanišgohte , ja olusat vulge dain guovlluin Jerusalemii ovdal basiid buhtistit iežaset .
Sii ohce Jesusa , ja čuoččodettiin tempelšiljus sii jerre guhtet guimmiineaset : « Maid jáhkkibehtet ? Ii go son dáidde boahtit basiide ? »
Bajitbáhpat ja farisealaččát ledje gohččon ahte jos guhtege bođii diehtit gos Jesus lei , de galggai dieđihit sidjiide , vai sii besset váldit su gitta .
Guhtta beaivvi ovdal beassážiid Jesus bođii Betaniai gos Lasarus orui , son gean Jesus lei bajásčuoččáldahttán jápmimis .
Doppe dollojuvvojedje sutnje guossemállásat . Mártá lágidii daid , ja Lasarus lei okta dain geat ledje beavddi guoras .
Márjá buvttii butti buhtes , divrras nardusvuoidasa , vuoiddai Jesusa julggiid dainna ja sihkui daid vuovttaidisguin .
Viessu dievai njálggahájain .
Dalle dajai Judas Iskariot , okta máhttájeddjiin , son gii maŋŋil behtii Jesusa : « Manne dát vuoiddas ii vuvdojuvvon golmma čuođi denarii nu ahte livččii sáhttán addit ruđaid gefiide ? »
Dán son ii dadjan danne go son anii fuola gefiin , muhto danne go son lei suola .
Sin oktasaš ruhtabursa lei su duohken , ja son lávii váldit das mii dohko biddjojuvvui .
Muhto Jesus celkkii : « Diktet su ráfis ! Son lea vurken vuoidasa mu hávdádanbeaivái .
Geafit gal leat álo din luhtte , muhto mun in leat álo din luhtte . »
Ollu juvddálaččat ožžo diehtit ahte Jesus lei Betanias ja sii bohte dohko . Eai sii boahtán dušše su dihtii , muhto oaidnin dihtii Lasarusa ge , gean son lei bajásčuoččáldahttán jábmiid luhtte .
Dalle bajitbáhpat lihtodišgohte goddit Lasarusa ge , dasgo su dihtii ollu juvddálaččat manne dohko ja oskugohte Jesusii .
Beaivvi maŋŋil gulai stuora olmmošjoavku , mii lei boahtán beassášbasiide , ahte Jesus lei boahtimin Jerusalemii .
Dalle sii válde pálbmaovssiid ja manne su ovddal , ja sii čurvo : Hosianna !
Buressivdniduvvon lehkos son guhte boahtá Hearrá nammii , son guhte lea Israela gonagas !
Jesus gávnnai ásena ja čohkánii dan ala , nugo lea čállojuvvon : Ale bala , Siona nieida !
Geahča , du gonagas boahtá ; son riide ásenvárssáin .
Máhttájeaddjit eai ádden dán vel dalle , muhto go Jesus lei hearvásin dahkkojuvvon , de sii muite ahte dát lei čállojuvvon su birra , ja sutnje lei dáhpáhuvvan aiddo nu .
Buohkat geat ledje leamaš Jesusa mielde dalle go son rávkkai Lasarusa hávddis ja bajásčuoččáldahtii su jábmiid luhtte , duođaštedje dan maid ledje oaidnán .
Danne go olbmot ledje gullan ahte son lei dahkan dan mearkadagu , sii vulge su ovddal .
Muhto farisealaččat dadje gaskaneaset : « Dii oaidnibehtet ahte ii ávkkut ii mihkkege !
Oppa máilbmi viehká su maŋis ! »
Ledje muhtun greikalaččat sin gaskkas geat ledje boahtán Jerusalemii basiid áigge rohkadallat .
Sii manne Filipa lusa , gii lei Betsaidas Galileas eret , ja dadje sutnje : « Mii hálidivččiimet oaidnit Jesusa . »
Filip manai ja háleštii Ándarasain dan birra , ja soai manaiga Jesusa ságaide .
Jesus celkkii sudnuide : « Diibmu lea boahtán go Olbmobárdni hearvásin dahkkojuvvo .
Duođaid , duođaid , mun cealkkán didjiide : Jos nisogordni ii gahčaše eatnamii ja jámáše , de šattašii dušše dat okta gordni .
Muhto jos dat jápmá , de šaddada valjis šattuid .
Dat guhte ráhkista heakkas , massá dan , ja dat guhte dán máilmmis vašuha heakkas , gádju dan ja oažžu agálaš eallima .
Jos guhtege dáhttu bálvalit mu , de čuvvos mu , ja gos mun lean , doppe lea mu bálvaleaddji ge .
Dat guhte bálvala mu , su gudnejahttá Áhččán .
Dál lea mu siellu suorganan .
Muhto cealkkán go : Áhčči , beastte mu dán diimmus ?
In ! Dasgo aiddo dán diimmu várás mun lean boahtán .
Áhčči , divtte namat hearvásmahttojuvvot ! »
Dalle gullui jietna almmis : « Mun lean hearvásmahttán dan , ja dagan dan fas hearvásin . »
Olbmot geat ledje čuožžumin das , gulle dan ja dadje ahte baján lei čergon . Earát dadje : « Eŋgel dat sártnui sutnje . »
Muhto Jesus celkkii sidjiide : « Ii dát jietna gullon mu dihtii , muhto din dihtii .
Dál boahtá duopmu dán máilmmi badjel ; dán máilmmi gonagas bálkestuvvo dál olggos .
Ja go mun bajiduvvon eatnamis , de geasán buohkaid lusan . »
Dán son celkkii dovddahan dihtii makkár jápmima son galggai muosáhit .
Olbmot dadje dalle Jesusii : « Mii leat oahppan lágas ahte Messias bissu agálaččat .
Mo dalle sáhtát cealkit ahte Olbmobárdni galgá bajiduvvot ?
Gii lea dát Olbmobárdni ? »
Jesus vástidii : « Velá oanehassii lea čuovggas din luhtte .
Vádjolehket dan botta go dis lea čuovggas , amas seavdnjadas boahtit din ala .
Dat guhte vádjola seavdnjadasas , ii dieđe gosa manná .
Oskot čuovgasii dan botta go dis ain lea čuovggas , vai šattašeiddet čuovgasa mánnán . »
Go Jesus lei cealkán dán , de manai eret sin luhtte ja čiehkádii sis .
Vaikko son lei dahkan nu ollu mearkadaguid sin čalmmiid ovddas , de sii almmatge eai oskon sutnje , vai profehta Jesaja sátni ollašuvašii : Hearrá , gii oskkui min sártni , ja geasa lea almmustuvvan Hearrá gieđa fápmu ?
Sii eai sáhttán oskut , dasgo Jesaja lea maiddái cealkán : Son lea sevnnjodahttán sin čalmmiid ja buoššudan sin váimmuid , amaset sin čalmmit oaidnit ja sin váimmut áddet , nu ahte eai jorgalivčče , vai mun beasašin buoridit sin .
Dán Jesaja celkkii danne go oinnii Jesusa hearvásvuođa ja sártnui su birra .
Dattege olusat ráđđehearráin ge osko sutnje . Muhto farisealaččaid geažil sii eai dovddastan dan , amaset čuldojuvvot eret synagogas , dasgo sii ráhkistedje olbmuid gudni eambbo go Ipmila gudni .
Muhto Jesus čuorvvui : « Dat guhte osku munnje , ii oskko munnje , muhto sutnje guhte lea vuolggahan mu . Ja dat guhte oaidná mu , oaidná su guhte lea vuolggahan mu .
Mun lean čuovggas mii lea boahtán máilbmái , amas dat guhte osku munnje , báhcit seavdnjadassii .
Dat guhte gullá mu sániid ii ge vurke daid , su mun in dubme . Dasgo mun in leat boahtán dubmet máilmmi , muhto beastit máilmmi .
Dat guhte hilgu mu ii ge vuostáiváldde mu sániid , sus lea dattege duopmár : Dat sátni man mun lean sárdnon , dubme su maŋimuš beaivvi .
Dasgo mun in leat sárdnon iešalddán , muhto Áhčči gii lea vuolggahan mu , lea gohččon mu maid mun galggan cealkit ja sárdnut .
Ja mun dieđán ahte son dáhttu addit agálaš eallima .
Go mun sártnun , de sártnun nu mo Áhčči lea gohččon mu . »
Lei aiddo ovdalaš beassášbasiid , ja Jesus diđii ahte su diibmu lei boahtán go son galggai guođđit dán máilmmi ja mannat Áhči lusa .
Son lei ráhkistan máhttájeddjiidis geat ledje dán máilmmis , ja son ráhkistii sin gitta loahpa rádjái .
Sii dolle eahkedismállásiid . Beargalat lei juo bidjan jurdaga Judasa , Simmon Iskariota bártni , váibmui ahte son galggai beahttit Jesusa .
Jesus diđii ahte Áhčči lei addán buot su háldui , ja ahte son lei boahtán Ipmila luhtte ja lei máhccamin Ipmila lusa .
De son čuožžila boradeames , nuollá eret olgguldasbiktasa , váldá liidnesihkaldaga ja čatná iežas birra .
Dasto leike čázi lihttái ja bassagoahtá máhttájeddjiid julggiid ja sihkku liidnesihkaldagain mii sus lei čadnon birra .
Son boahtá Simmon Biehtára lusa , ja Biehtár dadjá sutnje : « Hearrá , basat ba don mu julggiid ? »
Jesus vástidii : « It ádde dál dan maid mun dagan , muhto don áddet dan maŋŋil . »
Biehtár dadjá : « It goassege oaččo bassat mu julggiid . »
Jesus vástidii : « Jos mun in basa du , de dus ii leat šat oassi mus. »
Simmon Biehtár dadjá : « Hearrá , ale basa dušše julggiid , muhto maiddái gieđaid ja oaivvi ge ! »
Jesus vástidii sutnje : « Dat gii lea lávggodan , lea áibbas buhtis ja dárbbaša bassat dušše julggiid .
Dii lehpet buhttásat – muhto ehpet buohkat . »
Dasgo son diđii gii galggai beahttit su . Danne son celkkii : « Ehpet dii leat buohkat buhttásat . »
Go son lei bassan sin julggiid , de cokkai fas olgguldasbiktasa ja manai beavdái . Son celkkii sidjiide : « Ipmirdehpet go maid mun lean dahkan didjiide ?
Dii gohčodehpet mu oahpaheaddjin ja hearrán , ja riektagis lehpet ge , go dat han mun lean ge .
Jos dál mun , gii lean hearrá ja oahpaheaddji , lean bassan din julggiid , de dii ge lehpet geatnegasat bassat guhtet guimmiideattet julggiid .
Mun lean addán didjiide ovdamearkka , vai dii dahkabehtet nugo mun lean dahkan didjiide .
Duođaid , duođaid , mun cealkkán didjiide : Bálvaleaddji ii leat stuorit go isit , ii ge áirras leat stuorit go son guhte lea vuolggahan su .
Dál dii diehtibehtet dán , ja jos dahkabehtet dan mielde , de lehpet ávdugasat .
Mun in sártno din buohkaid birra , dasgo mun dieđán geaid mun lean válljen .
Muhto dát čállaga sátni ferte ollašuvvat : Dat guhte borai mu láibbi , lea jorgalan mu vuostái .
Mun cealkkán dán didjiide dál ovdal go dat dáhpáhuvvá , vai dii , go dat lea dáhpáhuvvan , oskubehtet ahte mun lean dat guhte lean .
Duođaid , duođaid , mun cealkkán didjiide : Dat guhte váldá vuostái dan gean mun lean vuolggahan , váldá vuostái mu .
Ja dat guhte váldá vuostái mu , váldá vuostái su gii lea vuolggahan mu . »
Go Jesus lei cealkán dán , de son darragođii ja celkkii : « Duođaid , duođaid , mun cealkkán didjiide : Muhtun dis beahttá mu . »
Máhttájeaddjit gehčče guhtet guoibmáseaset ; eai sii ádden gean son oaivvildii .
Okta sis , dat máhttájeaddji gean Jesus ráhkistii , lei čohkkámin beavddis Jesusa bálddas .
Simmon Biehtár nuvkkihii sutnje , vai son jearašii gean Jesus oaivvildii .
Son mieiggastii dalle Jesusa ratti vuostái ja jearai : « Hearrá , gii dat lea ? »
Jesus vástidii : « Son lea dat geasa mun attán dán láibebihtá man dál buonjostan . »
De son buonjostii láibbi ja attii Judasii , Simmon Iskariota bárdnái .
Go Judas lei ožžon láibbi , de Sáhtán manai su sisa .
Jesus cealká sutnje : « Daga fargga dan maid áiggut dahkat . »
Ii oktage beavddis ádden maid son oaivvildii dáinna .
Danne go ruhtabursa lei Judasa hálddus , muhtumat gádde ahte Jesus dáhtui su mannat oastit daid maid sii dárbbašedje basiide , dahje addit juoidá gefiide .
Go Judas lei váldán láibebihtá , de manai dakkaviđe olggos .
Lei idja .
Go Judas lei mannan , de Jesus celkkii : « Dál Olbmobárdni lea hearvásmahttojuvvon , ja Ipmil lea hearvásmahttojuvvon su siste .
Jos Ipmil lea hearvásmahttojuvvon su siste , de Ipmil hearvásmahttá su iežas siste , ja son dahká dan fargga .
Mánážiiddán ! Oanehis bottoža lean mun ain din luhtte .
Dii šaddabehtet ohcat mu , muhto mun cealkkán fas didjiide dan seammá maid celken juvddálaččaide : Gosa mun manan , dohko dii ehpet beasa .
Mun attán didjiide ođđa báhkkoma : Ráhkistehket guhtet guimmiideattet .
Nugo mun lean ráhkistan din , nu galgabehtet dii ge ráhkistit guhtet guimmiideattet .
Jos dis lea ráhkisvuohta guhtet guoibmáseattet , de buohkat dovdet ahte dii lehpet mu máhttájeaddjit . »
Simmon Biehtár jearrá sus : « Hearrá , gosa don manat ? »
Jesus vástidii : « Dohko gosa mun manan , dohko don it sáhte čuovvut mu dál . Maŋŋil don beasat čuovvut mu . »
Biehtár dadjá : « Manne mun in sáhte čuovvut du dál ?
Mun attán heaggan du ovddas . »
Jesus vástidii : « Don attát heakkat mu ovddas ?
Duođaid , duođaid , mun cealkkán dutnje : Ovdal go vuoncávaris biškkáda , de don leat biehttalan mu golmma gearddi .
Alloset din váimmut suorganehko .
Oskot Ipmilii ja oskot munnje !
Mu Áhččán viesus leat ollu lanjat .
Jos nu ii livčče , de mun cealkkášin didjiide dan . Dasgo mun manan gárvvistit didjiide saji .
Ja go mun lean mannan ja lean gárvvistan didjiide saji , de boađán fas ja válddán din lusan , vai dii livččiidet doppe gos mun lean .
Ja dii diehtibehtet geainnu dohko gosa mun manan . »
Duomás dadjá sutnje : « Hearrá , eat mii dieđe gosa don manažat .
Mo mii de sáhttit diehtit geainnu ? »
Jesus cealká : « Mun lean geaidnu , duohtavuohta ja eallin .
Ii oktage beasa Áhči lusa earet mu bokte .
Jos dii dovddašeiddet mu , de dii dovddašeiddet Áhččán ge .
Dás duohko dii dovdabehtet su ja lehpet oaidnán su . »
Filip cealká sutnje : « Hearrá , čájet midjiide Áhči , ja das lea midjiide doarvái . »
Jesus vástida : « It go dovdda mu , Filip , vaikko mun lean leamaš nu guhká din luhtte ?
Dat guhte lea oaidnán mu , lea oaidnán Áhči .
Mo de sáhtát dadjat : Čájet midjiide Áhči ?
It go oskko ahte mun lean Áhči siste ja Áhčči mu siste ?
Dat sánit maid mun sártnun didjiide , eai leat mus alddán , muhto Áhčči lea mu siste ja dahká daguidis .
Oskot munnje go cealkkán ahte mun lean Áhči siste ja Áhčči mu siste . Jos muđuid ehpet oskko , de oskot munnje mu daguid dihtii .
Duođaid , duođaid , mun cealkkán didjiide : Dat guhte osku munnje , dahká maiddái daid daguid maid mun dagan . Duođaid , son dahká velá stuoribuid go daid , dasgo mun manan Áhči lusa . Maid ihkinassii dii átnubehtet mu nammii , dan mun dagan vai Áhčči hearvásin dahkkojuvvo Bártni bokte .
Jos dii átnubehtet juoidá mu nammii , de mun dagan dan .
Jos dii ráhkistehpet mu , de doallabehtet mu báhkkomiid .
Ja mun jearan Áhčis , ja son addá didjiide eará bealušteaddji gii bissu din luhtte agálaččat . Dat lea duohtavuođa Vuoigŋa .
Máilbmi ii sáhte vuostáiváldit su , dasgo máilbmi ii oainne su ii ge dovdda su .
Muhto dii dovdabehtet su ; son bissu din luhtte ja orru din siste .
In mun guođe din oarbbisin ; mun boađán din lusa .
Velá oanehis bottoš , de máilbmi ii šat oainne mu .
Muhto dii oaidnibehtet mu , dasgo mun ealán , ja dii ge oažžubehtet eallit .
Dan beaivvi dii áddebehtet ahte mun lean Áhččán siste , ja ahte dii lehpet mu siste ja mun din siste .
Dat guhte lea vuostáiváldán mu báhkkomiid ja jeagada daid , ráhkista mu .
Ja dat gii ráhkista mu , su ráhkista Áhččán ge . Mun ge ráhkistan su ja almmustahtán iežan sutnje . »
Nubbi Judas , ii ge Iskariot , dadjá sutnje : « Hearrá , manne don almmustahtát iežat midjiide , it ge máilbmái ? »
Jesus vástida sutnje : Jos guhtege ráhkista mu , de jeagada mu sáni , ja mu Áhčči ráhkista su , ja moai bohte su lusa ja orrugohte su luhtte .
Dat guhte ii ráhkis mu , ii jeagat mu sáni , ja dat sátni man dii gullabehtet ii boađe mus , muhto Áhčistan guhte lea vuolggahan mu .
Dán mun lean cealkán didjiide go ain lean din luhtte .
Muhto bealušteaddji , Bassi Vuoigŋa , gean Áhčči vuolggaha mu nammii , oahpaha didjiide buot ja muittuha didjiide buot maid mun lean cealkán didjiide .
Ráfi mun guođán didjiide , ráfán attán didjiide , in fal dan láhkái go máilbmi addá ráfi .
Alloset din váimmut suorganehko , allet ge váivašuva dorvvuhisvuođas .
Dii gulaidet mu cealkimin : Mun manan , muhto boađán fas din lusa .
Jos dii ráhkistivččiidet mu , de illudivččiidet go mun manan Áhččán lusa , dasgo son lea stuorit go mun .
Dál mun lean cealkán didjiide dán ovdal go dat dáhpáhuvvá , vai dii oskubehtet go dat dáhpáhuvvá .
Mun in sártno didjiide ollu šat dás duohko , dasgo dán máilmmi oaivámuš lea boahtimin .
Sus ii leat mihkkege válddiid mu badjel , muhto máilbmi ferte dál diehtit ahte mun ráhkistan Áhči ja dagan nugo son lea gohččon .
Čuožžilehket , vulgot eret dáppe .
Mun lean duohta viidnemuorra , ja mu Áhčči lea viidnegárdeolmmái .
Juohke oavssi mus mii ii šaddat šattuid , son váldá eret , ja juohke oavssi mii šaddada šattuid , son buhtista , vai dat šaddadivččii eanebut .
Dii lehpet juo buhttásat dan sáni dihtii maid mun lean sárdnon didjiide .
Bissot mu siste , de mun bisun din siste .
Nugo oaksi ge ii sáhte šaddadit šattuid iešalddes muđuid go bissu viidnemuoras , nu ehpet dii ge sáhte šaddadit šattuid muđuid go bissubehtet mu siste .
Mun lean viidnemuorra , dii lehpet oavssit .
Dat guhte bissu mu siste ja gean siste mun bisun , šaddada ollu šattuid , muhto mu haga ehpet sáhte dahkat maidege .
Dat guhte ii biso mu siste , bálkestuvvo olggos dego oaksi ja son goldná .
Dakkár oavssit čohkkejuvvojit ja bálkestuvvojit dollii , ja dat bullet .
Jos dii bissubehtet mu siste ja mu sánit bissot din siste , de átnot maid ihkinassii hálidehpet , ja dii oažžubehtet dan .
Go dii šaddadehpet ollu šattuid , de mu Áhčči hearvásmahttojuvvo , ja dalle lehpet mu máhttájeaddjit .
Nugo Áhčči lea ráhkistan mu , nu lean mun ge ráhkistan din .
Bissot mu ráhkisvuođas !
Jos doallabehtet mu báhkkomiid , de bissubehtet mu ráhkisvuođas , nugo mun ge lean doallan Áhččán báhkkomiid ja bisun su ráhkisvuođas .
Dán lean sárdnon didjiide , vai mu illu bisošii din siste , ja din illu šattašii ollisin .
Dát lea mu báhkkon : Ráhkistehket guhtet guimmiideattet nugo mun lean ráhkistan din .
Ii ovttasge leat stuorit ráhkisvuohta go das guhte addá heakkas ustibiiddis ovddas .
Dii lehpet mu ustibat jos dii dahkabehtet dan maid mun gohčun .
In mun šat gohčot din bálvaleaddjin , dasgo bálvaleaddji ii dieđe maid su isit dahká .
Muhto mun gohčodan din ustibin , dasgo mun lean almmuhan didjiide buot maid lean gullan Áhčistan .
Ehpet dii leat válljen mu , muhto mun lean válljen din ja lean vuolggahan din šaddadit šattuid , bistevaš šattuid .
Go nu dahkabehtet , de Áhčči addá didjiide buot maid átnubehtet mu nammii .
Dát lea mu báhkkon didjiide : Ráhkistehket guhtet guimmiideattet !
Jos máilbmi vašuha din , de muitet ahte dat vašuhii mu ovdal go din .
Jos dii gulašeiddet máilbmái , de máilbmi livččii ráhkistan din dego livččiidet dan iežas mánát .
Muhto dál dii ehpet gula máilbmái ; mun han lean válljen din máilmmis ja dahkan din iehčanan . Danne máilbmi vašuha din .
Muitet maid mun celken : Bálvaleaddji ii leat stuorit go isit .
Jos sii leat doarrádallan mu , de doarrádallet din ge .
Jos sii leat doahttalan mu sániid , de sii doahttalit din sániid ge .
Buot dáid sii dahket didjiide mu nama dihtii , dasgo eai dovdda su gii lea vuolggahan mu .
Jos mun in livčče boahtán in ge sárdnon sidjiide , de sii livčče suttu haga .
Muhto dál sis ii leat bealuštus suttuidasaset .
Dat guhte vašuha mu , vašuha maiddái Áhččán .
Jos mun in livčče dahkan dakkár daguid sin gaskkas maid ii oktage eará leat dahkan , de sii livčče suttu haga .
Muhto dál sii leat oaidnán daid ja vašuhit almmatge sihke mu ja mu Áhči .
Muhto dat sátni mii čuožžu sin iežaset lágas , galggai ollašuvvat : Sii vašuhedje mu siva haga .
Go bealušteaddji boahtá , son gean mun vuolggahan Áhči luhtte din lusa , duohtavuođa Vuoigŋa , guhte vuolgá Áhčis , dalle son duođašta mu birra .
Muhto dii ge lehpet mu duođašteaddjit , dasgo dii lehpet leamaš muinna álggu rájes .
Dán mun lean sárdnon didjiide amadet dii jorralit .
Sii ádjet din olggos synagogain . Áigi boahtá go juohkehaš gii goddá din , jáhkká ahte son dan bokte bálvala Ipmila .
Dan sii dahket danne go eai dovdda Áhči eai ge mu .
Mun lean cealkán didjiide dán , vai dii , dalle go dat áigi boahtá , muitibehtet ahte mun celken dan .
Mun in muitalan didjiide dán álggu rájes , dasgo dalle ledjen din luhtte .
Dál manan su lusa gii lea vuolggahan mu , muhto ii oktage dis jeara : « Gosa don manat ? »
Dasgo moraš lea deavdán din váimmuid dan dihtii maid mun lean cealkán didjiide .
Muhto mun cealkkán didjiide duohtavuođa : Lea didjiide ávkin ahte mun manan eret .
Dasgo jos mun in mana , de bealušteaddji ii boađe din lusa .
Muhto jos mun manan , de vuolggahan su din lusa .
Ja go son boahtá , de rahpá máilmmi čalmmiid ja čájeha mii lea suddu , vanhurskkisvuohta ja duopmu .
Suddu lea ahte sii eai oskko munnje .
Vanhurskkisvuohta lea ahte mun manan Áhči lusa , ehpet ge oainne šat mu .
Duopmu lea ahte dán máilmmi oaivámuš lea dubmejuvvon .
Ain lea mus ollu sárdnut didjiide , muhto dii ehpet sáhte guoddit dan dál .
Muhto go son , duohtavuođa Vuoigŋa , boahtá , de son oahpista din olles duohtavuhtii .
Dasgo son ii sártno iešalddes , muhto sárdnu dan maid gullá , ja almmuha didjiide boahttevaš dáhpáhusaid .
Son hearvásmahttá mu , dasgo son váldá mus dan maid almmuha didjiide .
Buot dat mii Áhči lea , lea maiddái mu .
Danne celken ahte son váldá mus dan maid son almmuha didjiide .
Bottoža geahčen dii ehpet oainne mu , ja bottoža geahčen fas oaidnibehtet mu .
Muhtumat su máhttájeddjiin dadje guhtet guoibmáseaset : « Maid son oaivvilda dainna ahte bottoža geahčen mii eat oainne su , ja bottoža geahčen fas oaidnit , ja ahte son manná Áhči lusa ?
Maid mearkkaša dát go cealká : bottoža geahčen ?
Mii eat ádde man birra son sárdnu . »
Jesus diđii ahte sii áigo jearrat sus , ja son celkkii : « Imaštallabehtet go dan maid mun celken : Bottoža geahčen dii ehpet oainne mu , ja bottoža geahčen fas oaidnibehtet mu ?
Duođaid , duođaid , mun cealkkán didjiide : Dii šaddabehtet čierrut ja váidalit , muhto máilbmi illuda .
Dii šaddabehtet moraštit , muhto din moraš šaddá illun .
Nisu guhte lea riegádahttimin , váivašuvvá go su áigi lea boahtán .
Muhto go mánná lea riegádan , de son ii muitte šat bákčasiiddis ilu dihtii go olmmoš lea riegádan máilbmái .
Dii ge lehpet dál morrašis , muhto mun oainnán din fas , ja din váimmut illudit , ii ge oktage sáhte váldit dis ilu eret .
Dan beaivvi dii ehpet jeara mus maidege .
Duodaid , duodaid , mun cealkkán didjiide : Maid ihkinassii dii átnubehtet Áhcis , dan son addá didjiide mu nammii .
Dássážii dii ehpet leat rohkadallan maidege mu nammii .
Átnot , de oažžubehtet , vai din illu šattašii ollisin .
Dán mun lean sárdnon didjiide veardádussan .
Boahtá áigi go in sártno didjiide veardádusaiguin , muhto sártnun vuigestaga Áhči birra .
Dan beaivvi dii átnubehtet mu nammii . Mun in cealkke ahte mun rohkadalan Áhččái din ovddas , dasgo Áhčči ieš ráhkista din , danne go dii lehpet ráhkistan mu ja oskon ahte mun boađán Ipmila luhtte .
Mun lean vuolgán Áhči luhtte ja boahtán máilbmái .
Mun guođán máilmmi fas ja manan Áhči lusa . »
Máhttájeaddjit dadje sutnje : « Dál don sártnut čielga sániiguin , it ge veardádusaid bokte .
Mii áddet dál ahte don dieđát buot , it ge dárbbaš vuordit ahte gii nu jearašii dus.
Danne mii oskut ahte don boađát Ipmila luhtte . »
Jesus vástidii : « Oskubehtet go dál ?
Áigi boahtá , ja lea juo dál , go dii bieđganehpet iešguhtet guvloseattet ja guođđibehtet mu okto .
Muhto in mun báze okto , dasgo Áhčči lea muinna .
Dán mun lean sárdnon didjiide vai dis livččii ráfi mu siste .
Máilmmis dis leat áŧestusat . Muhto lehket dorvvolaččat ! Mun lean vuoitán máilmmi ! »
Go Jesus lei cealkán dán , de bajidii čalmmiidis almmi guvlui ja celkkii : Áhčči , diibmu lea boahtán .
Hearvásin daga Bártnát , vai Bárdni hearvásin dagašii du
Dasgo don leat addán sutnje fámu buot olbmuid badjel , vai son attášii agálaš eallima buohkaide geaid don leat addán sutnje .
Ja dát lea agálaš eallin ahte sii dovdet du , áidna duohta Ipmila , ja su gean don leat vuolggahan , Jesus Kristusa .
Mun lean hearvásmahttán du eatnama alde go mun ollašuhtten dan dagu man don addet munnje .
Áhčči , hearvásmahte dál mu iežat luhtte dainna hearvásvuođain mii mus lei du luhtte ovdal go máilbmi šattai .
Mun lean almmustahttán du nama daidda olbmuide geaid don válljejit máilmmis ja addet munnje .
Sii gulle dutnje , ja don addet sin munnje , ja sii leat vurken du sáni .
Dál sii dihtet ahte buot maid don leat addán munnje , boahtá dus.
Dasgo mun lean addán sidjiide daid sániid maid don addet munnje , ja sii leat vuostáiváldán daid .
Dál sii leat duođaid ádden ahte mun lean boahtán du luhtte , ja sii leat oskon ahte don leat vuolggahan mu .
Mun rohkadalan sin ovddas .
In rohkadala máilmmi ovddas , muhto sin ovddas geaid don leat addán munnje , dasgo sii gullet dutnje .
Buot mii lea mu , lea du , ja dat mii lea du , lea mu , ja mun lean hearvásmahttojuvvon sin bokte .
Mun in leat šat máilmmis , muhto sii báhcet máilbmái go mun boađán du lusa .
Bassi Áhčči , várjal sin namainat man don leat addán munnje , vai sii livčče okta , nugo moai ge letne okta .
Go mun ledjen sin luhtte , de várjalin sin du namain man don leat addán munnje .
Mun gáhttejin sin , ii ge oktage sis mannan gáđohussii , earet go gáđohusa bárdni , vai čála ollašuvašii .
Dál mun boađán du lusa . Muhto dán cealkkán go ain lean máilmmis , vai mu illu deavddášii sin .
Mun lean addán du sáni sidjiide . Muhto máilbmi vašuhii sin , dasgo sii eai gula máilbmái , nugo mun ge in gula máilbmái .
Mun in rohkadala du váldit sin eret máilmmis , muhto várjalit sin bahás eret .
Eai sii gula máilbmái , nugo mun ge in gula máilbmái .
Basuhivččet sin duohtavuođas ; du sátni lea duohtavuohta .
Nugo don leat vuolggahan mu máilbmái , lean mun ge vuolggahan sin máilbmái . Ja mun basuhan iežan sin dihtii , vai sii ge basuhuvvošedje duohtavuođas .
Mun in rohkadala dušše sin ovddas , muhto maiddái daid ovddas geat sin sáni bokte oskot munnje , vai sii buohkat livčče okta .
Nugo don , Áhčči , leat mu siste ja mun du siste , nu divtte sin šaddat oktan munno siste , vai máilbmi oskkošii ahte don leat vuolggahan mu .
Mun lean addán sidjiide dan hearvásvuođa man don leat addán munnje , vai sii livčče okta nugo moai letne okta , mun sin siste ja don mu siste , vai sii livčče ollásit okta .
De máilbmi ádde ahte don leat vuolggahan mu ja leat ráhkistan sin nugo don leat ráhkistan mu ge .
Áhččán , mun dáhtun ahte sii , geaid don leat addán munnje , livčče mu luhtte doppe gos mun lean , vai sii oainnášedje mu hearvásvuođa , man don leat addán munnje , dasgo don leat ráhkistan mu ovdal go máilbmi vuođđuduvvui .
Vanhurskkis Áhčči , máilbmi ii leat dovdan du , muhto mun lean dovdan du , ja sii leat dovddiidan ahte don leat vuolggahan mu .
Mun lean almmuhan sidjiide du nama ja dagan dan fas , vai sis bisošii seammá ráhkisvuohta maid don leat čájehan munnje , ja mun ieš bisošin sin siste .
Go Jesus lei sárdnon dán , de son manai máhttájeddjiidisguin Kedronjogaža rastá gilvvagárdái mii lei das .
Judas guhte behtii su , diđii maid dan báikki , dasgo Jesus ja máhttájeaddjit ledje čoahkkanan dasa dávjá .
Judas válddii mielddis soalddáhiid ja muhtumiid bajitbáhpaid ja farisealaččaid olbmáin , ja sii bohte dohko spáidariiguin , lámppáiguin ja vearjjuiguin .
Jesus diđii buot dan mii galggai dáhpáhuvvat sutnje . Son manai sin lusa ja jearai : « Gean dii ohcabehtet ? »
Sii vástidedje : « Nasaretlačča Jesusa . »
Jesus cealká : « Mun dat lean . »
Judas guhte behtii su , lei maiddái das singuin .
Go Jesus celkkii : « Mun dat lean » , de sii murdiledje ja gahčče eatnamii .
Son jearai fas : « Gean dii ohcabehtet ? »
Sii dadje : « Nasaretlačča Jesusa . » Jesus celkkii : « Mun han celken didjiide ahte mun dat lean .
Jos mu lehpet ohcamin , de diktet dáid earáid mannat ! »
Dán son vástidii , vai dat sátni ollašuvašii maid son lei cealkán : « Mun in leat massán ovttage sis geaid don leat oskkildan munnje . »
Simmon Biehtár geas lei miehkki , rohttii dál dan , čuolastii bajimušbáhpa bálvaleaddji ja čuohpastii sus olgeš bealji . Bálvaleaddji namma lei Malkus .
Muhto Jesus celkkii Biehtárii : « Nahket miehki dohppii ! In go mun jugaše dan geara man Áhčči lea addán munnje ? »
Soalddáhat oktan kommandánttaineaset ja juvddálaččaid tempelfávttat dohppejedje dál Jesusa , čatne su ja dolvo su vuos Hannasa lusa . Son lei Kaifasa , dan jagi bajimušbáhpa , vuohppa .
Aiddo Kaifas lei hálahan juvddálaččaid ahte livččii buoremus jos okta olmmoš jámášii álbmoga ovddas .
Simmon Biehtár ja muhtun eará máhttájeaddji čuovuiga Jesusa .
Dát nubbi máhttájeaddji dovddai bajimušbáhpa , ja son bođii Jesusiin bajimušbáhpa gárdima šilljui , muhto Biehtár bázii olggobeallái poartta gurrii .
Máhttájeaddji gii dovddai bajimušbáhpa , manai olggos hálahit biiggá gii lei geahččamin poartta , vai luoittášii Biehtára sisa .
Biigá jearai Biehtáris : « It go don ge leat okta dán olbmá máhttájeddjiin ? »
Son vástidii : « In leat . »
Lei čoaskkis , ja bálvaleaddjit ja fávttat ledje cahkkehan hilladola ja liekkadalle dollagáttis . Biehtár maiddái čuoččui sin gaskkas liekkadallamin .
Bajimušbáhppa jearahalai dál Jesusa su máhttájeddjiid ja su oahpu birra .
Jesus vástidii : « Mun lean sárdnon albmosit ja buohkaid gullut .
Álo lean oahpahan synagogain ja tempelis gosa buot juvddálaččat čoagganit ; čihkosis in leat sárdnidan maidege .
Manne jearahat mu ?
Jearat baicca sin geat leat gullan mu , maid mun lean sárdnon sidjiide .
Sii dihtet maid mun lean cealkán . »
Muhtun dain fávttain geat ledje čuožžumin das , doškii su muhtui ja dajai : « Nie ba don vástidat bajimušbáhppii ? »
Jesus celkkii sutnje : « Jos mun leaččan cealkán maidege boastut , de duođaš dan !
Muhto jos dat lei riekta maid celken , manne dalle doškejit mu ? »
Hannas vuolggahii čadnon Jesusa bajimušbáhpa Kaifasa lusa .
Simmon Biehtár lei dalle čuožžumin liekkadallamin .
Olbmot jerre sus : « It go don ge leat okta su máhttájeddjiin ? »
Muhto son biehttalii ja dajai : « In leat . »
Muhtun bajimušbáhpa bálvaleddjiin , dan fuolki geas Biehtár lei čuohpastan bealji , dadjá : « In go mun oaidnán du gilvvagárddis suinna ? »
Muhto Biehtár fas biehttalii .
Ja seammás biškkádii vuoncávaris .
Sii dolvo Jesusa Kaifasa luhtte eananhearrá ladnái .
Lei árrat iđit .
Ieža sii eai mannan ladnái amaset šaddat buhtismeahttumin , nu ahte eai livčče sáhttán borrat beassášmállásiid .
Pilatus manai olggos sin lusa ja jearai : « Mas dii guoddalehpet dán olbmá ? »
Sii vástidedje : « Jos dát olmmái ii livčče vearredahkki , de eat attáše su du háldui . »
Pilatus dajai sidjiide : « Váldet ieža su ja dubmejehket su lágadet mielde ! »
Muhto juvddálaččat vástidedje : « Mis ii leat vuoigatvuohta dubmet geange jápmimii . »
Dát dáhpáhuvai vai dat sátni ollašuvašii maid Jesus lei cealkán dovddahan dihtii makkár jápmima son galggai gillát .
Pilatus manai fas ladnái , gohčui Jesusa iežas ovdii ja jearai sus : « Leat go don juvddálaččaid gonagas ? »
Jesus vástidii : « Dajat go dán iešalddát , vai leat go earát dadjan dan dutnje ? »
Pilatus dajai : « Lean go mun gal juvddálaš ?
Du iežat álbmot ja bajitbáhpat leat addán du mu háldui .
Maid don leat dahkan ? »
Jesus vástidii : « Mu riika ii leat dán máilmmis .
Jos mu riika livččii lean dán máilmmis , de mu olbmát livčče soahtan mu ovddas , aman addojuvvot juvddálaččaide .
Muhto mu riika ii leat dáppe . »
Pilatus jearai : « De don dattege leat gonagas ? »
Jesus vástidii : « Don dajat dan ieš ahte mun lean gonagas .
Mun lean riegádan ja boahtán máilbmái duođaštan dihtii duohtavuođa birra .
Juohkehaš guhte lea duohtavuođas , gullá mu jiena . »
Pilatus jearai : « Mii lea duohtavuohta ? »
Dasto son manai fas olggos juvddálaččaid lusa ja celkkii sidjiide : « Mun in gávnna maidege áššiid dán olbmás .
Lea vierru ahte mun luoittán didjiide luovus muhtuma beassážiidda .
Dáhttubehtet go ahte mun dalle luoittán juvddálaččaid gonagasa ? »
De sii čurvo fas : « Ale fal su luoitte , muhto Barabbasa ! »
Barabbas lei rievvár .
Pilatus dohppii dál Jesusa , ja divttii su spihččehit .
Soalddáhat bárgidedje kruvnnu bastilislánjáin ja bidje su oaivái . De sii bidje purpurbiktasa su birra ,
bohte su ovdii ja dadje : « Dearvva dutnje , juvddálaččaid gonagas ! » Ja sii čorbme su .
Pilatus manai fas olggos ja dajai juvddálaččaide : « Mun buvttán su dál din lusa , vai dii áddešeiddet ahte mun in gávnna sus maidege sivaid . »
De Jesus bođii olggos , ja sus lei badjelis bastilislátnjákruvdnu ja purpurbivttas . Pilatus dajai sidjiide : « Gehččet , dát olmmošrávki ! »
Muhto go bajitbáhpat ja sin olbmát oidne su , de sii čurvo : « Russiinávle ! Russiinávle ! »
Pilatus dajai : « Russiinávlejehket dii su !
Dasgo mun in gávnna sus maidege sivaid . »
Juvddálaččat vástidedje : « Mis lea láhka , ja lága mielde son lea áššálaš jápmit , danne go son lea dahkan iežas Ipmila Bárdnin . »
Go Pilatus gulai dán , de ballái vel eanebut .
Ja son manai ladnái fas ja jearai Jesusis : « Gos don leat eret ? »
Muhto Jesus ii vástidan sutnje maidege .
Pilatus dajai : « It go vástit munnje ?
It go dieđe ahte mus lea fápmu luoitit du luovus ja fápmu russiinávlet du ? »
Jesus vástidii : « Dus ii livčče mihkkege fámuid mu badjel jos dat ii livčče addojuvvon dutnje badjin .
Danne lea stuorit suddu dan olbmos guhte lea addán mu du háldui . »
Dás maŋŋil Pilatus geahččalii luoitit su .
Muhto juvddálaččat čurvo : « Jos don luoittát dán olbmá luovus , de it leat keaisára ustit .
Dat guhte dahká iežas gonagassan , lea vuostálastimin keaisára . »
Go Pilatus gulai dán , de doalvvui Jesusa olggos ja čohkánii duopmárstullui , mii lei dan báikkis mii gohčoduvvo Ráktošilljun , hebreagillii Gabbata .
Dát dáhpáhuvai beassážiid ráhkkananbeaivvi , guđat diimmu birrasiid .
Pilatus dadjá juvddálaččaide : « Gehččet , dá čuožžu din gonagas ! »
Muhto sii čurvo : « Doalvvo su eret !
Russiinávle su ! »
Pilatus jearai : « Dáhttubehtet go mu russiinávlet din gonagasa ? »
Bajitbáhpat dadje : « Ii mis leat eará gonagas go keaisár . »
Dalle son attii Jesusa sin gieđaide , vai son russiinávlejuvvošii . Sii dolvo Jesusa eret .
Son guttii ieš ruossas ja manai dan báikái mii gohčoduvvo Oaivegállobáikin , hebreagillii Golgata .
Doppe sii russiinávlejedje su , ja suinna oktanaga guokte eará , ovtta goappá ge beallái ja Jesusa sudno gaskii .
Pilatus lei čállán bajilčállaga ja bidjan russii . Das čuoččui : « Nasaretlaš Jesus , juvddálaččaid gonagas » .
Ollu juvddálaččat lohke dán bajilčállaga , dasgo báiki gosa Jesus russiinávlejuvvui , lei lahka gávpoga , ja bajilčála lei hebrea- , latiinna- ja greikkagillii .
Juvddálaččaid bajitbáhpat dadje Pilatusii : « Ale čále : Juvddálaččaid gonagas , muhto ahte son celkkii : Mun lean juvddálaččaid gonagas . »
Pilatus vástidii : « Dan maid čállen , dan čállen . »
Go soalddáhat ledje russiinávlen Jesusa , de válde su biktasiid ja juogadedje daid gaskaneaset , ja juohkehaš dan njealji soalddáhis oaččui ovtta oasi .
Sii válde gávtti ge mii lei sávnnjiid haga , oktan bihttán gođđojuvvon bajimus ravddas vuolimus ravdii .
Danne celke guhtet guimmiidasaset : « Allot gaikkot dan , muhto vuorbádeadnot gii oažžu dan . » Nu dát čálasátni ollašuvai : Sii juogadedje mu biktasiid gaskaneaset ja vuorbádalle mu gávtti alde .
Soalddáhat dahke dan .
Jesusa ruossa luhtte čužžo eadnis , eatnis oabbá , Márjá , Klopasa áhkká , ja Márjá Magdalena .
Go Jesus oinnii eatnis ja su bálddas dan máhttájeaddji gean son ráhkistii , de celkkii eadnásis : « Nisu , son lea du bárdni . »
Dasto celkkii máhttájeaddjái : « Son lea du eadni . »
Dan rájes máhttájeaddji válddii su ruktosis .
Jesus diđii ahte buot lei dál ollašuvvan , ja vai čála šattašii duohtan , son celkkii : « Mus lea goiku . »
Das lei ettetviidnelihtti ja sii buonjostedje guobbarasa viinnis , bidje dan issotgeahčái ja dolle su njálmmi ovdii .
Go Jesus lei ožžon ettetviinni , de celkkii : « Dat lea ollašuvvan ! »
De sojaldahtii oaivvis ja attii vuoiŋŋas .
Lei ráhkkananbeaivi , eai ge jábmit sáhttán báhcit ruossaide heaŋgát sábbáha badjel , dasgo dát sábbát lei stuora bassi . Juvddálaččat bivde dan dihtii ahte jábmiid juolgedávttit cuvkojuvvošedje , ja ahte liikkat váldojuvvošedje vuolás .
Soalddáhat bohte ja cuvko juolgedávttiid dan guoktás geat leigga russiinávlejuvvon Jesusiin , vuos nuppis ja de nuppis .
Go sii bohte Jesusa lusa , de oidne ahte son lei juo jápmán , eai ge sii cuvken su juolgedávttiid . Muhto muhtun soalddát čuggii sáittiin su erttegii , ja dallánaga golggihii varra ja čáhci .
Ja son guhte oinnii dan , lea duođaštan dan , ja su duođaštus lea duohta .
Son diehtá ahte son sárdnu duođa , vai dii ge oskkošeiddet .
Dát dáhpáhuvai vai dat čálasátni ollašuvašii : Ii oktage su dávttiin cuvkejuvvo .
Ja eará čálasátni cealká : Sii gehččet sutnje gean čađa leat čuggen .
Das maŋŋil Jovsset , gii lei Arimateas eret , jearai Pilatusis lobi váldit Jesusa rupmaša ruossas eret . Jovsset lei Jesusa máhttájeaddji , muhto čihkosis , danne go son balai juvddálaččain .
Pilatus suovai dan , ja son bođii ja válddii rupmaša ruossas eret .
Nikodemus lei maiddái das , son gii lei boahtán Jesusa lusa ihkku .
Sus lei mielde myrra ja aloe seaguhus , birrasiid čuođi butti .
Soai válddiiga Jesusa rupmaša ja giesaiga dan liinniid sisa njálggahájat vuoidasiin juvddálaččaid hávdádanvieru mielde .
Dan báikki lahka gosa Jesus lei russiinávlejuvvon , lei gilvvagárdi , ja das lei ođđa hávdi masa ii oktage lean vel biddjojuvvon .
Dohko soai bijaiga Jesusa , danne go lei juvddálaččaid ráhkkananbeaivi , ja hávdi lei nu lahka .
Árrat iđedis vahku vuosttaš beaivvi , go ain lei seavdnjat , bođii Márjá Magdalena hávddi lusa ja oinnii ahte geađgi lei váldojuvvon eret hávddi ovddas .
Son viehkalii ja bođii Simmon Biehtára ja nuppi máhttájeaddji lusa , gean Jesus ráhkistii , ja muitalii sudnuide : « Sii leat váldán Hearrá eret hávddis , eat ge dieđe gosa leat bidjan su . »
Biehtár ja nubbi máhttájeaddji vulggiiga hávddi lusa .
Soai viegaiga ovttas , muhto nubbi máhttájeaddji viegai johtileabbot go Biehtár ja bođii vuosttažin hávddi lusa .
Son njahkalii sisa ja oinnii giessanliinniid das , muhto ii mannan hávddi sisa .
Simmon Biehtár bođii dál maŋis , ja manai hávddi sisa .
Son fuobmái giessanliinniid das , ja dan liinni mii lei leamaš Jesusa oaivvi badjel .
Dat ii lean giessanliinniid luhtte , muhto gissojuvvon sierra sadjái .
De nubbi máhttájeaddji ge manai sisa , son gii lei joavdan hávddi lusa vuosttažin .
Son oinnii ja oskkui .
Dássážii sii eai lean ádden dan maid čála cealká , ahte son galggai bajásčuožžilit jábmiid luhtte .
Máhttájeaddjiguovttos manaiga ruoktot .
Muhto Márjá čuoččui hávddi olggobealde ja čierui .
Čieru njahkalii ovddos ja guovllai hávddi sisa ja oinnii guokte eŋgela , vilges biktasat badjelis , čohkkámin dakko gokko Jesusa rumaš lei leamaš , nubbi oaivvegeahčen ja nubbi julggiidgeahčen .
Soai jearaiga sus : « Nisu , manne don čierut ? »
Son vástidii : « Sii leat váldán mu Hearrá eret , in ge mun dieđe gosa sii ležžet bidjan su . »
Dan seammás jorggihii ja oinnii Jesusa čuožžumin das , muhto ii árvidan ahte son dat lei .
Jesus jearrá : « Nisu , manne don čierut ?
Gean don leat ohcamin ? »
Márjá gáttii ahte son lei gilvvagárdeolmmái ja dadjá sutnje : « Hearrá , jos don leaččat váldán su eret , de muital munnje gosa leat bidjan su , vai beasan váldit su fárrui . »
Jesus celkkii : « Márjá . »
Dalle Márjá jorggihii ja dajai sutnje hebreagillii : « Rabbuni ! »
– dat mearkkaša oahpaheaddji .
Jesus cealká sutnje : « Ale guoskkat mu , dasgo mun in leat velá mannan bajás Áhči lusa .
Muhto mana mu vieljaid lusa ja muital sidjiide ahte mun manan bajás su lusa gii lea mu Áhčči ja din Áhčči , mu Ipmil ja din Ipmil . »
Márjá Magdalena vulggii ja muitalii máhttájeddjiide : « Mun lean oaidnán Hearrá ! » Ja son muitalii sidjiide maid Jesus lei cealkán sutnje .
Lei eahket seammá beaivvi , vahku vuosttaš beaivvi , ja máhttájeaddjit ledje čoahkkanan juvddálaččaid balus gitta uvssaid duohkái .
De Jesus bođii ; son čuoččui sin gaskkas ja celkkii : « Ráfi lehkos dinguin . »
Ja go son lei cealkán dan , de čájehii sidjiide gieđaidis ja erttegis .
Máhttájeaddjit illosedje go oidne Hearrá .
Ohpit son celkkii sidjiide : « Ráfi lehkos dinguin .
Nugo Áhčči lea vuolggahan mu , nu mun ge vuolggahan din . »
Go son lei cealkán dan , de vuoiŋŋai sin ala ja celkkii : « Vuostáiváldet Bassi Vuoiŋŋa .
Geaidda dii addibehtet sin suttuid ándagassii , de sidjiide leat dat ándagassii addojuvvon . Geaidda dii čatnabehtet sin suttuid , de dat leat čadnojuvvon . »
Duomás , okta dan guoktenuppelohkásis , son gii gohčoduvvui Jumežin , ii lean singuin go Jesus bođii .
Sii muitaledje sutnje : « Mii leat oaidnán Hearrá . » Muhto son dajai : « Jos in ieš oainne návleráiggiid su gieđain in ge beasa bidjat suorpma daidda ja guoskkahit su erttega gieđain , de in oskko . »
Gávcci beaivvi maŋŋil máhttájeaddjit ledje fas čoahkkanan , ja Duomás lei singuin .
Uvssat ledje giddejuvvon , muhto Jesus bođii ja čuoččui fáhkkestaga sin gaskkas ja celkkii : « Ráfi lehkos dinguin . »
De son cealká Duopmásii : « Geige suorpmat , ja geahča mu gieđaid , ja geige gieđat ja iskka mu erttega .
Ale leage eahpeoskkolaš , muhto oskkolaš ! »
Duomás dajai : « Hearrán ja Ipmilan ! »
Jesus cealká sutnje : « Don oskkut danne go leat oaidnán mu .
Ávdugasat sii geat eai oainne ja dattege oskot . »
Jesus dagai maiddái ollu eará mearkkaid máhttájeddjiid oaidnut , maid birra ii leat čállojuvvon dán girjái .
Muhto dát leat čállojuvvon , vai dii oskubehtet ahte Jesus lea Messias , Ipmila Bárdni , ja vai dis oskku bokte lea eallin su namas .
Dás maŋŋil Jesus almmustahtii iežas fas máhttájeddjiidasas Tiberiasjávregáttis .
Dat geavai ná : Simmon Biehtár , Duomás , gii gohčoduvvui Jumežin , Natanael gii lei Kanas Galileas eret , Sebedeusa bártniguovttos ja guovttis vel su máhttájeddjiin ledje doppe čoahkis .
Simmon Biehtár dajai earáide : « Mun vuolggán guliid bivdit . »
Sii dadje : « Mii maid vuolgit mielde . »
Sii vulge ja manne fatnasii , muhto dan ija eai goddán maidege .
Go šattai iđit , de Jesus čuoččui jávregáttis , muhto máhttájeaddjit eai diehtán ahte Jesus dat lei .
Jesus jearai sis : « Mánážiiddán , leat go dis guolit ? »
Sii vástidedje : « Eai leat . » Jesus celkkii sidjiide : « Suhppejehket fierpmi fatnasa olgešbealde , de fidnebehtet guoli . »
Sii suhppejedje fierpmi , ja dál sii eai veadján dan oppa geassit ge , nu ollu ledje fidnen guliid .
De dat máhttájeaddji gean Jesus ráhkistii , dajai Biehtárii : « Dat lea Hearrá . »
Go Simmon Biehtár gulai ahte Hearrá dat lei , de son čanai biktasis iežas birra , dan man son lei nuollan eret , ja njuikii jávrái .
Eará máhttájeaddjit čuvvo fatnasiin ja gesse guollefierpmi maŋisteaset .
Eai sii lean guhkkin gáttis , dušše sullii guokte čuođi állana .
Go sii ledje boahtán gáddái , de oidne ahte hilladolas ledje bassojuvvomin guolit ja láibbit .
Jesus celkkii sidjiide : « Buktet deike veahá dain guliin maid gottiidet . »
Simmon Biehtár manai fatnasii ja gesii fierpmi gáddái .
Dat lei dievva stuora guliin , čuođivihttalogigolbma oktiibuot .
Muhto vaikko ledje ge nu ollu , de fierbmi ii gaikánan .
Jesus celkkii sidjiide : « Bohtet boradit . »
Ii oktage máhttájeddjiin arvan jearrat sus : « Gii don leat ? » dasgo sii dihte ahte dat lei Hearrá .
Jesus loaiddastii , válddii láibbi ja attii sidjiide , ja guoli maiddái .
Dát lei goalmmát geardi go Jesus almmustahtii iežas máhttájeddjiidasas maŋŋil go lei bajásčuoččáldahttojuvvon jábmiid luhtte .
Go sii ledje geargan boradeames , de Jesus cealká Simmon Biehtárii : « Simmon , Johanasa bárdni , ráhkistat go mu eanebut go dát earát ? »
Son vástidii : « De ráhkistan . Hearrá , don dieđát ahte mun anán du ráhkisin . »
Jesus cealká sutnje : « Biepma mu lábbáid ! »
Nuppádassii Jesus jearrá sus : « Simmon , Johanasa bárdni , ráhkistat go mu ? »
Biehtár vástidii : « De ráhkistan . Hearrá , don dieđát ahte mun anán du ráhkisin . »
Jesus cealká : « Geahča mu sávzzaid ! »
De Jesus cealká goalmmádassii : « Simmon , Johanasa bárdni , anát go mu ráhkisin ? »
Biehtár šlunddui go Jesus goalmmádassii jearrá sus ahte ráhkista go son su , ja son dajai : « Hearrá , don dieđát buot ; don dieđát ahte mun anán du ráhkisin . »
Jesus cealká sutnje : « Biepma mu sávzzaid !
Duođaid , duođaid , mun cealkkán dutnje : Go don ledjet nuorra , de čanastit boahkánat birra ja mannet gosa dáhttot .
Muhto go don boarásmuvat , de geiget gieđaidat , ja muhtun eará čatná du boahkána ja doalvu du gosa it dáhto . »
Dán son celkkii almmuhan dihtii makkár jápmimiin Biehtár galggai gudnejahttit Ipmila .
Dasto son celkkii Biehtárii : « Čuovo mu ! »
Biehtár jorggihii ja oinnii ahte dat máhttájeaddji gean Jesus ráhkistii , bođii maŋis .
Son lei dat gii eahkedismállásiid boradettiin lei mieiggastan Jesusa ratti vuostái ja jearran : « Hearrá , gii beahttá du ? »
Go dál Biehtár oinnii su , de jearai Jesusis : « Hearrá , mo sutnje gis geavvá ? »
Jesus vástidii : « Jos mun dáhtošin ahte son eallá dassážii go mun boađán , mii das guoská dutnje ?
Čuovo don mu ! »
Dát sátni bođii maŋŋil oskuguimmiid gaskii : « Dát máhttájeaddji ii jáme . »
Muhto ii Jesus lean cealkán ahte son ii jáme , muhto son celkkii : « Jos mun dáhtošin ahte son eallá dassážii go mun boađán , mii das guoská dutnje ? »
Son lea dat máhttájeaddji gii duođašta dáid dáhpáhusaid ja gii lea čállán dán , ja mii diehtit ahte su duođaštus lea luohtehahtti .
Muhto Jesus dagai ollu eará daguid ge . Jos dat čállojuvvošedje čuoggás čuoggái , de in jáhke ahte oppa máilbmi geasášii buot daid girjjiid mat dalle fertešedje čállojuvvot .
Buorre Teofilos , vuosttaš girjjistan mun čállen buot dan birra maid Jesus dagai ja oahpahii álggu rájes gitta dan beaivvi rádjái go son váldojuvvui bajás albmái , maŋŋil go son lei addán gohččumiiddis Bassi Vuoiŋŋa bokte apoastaliidda geaid son lei válljen .
Son čájehii iežas sidjiide gillámušas ja jápmimis maŋŋil ja attii sidjiide máŋga čielga duođaštusa das ahte lei eallimin ; njealljelot beaivvi sii oidne su , ja son sártnui Ipmila riikka birra .
Go son lei boradeamen singuin , de gohčui sin : « Allet vuolgge Jerusalemis , muhto vurdet dan maid Áhčči lea lohpidan ja man birra mun lean sárdnon .
Dasgo Johanas gásttašii čáziin , muhto dii gásttašuvvobehtet Bassi Vuoiŋŋain moatti beaivvi geažes . »
Go sii ledje čoahkis , de jerre sus : « Hearrá , lea go dál dat áigi boahtán go don ráhkadat Israela riikka ođđasis ? »
Son vástidii : « Ii dat gula didjiide diehtit daid áiggiid ja bottuid maid Áhčči lea mearridan fámustis .
Muhto dii oažžubehtet fámu go Bassi Vuoigŋa boahtá din badjelii , ja dii lehpet mu duođašteaddjit Jerusalemis , oppa Judeas , Samarias ja gitta eatnama ravddaide . »
Go son lei cealkán dán , de váldojuvvui bajás sin oaidnut , ja balva doalvvui su eret sin čalmmiid ovddas .
Go sii ledje geahččamin almmi guvlui ja oidne su mannamin , de fáhkka čužžo guokte olbmá vilges biktasiiguin sin luhtte ja celke : « Galilealaččat , manne dii čuožžubehtet dás geahččamin bajás almmi guvlui ?
Dát Jesus gii váldojuvvui albmái eret din luhtte , boahtá fas seammá láhkái go dii oinniidet su mannamin bajás albmái . »
De sii máhcce Jerusalemii dan váris man namma lea Oljovárri ja mii lea sábbátmátkki Jerusalemis eret .
Ja go sii bohte gávpogii , de manne bajás dan latnjii gos lávejedje orrut . Sii ledje Biehtár ja Johanas , Jáhkot ja Ándaras , Filip ja Duomás , Bartolomeus ja Matteus , Jáhkot , Alfeusa bárdni , selota Simmon ja Judas , Jáhkoba bárdni .
Buohkat bisso ovttamielalaččat rohkadallamis oktan nissoniiguin ja Márjjáin , Jesusa etniin , ja su vieljaiguin .
Dán áiggi Biehtár čuožžilii ja sárdnugođii oskuguimmiid gaskkas geat ledje čoahkis ; sullii čuođiguoktelogi olbmo : « Oskuguoimmit , dat čállaga sánit fertejedje ollašuvvat , maid Bassi Vuoigŋa sártnui Dávveda bokte Judasa birra , guhte oahpistii sin geat válde Jesusa gitta .
Son lohkkojuvvui min searvái ja lei ožžon seammá bálvalusa go mii .
Son osttii alccesis bealddu dainna bálkkáin man son oaččui vearredagus ovddas , muhto son gahčai oaivválassii ja luoddanii nu ahte buot su siskilušat golge olggos .
Dat šattai dihtosii buot Jerusalema ássiide , ja iežaset gillii sii gohčodit bealddu Hakeldaman , mii mearkkaša Varrabealdu .
Dasgo lea čállojuvvon Sálmmaid girjái : Šaddos su dállu ávdimin , allos oktage das ásso , ja : Ožžos muhtun eará su doaimma .
Danne okta dain olbmáin geat leat leamaš minguin miehtá dan áiggi go Hearrá Jesus vádjolii min gaskkas , dan rájes go Johanas gásttašii su gitta dan beaivvi rádjái go son váldojuvvui eret min luhtte , okta dáin olbmáin ferte duođaštit minguin ovttas ahte son lea bajásčuožžilan . »
Dalle sii divvo guokte olbmá ovdan , Jovsset Barsabbasa gean maiddái gohčodedje Justusin , ja Mattiasa .
Ja sii rohkadalle : « Hearrá , don guhte dovddat buohkaid váimmuid , čájet midjiide goappá dán guoktásis don leat válljen dan bálvalussii ja apoasttaldoibmii man Judas guđii go manai dan sadjái gosa gulai . »
Sii vuorbádedje dan guoktása gaskkas , ja vuorbi gahčai Mattiasa ala . Dás duohko son lasihuvvui dan oktanuppelot apoastala searvái .
Go hellodatbeaivi bođii , de sii ledje buohkat čoahkis .
Fáhkkestaga gullui almmis šuvva dego garra riđđu , ja dat devddii oppa viesu gos sii ledje čohkkámin .
Sii oidne njuokčamiid dego dollanjivžžanasaid mat juohkásedje ja luoitádedje juohkehačča ala .
De buohkat devdojuvvojedje Bassi Vuoiŋŋain , ja sii sárdnugohte eará gielaid dađe mielde go Vuoigŋa attii sidjiide sárdnut .
Jerusalemis ásse dál ipmilbalolaš juvddálaččat geat ledje boahtán dohko buot álbmogiin almmi vuolde .
Go dát jietna gullui , de olmmošjoavku čoahkkanii ja moivašuvai ; dasgo juohkehaš gulai sárdnojuvvomin iežas gillii .
Sii ovddošedje ja jerre : « Eai bat duot leat buohkat galilealaččat , geat leat sárdnumin ?
Mo de sáhttit mii gullat juohkehaš iežamet eatnigiela ?
Mii leat partalaččat ja medialaččat ja elamlaččat , olbmot Mesopotamias , Judeas ja Kappadokias , Pontosis ja Asia eanangottis , Frygias ja Pamfylias , Egyptas ja Libya guovlluin Kyrene lahka , mii leat fárren deike Romas , sihke juvddálaččat ja sii geat leat jorgalan juvddálaš oskui , mii leat kretalaččat ja arabialaččat – ja mii gullat sin sárdnumin Ipmila stuora daguid birra min iežamet gillii . »
Buohkat hirpmástuvve ja šadde eahpádussii ja jerre guhtet guimmiineaset : « Mii son dát lea ? »
Muhto muhtumat bilkidedje ja dadje : « Sii leat juhkan njálgga viinni ja leat gárihuvvan . »
De Biehtár loaiddastii ovdan dainna oktanuppelohkásiin ja sárdnugođii alla jienain : Juvddálaš olbmát ja buot Jerusalema ássit !
Diktet mu almmuhit didjiide dan mii dás dáhpáhuvvá .
Guldalehket mu sániid !
Eai dát olbmát leat gárihuvvan nugo dii gáddibehtet .
Muhto dás dáhpáhuvvá dat man birra profehta Joel sárdnidii : Ipmil cealká : Maŋimuš beivviid dáhpáhuvvá ahte mun golggahan Vuoigŋan buot olbmuid badjelii .
Din bártnit ja nieiddat profehtastallet , din nuorra olbmát oidnet oainnáhusaid , ja din vuorrasat niegadit nieguid .
Velá bálvaleddjiidan ja bálvaleaddjinissoniiddán badjelii ge golggahan Vuoigŋan daid beivviid , ja sii profehtastallet .
Mun čájehan váigasiid badjin almmis ja mearkkaid vuollin eatnama alde : vara , dola ja soici suovaid .
Beaivváš sevnnjoda ja mánnu šaddá varran , ovdal go Hearrá beaivi boahtá , stuora ja hearvás beaivi .
Ja juohkehaš gii čuorvu Hearrá nama bestojuvvo .
Israellaččat , gullet dáid sániid : Nasaretlaš Jesus lei olmmái gean Ipmil válljii didjiide ja duođaštii dan fámolaš daguiguin , oavdduiguin ja mearkkaiguin , maid Ipmil dagai din gaskkas Jesusa bokte nugo dii ieža diehtibehtet . Dát Jesus addojuvvui din háldui Ipmila áigumuša mielde ja nugo son diđii ovddalgihtii , ja dii divttiidet olbmáid geat eai dovdda Ipmila lága , russiinávlet ja goddit su .
Muhto Ipmil bajásčuoččáldahtii su ja čovddii su jápmima bákčasiin , dasgo ii han jápmin sáhttán doallat su gitta .
Dasgo Dávvet cealká su birra : Mun anán álelassii Hearrá čalmmiidan ovddas , dasgo son lea mu olgeš gieđa bealde , aman jorralit .
Danne mu váibmu illuda , ja mu njuovčča ávvuda , ja velá mu jámolaš rumaš ge vuoiŋŋasta doaivvus .
Dasgo don it guođe mu sielu jábmiid riikii it ge divtte bassi bálvaleaddját muosáhit guohcageami .
Don leat oahpahan mu dovdat eallima geainnu , ja don deavddát mu iluin muođuidat ovddas .
Vieljat , diktet mu sárdnut roahkkadit didjiide min máddara Dávveda birra . Son jámii ja hávdáduvvui , ja su hávdi lea min luhtte velá otná beaivvi ge .
Muhto son lei profehta ja diđii ahte Ipmil lei vurdnon bidjat Dávveda truvdnui muhtuma su maŋisbohttiin .
Danne son einnostii Messiasa bajásčuožžileami go sártnui : Son ii báze jábmiid riikii , ii ge su rumaš muosát guohcageami .
Dán Jesusa Ipmil bajásčuoččáldahtii , ja mii leat buohkat dan duođašteaddjit .
Son bajiduvvui Ipmila olgeš gieđa beallái ja vuostáiválddii Bassi Vuoiŋŋa nugo Áhčči lei lohpidan ja golggahii dan .
Dán dii dál oaidnibehtet ja gullabehtet .
Dasgo Dávvet ii mannan bajás albmái , muhto son cealká : Hearrá celkkii mu hearrái : Čohkán mu olgeš gieđa beallái dassážii go bijan du vašálaččaid du julggiid vuložin .
Dan dihtii , dihtos oppa Israela álbmot dán vissásit : Dán Jesusa gean dii russiinávliidet , lea Ipmil dahkan sihke Hearrán ja Messiasin .
Go sii gulle dán , de dat čuggii sin váibmui , ja sii jerre Biehtáris ja eará apoastaliin : « Vieljat , maid mii galgat dahkat ? »
Biehtár vástidii sidjiide : « Jorgalehket , ja diktet buohkat iežadet gásttašuvvot Jesus Kristusa nammii , juohkehaš dis , vai oažžubehtet suttuid ándagassii addojumi ja Bassi Vuoiŋŋa attáldahkan .
Dasgo lohpádus gullá didjiide ja din mánáide ja buohkaide geat leat guhkkin eret , nu olusiidda go Hearrá Ipmileamet rávká . »
Ollu eará sániiguin ge son duođaštii sidjiide , ja rávvii sin : « Diktet iežadet bestojuvvot dán gážžáris sohkagottis . »
Sii geat vuostáiválde su sáni , gásttašuvvojedje , ja dan beaivvi lasihuvvojedje oskkolaččaid jovkui sullii golbma duhát olbmo .
Sii bisso oskkáldasat apoastaliid oahpahusas ja searvevuođas , láibedoadjaleamis ja rohkadusas .
Šattai ballu olbmuid gaskii , dasgo apoastalat dahke ollu oavdudaguid ja mearkkaid .
Buot oskkolaččat bisso čoahkis ja sii atne buot oktasaččat .
Sii vuvde dáluideaset ja dávviriiddiset ja juogadedje ruđaid buohkaide juohkehačča dárbbu mielde .
Juohke beaivvi sin joavku čoahkkanii tempelii , ja ruovttuineaset sii doadjaledje láibbi ja boradedje ávuin ja duođalaš váimmuiguin .
Sii máidno Ipmila , ja oppa álbmot anii sin árvvus .
Beaivválaččat Hearrá lasihii oskkolaččaid jovkui sin geat bestojuvvojedje .
Biehtár ja Johanas manaiga bajás tempelii ovccát diimmus , rohkosbottus .
Muhtun olmmái gii lei leamaš lámis riegádeami rájes , guddojuvvui juohke beaivvi dohko ja biddjojuvvui dan tempelpoartta gurrii mii gohčoduvvo Čáppapoartan , vai son gearjidivččii sis geat manne tempelšilljui .
Go son oinnii Biehtára ja Johanasa mannamin sisa , de ánuhii sudnos ge attáldaga .
Soai geahčaiga njuolga sutnje , ja Biehtár celkkii : « Geahča munnuide ! »
Son dagai nu ja doaivvui oažžut juoidá sudnos .
Muhto Biehtár celkkii : « Silbbat dahje gollit mus eai gal leat , muhto dan mii mus lea , attán dutnje .
Jesus Kristusa , nasaretlačča , nammii : « Čuožžil ja vázzil ! »
Ja son dohppii olbmá olgeš gihtii ja čuoččáldahtii su . Dan seammás su juolggit ja juolgelađđasat nanosmuvve , son njuikii čuoččat ja váccašii .
Son čuovvulii sudno tempelšilljui , gos son váccašii viehkalattai máinnodettiin Ipmila .
Ja buohkat oidne su váccašeamen ja máidnumin Ipmila .
Sii dovdájedje su ja dihte ahte son lei dat gii lávii čohkkát Čáppapoartta guoras gearjideamen , ja sii hirpmástuvve ja suorganedje das mii lei dáhpáhuvvan sutnje .
Olmmái bisui Biehtára ja Johanasa lahka , ja olbmot čohkiidedje ovddošemiin sudno birra dan báikái mii gohčoduvvui Salomo geađgestoalpohállan .
Go Biehtár oinnii dan , de sárdnugođii olbmuide : Israellaččat , manne dii ovddošehpet dán ?
Manne geahččabehtet munnuide dego moai iežame fámuin dahje ipmilbalolašvuođain livččiime ožžon dán olbmá vázzit ?
Ean fal , Abrahama ja Issáha ja Jáhkoba Ipmil , min máddariid Ipmil , lea hearvásin dahkan bálvaleaddjis Jesusa . Su dii attiidet eiseváldái ja biehttaleiddet Pilatusa ovddas , go son lei mearridan luoitit su luovus .
Dii biehttaleiddet su guhte lei bassi ja vanhurskkis , ja siđaidet olmmošgoddi luovus .
Muhto eallima oaivámučča dii gottiidet , su gean Ipmil bajásčuoččáldahtii jábmiid luhtte ; moai letne dán duođašteaddjit .
Osku Jesusii ja su nammii lea addán fámu dán olbmái gean dii oaidnibehtet ja dovdabehtet .
Dat osku man mii oažžut dán nama bokte , lea dahkan su áibbas dearvvašin din buohkaid oaidnut .
Álbmotguoimmit , mun dieđán ahte dii dagaidet dan diehtemeahttunvuođas , nugo din oaivámuččat ge .
Muhto nu lea Ipmil ollašuhttán dan maid son lei sárdnidahttán ovddalgihtii buot profehtaidis bokte , ahte su Messias galggai gillát .
Gáhtet dan dihtii ja jorgalehket , vai din suttut sihkkojuvvošedje eret .
De áigi boahtá go Hearrá áhpásmahttá din , ja vuolggaha dan Jesusa gii lei dat Messias gean son lei válljen . Son ferte orrut almmis gitta dassá go dat áigi boahtá go buot ráhkaduvvo ođđasis maid Ipmil lea sárdnidan doložis bassi profehtaidis njálmmi bokte .
Movsses han celkkii : Hearrá Ipmileattet čuoččáldahttá didjiide mu lágán profehta álbmotguimmiideattet gaskkas .
Guldalehket buot maid son cealká didjiide .
Muhto juohkehaš guhte ii guldal dán profehta , jávkaduvvo eret álbmogis ja duššaduvvo .
Maiddái buot eará profehtat guđet leat sárdnidan , gitta Sámmola rájes , leat einnostan dáid beivviid dáhpáhusaid .
Dii lehpet profehtaid mánát ja lehpet árben dan lihtu man Ipmil ásahii din máddariiguin go celkkii Abrahamii : Du náli bokte buressivdniduvvojit buot eatnama sohkagottit .
Ovddimustá din várás Ipmil čuoččáldahtii ja vuolggahii bálvaleaddjis , vai son buressivdnidivččii din go jorgalahttá juohkehačča dis eret din bahávuođas .
Go Biehtár ja Johanas ain leigga sárdnumin olbmuide , de bohte fáhkka báhpat ja tempelfávttaid kommandánta ja saddukealaččat .
Sii ledje suhttan das go apoasttalguovttos oahpaheigga olbmuid ja čujuhettiin Jesusii sárdnideigga bajásčuožžileami jábmiid luhtte .
Sii válde sudno gitta ja bidje giddagassii nuppi beaivái , dasgo lei juo eahket .
Muhto olusat sis geat ledje gullan sártni , oskugohte , ja oktiibuot sii ledje dál birrasiid vihtta duhát olbmá .
Nuppi beaivvi juvddálaččaid ráđđehearrát čoahkkanedje Jerusalemis vuorrasiiguin ja čálaoahppavaččaiguin .
Bajimušbáhppa Hannas lei doppe ja Kaifas , Johanas , Aleksandros ja buohkat geat ledje bajimušbáhpa sogas .
Sii gohččo apoastalguoktá lusaset ja jearahedje sudno : « Makkár fámuin ja gean nammii leahppi dahkan dan ? »
Dievva Bassi Vuoiŋŋas Biehtár vástidii : « Álbmoga ráđđehearrát ja vuorrasat ! Go moai odne dutkojuvvojetne dan buori dagu dihtii maid letne dahkan buohcci olbmái , ja mo son buoriduvvui , de dihtet dii buohkat ja oppa Israela álbmot ahte dát olmmái čuožžu dearvvašin din ovddas Jesus Kristusa , nasaretlačča , nammii . Su dii russiinávliidet , muhto Ipmil bajásčuoččáldahtii su jábmiid luhtte .
Son lea dat geađgi man dii huksejeaddjit hilgguidet , muhto dat šattai váldočiehkageađgin .
Ii oktage eará sáhte beastit go son , dasgo ii leat addojuvvon olbmuide eará namma almmi vuolde mii sáhtášii beastit min . »
Sii ovddošedje go oidne Biehtára ja Johanasa roahkkatvuođa ja árvidedje ahte soai leigga oahppameahttun olbmát .
Sii dihte maiddái ahte soai leigga leamaš Jesusa mielde . Ja go sii oidne buoriduvvon olbmá čuožžumin das sudno luhtte , de eai sáhttán vuosttildit .
Sii gohččo sudno mannat olggos diggelanjas ja ráđđádallagohte : « Maid mii galgat dahkat dáinna olbmoguoktáin ?
Soai leaba dahkan čielga oavdudagu ; dat lea almmus juohkehažžii gii orru Jerusalemis , eat ge mii sáhte biehttalit dan .
Muhto amas dát sáhka viidánit dađe eanebut olbmuid gaskii , de mii fertet áitit sudno ahte eaba oaččo šat sárdnut ovttage olbmui dán nammii . »
Sii gohččo sudno fas sisa ja gilde sudno sárdnideames šat ja oahpaheames Jesusa nammii .
Muhto Biehtár ja Johanas vástideigga : « Dubmejehket ieža , lea go Ipmila ovddas riekta jeagadit din eanebut go Ipmila .
Muhto ean moai sáhte orrut sártnokeahttá dan birra maid letne oaidnán ja gullan . »
Dalle sii áite sudno vel eanebut , muhto dattege luite sudno luovus olbmuid dihtii ; sii eai duostan ráŋggáštit sudno , dasgo buohkat máidno Ipmila dan dihtii mii lei dáhpáhuvvan .
Olmmái gii lei buoriduvvon dán oavdumearkka bokte , lei badjel njealljelot jagi .
Maŋŋil go soai leigga luitojuvvon , manaiga ustibiiddiska lusa ja muitaleigga maid bajitbáhpat ja vuorrasat ledje dadjan .
Go sii gulle dan , de buohkat rohkadallagohte ovtta jitnii Ipmilii ja dadje : « Hearrá , don guhte sivdnidit almmi ja eatnama ja meara ja buot mat dain leat ! Don addet Bassi Vuoiŋŋa min máddarii Dávvedii , bálvaleaddjásat , ja celket su njálmmiin : Manne báhkinat stuibmidit ? Manne álbmogat hutket joavdelas juonaid ?
Eatnama gonagasat čuožžilit ja ráđđejeaddjit čoagganit Hearrá ja su Messiasa vuostái .
Duođaid , sii leat lihtodan dán gávpogis du bassi bálvaleaddji Jesusa vuostái , gean don leat vuoiddadan , sihke Herodes ja Pontius Pilatus oktan báhkiniiguin ja Israela álbmogiin , ollašuhttin dihtii dan maid du giehta ja dáhttu lei juo mearridan .
Ja dál , Hearrá , geahča mo sii uhkidit min ja suova bálvaleddjiidat sárdnidit sánát buot roahkkatvuođain .
Geige gieđat ja dearvvašmahte buhcciid , ja divtte mearkkaid ja oavdudaguid dáhpáhuvvat bassi bálvaleaddját Jesusa nammii . »
Go sii ledje rohkadallan , de doarggistišgođii báiki gosa sii ledje čoahkkanan , ja sii buohkat devdojuvvojedje Bassi Vuoiŋŋain , ja sii sárdnidedje Ipmila sáni roahkkatvuođain .
Oppa oskkolaččaid joavkkus lei okta váibmu ja okta siellu , ii ge oktage atnán opmodagas leamen dušše iežas ; sii atne buot oktasaččat .
Apoastalat duođaštedje stuora fámuin ahte Hearrá Jesus lei bajásčuožžilan , ja stuora árbmu lei singuin buohkaiguin .
Ii oktage sis gillán vádjitvuođa , dasgo sii geain ledje bealddut dahje viesut , vuvde daid ja bukte buot ruđaid ja bidje daid apoastaliid julggiid ovdii .
Ruđat juhkkojuvvojedje juohkehažžii dađe mielde go guhtege dárbbašii .
Lei muhtun Jovsset-nammasaš levihtta Kyprosis eret , gean apoastalat gohčodedje Barnabassan , dat mearkkaša jeđđehusa bárdni . Son ge vuvddii bealddu mii sus lei , buvttii ruđaid ja bijai apoastaliid julggiid ovdii .
Muhtun olmmái gean namma lei Ananias ja su eamit Safira vuvddiiga eananopmodaga .
Muhto suoli son doaladii sierra oasi hattis , ja eamit diđii dan ; loahpaid son attii apoastaliidda .
De Biehtár dajai : « Ananias , manne Sáhtán lea deavdán du váimmu , go don geahččalat gielistit Bassi Vuigŋii ja doaladit alccesat oasi dan ruđas maid ožžot bealddu ovddas ?
Ii go bealdu gullan dutnje ovdal go vuvdet dan ?
Ja go de ledjet vuovdán , eai go dalle ruđat gullan dutnje ?
Mo dakkár jurdagat sáhtte badjánit du váibmui ?
It don leat gielistan olbmuid , muhto Ipmila . »
Go Ananias gulai dáid sániid , de gahčai dasa ja jámii . Ja stuora ballu bođii buohkaide geat gulle dan birra .
Muhtun nuorra olbmát gisse jábmi , gudde su olggos ja hávdádedje su .
Sullii golbma diimmu dás maŋŋil bođii su eamit sisa , ii ge son diehtán mii lei dáhpáhuvvan .
Biehtár jearai : « Daja munnje , dá go lei buot maid doai oaččuide bealddu ovddas ? »
Nisu vástidii : « Lei , die lei buot . »
Biehtár dajai sutnje : « Mo doai sáhtiide soabadit geahččalit Hearrá Vuoiŋŋa ?
Gula , uvssa olggobealde gullojit sin lávkkit geat leat hávdádan du boatnjá ; sii guddet du ge olggos . »
Dan seammás nisu gahčai Biehtára julggiid ovdii ja attii vuoiŋŋas .
Go nuorra olbmát bohte sisa , de gávdne su jápmán , ja sii gudde su olggos ja hávdádedje su boatnjás báldii .
Stuora ballu bođii oppa searvegoddái ja buohkaide geat gulle dan .
Ollu mearkkat ja oavdudagut dáhpáhuvve olbmuid gaskkas apoastaliid gieđaid bokte .
Buot oskkolaččat bisso ovttamielalažžan ja lávejedje čoagganit Salomo geađgestoalpohállii .
Ii oktage eará duostan servvoštallat singuin , muhto álbmot anii sin alla árvvus .
Eanet ahte eanet olbmot , stuora lohku olbmát ja nissonat , oskugohte Hearrái ja sii lasihuvvojedje oskkolaččaid jovkui .
Sii gudde velá buhcciid ge geainnuid ala ja vellehedje sin seaŋggaid ja guoddinseaŋggaid ala , vai juobe Biehtára suoivva ge deaivvašii sin go váccii meattá .
Maiddái Jerusalema biras gávpogiin bohte ollu olbmot geat bukte mielddiset buhcciid ja dakkáriid geaid buhtismeahttun vuoiŋŋat givssidedje , ja buohkat dearvvašmahttojuvvojedje .
Dalle bajimušbáhppa ja buot su doarjaleaddjit , dat lea saddukealaččaid bellodat , čuožžiledje dievva áŋgirvuođas ja válde apoastaliid gitta ja bidje sin gávpotgiddagassii .
Muhto Hearrá eŋgel rabai giddagasa uvssaid ihkku , doalvvui sin olggos ja celkkii : « Mannet tempelšilljui ja sárdnidehket olbmuide buot eallima sániid . »
Go sii gulle dan , de manne tempelii árrat nuppi iđida ja oahpahedje olbmuid .
Dan botta bajimušbáhppa ja su bealušteaddjit gohččo čoahkkái Ráđi , oppa Israela vuorrasiid .
Sii gohččo viežžat apoastaliid giddagasas .
Muhto go bálvaleaddjit bohte dohko , de eai gávdnan sin doppe .
Bálvaleaddjit bohte ruovttoluotta ja muitaledje : « Mii gávnnaimet giddagasa fuolalaččat lohkkaduvvon ja fávttaid čuožžumin uvssaid ovddas . Muhto go mii rabaimet uvssaid , de eat gávdnan ovttage siste . »
Go tempelfávttaid kommandánta ja bajitbáhpat gulle dan , de šadde eahpádussii ja imaštedje gaskaneaset mii duođaid lei dáhpáhuvvan .
Dan seammás bođii muhtun ja muitalii sidjiide : « Dat olbmát geaid dii bijaidet giddagassii , čužžot dál tempelšiljus oahpaheamen olbmuid . »
Kommandánta ja fávttat manne dohko ja vižže sin , muhto eai fal veahkaválddálašvuođain ; sii balle ahte olbmot geađgádit sin .
Sii válde apoastaliid mielddiset ja dolvo sin Ráđi ovdii .
De bajimušbáhppa dutkagođii apoastaliid : « Mii gilddiimet din garrasit oahpaheames dán olbmá nammii .
Ja dattege lehpet viiddidan ohpodet miehtá Jerusalema ja áigubehtet diktit dien olbmá vara boahtit min badjelii . »
Muhto Biehtár ja eará apoastalat vástidedje : « Olmmoš ferte jeagadit Ipmila eanebut go olbmuid .
Min máddariid Ipmil bajásčuoččáldahtii Jesusa , gean dii heŋgiidet ruossamurrii ja gottiidet .
Su lea Ipmil bajidan ja bidjan olgeš gieđas beallái oaivámužžan ja beastin , addin dihtii Israelii jorgalusa ja suttuid ándagassii addojumi .
Mii leat buot dáid daguid duođašteaddjit , nu maiddái Bassi Vuoigŋa gean Ipmil lea addán sidjiide geat jeagadit su . »
Go sii gulle dán , de moaráskedje ja árvaledje goddit sin .
Muhto de čuožžilii Ráđis muhtun olmmái , farisealaš Gamaliel , láhkaoahpaheaddji , gean olles álbmot anii alla árvvus .
Son gohčui sin doalvut apoastaliid olggos oanehis boddui ja de sárdnugođii : « Israellaččat , smihttet dárkilit maid dahkabehtet dáiguin olbmáiguin .
Dovle bođii Teudas ovdan ; son anii iežas stuora olmmájin , ja sullii njeallječuođi olbmo čuovvuledje su .
Muhto son goddojuvvui , ja buot su čuovvut bieđganedje ja jávke .
Su maŋŋil , álbmotlohkama áiggi , bođii galilealaš Judas , gii oaččui olbmuid mielddis stuibmái .
Son ge goddojuvvui , ja buohkat geat ledje čuvvon su , bieđganedje .
Ja dál cealkkán didjiide : Diktet dáid olbmáid ráfis , luitet sin mannat .
Jos dát leažžá dušše olbmuid dáhttu ja dahku , de das ii boađe mihkkege .
Muhto jos dat bođeš Ipmilis , de dii ehpet veaje bissehit sin .
Váruhehket , ahte ehpet gártta doarrut Ipmila vuostái . »
Sii čuvvo su rávvaga ja gohččo apoastaliid sisa fas , spihččehedje sin ja gilde sin sárdnideames Jesusa nammii . De sii luite sin mannat .
Apoastalat guđđe Ráđi ja illudedje go ledje adnojuvvon dohkálažžan hiddjiduvvot Jesusa nama dihtii .
Nugo ovdal sii oahpahedje tempelis ja ruovttuin ja sárdnidedje beaivválaččat ahte Jesus lea Messias .
Dán áiggi , go máhttájeddjiid lohku dađistaga lassánii , de searvegotti greikkagielat juvddálaččat nimmoredje hebreagielagiid vuostái , danne go sin leaskkat govssáhalle beaivválaš borramušjuogadeamis .
Dat guoktenuppelogis gohččo dalle čoahkkái buot máhttájeddjiid ja dadje : « Ii livčče riekta jos mii heaittášeimmet sárdnideames Ipmila sáni dan dihtii go fertet lágidit biepmuid .
Oskuguoimmit , válljejehket iežadet searvvis čieža olbmá geain lea buorre beaggin ja geat leat dievva Vuoiŋŋas ja viisodagas ; sin mii bidjat dán bálvalussii .
Muhto mii áigut bissut rohkadallamis ja sáni bálvaleamis . »
Olles joavkku mielas lei dát buorre evttohus . Ja sii válljejedje Stefanusa , olbmá gii lei dievva oskkus ja Bassi Vuoiŋŋas , ja Filipa , Prokorusa , Nikanora , Timona , Parmenasa ja Nikolaosa , antiokialaš olbmá gii lei proselyhtta .
Sii divvo sin apoastaliid ovdii , geat rohkadalle ja bidje gieđaideaset sin ala .
Ipmila sátni ovdánii , ja máhttájeddjiid lohku Jerusalemis lassánii sakka .
Ollu báhpat ge vuostáiválde oskku .
Stefanus lei dievva árpmus ja fámus ja dagai stuora oavdudaguid ja mearkkaid olbmuid gaskkas .
De bohte muhtumat dan synagogas mii gohčoduvvo friddjandahkkojuvvomiid synagogan . Das ledje kyrenelaččat ja aleksandrialaččat , ja Kilikia ja Asia eanangotti olbmot . Sii nákkáhallagohte Stefanusiin .
Muhto eai sii birgen dan viissisvuođa ja Vuoiŋŋa vuostái mii lei su sániin .
Dalle sii suollemasat dájuhedje muhtumiid dadjat : « Mii leat gullan su bilkideamen Movssesa ja Ipmila . »
Nu sii háhttejedje álbmoga , vuorrasiid ja čálaoahppavaččaid , ja dasto sii bohte ja dohppejedje Stefanusa ja dolvo su Ráđi ovdii .
Doppe sii bukte vearreduođašteddjiid geat dadje : « Dát olmmái ii heaitte sárdnumis bassi báikki ja lága vuostái .
Mii gulaimet su dadjamin ahte nasaretlaš Jesus áigu duššadit dán báikki ja rievdadit daid vieruid maid Movsses lea addán midjiide . »
Buohkat geat ledje Ráđis , gehčče sutnje ja oidne ahte su ámadadju lei dego eŋgela muođut .
Bajimušbáhppa jearai : « Lea go dát duohta ? »
Stefanus vástidii : Guldalehket mu , álbmotguoimmit ja álbmoga áhčit !
Hearvásvuođa Ipmil almmustahtii iežas min áhččái Abrahamii dalle go son orui Mesopotamias ovdal go son ássagođii Karanii , ja celkkii sutnje : Vuolgge eret eatnamisttát ja sogastat ja mana dan eatnamii man mun čájehan dutnje .
Dalle Abraham guđii Kaldea eatnama ja ásaiduvai Karanii , ja maŋŋil go su áhčči lei jápmán , de Ipmil gohčui su fárret dán eatnamii gos dii dál ássabehtet .
Ii son addán sutnje maidege das opmodahkan , ii oppa juolggi viiddu ge , muhto son lohpidii addit sutnje eatnama oapmin , sutnje ja su nállái , vaikko sus eai lean mánát .
Ipmil celkkii : Su nálli šaddá orrut vierisin amas eatnamis , gos sii leat šlávvan ja sordojuvvojit njeallječuođi jagi .
Muhto , celkkii Ipmil , mun áiggun dubmet dan álbmoga man šlávvan sii leat , ja dasto sii vulget olggos dan eatnamis ja bálvalit mu dán báikkis .
Ipmil attii sutnje birračuohpahusa lihtu , ja son šattai Issáha áhččin ja birračuohpai su gávccát beaivvi .
Issát šattai Jáhkoba áhččin , ja Jáhkot šattai min álbmoga guoktenuppelot máttarvánhemiid áhččin .
Máddarat gáđaštišgohte Jovsseha ja vuvde su Egyptii .
Muhto Ipmil lei su mielde ja gájui su buot áŧestusain .
Ipmil attii sutnje árpmu ja viissisvuođa nu ahte farao , Egypta gonagas , luohttigođii sutnje , ja bijai su hálddašit Egypta ja oppa iežas dállodoalu .
De bođii nealgeheahti olles Egyptii ja Kanaanii , ja vártnuhisvuohta lei stuoris .
Eai min máddarat ge fidnen biepmu .
Go Jáhkot gulai ahte Egyptas lei gordni , de vuolggahii min máddariid dohko vuosttaš gearddi .
Muhto nuppi gearddi go sii bohte , de Jovsset almmustahtii iežas vieljaidasas , ja farao bođii diehtit Jovsseha soga birra .
Dalle Jovsset rávkkai lusas áhčis Jáhkoba ja olles joavkkus , oktiibuot čiežalogivihttasa . Ja Jáhkot manai dasto Egyptii .
Dohko son jámii , nugo min máddarat ge . Sii dolvojuvvojedje Šikemii ja hávdáduvvojedje dan hávdái man Abraham lei oastán Hamora bártniin Šikemis ja máksán silbbain .
Áigi lahkanii go Ipmila lohpádus Abrahamii galggai ollašuvvat , ja álbmot lassánii ja stuorui Egyptas
dassážii go šattai ođđa gonagas guhte ii dovdan Jovsseha .
Son gávvilušai min álbmoga vuostái , sorddii min máddariid ja bággii sin bidjat olggos njuoratmánáideaset amaset sii beassat eallit .
Dan áiggi Movsses riegádii . Son lei čáppa mánná gean Ipmil anii ráhkisin .
Golbma mánu son bibmojuvvui áhčis dálus .
Dasto biddjojuvvui olggos , muhto farao nieida gávnnai su ja bajásgesii su iežas bárdnin .
Movssesii oahpahuvvui buot egyptalaš viisodat , ja son lei fámolaš sihke sániin ja daguin .
Go Movsses lei njealljelot jagi boaris , de hálidišgođii oahppaladdat álbmotguimmiidis , israellaččaid .
Go son oinnii mo muhtun sis illástuvvui , de Movsses doamihii veahkehit su ja gottii egyptalačča mávssahan dihtii illástuvvan olbmá .
Son navddii ahte su álbmotguoimmit áddešedje ahte Ipmil lei válljen su sin beastin , muhto eai sii ádden dan .
Nuppi beaivvi son bođii go guovttis sis leigga doarrumin gaskaneaskka , ja son geahččalii soabahit sudno ja dajai : « Olbmát , doai han leahppi álbmotguimmežat ! Manne doai dahkabeahtti vearrut goappat guoibmáseatte ? »
Muhto son guhte lei dahkan vearrut nubbái , hoigadii Movssesa eret ja dajai : « Gii lea bidjan du min oaivámužžan ja duopmárin ?
Dáiddát áigut mu ge goddit , nugo ikte goddet egyptalačča ? »
Go Movsses gulai dán , de báhtarii , ja son ásaiduvai vierisin Midianii , gos sutnje riegádedje guokte bártni .
Go njealljelot jagi ledje vássán , de eŋgel almmustuvai sutnje Sinaivári meahcis buolli bastilislánjá dollanjuokčamiin .
Go Movsses oinnii dán , de ovddošii dan oainnáhusa , ja go manai lagabuidda geahččat , de gullui Hearrá jietna : Mun lean du máddariid Ipmil , Abrahama ja Issáha ja Jáhkoba Ipmil .
De Movsses doarggistišgođii ii ge duostan geahččat .
Muhto Hearrá celkkii sutnje : Nuola gápmagiiddát julggiinat !
Dasgo dat báiki gos don leat čuožžumin , lea bassi eanan .
Mun lean oaidnán mo mu álbmot sordojuvvo Egyptas ja gullan sin šuohkkimiid , ja mun lean njiedjan beastit sin .
Boađe dál ! Mun vuolggahan du Egyptii .
Dán Movssesa israellaččat biehttaledje go dadje : Gii lea dahkan du oaivámužžan ja duopmárin ?
Muhto aiddo su Ipmil vuolggahii oaivámužžan ja gáddjun go eŋgel almmustuvai bastilislánjás sutnje veahkkin .
Aiddo son doalvvui sin eret Egyptas ja dagai oavdudaguid ja mearkkaid Egyptas , Ruksesmearas ja njealljelot jagi meahcis .
Dát Movsses celkkii israellaččaide : Ipmil čuoččáldahttá didjiide mu lágán profehta álbmotguimmiideattet gaskkas .
Aiddo son , dalle go álbmot lei čoagganan meahccái , almmuhii min máddariidda dan maid eŋgel sártnui sutnje Sinaiváris .
Son vuostáiválddii ealli sániid , addin dihtii daid midjiide .
Muhto min máddarat eai dáhtton jeagadit su . Sii hoigadedje su eret , ja váimmuineaset sii ehce ruovttoluotta Egyptii ja dadje Aronii : « Ráhkat midjiide ipmiliid mat jođihivčče min .
Dasgo mii eat dieđe mii lea dáhpáhuvvan dán Movssesii gii doalvvui min eret Egyptas . »
Nu sii ráhkadedje gálbbi ja oaffarušše dan eahpeipmilii , ja sii illudedje gieđaideaset dujiid dihtii .
Muhto Ipmil jorggihii sis eret ja guđii sin bálvalit almmi násttiid , nugo lea čállojuvvon profehtaid girjái : Israela sohka , lehpet go oaffaruššan munnje njuovvanoaffariid ja eará oaffariid dán njealljelot jagis meahcis ?
Dii guttiidet Moloka goađi ja Raifan-ipmila nástti , daid govaid maid ráhkadeiddet gudnejahttit daid .
Dan dihtii mun sirddán din nuppi beallái Babylona .
Min máddariin lei meahcis duođaštusa goahti . Movsses lei ráhkadan dan nugo Ipmil gohčui , dan ovdagova mielde man Movsses lei oaidnán .
Min máddarat árbejedje dan ja bukte dan mielddiset go sii Josva láidejumi vuolde válde alcceseaset dan eatnama gos báhkinat ledje ássan , dat geaid Ipmil ájii eret min máddariid ovddas .
Nu lei gitta Dávveda beivviid rádjái .
Dávvet oaččui árpmu Ipmilis ja ánui ahte gávnnašii orrunvistti Jáhkoba sohkii .
Salomo huksii Ipmilii viesu .
Buot Alimus ii dattege ása viesuin maid olbmuid gieđat leat huksen .
Profehta han cealká : Albmi lea mu truvdnu , ja eanan lea mu julggiid vuloš . Makkár viesu dii huksešeiddet munnje , cealká Hearrá , ja gos ba livččii mu vuoiŋŋastanbáiki ?
Ii go mu giehta leat sivdnidan buot dán ?
Ceaggás niskkit dii lehpet , ja birračuohpakeahttá sihke váimmut ja bealjit !
Álelassii dii vuostálastibehtet Bassi Vuoiŋŋa nugo din máddarat , nu dii ge .
Lea go goassege leamaš profehta gean din máddarat eai leat doarrádallan ?
Sii godde sin geat einnostedje ahte Vanhurskkis galggai boahtit . Ja dál dii lehpet beahttán ja goddán su , dii geaidda eŋgelat bukte lága , muhto dii ehpet doallan dan .
Go sii gulle dan , de sii moaráskedje sutnje nu ahte gáske bániid .
Muhto Stefanus lei dievva Bassi Vuoiŋŋas , ja son geahčai almmi guvlui , oinnii Ipmila hearvásvuođa ja Jesusa čuožžumin Ipmila olgeš gieđa bealde . Son dajai : « Mun oainnán almmi rabasin ja Olbmobártni čuožžumin Ipmila olgeš gieđa bealde . »
Muhto dalle sii huikkádedje alla jienain ja dahppe beljiideaset gieđaiguin , ja oktan olmmájin fallehedje su . Sii ádje su olggos gávpogis ja geađgádedje su .
Vihtanat nulle olgguldasbiktasiiddiset ja bidje daid nuorra olbmá julggiid ovdii gean namma lei Sávlos .
Go sii ledje geađgádeamen Stefanusa , de son rohkadalai : « Hearrá Jesus , vuostáiváldde mu vuoiŋŋa . »
De son luoitádii čippiidis ala ja čuorvvui alla jienain : « Hearrá , ale logahala sidjiide dán suttu . »
Dáiguin sániiguin son nohkai .
Muhtun ipmilbalolaš olbmát hávdádedje Stefanusa ja dolle stuora morašváidagiid su muitun .
Muhto Sávlos vikkai duššadit searvegotti .
Son jođii dáluid mielde ja gaikkui olggos sihke olbmáid ja nissoniid ja bijahii sin giddagassii .
Sii geat ledje bieđganaddan juohke guvlui , johtališgohte sárdnideamen evangeliuma .
Filip bođii vuolás Samaria oaivegávpogii , ja doppe son sárdnidii Kristusa birra .
Ja olles joávku vuhtiiválde Filipa sániid go guldaledje su ja oidne mearkkaid maid son dagai .
Dasgo olusiin ledje buhtismeahttun vuoiŋŋat mat vulge sis olggos alla huikasiiguin , ja ollu lápmásat ja skierpmát buoriduvvojedje .
Dan gávpogis lei stuora illu .
Gávpogis lei muhtun Simmon-nammasaš olmmái guhte lei guhká juo noidodagain čádjidahttán samarialaččaid .
Son anii iežas stuorisin . Buohkat hálle su birra , ja sihke smávvát ja stuorrát dadje : « Dát olmmái lea Ipmila fápmu , mii gohčoduvvo Stuora Fápmun . »
Sii guldaledje su , danne go son lei guhkes áiggi čádjidahttán sin noidošemiinis .
Muhto go sii luhtte Filipii gii sárdnidii evangeliuma Ipmila riikka ja Jesus Kristusa nama birra , de sii gásttašuvvojedje , sihke olbmát ja nissonat .
Simmon ieš ge oskugođii , ja gásttas maŋŋil son bisui Filipa luhtte ja ovddošii daid mearkkaid ja fámolaš daguid maid oinnii .
Go apoastalat Jerusalemis gulle ahte Samaria lei vuostáiváldán Ipmila sáni , de vuolggahedje Biehtára ja Johanasa dohko . Soai bođiiga vuolás ja rohkadalaiga sin ovddas , vai sii oččošedje Bassi Vuoiŋŋa .
Dasgo Vuoigŋa ii lean velá boahtán guđege badjelii sin searvvis ; sii ledje dušše gásttašuvvon Hearrá Jesusa nammii .
Soai bijaiga gieđaideaskka sin ala , ja sii ožžo Bassi Vuoiŋŋa .
Muhto go Simmon oinnii ahte Vuoigŋa addojuvvui go apoastalat bijaiga gieđaideaskka sin ala , de son fálai sudnuide ruđaid ja dajai : « Addi munnje ge dan fámu , nu ahte dat gean ala mun bijan gieđaidan , oažžu Bassi Vuoiŋŋa ! »
Muhto Biehtár dajai sutnje : « Lehkoset du ruđat ja don garuhuvvon jos oaivvildat ahte sáhtát oastit Ipmila attáldaga ruđain !
Ii dus leat oassi dahje vuorbi dasa , dasgo du váibmu ii leat vuoiggalaš Ipmila ovddas .
Jorgal iežat bahávuođastat , ja rohkadala Hearrái ahte son attášii dutnje ándagassii go sáhttet váimmustat diekkáriid oppa jurddašit ge . Dasgo mun oainnán ahte don leat dievva bahčavuođa sáhpis ja giddanan vearrivuhtii . »
Simmon vástidii : « Rohkadalli Hearrái mu ovddas , aman mun deaivvahallat dasa maid doai leahppi dadjan . »
Maŋŋil go apoastalat leigga duođaštan ja sárdnidan Hearrá sáni , de máhcaiga Jerusalemii , ja dohko jođedettiin soai sárdnideigga evangeliuma ollu Samaria giliin .
Hearrá eŋgel sártnui Filipii : « Ráhkkan ja mana lulás dan geainnu mielde mii manná Jerusalemis vuolás Gasai . »
Dát geaidnu lea ávdin .
Filip ráhkkanii ja vulggii .
De bođii muhtun alla etiopialaš ámmátolmmái gii bearráigeahčai kandake , dahje Etiopia dronnega , dávviriid .
Son lei fitnan Jerusalemis bálvaleamen Ipmila , ja dál son lei máhccamin ruoktot ja lei čohkkámin vovnnastis lohkamin profehta Jesaja .
De Vuoigŋa celkkii Filipii : « Mana vovnna lusa ja biso dan lahka . »
Filip viegai dohko , ja go gulai su lohkamin profehta Jesaja , de jearai : « Áddet go don maid logat ? »
Olmmái vástidii : « Mo mun áddešin go ii oktage čilge munnje ? »
De son bivddii Filipa boahtit vovdnasis ja čohkánit iežas báldii .
Dat bihttá čállagis man son lei lohkamin , lei dát : Nu go sávza mii dolvojuvvo njuvvojuvvot , nugo láppis mii orru jávohaga beaskideaddji ovddas , son ii rahpan njálmmis .
Go son vuoliduvvui , de váldojuvvui su duopmu eret .
Gii máhttá lohkat su maŋisbohttiid logu ? Dasgo su heagga lea váldojuvvon eret eatnama alde .
Gonagasbálvaleaddji dajai Filipii : « Muital munnje gean birra profehta dás sárdnu ?
Lea go iežas vai muhtun eará birra ? »
De Filip sárdnugođii , ja dán čálabáikki vuođul son sárdnidii sutnje evangeliuma Jesusa birra .
Ja mátkkoštettiin soai bođiiga muhtun sadjái gos lei čáhci , ja gonagasbálvaleaddji dajai : « Dás lea čáhci . Lea go mihkkege mii hehttešii mu gásttašuvvomis ? »
Filip vástidii : « Jos don oskkut oppa váimmustat , de lea vejolaš . »
Gonagasbálvaleaddji dajai : « Mun oskkun ahte Jesus Kristus lea Ipmila Bárdni . »
De son gohčui orustahttit vovnna , ja guktot njiejaiga čáhcái , sihke Filip ja gonagasbálvaleaddji , ja Filip gásttašii su .
Go leigga fas čuožžilan bajás čázis , de Hearrá Vuoigŋa rohttii Filipa su luhtte eret , ii ge gonagasbálvaleaddji oaidnán šat su , muhto son jotkkii mátkkis ilolažžan .
Muhto Filip oidnojuvvui fas Ašdodas , ja son sárdnidii evangeliuma buot gávpogiin gos son jođii , gitta Kesarea rádjái .
Sávlos lei ain dievva vašis Hearrá máhttájeddjiide ja uhkidii goddit sin . Son manai bajimušbáhpa lusa ja siđai sus Damaskusa synagogaide fápmudusreivve mii attii sutnje vuoigatvuođa váldit gitta sin geaid gávnnai ja geat čuvvo Hearrá Geainnu , sihke olbmáid ja nissoniid , ja doalvut sin Jerusalemii .
Go lei jođus ja lahkanišgođii Damaskusii , de almmi čuovga fáhkkestaga báitigođii su birra .
Son gahčai eatnamii ja gulai jiena mii celkkii sutnje : « Sávlos , Sávlos , manne doarrádalat mu ? »
Son jearai : « Hearrá , gii don leat ? »
Ja jietna vástidii : « Mun lean Jesus , gean don doarrádalat .
Muhto čuožžil dál ja mana gávpogii . Doppe oaččut diehtit maid don galggat dahkat . »
Su mátkeguoimmit čužžo das jávohaga ; sii gulle jiena , muhto eai oaidnán ovttage .
Sávlos čuožžilii , muhto go rabai čalmmiidis , de ii oaidnán maidege .
Sii fertejedje váldit su gihtii ja láidet su Damaskusii .
Son lei čalmmeheapmin golbma beaivvi , ii ge son borran ii ge juhkan .
Damaskusis orui máhttájeaddji gean namma lei Ananias .
Hearrá celkkii sutnje oainnáhusas : « Ananias ! »
Son vástidii : « Dá mun lean , Hearrá . »
Ja Hearrá celkkii : « Mana Judasa vissui Njulgesgeainnus ja jeara Sávlosa gii lea Tarsosis eret .
Dasgo son lea dál rohkadallamin . Son lea oainnáhusas oaidnán Ananias-nammasaš olbmá boahtimin ja bidjamin gieđaid su ala , vai son oččošii oainnu fas . »
Ananias vástidii : « Hearrá , mun lean gullan olusiid muitaleamen dán olbmá ja buot baháid birra maid son lea dahkan du iežat olbmuide Jerusalemis .
Ja son lea dál boahtán deike bajitbáhpaid fámuin váldit gitta buohkaid geat rávket du nama . »
Muhto Hearrá celkkii sutnje : « Mana dal dohko . Dasgo mun lean válljen su iežan gaskaoapmin doalvut mu nama báhkiniid , gonagasaid ja Israela álbmoga ovdii . Mun áiggun čájehit sutnje man ollu son ferte gillát mu nama dihtii . »
De Ananias vulggii , ja son bođii vissui , bijai gieđaidis su ala ja celkkii : « Sávlos , vieljažan !
Hearrá lea vuolggahan mu , Hearrá Jesus guhte almmustuvai dutnje go don ledjet boahtimin deike , vai don oččošit fas oainnu ja devdojuvvošit Bassi Vuoiŋŋain . »
Dan seammás loggásedje Sávlosa čalmmiin dego čuopmasat , ja son oaidnigođii .
De son čuožžilii ja gásttašuvvui . Go son lei boradan , de vuoimmáiduvai fas .
Sávlos orui moadde beaivvi máhttájeddjiid luhtte Damaskusis , gos son dakkaviđe sárdnidišgođii synagogain ahte Jesus lea Ipmila Bárdni .
Buohkat geat gulle dán , ovddošedje sakka ja dadje : « Ii go son lean dat gii Jerusalemis vikkai duššadit sin geat čurvot dan nama ?
Ii go son boahtán deike váldit gitta ja doalvut sin bajitbáhpaid lusa ? »
Sávlos nanosmuvai dađistaga , ja son jávohuhtii Damaskusa juvddálaččaid go čájehii sidjiide čielgasit ahte Jesus lea Messias .
Muhtun áiggi geažes juvddálaččat lihtodišgohte goddit su . Muhto Sávlos bođii diehtit sin bahás áigumuša .
Sii fáktejedje gávpotpoarttaid ijatbeaivvi , vai beasašedje goddit su . Muhto muhtun ija su máhttájeaddjit veahkehedje su báhtarit ja luite su vuolás gore siste gávpotmuvrra olggobeallái .
Go Sávlos bođii Jerusalemii , de geahččalii servvoštallat máhttájeddjiiguin .
Muhto buohkat balle sus , dasgo eai jáhkkán ahte son lea máhttájeaddji .
Barnabas válddii su dasto mielde ja doalvvui su apoastaliid lusa ja muitalii sidjiide mo Sávlos geainnu alde lei oaidnán Hearrá , mo Hearrá lei sárdnon Sávlosii ja mo son Damaskusis lei sárdnidan roahkkadit Jesusa nammii .
Dás maŋŋil Sávlos elii ja vádjolii sin gaskkas Jerusalemis ja sárdnidii roahkkadit Hearrá nammii .
Son sártnui ja nákkáhalai greikkagielat juvddálaččaiguin , muhto sii bivde goddit su .
Go oskuvieljat bohte diehtit dán , de sii dolvo su Kesareai ja vuolggahedje su viidáseappot Tarsosii .
Searvegottiin lei dál ráfi miehtá Judea ja Galilea ja Samaria .
Dat huksejuvvojedje ja elle Hearrá balus , ja dat sturro Bassi Vuoiŋŋa fámu bokte .
Biehtár jođii báikkis báikái ja bođii maiddái Ipmila olbmuid lusa geat ásse Lyddas .
Doppe deaivvai muhtun Aineas-nammasaš olbmá guhte lei lámis ja lei leamaš seaŋggabuorrin gávcci jagi .
Biehtár dadjá sutnje : « Aineas , Jesus Kristus dearvvašmahttá du
Čuožžil ja láže seaŋggat ! »
Son čuožžilii dallánaga .
Buohkat geat ásse Lyddas ja Sáronis , oidne su , ja sii jorgaledje Hearrái .
Joppes lei máhttájeddjiid gaskkas muhtun nisu gean namma lei Tabita , greikkagillii Dorkas .
Son dagai ollu buriid ja anii fuola gefiin .
Muhto aiddo dáid áiggiid son buohccái ja jámii , ja sii basse su ja bidje su muhtun loktalatnjii .
Lydda lea Joppe lahka , ja go máhttájeaddjit gulle ahte Biehtár lei doppe , de vuolggahedje guokte olbmá su lusa dáiguin sániiguin : Doama dakkaviđe min lusa !
Biehtár ráhkkanii dallánaga ja vulggii sudno mielde .
Go son joavddai , de sii dolvo su loktii , gos buot leaskkat čoahkkanedje čieru su birra . Sii čájehedje sutnje báiddiid ja gávttiid maid Dorkas lei gorron go ain lei sin luhtte .
Dallánaga Biehtár gohčui buohkaid olggos , čippostii ja rohkadalai .
De jorggihii jábmi guvlui ja dajai : « Tabita , čuožžil ! »
Nisu rabai čalmmiidis , ja go oinnii Biehtára , de čohkkedii .
Biehtár geigii sutnje gieđa ja veahkehii su čuoččat .
De gohčui sisa oskkolaččaid oktan leaskkaiguin ja čájehii sidjiide Dorkasa eallin .
Dát dáhpáhus bekkii miehtá Joppe ja olusat oskugohte Hearrái .
Biehtár orui viehka guhká Joppes muhtun Simmona luhtte gii lei náhkkebárkejeaddji .
Kesareas lei muhtun Kornelius-nammasaš olmmái guhte bálvalii offisearan nu gohčoduvvon italialaš soahteossodagas .
Son lei ipmilbalolaš olmmái nugo buohkat su dálus , ja son attii valjis attáldagaid juvddálaččaide ja lei álelassii rohkadallamin Ipmilii .
Muhtun beaivvi ovccát diimmu birrasiid son oinnii čielgasit oainnáhusas Ipmila eŋgela guhte bođii su lusa ja celkkii sutnje : « Kornelius ! »
Kornelius gávkkai suorganemiin eŋgelii ja jearai : « Hearrá , maid don dáhtut ? »
Eŋgel vástidii sutnje : « Du rohkosat ja attáldagat leat badjánan Ipmila ovdii , ja son lea muitán du
Vuolggat dál moaddása Joppii viežžat muhtun Simmon-nammasaš olbmá guhte maiddái gohčoduvvo Biehtárin .
Son orru náhkkebárkejeaddji Simmona luhtte gean viessu lea mearragáttis . »
Go eŋgel guhte sártnui sutnje , lei jávkan , de son gohčui lusas guoktása bálvaleddjiinis ja ovtta ipmilbalolaš soalddáha , ovtta su lagamuš olbmáin .
Son čilgii sidjiide visot ja vuolggahii sin Joppii .
Nuppi beaivvi , go sii ledje johtimin ja lahkanišgohte Joppii , de Biehtár manai guđat diimmus viessodáhki ala rohkadallat .
Son nealgugođii ja hálidii borrat .
Dan botta go sii ledje lágideamen borramuša , son rohttašuvai Vuoiŋŋas .
De son oaidná almmi rabasin ja dego stuora beavdeliinni boahtimin vuolás .
Dat luitojuvvo eatnama ala čiegaid duohken . Dan alde ledje juohkelágán njealjejuolggat eallit , njoammut ja almmi lottit .
Ja jietna sártnui sutnje ; « Biehtár , čuožžil , njuova ja bora . »
Muhto Biehtár vástidii : « In eisege , Hearrá !
Dasgo mun in leat goassege borran maidege eahpebasiid dahje buhtismeahttumiid . »
Nuppádassii jietna sártnui sutnje : « Dan maid Ipmil lea buhtistan , it galgga don atnit buhtismeahttumin . »
Dát dáhpáhuvai golmma geardde , ja de liidni váldojuvvui fas bajás albmái .
Go Biehtár ain lei ipmašis ja árvaleamen maid dat oainnáhus mearkkašii , de Korneliusa áirasat bohte .
Sii ledje jearahan Simmona viesu ja čužžo dál poartta ovddas . Sii čurvejedje sisa ja jerre lea go das guossin Simmon gii gohčoduvvo Biehtárin .
Biehtár lei ain smiehttamin oainnáhusas go Vuoigŋa celkkii : « Golbma olbmá jearahit du
Doapmal vuolás sin lusa ja čuovo sin ájahalakeahttá , dasgo mun lean vuolggahan sin . »
Biehtár manai vuolás olbmáid lusa ja dajai : « Mun lean dat gean dii ohcabehtet .
Manne lehpet boahtán deike ? »
Sii vástidedje : « Offiseara Kornelius lea vuolggahan min ; son lea vanhurskkis ja ipmilbalolaš olmmái geas lea buorre beaggin oppa juvddálaš álbmogis . Bassi eŋgel gohčui su viežžat du su vissui ja gullat mii dus lea cealkámuššan . »
De Biehtár gohčui sin sisa , ja sii ledje su guossin .
Nuppi beaivvi son vulggii singuin , ja muhtumat Joppe oskuvieljain ge vulge mielde .
Beaivvi maŋŋil sii jovde Kesareai . Kornelius lei vuordimin sin ja lei gohččon čoahkkái fulkkiidis ja lagamus ustibiiddis .
Go Biehtár lei mannamin sisa , de Kornelius bođii su ovddal ja luoitádii su julggiid ovdii .
Muhto Biehtár gohčui su čuožžilit ja dajai : « Čuožžil , mun ge lean dušše olmmoš . »
Biehtár de manai sisa háleštettiin suinna ja oinnii ollu olbmuid čoahkkanan .
Son sártnui sidjiide : « Dii diehtibehtet ahte juvddálaččas ii leat lohpi ovttastallat dahje galledit geange guhte gullá amas álbmogii .
Muhto Ipmil lea čájehan munnje ahte in galgga atnit nuppi olbmo eahpebassin dahje buhtismeahttumin .
Go mun gohčohallen deike , de bohten biehttalkeahttá .
Muhto dál jearan dis : Manne lehpet rávkan mu boahtit ? »
Kornelius vástidii : « Dán muttos áiggi , njeallje beaivvi dás ovdal , ledjen rohkadallamin ruovttus ovccát diimmu rohkosa . Fáhkkestaga čuožžu olmmái mu ovddas čuovgi biktasat badjelis , ja son cealká : Kornelius , Ipmil lea gullan du rohkosa ja muitá du attáldagaid .
Bija sáni Joppii ja gohčo Simmona , gii gohčoduvvo Biehtárin , boahtit deike .
Son lea náhkkebárkejeaddji Simmona guossin gii orru mearragáttis .
Mun bidjen dakkaviđe sáni dutnje , ja giitu go bohtet .
Dál mii leat buohkat čoahkis Ipmila muođuid ovddas gullan dihtii buot dan maid Hearrá lea gohččon du sárdnut . »
De Biehtár sárdnugođii : « Dál mun duođaid ádden ahte Ipmil ii geahča olbmo hámi beallái , muhto son dohkkeha juohkehačča guhte ballá sus ja dahká su dáhtu mielde , makkár álbmogii dal gulaš .
Dan sáni son vuolggahii israellaččaide go son almmuhii ráfi evangeliuma man Jesus Kristus lea buktán , son guhte lea buohkaid Hearrá .
Dii diehtibehtet mii lea dáhpáhuvvan miehtá Judea ; dat álggii Galileas dan gástta maŋŋil man Johanas sárdnidii : Ipmil vuoiddai nasaretlačča Jesusa Bassi Vuoiŋŋain ja fámuin , ja son vádjolii juohke sajis ja dagai buriid ja buoridii buohkaid geat ledje beargalaga fámu vuolde , dasgo Ipmil lei suinna .
Ja mii leat dan duođašteaddjit maid son dagai sihke juvddálaš giliin ja Jerusalemis .
Su sii heŋgejedje murrii ja godde , muhto Ipmil bajásčuoččáldahtii su goalmmát beaivvi ja divttii su almmustuvvat , ii oppa álbmogii , muhto midjiide geaid Ipmil ovddalgihtii lei válljen duođašteaddjin , midjiide geat jugaimet ja boradeimmet suinna maŋŋil go son lei bajásčuožžilan jábmiid luhtte .
Ja son gohčui min sárdnidit álbmogii ja duođaštit ahte son lea dat gean Ipmil lea bidjan elliid ja jábmiid duopmárin .
Su birra duođaštit buot profehtat ja celket ahte juohkehaš guhte osku sutnje , oažžu suttuid ándagassii addojumi su nama bokte . »
Go Biehtár ain lei sárdnumin , de Bassi Vuoigŋa bođii buohkaid badjelii geat gulle su sániid .
Oskkolaš juvddálaččat geat ledje boahtán dohko Biehtáriin , hirpmástuvve go Bassi Vuoiŋŋa attáldat golggahuvvui maiddái báhkiniidda ge .
Dasgo sii gulle sin sárdnumin gielaiguin ja máidnumin Ipmila .
De Biehtár jearai : « Sáhttá go oktage biehttalit sis čázi ja hehttet sin gásttašuvvomis , go sii leat ožžon Bassi Vuoiŋŋa nugo mii ? »
Ja son gohčui sin gásttašuvvot Jesus Kristusa nammii .
Maŋŋil sii dáhtto su orrut sin luhtte moadde beaivvi .
Apoastalat ja oskuguoimmit miehtá Judea gulle dál ahte báhkinat ge ledje vuostáiváldán Ipmila sáni .
Go Biehtár bođii bajás Jerusalemii , de dat guđet ledje birračuhppojuvvon láite su ja dadje : « Manne don mannet birračuohpakeahtes olbmuid lusa ja boradit singuin ? »
De Biehtár čilgegođii sidjiide buot , álggus gitta lohppii : « Mun ledjen Joppe gávpogis . Go ledjen rohkadallamin , de rohttašuvven ja oidnen oainnáhusa .
Juoga bođii vuolás almmis , dego stuora beavdeliidni mii luitojuvvui čiegaid duohken , ja dat bođii vuolás gitta mu rádjái .
Geahčadettiinan dasa oidnen eatnama njealjejuolggat elliid , spiriid , njoammuid ja almmi lottiid .
Ja gullen jiena ge mii celkkii munnje : « Biehtár , čuožžil , njuova ja bora ! »
Mun vástidin : « Hearrá , dan in eisege sáhte , dasgo ii goassege leat mihkkege eahpebasiid ja buhtismeahttumiid boahtán mu njálbmái . »
Nuppádassii gullui jietna almmis : « Dan maid Ipmil lea buhtistan , it galgga don atnit buhtismeahttumin . »
Dát dáhpáhuvai golbmii , ja buot váldojuvvui fas bajás albmái .
Dan seammás golbma olbmá čužžo viesu olggobealde gos mii oruimet ; sii ledje vuolggahuvvon Kesareas mu lusa . Vuoigŋa gohčui mu vuolgit singuin almmá eahpitkeahttá .
Dát guhtta oskuvielja maid vulge mielde , ja mii bođiimet dan olbmá vissui .
Son muitalii midjiide mo son lei oaidnán eŋgela čuožžumin iežas viesus ja cealkimin : « Bija sáni Joppii ja gohčo Simmona gii gohčoduvvo Biehtárin , boahtit deike .
Son sárdnida dutnje dan mii beastá du ja oppa du dálu . »
Ja go mun sárdnidišgohten , de Bassi Vuoigŋa bođii sin badjelii nugo álggus min badjelii .
Dalle muitájin Hearrá sániid go son celkkii : « Johanas gásttašii čáziin , muhto dii gásttašuvvobehtet Bassi Vuoiŋŋain . »
Jos nappo Ipmil lea addán sidjiide seammá attáldaga maid mii oaččuimet go oskugođiimet Hearrá Jesus Kristusii , gii dalle mun livččen ahte hehttešin Ipmila ? »
Go sii gulle dán , de lotkkodedje , ja sii máidno Ipmila ja dadje : « Ipmil lea diktán báhkiniid ge jorgalit ja vuoitit eallima ! »
Sii guđet bieđganadde doarrádallojumi áiggiid mat álge Stefanusiin , jovde gitta Fenikia , Kyprosa ja Antiokia rádjái , muhto sii sárdnidedje sáni dušše juvddálaččaide .
Sin gaskkas ledje kyrenelaččat ja kyproslaččat geat bohte Antiokiai gos sárdnidedje evangeliuma Hearrá Jesusa birra maiddái greikalaččaide ge .
Ja Hearrá giehta lei singuin , nu ahte olusat geat oskugohte , jorgaledje Hearrái .
Dat mii lei dáhpáhuvvan , bekkii maiddái Jerusalema searvegoddái , ja sii vuolggahedje Barnabasa Antiokiai .
Go son bođii dohko ja oinnii maid Ipmila árbmu lei duddjon , de illosii ja rávvii buohkaid bissut Hearrá luhtte duođalaš váimmuin .
Dasgo son lei buorre olmmái , dievva Bassi Vuoiŋŋas ja oskkus .
Ja stuora olmmošjoavku vuitojuvvui Hearrái .
De Barnabas manai Tarsosii ohcat Sávlosa , ja go gávnnai , de válddii su mielde Antiokiai .
Soai leigga ovttas dainna searvegottiin olles jagi ja oahpaheigga ollu olbmuid .
Antiokias gohčoduvvojedje máhttájeaddjit vuosttaš geardde kristtalažžan .
Dan áiggi bohte muhtun profehtat Jerusalemis vuolás Antiokiai .
Okta sis , gean namma lei Agabos , čuožžilii ja einnostii Vuoiŋŋa bokte ahte stuora nealgeheahti galggai boahtit miehtá máilmmi . Nu dáhpáhuvai ge keaisár Klaudiusa áiggi .
Máhttájeaddjit mearridedje vuolggahit veahki oskuguimmiide geat ásse Judeas , iešguhtege nu ollu go suittii .
Sii dahke dán ja vuolggahedje attáldagaid searvegotti vuorrasiidda Barnabasa ja Sávlosa mielde .
Dan áiggi gonagas Herodes válddii gitta muhtun searvegotti lahtuid ja illástii sin .
Ja son gottihii Jáhkoba , Johanasa vielja , mihkiin . Go Herodes oinnii ahte juvddálaččat liikojedje dása , de jotkkii ja válddii Biehtára ge gitta .
Dát dáhpáhuvai suvrrokeahtes láibbiid basiid .
Go Herodes lei váldán su gitta , de bijai su giddagassii ja attii su njealji fáktavuoru háldui , njeallje olbmá juohke fáktavuorus .
Beassážiid maŋŋil Herodes áiggui dasto divvut su álbmoga ovdii .
Dan dihtii Biehtár fáktejuvvui giddagasas , muhto searvegoddi rohkadalai áŋgirit Ipmilii su ovddas .
Ihkku , ovdal dan beaivvi go Herodes áiggui divvut su duopmostuolu ovdii , lei Biehtár oađđimin guovtti soalddáha gaskkas .
Son lei čadnojuvvon guvttiin láhkkiin , ja uvssa olggobealde ledje fávttat fáktemin giddagasa .
Fáhkka čuoččui Hearrá eŋgel das , ja čuovga báittii lanjas .
Son duohtadii Biehtára erttega ja bovttii su ja celkkii : « Doama , čuožžil ! »
Láhkkit gahčče Biehtára gieđain , ja eŋgel celkkii sutnje : « Čana boahkána ja cokka gápmagiiddát . »
Biehtár dagai dan , ja eŋgel celkkii : « Nahket oalgegávttát badjelii ja čuovo mu . »
Biehtár čuovui olggos su maŋis . Ii son ádden ahte dat maid eŋgel dagai , lei duohtavuohta , muhto gáttii dan oainnáhussan .
Soai manaiga vuosttaš ja nuppi fávtta meattá ja bođiiga ruovdepoartta duohkái mii doalvu olggos gávpogii .
Dat rahpasii iešalddes ja soai manaiga olggos ja vácciiga vuolás geainnu mielde . Fáhkkestaga eŋgel jávkkai .
Go Biehtár fuomášii mii lei dáhpáhuvvan , de celkkii : « Dál dieđán ahte Hearrá duođaid lea vuolggahan eŋgelis ja gádjon mu Herodesa gieđas ja buot das maid juvddálaččat dál leat vuordimin . »
Go buot čielggai sutnje , de son manai dan vissui gos Márjá , Johanasa eadni , orui ; Johanasas lei liigenamman Markus .
Dohko ledje olusat čoagganan rohkadallat .
Biehtár goalkkuhii poartta , ja biigá gean namma lei Rhode , bođii olggos rahpat .
Go son dovdái Biehtára jiena , de ilustis vajáldahtii rahpamis poartta , muhto viehkalii sisa ja muitalii ahte Biehtár lea čuožžumin olggobealde .
Sii dadje sutnje : « Don leat mielahuvvan ! »
Muhto go nieida ain nággii , de sii dadje : « Dat ferte leat su eŋgel . »
Biehtár lei ain goalkkuheamen . Go sii rahpe poartta ja oidne su , de hirpmástuvve sakka .
Biehtár sevii sin jávohuvvat , ja de muitalii mo Hearrá lei luoitán su olggos giddagasas .
Son dajai : « Muitalehket dán Jáhkobii ja oskuguimmiide . » Dasto son guđii sin ja manai eará báikái .
Iđedis šattai stuora moivi soalddáhiid gaskkas : Gosa Biehtár lei šaddan ?
Herodes ozai su , muhto ii gávdnan ; ja maŋŋil go lei dutkan fávttaid de gohčui sin steavliduvvot .
Ieš son vulggii Judeas vuolás Kesareai ja orui doppe muhtun áiggi .
Herodes lei guhká guoddán vaši Tyrosa ja Sidona ássiide .
Dál dát olbmot soabadedje jorggihit gonagassii , ja go sii ledje ožžon gonagasa gámmárbálvaleaddji , Blastosa , iežaset beallái , de sii sihte ráfi , dasgo sii ožžo eallindárbašiiddiset gonagasa eatnamis .
Mearrebeaivvi Herodes cokkai gonagasbiktasiid , čohkánii gudnelávdái ja sártnui olbmuide .
Dalle olbmot čurvo : « Diet lea ipmil mii sárdnu , ii ge olmmoš . »
Dan seammás Hearrá eŋgel časkkii su dan dihtii go son ii lean addán Ipmilii gudni . Ja son borahalai máđuide ja jámii .
Muhto Ipmila sátni ovdánii ja viidánii .
Go Barnabas ja Sávlos leigga ollašuhttán bálvalusaska , de vulggiiga Jerusalemis ja válddiiga mielddiska Johanasa geas lei lassinamman Markus .
Antiokia searvegottis ledje profehtat ja oahpaheaddjit . Dat ledje Barnabas ja Simmon gii gohčoduvvui Nigerin , kyrenelaš Lukios , Manaen , gii lei guovllugonagasa Herodesa biepmoviellja , ja Sávlos .
Oktii go sii dolle ipmilbálvalusa ja atne borakeahttáivuođa , de Bassi Vuoigŋa celkkii : « Válljejehket Barnabasa ja Sávlosa dan bargui masa mun lean gohččon sudno . »
Borakeahttáivuođa ja rohkadusa maŋŋil sii bidje gieđaideaset sudno ala ja vuolggahedje sudno .
Dál go Bassi Vuoigŋa lei vuolggahan sudno , soai manaiga vuolás Seleukiai , ja doppe borjjasteigga Kyprosii .
Go bođiiga Salamisii , de sárdnideigga Ipmila sáni juvddálaččaid synagogain .
Sudnos lei Johanas mielde veahkkin .
Sii manne rastá sullo gitta Pafosa rádjái , ja doppe deive juvddálaš noidošeaddji ja vearreprofehta gean namma lei Barjesus .
Son orui eananhearrá Sergius Paulusa luhtte .
Eananhearrá lei jierpmálaš olmmái , ja son siđai Barnabasa ja Sávlosa lusas ja hálidii gullat Ipmila sáni .
Muhto Elymas , dát mearkkaša diehtti , vuostálasttii sudno ja vikkahii eananhearrá eret oskkus .
Dievva Bassi Vuoiŋŋas Sávlos , gii maiddái gohčoduvvo Bávlosin , geahčastii bastilit sutnje ja celkkii : « Don beargalaga bárdni !
Don leat buot vanhurskkisvuođa vašálaš , dievva juohkelágán gávvilvuođas ja bahávuođas , it go goassege áiggo heaitit botnjamis Hearrá njulges geainnuid ?
Dál Hearrá lokte gieđas du vuostái , ja don šattat čalmmeheapmin it ge oainne beaivváža muhtun áigái . »
Dallánaga mierká ja seavdnjat gahčai noidošeaddji ala , ja son váccii ja geahččalii gieđa guluin gávdnat muhtuma gii láidešii su .
Go eananhearrá oinnii dán mii dáhpáhuvai , de oskugođii ja ovddošii sakka Ipmila oahpu .
Bávlos borjjastii guimmiidisguin Pafosis , ja sii bohte Pergii Pamfylias .
Doppe Johanas earránii sis ja máhcai Jerusalemii .
Earát vulge Perges ja ollejedje Antiokiai Pisidias .
Sábbáhin sii manne synagogii ja čohkánedje .
Maŋŋil go láhka ja profehtat ledje lohkkojuvvon , de synagoga ovddasčuožžut vuolggahedje dán sáni sidjiide : « Vieljat , jos dis leažžá neavvunsárdni olbmuide , de sárdnot ! »
Bávlos čuožžilii , loktestii gieđas ja sárdnugođii : Israellaččat ja dii earát geat ballabehtet Ipmilis , guldalehket mu !
Dán álbmoga Ipmil , Israela Ipmil , válljii min máddariid ja dagai álbmoga stuorisin go sii ledje ássamin vierisin Egyptas , ja son doalvvui sin doppe eret gievrras gieđainis .
Sullii njealljelot jagi son anii sis fuola meahcis .
Ja go son lei duššadan čieža álbmoga Kanaanis , de attii sin eatnama israellaččaide iežaset árbeeanan .
Dát bisttii sullii njeallječuođivihttalot jagi . Dasto son attii sidjiide duopmáriid gitta profehta Sámmola rádjái .
De sii sihte gonagasa , ja Ipmil attii sidjiide Sávlosa , Kiša bártni , guhte lei Benjamina čearddas , ja son lei gonagassan njealljelot jagi .
Dalle Ipmil bijai su eret truvnnus ja čuoččáldahtii Dávveda gonagassan sidjiide .
Su birra Ipmil duođaštii : Mun lean gávdnan olbmá mu miela mielde , Dávveda , Isaja bártni , son ollašuhttá buot mu dáhtu .
Dán olbmá nális Ipmil attii lohpádusas mielde Israelii beasti , Jesusa .
Ovdal go son bođii , de Johanas lei sárdnidan jorgalusa gástta oppa Israela álbmogii .
Go Johanas lei loahpaheamen daguidis , de son celkkii : « Mun in leat dat geanin dii gáddibehtet mu .
Muhto mu maŋŋil boahtá muhtun gean gápmagiid ge mun in leat dohkálaš nuollat . »
Álbmotguoimmit , dii Abrahama nálli , ja dii earát geat ballabehtet Ipmilis ! Aiddo midjiide dát bestojumi sátni lea vuolggahuvvon .
Dasgo Jerusalema ássit ja sin oaivámuččat eai árvidan gii son lei eai ge ádden profehtaid sániid mat lohkkojuvvojit juohke sábbáha , muhto sii ollašuhtte daid go dubmejedje su .
Vaikko sii eai gávdnan siva dubmet su jábmimii , de dattege dáhtto Pilatusa goddit su .
Ja go sii ledje ollašuhttán buot mii lea čállojuvvon su birra , de válde su vuolás ruossas ja bidje su hávdái .
Muhto Ipmil bajásčuoččáldahtii su jábmiid luhtte , ja son almmustahtii iežas máŋga beaivvi sidjiide geat ledje čuvvon su Galileas bajás Jerusalemii . Sii leat dál su duođašteaddjin olbmuide .
Ja mii buktit didjiide buori sága , ahte dan lohpádusa maid Ipmil attii min máddariidda , lea son ollašuhttán midjiide , sin mánáide , go son bajásčuoččáldahtii Jesusa , nugo lea čállojuvvon nuppi sálmmas : Don leat mu bárdni , mun lean odne riegádahttán du
Ja go Ipmil lea bajásčuoččáldahttán Jesusa jábmiid luhtte , de Jesus ii goassege šat máhca guohcageapmái .
Dán birra lea Ipmil cealkán ná : Mun attán didjiide daid bassi ja nana lohpádusaid maid adden Dávvedii .
Ja eará sálmmas son cealká : Don it divtte bassi bálvaleaddját oaidnit guohcageami .
Dávvet bálvalii Ipmila olles eallinagis ollašuhttin dihtii Ipmila áigumušaid . De son jámii ja hávdáduvvui máddariiddis lusa ja guohcagii .
Muhto son gean Ipmil bajásčuoččáldahtii , ii guohcagan .
Ja dihtet dál , álbmotguoimmit , ahte su bokte sárdniduvvo didjiide suttuid ándagassii addojupmi . Su bokte juohkehaš guhte osku dahkkojuvvo vanhurskkisin buot dain suttuin main Movssesa láhka ii sáhttán dahkat vanhurskkisin .
Váruhehket dál , amas dat maid profehtat leat cealkán , dáhpáhuvvat didjiide : Gehččet , dii badjelgeahččit , ovddošehket ja šaddet duššin . Dasgo dakkár dagu mun dagan din beivviid , dagu man dii ehpet oskkoše jos muhtun muitalivččii dan .
Go Bávlos ja Barnabas manaiga olggos , de olbmot ávžžuhedje sudno sárdnut dán birra čuovvovaš sábbáha ge .
Ja go synagoga olbmot earránadde , de sihke juvddálaččat ja báhkinat geat ledje jorgalan juvddálaččaid oskui čuvvo sudno .
Bávlos ja Barnabas sártnuiga sidjiide ja roahkasmahtiiga sin doallat gitta Ipmila árpmus .
Maŋit sábbáha measta olles gávpot bođii sudno lusa gullat Ipmila sáni .
Go juvddálaččat oidne olmmošjoavkku , de gáđaštišgohte ja vuostálastigohte bilkusániiguin dan maid Bávlos sárdnidii .
Bávlos ja Barnabas sártnuiga dalle roahkkadit : « Lei dárbbašlaš sárdnidit Ipmila sáni vuos didjiide .
Muhto go juo dii hilgubehtet dan , ehpet ge ane iežadet dohkálažžan agálaš eallimii , de moai vulge dál báhkiniid lusa .
Dasgo ná lea Hearrá gohččon : Mun lean dahkan du čuovggasin báhkiniidda , vai don šattašit bestojupmin gitta eatnama ravddaid rádjái . »
Go báhkinat gulle dán , de sii illudedje ja rámidedje Hearrá sáni , ja buohkat geat ledje mearriduvvon agálaš eallimii , oskugohte . Hearrá sátni viidánii miehtá dan guovllu .
Muhto juvddálaččat háhttejedje allanálat ipmilbalolaš nissoniid ja gávpoga ovddimuš olbmáid ge ja doarrádallagohte Bávlosa ja Barnabasa ja ádje sudno eret guovllusteaset .
Dalle soai savdnjileigga muoldda eret julggiineaskka duođaštussan sin vuostái ja vulggiiga Ikonionii .
Muhto máhttájeaddjit devdojuvvojedje iluin ja Bassi Vuoiŋŋain .
Ikonionas ge Bávlos ja Barnabas manaiga juvddálaččaid synagogii ja sártnuiga nu ahte stuora joavku juvddálaččain ja greikalaččain oskugohte .
Muhto dat juvddálaččat geat eai oskon , háhttejedje báhkiniid ja mirkkohedje sin miela oskuvieljaid vuostái .
Soai dattege oruiga das guhkes áiggi ja sárdnideigga roahkkadit luohtedettiin Hearrái , gii nannii árpmusánis daiguin mearkkaiguin ja oavdudaguiguin maid divttii dáhpáhuvvat sudno gieđaid bokte .
Muhto gávpoga ássit juohkásedje guovtti oassái , nuppit ledje juvddálaččaid bealde , nuppit fas apoastaliid bealde .
Go soai ipmirdeigga ahte sihke báhkinat ja juvddálaččat oktan oaivámuččaideasetguin áigo illástit ja geađgádit sudno , de báhtareigga Lykaonia gávpogiidda Lystrai ja Derbii ja daid lagas guovlluide .
Doppe soai sárdnideigga evangeliuma .
Lystras lei olmmái geas ledje lámis juolggit .
Son lei eamis lámis ii ge lean goassege nagadan vázzit .
Dát olmmái guldalii Bávlosa sárdnumin .
Bávlos geahčai dárkilit sutnje , ja go árvidii ahte olbmás lei osku nu ahte sáhtii buoriduvvot , de Bávlos celkkii alla jienain : « Čuožžil ja čuoččo julggiidat alde ! »
Olmmái njuikii čuoččat ja váccašišgođii .
Go olbmot oidne maid Bávlos lei dahkan , de čuorvugohte lykaoniagillii : « Ipmilat leat boahtán vuolás min lusa olbmuid hámis ! »
Sii gohčodedje Barnabasa Zeusin ja Bávlosa Hermesin , dasgo son lei dat gii sártnui .
Báhppa gii gulai Zeustempelii mii lei aiddo olggobealde gávpoga , bođii gávpotportii vuovssáiguin ja rássegierdduiguin ja áiggui oaffaruššat ovttas olbmuiguin .
Muhto go apoastalat Barnabas ja Bávlos gulaiga dan , gaikkodeigga biktasiiddiska , viegaiga olbmuid gaskii ja čuorvvuiga : « Olbmát , manne dahkabehtet dan ?
Moai han letne dábálaš olbmot nugo dii ge .
Ja moai bukte didjiide buori sága , ahte dii fertebehtet jorgalit eret duššálaš eahpeipmiliin ealli Ipmilii , sutnje guhte lea sivdnidan almmi ja eatnama ja meara ja buot mat daid siste leat .
Vássán sohkabuolvvaid áiggiid son suovai buot álbmogiid mannat iežaset geainnuid . Almmatge son attii didjiide duođaštusa iežas birra go dagai buriid daguid ja attii didjiide arvvi almmis ja šattolaš áiggiid ; son gallehii din ja devddii din váimmuid iluin . »
Dáiguin sániiguin aiddo dal nagadeigga eastadit olbmuid oaffaruššamis alcceseaskka .
Dalle juvddálaččat bohte Antiokias ja Ikonionas .
Sii sártnuhedje olbmuid , nu ahte dat geađgádedje Bávlosa ja gesse su olggobeallái gávpoga go navde su jápmán .
Muhto máhttájeaddjit birastahtte su , ja son čuožžilii ja manai gávpogii .
Nuppi beaivvi soai Barnabasain vulggiiga Derbii .
Dán gávpogis soai sárdnideigga evangeliuma ja vuittiiga eatnagiid máhttájeaddjin .
Dasto máhcaiga Lystrai , viidáseappot Ikonionii ja doppe Antiokiai .
Soai nanosmahtiiga máhttájeddjiid , rávviiga sin bissut nanusin oskkus ja dajaiga : « Mii fertet mannat Ipmila riikka sisa ollu áŧestusaid čađa . »
Juohke searvegottis soai válljiiga vuorrasiid ; ja rohkosiin ja borakeahttáivuođain soai bijaiga sin Hearrá háldui , geasa sii osko .
De soai manaiga Pisidia čađa ja bođiiga Pamfyliai , ja go soai leigga sárdnidan sáni Perges , de manaiga vuolás Attaliai .
Doppe soai borjjasteigga Antiokiai , gos oktii leigga addojuvvon Ipmila árpmu háldui ollašuhttin dihtii dan dagu man dál leigga loahpahan .
Go joavddaiga dohko , de čohkkiiga searvegotti ja muitaleigga makkár daguid Ipmil lei dahkan sudno bokte , ja mo son lei rahpan oskku uvssa báhkiniidda .
Doppe soai oruiga mihá guhkes áiggi máhttájeddjiid luhtte .
Muhtun olbmát bohte Judeas ja oahpahišgohte oskuguimmiid : « Jos dii ehpet birračuhppojuvvo Movssesa lága mielde , de ehpet sáhte bestojuvvot . »
Bávlos ja Barnabas šattaiga garra riidui ja nággui singuin .
Dalle mearriduvvui ahte Bávlos ja Barnabas ja muhtun earát galge mannat bajás Jerusalemii apoastaliid ja vuorrasiid lusa dáinna gažaldagain .
Searvegoddi vuolggahii sin , ja sii johte Fenikia ja Samaria čađa gos muitaledje báhkiniid jorgalusa birra , ja dat lei stuora illun buot oskuguimmiide .
Go sii bohte Jerusalemii , de searvegoddi , apoastalat ja vuorrasat vuostáiválde sin , ja sii muitaledje buot maid Ipmil lei dahkan sin bokte .
Muhto muhtun oskkolaččat guđet gulle farisealaččaid bellodahkii čuožžiledje , ja dadje : « Báhkinat fertejit birračuhppojuvvot ja gohččojuvvot doallat Movssesa lága . »
Apoastalat ja vuorrasat čoahkkanedje guorahallat dán ášši .
Guhkes nákkáhallama maŋŋil Biehtár čuožžilii ja sártnui sidjiide : « Vialjat , dii diehtibehtet ahte Ipmil áigá juo válljii mu din gaskkas , vai báhkinat beasašedje gullat evangeliuma sáni mu njálmmis ja oskugoahtit .
Ja Ipmil guhte dovdá buohkaid váimmuid , duođaštii dan addimiin sidjiide Bassi Vuoiŋŋa nugo midjiide ge .
Son čájehii ahte ii leat erohus min ja sin gaskkas , muhto buhtistii sin váimmuid go sii osko .
Manne dii dalle geahččalehpet Ipmila ja bidjabehtet máhttájeddjiid niskki ala geassá man eai min máddarat eat ge mii leat veadján guoddit ?
Mii han oskut ahte mii bestojuvvot Hearrá Jesusa árpmu bokte seammá láhkái go sii ge . »
De olles joavku jávohuvai ja guldalii Barnabasa ja Bávlosa muitaleamen buot mearkkaid ja oavdudaguid birra maid Ipmil lei dahkan báhkiniid gaskkas sudno bokte .
Go soai jávohuvaiga , de Jáhkot sárdnugođii : « Vieljat , guldalehket mu !
Simmon lea muitalan mo Ipmil áigá juo válljii alccesis álbmoga báhkiniid gaskkas , vai sii gudnejahtášedje su nama .
Dát soahpá profehtaid sániiguin , nugo lea čállojuvvon : Das maŋŋil mun máhcan ja huksen fas Dávveda gahččan goađi .
Mun huksen fas dan mii lea gaikkoduvvon ja ceggen dan ođđasis , vai buot eará olbmot ge ozašedje Hearrá , buot báhkinat geaid badjelii mu namma lea celkojuvvon .
Nu cealká Hearrá , gii lea dahkan dán dovddusin agálašvuođa rájes .
Dan dihtii oaivvildan ahte mii eat galggaše váivvidit báhkiniid geat dahket jorgalusa Ipmilii , muhto čállot sidjiide ahte sii galget doalahit iežaset eret das mii lea šaddan buhtismeahttumin eahpeipmilbálvalusa dihtii , ja fuorrávuođas , buvihuvvon elliid bierggus ja varas .
Dasgo Movssesis leat dološ rájes leamaš sárdnideaddjit buot gávpogiin , ja sii lohket su sániid synagogain juohke sábbáha . »
Dalle apoastalat ja vuorrasat oktan olles searvegottiin šiehtadedje válljet moaddása iežaset gaskkas ja vuolggahit sin Antiokiai Bávlosiin ja Barnabasain .
Dat geat válljejuvvuiga , leigga Judas , gii gohčoduvvui Barsabbasin , ja Silas , goappašagat oskuvieljaid njunuš olbmát .
Sin mielde sii sáddejedje dákkár girjji : Din oskuvieljat apoastalat ja vuorrasat celket dearvvuođaid báhkinsogaid oskuvieljaide Antiokias , Syrias ja Kilikias .
Mii leat gullan ahte muhtumat leat boahtán min luhtte ja jorggiidahttán ja ráfehuhttán din sániideasetguin .
Muhto mii eat leat vuolggahan sin .
Danne mii buohkat leat šiehttan válljet moadde olbmá ja vuolggahit sudno din lusa oktan ráhkis oskuvieljaideametguin Barnabasain ja Bávlosiin , guđet leaba bealuštan Hearrámet Jesus Kristusa nama heakkaineaskka .
Mii nappo vuolggahit Judasa ja Silasa , geat njálmmálaččat ge duođašteaba dan mii lea čállojuvvon dán girjái .
Bassi Vuoigŋa ja mii leat mearridan ahte eat bija makkárge nođiid din ala , earet dáid mat leat dárbbašlaččat : Doalahehket iežadet eret bierggus mii lea oaffaruššon eahpeipmiliidda , ja buvihuvvon elliid bierggus , varas ja fuorrávuođas .
Jos dii váruhehpet dáin , de dahkabehtet bures .
Ellet dearvan !
De sii vuolggahuvvojedje ja manne vuolás Antiokiai . Sii čohkkejedje searvegotti ja adde sidjiide reivve .
Go sii ledje lohkan dan , de illudedje daid árvvosmahtti sániid dihtii mat das ledje .
Judas ja Silas geat ieža ge leigga profehtat , árvvosmahtiiga oskuguimmiid ollu sániiguin ja nanosmahtiiga sin .
Go soai leigga orron doppe muhtun áiggi , de oskuguoimmit luite sudno vuolgit ruoktot ráfiin sin lusa geat ledje vuolggahan sudno .
Muhto Silas mearridii orrut sin luhtte ja danne Judas vulggii okto .
Muhto Bávlos ja Barnabas oruiga Antiokias áigebotta , ja doppe oahpaheigga ja sárdnideigga Hearrá sáni ovttas ollu earáiguin .
Muhtun áiggi das maŋŋil Bávlos dajai Barnabassii Barnabas hálidii váldit mielde Johanasa gean lassinamma lei Markus .
Muhto Bávlos ii miehtan váldit su mielde mátkeguoibmin go son lei guođđán sudno Pamfylias ii ge lean bargagoahtán sudnuin doppe .
Sudno gaskii šattai nu garra riidu ahte soai earránattaiga .
Barnabas válddii mielddis Markusa ja borjjastii Kyprosii , muhto Bávlos gis válljii Silasa guoibmin ja vulggii go oskuguoimmit ledje bidjan su Hearrá árpmu háldui .
Son mátkkoštii Syria ja Kilikia čađa ja nanosmahtii searvegottiid .
Bávlos joavddai maiddái Derbii ja Lystrai .
Doppe lei máhttájeaddji gean namma lei Timoteus .
Son lei oskkolaš juvddálaš nissona bárdni , muhto su áhčči lei greikalaš .
Lystra ja Ikoniona oskuguoimmit adde buori duođaštusa su birra .
Bávlos siđai Timoteusa mielde mátkeguoibmin , ja son birračuohpai su daid guovlluid juvddálaččaid dihtii , dasgo buohkat dihte ahte Timoteusa áhčči lei greikalaš .
Go sii dasto johte gávpogis gávpogii , de dieđihedje searvegottiide daid rávvagiid maid apoastalat ja vuorrasat Jerusalemis ledje mearridan , ja sii gohččo sin doallat daid .
Searvegottit nanosmuvve oskkus ja lassánedje beaivvis beaivái .
Dasto sii vulge Frygia ja Galatia čađa , dasgo Bassi Vuoigŋa lei gieldán sin sárdnideames sáni Asia eanangottis .
Go ledje Mysia lahka , de geahččaledje mannat Bityniai , muhto Jesusa Vuoigŋa ii luoitán sin dohko .
De sii manne Mysia čađa vuolás Troasii .
Ihkku lei Bávlosis oainnáhus .
Son oinnii makedonialačča čuožžumin iežas ovddas ja dat rávkkai : « Boađe deike Makedoniai veahkehit min ! »
Dán oainnáhusa maŋŋil mii geahččaleimmet dakkaviđe beassat Makedoniai ; dasgo mii árvideimmet ahte Ipmil lei rávkan min sárdnidit evangeliuma sidjiide .
De mii vulggiimet Troasis ja borjjasteimmet njuolgga Samotrakii ja nuppi beaivvi fas Neapolisii .
Das jotkkiimet Filippii , mii lea romalaš koloniija ja Makedonia vuosttaš guovllu gávpot .
Dan gávpogis oruimet moadde beaivvi .
Sábbáhin manaimet gávpotpoartta olggobeallái eatnogáddái gos navddiimet leat rohkadallanbáikki .
Dasa čohkáneimmet ja sárdnugođiimet daidda nissoniidda geat ledje čoagganan .
Okta sis geat ledje guldaleamen min , lei Lydia , muhtun nisu Tyatira gávpogis eret .
Son vuvddii purpurliinniid ja lei ipmilbalolaš .
Hearrá rabai su váimmu , vai son vuostáiválddášii Bávlosa sániid .
Go son lei gásttašuvvon oktan dáluinis , de bovdii min ja dajai : « Jos anežehpet mu Hearrái osku olmmožin , de bohtet mu guossin . »
Ja son sártnuhii min boahtit .
Oktii go leimmet mannamin rohkadallanbáikái , bođii min ovddal muhtun šlávvanieida geas lei einnostanvuoigŋa .
Su eaiggádat dinejedje bures su einnostusain .
Son čuovvulii Bávlosa ja min čuorvvodettiin : « Dát olbmát leat Alimus Ipmila bálvaleaddjit , ja sii sárdnidit didjiide bestojumi geainnu . »
Dát dáhpáhuvai máŋga beaivvi mieldálagaid dassá go Bávlos suhtai , jorggihii ja celkkii vuigŋii : « Mun gohčun du Jesus Kristusa nammii : Vuolgge sus ! »
Ja dat guđii nieidda dan seammás .
Muhto go nieidda eaiggádat árvidedje ahte sin dinendoaivva lei nohkan , de válde Bávlosa ja Silasa ja gesse sudno márkanšilljui gávpotdikki ovdii .
Sii bukte sudno romalaš hálddahusolbmáid ovdii ja dadje : « Dát olbmát dagaheaba ráfehisvuođa min gávpogis .
Soai leaba juvddálaččat ja oahpaheaba dakkár dábiid maid mis romalaččain ii leat lohpi dohkkehit dahje čuovvut . »
Olmmošjoavku maiddái čuožžilii sudno vuostái , ja hálddahusolbmát gohččo gaikkihit sudnos biktasiid eret ja huškut sudno .
Go sii ledje huškon sudno máŋgii , de bálkestedje sudno giddagassii ja gohččo fáŋgafávtta atnit sudno dárkilis geahčus .
Go fákta lei ožžon dán gohččuma , de doalvvui sudno siskkimus fáŋgalatnjii ja giddii sudno julggiid čoskii .
Gaskaija áiggi Bávlos guovttos Silasiin rohkadalaiga ja lávlluiga máidnunlávlagiid Ipmilii , ja fáŋggat guldaledje sudno .
Fáhkka bođii garra eatnandoarggástus , nu ahte giddagasa geađgejuolgi sparaidii .
Dan seammás rahpasedje buot uvssat , ja buohkaid láhkkit luovvanedje .
Fáŋgafákta morihii ja oinnii giddagasa uvssaid rahpasan . Son dohppii miehki ja áiggui sorbmet iežas , dasgo son gáttii ahte fáŋggat leat báhtaran .
Muhto Bávlos čurvii sutnje : « Ale daga alccesat bahá , dasgo mii leat buohkat dás ! »
Fáŋgafákta bivddii čuovgga , viegai sisa ja luoitádii doarggistemiin Bávlosa guoktá Silasiin ovdii .
Son doalvvui sudno olggos ja dajai : « Buorit olbmát , maid mun galggan dahkat , vai bestojuvvošin ? »
Soai vástideigga : « Oskko Hearrá Jesusii , de don ja buohkat du dálus bestojuvvobehtet . »
Ja soai sárdnideigga Hearrá sáni sutnje ja oppa su jovkui .
Dammanaga bottus ihkku fáŋgafákta válddii sudno iežas fárrui ja basai sudno háviid , ja dan seammás son gásttašuvvui oktan joavkkuinis .
Son válddii sudno vissosis ja ráhkadii sudnuide mállásiid , ja son illudii oppa joavkkuinis go lei oskugoahtán Ipmilii .
Go iđit bođii , de hálddahusolbmát vuolggahedje diggebálvaleddjiid dákkár gohččumiin : « Luitet olbmáid luovus ! »
Fáŋgafákta dieđihii Bávlosii dán ja dajai : « Hálddahusolbmát dieđihit ahte doai galgabeahtti luitojuvvot luovus .
Boahtti dal olggos ja manni eret ráfái ! »
Muhto Bávlos vástidii : « Dubmekeahttái sii leat roiskon munno almmolaččat , vaikko moai letne Roma riikkavuložat , ja dasto sii leat bálkestan munno giddagassii .
Ja dál sii dáhtošedje ádjit munno suollemasat eret !
Eai de , bohtoset baicca ieža doalvut munno olggos ! »
Dán vástádusa diggebálvaleaddjit dieđihedje hálddahusolbmáide , ja sii ballájedje go gulle ahte soai leaba Roma riikkavuložat .
De sii bohte ieža ja bivde ándagassii ; sii dolvo sudno olggos giddagasas ja dáhtto sudno vuolgit eret gávpogis .
Go soai leigga beassan giddagasas , de finaiga Lydia luhtte .
Doppe deaivvaiga oskuguimmiid ja árvvosmahtiiga sin , ja dasto vulggiiga .
Soai jođiiga Amfipolisa ja Apollonia čađa ja bođiiga Tessalonikai gos juvddálaččain lei synagoga .
Vieru mielde Bávlos manai dohko , ja golbma sábbáha mieldálagaid son sártnodii singuin čállagiid vuođul .
Son dulkui daid ja čájehii ahte Messias fertii gillát ja bajásčuožžilit jábmiid luhtte , ja celkkii : « Dat Jesus gean birra mun sárdnidan didjiide , lea Messias . »
Muhtumat sis luohttigohte Bávlosa ja Silasa sániide ja serve sudnuide .
Nu dahke maiddái ollu ipmilbalolaš greikalaččat , ja viehka ollu allanálat nissonat .
Muhto juvddálaččat moaráskedje dás , ja sii fidnejedje iežaset beallái muhtunráje šilju šlárvvaid ja dahke stuimmi gávpogis .
Sii fallehedje Jasona viesu ja ohce Bávlosa ja Silasa , vai besset doalvut sudno álbmoga ovdii .
Go eai gávdnan sudno , de gesse Jasona ja muhtumiid oskuguimmiin gávpotráđi ovdii ja čurvo : « Dát olbmot geat moivváskahttet olles máilmmi , leat dál boahtán deike ge , ja Jason lea vuostáiváldán sin .
Sii dahket buohkat aiddo keaisára gohččuma vuostái , dasgo sii dadjet ahte muhtun eará lea gonagas , dat lea Jesus . »
Sihke álbmot ja gávpotráđđi baláskedje go gulle dán , ja sii válde dáhkádusruđa Jasonis ja earáin ovdal go luite sin luovus .
Seammá ija oskuguoimmit vuolggahedje Bávlosa ja Silasa Bereai , ja go soai olliiga dohko , de manaiga juvddálaččaid synagogii .
Dáppe ledje juvddálaččat eanet rabasmielagat go Tessalonikas , ja sii vuostáiválde sáni geargatvuođain ja guorahalle čállagiid beaivválaččat oaidnin dihtii leat go dát sánit duođat .
Olusat sis oskugohte , ja sin gaskkas ledje viehka ollu allanálat greikalaš nissonat ja olbmát .
Muhto go Tessalonika juvddálaččat fuomášedje ahte Bávlos sárdnidii Ipmila sáni Bereas ge , de sii bohte dohko ja fillegohte ja moivváskahtte olbmuid doppe ge .
Dalle oskuguoimmit vuolggahedje dakkaviđe Bávlosa vuolás mearragáddái , muhto Silas ja Timoteus báziiga Bereai .
Bávlosa mieđušteaddjit dolvo su Atenii ja de máhcce ruovttoluotta gohččumiin Silasii ja Timoteusii ahte soai galggaiga boahtit Bávlosa lusa nu johtilit go vejolaš .
Dan botta go Bávlos lei vuordimin sudno Atenas , de son moaráskii sakka go oinnii ahte gávpot lei dievva eahpeipmilgovain .
Synagogas son sártnodii juvddálaččaiguin ja ipmilbalolaččaiguin , ja šiljus sártnodii juohke beaivvi singuin geaid deaivvai .
Muhtun epikuralaš ja stoalaš filosofat nákkáhallagohte suinna , ja muhtumat dadje : « Maid duođaid viggá dat hállás olmmái muitalit ? »
Earát árvaledje : « Son dáidá leat amas ipmiliid sárdnideaddji . »
Dasgo Bávlos sárdnidii evangeliuma Jesusa ja bajásčuožžileami birra .
Sii válde dasto Bávlosa mielddiset ja dolvo su Areiopagosii ja dadje : « Oažžut go mii diehtit makkár lea dat ođđa oahppu maid don buvttát ?
Dasgo mii gullat imašlaš ságaid ; danne dáhtošeimmet diehtit mat dat duođaid leat . »
Sihke atenalaččat ja olgoriikkalaččat geat orrot doppe , golahit buot áiggi muitalit ja gullat ođđasiid .
Bávlos čuožžilii gasku Areiopagosa ja sárdnugođii : Atenalaččat ! Mun oainnán juohke láhkái ahte dii gudnejahttibehtet áŋgirit ipmiliiddádet .
Go mun ledjen váccašeamen gávpogis geahččamin din bassi báikkiid , de fuomášin maiddái áltára masa lei čállojuvvon : « Dovdameahttun Ipmilii . »
Dan man dii bálvalehpet dovddakeahttá , dan mun sárdnidan didjiide .
Ipmil , guhte sivdnidii máilmmi ja buot mii das lea , lea almmi ja eatnama Hearrá . Son ii ása tempeliin maid olbmuid gieđat leat huksen . Ii ge dárbbaš maidege mainna olbmuid gieđat sáhttet bálvalit su .
Son han dat lea guhte addá buohkaide heakka ja vuoiŋŋanasa ja buot .
Ovtta olbmos son lea dahkan buot álbmogiid ja diktá sin ássat miehtá eatnama ; son lea bidjan sidjiide ásahuvvon áiggiid ja lea mearridan sin ássanguovlluid rájiid .
Dán son lea dahkan , vai sii ozašedje Ipmila , jos de dovddašedje ja gávnnašedje su , vaikko son ii leat guhkkin eret ovttasge mis .
Dasgo su siste mii eallit , lihkadit ja leat , nugo muhtumat din diktačálliin ge leat dadjan : « Mii leat maiddái su sogas . »
Danne go mii nappo leat Ipmila sohka , de eat berre jurddašit ahte ipmilvuohta lea golle- dahje silba- dahje geađgegova láhkásaš , man olbmuid dáidu dahje jurdda lea hábmen .
Ipmil lea gierdan ovddit áiggiid diehtemeahttunvuođa , muhto dál son gohčču juohke guovllu olbmuid dahkat jorgalusa .
Dasgo son lea mearridan beaivvi goas son dubme máilmmi vanhurskkisvuođain dan olbmá bokte gean son lea válljen dasa .
Dán son lea čájehan buohkaide go bajásčuoččáldahtii su jábmiid luhtte .
Go sii gulle Bávlosa sárdnumin jábmiid bajásčuožžileami birra , de muhtumat bilkidedje su , muhto earát fas dadje : « Mii hálidivččiimet áinnas gullat du sárdnumin dán birra nuppe háve ge . »
De Bávlos guđii sin , muhto muhtumat serve sutnje ja oskugohte . Sin searvvis lei Areiopagosdikki lahttu Dionysios ja muhtun nisu gean namma lei Damaris , ja muhtun earát .
Das maŋŋil Bávlos vulggii Atenas ja bođii Korintii .
Doppe son deaivvai juvddálačča gean namma lei Akvila gii lei Pontosis eret .
Son lei aiddo boahtán Italias oktan áhkáinis Priskillain , danne go keaisár Klaudius lei gohččon buot juvddálaččaid guođđit Roma .
Bávlos manai sudno lusa , ja danne go sus lei seammá fidnu go sudnos , de son orrugođii ja bargagođii sudno luhtte .
Soai leigga nappo guktot loavddagoarrut .
Juohke sábbáha Bávlos sártnodii olbmuiguin synagogas ja sártnuhii juvddálaččaid ja greikalaččaid oskut .
Go Silas ja Timoteus bođiiga vuolás Makedonias , de Bávlos lei áŋgirvuođain sárdnideamen ja duođašteamen juvddálaččaide ahte Jesus lea Messias , muhto sii vuostálaste ja bilkidedje su .
De son savdnjilii biktasiiddis ja dajai sidjiide : « Bohtos din varra iežadet oivviid ala .
Mun lean vigiheapmi dása .
Dás duohko mun manan báhkiniid lusa . »
Dasto son vulggii ja manai ipmilbalolaš olbmá vissui ; su namma lei Titius Justus ja su viessu lei aiddo synagoga guoras .
Synagoga ovddasčuožžu Krispus oppa dáluinis oskugođii Hearrái , ja olusat earát ge Korintas geat gulle Bávlosa , oskugohte ja gásttašuvvojedje .
Ja Hearrá celkkii Bávlosii oainnáhusas ihkku : « Ale bala ! Muhto sártno , ale ge oro jávohaga , dasgo mun lean du mielde , ii ge oktage bija gieđa du ala dahje vahágahte du ; dasgo dán gávpogis leat eatnagat geat gullet mu álbmogii . »
Bávlos orui doppe beannot jagi ja oahpahii sidjiide Ipmila sáni .
Muhto go Gallio lei eananhearrán Akaias , de juvddálaččat searválagaid fallehedje Bávlosa ja dolvo su duopmostuolu ovdii .
Sii dadje : « Dát olmmái hálaha olbmuid bálvalit Ipmila lága vuostái . »
Muhto ovdal go Bávlos háhppehii vástidit , de Gallio sártnui juvddálaččaide : « Juvddáláččat , jos dás livččii mihkkege rihkkosiid dahje vearredaguid , dalle mun áinnas guldalivččen din gierdavaččat .
Muhto jos lea riidu sániid ja namaid ja din iežadet lága alde , de dat leat iežadet áššit .
Diekkár áššiin mun in dubme . »
Ja son ájii sin eret dikkis .
Dalle buohkat dohppejedje synagoga ovddasčuožžu Sostenesa ja cábme su aiddo duopmárstuolu ovddas .
Muhto Gallio ii beroštan das .
Das maŋŋil son dagai dearvvuođaid oskuguimmiide ja borjjastii Syriai oktan Priskillain ja Akvilain .
Kenkreas son čuohpahii vuovttaidis ollašuhttin dihtii lohpádusa .
Go sii bohte Efesosii , de Bávlos guđii mátkeguimmiid ja manai synagogii háleštit juvddálaččaiguin .
Sii dáhtto su orrut guhkit áiggi doppe , muhto son biehttalii ja válddii sis earu dáiguin sániiguin : « Mun máhcan din lusa jos lea Ipmila dáhttu . »
Dasto son borjjastii eret Efesosas .
Go son joavddai Kesareai , de vulggii bajás Jerusalemii . Das son buorástahtii searvegotti ja de mátkkoštii Antiokiai .
Muhtun áiggi maŋŋil son vulggii vuos Galatia ja dasto Frygia čađa ja nanosmahtii buot máhttájeddjiid .
Efesosii bođii dál juvddálaš gean namma lei Apollos .
Son lei Aleksandrias eret , čeahppi sárdnut ja dovddai čállagiid vuđolaččat .
Apollos lei ožžon oahpahusa Hearrá Geidnui , ja buolli áŋgirvuođain son sártnui ja oahpahii dárkilit Jesusa birra , vaikko son dovddai dušše Johanasa gástta .
Son sárdnugođii roahkkadit synagogas .
Go Priskilla ja Akvila gulaiga su , de válddiiga su lusaska ja čilgiiga sutnje Ipmila Geainnu dárkileabbot .
Apollos hálidii vuolgit Akaiai , ja oskuguoimmit movttiidahtte su ja čálle máhttájeddjiide ja ávžžuhedje sin vuostáiváldit su .
Son bođii dohko ja šattai stuora veahkkin sidjiide geat Ipmila árpmu bokte ledje oskugoahtán , dasgo son gomihii juvddálaččaid ákkaid ja duođaštii buohkaid gullut čállagiin ahte Jesus lea Messias .
Dan botta go Apollos lei Korintas , Bávlos jođii siseatnama čađa ja bođii Efesosii .
Doppe son deaivvai muhtun máhttájeddjiid ja jearai sis : « Oaččuidet go dii Bassi Vuoiŋŋa dalle go oskugođiidet ? »
Sii vástidedje : « Mii eat leat oppa gullan ge ahte livččii mihkkege Bassi Vuoiŋŋaid . »
Bávlos jearai : « Makkár gásttain gásttašuvvuidet ? » Sii vástidedje : « Johanasa gásttain . »
De Bávlos celkkii : « Johanas gásttašii jorgaleami gásttain ávžžuhettiin olbmuid oskut sutnje gii boahtá su maŋŋil , ja dat lea Jesus . »
Go sii gulle dán , de gásttašuvvojedje Hearrá Jesusa nammii .
Ja go Bávlos bijai gieđaidis sin ala , de Bassi Vuoigŋa bođii sin badjelii , ja sii sárdno gielaiguin ja profehtastalle .
Sii ledje birrasiid guoktenuppelot olbmá oktiibuot .
Golmma mánu áiggi Bávlos jođii synagogas , ja doppe son sárdnidii roahkkadit , háleštii olbmuiguin ja beaktilis sániiguin čájehii sidjiide duohtavuođa Ipmila riikka birra .
Muhto muhtumat buoššudedje váimmuideaset eai ge oskon ; sii bilkidedje Hearrá Geainnu čoakkalmasa gullut .
Dalle Bávlos guđii sin , válddii máhttájeddjiid mielddis ja sártnodii singuin beaivválaččat Tyrannosa skuvllas .
Dáinna son jotkkii guokte jagi , nu ahte buot Asia eanangotti ássit , sihke juvddálaččat ja greikalaččat , besse gullat Hearrá sáni .
Ipmil dagai erenoamáš oavdudaguid Bávlosa gieđaid bokte . Nu dáhpáhuvai ahte olbmot válde liinniid ja biktasiid maid son lei atnán , ja bidje buhcciid ala . De buozalvasat luite sin , ja bahá vuoiŋŋat vulge sis olggos .
Maiddái muhtun golgu juvddálaš vuoiŋŋaidvuortnuheaddjit geahččaledje namuhit Hearrá Jesusa nama sin badjel geain ledje bahá vuoiŋŋat .
Sii dadje : « Mun vuortnuhan din dan Jesusa bokte gean Bávlos sárdnida ! »
Nu dahke maiddái juvddálaš bajimušbáhpa Skeuasa čieža bártni .
Muhto bahá vuoigŋa vástidii sidjiide : « Jesusa mun gal dovddan , ja mun dieđán gii Bávlos lea , muhto geat bat dii lehpet ? »
Olmmái geas lei bahá vuoigŋa , fallehii sin , biđii sis buohkain ja illástii sin nu ahte sii fertejedje báhtarit viesus olggos álásin ja hávváduvvon .
Dát šattai dovddusin buot efesoslaččaide , sihke juvddálaččaide ja greikalaččaide , buohkat ballagohte , ja Hearrá Jesusa namma máidnojuvvui .
Olusat sis geat ledje oskugoahtán bohte ja dovddastedje albmosit daguideaset . Viehka olusat sis geat ledje noidošan , bukte girjjiideaset ja bolde daid buohkaid oaidnut .
Muhtumat rehkenaste girjjiid ruhtaárvvu ja gávnnahedje ahte dat ledje vihttalotduhát silbaruđa veara .
Dán láhkái ovdánii Hearrá sátni ja oaččui stuora fámu .
Daid dáhpáhusaid maŋŋil Bávlos mearridii vuolgit Makedonia ja Akaia čađa Jerusalemii . Son dajai : « Go doppe lean fitnan , de ferten mannat Romai ge . »
Son vuolggahii guoktása vehkiinis , Timoteusa ja Erastosa , Makedoniai , muhto ieš son orui Asia eanangottis velá muhtun áiggi .
Daid áiggiid šattai stuora stuibmi Hearrá Geainnu dihtii .
Demetrios-nammasaš silbarávdi ráhkadii Artemisa tempeliid govvádusaid silbbas ja fidnii dainna buori sisaboađu duojáriidda .
Son gohčui sin čoahkkái oktan daiguin bargiiguin geain lei seammá fidnu ja dajai : « Buorit olbmot , dii diehtibehtet ahte min riggodat boahtá dán barggus .
Muhto dál oaidnibehtet ja gullabehtet ieža ge ahte ii duššefal Efesosas , muhto measta miehtá Asia eanangotti dát Bávlos lea hálahan ja dájuhan ollu olbmuid go cealká ahte olbmo gieđaiguin ráhkaduvvon ipmilat eai oppa leat ge ipmilat .
Ii leat duššefal ballamis ahte min fidnui sáhttá šaddat fuones beaggin , muhto bahát velá lea , ahte stuora nissonipmila Artemisa tempel navdojuvvo duššin , ja son gean olles Asia ja oppa máilbmi bálvala , sáhttá manahit alla árvvus . »
Go sii gulle dán , de moaráskedje ja čuorvugohte : « Stuoris lea efesoslaččaid Artemis ! »
Stuibmi viidánii miehtá gávpoga , ja buohkat dopme ja bahkkejedje teáhterii ja gesse mielddiset Gaiusa ja Aristarkosa geat leigga Bávlosa makedonialaš mátkeguoimmit .
Bávlos áiggui ieš mannat olbmuid gaskii , muhto su máhttájeaddjit hehttejedje su .
Muhtumat Asia eanangotti ráđđehearráin geat ledje Bávlosa ustibat , bidje maiddái sáni sutnje ahte ii galgan mannat teáhterii .
Olmmošjoavku lei áibbas moivváskan , sii čurvo ja huike oktii njálmmiid , ja eatnasat sis eai oppa diehtán ge manne ležžet čoahkkanan .
Juvddálaččat hoigadedje ovdan Aleksandrosa , ja muhtumat joavkkus čilgejedje ášši sutnje .
Aleksandros sevii gieđainis ahte son áiggui doallat bealuštussártni álbmogii .
Muhto go sii árvidedje ahte son lei juvddálaš , de buohkat huikigohte : « Stuoris lea efesoslaččaid Artemis ! »
Ja stuibmi bisttii guokte diimmu áiggi .
Muhto gávpotčálli vejii loahpas jaskkodahttit olbmuid ja dajai : « Efesoslaččat , eai go buohkat dieđe ahte efesoslaččaid gávpot lea gáhttemin stuora Artemisa ja su gova mii lea gahččan almmis ?
Dán ii sáhte oktage biehttalit , ja dan dihtii berrebehtet dii jaskkodit dál , ehpet ge dahkat maidege jallavuođaid .
Dasgo dii lehpet buktán deike dáid olbmáid geat eai leat tempelsuollagat eai ge leat bilkidan min nissonipmila .
Jos Demetrios ja su duojárat áigot guoddalit geange , de mis leat dikkit ja eananhearrát ; váidoset doppe guhtet guimmiideaset .
Ja jos dis ležžet eará gáibádusat , de diktet lágalaš álbmotdikki meannudit ášši .
Dasgo mii veadjit váidojuvvot dan stuibmideami sivas mii odne lea dáhpáhuvvan . Eat ge mii sáhte bealuštit dakkár stuimmi . »
Dáiguin sániiguin son vejii biđget čoagganeami .
Go stuibmi lei jaskkodan , de Bávlos gohčui máhttájeddjiid čoahkkái ja árvvosmahtii sin .
Dasto son dagai dearvvuođaid ja vulggii sin luhtte Makedoniai .
Mátkkoštettiin dán guovllu čađa son árvvosmahtii oskkolaččaid ollu sániiguin . Son bođii Hellasii gos orui golbma mánu .
Son lei vuolgaleamen meara mielde Syriai , muhto juvddálaččaid lihtodeapmi su vuostái dagai ahte son mearridii mannat ruovttoluotta Makedonia čađa .
Su fárus mátkkoštedje berealaš Sopatros , Pyrrosa bárdni , tessalonikalaččat Aristarkos ja Sekundos ja derbelaš Gaius , Timoteus ja Asia eanangoddelaččat Tykikos ja Trofimos .
Dat vulge juo ovdal ja ledje vuordimin min Troasis .
Suvrrokeahtes láibbiid basiid maŋŋil mii borjjasteimmet Filippis ja deaivvaimet sin vihtta beaivvi geažes Troasis , gos mii oruimet čieža beaivvi .
Vahku vuosttaš beaivvi mii leimmet čoagganan doadjalit láibbi .
Bávlos sártnodii singuin , ja son jotkkii gitta gaskaija rádjái danne go son áiggui vuolgit nuppi beaivvi .
Dan lanjas badjin gosa mii leimmet čoagganan , ledje ollu lámppát .
Nuorra bárdni gean namma lei Eutykos lei čohkkámin láses .
Son nohkai lossadit go Bávlos sárdnidii nu guhká , ja oađedettiin son gahčai olggos láseráigge goalmmát gearddis .
Son lei jápmán go sii loktejedje su .
Muhto Bávlos manai vuolás , gopmulii su badjel , fátmmastii su ja celkkii : « Allet muosehuva , gal sus lea heagga . »
Bávlos manai fas bajás , doadjalii láibbi ja borai , ja go son lei sártnodan singuin gitta dassážii go čuvggodii , de son vulggii .
Bártni sii dolvo ruoktot heakkas , ja dat lei sidjiide stuora jeđđehussan .
Mii manaimet njuolga fatnasii ja borjjasteimmet Assosii , gos galggaimet váldit Bávlosa mielde . Nu son lei mearridan , dasgo son hálidii mannat vácci dohko .
Go son deaivvai min Assosis , de mii válddiimet su fatnasii ja manaimet Mitylenii .
Mii borjjasteimmet das ja bođiimet nuppi beaivvi Kiosa buohta . Maŋit beaivvi láddiimet Samosii ja velá maŋit beaivvi joavddaimet Miletosii .
Bávlos lei nappo mearridan garvit Efesosa , amas ájihuvvot Asia eanangottis .
Son doamai , vai joavddašii Jerusalemii hellodatbeaivái , jos lei vejolaš .
Miletosas son bijai sáni Efesosii ja gohčui lusas searvegotti vuorrasiid .
Go sii ledje boahtán , de sárdnugođii sidjiide : Dii diehtibehtet mo mun lean eallán din gaskkas oppa dan áiggi mii lea vássán vuosttaš beaivvi rájes go mun bohten Asia eanangoddái .
Mun lean bálvalan Hearrá vuollegašvuođain ja gatnjaliiguin buot geahččalusain maid mun lean gillán juvddálaččaid bahás lihtodemiid dihtii .
Dii diehtibehtet ahte in leat čiehkan maidege mii livččii sáhttán leat didjiide ávkin , muhto mun lean oahpahan didjiide dán sihke almmolaččat ja ruovttuin .
Mun lean rávven sihke juvddálaččaid ja greikalaččaid dahkat jorgalusa Ipmilii ja oskut Hearrámet Jesusii .
Ja dál Vuoigŋa lea čatnan mu ja vuolggaha mu Jerusalemii , in ge dieđe mii doppe deaivideažžá mu .
Dan mun dieđán , ahte Bassi Vuoigŋa duođašta munnje juohke gávpogis ahte láhkkit ja áŧestusat vurdet mu .
Muhto mun in ane ealliman mange vearan , go dušše beasan ollašuhttit mátkán ja dan bálvalusa man lean ožžon Hearrá Jesusis : duođaštit evangeliuma Ipmila árpmu birra .
Ja dál dieđán ahte dii ehpet goassege šat oainne mu , dii geaid gaskkas mun lean vádjolan ja sárdnidan Ipmila riikka .
Danne cealkkán didjiide dán beaivvi ahte mun lean sivaheapmi jos oktage láhppoš , dasgo mun in leat čiehkan maidege , muhto mun lean sárdnidan didjiide visot mii lea Ipmila áigumuš .
Atnet vára alddádet ja oppa dan ealus man geahččin Bassi Vuoigŋa lea bidjan din ; gehččet Ipmila searvegotti , man son lea vuoitán alccesis iežas varain .
Mun dieđán ahte go mun lean guođđán din , de gáfat gumppet bohtet din gaskii , eai ge seastte ealu .
Maiddái din iežadet gaskkas čuožžilit muhtun olbmát ja sárdnidit vearri oahpu , vai besset fillet máhttájeddjiid iežaset fárrui .
Gohcet dan dihtii ja muitet ahte golbma jagi ijatbeaivvi mun lean heaittekeahttá nevvon juohkehačča dis ganjalčalmmiid .
Ja dál mun attán din Ipmila ja su árpmusáni háldui , mii sáhttá hukset din ja addit didjiide árbbi singuin buohkaiguin geat leat bassindahkkojuvvon .
Mun in leat goassege bivdalan silbbaid dahje golliid dahje biktasiid geasge .
Dii diehtibehtet ahte dáid gieđaiguin mun lean bargan ja dinen buot maid mun ja mu guoimmit dárbbašeimmet .
Juohke dáfus mun lean čájehan didjiide ahte dii fertebehtet bargat dáinna lágiin ja veahkehit heajubuid ja muitit dáid Hearrá Jesusa sániid : Lea ávdugasat addit go oažžut .
Go Bávlos lei cealkán dán , de luoitádii čippiidis ala ja rohkadalai singuin buohkaiguin .
Buohkat čirrojedje ja dollejedje Bávlosa čeabáha birra ja cummistedje su .
Eanemusat bávččagahtte sin dat sánit ahte sii eai goassege ožžon oaidnit su šat .
Ja sii mieđuštedje su fatnasii .
Go mii leimmet earránan sis , de vulggiimet borjjastit njuolga Kosii , nuppi beaivvi Rhodosii ja doppe Patarai .
Doppe gávnnaimet skiippa mii lei vuolgimin Fenikiai ; mii manaimet dan sisa ja vulggiimet .
Go oinniimet Kyprosa , de borjjasteimmet sullo lulábeale Syria guvlui ja láddiimet Tyrosii gos boltojuvvojedje gálvvut skiippas .
Mii gávnnaimet máhttájeddjiid ja oruimet sin luhtte čieža beaivvi .
Vuoiŋŋa bagadusa mielde sii rávvejedje Bávlosa mannamis bajás Jerusalemii .
Go mii leimmet orron doppe daid beivviid , de vulggiimet ja jotkkiimet mátkámet .
Buohkat mieđuštedje min olggos gávpogis , nissonat ja mánát ge .
Mearragáttis mii čipposteimmet ja rohkadalaimet ja dasto dagaimet dearvvuođaid .
Mii manaimet fatnasii , ja sii gis máhcce iežaset ruovttuide .
Tyrosis joavddaimet Ptolemaisii , gosa min mearramátki nogai .
Mii buorástahtiimet oskuguimmiid ja oruimet sin luhtte beaivvi .
Nuppi beaivvi jotkkiimet mátkki ja olliimet Kesareai , ja doppe manaimet evangelista Filipa dállui ja oruimet su luhtte .
Son lei okta dan čiehččasis , ja sus ledje njeallje náitalkeahtes nieidda geain ledje profehtalaš attáldagat .
Mii oruimet doppe moanaid beivviid , ja dalle bođii Judeas vuolás profehta gean namma lei Agabos .
Son bođii min lusa ja válddii Bávlosa boahkána , čanai julggiidis ja gieđaidis dainna ja celkkii : « Nu cealká Bassi Vuoigŋa : Dán láhkái čatnet Jerusalema juvddálaččat dan olbmá geasa dát boagán gullá ja addet su báhkiniid gieđaide . »
Go mii gulaimet dán , de sihke mii ja báikki olbmot várriimet Bávlosa mannamis bajás Jerusalemii .
Muhto Bávlos vástidii : « Manne dii čierrubehtet ja givssidehpet mu váimmu ?
In leat gárvvis dušše čadnojuvvot , muhto maiddái jápmit Jerusalemii min Hearrá Jesusa nama dihtii . »
Go son ii diktán iežas hálahuvvot , de mii vuolláneimmet ja dajaimet : « Šaddos Hearrá dáhttu ! »
Dáid beivviid maŋŋil mii ráhkkaneimmet ja vulggiimet bajás Jerusalemii .
Muhtumat Kesarea máhttájeddjiin ge vulge min fárrui ja dolvo min kyproslačča Mnasona lusa ; son lei leamaš máhttájeaddji guhká .
Su viesus galggaimet orrut .
Go mii bođiimet Jerusalemii , de oskuguoimmit vuostáiválde min iluin .
Nuppi beaivvi Bávlos manai min mielde Jáhkoba lusa gosa vuorrasat ledje čoahkkanan .
Son buorástahtii sin ja muitalii dárkilit maid Ipmil lei dahkan báhkiniid gaskkas su bálvalusa bokte .
Sii máidno Ipmila dan ovddas maid gulle , muhto dasto dadje Bávlosii : « Oskuviellja , don dieđát ahte máŋga duhát juvddálačča leat oskugoahtán , ja sii dollet lága áŋgirit .
Dál sii leat gullan du birra ahte don oahpahat daid juvddálaččaid geat orrot báhkiniid gaskkas , jorggihit eret Movssesis ja čilget sidjiide ahte sii eai galgga birračuohppat mánáideaset eai ge eallit min vieruid mielde .
Maid mii dál dahkat ?
Fargga šaddá dovddusin ahte don leat boahtán .
Daga dál danne nugo mii gohččut du : Mis leat njeallje olbmá dáppe geat leat dahkan lohpádusa .
Váldde dán njealljása mielddát ja buhtistahte iežat oktan singuin . Mávsse dáid goluid , vai sii besset ráhket oaivviset .
De buohkat áddejit ahte ii leat duohta maid sii leat gullan du birra , muhto ahte don ieš ealát lága mielde ja doalat dan .
Daid báhkiniid hárrái guđet leat oskugoahtán , mii leat čállán reivve ja addán dieđu ahte sii galget hilgut bierggu mii oaffaruššojuvvo eahpeipmiliidda , vara , buvihuvvon elliid bierggu ja fuorrávuođa . »
Nuppi beaivvi Bávlos válddii olbmáid mielddis ja buhtistahtii iežas oktan singuin .
Dasto son manai tempelii dieđihit goas buhtistanáigi loahpahuvvo nu ahte oaffar sáhtii oaffaruššojuvvot juohkehačča ovddas .
Go dat čieža beaivvi ledje measta vássán , de Asia eanangotti juvddálaččat fuomášedje su tempelšiljus .
Sii moivašuhtte olmmošjoavkku , dohppejedje su ja čurvo : « Israellaččat , veahkehehket min !
Dá lea dat olmmái gii oahpaha juohke sajis ja buohkaide álbmoga vuostái ja lága ja dán bassi báikki vuostái .
Ja dál son lea váldán velá greikalaččaid mielddis ja eahpebasuhan dán bassi báikki . »
Sii ledje nappo ovdal oaidnán efesoslačča Trofimosa searválagaid suinna gávpogis ja jáhkke dál ahte Bávlos lei váldán su mielddis tempelii .
Oppa gávpot lihkahuvvui , ja olbmot čoahkkanadde , dohppejedje Bávlosa ja rohttejedje su eret tempelšiljus , ja poarttat giddejuvvojedje dakkaviđe .
Sii ledje cábmimin su measta jámas go romalaš soalddáhiid kommandánta bođii gullat ahte olles Jerusalem lei moivvis .
Go olbmot oidne kommandántta ja soalddáhiid , de heite cábmimis Bávlosa .
Kommandánta manai ovdan ja válddii Bávlosa gitta ja gohčui čatnat su guvttiin láhkkiin .
De son jearai gii Bávlos lei ja maid son lei dahkan .
Muhto olbmot čurvo , nuppit dán , nuppit duon , ja go son ii sáhttán oažžut albma dieđu dán rieja dihtii , de son gohčui doalvut Bávlosa ladnái .
Muhto go Bávlos ollii boardagii , de soalddáhat fertejedje guoddit su danne go olbmot bahkkejedje garrasit juohke guovllus . Dasgo olles olmmošjoavku čuovui maŋis ja čuorvvui : « Goddet su ! »
Sii ledje aiddo doalvumin Bávlosa ladnái go son jearai kommandánttas : « Beasan go cealkit dutnje maidege ? »
Son vástidii : « Máhtát go greikkagiela ?
Dalle han don it leat dat egyptalaš gii muhtun áiggi dás ovdal dagahii stuimmi ja doalvvui njeallje duhát olmmošgoddi meahccái ? »
Bávlos dajai : « Mun lean juvddálaš Tarsosis , Kilikias eret ja dan gávpoga ássi man vissa buohkat dovdet .
Mun bivddán du , suova mu sárdnut olbmuide . »
Kommandánta suovai dan , ja čuoččodettiin boardaga alde Bávlos sevii olbmuide gieđain .
Go sii jaskkodedje , de sárdnidii sidjiide hebreagillii :
« Álbmotguoimmit ja áhčit , gullet maid mun dál sártnun iežan bealuštussan ! »
Go sii gulle ahte son sártnui sidjiide hebreagillii , de šadde velá jaskadeabbot . Bávlos jotkkii :
Mun lean juvddálaš , riegádan Tarsosis , Kilikias , muhto lean bajásšaddan dán gávpogis Gamaliela julggiid ovddas ja ožžon vuđolaš oahpaheami min máddariid lága dárkilis vuogi mielde , ja mun ledjen áŋgir Ipmila bealis nugo dii gis buohkat lehpet odne .
Mun lean doarrádallan jápmimiin ja goddimiin sin geat čuvvot dán Geainnu , ja lean čatnan ja addán giddagassii sihke olbmáid ja nissoniid .
Dan sáhttet bajimušbáhppa ja vuorrasiid ráđđi duođaštit .
Sii adde munnje reivve Damaskusa álbmotguimmiide , ja mun vulgen dohko váldit gitta sin geat ledje doppe , ja buktit sin láhkkiin Jerusalemii , vai sii ráŋggáštuvvošedje .
Muhto jođedettiin dohko , go lahkanišgohten Damaskusii gaskabeaivvi áiggi , šloavggihii fáhkkestaga mu birra šerres čuovga almmis .
Mun gahččen eatnamii ja gullen jiena mii celkkii munnje : « Sávlos , Sávlos , manne doarrádalat mu ? »
Mun jerren : « Hearrá , gii don leat ? »
Son vástidii : « Mun lean nasaretlaš Jesus gean don doarrádalat . »
Mu mátkeguoimmit oidne gal čuovgga , muhto eai gullan jiena mii sártnui munnje .
Mun jerren : « Hearrá , maid mun galggan dahkat ? »
Ja Hearrá celkkii munnje : « Čuožžil bajás ja mana Damaskusii !
Doppe beasat gullat makkár doaimmaide don leat mearriduvvon . »
Šerres čuovgga dihtii mun in oaidnán , ja sii geat ledje muinna , láidejedje mu gieđas nu ahte bohten Damaskusii .
Doppe lei olmmái gean namma lea Ananias .
Son elii ipmilbalolaččat lága mielde , ja buot dan báikki juvddálaččat adde sutnje buori duođaštusa .
Son bođii mu lusa ja celkkii : « Sávlos , vieljažan , šatta fas oaidnin ! »
Dan seammás mun oaidnigohten ja oidnen su .
Son dajai munnje : « Min máddariid Ipmil lea válljen du dovdat su dáhtu , oaidnit Vanhurskása ja gullat su sárdnumin iežas jienain .
Dasgo don šattat su duođašteaddjin ja muitalat buot olbmuide dan maid leat oaidnán ja gullan .
Mainna ádjánat ?
Čuožžil , divtte iežat gásttašuvvot ja suttuidat sihkkojuvvot eret ja čuorvvo Hearrá nama . »
Go mun ledjen máhccan Jerusalemii ja ledjen rohkadallamin tempelis , de rohttašuvven
Son celkkii munnje : « Doapmal eret Jerusalemis nu johtilit go sáhtát , dasgo sii eai vuostáiváldde du duođaštusa mu birra . » ja oidnen Hearrá .
Mun vástidin : « Hearrá , sii han dihtet ieža ahte mun juohke synagogas bidjen giddagassii sin geat osko dutnje ja dikten sin spihččejuvvot .
Ja go du duođašteaddji Stefanusa varra golggahuvvui , de ledjen ieš das ja dohkkehin dan ja fáktejin su sorbmejeddjiid biktasiid . »
Muhto Hearrá celkkii munnje : « Vuolgge , dasgo mun áiggun vuolggahit du guhkás eret báhkiniid lusa . »
Dassážii sii guldaledje Bávlosa , muhto de čuorvugohte : « Jávkadehket dán olbmo eatnama alde !
Dákkár ii berre beassat eallit ! »
Sii huike ja rámško oalgegávttiideasetguin ja bálko sádduid áibmui .
Dalle kommandánta gohčui doalvut Bávlosa ladnái . Son gohčui su gažaduvvot ja spihččejuvvot gávnnahan dihtii manne sii čurvo nu su vuostái .
Muhto go sii čatne Bávlosa gitta ja áigo spihččegoahtit su , de Bávlos jearai offisearas gii lei das : « Lea go dis lohpi spihččet Roma riikkavuloža gii ii leat ožžon duomu ge ? »
Go offiseara gulai dan , de manai kommandántta lusa ja dajai : « Várut , dasgo dát olmmái lea Roma riikkavuloš . »
Kommandánta manai dalle ieš Bávlosa lusa ja jearai : « Muital , leat go don Roma riikkavuloš ? »
Kommandánta dajai : « Mun lean máksán ollu ruđaid oažžut dan riikkavulošvuoigatvuođa . » Bávlos vástidii : « De lean . »
Muhto Bávlos vástidii : « Mun lean riegádan dasa . »
Sii geat galge gažadit su , geassádedje dallánaga . Ja kommandánta šattai ballui go árvidii ahte son lei čatnan láhkkiiguin Roma riikkavuloža .
Kommandánta hálidii diehtit vissásit mas juvddálaččat áššáskuhtte Bávlosa , ja nuppi beaivvi son čovddii su láhkkiin , gohčui čoahkkái bajitbáhpaid ja olles Ráđi ja vieččai Bávlosa sin ovdii .
Bávlos geahčai njuolga Ráđđái ja dajai : « Álbmotguoimmit , gitta dán beaivvi rádjái mun lean eallán buhtes oamedovdduin Ipmila ovddas . »
Bajimušbáhppa Ananias gohčui sin geat čužžo lagamusas , došket Bávlosa njálbmái .
Bávlos celkkii sutnje : « Ipmil cábmá du , don kálkejuvvon seaidni !
Don leat čohkkámin dás dubmen dihtii mu lága mielde , muhto don rihkut lága go gohčut cábmit mu . »
Sii geat ledje čuožžumin das , dadje : « Bealkkihat go don Ipmila bajimušbáhpa ? »
Bávlos vástidii : « Álbmotguoimmit , in mun diehtán ahte son lea bajimušbáhppa , dasgo lea čállojuvvon : It galgga garuhit álbmogat oaivámučča . »
Muhto go Bávlos diđii ahte Ráđi nubbin oassin ledje saddukealaččat ja nubbin gis farisealaččat , de son čuorvvui sidjiide : « Álbmotguoimmit , mun lean farisealaš ja farisealačča bárdni !
Dál lean áššáskuhttojuvvon jábmiid bajásčuožžileami doaivaga dihtii . »
Go son dajai dán , de šattai riidu farisealaččaid ja saddukealaččaid gaskii , ja čoahkkin bieđganii guovtti beallái .
Dasgo saddukealaččat oaivvildit ahte ii leat bajásčuožžileapmi eai ge eŋgelat ja vuoiŋŋat , muhto farisealaččat oskot buot daidda .
Dál sii čuorvugohte ja farisealaččaid bealladagas čuožžiledje muhtun čálaoahppavaččat ja vuostálaste garrasit : « Mii eat gávnna maidege baháid dán olbmás .
Mo jos eŋgel dahje vuoigŋa lea sárdnon sutnje ! »
Nággu šattai nu garas ahte kommandánta balai ahte sii gaikkodit Bávlosa .
Danne son gohčui soalddáhiiddis mannat vuolás ja rohttet Bávlosa eret sin gaskkas ja doalvut su ladnái .
Čuovvovaš ija Hearrá čuoččui Bávlosa ovddas ja celkkii : « Leage dorvvolaš !
Seammá láhkái go don leat duođaštan mu birra Jerusalemis , nu fertet duođaštit Romas ge . »
Nuppi iđida juvddálaččat lihtodedje Bávlosa vuostái ja vurdno ahte eai áigon borrat eai ge juhkat ovdal go ledje goddán su .
Badjel njealljelot olbmá ledje mielde dán lihtodeamis . Sii manne bajitbáhpaid ja vuorrasiid lusa ja dadje : « Mii leat vurdnon ahte eat áiggo máistit biepmu ovdal go leat goddán Bávlosa .
Ávžžuhehket dii ja Ráđđi kommandántta buktit su din ovdii fas dego mahkáš áiggošeiddet dutkat su ášši dárkileabbot .
De mii leat gárvásat goddit su ovdal go joavdá din lusa . »
Bávlosa neahpi gulai dán lihtodeami birra , ja son manai bajás ladnái ja muitalii dán Bávlosii .
Bávlos rávkkai lusas muhtun offiseara ja dajai sutnje : « Doalvvo dán nuorra olbmá kommandántta lusa , dasgo sus lea sutnje diehtu . »
Offiseara válddii bártni mielde ja doalvvui su kommandántta lusa ja dajai : « Fáŋga Bávlos rávkkai mu lusas ja dáhtui doalvut dán bártni du ovdii . Sus lea dutnje dadjamuš . »
Kommandánta válddii bártni gihtii ja manai sierranassii ja jearai : « Mii dus lea munnje muitalit ? »
Bárdni vástidii : « Juvddálaččat leat soahpan ahte sii áigot ihttin gohččut du doalvut Bávlosa Ráđi ovdii dego áiggošedje guorahallat su ášši dárkileabbot .
Muhto ale fal mieđa sidjiide ; dasgo sii leat eanet go njealljelogis geat leat vuođgŋimin su . Sii leat vurdnon ahte eai áiggo borrat eai ge juhkat ovdal go leat goddán su .
Dál sii leat gárvásat ja leat vuordimin ahte don mieđat dasa . »
Kommandánta divttii bártni mannat , muhto gilddii su garrasit : « Ale almmut geasage ahte leat muitalan munnje dán . »
Kommandánta gohčui lusas guoktása offisearainis ja dajai : « Ráhkkanahtti guoktečuođi soalddáha vuolgit Kesareai otná ija goalmmát diimmu maŋŋil .
Váldi mielddáde čiežalot riidejeaddji ja guoktečuođi sáiteolbmá , ja háhkki maiddái riidenheastta Bávlosii ja doalvu su dearvan eananhearrá Feliksa lusa . »
De son čálii reivve dáiguin sániiguin : Klaudius Lysias dearvvaha allaárvosaš eananhearrá Feliksa .
Juvddálaččat ledje váldán gitta dán olbmá , ja sii ledje cábmimin su jámas go mun bohten soalddáhiiguin ja gádjon su dasgo mun bohten diehtit ahte son lei Roma riikkavuloš .
Mun vuolggahin su vuolás sin Ráđđái , danne go dáhtton gullat mainna sii ledje áššáskuhttimin su .
Mun gávnnahin ahte váidalus guoskkai sin láhkagažaldagaide ii ge masage mii ánssášivččii jápminduomu dahje giddagasa .
Danne go dieđihuvvui munnje ahte juvddálaččat lihtodit dán olbmá vuostái , mun vuolggahan su njuolga du lusa .
Mun lean dieđihan su áššáskuhttiide ge ahte sii ožžot buktit du ovdii váidalusaideaset su vuostái .
Gohččuma mielde soalddáhat válde Bávlosa mielddiset ja dolvo su ihkku Antipatrisii .
Nuppi beaivvi sii máhcce ladnáseaset ja dikte riidejeddjiid doalvut su viidáseappot .
Go riidejeaddjit jovde Kesareai , de adde reivve eananhearrái ja divvo Bávlosa su ovdii .
Son logai reivve ja jearai guđe eananguovllus Bávlos bođii .
Go son gulai ahte dat lei Kilikias eret , de dajai : « Mun gažadan du go du áššáskuhttit leat boahtán . »
De gohčui Bávlosa gáhttejuvvot Herodesa šloahttalatnis .
Vihtta beaivvi maŋŋil bođii bajimušbáhppa Ananias dohko vuolás oktan muhtun vuorrasiiguin ja láhkačehpiin gean namma lei Tertullus .
Sii bidje eananhearrá ovdii áššáskuhttimiiddiset Bávlosa vuostái .
Bávlos rávkojuvvui sisa , ja Tertullus áššáskuhttigođii su : « Allaárvosaš Feliks !
Du dihtii mii leat ožžon ráfi juohke báikkis , ja dán álbmogis lea dál buoret dilli du viissis stivrejumi dihtii .
Stuora giitevašvuođain mii dovddastit dán álo ja juohke sajis .
Mun in áiggo ájihit du guhká , muhto siđašin ahte don guldalivččet min oanehis bottoža dábálaš buorredáhtolašvuođainat .
Mii leat gávnnahan dán olbmá duohta rohttudávdan . Son dagaha ráfehisvuođa juvddálaččaid gaskkas miehtá máilmmi ja lea nasaretlaččaid suorggi oaivámuš .
Son lea geahččalan eahpebasuhit velá tempela ge , muhto de mii dohppiimet su ja dáhtuimet dubmet su láhkamet mielde .
Muhto kommandánta Lysias bođii ja rohttii su veahkaválddálašvuođain eret min gieđain .
Ja son gohčui Bávlosa áššáskuhttiid boahtit du lusa . Don sáhtát ieš dutkat su , de fuomášat visot mas mii áššáskuhttit su . »
Juvddálaččat dorjo dán váidalusa ja duođaštedje ahte nie lea .
Eananhearrá seavvilii dalle Bávlosii , ja son sárdnugođii : Mun dieđán ahte don leat leamaš dán álbmoga duopmárin máŋga jagi . Danne mun bealuštan iežan roahkkatvuođain .
Don sáhtát ieš dárkkistit ahte eai leat eanet go guoktenuppelot beaivvi dan rájes go mun mannen bajás Jerusalemii rohkadallat Ipmilii doppe .
Ii ge oktage oaidnán mu nákkáhallamin geainnage dahje giivváskahttimin álbmoga , ii tempelis , ii synagogain ii ge gávpogis ge . Eai ge sii sáhte duođaštit dan mas áššáskuhttet mu .
Muhto dán mun dovddastan dutnje , ahte mun čuovun dan Geainnu man sii gohčodit sierrasearvin , ja dáinna lágiin bálvalan min máddariid Ipmila , oskkodettiin buot dasa mii lea čállojuvvon láhkii ja profehtaide , ja mus lea seammá doaivva go dáin ge , ahte bajásčuožžileapmi jábmiid luhtte boahtá sihke vanhurskásiidda ja vanhurskkismeahttumiidda .
Danne barggan dan ala ahte mus álo livččii buhtes oamedovdu Ipmila ja olbmuid ovddas .
Maŋŋil go ledjen eret máŋggaid jagiid , de bohten buktit attáldagaid álbmogasan ja oaffaruššat .
Dagadettiinan dán sii gávdne mu tempelis , gos ledjen buhtistuvvomin , ii ge gostege lean dihtton stuibmi dahje ráfehisvuohta .
Muhtun Asia eanangotti juvddálaččat oidne mu , ja dat galggašedje ieža leat dás du ovddas áššáskuhttimin mu jos leažžá mihkkege mu vuostái .
Dahje divtte dáid ieža muitalit mas sii gávdne mu sivalažžan go čužžon Ráđi ovddas , leažžá go juo aiddo dán dajaldaga sivas man mun čurvejin go čužžon sin ovddas : « Dii áššáskuhttibehtet mu odne jábmiid bajásčuožžileami dihtii . »
Feliks dovddai bures Hearrá Geainnu , ja son maŋidii ášši ja dajai : « Go kommandánta Lysias boahtá vuolás deike , de válddán dán ášši dupmui . »
Feliks gohčui offiseara doallat Bávlosa giddagasas , muhto geahppa eavttuiguin , eai ge su iežas olbmot galgan hehttejuvvot veahkeheames su .
Moadde beaivvi maŋŋil Feliks bođii oktan áhkáinis Drusillain gii lei juvddálaš .
Son rávkkai Bávlosa ovdan ja guldalii su sárdnumin oskku birra Jesus Kristusii .
Muhto go Bávlos sárdnugođii vanhurskkisvuođa ja mearálašvuođa ja boahttevaš duomu birra , de Feliks ballái ja dajai : « Dál lea doarvái , mana !
Go mus lea dilli , de rávkkan du lusan . »
Son doaivvui dan ge ahte Bávlos attášii sutnje ruđaid . Danne son rávkkai su dávjá ja sártnodii suinna .
Go guokte jagi ledje vássán , de Porkius Festus bođii Feliksa sadjái .
Feliks hálidii bisuhit buori gaskavuođa juvddálaččaide , ja dan dihtii son divttii Bávlosa ain čohkkát giddagasas .
Golbma beaivvi maŋŋil go Festus lei álgán ámmáhasas , de son vulggii Kesareas bajás Jerusalemii .
Bajitbáhpat ja juvddálaččaid oaivámuččat bohte su lusa guoddalit Bávlosa vuostái . Sii átno su doarjut sin ja viežžat Bávlosa Jerusalemii , dasgo sii ledje ráđđádallan vuođgŋit ja goddit su mátkkis .
Muhto Festus vástidii ahte Bávlos galggai gáhttejuvvot Kesareas , ja ahte son ieš fargga lei máhccamin dohko vuolás .
Son dajai : « Vulgoset din oaivámuččat vuolás muinna ja váidalehkoset sii dan olbmá , jos sus leažžá mihkkege boasttuvuođaid . »
Festus ii lean orron doppe eanet go gávcci dahje logi beaivvi go vulggii fas vuolás Kesareai .
Nuppi beaivvi son čohkánii duopmárstullui ja gohčui sin buktit ovdan Bávlosa .
Son bođii sisa , ja juvddálaččat geat ledje boahtán vuolás Jerusalemis , birastahtte su ja áššáskuhtte su garrasit .
Sii eai goitge sáhttán maidege duohtan duođaštit .
Muhto Bávlos bealuštii iežas ja dajai : « Mun in leat moktege suddudan juvddálaččaid lága vuostái , in tempela in ge keaisára vuostái . »
Festus hálidii áinnas juvddálaččaid beallásis , ja danne son jearai Bávlosis : « Vuolggášit go bajás Jerusalemii , vai dubmešin du doppe dán áššis ? »
Muhto Bávlos vástidii : « Mun čuoččun dás keaisára duopmostuolu ovddas , ja mus lea vuoigatvuohta dubmejuvvot dás .
Juvddálaččaid vuostái mun in leat dahkan maidege veriid , nugo don dieđát bures .
Jos mun leaččan dahkan vearrivuođa ja juoidá mas ánssášan jápminduomu , de in beasadala jápmimis .
Muhto jos sin áššáskuhttimat ležžet duššit , de ii oktage sáhte addit mu sin háldui .
Mun guoddalan ášši keaisára ovdii . »
Festus sártnodii iežas ráđđeaddiiguin ja celkkii : « Don leat guoddalan ášši keaisára ovdii ; don beasat keaisára lusa . »
Moadde beaivvi maŋŋil bođiiga gonagas Agrippa ja Berenike Kesareai Festusa guossái .
Go leigga orron doppe eanet beivviid , de Festus čilgii Bávlosa ášši gonagassii ja dajai : « Mus lea dáppe olmmái gean Feliks guđii deike fáŋgan .
Go mun ledjen Jerusalemis , de bajitbáhpat ja juvddálaččaid vuorrasat áššáskuhtte su ja gáibidedje su dubmehallat .
Mun vástidin ahte ii leat romalaš vierru addit áššáskuhtton olbmá geange háldui ovdal go son ieš lea beassan deaivat áššáskuhttiid ja lea ožžon vejolašvuođa bealuštit iežas sivahallama vuostái .
Go sii bohte čoahkkái deike , de in mun ge ájahallan áššiin , muhto nuppi beaivvi juo čohkánin duopmárstullui ja gohččon buktit olbmá iežan ovdii .
Áššáskuhttit birastahtte su , muhto eai sii sivahallan su dakkár vearredaguin main mun livččen navdán . Sis goit ledje soames nákkut sin iežaset oskkoldaga birra ja muhtun Jesusa birra gii lea jápmán , muhto gean Bávlos čuoččuha leat eallimin .
Muhto go mun ledjen eahpádusas dán áššis de jerren sus vuolggášii go Jerusalemii dubmejuvvot doppe .
Muhto go Bávlos gáibidii áššis dutkojuvvot ođđasis ja dáhtui gáhttejuvvot dassážii go Majestehta sáhttá mearridit áššis , de mun gohččon doalahit su giddagasas dassážii go beasan vuolggahit su keaisára lusa . »
Agrippa dajai Festusii : « Mun ieš ge hálidivččen gullat dán olbmá . » Festus vástidii : « Juo ihttánaga beasat gullat su . »
Nuppi beaivvi bođiiga Agrippa ja Berenike olles čiŋaiguin ja vácciiga diggelatnjii oktan kommandánttaiguin ja gávpoga alimus olbmáiguin .
Festusa gohččuma mielde Bávlos buktojuvvui sisa . Ja Festus sártnui : « Gonagas Agrippa ja dii buohkat geat lehpet dás minguin !
Dii oaidnibehtet dán olbmá gean dihtii buot juvddálaččat leat jorggihan munnje , sihke Jerusalemis ja dáppe , čuorvvodettiin ahte son ii galggaše šat beassat eallit .
Muhto mun lean gávnnahan ahte son ii leat dahkan maidege mas ánssášivččii jápminduomu ; ja go son ieš lea guoddalan ášši Majestehta ovdii , de mun lean mearridan vuolggahit su dohko .
Dattege mus ii leat mihkkege sihkkaris dieđuid maid čálášin Majestehtii su birra .
Danne buvttán su din ovdii ja erenoamážit du ovdii , gonagas Agrippa , vai mun dutkama maŋŋil oččošin juoidá maid čállit .
Dasgo mu mielas ii leat dohkálaš vuolggahit fáŋgga almmá čilgekeahttá váidalusaid su vuostái . »
Dalle Agrippa dajai Bávlosii : « Don beasat dál buktit áššát ovdan . »
Bávlos loktii gieđa ja sárdnugođii bealuštusas : Gonagas Agrippa !
Mun anán iežan lihkolažžan go beasan bealuštit iežan odne aiddo du ovddas buot dan vuostái mas juvddálaččat áššáskuhttet mu .
Don dovddat erenoamáš bures buot juvddálaš vieruid ja riidogažaldagaid .
Danne mun bivddán du guldalit mu gierdavaččat .
Buot juvddálaččat dovdet mu eallingearddi nuorravuođa rájes . Sii dihtet mo mun álggu rájes ellen álbmogan searvvis Jerusalemis .
Sii leat dovdan mu guhká , ja jos dáhtošedje , de sáhtášedje duođaštit ahte mun lean eallán farisealažžan min oskku garraseamos suorggi mielde .
Ja dál mun lean áššáskuhtton dan lohpádusa doaivvu dihtii man Ipmil attii min máddariidda .
Dán lohpádusa min guoktenuppelot čeardda doivot beassat oaidnit ollašuvvamin ja danne sii bálvalit Ipmila váibbakeahttá ijatbeaivvi .
Gonagas , dán doaivvu dihtii áššáskuhttet juvddálaččat mu .
Manne lea didjiide jáhkkemeahttun ahte Ipmil bajásčuoččáldahttá jábmiid ?
Mun ieš ge gádden oktii ahte galggan juohke láhkái soahtat nasaretlačča Jesusa nama vuostái , ja mun dahken dan maiddái Jerusalemis .
Mun ožžon válddi bajitbáhpain ja bálkestin ollu bassiolbmuid giddagassii , ja go sii sorbmejuvvojedje , de jienastin dan beali ge .
Buot synagogain ráŋggáštahtten sin dávjá ja bággejin sin bilkidit Jesusa , ja moaristan doarrádallen sin gitta olgoriikka gávpogiidda .
Dan dihtii vulgen oktii Damaskusii bajitbáhpaid válddiin ja isitvuođain .
Dohko jođedettiin , gonagas , oidnen beaiveguovdil čuovgga almmis , šearradeabbo go beaivváš , báitimin mu birra ja sin birra geat ledje mu mielde .
Mii buohkat gahčaimet eatnamii , ja mun gullen jiena cealkimin alccesan hebreagillii : « Sávlos , Sávlos , manne doarrádalat mu ?
Dutnje šaddá lossadin čiekčat seahčagasa vuostái . »
Mun jerren : « Hearrá , gii don leat ? »
Ja Hearrá celkkii : « Mun lean Jesus gean don doarrádalat .
Muhto čuožžil ja čuoččo iežat julggiid alde !
Mun lean almmustahttán iežan dutnje , dasgo mun lean válljen du bálvaleaddjin ja duođašteaddjin , muitalan dihtii sihke dan birra maid don leat oaidnán ja maid mun čájehan dutnje maŋŋil go mun gájun du iežat álbmogis ja báhkiniin .
Sin lusa mun vuolggahan du rahpat sin čalmmiid , vai sii jorgalivčče seavdnjadasas čuovgadassii ja Sáhtána fámus Ipmilii .
Nu sii ožžot suttuid ándagassii addojumi ja oasi sin searvvis geat leat basuhuvvon go sii oskot munnje . »
Danne , gonagas Agrippa , mun in leat leamaš eahpegulolaš almmálaš oainnáhussii .
Muhto mun sárdnidin , vuosttažettiin sidjiide guđet leat Damaskusis , de Jerusalemis ja dasto Judeas ja báhkiniidda ahte sii fertejit dahkat buorádusa ja jorgalit Ipmilii ja dahkat daguid mat duođaštit jorgalusa .
Dán sivas juvddálaččat válde mu gitta tempelšiljus ja geahččaledje heakkahuhttit mu .
Muhto dán beaivvi rádjái Ipmil lea veahkehan mu , nu ahte mun čuoččun dás ja duođaštan uhcahaččaide ja stuorráide , in ge mun daja eará go dan maid profehtat ja Movsses leat einnostan , ahte Messias galggai gillát ja vuosttažin bajásčuožžilit jábmiid luhtte , ja son galggai sárdnidit čuovgasa sihke min álbmogii ja báhkiniidda .
Go Bávlos ná lei bealušteamen iežas , de dajai Festus alla jienain : « Bávlos , don leat mielaid haga !
Buot du oahppu mielahuhttá du »
Bávlos vástidii : « Gudnejahtton Festus , in mun leat mielaheapmi , dasgo buot maid mun sártnun , leat duohta ja jierpmálaš sánit .
Gonagas han dovdá buot dáid áššiid , ja sutnje mun sártnun roahkkadit .
Mun lean vissis das ahte ii mihkkege dás leat amas sutnje ; ii han dat leat dáhpáhuvvan doaresbeale loavkkus .
Gonagas Agrippa , oskkut go don profehtaide ?
Mun dieđán ahte don oskkut . »
Agrippa dajai Bávlosii : « Unnán váilu das ahte don leat hálaheamen mu šaddat kristtalažžan . »
Bávlos vástidii : « Váilos unnán dahje ollu , de mu rohkos Ipmilii lea ahte it duššefal don , muhto buohkat geat gullet mu odne šattašedje dego mun , duššefal dáid láhkkiid haga . »
De gonagas čuožžilii ja nu maiddái eananhearrá ja Berenike ja olles sin joavku .
Go sii ledje geassádan sierranassii , de háleštedje gaskaneaset ja dadje : « Dát olmmái ii leat dahkan maidege mas ánssáša jápminduomu dahje giddagasa . »
Ja Agrippa dajai Festusii : « Dán olbmá livččii ožžon luoitit luovus jos ii livčče guoddalan áššis keaisárii . »
Go lei mearriduvvon ahte mii galggaimet borjjastit Italiai , de Bávlos ja muhtun eará fáŋggat addojuvvojedje Juliusnammasaš offiseara háldui , gii gulai keaisára soahteossodahkii .
Mii manaimet muhtun Adramyttiona fatnasii mii lei mannamin Asia eanangotti hápmaniidda , ja de vulggiimet borjjastit .
Min mielde lei makedonialaš Aristarkos gii lei Tessalonikas eret .
Nuppi beaivvi finaimet Sidonis , ja Julius meannudii ustitlaččat Bávlosiin ja divttii su mannat ustibiid lusa , vai sii besse addit sutnje maid son dárbbašii .
Mii vulggiimet fas ja borjjasteimmet Kyprosa mieđabeale , danne go mis lei vuostebiegga .
De borjjasteimmet rastá meara Kilikia ja Pamfylia olggobeale ja bođiimet Myrai Lykias .
Doppe offiseara gávnnai muhtun Aleksandria skiippa mii lei mannamin Italiai , ja son bijai min dan fárrui .
Máŋga beaivvi borjjasteimmet hui gulul , ja illá joavddaimet Knidosa rádjái . Biegga hehttii min beassamis ovddosguvlui , ja mii doalahalaimet danne vuolábeale Kreta Salmone lahka .
Illá beasaimet sullo gáddeguora ja bođiimet báikái mii gohčoduvvo Buorre hápmanin , Lasea gávpoga lahkosiin .
Guhkes áigi lei gollan dan mátkkis ja lei juo maŋŋil fástobeaivvi , ja šaddagođii váralaš borjjastit .
Danne Bávlos rávvii sin ja dajai : « Olbmát , mun oainnán ahte guhkkelebbui borjjasteapmi buktá lihkuhisvuođa ja vahága ; eat masse dušše gálvvuid ja skiippa , muhto heaggamet ge . »
Muhto offiseara luhtii eanebut skiippa jođiheaddjái ja eaiggádii go dasa maid Bávlos dajai .
Ja go hápman ii heiven dálveorohahkan , de eatnasat hálidedje borjjastit eret das ja geahččalit ollet Feniksii orrut doppe dálvvi .
Dát Kreta hápman lea rabas máttaoarjjás ja davveoarjjás .
Go dál biekkastii luládahkan , de sii gádde sáhttit dahkat nugo áigo , ja sii rohttejedje áŋkora ja borjjastedje Kreta gáddeguora .
Muhto fargga bođii sullo badjel garra riđđu , mii gohčoduvvo davvinuorttádahkan .
Dat doalvvui skiippa veagal , ja go ii lean vejolaš doalahit dan biekka vuostái , de mii vuolláneimmet ja luittiimet iežamet rievdat .
Mii bođiimet muhtun Kauda-nammasaš sulloža mieđabeallái , ja illá vejiimet gádjut skiipafatnasa .
Sii gesse dan skiipii , ja sihkkarastin dihtii skiippa sii gárre dan oaraiguin .
Go sii dál balle rievdamis Syrteluovtta sáttonjuoraide de luite borjasiid , ja nu sii rievddadedje .
Go riđđudálki ain hehttii min , de nuppi beaivvi olbmát bálkugohte gálvvuid merrii . Ja goalmmát beaivvi bálko ieža maiddái skiipabiergasiid ge merrii .
Ii beaivváš eai ge násttit oidnon máŋgga beaivái ja garra dálki bisttii ain .
Loahpas nohkagođii doaivva gáddjojuvvot .
Muhto go guhkes áigái olbmát eai lean ožžon maidege borrat , de Bávlos loaiddastii sin gaskii ja celkkii : « Olbmát , dii livččiidet galgan guldalit mu ehpet ge vuolgit Kretas , de livččiidet vealtan sihke lihkuhisvuođas ja vahágis .
Muhto dál bivddán ahte dii lehpet dorvvolaččat , dasgo ii oktage dis dušša , muhto skiipa gal duššá .
Dasgo mannan ija bođii Ipmila eŋgel mu lusa , dan Ipmila geasa mun gulan ja gean mun bálvalan . Eŋgel celkkii : Ale bala , Bávlos .
Don beasat čuožžut keaisára ovddas , ja Ipmil lea addán dutnje buohkaid geat leat johtimin du mielde .
Lehket dan dihtii dorvvolaččat !
Dasgo mus lea dat osku Ipmilii ahte buot manná nugo munnje lea celkojuvvon ; mii rievdat gal muhtun sullui . »
Mii leimmet dál rievddadan Adriamearas njealljenuppelot jándora go mearraolbmát ihkku árvidedje ahte gáddi lea lahka .
Sii mihtidedje guoktelot sala čikŋodaga .
Veahá siskelis mihtidedje fas vihttanuppelot sala .
Sii balle mannamis boađu ala ja bálkestedje njeallje áŋkora maŋŋestávnnis ja sávve dušše ahte beaivi boađášii .
Mearraolbmát geahččaledje báhtarit skiippas ja bidje skiipafatnasa čáhcái dahkaluttadettiin ahte sii áigot bidjat áŋkoriid ovdastávnnis .
Muhto Bávlos dajai offiserii ja soalddáhiidda : « Jos dát olbmát eai biso skiippas , de dii ehpet sáhte gáddjojuvvot . »
De soalddáhat botkejedje báttiid mat dolle fatnasa , ja dikte dan rievdat eret .
Go beaivi lei čuvggodeamen , de Bávlos ávžžuhii sin buohkaid boradit ja dajai : « Dii lehpet dál vuordán borakeahttá njealljenuppelot beaivvi ehpet ge leat ožžon maidege heggii .
Dan dihtii ávžžuhan din dál boradit ; dat lea dárbbašlaš , vai dii sáhttibehtet gáddjojuvvot .
Ii ovttasge dis dušša vuoktačalmmáš ge oaivvis . »
Go Bávlos lei dadjan dan , de válddii láibbi , giittii Ipmila buohkaid gullut , doadjalii dan ja borai .
Buohkat árvvosmuvve fas ja boradišgohte .
Mii leimmet oktiibuot guoktečuođičiežalogiguhtta olbmo skiippas .
Go sii ledje gallánan , de bálko gordnegálvvuid merrii , vai skiipa geahppu .
Go beaivi čuvggodii , de sii eai dovdan eatnama , muhto sii oidne luovtta mas lei sáttogáddi , ja áigo geahččalit rievddahit skiippa dasa .
Sii botkejedje áŋkorbáttiid ja luite daid merrii , ja dan seammás čovde stivrranbáttiid ge . De rohttejedje ovdageašborjasa bajás ja manne biekka mielde gátti guvlui .
Sii rivde sáttonjuora guvlui mas lei čieŋal guovtti beale , ja dasa borjjastedje skiippa gitta .
Ovdastávdni čuoggasii njurrii ja cohkkui dasa , muhto bárut cuvkejedje skiippa maŋŋegeaži .
Soalddáhat áigo dál goddit fáŋggaid amas oktage beassat vuodjalit báhtarussii .
Muhto offiseara dáhtui gádjut Bávlosa ja hehttii sin .
Son gohčui sin geat máhtte vuodjat , njuiket čáhcái vuosttažin ja mannat gáddái , ja gohčui earáid boahtit maŋis fielluid dahje skiipagáhpálagaid alde .
Dán láhkái buohkat besse dearvan gáddái .
Go mii leimmet gáddjojuvvon , de oaččuimet diehtit ahte sullo namma lei Malta .
Sullo ássit ledje hui veahkkái midjiide . Sii cahkkehedje dola ja atne mis buohkain fuola , dasgo lei ráššodálki .
Bávlos lei čohkken risselána , ja go lei bidjan dan dollii , de gearpmaš njoamui olggos báhkkasa geažil ja čuolastii iežas gitta su gihtii .
Go sullo ássit oidne gearbmaša heaŋgámin su gieđas , de dadje guhtet guimmiidasaset . « Dát olmmái lea vissásit olmmošgoddi .
Son lea gáddjojuvvon mearas , muhto mávssaheaddji nissonipmil ii divtte su eallit . »
Muhto Bávlos šluvgilii gearbmaša eret gieđas njuolga dollii ii ge son ožžon makkárge vigi das , vaikko sii vurde su bohtanit dahje fáhkkestaga gahččat jábmin .
Muhto go ledje vuordán guhká ja oidne ahte ii Bávlosii dáhpáhuvvan mihkkege baháid , de molso oaivileaset ja dadje ahte son lea muhtun ipmil .
Dán báikki lahka lei stuora gárdin mii gulai sullo alimus virgeolbmái , gean namma lei Publius .
Son vuostáiválddii min ustitlaččat iežas guossin golmma beaivái .
Publiusa áhčči lei aiddo dalle veallámin buohccin feberis ja garra čoavjedávddas .
Bávlos manai su lusa , rohkadalai ja bijai gieđaidis su ala ja buoridii su .
Dás maŋŋil bohte earát ge sullo buhcciin , ja buoriduvvojedje .
Sii atne min alla árvvus , ja go mii vulggiimet , de adde midjiide buot maid dárbbašeimmet .
Golbma mánu maŋŋil borjáneimmet aleksandrialaš skiippain mii lei leamaš dálvvi sullos .
Mii bođiimet Syrakusii gos oruimet golbma beaivvi .
Das borjjasteimmet fas Regiumii .
Nuppi beaivvi šattai lullibiegga ja beaivvi maŋŋil bođiimet Puteolii .
Doppe deaivvaimet muhtun oskuguimmiid , geat bovdejedje min orrut sin luhtte čieža beaivvi .
Ja de olliimet Romai .
Oskuguoimmit doppe ledje gullan min birra ja bohte min ovddal gitta Forum Appii ja Tres Tabernae rádjái .
Bávlos giittii Ipmila go oinnii sin ja árvvosmuvai fas .
Go leimmet boahtán Romai , de Bávlos oaččui lobi orrut sierranassii dainna soalddáhiin gii galggai bearráigeahččat su .
Golbma beaivvi maŋŋil Bávlos gohčui čoahkkái juvddálaččaid oaivámuččaid . Go sii ledje čoahkis , de celkkii sidjiide : « Vieljat , mun in leat dahkan vearrut min álbmoga dahje máddariid vieruid vuostái , ja dattege boađán fáŋgan Jerusalemis gos addojuvvojin romalaččaid háldui .
Sii gažadedje mu ja dáhtto luoitit mu , danne go in lean dahkan maidege mas ánssášin jápminduomu .
Muhto juvddálaččat vuostálaste dán , ja de mun bággejuvvojin guoddalit ášši keaisára ovdii , muhto dát ii mearkkaš ahte mun sivahallen iežan álbmoga .
Dán dihtii lean sihtan din boahtit deike , vai beasan deaivat din ja sárdnut didjiide .
Dasgo mun lean čadnon dáidda láhkkiide Israela doaivaga dihtii . »
Sii vástidedje : « Mii eat leat ožžon makkárge reivve Judeas du birra . Eai geatge min álbmotguimmiin leat boahtán dieđihit dahje cealkit maidege baháid du birra .
Muhto mii hálidit áinnas gullat maid don oaivvildat , dasgo mii diehtit ahte olbmot vuostálastet dán searvvi juohke báikkis . »
Go sii ledje šiehtadan beaivvi Bávlosiin , de eanebut bohte dohko gos son orui .
Iđedis eahkedii son duođaštii ja čilgii Ipmila riikka birra , ja čujuhettiin Movssesa láhkii ja profehtaide son geahččalii vuoitit sin Jesusii .
Muhtumat sis oskugohte su sániid dihtii , muhto earát eai oskon .
Eai sii soahpan gaskaneaset ja danne earránadde , ja Bávlos celkkii dán ovtta sáni sidjiide : « Dat lei duohta maid Bassi Vuoigŋa sártnui profehta Jesaja bokte din máddariidda : Mana dán álbmoga lusa ja cealkke : Guladettiineattet dii gullabehtet , ehpet ge ádde , oainnedettiineattet dii oaidnibehtet , ehpet ge fuobmá .
Dasgo dán álbmoga váibmu lea buoššuduvvon .
Illá sii gullet beljiiguin , čalmmiideaset sii leat čárven , amaset sin čalmmit oaidnit , sin bealjit gullat , sin váibmu áddet , nu ahte eai jorgalivčče vai mun beasašin buoridit sin .
Dihtet dán ahte dát Ipmila bestojupmi lea vuolggahuvvon báhkiniidda , ja sii gullet ! »
Go son lei cealkán dán , de juvddálaččat vulge eret nákkáhaladettiin garrasit .
Guokte olles jagi Bávlos orui dan visttis man lei láigohan , ja son vuostáiválddii buohkaid geat bohte su lusa .
Son sárdnidii Ipmila riikka ja oahpahii roahkkatvuođain Hearrá Jesus Kristusa birra ii ge oktage hehtten su das .
Dearvvuođat Bávlosis , Jesus Kristusa bálvaleaddjis , gii lea rávkojuvvon apoasttalin ja válljejuvvon sárdnidit Ipmila evangeliuma man Ipmil ovddalgihtii lea lohpidan profehtaidis bokte bassi čállagiin . Dát evangelium muitala su Bártni birra , guhte riegádii olmmožin Dávveda sogas , muhto bassivuođa Vuoiŋŋa mielde son duođaštuvvui Ipmila fámolaš Bárdnin go son bajásčuožžilii jábmiid luhtte : Son lea Jesus Kristus , min Hearrá .
Sus mun lean ožžon árpmu ja apoasttaldoaimma , vai mun su nama gudnin láidešin olbmuid buot álbmogiin oskku gulolašvuhtii .
Sin searvvis lehpet dii ge , geat lehpet rávkojuvvon Jesus Kristusa searvevuhtii .
Mun cealkkán dearvvuođaid didjiide romalaččaide , buohkaide geaid Ipmil ráhkista , geaid son lea rávkan bassi olmmožin .
Árbmu lehkos dinguin ja ráfi Ipmilis , Áhčisteamet , ja Hearrás Jesus Kristusis !
Ovddimustá mun giittán Ipmilan Jesus Kristusa bokte din buohkaid ovddas , dasgo din oskku beakkuhuvvo miehtá máilmmi .
Ipmil , gean mun vuoiŋŋastan bálvalan sárdnidettiinan evangeliuma su Bártni birra , lea mu duođašteaddji ahte mun álo muittán din rohkosiinnán .
Mun rohkadalan ahte viimmat beasašin boahtit din lusa , jos Ipmil dáhttu .
Dasgo mun áibbašan oaidnit din , vai beasašin addit didjiide Vuoiŋŋa attáldagas , ja nu nannet din .
Dát mearkkaša ahte mii searválagaid oažžut arvvosmahttojumi oktasaš oskkus , mii lea sihke din ja mu .
Oskuguoimmit , mun dáhtošin din diehtit ahte mun lean dávjá jurddašan boahtit din lusa , muhto lean hehttejuvvon gitta dássážii . Mun hálidivččen oažžut šattuid maiddái din gaskkas , nugo eará báhkiniid gaskkas ge .
Dasgo mun lean velggolaš sihke greikalaččaide ja barbáraide , oahppan ja oahppameahttun olbmuide .
Dan dihtii sávašin beassat sárdnidit evangeliuma maiddái didjiide geat orrubehtet Romas .
Mun in heahpanatta evangeliumis , dasgo dat lea Ipmila fápmu bestojupmin buohkaide geat oskot , ovddimustá juvddálaččaide ja dasto greikalaččaide .
Dás Ipmila vanhurskkisvuohta almmustuvvá , oskkus oskui , nugo lea čállojuvvon : Vanhurskkis oažžu eallit go osku .
Dasgo Ipmila moarri almmustuvvá almmis ja čuohcá buotlágán ipmilmeahttunvuhtii ja vearrivuhtii , maid olbmot dahket go vearrivuođasteaset hehttejit duohtavuođa .
Dat maid olbmot sáhttet diehtit Ipmila birra , lea sidjiide čalmmus , dasgo Ipmil lea almmustahttán dan sidjiide .
Dasgo su oaidnemeahttun luondu , su agálaš fápmu ja su ipmilvuohta lea oidnojuvvon gitta máilmmi sivdnideami rájes , ja olbmot leat dovdan dan su daguin .
Danne sii leat bealuštusa haga . Vaikko sii dovde Ipmila , de eai gudnejahttán su Ipmilin eai ge giitán su , muhto sin jurdagat šadde guorusin ja sin jierpmehis váimmut sevnnjodedje .
Sii atne iežaset viissisin , muhto sii šadde jallan ja molso nohkameahttun Ipmila hearvásvuođa nohkavaš olbmuid , lottiid , njealjejuolggat elliid ja njoammuid govvan .
Dan dihtii Ipmil attii sin váimmuideaset anistumiid ja nuoskivuođa háldui , nu ahte sii gaskavuođaineaset heahppašuhtte rupmašiiddiset .
Dasgo sii lonuhedje Ipmila duohtavuođa giellásiin ja gudnejahtte ja bálvaledje sivdnádusa sivdnideaddji sadjái , gii lea buressivdniduvvon agálašvuhtii . Amen .
Dan dihtii Ipmil attii sin heahpatlaš himuid háldui .
Nissonat molso lunddolaš sohkabealoktavuođas eahpelunddolaš daguide .
Seammá láhkái olbmát heite lunddolaš sohkabealoktavuođa nissoniiguin ja sis buollájedje baicca himut guhtet guimmiidasaset .
Olbmát nuskošedje olbmáiguin ja ožžo dan ráŋggáštusa man ánssášedje dan čádjádusa dihtii .
Danne go sii eai atnán dan maninge dovdat Ipmila , attii Ipmil sin iežaset árvvohis jurdagiid háldui , vai sii dahket heivemeahttunvuođaid .
Sis lea dievva miela juohke lágán vearrivuohta , furrošeapmi , bahávuohta , ruhtaváibmilvuohta ja gávvilvuohta ; sis lea dievva gáđašvuohta , sorbmenmiella , riidu , beahtus ja baháneahkkánvuohta .
Sii juorrudit , sárdnot sealggebealde , vašuhit Ipmila ja leat veahkaválddálaččat ; sii čeavlástallet , rámppástallet , hutket juohkelágán bahájuonaid ja leat eahpegulolaččat vánhemiiddáseaset ; sii leat jierpmeheamit , oskkáldasmeahttumat , ráhkismeahttumat ja váibmoláđismeahttumat .
Vaikko sii dihtet Ipmila mearrádusa , ahte sii geat dahket nie , ánssášit jápmit , de eai dušše daga dáid ieža , muhto sii rábmojit vel sin geat dahket dakkár daguid .
Danne dus ii leat mihkkege bealuštusaid , don olmmošriehpu guhte dubmet earáid , gii dal juo leaččat ge .
Dasgo go dubmet nuppi , de dubmet iežat , go don han ieš dagat seammá go dat gean dubmet .
Mii diehtit ahte Ipmil dahká rievttuid go dubme sin geat dahket dakkáriid .
Muhto don guhte dubmet sin geat dahket dakkáriid , ja ieš ge dagat seammáid , gáttát go ahte sáhtát vealtat Ipmila duomus ?
Dahje badjelgeahčat go don su geažehis buorrevuođa , guhkesmielalašvuođa ja gierdavašvuođa ?
It go ádde ahte Ipmila buorrevuohta doalvu du jorgalussii ?
Garra ja gáhtameahttun váimmuinat don čohkket moari badjelasat moari beaivvi go Ipmila vanhurskkis duopmu almmustuvvá .
Dalle son máksá juohkehažžii daguid mielde : Sidjiide geat gierdavaččat dahket buori ja ohcet gudni , hearvásvuođa ja nohkameahttunvuođa , son addá agálaš eallima . Muhto sii geat jurddašit dušše iežaset ávkki eai ge čuovo duohtavuođa , muhto vearrivuođa , sii ožžot moari ja ráŋggáštusa .
Áŧestus ja ballu deaivá juohke olbmo gii dahká baháid , ovddimustá juvddálačča ja de greikalačča .
Muhto hearvásvuođa , gudni ja ráfi oažžu juohkehaš gii dahká buori , ovddimustá juvddálaš ja de greikalaš . Dasgo Ipmil ii geahča olbmo hámi beallái .
Sii geat leat suddudan dovddakeahttá lága , mannet maiddái gáđohussii beroškeahttá lágas .
Ja sii geat dovdet lága ja suddudit , dubmejuvvojit lága mielde .
Dasgo Ipmil ii ane vanhurskkisin sin guđet dušše gullet lága , muhto atná baicca vanhurskkisin sin guđet dahket lága mielde .
Go báhkinat geain ii leat láhka , luonddusteaset dahket lága mielde , de sii leat iešalcceseaset láhka , vaikko sis ii leat láhka .
Dákko bokte sii čájehit ahte lága gáibádus lea čállojuvvon sin váimmuide . Maiddái sin oamedovdu duođašta dán , go sin jurdagat jogo váidalit dahje bealuštit sin .
Dát šaddá čielggasin dan beaivvi go Ipmil dubme olbmuid čihkkojuvvon suollemasvuođaid , dan evangeliuma mielde man mun lean ožžon Jesus Kristusis .
Na ba don , gii gal gohčodat iežat juvddálažžan ja luohtát láhkii , don čeavlástalat Ipmiliinnát , don dovddat su dáhtu ja áddet mii lea mávssolaš , danne go leat oahppan lága , don anát iežat čalmmehemiid oahpisteaddjin ja čuovggasin sidjiide geat leat seavdnjadasas , jierpmehemiid bagadeaddjin ja oktageardániid oahpaheaddjin , danne go lágas han dus lea ollislaš diehtu ja duohtavuohta .
Don gii oahpahat earáid , it go iežat ge oahpat ?
Don gii sárdnidat ahte ii galgga suoládit , suoládat go ieš ?
Don gii dajat ahte ii galgga rihkkut náittosdili , rihkut go ieš náittosdili ?
Don gii fasttášat eahpeipmiliid , rievidat go ieš sin tempeliid ?
Don gii čeavlástalat lágain , heahppašuhtát go Ipmila go ieš rihkut lága ?
Dasgo nu han lea čállojuvvon : Din dihtii Ipmila namma bilkiduvvo báhkiniid gaskkas .
Birračuohpahus lea gal dutnje ávkin jos doalat lága .
Muhto jos don rihkut lága , de leat dego birračuohpakeahtes olmmoš .
Jos birračuohpakeahtes olmmoš doallá lága mearrádusaid , ii go son dalle adnojuvvo birračuhppojuvvon olmmožin ?
Olgguldasat son lea birračuohpakeahttá , muhto doallá lága ja dubme du guhte rihkut lága , vaikko dus lea lága bustávva ja leat birračuhppojuvvon .
Dasgo rivttes juvddálaš ii leat son gii olgguldasat lea juvddálaš , ja rivttes birračuohpahus ii leat rupmaša olgguldas mearka .
Muhto rivttes juvddálaš lea son gii lea juvddálaš siskkildasas , ja rivttes birračuohpahus lea váimmu birračuohpahus , mii lea Vuoiŋŋa ii ge bustáva dahku .
Son ii oaččo rámis olbmuin , muhto Ipmilis .
Makkár ovdamunni lea dasto juvddálaččas , dahje mii ávkkiid lea birračuohpahusas ?
Ollu , juohke dáfus !
Ovddimustá ahte Ipmila sátni oskkilduvvui sidjiide .
Muhto mo de jos muhtumat sis leat leamaš oskkáldasmeahttumat ? Sáhttá go sin oskkáldasmeahttunvuohta dahkat Ipmila oskkáldasvuođa duššin ?
Ii eisege !
Ipmil sárdnu álo duođa , vaikko juohke olmmoš livččii gielástalli .
Nugo lea čállojuvvon : Vai don čajehivččet iežat duohtan go sártnut , ja vuoittášit go leat dikkis .
Muhto jos min vearrivuohta čájeha Ipmila vanhurskkisvuođa , maid dat mearkkaša ?
Go sártnun olbmo vuogi mielde , lea go dalle Ipmil vuoigatmeahttun , go diktá moaris deaivat min ?
Ii eisege !
Jos Ipmil lea vuoigatmeahttun , mo son dalle sáhttá dubmet máilmmi ?
Muhto jos mu gielisvuohta šaddá sutnje gudnin go čájeha vel čielgaseabbot ahte Ipmil sárdnu duohtavuođa , manne mun dalle liikká dubmejuvvon suttolažžan ?
Ii goit ášši leat nugo muhtun bilkideaddjit dadjet min oahpahit : « Dahkot fal bahá vai dat šattašii buorrin . »
Ožžoset sii dan duomu man ánssášit .
Mo lea dalle ?
Leat go mii juvddálaččat buoret dilis go báhkinat ?
Eat eisege !
Mii han leat juo čájehan ahte buot olbmot , sihke juvddálaččat ja greikalaččat , leat suttu vuložat .
Nugo lea čállojuvvon : Ii leat oktage vanhurskkis , ii fal ii oktage . Ii leat oktage jierpmálaš , ii oktage guhte ohcá Ipmila .
Buohkat leat čádjidan , buohkat leat dohkkemeahttumat , ii leat oktage guhte dahká buriid , ii fal ii oktage .
Sin čotta lea rabas hávdi , sis leat behtolaš sánit njuokčama alde .
Sis lea gearpmašmirkko baksamiid vuolde , sin njálmmi dievva lea garuhus ja bahčavuohta .
Johtilis julggiiguin sii gáhččet golggahit vara , duššadeapmi ja vártnuhisvuohta čájehit sin luottaid , ráfi geainnu sii eai dovdda . Sii eai leat oahppan ballat Ipmilis .
Mii diehtit ahte buot dat maid láhka cealká , guoská sidjiide geat leat lága vuložat , vai juohke njálbmi buđđojuvvošii ja oppa máilbmi šattašii sivalažžan Ipmila ovddas .
Dasgo Ipmil ii daga vanhurskkisin ovttage dušše danne go dat dahká dan maid láhka gáibida .
Lágas oahppá mii suddu lea .
Muhto dál Ipmil lea almmustahttán vanhurskkisvuođas fuolakeahttá lágas , nugo láhka ja profehtat duođaštit . Dát lea Ipmila vanhurskkisvuohta mii boahtá oskkus Jesus Kristusii , buohkaide geat oskot .
Dás ii leat mihkkege erohusaid , dasgo buohkat leat suddudan , ja sis váilu Ipmila hearvásvuohta . Muhto ánssáškeahttá sii ožžot vanhurskkisvuođa su árpmus , go Kristus Jesus lea lonistan sin .
26 Su lea Ipmil ásahan oaffarin , go son dagai su vara soabahussan sidjiide geat oskot .
Nu lea Ipmil čájehan vanhurskkisvuođas , go guhkesmielalašvuođastis guđii ráŋggáškeahttá vássán áiggiid suttuid .
Muhto dál dán áiggis son čájeha vanhurskkisvuođas , ahte son lea ieš vanhurskkis ja cealká vanhurskkisin su guhte osku Jesusii .
Gos de lea dat mas mii sáhttit rábmot iežamet ?
Buot rápmi lea dušši !
Mii lágaid cealká dan ?
Lea go dat daguid láhka ?
Ii leat , muhto oskku láhka . Dasgo mii diehtit ahte olmmoš dahkkojuvvo vanhurskkisin go osku , láhkadaguid haga .
Vai lea ba gal Ipmil dušše juvddálaččaid Ipmil ?
Ii go son leat maiddái báhkiniid Ipmil ?
De lea , son lea maiddái báhkiniid Ipmil .
Go juo Ipmil lea áidna ja okta , de son cealká vanhurskkisin sihke sin geat leat birračuhppojuvvon jos sii oskot , ja sin geat leat birračuohpakeahttá go sii oskot .
Heaittihit go mii de lága go oskut ?
Eat eisege !
Mii nannet lága .
Maid dát mearkkaša Abrahama , min álbmoga máddara , dáfus ?
Mii šattai su oassin ?
Jos Abraham dahkkojuvvui vanhurskkisin daguidis dihtii , de juoga sus gal livččii mainna rábmot iežas .
Muhto Ipmila ovddas sus ii lean mihkkege maid rábmot .
Maid čála cealká dasa ? Abraham jáhkii Ipmila , ja danne Ipmil anii su vanhurskkisin .
Bargi ii oaččo bálkkás árpmus , muhto ánssášumi mielde .
Muhto jos guhtege geas eai leat dagut , osku sutnje gii cealká ipmilmeahttuma vanhurskkisin , de Ipmil atná su oskku sutnje vanhurskkisvuohtan .
Nu Dávvet ge rámida ávdugassan dan olbmo gean Ipmil atná vanhurskkisin almmá daguid haga : Ávdugasat sii geaid vearredagut leat ándagassii addojuvvon ja geaid suttut leat jávkaduvvon .
Ávdugas dat olmmoš geasa Hearrá ii logahala suttuid .
Guoská go dát ávdugassan máidnojupmi dušše birračuhppojuvvon olbmuide vai maiddái birračuohpakeahtes olbmuide ?
Mii leat juo cealkán ahte Ipmil anii Abrahama oskku sutnje vanhurskkisvuohtan .
Goas dat dáhpáhuvai ?
Lei go ovdal vai maŋŋil go son birračuhppojuvvui ?
Dat lei ovdal go son birračuhppojuvvui .
Son oaččui birračuohpahusa seailamearkan mii duođaštii ahte son adnojuvvui vanhurskkisin go oskkui ovdal juo go birračuhppojuvvui .
Nu lea son buohkaid áhčči geat oskot vaikko eai leat birračuhppojuvvon , vai sii ge adnojuvvošedje vanhurskkisin .
Muhto son lea maiddái sin áhčči geat leat birračuhppojuvvon ; sii eai leat dušše birračuhppojuvvon , muhto maiddái vádjolit oskku geainnu mielde man min áhčči Abraham čuovui ovdal go son birračuhppojuvvui .
Lohpádus Abrahamii ja su nállái ahte sii šaddet máilmmi árbbolažžan , ii addojuvvon danne go Abraham jeagadii lága , muhto danne go son adnojuvvui vanhurskkisin go oskkui .
Jos sii geat čuvvot lága , leat árbbolaččat , dalle han osku ii leat mihkkege ja lohpádus lea duššálaš .
Láhka duddjo moari , muhto lága haga ii leat láhkarihkkun ge .
Dan dihtii son oaččui lohpádusa go oskkui , vai buot addojuvvošii árpmus ja lohpádus bisošii nanusin oppa su nállái , ii dušše sidjiide geat čuvvot lága , muhto sidjiide ge geain lea seammá osku go Abrahamas . Dasgo son lea min buohkaid áhčči , nugo lea čállojuvvon : Mun lean dahkan du ollu álbmogiid áhččin .
Ipmila ovddas son lea min áhčči , ja son oskkui sutnje guhte dahká jábmiid eallin ja gohčču šaddat dan mii ii leat .
Vaikko ii lean doaivva , de Abraham dattege doaivvui ja oskkui ahte son šaddá ollu álbmogiid áhččin , nugo lei celkojuvvon : Nu eatnat šaddá du nálli .
Su osku ii hedjonan go son čuođijahkásažžan diđii ahte su rupmaša návccat ledje nohkan , ja ahte Sárá goaŧŧu lei jápmán .
Son ii lean eahpeoskkolaš ii ge eahpidan Ipmila lohpádusa , muhto son oaččui fámu oskkus ja attii gudni Ipmilii .
Dasgo son lei vissis das ahte Ipmil lei fámolaš dahkat dan maid lei lohpidan .
Dan dihtii Ipmil anii su vanhurskkisin .
Muhto dát sánit ahte Ipmil anii su vanhurskkisin , eai čállojuvvon dušše Abrahama dihtii , muhto maiddái min dihtii .
Ipmil atná vanhurskkisin min guđet oskut sutnje gii bajásčuoččáldahtii Jesusa , min Hearrá , jábmiid luhtte . Son addojuvvui jápmimii min rihkkumiid dihtii ja bajásčuoččáldahttojuvvui vai mii dahkkojuvvošeimmet vanhurskkisin .
Go mii dál leat dahkkojuvvon vanhurskkisin go oskut , de mis lea ráfi Ipmiliin Hearrámet Jesus Kristusa dihtii .
Go mii oskut , de beassat su dihtii dan árbmui mas mii juo leat , ja mii illudit go mis lea dat doaivva ahte mii oažžut oasi Ipmila hearvásvuođas .
Eat ge duššefal dan , muhto mii illudit velá áŧestusaideamet dihtii ge . Dasgo mii diehtit ahte áŧestusat duddjojit gierdavašvuođa , gierdavašvuohta duddjo geahččaluvvon miela , ja geahččaluvvon miella duddjo doaivaga .
Ii ge doaivva heahppašuhte min , dasgo Ipmil lea golggahan ráhkisvuođas min váimmuide Bassi Vuoiŋŋa bokte , gean son lea addán midjiide .
Go mii ain leimmet rašit , de Kristus jámii mearriduvvon áigái ipmilmeahttun olbmuid ovddas .
Illá oktage dáhtošii jápmit oppa vanhurskkis olbmo ovddas ge . Buori olbmo ovddas gal muhtun veajášii jápmit .
Muhto Ipmil čájeha ráhkisvuođas midjiide dan láhkái ahte Kristus jámii min ovddas go mii ain leimmet suttolaččat .
Go son dál lea dahkan min vanhurskkisin go Kristus golggahii varas , de dađe vissáseabbot son beastá min boahttevaš moaris !
Go mii ain leimmet Ipmila vašálaččat , de Ipmila Bártni jápmin soabahii min Ipmiliin .
Dál go mii leat soabahuvvon , de dađe vissáseabbot Bártni eallin beastá min .
Ii ge duššefal dan , muhto mii beassat maiddái rábmot iežamet Ipmilis , Hearrámet Jesus Kristusa dihtii , gii dál lea addán midjiide soabahusa .
Suddu lea boahtán máilbmái ovtta olbmo bokte , ja suttu bokte maiddái jápmin . Ja nie jápmin lea njommon buot olbmuide , danne go buohkat suddudedje .
Suddu lei nappo máilmmis juo ovdal go láhka bođii , muhto suttut eai logahallojuvvo doppe gos ii leat mihkkege lágaid . Almmatge jápmin ráđđii Áttáma rájes Movssesa rádjái sin ge geat eai lean rihkkon Ipmila báhkkoma nugo Áttán .
Ja Áttán vástida su gii galggai boahtit .
Muhto rihkkuma goittotge ii sáhte buohtastahttit árpmuin .
Eatnagat leat gal jápmán dan ovtta olbmo rihkkuma dihtii , muhto Ipmila árbmu lea dađe stuorit ja addojuvvo valljugas attáldahkan nu eatnagiidda dan ovtta olbmo , Jesus Kristusa árpmu dihtii .
Dán attáldaga ii sáhte buohtastahttit dainna mii boahtá ovtta olbmo suttus . Dasgo ovtta olbmo rihkkumuš buvttii dubmehusa , muhto árbmu buvttii friddjavuođa duomu buohkaide guđet ledje jorralan .
Jos ovtta olbmo rihkkun dagahii ahte jápmin ráđđegođii dan ovtta olbmo dihtii , de sii guđet ožžot vanhurskkisvuođa valljugas árpmu ja attáldaga , besset dađe vissáseabbot ráđđet ja eallit dan ovtta olbmo , Jesus Kristusa , dihtii .
Nugo nappo ovtta olbmo rihkkun šattai dubmehussan buot olbmuide , lea ovtta olbmo vanhurskkis dahku šaddan friddjavuođa duopmun ja eallimin buohkaide .
Nugo ovtta olbmo jeaguhisvuohta dagai buohkaid suttolažžan , nu dahká ovtta olbmo gulolašvuohta buohkaid vanhurskkisin .
Láhka bođii máilbmái vai rihkkun šattašii dađe stuoribun .
Muhto gos suddu lea šaddan stuorisin , doppe árbmu lea šaddan vel stuoribun .
Ja nugo suddu lea ráđđen ja buktán jápmima , nu árbmu ráđđe ja buktá vanhurskkisvuođa ja addá agálaš eallima Hearrámet Jesus Kristusa bokte .
Maid mii dása cealkit ?
Bissut go mii ain suttus , vai árbmu šattašii dađe stuoribun ?
Eat eisege !
Mii geat leat jápmán eret suttus , mo mii sáhttit ain eallit das ?
Ehpet go dii dieđe ahte mii buohkat geat gásttašuvvuimet Kristus Jesusii , gásttašuvvuimet su jápmimii ?
Mii nappo hávdáduvvuimet suinna go gásttašuvvuimet jápmimii , vai beasašeimmet eallit ođđa eallima , nugo Áhči hearvásvuohta bajásčuoččáldahtii Kristusa jábmiid luhtte .
Dasgo jos mii leat ovttastahttojuvvon suinna go jápmit nugo son , de mii maiddái ovttastahttojuvvot suinna go bajásčuoččáldahttojuvvot nugo son .
Mii diehtit ahte min boares luondu russiinávlejuvvui suinna , vai suttolaš rumaš duššaduvvo , amamet mii leat šat suttu šlávvan .
Dasgo dat guhte lea jápmán , lea beassan suttu fámus .
Jos mii leat jápmán Kristusiin , de oskut ahte mii maiddái eallit suinna .
Mii han diehtit ahte go Kristus lea bajásčuoččáldahtton jábmiid luhtte , de ii šat jáme , ii ge jápmin šat ráđđe su .
Go son jámii , de son jámii ovtta geardde eret suttus .
Go son dál eallá , de eallá Ipmilii .
Seammá láhkái dii ge galgabehtet atnit iežadet : Dii lehpet jápmán eret suttus , muhto eallibehtet Ipmilii Kristus Jesusis .
Allet nappo divtte suttu ráđđet din jámolaš rupmašis , nu ahte čuovvubehtet dan anistumiid .
Allet ge bija lahtuideattet suttu háldui vearrivuođa gaskaoapmin . Muhto addet iežadet Ipmila háldui , dii guđet lehpet jorgalan jápmimis eallimii ; geavahehket lahtuideattet su bálvalusas , vanhurskkisvuođa gaskaoapmin .
Suddu ii galgga šat ráđđet din , dasgo dii ehpet leat lága , muhto árpmu vuložat .
Maid dat mearkkaša ?
Beassat go mii suddudit , danne go eat leat lága , muhto árpmu vuložat ?
Eat eisege !
Dii diehtibehtet ahte jos bidjabehtet iežadet muhtuma háldui jegolaš šlávvan , de šaddabehtet su šlávvan . Seammá láhkái dii šaddabehtet jogo suttu šlávvan mii doalvu jápmimii , dahje jegolašvuođa šlávvan mii doalvu vanhurskkisvuhtii .
Muhto Ipmilii lehkos giitu !
Dasgo ovdal dii leiddet suttu šlávat , muhto dál jeagadehpet váimmusteattet dan oahpu masa dii oskkilduvvuidet .
Dii čovdojuvvuidet suttus ja lehpet šaddan vanhurskkisvuođa šlávvan . Mun geavahan juohkebeaivválaš giela din oaččálaš headjuvuođa dihtii .
Nugo dii bijaidet lahtuideattet buhtismeahttunvuođa ja lágahisvuođa háldui ja šattaidet lágaheapmin , nu galgabehtet dál bidjat lahtuideattet vanhurskkisvuođa háldui , vai dii šaddabehtet bassin .
Dalle go dii leiddet suttu šlávat , de ehpet sáhttán bálvalit vanhurskkisvuođa .
Maid oaččuidet dalle ?
Šattuid main dál heahpanaddabehtet , dasgo dat buktet jápmima .
Muhto dál go lehpet čovdojuvvon suttus ja lehpet šaddan Ipmila šlávvan , de oažžubehtet šaddun bassindahkkojumi ja loahpas agálaš eallima .
Dasgo suttu bálká lea jápmin , muhto Ipmila árpmuattáldat lea agálaš eallin Kristus Jesusis , min Hearrás .
Oskuguoimmit , dál mun sártnun didjiide guđet dovdabehtet lága , ja dii han diehtibehtet ahte láhka ráđđe olbmo dušše nu guhká go son eallá .
Náitalan nisu lea lága mielde čadnojuvvon boadnjásis nu guhká go boadnjá eallá .
Muhto jos boadnjá jápmá , de son lea čovdojuvvon dan lágas mii čanai su boadnjái .
Jos son addá iežas eará olbmái nu guhká go boadnjá lea eallimin , de son rihkku náittosdili .
Muhto jos boadnjá jápmá , de son beassá eret lága vuolde ii ge rihko náittosdili jos náitala eará olbmáin .
Nu lea maiddái dinguin , oskuguimmiidan .
Kristusa rupmašiin dii ge lehpet jápmán lágas eret vai gulašeiddet earái , sutnje gii bajásčuoččáldahttojuvvui jábmiid luhtte , vai mii šaddadivččiimet šattuid Ipmilii .
Nu guhká go mii eliimet oačči mielde , de láhka bovttii suttolaš anistumiid mat doibme min lahtuin , nu ahte mii šaddadeimmet šattuid jápmimii .
Muhto dál mii leat čovdojuvvon lágas , danne go mii leat jápmán eret dan lágas mii čanai min .
Mii bálvalit Ipmila ođđa vuohkái , Vuoiŋŋa mielde , eat ge nugo ovdal , bustáva mielde .
Maid mii dása cealkit ?
Lea go láhka suddu ?
Ii eisege !
Muhto lága haga in livčče dovdan suttu .
Mun in livčče dovdan anistumi , jos láhka ii livčče cealkán : Don it galgga anistuvvat .
Suddu geavahii báhkkoma ja bovttii mus juohke lágán anistumiid , dasgo lága haga suddu lea jápmán .
Oktii mun ellen lága haga .
Muhto go báhkkon bođii , de suddu fas eallái , ja mun jápmen .
Nu geavai ahte báhkkon mii galggai addit eallima , gárttai munnje jápmimin . Dasgo suddu geavahii báhkkoma ja behtii ja gottii mu dainna .
De láhka lea nappo bassi , ja báhkkon lea bassi , vanhurskkis ja buorre .
Muhto lea go dalle dat mii lea buorre , šaddan munnje jápmimin ?
Ii eisege !
Suddu šattai munnje jápmimin , ja nu dat čájehii mii suddu duođaid lea : Dat buvttii munnje jápmima dainna mii iešalddes lea buorre , vai báhkkon dagašii suttu badjelmearálaš suddun .
Mii diehtit ahte láhka lea vuoiŋŋalaš , muhto ieš mun lean oaččálaš , vuvdojuvvon suttu šlávvan .
Dasgo mun in ádde maid mun ieš dagan .
Mun in daga dan man hálidan , muhto dan man vašuhan .
Muhto jos dagan dan man in hálit , de mieđihan ahte láhka lea buorre .
De in leat šat mun ieš gii dagan dan , muhto suddu mii ássá mu siste .
Dasgo mun dieđán ahte mus , mu oaččis , ii leat mihkkege buriid .
Mun dáhtošin gal dahkat buori , muhto in veaje .
In daga buori man hálidan , muhto dagan bahá man in hálit .
Muhto jos dagan dan man in hálit , de in leat šat mun ieš gii dagan dan , muhto suddu mii ássá mu siste .
Dalle fuomášan dákkár lága : Mun dáhtun dahkat buori , muhto in beasa bahás .
Mu siskkáldas olmmoš illuda Ipmila lága dihtii , muhto mun oainnán eará l@¡ga lahtuinan . Dat soahtá mu miela lága vuostái ja váldá mu fáŋgan suttu lága vuollái mii lea mu lahtuin .
Mun vártnuhis olmmoš !
Gii čoavdá mu dán jápmima rupmašis ?
Ipmilii lehkos giitu Jesus Kristusa , Hearrámet , bokte !
De mun ieš bálvalan nappo Ipmila lága mielainan , muhto suttu lága oččiinan .
De ii leat šat mihkkege dubmehusaid sidjiide geat leat Kristus Jesusis . Dasgo Vuoiŋŋa láhka mii addá eallima Kristus Jesusis , lea čoavdán mu suttu ja jápmima lágas .
Ipmil dagai dan mii lei veadjemeahttun láhkii , danne go dat lei fámuheapmi oačči dihtii . Soabahan dihtii suttu son vuolggahii Bártnis suttolaš olbmo hámis ja dubmii suttu mii lea oaččis , vai lága gáibádus ollašuvašii min siste , guđet eat vádjol oačči mielde , muhto Vuoiŋŋa mielde .
Sis guđet ellet oačči mielde , lea oačči miellaláhki . Muhto sis guđet ellet Vuoiŋŋa mielde , lea Vuoiŋŋa miellaláhki .
Oačči hállu doalvu jápmimii , muhto Vuoiŋŋa hállu doalvu eallimii ja ráfái .
Oačči hállu lea vašálašvuohta Ipmila vuostái , dasgo min oažži ii leat Ipmila lága vuolibuš , ii oppa sáhte ge leat .
Sii guđet ellet oačči mielde , eai sáhte leat Ipmila miela mielde .
Muhto dii ehpet eale oačči mielde , muhto Vuoiŋŋa mielde jos duššefal Vuoigŋa ássá din siste .
Dat geas ii leat Kristusa Vuoigŋa , ii gula sutnje .
Muhto jos Kristus lea din siste , de rumaš lea gal jápmán suttu dihtii , muhto Vuoigŋa addá eallima danne go dii lehpet dahkkojuvvon vanhurskkisin .
Jos dat Vuoigŋa mii boahtá sus guhte bajásčuoččáldahtii Jesusa jábmiid luhtte , ássá din siste , de son guhte bajásčuoččáldahtii Kristusa jábmiid luhtte , maiddái dahká eallin din jámolaš rupmaša Vuoiŋŋainis gii ássá din siste .
Oskuguoimmit , mis ii leat nappo vealgi oažžái , nu ahte dárbbašit eallit dan mielde .
Dasgo jos dii eallibehtet oačči mielde , de jápmibehtet . Muhto jos dii Vuoiŋŋa bokte jámihehpet rupmaša daguid , de eallibehtet .
Buohkat geaid Ipmila Vuoigŋa jođiha , leat Ipmila mánát .
Dii ehpet leat ožžon šlávvavuođa vuoiŋŋa vai dii fas ballagoađášeiddet , muhto dii lehpet ožžon Vuoiŋŋa gii addá mánáid vuoigatvuođa nu ahte mii beassat čuorvut : « Abba !
Áhčážeamet ! »
Vuoigŋa ieš duođašta oktan min vuoiŋŋain ahte mii leat Ipmila mánát .
Jos mii leat mánát , de mii leat árbbolaččat ge , Ipmila árbbolaččat ja árbbolaččat oktan Kristusiin , jos mii duššefal gillát suinna , vai mii maiddái dahkkojuvvošeimmet hearvásin suinna .
Mun dieđán ahte dat maid mii dáppe šaddat gillát , ii leat mihkkege dan hearvásvuođa ektui mii oktii almmustuvvá midjiide .
Buot sivdnádus vuordá áibbašemiin Ipmila mánáid almmustuvvat .
Dasgo sivdnádus lea biddjojuvvon nohkavašvuođa vuollái , ii iežas dáhtu mielde , muhto su dáhtu mielde guhte lei dan vuolidan . Muhto doaivva goit lea ahte maiddái sivdnádus čovdojuvvo nohkavašvuođa šlávvavuođas ja olle dan friddjavuhtii man Ipmila mánát ožžot hearvásvuođas .
Mii diehtit ahte oppa sivdnádus šuohkká ja gillá dego riegádahttinávttain gitta dán beaivvi rádjái .
Ii ge duššefal sivdnádus , muhto maiddái mii ge geat leat ožžon Vuoiŋŋa vuosttaš šaddun , šuohkkit ja áibbašit dan beaivvi maŋŋái go Ipmil addá midjiide mánáid vuoigatvuođa ja dahká min rupmaša friddjan .
Dán doaivaga mielde mii leat bestojuvvon .
Muhto doaivva man oaidná juo ollašuvvan , ii leat šat doaivva .
Mo sáhttá oktage doaivut dan man oaidná ?
Jos mii doaivut dan man eat oainne , de mii vuordit dan gierdavaččat .
Seammá láhkái Vuoigŋa ge veahkeha min min headjuvuođas . Dasgo mii eat dieđe mo galggašeimmet rohkadallat , muhto Vuoigŋa ieš rohkadallá min ovddas cealkemeahttun šuohkahusaiguin .
Ja Ipmil guhte suokkarda váimmuid , diehtá maid Vuoigŋa hálida , dasgo Vuoigŋa rohkadallá bassi olbmuid ovddas Ipmila dáhtu mielde .
Mii diehtit ahte buot boahtá buorrin sidjiide geat ráhkistit Ipmila , sidjiide geaid son lea rávkan áigumušas mielde . Dasgo sin geaid son ovdalis lea dovdan , lea son maiddái ovddalgihtii mearridan hábmet Bártnis gova mielde , vai Bárdni livččii vuosttašriegádeaddji eatnat vieljažiid gaskkas .
Sin geaid son ovddalgihtii lea válljen , lea son maiddái rávkan .
Sin geaid son lea rávkan , lea son maiddái cealkán vanhurskkisin , ja sin geaid son lea cealkán vanhurskkisin , lea son maiddái dahkan hearvásin .
Maid mii dása cealkit ?
Jos Ipmil lea min beale , gii dalle lea min vuostái ?
Son guhte ii seastán Bártnis , muhto attii su min buohkaid ovddas , manne son dalle ii galggaše addit midjiide buot eará ge oktan suinna ?
Gii sáhttá váidalit sin geaid Ipmil lea válljen ?
Ii oktage , go Ipmil lea dat guhte cealká sin vanhurskkisin . Gii sáhttá dubmet sin ?
Ii oktage , go Kristus Jesus lea dat guhte jámii ja velá bajásčuoččáldahttojuvvui ja čohkká Ipmila olgeš gieđa bealde ja rohkadallá min ovddas .
Gii dalle sáhttá earuhit min Kristusa ráhkisvuođas ?
Sáhttá go áŧestus , ballu , doarrádallojupmi , nealgi , álásvuohta , heahti dahje miehkki ?
Nugo lea čállojuvvon : Du dihtii mii goddojuvvot geažos beaivvi , mii adnojuvvot njuovvansávzan .
Muhto buot dáid áŧestusaid badjel son addá midjiide vuoittu , son guhte ráhkistii min .
Dasgo mun lean vissis das ahte ii jápmin ii ge eallin , eai eŋgelat eai ge eará oaivámuččat , eai dat mat leat dál eai ge dat mat bohtet , dahje miige fámuid , eai dat mat leat badjin eai ge dat mat leat čiekŋalasas , sáhte earuhit min Ipmila ráhkisvuođas Kristus Jesusis , Hearrásteamet .
Mun sártnun duođa , mun in gielis , dasgo mun gulan Kristusii , ja mu oamedovdu duođašta Bassi Vuoiŋŋas dan ahte mus lea stuora moraš ja heaittekeahtes bávččas váimmustan .
Mun sávan ahte ieš livččen garuhuvvon ja earuhuvvon Kristusis , jos dat dušše livččii ávkin vieljaidasan ja álbmotguimmiidasan .
Sii han leat israellaččat , ja sidjiide gullá mánáid vuoigatvuohta , Ipmila hearvásvuohta , lihtut , láhka , tempelbálvalus ja lohpádusat ; sidjiide gullet máddarat , geain Kristus lea boahtán olmmožin , son guhte lea Ipmil buot badjel , máidnojuvvon agálašvuhtii . Amen .
Mun in cealkke ahte Ipmila sátni livččii meaddán . Dasgo eai buot israellaččat duođaid gula Israelii , ii ge buot Abrahama nálli leat Abrahama mánát .
Dát mearkkaša ahte eai su lunddolaš mánát leat Ipmila mánát . Muhto dat mánát guđet riegádit Ipmila lohpádusa mielde , adnojuvvojit su nállin .
Dasgo dát lei lohpádus : Boahtte jagi seammá áiggi mun boađán du lusa , ja dalle Sárás lea bárdni .
Ii ge duššefal dat , muhto nu lei maiddái go Rebekka oaččui guokte bártni ovttain olbmáin , min máddariin Issáhiin .
12 Ovdal juo go soai leigga riegádan , go eaba lean dahkan maidege buriid dahje baháid , de Ipmil celkkii Rebekkai : Boarraset šaddá bálvalit nuorabu . Nu galggai Ipmila áigumuš ja válljejupmi bissut nanusin , ii olbmuid daguid dihtii , muhto su dihtii guhte rávká , nugo lea čállojuvvon : Mun ráhkistin Jáhkoba , muhto Esaua mun vašuhin .
Maid mii dása cealkit ?
Lea go Ipmil vuoigatmeahttun go dahká dan ?
Ii eisege !
Son han cealká Movssesii : Mun árpmihan su gean árpmihan , ja lean árbmugas sutnje geasa lean árbmugas .
Ii leat nappo deaŧalaš dat , maid olmmoš dáhttu dahje viggá , muhto dat ahte Ipmil árpmiha .
Dasgo čála cealká faraoi : Mun lean čuoččáldahttán du vai čájehivččen fápmon ja vai mu namma sárdniduvvošii miehtá máilmmi .
Son nappo árpmiha su gean dáhttu , ja buoššuda su gean dáhttu .
Don dáiddát dadjat munnje : « Manne son dalle láitá min jos ii oktage sáhte vuostálastit su dáhtu ? »
Muhto gii leat don , olmmošriehpu , gii duosttat cuiggodit Ipmila ?
Sáhttá go dat mii lea ráhkaduvvon , dadjat ráhkadeaddjái : « Manne don dahket mu dákkárin ? »
Ii go láirálihttedahkki sáhte hábmet láirrá nugo ieš dáhttu , nu ahte son seammá láirrás ráhkada guokte lihti , nuppi čikŋalihttin ja nuppi fas atnulihttin ?
Ja nu lea maiddái Ipmil dahkan go dáhtui čájehit moaris ja almmuhit fámus .
Stuora guhkesmielalašvuođain son sesttii vel daid lihtiid ge maid lei ráhkadan cuvken dihtii moaristis .
Son dáhtui almmustahttit rikkis hearvásvuođas daid lihtiide maid son váibmoláđisvuođastis lea gárvvistan hearvásvuhtii .
Maiddái min ge son lea rávkan dákkár lihttin , ii dušše juvddálaččaid gaskkas , muhto báhkiniid gaskkas ge , nugo son cealká Hosea girjjis : Dán álbmoga mii ii leat mu , gohčodan iežan álbmogin , ja dan moarsi gean in ráhkis , gohčodan iežan ráhkisin .
Ja seammá báikkis gos sidjiide celkojuvvui : Dii ehpet leat mu álbmot , – das sii gohčoduvvojit ealli Ipmila mánnán .
Ja Jesaja čuorvu Israela birra : Vaikko Israela mánát livčče valljugasat dego meara sáddot , de dušše bázahas sis bestojuvvo . Dasgo hoahpus Hearrá ollašuhttá sánis eatnama alde .
Nugo Jesaja ovdal lea cealkán : Jos Hearrá Sebaot ii livčče guođđán midjiide náli , de livččiimet šaddan dego Sodoma , de livččiimet Gomorra láhkásaččat .
Maid mii dása cealkit ?
Mii cealkit ahte báhkinat geat eai bivdán vanhurskkisvuođa , leat ožžon vanhurskkisvuođa , ja dat lea vanhurskkisvuohta mii boahtá oskkus .
Muhto Israel mii faŋuhii lága mii addá vanhurskkisvuođa , ii olahan dan .
Manne ii ?
Danne go dat ii faŋuhan dan oskkuin , muhto daguidisguin .
Sii jorraledje norddastusgeađgái , nugo lea čállojuvvon : Geahča , mun bijan Sionii norddastusgeađggi , bávtti masa olbmot jorralit .
Dat guhte osku sutnje , ii heahppašuva .
Oskuguoimmit , mun sávan oppa váimmustan ja rohkadalan Ipmilii ahte sii bestojuvvošedje . Dasgo mun sáhtán duođaštit sin áŋgiris oskku Ipmilii , muhto sis váilu rivttes áddejupmi .
Dovddakeahttá Ipmila vanhurskkisvuođa sii vigget ráhkadit iežaset vanhurskkisvuođa , ja dan dihtii eai vuollán Ipmila vanhurskkisvuođa vuollái .
Dasgo Kristus lea lága loahppa ja buktá vanhurskkisvuođa juohkehažžii guhte osku .
Movsses čállá dan vanhurskkisvuođa birra man láhka addá : Dat olmmoš guhte doallá lága báhkkomiid , oažžu das eallima .
Muhto vanhurskkisvuohta mii boahtá oskkus , cealká : Ale jurddaš váimmustat : Gii manná bajás albmái ?
– namalassii viežžat Kristusa vuolás – dahje : Gii njiedjá čiekŋalassii ?
– namalassii viežžat Kristusa bajás jábmiid luhtte .
Muhto maid dat dasto cealká ?
Sátni lea du lahka , du njálmmis ja du váimmus , namalassii dat oskku sátni man mii sárdnidit .
Jos don dovddastat njálmmiinat ahte Jesus lea Hearrá , ja oskkut váimmustat ahte Ipmil lea bajásčuoččáldahttán su jábmiid luhtte , de bestojuvvot .
Dasgo váimmu osku doalvu vanhurskkisvuhtii , ja njálmmi dovddastus doalvu bestojupmái .
Čála han cealká : Ii oktage guhte osku sutnje , heahppašuva .
Dasgo ii leat erohus juvddálačča ja greikalačča gaskkas .
Hearrá lea seammá buohkaide , ja su rikkisvuohta ollá buohkaide geat čurvot su .
Dasgo juohkehaš guhte čuorvu Hearrá nama , bestojuvvo .
Muhto mo sii sáhttet čuorvut su geasa eai oskko ?
Mo sii sáhttet oskut sutnje gean birra eai leat gullan ?
Mo sii sáhttet gullat jos ii oktage sárdnit ?
Mo sáhttet geatge sárdnidit jos eai leat vuolggahuvvon ?
Nugo lea čállojuvvon : Man čábbát čudjet sin lávkkit geat buktet buriid ságaid !
Muhto eai buohkat lean gulolaččat evangeliumii .
Dasgo Jesaja cealká : Hearrá , gii oskkui min sárdnái ?
De osku boahtá dan sártnis man olmmoš gullá , ja sárdni boahtá Kristusa sánis .
Muhto mun jearan : Eai go sii leat gullan ?
De leat : Sin jietna lea ollán miehtá máilmmi , sin sánit gitta eatnama ravddaide .
Mun jearan fas : Ii go Israel leat ádden dan ?
Ii leat , Movsses juo cealká : Mun bovttán din gáđašvuođa sin vuostái geat eai leat álbmot . Mun moaráhuhtán din jierpmehis álbmoga vuostái .
Ja Jesaja cealká vel roahkkadeabbot : Sii geat eai lean ohcan mu , gávdne mu . Mun almmustuvven sidjiide geat eai jearahan mu .
Muhto Israela birra son cealká : Geažos beaivvi geaigguhin gieđaidan eahpegulolaš ja nággáris álbmogii .
Mun jearan dalle : Lea go Ipmil hilgon álbmogis ?
Ii eisege !
Dasgo mun han lean ieš israellaš , Abrahama sogas ja Benjamina čearddas .
Ipmil ii leat hilgon álbmogis man oktii válljii alccesis .
Ehpet go dieđe maid čála cealká Elia birra , mo son boahtá Ipmila ovdii ja sivahallá Israela : Hearrá , sii leat goddán du profehtaid ja njeaidán du áltáriid .
Mun lean okto vel báhcán , ja dál sii bivdet mu heakka ge .
Muhto maid Ipmil vástida sutnje ?
Mun lean guođihan alccesan čieža duhát olbmá geat eai leat sojaldahttán čippiideaset Baala ovddas .
Seammá láhkái lea min áiggi ge bázahas man Ipmil lea válljen árpmustis .
Muhto jos dat lea árpmus , de ii leat buriid daguid dihtii .
Muđuid han árbmu ii livčče mihkkege árpmuid .
Maid dat mearkkaša ?
Israel ii leat olahan dan maid lea viggan , muhto sii geat leat válljejuvvon , leat olahan dan .
Earát leat buoššuduvvon , nugo lea čállojuvvon : Ipmil lea addán sidjiide šliettasvuođa vuoiŋŋa , čalmmiid mat eai oainne ja beljiid mat eai gula , gitta dán beaivvi rádjái .
Ja Dávvet cealká : Šaddos sin ávvubeavdi sidjiide giellan ja gillarin , vai sii jorralivčče ja oččošedje ráŋggáštusa .
Sevnnjodehkoset sin čalmmit , amaset sii oaidnit . Sojat sin čielggi álelassii .
De mun jearan : Go sii guossaledje , lei go sin jorralus agibeaivái ?
Ii eisege !
Muhto danne go sii jorraledje , bestojupmi bođii báhkiniidda , ja nu dát bovttii sin gáđašvuođa .
Jos sin jorraleapmi lea šaddan riggodahkan máilbmái , ja sin vádjitvuohta fas riggodahkan báhkiniidda , man ollu stuorit šattašii ge sin riggodat go sin lohku dievvá !
Muhto didjiide báhkiniidda mun cealkkán : Báhkiniid apoasttalin mun anán bálvalussan alla árvvus , vai mun soaittášin boktit mu álbmotguimmiid gáđašvuođa ja dien láhkái beastit muhtumiid sis .
Jos vuosttaš láibi mii oaffaruššo lea bassi , de olles dáigi lea bassi .
Jos ruohtas lea bassi , de oavssit ge leat basit .
Muhto muhtun oavssit leat dál doddjojuvvon eret , ja don gii ledjet villa oljooaksi , leat laktojuvvon albma ovssiid gaskii ja leat ožžon oasi oljomuora ruohttasa máihllis . Muhto ale goarggastala álgoovssiid bálddas !
Jos dagat dan , de muitte ahte it don guotte ruohttasa , muhto ruohtas guoddá du !
Don veaját dadjat : « Duot oavssit doddjojuvvojedje eret vai mun laktojuvvošin daid sadjái . »
Dát lea duohta , muhto sii doddjojuvvojedje eret danne go eai oskon , ja don bisut go oskkut !
Ale čeavlástala , muhto várut ! Jos Ipmil ii seastán lunddolaš ovssiid , de ii seastte du ge .
Geahča mo Ipmil lea sihke buorre ja garas , garas sidjiide geat leat jorralan , muhto buorre dutnje , jos don bisut su buorrevuođas . Muđuid don ge čuhppojuvvot eret .
Muhto maiddái duot earát ge laktojuvvojit murrii , jos sii eai biso eahpeoskkusteaset .
Ipmilis lea fápmu laktit sin fas dasa .
Jos don čuhppojuvvojit eret villa oljomuoras masa don luonddu mielde gullet , ja luonddu vuostái laktojuvvojit buori oljomurrii , eai go dađe vissáseabbot lunddolaš oavssit fas laktojuvvoše iežaset oljomurrii ?
Oskuguoimmit , mun dáhtošin din dovdat dán čiegusvuođa , amadet atnit iežadet viissisin : Oassi Israelas lea buoššuduvvon , dassážii go báhkiniid lohku dievvá , ja dat čohkkejuvvojit .
De olles Israel bestojuvvo , nugo lea čállojuvvon : Beasti boahtá Sionis , son jávkada buot ipmilmeahttunvuođa Jáhkobis , ja dát lea mu lihttu singuin go mun válddán eret sin suttuid .
Evangeliuma dáfus sii leat Ipmila vašálaččat , din dihtii .
Muhto válljejumi dáfus Ipmil ráhkista sin , máddariid dihtii .
Dasgo Ipmil ii gáđa árpmuattáldagaidis ja rávkojumis .
Dii leiddet oktii eahpegulolaččat Ipmilii , muhto dál duoid earáid eahpegulolašvuođa dihtii lea Ipmil árpmihan din .
Seammá láhkái sii leat dál eahpegulolaččat , muhto danne go dii lehpet ožžon váibmoláđisvuođa , de sii ge ožžot váibmoláđisvuođa .
Dasgo Ipmil bijai buohkaid eahpegulolašvuođa vuollái , vai beassá čájehit váibmoláđisvuođa buohkaide .
Man čieŋal lea Ipmila riggodat , viisodat ja diehtu !
Man suokkardallameahttumat leat su duomut , ja man árvitmeahttumat su geainnut !
Gii dovdá Hearrá jurdagiid , gii sáhttá leat su ráđđeaddi ?
Gii lea addán sutnje maidege , man son ferte buhtadit ?
Sus ja su bokte ja sutnje lea buot mii lea .
Sutnje lehkos gudni agálašvuhtii ! Amen .
Oskuguoimmit , mun rávven din danne go Ipmil árkkálmastá min : Buktet rupmašiiddádet ealli , bassi ja Ipmilii dohkálaš oaffarin , ja dát lea din vuoiŋŋalaš ipmilbálvaleapmi .
Allet ge divtte dálá máilmmi báidnit din , muhto nuppástuvvet , nu ahte din miella ođasmahttojuvvošii , vai dii áddešeiddet mii lea Ipmila dáhttu : dat mii lea buorre , dohkálaš sutnje ja ollis .
Danne go Ipmil lea addán munnje árpmu , cealkkán didjiide buohkaide : Allet ane iežadet stuoribun go berrebehtet atnit , muhto lehket jierpmálaččat , juohkehaš dan oskku mihtu mielde man Ipmil lea addán .
Dasgo nugo ovtta rupmašis leat máŋga lahtu , ja buot lahtuin leat iešguđet lágán doaimmat , nu leat mii ge buohkat okta rumaš Kristusis , muhto sierralágaid mii leat guhtet guimmiideamet lahtut .
Mis leat iešguđet lágán árpmuattáldagat , juohkehaččas dan árpmu mielde maid Ipmil lea addán midjiide .
Dat geas lea profehtalaš attáldat , geavahehkos dan oskkus mielde ; dat geas lea bálvalanattáldat , bálvalehkos ; dat geas lea oahpahanattáldat , oahpahehkos ; dat geas lea rávvenattáldat , rávvejehkos ; dat gii addá opmodagastis , addos árvasit ; dat gii lea ovddasčuožžu , lehkos dan áŋgirvuođain ; dat gii dahká váibmoláđis daguid , dahkos dan iluin .
Lehkos din ráhkisvuohta duođalaš . Fasttášehket bahá , dollet gitta das mii lea buorre .
Ráhkistehket guhtet guimmiideattet váimmolaččat dego vieljažat , gilvvohallet gudnejahttimis guhtet guimmiideattet .
Lehket áŋgirat , allet ge leage loikasat , bullos dis Vuoiŋŋa dolla , bálvalehket Hearrá !
Lehket ilolaččat doaivagis , gierdavaččat áŧestusas , bissovaččat rohkadallamis .
Veahkehehket Ipmila olbmuid sin vátnivuođas , lehket guosseláđđásat .
Buressivdnidehket sin geat doarrádallet din , buressivdnidehket , allet ge garut .
Illudehket singuin geat leat illudeamen ja čirrot singuin geat leat čierrumin .
Lehket ovttamielalaččat , allet čeavlástala , muhto servvoštallet dábálaš olbmuiguin , allet viissástala .
Allet mávssat geasage bahá baháin .
Vigget dahkat dan maid olbmot atnet buorrin .
Jos lea vejolaš , de ellet ráfis buohkaiguin nu guhkás go sáhttibehtet .
Ráhkkásiiddán , allet oza liibba mávssahit , muhto diktet Ipmila moari dahkat dan . Dasgo lea čállojuvvon : Duopmu gullá munnje , mun mávssahan , nu cealká Hearrá .
Ja čuožžu velá : Jos du vašálaš lea nealgumin , de atte sutnje borramuša ; jos sus lea goiku , de atte sutnje juhkamuša .
Go dagat dan , de čohkket buolli hilaid su oaivvi ala .
Ale vuoittahala bahái , muhto vuoitte bahá buriin !
Juohkehaš galgá leat eiseválddiid vuolibuš .
Dasgo ii leat eiseváldi mii ii boađe Ipmilis , ja Ipmil lea ásahan daid eiseválddiid mat leat .
Sii guđet vuostálastet eiseválddiid , leat vuostálastimin Ipmila ásahusa , ja sii guđet dahket dan , ožžot duomuset .
Sii guđet dahket buriid , eai dárbbaš ballat ráđđejeddjiin , muhto bahádahkkit fertejit ballat .
Jos hálidat eallit balakeahttá eiseválddis , de daga buriid , ja don oaččut rámi .
Dasgo eiseváldi lea Ipmila bálvaleaddji , dutnje buorrin .
Muhto jos don dagat baháid , de gal fertet ballat .
Ii han dat guotte miehki duššás .
Dat lea Ipmila bálvaleaddji guhte ollašuhttá su ráŋggáštusa bahádahkkái .
Dan dihtii lea dárbbašlaš leat eiseválddi vuolibuš , ii dušše ráŋggáštusa dihtii , muhto oamedovddu dihtii ge .
Danne han dii ge máksibehtet vearu .
Ja ráđđejeaddjit leat Ipmila bálvaleaddjit go dat bearráigehččet buot daid .
Addet juohkehažžii dan mii gullá sutnje : vearu dasa geasa vearru gullá , tuolu dasa geasa tuollu gullá , árvvu dasa geasa árvu gullá , gudni dasa geasa gudni gullá .
Allet šatta geasage velggolažžan , earet dan ahte ráhkistehpet guhtet guimmiideattet .
Dat guhte ráhkista lagamuččas , lea ollašuhttán lága .
Dasgo báhkkomat : it galgga rihkkut náittosdili , it galgga goddit , it galgga suoládit , it galgga anistuvvat , dahje guđe ihkinas báhkkon dal leažžá , dat ovttastahttojuvvojit dán báhkkomii : Don galggat ráhkistit lagamuččat nugo iežat .
Ráhkisvuohta ii daga maidege baháid lagamužžii .
Danne ráhkisvuohta ollašuhttá lága .
Muđuid han dii diehtibehtet mii áiggiid dál lea : Diibmu lea boahtán go dii fertebehtet morihit nahkáriin , dasgo min bestojupmi lea dál lagabus go dalle go mii oskugođiimet .
Idja lea fargga gollan , beaivi lea lahka .
Biddjot dal eret seavdnjadasa daguid ja gárvodehkot čuovgasa vearjjuiguin .
Vádjolehkot dohkálaččat nugo beaivet ; allot borešvuođas ja jugešvuođas , váccešvuođas ja nuoskivuođas , riidduin ja gáđašvuođas .
Muhto gárvodehket Hearrá Jesus Kristusiin , allet ge ane fuola oaččis nu ahte anistumit giktaluvvojit .
Vuostáiváldet su geas lea rašis osku almmá digaštalakeahttá su oaiviliid birra .
Muhtumis lea dakkár osku ahte oažžu borrat buotlágážiid , muhto dat geas lea rašis osku , borrá dušše ruotnasiid .
Dat guhte borrá , ii galgga badjelgeahččat su gii ii daga dan .
Ja dat guhte ii bora , ii galgga dubmet su guhte borrá , dasgo Ipmil han lea vuostáiváldán su .
Mii vuoigatvuođaid dus lea dubmet nuppi olbmo bálvaleaddji ?
Su isit mearrida jogo son čuožžu dahje gahččá .
Muhto son bissu čuoččat , dasgo Hearrás lea fápmu doallat su čuoččat .
Muhtun atná nuppi beaivvi deaŧáleabbon go nuppi , earáide leat buot beaivvit ovttalágánat .
Lehkos juohkehaš nanus jáhkustis .
Dat guhte atná árvvus vissis beaivvi , dahká dan Hearrá gudnin , ja dat guhte borrá , dahká dan Hearrá gudnin ; dasgo son giitá Ipmila .
Seammá láhkái , dat guhte ii bora , dahká dan Hearrá gudnin , ja son ge giitá Ipmila .
Dasgo ii oktage mis eale iežas várás , ii ge oktage jáme iežas várás .
Jos mii eallit , de eallit Hearrá várás , ja jos mii jápmit , de jápmit Hearrá várás .
Jogo mii dal eležat dahje jámežat , de mii gullat Hearrái .
Aiddo dan dihtii Kristus jámii ja eallái fas , vai son sáhtášii leat sihke jábmiid ja elliid Hearrá .
Muhto don , manne dubmet oskuguoimmát , dahje manne badjelgeahčat oskuguoimmát ?
Mii han galgat buohkat Ipmila duopmostuolu ovdii , dasgo lea čállojuvvon : Nu duohta go ealán , cealká Hearrá , juohke čibbi sodjala mu ovddas , ja juohke njuovčča dovddasta Ipmila .
De juohkehaš mis galgá nappo doallat logu Ipmila ovddas .
Dan dihtii , allot šat dubme guhtet guimmiideamet !
Jurddašehket baicca ahte ii oktage galgga jorralahttit oskuguoimmis ja vearránahttit su .
Mun dieđán ja lean vissis Hearrá Jesusis ahte ii mihkkege leat buhtismeahttun iešalddes .
Muhto jos muhtun atná juoidá buhtismeahttumin , de dat lea buhtismeahttun sutnje .
Jos don bávččagahtát oskuguoimmát dainna maid borat , de it šat eale ráhkisvuođa mielde .
Ale divtte du borramuša doalvut gáđohussii su , gean ovddas Kristus jámii .
Allet divtte bilkiduvvot daid buriid maid lehpet ožžon .
Dasgo Ipmila riika ii leat borramuš ja juhkamuš , muhto vanhurskkisvuohta , ráfi ja illu Bassi Vuoiŋŋas .
Dat guhte bálvala Kristusa dán láhkái , lea Ipmila miela mielde ja oažžu olbmuin ge árvvu .
De bivdot dan mii duddjo ráfi ja searvevuođa .
Allet bilit Ipmila dagu borramuša dihtii .
Buot lea gal buhtis , muhto ii leat riekta borrat jos dat vearránahttá oamedovddu .
Dan dihtii lea riekta doalahit borramis bierggu ja juhkamis viinni ja vealtat eará daguin mat jorralahttet du oskuguoimmi .
Divtte dan maid ieš oskkut dán hárrái , leat du ja Ipmila gaskkas .
Ávdugas dat guhte ii dubme iežas go dahká dan maid atná vuoigadin .
Muhto dat guhte eahpida go borrá , lea dubmejuvvon , danne go ii daga dan oskkus .
Buot mii ii dáhpáhuva oskkus , lea suddu .
Mii geat leat nannosat , leat geatnegasat guoddit rašis olbmuid headjuvuođaid eat ge dušše jurddašit iežamet .
Juohkehaš mis galgá jurddašit lagamuččas ja dahkat dan mii lea sutnje buorrin , ja mii nanosmahttá su .
Dasgo Kristus ii jurddašan iežas , muhto nugo lea čállojuvvon : Du hiddjideddjiid hiddjádusat gahčče mu ala .
Buot mii ovdal lea čállojuvvon čállagii , lea čállojuvvon midjiide oahpahussan , vai mii doalašeimmet gitta doaivvusteamet ja oččošeimmet dan gierdavašvuođa ja jeđđehusa maid čála addá midjiide .
Vare Ipmil , gii addá gierdavašvuođa ja jeđđehusa , dagašii din ovttamielalažžan Jesus Kristusa dáhtu mielde , vai dii ovttamielalaččat sáhtášeiddet máidnut Ipmila , Hearrámet Jesus Kristusa Áhči .
Vuostáiváldet dan dihtii guhtet guimmiideattet , nu mo Kristus lea vuostáiváldán din , Ipmilii gudnin .
Mun cealkkán didjiide ahte Kristus šattai sin bálvaleaddjin geat ledje birračuhppojuvvon , ja son dáhtui čájehit ahte Ipmil lea sárdnon duođa .
Dáinna lágiin son nannii daid lohpádusaid mat ledje addojuvvon máddariidda , vai báhkinat ge beasašedje máidnut Ipmila su váibmoláđisvuođa dihtii , nugo lea čállojuvvon : Dan dihtii rámidan du báhkiniid gaskkas ja máinnun du nama .
Lea vel čállojuvvon : Ávvudehket , báhkinat , oktan su álbmogiin !
Ja vel : Máidnot Hearrá , buot báhkinat , rámidehket su , buot álbmogat .
Ja Jesaja cealká : Isaja ruohttasis ihtá vesá , son guhte čuožžila ráđđet buot báhkiniid , sutnje báhkinat bidjet doaivageaset .
Vare Ipmil gii addá doaivaga , deavddášii iluin ja ráfiin din geat oskubehtet , vai dis lassánivččii doaivva Bassi Vuoiŋŋa fámus .
Oskuguimmiidan , mun lean áibbas vissis das ahte dii lehpet dievva buorrevuođas ja dan dieđus mii lea dárbbašlaš , nu ahte dii sáhttibehtet cuiget guhtet guimmiideattet .
Dattege lean čállán didjiide viehka roahkkadit muittuhan dihtii muhtun áššiid . Mun lean dahkan dan danne go Ipmil árpmustis lea gohččon mu vuolgit báhkiniid lusa Kristus Jesusa báhppan .
Ja mu bassi bálvalus lea sárdnidit Ipmila evangeliuma , vai báhkinat šaddet dohkálaš oaffarin maid Bassi Vuoigŋa lea basuhan .
Kristus Jesusis mun sáhtán gal rábmot iežan go bálvalan Ipmila .
Muhto mun in arvva sárdnut eará birra go dan maid Kristus lea doaimmahan mu bokte vai báhkinat dolvojuvvošedje gulolašvuhtii , sániiguin ja daguiguin , mearkkaiguin ja oavdudaguiguin ja Vuoiŋŋa fámuin .
Nu mun lean sárdnidan Kristusa evangeliuma buot báikkiin Jerusalema rájes gitta Illyria rádjái .
Mu áigumuš lea álo leamaš sárdnidit evangeliuma doppe gos Kristusa namma ii leat dovddus , aman hukset dan vuođu ala man earát leat bidjan , nugo lea čállojuvvon : Sii geat eai leat ožžon dieđu su birra , oidnet , ja sii geat eai leat gullan , áddejit .
Dán sivas mun lean máŋgga geardde hehttejuvvon boahtimis din lusa .
Muhto dál mus ii leat šat bargu dáin guovlluin , ja mun lean máŋga jagi hálidan boahtit din lusa go vuolggán Spaniai .
Dohko jođedettiinan mun doaivvun beassat oaidnit din , ja ahte dii veahkehivččiidet mu mátkái , go vuos lean beassan illudit muhtun áiggi din luhtte .
Muhto dál mun vuolggán Jerusalemii bálvalit bassi olbmuid doppe . Dasgo Makedonia ja Akaia searvegottit leat mearridan čohkket attáldaga Jerusalema searvegotti gefiide .
Sii leat ieža mearridan dán , ja sis han lea maid sidjiide vealgi .
Sii leat velggolaččat veahkehit sin áiggálaš buriiguin go báhkinat leat ožžon oasi sin vuoiŋŋalaš buriin .
Dasto go lean gárvvihan dán ja lean dolvon čohkkejuvvon ruđaid sidjiide , de áiggun vuolgit Spaniai ; dalle jođán din bokte .
Ja mun dieđán ahte go boađán din lusa , de mus lea Kristusa valljugas buressivdnádus .
Oskuguoimmit , mun rávven din Hearrámet Jesus Kristusa dihtii ja dan vanhurskkisvuođa dihtii man Vuoigŋa addá : Sohtet muinna nu ahte rohkadallabehtet Ipmilii mu ovddas .
Rohkadallet ahte mun gáddjojuvvošin Judea eahpeoskkolaččaid gieđain , ja ahte Jerusalema bassi olbmot vuostáiválddášedje bures mu bálvalusa .
Dalle sáhtášin boahtit din lusa iluin , ja beassat din luhtte vuoiŋŋastit jos Ipmil dáhttu .
Ráfi Ipmil lehkos dinguin buohkaiguin !
Amen .
Mun rávven didjiide min oappá Febe , guhte lea Kenkrea searvegotti bálvaleaddji .
Váldet su vuostái Hearrá nammii , nugo lea heivvolaš bassi olbmuide .
Addet sutnje dan veahki man dárbbašeš , dasgo son lea ieš veahkehan olusiid , maiddái mu ge .
Celket dearvvuođaid Priskai ja Akvilai , mu bargoguoimmi guoktái Kristus Jesusis . Soai leaba mannan heakkavárrii mu dihtii .
In dušše mun , muhto maiddái buot báhkiniid searvegottit giitet sudno .
Celket maiddái dearvvuođaid searvegoddái mii čoaggana sudno vissui .
Celket dearvvuođaid mu ráhkis Epainetosii , gii lei Asia eanangotti vuosttaš šaddu Kristusii .
Celket dearvvuođaid Márjái gii lea rahčan din gaskkas .
Celket dearvvuođaid Andronikosii ja Juniasii , geat leaba juvddálaččat nugo mun ja mu fáŋgaguoimmit .
Sudnos lea buorre beaggin apoastaliid gaskkas , ja soai šattaiga kristtalažžan ovdal go mun .
Celket dearvvuođaid Ampliatusii , mu ráhkis oskuvilljii .
Celket dearvvuođaid Urbanusii , min bargoguoibmái Kristusa bálvalusas , ja mu ráhkis Stakysii .
Celket dearvvuođaid Apellesii gii lea geahččaluvvon kristtalaš .
Celket dearvvuođaid Arostobulos gázzái .
Celket dearvvuođaid Herodionii , gii lea juvddálaš nugo mun .
Celket dearvvuođaid sidjiide Narkissosa joavkkus guđet gullet Hearrái .
Celket dearvvuođaid Tryfainai ja Tryfosai geat bargaba Hearrá bálvalusas .
Celket dearvvuođaid ráhkis Persisii , gii lea bargan ollu Hearrá bálvalusas .
Celket dearvvuođaid Rufusii , gean Hearrá lea válljen , ja maiddái su eadnái , gii lea leamaš dego eadni munnje ge .
Celket dearvvuođaid Asynkritosii , Flegonii , Hermesii , Patrobasii , Hermasii ja daidda oskuguimmiide geat leat singuin .
Celket dearvvuođaid Filologosii , Juliasii , Nereusii ja su oabbái , ja maiddái Olympasii ja buot bassi olbmuide geat leat singuin .
Dearvvahallet guhtet guimmiideattet bassi cummáin .
Buot Kristusa searvegottit celket didjiide dearvvuođaid .
Oskuguoimmit , mun rávven din : Váruhehket sis geat dagahit riidduid ja jorralahttet earáid go sii vuostálastet dan oahpu man dii lehpet vuostáiváldán .
Gáidet eret sis .
Dasgo dakkár olbmot eai bálval min Hearrá Kristusa , muhto iežaset čoavjji .
Čáppa ja fillejeaddji sániiguin sii čádjidahttet oktageardánis olbmuid .
Muhto buohkat leat gullan man jegolaččat dii lehpet , ja danne mun illudan din dihtii . Mun hálidan ahte dii livččiidet jierpmálaččat , nu ahte dieđášeiddet mii lea buorre , muhto oktageardánat dan dáfus mii lea bahá .
Vare ráfi Ipmil fargga cuvkešii Sáhtána din julggiid vuollái !
Hearrámet Jesus Kristusa árbmu lehkos dinguin !
Timoteus , mu bargoguoibmi , ja Lukios , Jason ja Sosipatros , geat leaba juvddálaččat nugo mun , celket didjiide dearvvuođaid .
Mun ge , Tertius , guhte lean čállán dán girjji , cealkkán didjiide dearvvuođaid Hearrá nammii .
Gaius , gii lea rahpan viesus munnje ja oppa searvegoddái , cealká didjiide dearvvuođaid .
Erastos , gávpoga rehketdoalli , ja min oskuviellja Kvartus cealkiba didjiide dearvvuođaid .
Hearrámet Jesus Kristusa árbmu lehkos dinguin buohkaiguin !
Amen .
Máidnojuvvon lehkos Ipmil , son geas lea fápmu nanosmahttit din evangeliumiin man mun sárdnidan , ja mii lea sáhka Jesus Kristusa birra .
Dan čiegusvuohta lea leamaš čihkkojuvvon agálaš áiggiid rájes , muhto dál dat lea almmustuvvan profehtalaš čállosiin ja agálaš Ipmila gohččuma mielde , vai buot álbmogat dolvojuvvošedje oskku gulolašvuhtii .
Sutnje , áidna viissis Ipmilii , lehkos gudni álo ja agálašvuhtii Jesus Kristusa bokte ! Amen .
Dearvvuođat Bávlosis , gii Ipmila dáhtu mielde lea rávkojuvvon Jesus Kristusa apoasttalin , ja min oskuvieljas Sostenesas Ipmila searvegoddái Korintas , sidjiide geaid Kristus Jesus lea basuhan ja geat leat rávkojuvvon Ipmila bassi olmmožin oktan singuin geat juohke báikkis čurvot min Hearrá Jesus Kristusa nama , su gii lea sin ja min Hearrá .
Árbmu lehkos dinguin ja ráfi Ipmilis , Áhčisteamet , ja Hearrás Jesus Kristusis !
Mun giitalan álo Ipmilan din ja dan árpmu ovddas maid son lea addán didjiide Kristus Jesusis .
Su siste dii lehpet ožžon riggodaga juohke dáfus , sárdnidanattáldaga ja dieđu . Dasgo duođaštus Kristusa birra lea nanosmahttojuvvon din siste , nu ahte dis ii váillo mihkkege árpmuattáldagaid dan botta go vuordibehtet min Hearrá Jesus Kristusa almmustuvvama .
Son maiddái nanosmahttá din gitta loahpa rádjái , vai dii livččiidet láitemeahttumat Hearrámet Jesus Kristusa beaivvi .
Ipmil lea oskkáldas , son gii lea rávkan din Bártnis Jesus Kristusa , min Hearrá , searvevuhtii .
Oskuguoimmit , mun rávven din Hearrámet Jesus Kristusa nammii čájehit soabalašvuođa ja vealtat soahpameahttunvuođain . Ellet nana searvevuođas seammá áigumušain ja mielain .
Dasgo Kloegázzi leat muitalan munnje , oskuguimmiidan , ahte din gaskkas leat riiddut , namalassii nu ahte muhtumat dis dadjet : « Mun čuovun Bávlosa » , dahje : « mun čuovun Apollosa » , dahje : « mun čuovun Kefasa » , dahje « mun gis čuovun Kristusa » .
Lea go Kristus juogaduvvon ?
Russiinávlejuvvui go Bávlos din ovddas ?
Dahje gásttašuvvuidet go dii Bávlosa nammii ?
Mun giittán Ipmila go in leat gásttašan geange dis earet Krispusa ja Gaiusa , amas oktage dadjat didjiide ahte dii gásttašuvvuidet mu nammii .
Lean mun gal gásttašan Stefanasa ja buohkaid su dálus , muđuid in muitte gal geange eará gásttašan .
Dasgo Kristus ii leat vuolggahan mu gásttašit , muhto sárdnidit evangeliuma ; in ge daga dan viisodaga sániiguin amas Kristusa ruossa massit fámus .
Dasgo sátni ruossa birra lea jallavuohta sidjiide geat mannet gáđohussii , muhto midjiide geat bestojuvvot , dat lea Ipmila fápmu .
Dasgo lea čállojuvvon : Mun duššadan viisáid viisodaga , ja jierpmálaččaid jierpmálašvuođa dagan duššin .
Gos dál lea viissis , čálaoahppavaš ja dálá máilmmi viissástalli ?
Ii go Ipmil leat dahkan dán máilmmi viisodaga jallodahkan ?
Vaikko Ipmil čájehii viisodagas , de máilbmi ii iežas viisodagas oahppan dovdat Ipmila . Dan dihtii Ipmil dáhtui min sárdnidit jallavuođa ja nu beastit sin guđet oskot .
Juvddálaččat gáibidit mearkkaid , ja greikalaččat ohcet viisodaga , muhto mii sárdnidit russiinávlejuvvon Kristusa . Juvddálaččaid mielas dát lea vearránus ja báhkiniid mielas jallavuohta , muhto sidjiide geat leat rávkojuvvon , sihke juvddálaččaide ja greikalaččaide , mii sárdnidit ahte Kristus lea Ipmila fápmu ja Ipmila viissisvuohta .
Dasgo Ipmila jallodat lea viisáset go olbmuid viisodat , ja Ipmila headjuvuohta gievrrat go olbmuid gievravuohta .
Oskuguoimmit , muitet geat dii ieža leiddet dalle go dii rávkojuvvuidet . Olbmuid mielas eai lean ollu viisát din gaskkas , eai fámolaččat eai ge olusat alla sogas .
Muhto dan mii máilmmis adnojuvvo jallodahkan , lea Ipmil válljen heahppašuhttit viisáid . Dan mii máilmmis adnojuvvo headjun , lea Ipmil válljen heahppašuhttit dan mii lea fámolaš .
Dan mii máilmmis adnojuvvo vuollegažžan , mii badjelgehččojuvvo , mii ii leat mihkkege , dan lea Ipmil válljen dahkat duššin dan mii adnojuvvo maninge , amas oktage olmmoš rábmot iežas Ipmila ovddas .
Su dahku dat lea ahte dii lehpet Kristus Jesusis . Su lea Ipmil dahkan min viisodahkan , vanhurskkisvuohtan , bassindahkkojupmin ja lonástussan , vai dat guhte rábmo iežas , rábmojehkos Hearrástis , nugo lea čállojuvvon .
Oskuguoimmit , go mun bohten din lusa , de in sárdnidan didjiide Ipmila čiegusvuođa goargadis sániiguin dahje viisodagain .
Dasgo mun mearridin ahte in hálidan diehtit maidege eará din gaskkas go Jesus Kristusa , russiinávlejuvvon Kristusa .
Mun ledjen headju ja balus ja doarggistin sakka go ledjen din luhtte .
Mun in sárdnidan olmmošlaš viisodaga sániiguin , muhto Vuoiŋŋa ja fámu duođaštusain , amas din osku vuođđuduvvot olbmuid viisodahkii , muhto Ipmila fápmui .
Liikká mii sárdnidit viisodaga sidjiide geat leat rávásman vuoiŋŋalaččat . Muhto dat viisodat ii gula dálá máilbmái ii ge dálá máilmmi ráđđejeddjiide geat duššet .
Mii sárdnidit Ipmila čiegus viisodaga mii lea leamaš čihkkojuvvon dán rádjái , muhto Ipmil lei juo ovdal áiggiid álggu mearridan ahte dat galggai doalvut min hearvásvuhtii .
Ii oktage dán máilmmi ráđđejeddjiin leat dovdan dán viisodaga . Jos sii livčče dovdan dan , de eai livčče russiinávlen hearvásvuođa Hearrá .
Muhto nugo lea čállojuvvon : Dan maid ii oktage čalbmi leat oaidnán ii ge oktage beallji gullan , dan mii ii leat badjánan ovttage olbmo váibmui , buot dan lea Ipmil gárvvistan sidjiide geat ráhkistit su .
Dán lea Ipmil almmustahttán midjiide Vuoiŋŋainis .
Dasgo Vuoigŋa suokkarda buot , maiddái Ipmila čikŋodaga ge .
Gii earáid go olbmo iežas vuoigŋa diehtá mii lea olbmo siste ?
Seammá láhkái dušše Ipmila Vuoigŋa diehtá mii lea Ipmila siste .
Mii eat leat ožžon máilmmi vuoiŋŋa , muhto Ipmila iežas Vuoiŋŋa , vai mii áddešeimmet dan maid Ipmil lea addán midjiide árpmustis .
Dán birra mii eat sártno sániiguin maid olbmo viisodat lea oahpahan midjiide , muhto sániiguin maid Vuoigŋa lea oahpahan midjiide . Dasgo dan mii gullá Vuigŋii , mii čilget Vuoiŋŋa sániiguin .
Luonddustis olmmoš ii sáhte ipmirdit dan mii boahtá Ipmila Vuoiŋŋas .
Sutnje dat lea jallavuohta , ii ge son sáhte áddet dan , danne go dan ferte árvvoštallat vuoiŋŋalaččat .
Muhto vuoiŋŋalaš olmmoš sáhttá árvvoštallat buot , muhto su ii sáhte oktage árvvoštallat .
Dasgo : Gii dovdá Hearrá miela nu ahte sáhtášii rávvet su ?
Muhto mis lea Kristusa miella .
Dattege , oskuguoimmit , mun in sáhttán sárdnidit didjiide nugo vuoiŋŋalaš olbmuide , muhto mun fertejin sárdnidit didjiide nugo oaččálaš olbmuide , geaid osku Kristusii lea dego beallešattot mánážiid osku .
Mun bibmen din milkkiin in ge álbmás borramušain , dasgo daid ehpet livčče vel gierdan .
Ehpet ge gierdda dan velá dál ge , dasgo ain han dii lehpet oaččálaččat .
Go juo din gaskkas lea gáđašvuohta ja riidu , dalle han oažži ráđđe din siste . Ehpet go dalle meannut dábáláš olbmuid láhkái ?
Go nubbi dadjá : « Mun čuovun Bávlosa » ja nubbi : « Mun čuovun Apollosa » , ehpet go dalle leat nugo buot eará olbmot ?
Mii lea dasto Apollos , ja mii lea Bávlos ?
Soai leaba dušše bálvaleaddjit geat veahkeheigga din oskut , goappašagat dan doaimmas man Hearrá attii sutnje .
Mun gilven , Apollos láktadii ; muhto Ipmil šaddadii .
Dan dihtii gilvi ii leat mihkkege ii ge láktadeaddji ge , muhto dušše Ipmil gii šaddada .
Gilvi ja láktadeaddji bargaba ovttas , muhto soai oažžuba bálkká goabbáge barggustis .
Dasgo mii leat Ipmila bargoguoimmit , ja dii lehpet Ipmila bealdu , Ipmila viessu .
Ipmila árpmu mielde lean mun , čeahpes huksejeaddji , bidjan vuođu , ja muhtun eará hukse dan vuođu ala .
Muhto juohkehaš gehččos mo son hukse .
Ii oktage sáhte bidjat eará vuođu go dan mii lea biddjojuvvon , ja dat lea Jesus Kristus .
Jos muhtumat huksejit dan vuođu ala gollis , silbbas dahje divrras geđggiin , muoras , suinniin dahje oalggain , de áiggi mielde šaddá almmusin mo iešguhtege lea huksen .
Duopmobeaivvi dat šaddá almmusin , dasgo dat beaivi almmustuvvá dolas , ja dolla geahččala makkár iešguđege duodji lea .
Dat gean viessu bissu , oažžu bálkká .
Dat gean viessu buollá , son massá bálkká .
Ieš son gal bestojuvvo , muhto almmatge dego dola čađa .
Ehpet go dieđe ahte dii lehpet Ipmila tempel , ja ahte Ipmila Vuoigŋa orru din siste ?
Jos oktage bilideažžá Ipmila tempela , de Ipmil duššada su . Dasgo Ipmila tempel lea bassi , ja dat tempel lehpet dii.
Allos oktage behtto iežas !
Jos oktage dis navddeš iežas viissisin dálá máilmmi árvvoštallamiid mielde , de šaddos son vuos jallan , vai son duođaid šattašii viissisin .
Dasgo dán máilmmi viisodat lea jallodat Ipmila čalmmiin , nugo lea čállojuvvon : Son giellá viisáid sin iežaset gávvilvuhtii , ja : Hearrá dovdá viisáid jurdagiid ja diehtá ahte dat leat duššálaččat .
Danne allos oktage rábmojehko iežas das mii gullá olbmui .
Buot han gullá didjiide , lehkos dal Bávlos , Apollos dahje Kefas , máilbmi , eallin dahje jápmin , dat mii lea dál dahje dat mii boahtá – buot lea din .
Muhto dii gullabehtet Kristusii , ja Kristus gullá Ipmilii .
Atnet min dasto Kristusa bálvaleaddjin ja dállodoallin geaidda Ipmila čiegusvuođat leat oskkilduvvon .
Dain geaidda juoga lea oskkilduvvon , gáibiduvvo ahte sii leat oskkáldasat .
Muhto munnje ii mearkkaš maidege gii mu dubme , dii dahje mii nu olbmuid duopmostuoluid .
In mun ieš ge dubme iežan .
Mu oamedovdu lea buhtis , muhto ii dat dattege mearkkaš ahte mun livččen sivaheapmi .
Mu duopmár lea Hearrá .
Allet dan dihtii dubme ovdal áiggi , ovdal go Hearrá boahtá .
Son bidjá čuovgga ovdii dan mii lea čihkkojuvvon seavdnjadassii , ja almmustahttá olbmuid váimmuid jurdagiid .
Dalle juohkehaš oažžu rámi Ipmilis .
Oskuguoimmit , din dihtii mun lean geavahan iežan ja Apollosa ovdamearkan , vai dii oahpašeiddet munnos maid dát sátni mearkkaša : « Bissot das mii lea čállojuvvon ! » amas oktage čeavlásvuođas rábmot nuppi ja fuotnut nuppi .
Gii bidjá du earáid ovddabeallái ?
Mii dus lea maid don it leat ožžon attáldahkan ?
Ja jos leat ožžon dan , manne dalle rábmot dego ii livčče attáldat ?
Muhto dii lehpet juo gallásat ! Dii lehpet juo riggát ! Dii lehpet juo šaddan gonagassan , muhto mii eat !
Vare duođaid livččiidet gonagasat vai mii beasašeimmet ráđđet dinguin !
Mu mielas orru ahte Ipmil lea bidjan min , apoastaliid , vuolimužžii , dego livččiimet dubmejuvvon jápmit árenas ; mii leat šaddan máilmmi , eŋgeliid ja olbmuid čájáhusgálvun .
Mii leat jallat Kristusa dihtii ; dii lehpet viisát Kristusis .
Mii leat heajut ; dii lehpet gievrrat .
Din gudnejahttet ; min badjelgehččet .
Velá dán bottus ge mis lea nealgi ja goiku ; mis váilot biktasat ; min illástit ja mii leat ruovttoheamit .
Mii bargat rahčat gieđaideametguin .
Go min bealkkihit , de mii buressivdnidit ; go min doarrádallet , de mii gierdat dan ; go min bilkidit , de mii vástidit ustitlaččat .
Mii leat šaddan máilmmi hilggohassan , buohkaid suohpahassan gitta dán beaivvi rádjái .
Mun in čále dán heahppašuhttin dihtii din , muhto cuigen dihtii , dego ráhkis mánáidan .
Vaikko dis ležžet ge duháhat oahpaheaddjit geat bagadit din kristtalašvuođas de dis dattege eai leat máŋga áhči .
Mun dat šadden din áhččin Kristus Jesusis go adden didjiide evangeliuma .
Nu ba rávven din : Atnet mu ovdagovvan !
Dan dihtii mun vuolggahin din lusa Timoteusa , gii lea mu ráhkis ja oskkáldas bárdni Hearrás ; son muittuha didjiide mo mun dáhtun din vádjolit kristtalažžan , nugo mun oahpahan juohke báikkis , buot searvegottiin .
Muhtumat dis leat čeavlástallagoahtán danne go sii jáhkket ahte mun in máhca din lusa .
Muhto mun áiggun boahtit fargga , jos Hearrá dáhttu . Dalle beasan oahpásmuvvat dáid čeavlás olbmuid fápmui , in dušše sin sániide .
Dasgo Ipmila riika ii boađe albmosii sátnin , muhto fápmun .
Goappá dii hálidehpet , ahte mun boađán din lusa rissiin dahje ráhkisvuođain ja láđisvuođain ?
Mun lean gullan ahte din gaskkas lea fuorrávuohta , ja velá dakkár ge fuorrávuohta man eai báhkinat ge dohkket , namalassii ahte olmmái eallá eadnebeliinis .
Ja das vel čeavlástallabehtet ! Dii galggašeiddet baicca moraštit ja ádjit eret su gii lea dahkan dákkáriid .
Vaikko mun in leat din luhtte rumašlaččat , de goit vuoiŋŋas lean lahka ; ja dego ieš livččen das de lean juo mearridan maid sivalažžii galgá dahkat .
Go dii čoagganehpet Hearrámet Jesusa nammii , ja mun lean dinguin vuoiŋŋas , ja Hearrá Jesusa fápmu lea mielde , de addet dan olbmo Sáhtánii , vai su oažži duššaduvvošii ja su vuoigŋa bestojuvvošii Hearrá beaivvi .
Dis ii duođaid leat mainna čeavlástallat !
Ehpet go dieđe ahte uhca suvrradáiggáš suvruda olles dáiggi ?
Čorgejehket eret boares suvrradáiggi , vai dii livččiidet ođđa dáigi ! Dii han lehpet juo suvrrokeahtes láibbit . Dasgo Kristus , min beassášláppis , lea njuvvojuvvon .
De ávvudehkot allabasiid , allot bahávuođa ja dohkkemeahttunvuođa boares suvrradáiggiin , muhto buhtisvuođa ja duohtavuođa suvrrokeahtes láibbiin .
Mun čállen didjiide juo ovddit girjjistan ahte dis ii galgga leat mihkkege dahkamušaid furrošeddjiiguin .
In mun oaivvildan dán máilmmi furrošeddjiid dahje ruhtaváibmiliid , suollagiid dahje eahpeipmilbálvaleddjiid . Dalle han dii fertešeiddet vuolgit eret dán máilmmis .
Mun čállen didjiide ahte dis ii galgga leat mihkkege dahkamušaid dakkáriin gii mahkáš lea oskuguoibmi , muhto eallá fuorrávuođas , lea ruhtaváibmil , bálvala eahpeipmiliid , lea bilkár , juhkki dahje suola .
Dakkár olbmo searvvis ehpet galgga oppa boradit ge .
Mii vuoigatvuođaid mus lea dubmet sin geat leat olggobealde ?
Ieža han dii ge dubmebehtet sin geat gullet din searvái .
Ipmil dubme sin geat leat olggobealde .
Ádjet eret iežadet luhtte su gii lea bahá .
Go muhtumis dis lea riidoášši oskuguimmiin , mo son jolggada bidjat dan báhkinlaš duopmáriid ovdii ii ge bassi olbmuid ovdii ?
Ehpet go dieđe ahte bassi olbmot šaddet dubmet máilmmi ?
Jos dii oažžubehtet dubmet máilmmi , ehpet go dalle sáhte dubmet smávva áššiid ?
Ehpet go dieđe ahte mii šaddat dubmet eŋgeliid ?
Manne dalle eat sáhtáše dubmet dán eallima áššiid .
Muhto jos dis leat dakkár áššit , manne de bidjabehtet daid dakkár olbmuid ovdii guđet eai adnojuvvo árvvus searvegottis ?
Mun cealkkán dan didjiide heahpadin !
Ii go din gaskkas leat oktage gii lea nu viissis ahte sáhttá čoavdit riiddu oskuguimmiid gaskkas ?
Ii , oskuguoibmi doalvu oskuguoimmi dikki ovdii ja diktá velá eahpeoskkolaš duopmáriid dubmet .
Didjiide lea heahpadin ahte dis leat diggeáššit gaskaneattet .
Manne dii ehpet baicca gillá vearrivuođa ?
Manne ehpet baicca divtte iežadet vuoittahallat ?
Muhto dii verrošehpet ja rivvebehtet earáin , ja dát dáhpáhuvvá velá oskuguimmiid gaskkas !
Ehpet go dieđe ahte vearredahkkit eai árbe Ipmila riikka ?
Allet čádjádala !
Ipmila riikka eai árbe furrošeaddjit , eahpeipmiliid bálvaleaddjit , náittosdilirihkkut , eai olbmát geat diktet eará olbmáid anašit iežaideasetguin , eai ge olbmát geat nuskošit olbmáiguin , eai suollagat , eai ruhtaváibmilat , eai juhkkit , eai bealkálasat eai ge rievvárat . Ovdal ledje muhtumat dis dakkárat .
Muhto dál dii lehpet bassojuvvon buhtisin ; dii lehpet basuhuvvon ; dii lehpet dahkkojuvvon vanhurskkisin Hearrá Jesus Kristusa nammii ja min Ipmila Vuoiŋŋas . Daddjojuvvo gal ahte buot lea munnje lobálaš .
Lehkos nu , muhto ii buot leat ávkkálaš .
Lehkos dal nu ahte buot lea lobálaš , muhto mun in divtte mange stivret iežan .
Daddjojuvvo maiddái ahte borramuš lea čoavjji várás , ja čoavji borramuša várás . Lehkos nu , muhto Ipmil dahká goappašagaid duššin !
Rumaš ii leat furrošeami várás ; dat lea Hearrá várás , ja Hearrá lea rupmaša várás .
Ipmil bajásčuoččáldahtii Hearrá jábmiid luhtte , ja son bajásčuoččáldahttá min ge fámuinis .
Ehpet go dieđe ahte din rupmašat leat Kristusa lahtut ?
Áiggošin go mun váldit Kristusa lahtuid ja dahkat daid fuorrálahttun ?
In eisege !
Dahje ehpet go dieđe ahte dat gii ovttastuvvá fuoráin , šaddá oktan rumašin suinna ?
Lea celkojuvvon : « Soai šaddaba oktan oažžin . »
Muhto dat gii ovttastuvvá Hearráin , šaddá oktan vuoigŋan suinna .
Fasttášehket furrošeami !
Buot suddu maid olmmoš muđuid dahká , lea rupmaša olggobealde . Muhto furrošeaddji sudduda iežas rupmaša vuostái .
Ehpet go dieđe ahte din rumaš lea Bassi Vuoiŋŋa tempel ? Vuoigŋa ássá din siste , ja dii lehpet ožžon su Ipmilis .
Dii ehpet gula šat alcceseattet , dasgo dii lehpet divrasii ostojuvvon .
Gudnejahttet dan dihtii Ipmila rupmašiinnádet !
Mun válddán dál daid áššiid maid dii čáliidet , ahte olbmái lea mahkáš buorre orrut almmá guoskkatkeahttá nissona .
Muhto vealtan dihtii fuorrávuođas de lehkos juohke olbmás iežas áhkká ja juohke nissonis iežas boadnjá .
Addos boadnjá áhkkásis dan man son lea geatnegas , ja nu gis maiddái áhkká boadnjásis .
Áhká rumaš ii leat iežas hálddus , muhto boatnjá .
Seammá láhkái boatnjá rumaš ii leat iežas hálddus , muhto áhká .
Alli biehttal eallimis ovttas goabbat guimmiineatte , jos juo eahppi leat šiehttan nu muhtun áigái , vai doai beasašeidde čiekŋut rohkadussii ja dasto ealligoahtit fas ovttas .
Muđuid Sáhtán geahččala dudno danne go eahppi liikká veaje soahtat himuideatte vuostái .
Dát maid mun cealkkán , lea dušše mieđiheapmi ii ge gohččun .
Mun sávašin ahte buohkat ealášedje dego mun .
Muhto juohkehaš lea ožžon árpmuattáldagas Ipmilis , nubbi dán , nubbi duon .
Náitalkeahtes olbmuide ja leaskkaide mun cealkkán ahte sidjiide livččii buorre bissut náitalkeahttá nugo mun .
Muhto jos sii eai veaje caggat himuideaset , de berrejit náitalit .
Dasgo lea buoret náitalit go buollit himuin .
Náitalan olbmuide mus lea dákkár gohččun , ii mus alddán , muhto Ipmilis , ahte nisu ii oaččo earránit boatnjástis .
Muhto jos son earráneš , de galgá eallit náitalkeahttá dahje soabadit boatnjáinis .
Ii ge olmmái oaččo earránit áhkástis .
Earáide mun cealkkán – dát leat mu iežan sánit , eai ge Hearrá sánit : Jos oskuvieljas leš eahpeoskkolaš áhkká , ja áhkká hálida bissut su luhtte , de olmmái ii galgga earránit sus .
Ja jos nissonis leš eahpeoskkolaš boadnjá , ja olmmái hálida bissut su luhtte , de nisu ii oaččo earránit sus .
Dasgo eahpeoskkolaš boadnjá basuhuvvo go lea náitalan áhkáinis , ja eahpeoskkolaš áhkká basuhuvvo go lea náitalan oskkolaš boatnjáinis .
Muđuid sudno mánát livčče buhtismeahttumat , muhto dál sii leat basuhuvvon .
Muhto jos eahpeoskkolaš náittosguoibmi dáhttu earránit , de earránehkos .
Dakkár dilis oskkolaš viellja dahje oabbá ii leat čadnojuvvon .
Ipmil lea rávkan min eallit ráfis . Áhkká , mas dieđát sáhtežat go beastit boatnját ? Ja boadnjá , mas dieđát sáhtežat go beastit áhkát ?
Dattege dohkkehehkos juohkehaš dan oasi man Hearrá lea addán sutnje , dan mii sus lei go Ipmil rávkkai su .
Dát lea mu gohččun buot searvegottiide .
Jos muhtun lei birračuhppojuvvon go son rávkojuvvui , de ii galgga geahččalit rievdadit birračuohpahusa mearkkaid .
Jos muhtun lea rávkojuvvon birračuohpakeahttájin , de ii galgga birračuohpahit iežas .
Ii leat deaŧalaš lea go olmmoš birračuhppojuvvon vai ii , muhto deaŧalaš lea doallat Ipmila báhkkomiid .
Bissos juohkehaš dan dilis mas son lei dalle go son rávkojuvvui .
Jos don ledjet šlávva go rávkojuvvojit , de ale váivvit iežat dainna !
Muhto jos don sáhtát šaddat friddjan , de vállje baicca dan .
Dasgo dat guhte lei šlávva go Hearrá rávkkai su , lea Hearrá friddjandahkkojuvvon olmmoš .
Seammá láhkái lea dat gii lei friddja olmmoš go son rávkojuvvui , šaddan Kristusa šlávvan .
Dii lehpet divrasii ostojuvvon . Allet de šatta olbmuid šlávvan .
Oskuguoimmit , bissos juohkehaš Ipmila ovddas dan dilis mas lei go rávkojuvvui .
Dasto , mii guoská náitalkeahtes olbmuide , de dan áššis mus eai leat gohččumat Hearrás .
Muhto mun cealkkán iežan oaivila , dasgo Hearrá lea árpmustis čájehan ahte luohttá munnje .
Dan heahteáiggi dihtii mas mii dál eallit , mun oaivvildan ahte olbmui lea buorre bissut náitalkeahttájin .
Jos don leat čadnojuvvon áhkkái , de ale geahččal beasadit sus .
Jos dus ii leat áhkká , de ale oza alccesat áhká .
Muhto jos don dattege náitalat , de it suddut .
Ja jos nieida náitala , de son ii suddut .
Muhto náitalan olbmot ožžot ollu morrašiid , ja mun dáhtošin din vealtat dain .
Oskuguoimmit , dat maid mun nappo oaivvildan , lea dát : Áigi lea oanehaš .
Dás duohko galget sii geain lea áhkká , eallit dego sii eai livčče náitalan . Sii geat moraštit , galget eallit dego sii eai livčče morrašis . Sii geat illudit , galget eallit dego eai livčče ilus . Sii geat ostet , galget eallit dego eai oamastivčče maidege . Sii geat geavahit máilmmi buriid , galget eallit dego eai dárbbašivčče geavahit daid .
Dasgo dát máilbmi , nugo dál lea , duššá . Mun dáhtun din eallit morrašiid haga .
Náitalkeahtes olmmoš atná fuola das mii gullá Hearrái , mo son sáhttá dohkket Hearrái .
Muhto náitalan olmmoš atná fuola das mii gullá máilbmái , mo son sáhttá leat buorre ja dohkálaš áhkkásis , ja ná son lea juohkásan guovtti sadjái .
Náitalkeahtes nisu dahje nieida atná fuola das mii gullá Hearrái , vai son sáhttá leat bassi sihke rupmašis ja vuoiŋŋastis .
Muhto náitalan nisu atná fuola das mii gullá máilbmái , mo son sáhttá dohkket boadnjásis .
Mun cealkkán dán didjiide iežadet ávkin , in ge danne ahte dáhtun giellat din , muhto vai mun veahkehivččen din eallit gudnálaččat ja bissut oskkáldasat Hearrás .
Jos oktage oaivvildeš ahte son ii meannut heivemeahttumit morsiinis , go su himut leat garrasat , ii ge son veaje maidege dasa , dahkos nu mo hálida , soai beassaba náitalit , ii ge das leat mihkkege suttuid .
Muhto jos son bissu nannosit áigumušastis ii ge leat bákku vuolde , muhto ráđđe dáhtus ja lea mearridan diktit moarsis leat guoskkatkeahttá , de son dahká riekta .
Nu dahká nappo son riekta gii náitala morsiinis , muhto son gii ii náital , dahká velá buorebut .
Áhkká lea čadnojuvvon boadnjásis nu guhká go boadnjá eallá .
Jos boadnjá jápmá , de son beassá náitalit geainna dáhttu , jos dat duššefal dáhpáhuvvá Hearrás .
Muhto mu mielas sutnje lea buoret jos son eallá okto . Ja mun navddán alddán ge leat Ipmila Vuoiŋŋa .
Dasto , mii guoská eahpeipmiliidda oaffaruššojuvvon birgui , de das mis gal lea buohkain diehtu .
Dakkár diehtu dahká čeavlájin , muhto ráhkisvuohta nanosmahttá .
Jos oktage navddeš alddis leat dieđu , dalle son ii leat ožžon rivttes dieđu . Muhto Ipmil dovdá su gii ráhkista Ipmila .
Go lea gažaldat borramis dakkár bierggu mii lea leamaš oaffaruššojuvvon eahpeipmiliidda , de mii gal diehtit ahte máilmmis ii leat eahpeipmil ii ge leat eará Ipmil go okta .
Vaikko mahkáš livčče ge ipmilat almmis ja eatnama alde , ja maiddái eatnat ipmilat ja hearrát , de mis lea almmatge dušše okta Ipmil , Áhčči . Sus boahtá buot , ja su lusa mii leat mannamin . Mis lea dušše okta Hearrá , Jesus Kristus . Su bokte lea buot sivdniduvvon , ja mii eallit su bokte .
Muhto dát diehtu ii leat buohkain .
Muhtumat borret dán bierggu eahpeipmiloaffarin , danne go sii dán rádjái leat hárjánan bálvalit eahpeipmiliid ja dat duolvvida sin rašis oamedovddu .
Muhto borramuš ii daga min dohkálažžan Ipmila ovddas .
Mii eat manat maidege jos eat bora , eat ge vuoitte maidege jos borrat .
Muhto váruhehket amas din friddjavuohta šaddat jorralussan rašis olbmuide !
Jos dál oktage oinneš du geas lea dát diehtu , borramin eahpeipmiltempelis , ii go dalle su rašis oamedovdu ávžojuvvo borrat oaffarbierggu ?
Nu du dieđu dihtii rašis olmmoš manná gáđohussii , dat oskuguoibmi gean ovddas Kristus jámii .
Go dii dán láhkái suddudehpet oskuguimmiideattet vuostái ja hávváduhttibehtet sin rašis oamedovddu , de suddudehpet Kristusa vuostái ge .
Dan dihtii , jos borramuš vearránahttá mu oskuguoimmi , de in goassege bora bierggu aman vearránahttit oskuguoibmán .
In go mun leat friddja olmmoš ?
In go leat apoasttal ?
In go leat oaidnán Jesusa , Hearrámet ?
Ehpet go dii leat mu dahku Hearrás ?
Jos earáide in leačča apoasttal , de didjiide goit lean !
Duođaid , dii lehpet seaila mii nanne ahte mun lean Hearrá apoasttal .
Dát lea dál mu bealuštus sin vuostái geat dubmejit mu : Ii go mis leat vuoigatvuohta borrat ja juhkat ?
Ii go mis ge leat vuoigatvuohta váldit mielde áhká oskuoabbán , nugo eará apoastalat ja Hearrá vieljat ja Kefas dahket ?
Letne go dušše moai Barnabasain geain ii leat vuoigatvuohta orrut barggakeahttá ?
Gii ba iežas bálkáha soalddáhin ?
Ii go viidnegárddi gilvi beasa borrat dan šattu ?
Ii go geahčči oaččo mielkki ealus ?
Sártnun go dušše olbmuid lági mielde ? Ii go láhka ge cealkke nu ?
Movssesa láhkii han lea čállojuvvon : Ale čana vuovssá njálmmi go dat lea ráidnemin gortniid .
Muhto lea go Ipmil vuovssáin atnimin fuola ?
Ii go dát leat celkojuvvon min hárrái ?
De lea , min dihtii dát lea čállojuvvon . Dasgo dat guhte jorgu eatnama ja dat guhte ráidne gortniid , berre dahkat dan dainna doaivagiin ahte oččošii oasi šattus .
Go mii leat gilván vuoiŋŋalaš buriid din gaskii , lea go dalle menddo ollu ahte mii beasašeimmet láddjet das máilmmálaš buriid ?
Jos dal earáin ležžet vuoigatvuođat oažžut dis juoidá , eai go mis livčče dalle vel eanet ?
Mii dattege eat leat atnán ávkki dán vuoigatvuođas , muhto mii gierdat buot amamet hehttet Kristusa evangeliuma ovdáneami .
Ehpet go dieđe ahte sii geat bálvalit tempelis ožžot tempelis ealáhusaset , ja sii geat bálvalit áltáris , ožžot oasi das mii oaffaruššojuvvo ?
Seammá láhkái lea Hearrá mearridan ahte sii geat sárdnidit evangeliuma , ožžot ealáhusa evangeliumis .
Muhto mun in leat atnán ávkki dákkár vuoigatvuođain . In ge mun čále dál danne ahte gáibidan alccesan dákkáriid .
Ovdal mun jámášin , dasgo ii oktage beasa váldit mus eret dan rámi .
Das ahte mun sárdnidan evangeliuma , ii leat mihkkege rábmomušaid , dasgo dat lea mu geatnegasvuohta .
Vuoi mu , jos mun in sárdnit evangeliuma !
Jos dagan dan iežan dáhtus , de mun galggan oažžut bálkká .
Muhto jos mun in daga dan iežan dáhtus , de dat lea doaibma mii lea oskkilduvvon munnje .
Mii lea dalle mu bálká ?
Dat ahte mun sárdnidan evangeliuma bálkká haga in ge ane ávkki dan vuoigatvuođas man evangelium attášii munnje .
Vaikko mun lean friddja in ge leat geange vuollásaš , de lean dahkan iežan buohkaid šlávvan , vai vuoittášin nu olusiid go vejolaš .
Juvddálaččaide lean leamaš dego juvddálaš , vai vuoittášin juvddálaččaid .
Sidjiide geat leat lága vuložat , mun lean leamaš dego livččen lága vuloš , vai vuoittášin sin , vaikko ieš in leat ge lága vuloš .
Sidjiide geat leat lága haga , lean leamaš dego ieš ge livččen lága haga , vai vuoittášin sin , vaikko ieš in leat Ipmila lága haga , mun han lean Kristusa lága vuloš .
Rašis olbmuide lean leamaš rašši , vai vuoittášin sin .
Buohkaide lean leamaš buot , vai beasttášin juobe muhtumiid .
Muhto buot dagan evangeliuma dihtii , vai ieš oččošin oasi das .
Ehpet go dieđe ahte vaikko buot gilvoviehkkit vihket gilvvu , de dušše okta vuoitá bálkkašumi ?
Vihket dalle nu ahte vuoittášeiddet !
Juohke gilvvohalli ferte biehttalit alddis buot . Sii dahket dan vai oččošedje nohkavaš vuoitokruvnnu ; mii gis dahkat dan vai oččošeimmet nohkameahttun kruvnnu .
In mun dasto viega mihttomeari haga , in ge čorpmadettiin fáippo guoros áibmui .
Muhto mun hárjehalan rupmašan garrasit ja bággen dan jeagadit , aman ieš hilgojuvvot , mun gii lean sárdnidan earáide .
Oskuguoimmit , mun dáhtošin din diehtit ahte min máddarat ledje balvva vuolde , ja buohkat manne meara čađa .
Buohkat gásttašuvvojedje Movssesa searvevuhtii balvvas ja mearas , ja buohkat borre seammá vuoiŋŋalaš borramuša ja juhke seammá vuoiŋŋalaš juhkamuša .
Dasgo sii juhke vuoiŋŋalaš bávttis mii čuovui sin ; dat bákti lei Kristus .
Dattege Ipmil hilggui eatnasiid sis , dasgo sii duššaduvvojedje meahcis .
Dát dáhpáhusat leat dál midjiide ovdamearkan amamet hálidit bahá , nugo sii dahke .
Allet ge šatta eahpeipmilbálvaleaddjin nugo muhtumat sis šadde .
Nugo lea čállojuvvon : Álbmot čohkánii borrat ja juhkat , ja dasto dánsugohte .
Allot ge furroš , nugo muhtumat sis , go sis dušše golbmagoalmmatlotduhát olbmo ovtta beaivvis .
Allot ge geahččal Hearrá , nugo muhtumat sis ; sii han gottahalle gearbmašiidda .
Allet ge nimmor nugo muhtumat sis , sii han gottahalle duššadeaddjái .
Buot dát dáhpáhusat šadde sidjiide ovdamearkan , ja dat čállojuvvojedje midjiide cuigehussan , midjiide geaidda maŋimuš áiggit leat boahtán .
Dan dihtii váruhehkos son gii navdá iežas čuožžut , amas jorralit !
Dii ehpet leat deaividan geahččalusaiguin maid olmmoš ii veaje gierdat .
Ipmil lea oskkáldas , son ii divtte din geahččaluvvot badjelmearálaččat , muhto dahká sihke geahččalusa ja dan loahpa nu ahte dii gierdabehtet dan .
Ráhkkásiiddán , fasttášehket nappo eahpeipmilbálvaleami !
Mun sártnun didjiide nugo jierpmálaš olbmuide .
Árvvoštallet dan maid mun sártnun !
Ii go dat gearra , man mii buressivdnidit , leat oasálašvuohta Kristusa varrii ?
Ii go dat láibi , man mii doadjalit , leat oasálašvuohta Kristusa rupmašii ?
Dan dihtii go lea okta láibi , de mii , guđet leat eatnagat , leat okta rumaš , dasgo mii leat buohkat oasálaččat dan ovtta láibái .
Gehččet Israela álbmoga : Eai go sii geat borret oaffaris , leat oasálaččat oaffaráltárii ?
Maid mun oaivvildan dáinna ?
Oaivvildan go ahte eahpeipmiloaffar livččii mihkkege , dahje ahte eahpeipmil livččii mihkkege ?
In eisege ! Muhto mun oaivvildan ahte dan maid báhkinat oaffaruššet , dan sii oaffaruššet bahá vuoiŋŋaide eai ge Ipmilii .
Mun in dáhto din leat oasálažžan bahá vuoiŋŋaide .
Ehpet dii sáhte juhkat sihke Hearrá geara ja bahá vuoiŋŋaid geara .
Dii ehpet sáhte leat oasálaččat sihke Hearrá beavdái ja bahá vuoiŋŋaid beavdái .
Duostat go mii hárdit Hearrá áŋgirvuođa ?
Leat go mii gievrrabut go son ?
Daddjojuvvo gal ahte buot lea lobálaš dahkat . Dat lea gal duohta , muhto ii buot leat ávkkálaš .
Buot lea gal lobálaš dahkat , muhto ii buot duddjo buori .
Allet bivdde iežadet ávkki , muhto earáid ávkki .
Borret buot mii vuvdojuvvo gávpešiljuin jearakeahttá oamedovddu dihtii lea go dat oaffarbiergu . Dasgo eanan ja buot mii deavdá dan , gullá Hearrái .
Jos muhtun eahpeoskkolaš bovde din , ja dii mannabehtet su guossái , de beassabehtet borrat buot mii biddjojuvvo din ovdii , jearakeahttá oamedovddu dihtii lea go dat oaffarbiergu .
Muhto jos muhtun dadjá : « Dát lea oaffarbiergu » , de allet bora dan su dihtii gii dajai dan , ja maiddái oamedovddu dihtii . Mun in oaivvil du oamedovddu , muhto nuppi olbmo oamedovddu !
De muhtun jearrá : Manne divttášin eará olbmo oamedovddu dubmet friddjavuohtan ?
Jos mun giittán Ipmila go boran , manne mun dalle láitojuvvon das man ovddas mun giittán Ipmila ?
Jogo dii nappo borrabehtet dahje juhkabehtet , dahje maid ihkinassii barggažehpet , de dahket buot Ipmila gudnin !
Allet divtte juvddálaččaid , greikalaččaid dahje Ipmila girku láitit din mastege !
Ieš mun geahččalan álo dohkket buohkaide in ge oza iežan ávkki , muhto eatnagiid ávkki , vai sii bestojuvvošedje .
Mun rámidan din go álo muitibehtet mu ja doallabehtet gitta dan oahpahusas man mun adden didjiide .
Mun hálidan din diehtit ahte Kristus lea juohke olbmá oaivi , olmmái lea nissona oaivi , ja Ipmil lea Kristusa oaivi .
Olmmái gii rohkadallá dahje profehtastallá gahpir oaivvis , heahppašuhttá oaivvis .
Muhto nisu gii rohkadallá dahje profehtastallá gahperahttá , heahppašuhttá oaivvis , dasgo dat lea seammá heahpat dego livččii ráhken vuovttaidis .
Jos nisu ii dáhto gokčat oaivvis , de čuhppos son buot vuovttaidis .
Muhto go juo lea heahpadin nissonii čuohppat dahje ráhket vuovttaidis , de ferte gokčat oaivvis .
Olmmái ii dárbbaš gokčat oaivvis , dasgo son lea Ipmila govva ja gudni .
Muhto nisu lea olbmá gudni . Dasgo olmmái ii šaddan nissonis , muhto nisu šattai olbmás . Ii ge olmmái sivdniduvvon nissona dihtii , muhto nisu sivdniduvvui olbmá dihtii .
Danne nisu ferte eŋgeliid dihtii gokčat oaivvis vuollegašvuođa mearkan .
Hearrá ovddas almmatge ii leat nisu almmá olbmá haga ii ge olmmái almmá nissona haga .
Dasgo nugo nisu šattai olbmás , de han olmmái ge riegáda nissonis , muhto buot boahtá Ipmilis .
Árvvoštallet ieža ! Heive go ahte nisu rohkadallá Ipmilii gahperahttá ?
Ii go luondu ieš oahpat didjiide ahte lea heahpadin olbmái jos sus leat guhkes vuovttat , muhto ahte nissonii dat lea gudnin ? Dasgo vuovttat leat addojuvvon nissonii govččasin .
Jos dál oktage dáhtoš nákkáhallat , de dihtos ahte mis ii leat dakkár vierru , ii ge Ipmila searvegottiin ge .
Go mun dál attán didjiide čuovvovaš gohččumiid , de in sáhte rábmot din , dasgo din čoagganeamit eai leat didjiide buorrin , muhto baicca vahágin .
Ovddimustá mun gulan ahte din gaskkas lea soahpameahttunvuohta go čoagganehpet searvegoddin , ja mun jáhkán muhtun muddui dan duohtan .
Din gaskkas han juo dieđusge fertejit leat sierra joavkkut , vai juo lea čielggas geat din gaskkas leat luohtehahttit .
Go dii dasto čoagganehpet , de eai leat Hearrá mállásat dat maid dii borrabehtet . Dasgo juohkehaš borrá dakkaviđe iežas borramuša , ja nubbi nealgu ja nubbi gis juhkaluvvá .
Ehpet go dii sáhte boradit ja juhkat ruovttuineattet ?
Vai badjelgeahččabehtet go Ipmila searvegotti , ja heahppašuhttibehtet go sin geain ii leat mihkkege ?
Maid dii hálidehpet mu cealkit dása ? Ahte mun rábmošin din ?
Dán áššis mun in rábmo din !
Dasgo mun lean vuostáiváldán Hearrás dan maid lean addán didjiide ge : Hearrá Jesus , dan ija go son behttojuvvui , válddii láibbi , giittii Ipmila , doadjalii dan ja celkkii : « Dát lea mu rumaš , mii addojuvvo din ovddas .
Dahket dán muitin dihtii mu ! »
Nu son válddii maiddái geara mállásiid maŋŋil ja celkkii : « Dát gearra lea ođđa lihttu mu varas .
Nu dávjá go dii juhkabehtet dan , dahket dan muitin dihtii mu ! »
Dasgo nu dávjá go dii borrabehtet dán láibbi ja juhkabehtet dán gearas , de sárdnidehpet Hearrá jápmima dassážii go son boahtá .
Danne dat guhte borrá láibbi dahje juhká Hearrá gearas dohkkemeahttun láhkái , sudduda Hearrá rupmaša ja vara vuostái .
Juohkehaš ferte guorahallat iežas ovdal go borrá láibbi ja juhká gearas .
Dasgo dat gii borrá ja juhká beroškeahttá das ahte dat lea Hearrá rumaš , son borrá ja juhká duomu alccesis .
Dan dihtii leat ollu buohccit ja návccaheamit din gaskkas , ja eatnagat leat oađđán jápmimii .
Jos mii guorahalašeimmet iežamet , de eat dubmehalaše .
Muhto go Hearrá dubme min , de mii bagaduvvot , amamet dubmejuvvot gáđohussii oktan máilmmiin .
Oskuguimmiidan , go dii nappo čoagganehpet boradit , de vurdet guhtet guimmiideattet !
Jos muhtumis leažžá nealgi , de boradehkos ruovttus , amaset din čoagganeamit buktit duomu alcceseattet .
Buot eará áššiin mun rávven din go boađán .
Dasto , oskuguoimmit , mii guoská Vuoiŋŋa attáldagaide , de mun dáhtošin din dovdat daid .
Dii diehtibehtet mo dii máŋgga láhkái geasáhalaidet gielahis eahpeipmiliid lusa dalle go leiddet báhkinat .
Dan dihtii mun cealkkán čielgasit didjiide ahte ii oktage guhte sárdnu Ipmila Vuoiŋŋas , sáhte dadjat : « Jesus lehkos garuhuvvon . » Ii ge oktage sáhte dadjat : « Jesus lea Hearrá » jos ii sártno Bassi Vuoiŋŋas .
Árpmuattáldagat leat máŋgga lágánat , muhto Vuoigŋa lea seammá .
Bálvalusat leat máŋgga lágánat , muhto Hearrá lea seammá .
Fámolaš dagut leat máŋgga lágánat , muhto Ipmil lea seammá , son gii duddjo buot mii lea .
Dan maid Vuoigŋa almmustahttá , oažžu juohkehaš oktasaš ávkin .
Muhtumii Vuoigŋa addá viisodaga sáni , ja nubbái seammá Vuoigŋa addá dieđu sáni .
Buot dáid duddjo okta ja seammá Vuoigŋa guhte juohká attáldagaidis juohkehažžii , dáhtus mielde .
Nugo rumaš lea okta , ja das leat máŋga lahtu , ja buot dat lahtut dahket ovtta rupmaša , vaikko leat ge máŋga , nu lea maiddái Kristusiin ge .
Dasgo ovttain Vuoiŋŋain mii leat buohkat gásttašuvvon vai mii livččiimet okta rumaš , leažžat dal juvddálaččat dahje greikalaččat , šlávat dahje friddja olbmot , ja mii buohkat leat ožžon juhkat ovtta Vuoiŋŋa .
Ii han rumaš leat dušše okta lahttu , muhto máŋga .
Jos mahkáš juolgi dajašii : « Danne go in leat giehta , de in gula rupmašii » , de dat liikká gullá rupmašii .
Jos beallji dajašii : « Danne go in leat čalbmi , de in gula rupmašii » , de dat liikká gullá rupmašii .
Jos oppa rumaš livččii čalbmi , livččii go dalle gullu ?
Jos buot livččii gullu , livččii go dalle haksin ?
Muhto Ipmil lea goit bidjan juohke lahtu rupmašii , nugo dáhtui .
Jos buot livččii okta lahttu , livččii go dalle mihkkege rupmašiid ?
Leat gal ollu lahtut , muhto dušše okta rumaš .
Čalbmi ii sáhte dadjat gihtii : « Mun in dárbbaš du » , ii ge oaivi sáhte dadjat julggiide : « In mun dárbbaš din » .
Lea baicca nuppe láhkái !
Aiddo dat rupmaša lahtut mat orrot leamen heajumusat , leat dárbbašlaččat . Daidda rumašlahtuide mat min mielas leat unnán gudni veara , daidda mii addit dađe eanet gudni , ja daid lahtuid mainna heahpanaddat , mii gárvvohit dađe heivvolaččabut ; eará lahtut eai dárbbaš dan .
Muhto Ipmil lea bidjan oktii rupmaša ja addán eanet gudni dasa mas gudni váilu , amaset rupmaša lahtut riidalit guhtet guimmiideasetguin , muhto vai buot lahtut anášedje fuola guhtet guimmiineaset .
Jos okta lahttu gillá , de buot earát ge gillájit .
Jos okta lahttu gudnejahttojuvvo , de buot earát ge illudit .
Dii lehpet Kristusa rumaš , ja juohkehaš dis lea su lahttu .
Ipmil lea ásahan girkosis vuosttažin apoastaliid , nubbin profehtaid ja goalmmádin oahpaheddjiid , de sin geain lea fápmu dahkat oavdudaguid , ja dasto sin geain lea buoridanattáldat , attáldat veahkehit nuppiid , attáldat jođihit ja attáldat sárdnut iešguđetlágán gielaiguin .
Leat ba gal buohkat apoastalat ?
Leat ba gal buohkat profehtat dahje oahpaheaddjit ?
Dahket ba gal buohkat oavdudaguid ?
Lea ba gal buohkain buoridanattáldat ?
Sárdnot ba gal buohkat gielaiguin , dahje dulkojit go buohkat gielaiguin sárdnumiid ?
Eai , muhto váinnuhehket stuorimus árpmuattáldagaid !
Ja dál mun čájehan didjiide buot buoremus geainnu :
Vaikko vel sártnošin ge olbmuid dahje eŋgeliid gielaiguin , muhto mus ii livčče ráhkisvuohta , de livččen dušše čuoddji biellu dahje skilaideaddji divga .
Vaikko mus vel livččii ge profehtastallanattáldat ja dovddašin buot čiegusvuođaid ja buot dieđu , ja vaikko mus livččii buot osku nu ahte sáhtášin váriid sirdit , muhto ii livčče ráhkisvuohta , de mun in livčče mihkkege .
Vaikko vel juogadivččen váivvážiidda buot mii mus leažžá , ja vaikko divttášin iežan boldojuvvot , muhto mus ii livčče ráhkisvuohta , de dat ii livčče munnje ávkin .
Ráhkisvuohta lea gierdavaš , ráhkisvuohta lea láđis , ii dat gáđaš ii ge rábmo ii ge čeavlástala .
Ii dat daga maidege dohkkemeahttumiid ii ge bivdde iežas ávkki , ii dat suhta ii ge vurke baháid .
Ii dat illut vearrivuođas , muhto baicca duohtavuođas .
Dat gillá buot , osku buot , doaivu buot , gierdá buot .
Ráhkisvuohta ii noga goassege .
Muhto profehtastallanattáldagat nohket , gielaiguin sárdnun jávohuvvá , ja diehtu nohká .
Dasgo min diehtu lea váilevaš , ja min profehtastallan lea váilevaš . Muhto go ollisvuohta boahtá , de jávká dat mii lea váilevaš .
Mánnán mun hállen nugo mánná , mus lei máná miella ja máná jurdagat .
Muhto go šadden rávisin , de guđđen mánálašvuođa .
Dál mii oaidnit dego njoađve speadjalis , dego árvádusa , muhto dalle oaidnit oktii čalmmiid .
Dál lea áddejupmi váilevaš , muhto dalle dat lea ollislaš , nugo Ipmil dovdá mu ollásit .
De dat bissot , dát golmmas : Osku , doaivu ja ráhkisvuohta . Muhto buot stuorimus dain lea ráhkisvuohta .
Bivdet ráhkisvuođa , muhto váinnuhehket maiddái vuoiŋŋalaš attáldagaid , eanemusat profehtastallama .
Dat guhte sárdnu gielaiguin , ii sártno olbmuide , muhto Ipmilii , dasgo ii oktage ádde su go son Vuoiŋŋas sárdnu čiegusvuođaid .
Muhto dat guhte profehtastallá , sárdnu olbmuide , son nanosmahttá , rávve ja jeđđe .
Dat guhte sárdnu gielaiguin , nanosmahttá iežas , muhto dat guhte profehtastallá , nanosmahttá searvegotti .
Mun sávan ahte dii buohkat sártnošeiddet gielaiguin , muhto vel eanebut sávašin ahte dii profehtastalašeiddet .
Dasgo dat guhte profehtastallá , lea stuorit go dat guhte sárdnu gielaiguin , jos juo ii dulkojuvvoše dat maid son sárdnu , vai searvegoddi nanosmahttojuvvošii .
Oskuguoimmit , mii ávkkiid livččii didjiide jos mun boađášin din lusa ja sártnošin gielaiguin , in ge attáše didjiide almmustusa , dieđu , profetiija dahje oahpaheami ?
Seammá láhkái lea jápma čuojanasaiguin , nugo njurggonasain ja hárppain . Jos nuohtain ii livčče erohus , mo dalle sáhtášii gullat dan mii čuojahuvvo ?
Ja jos soahtedorvves boahtá eahpečielga jietna , gii dalle ráhkkanišgoađášii soahtái ?
Nu lea dinguin ge : Jos ehpet sártno čielga giela , mo dalle sáhttá áddet dan mii daddjojuvvo ?
Dalle han sárdnubehtet aivve duššás !
Máilmmis leat máŋggašlái gielat , ja buot dat leat áddehahttit .
Muhto jos mun in máhte giela , de lean amas sutnje gii hállá dan , ja son gii hállá , lea amas munnje .
Nu lea dinguin ge : Go váinnuhehpet vuoiŋŋalaš attáldagaid , de oččodehket dakkár attáldagaid mat sáhttet nanusmahttit searvegotti !
Dan dihtii rohkadallos son gii sárdnu gielaiguin , ahte máhtášii dulkot dan maid ieš dadjá .
Dasgo jos mun rohkadaladettiinan sártnun gielaiguin , de mu vuoigŋa rohkadallá , muhto jierbmái ii leat mihkkege ávkkiid .
Maid dát mearkkaša ?
Mun hálidan rohkadallat vuoiŋŋainan , muhto maiddái jirpmiinan ; mun dáhtun lávlut ávvulávlagiid vuoiŋŋainan , muhto maiddái jirpmiinan .
Jos don rámidat Ipmila dušše vuoiŋŋastat , mo de sáhttá olggobealeolmmoš gii lea dás , dadjat « Amen » du giittusrohkosii jos ii ádde dan maid don dajat ?
Du giittusrohkos veadjá gal leat buorre , muhto dat ii leat nubbái ávkin .
Mun giittán Ipmila go sártnun gielaiguin eanebut go oktage dis . Muhto vai sáhtášin earáid ge oahpahit de hálidivččen baicca searvegottis dadjat vihtta jierpmálaš sáni go duháhiid sániid gielaiguin .
Oskuguoimmit , allet leage nugo mánát jierpmi dáfus . Bahávuođa dáfus lehket dego mánát , muhto jierpmi dáfus nugo rávis olbmot .
Láhkii lea čállojuvvon : Amas gielaiguin ja amas baksamiiguin , áiggun sárdnut dán álbmogii , muhto sii dattege eai guldal mu , cealká Hearrá .
Dan dihtii lea gielaiguin sárdnun mearka sidjiide geat eai oskko , ii ge oskkolaččaide . Muhto profehtalaš sárdnun lea mearka oskkolaččaide , ii ge eahpeoskkolaččaide .
Jos dál olles searvegoddi čoahkkanivččii ja buohkat sárdnugoađášedje gielaiguin , ja de boađášedje sisa muhtun olggobealeolbmot dahje eahpeoskkolaččat , eai go sii dalle dajaše ahte dii lehpet mielahuvvan ?
Muhto jos buohkat livčče profehtastallamin , ja de boađášii sisa muhtun eahpeoskkolaš dahje olggobealeolmmoš , de buot maid son gulašii , čájehivččii sutnje su suttu , ja son dovddašii ahte buohkat cuiggodit su ; su siskkimuš jurdagat boađášedje albmosii .
Son luoitádivččii muođuidis ala , rohkadalašii Ipmila ja dovddastivččii : « Ipmil lea duođaid din gaskkas ! »
Oskuguoimmit , maid nappo dát mearkkaša ?
Go dii čoagganehpet , de juohkehaččas lea juoga maid addit : sálbma , oahppu , almmustus , gielaiguin sárdnun ja dulkon .
Šaddos buot nu ahte dat nanosmahttá .
Jos sárdnot gielaiguin , de sárdnoset dušše guovttis dahje eanemusat golmmas , nubbi nuppi maŋis ja muhtun galgá dulkot .
Jos ii oktage máhte dulkot , de orros jávohaga son gii sárdnu gielaiguin go searvegoddi lea čoahkis . Sárdnos son alccesis ja Ipmilii !
Profehtain ge sárdnoset guovttis dahje golmmas , ja earát galget árvvoštallat dan maid sii celket .
Muhto jos muhtun eará gii lea čohkkámin das oažžu almmustusa , de nubbi galgá jávohuvvat .
Dasgo dii buohkat beassabehtet profehtastallat , muhto okta ain hávil , vai buohkat oahpašedje ja árvvosmahttojuvvošedje .
Profehtain lea fápmu ráđđet vuoiŋŋaid mat sárdnot sin siste , dasgo Ipmil ii leat moivvi Ipmil , muhto ráfi Ipmil .
Nugo lea dábálaš buot bassi olbmuid searvegottiin , de nissonat galget orrut jávohaga searvegoddečoagganemiin . Sis ii leat lohpi sárdnut , muhto galget orrut vuolibužžan , nugo láhka ge cealká .
Jos sii dáhttot oahppat maidege , de jerroset boatnjáineaset ruovttus . Dasgo ii heive ahte nisu sárdnu searvegottis .
Lea go ba Ipmila sátni vuolgán dis , dahje lea go dat ollen dušše din lusa ?
Jos oktage aneš iežas profehtan dahje ahte son lea ožžon attáldaga Vuoiŋŋas , de dihtos ahte dat maid mun čálán , lea Hearrá báhkkon .
Jos guhtege dán ii dohkket , su ii Ipmil ge dohkket .
Oskuguimmiidan , váinnuhehket profehtastallan attáldaga , allet ge hehtte geange sárdnumis gielaiguin .
Muhto dáhpáhuvvos buot heivvolaččat ja albma láhkái !
Oskuguoimmit , mun muittuhan didjiide dan evangeliuma man mun sárdnidin didjiide , dan man dii vuostáiválddiidet ja mas dii bissubehtet nanusin .
Dat buktá didjiide bestojumi jos vurkebehtet dan nu mo mun sárdnidin evangeliuma , muđuid dii lehpet oskugoahtán duššás .
Dasgo buot ovddimustá mun adden didjiide dan maid ieš vuostáiválden : ahte Kristus jámii min suttuid dihtii čállagiid mielde , son hávdáduvvui , son bajásčuožžilii goalmmát beaivvi čállagiid mielde , ja son almmustuvai Kefasii ja dasto dan guoktenuppelohkásii .
Das maŋŋil son almmustuvai oktanaga badjel vihttačuođi oskuguoibmái .
Eatnasat sis leat ain eallimin , muhto muhtumat leat oađđán jápmimii .
Das maŋŋil son almmustuvai Jáhkobii ja dasto buot apoastaliidda .
Maŋimustá son almmustuvai munnje ge , gii lean dego ovdal áiggi riegádan mánná .
Mun han lean heajumus apoastaliid searvvis , in ge oppa ánssáš ge gohčoduvvot apoasttalin , dasgo mun lean doarrádallan Ipmila girku .
Muhto Ipmila árpmus lean dat gii lean , ii ge su árbmu munnje leat leamaš duššás .
Mun lean rahčan eanebut go oktage sis , vaikko in gal mun , muhto Ipmila árbmu mii lea leamaš mu mielde .
Ná mii nappo sárdnidit , mun dego earát ge , ja dasa dii oskubehtet .
Muhto jos dál sárdniduvvo ahte Kristus lea bajásčuožžilan jábmiid luhtte , mo dalle sáhttet muhtumat dis cealkit ahte ii leat mihkkege bajásčuožžilemiid jábmiid luhtte ?
Jos ii leat bajásčuožžileapmi jábmiid luhtte , de ii leat Kristus ge bajásčuožžilan .
Muhto jos Kristus ii leat bajásčuožžilan , de min sárdni lea duššás , ja maiddái din osku lea duššás .
Dalle lea čielggas ahte mii leat duođaštan vearrut Ipmila birra go mii leat duođaštan Ipmila birra ahte son lea bajásčuoččáldahttán Kristusa , maid son nappo ii leat dahkan , jos juo jábmit eai bajásčuožžil .
Dasgo jos jábmit eai bajásčuožžil , de ii Kristus ge leat bajásčuožžilan .
Muhto jos Kristus ii leat bajásčuožžilan , dalle din osku lea dušši , ja dii lehpet ain suttuineattet .
Dalle leat láhppon sii ge geat Kristusii oskkodettiin leat oađđán jápmimii .
Jos mii leat bidjan doivomet Kristusii dušše dán eallimis , de mii leat buot vártnuhepmosat olbmuid gaskkas .
Muhto dál lea Kristus bajásčuožžilan jábmiid luhtte , vuosttaš šaddun sin gaskkas geat leat oađđán jápmimii .
Danne go jápmin bođii olbmos , lea maiddái jábmiid bajásčuožžileapmi boahtán olbmos .
Dasgo nugo buohkat jápmet oktan Áttámiin , de buohkat dahkkojit eallin oktan Kristusiin .
Muhto juohkehaš vuorus mielde : Kristus lea álgošaddu , dasto čuvvot sii geat gullet Kristusii , go son boahtá .
Das maŋŋil boahtá loahppa , go son addá riikka Ipmil Áhččái maŋŋil go lea duššadan buot hearrávuođa , válddi ja fámu .
Dasgo Kristus galgá ráđđet gonagassan dassážii go Ipmil lea bidjan buot vašálaččaid su julggiid vuložin .
Maŋimuš vašálaš gii duššaduvvo , lea jápmin , dasgo Ipmil lea bidjan buot su julggiid vuložin .
Go daddjo ahte buot lea biddjon su julggiid vuložin , de lea čielggas ahte Ipmil ieš ii lohkko dása , dasgo son dat lea guhte lea bidjan buot su vuollái .
Muhto go buot lea biddjon su vuollái , de Bárdni ieš ge bidjá iežas Ipmila vuollái gii bijai buot su vuollái , vai Ipmil ráđđe buot dievaslaččat .
Manne muhtumat gásttašahttet iežaset jábmiid bealis ?
Jos jábmit eai oppanassiige bajásčuožžil , manne sii dasto gásttašahttet iežaset sin bealis ?
Ja manne mii gis diktit iežamet áitojuvvot juohke diimmu ?
Duođaid , oskuguoimmit , jos dii leažžabehtet mu rápmi Kristus Jesusis , Hearrásteamet : Jápmin lea mu čalmmiid ovddas juohke beaivvi .
Jos mun dušše olmmošlaš doaivagiin livččen dorron spiriiguin Efesosas , mii ávkkiid das livččii munnje ?
Jos jábmit eai bajásčuožžil , de gul « boradehkot ja juhkot , dasgo ihttin mii jápmit » .
Allet fillehala !
« Heajos searvi bilida buriid dábiid » .
Gohccájehket , allet ge suddut !
Din searvvis leat muhtumat geat eai dovdda Ipmila . Lea heahpadin didjiide ahte mun ferten dadjat dan .
Muhto muhtun dáidá jearrat : « Mo jábmit bajásčuožžilit ; makkár rumaš sis dalle lea ? »
Don jalla !
Dat maid don gilvvát , ii eallá muđuid go dat vuos jápmá .
Ja dat maid don gilvvát , dat han ii leat dat šaddu mii ihtá , muhto bođu gordnečalbmi , jogo nisogordnečalbmi dahje eará siepmanšládja .
Muhto Ipmil addá dasa dan hámi maid dáhttu , ja juohke siepman oažžu sierra hámi .
Ii buot heakkalaččain ge leat seammálágán hápmi , muhto olbmuin , šibihiin , lottiin ja guliin lea buohkain iežaset hápmi .
Leat maiddái almmálaš rupmašat ja eatnanlaš rupmašat , muhto almmálaš rupmašiin lea áibbas earálágán čáppisvuohta go eatnanlaš rupmašiin .
Beaivvážis , mánus ja násttiin lea sierralágán čáppisvuohta .
Ja nuppi nástti čáppisvuohta lea eará lágán go nuppi .
Nu lea maiddái jábmiid bajásčuožžilemiin .
Dat mii gilvojuvvo , lea nohkavaš , muhto dat mii bajásčuožžila , lea nohkameahttun .
Dat mii gilvojuvvo gudnehisvuođas , bajásčuožžila hearvásvuođas .
Lunddolaš rumaš gilvojuvvo , vuoiŋŋalaš rumaš bajásčuožžila .
Jos lea lunddolaš rumaš , de lea maiddái vuoiŋŋalaš rumaš ge .
Dasgo nu lea čállojuvvon : Vuosttaš olmmoš , Áttán , šattai ealli siellun . Maŋit Áttán šattai vuoigŋan mii addá eallima .
Vuosttažin ii nappo boađe vuoiŋŋalaš , muhto dat mii lea lunddolaš .
Easkka das maŋŋil boahtá dat mii lea vuoiŋŋalaš .
Vuosttaš olmmoš bođii eatnamis ja ráhkaduvvui eatnamis , nubbi olmmoš boahtá almmis .
Nugo duot eatnanlaš olmmoš lei , dakkárat leat buot eatnanlaš olbmot . Ja nugo duot almmálaš olmmoš lea , nu šaddet buot almmálaš olbmot .
Nugo mii leat eatnanlaš olbmo láhkásaččat , nu mii šaddat almmálaš olbmo láhkásažžan ge .
Ja dan mun cealkkán , oskuguoimmit : Oažži ja varra ii sáhte árbet Ipmila riikka , ii ge nohkavašvuohta ge sáhte árbet nohkameahttunvuođa .
Gehččet , mun muitalan didjiide čiegusvuođa : Eat mii buohkat oađđá jápmimii , muhto mii buohkat nuppástuvvat , fáhkkestaga , čalbmeravkalanbottus , go maŋimuš básona jietna čuodjá .
Dasgo báson čuodjá , jábmit bajásčuožžilit nohkameahttunvuođas , ja mii nuppástuvvat .
Dasgo dat mii lea nohkavaš , ferte gárvvohuvvot nohkameahttunvuođain , ja dat mii lea jámolaš , ferte gárvvohuvvot jápmemeahttunvuođain .
Ja go dat mii lea nohkavaš , lea gárvvohuvvon nohkameahttunvuođain , ja dat mii lea jámolaš , lea gárvvohuvvon jápmemeahttunvuođain , dalle ollašuvvá dat sátni mii lea čállojuvvon : Jápmin lea njielastuvvon ja vuitojuvvon .
Jápmin , gos lea du seahčagas ?
Jápmin , gos lea du vuoitu ?
Jápmima seahčagas lea suddu , ja suttu fápmu lea láhka .
Muhto giittus lehkos Ipmilii , gii addá midjiide vuoittu Hearrámet Jesus Kristusa bokte !
Dan dihtii , ráhkis oskuguimmiidan , bissot nanusin ja lihkatmeahttumin , ja dahket álo Hearrá barggu áŋgirvuođain .
Dihtet ahte Hearrá ii divtte din barggu mannat duššás .
Dasto , mii guoská dan ruhtaveahkái mii čoggojuvvo searvegoddái , de dahket nugo mun lean gohččon Galatia searvegottiid .
Vahku vuosttaš beaivvi galgá juohkehaš čohkket ja bidjat ruđa sierra váris mielde , amas ruhtačoaggin álgit easkka dalle go mun boađán .
Go mun boađán din lusa , de attán rápmičállosa sidjiide geaidda dii luohttibehtet , ja vuolggahan sin Jerusalemii attáldagain .
Jos orru dárbbašlaš ahte mun ge vuolggán , de mii mannat ovttas .
Mun boađán din lusa go lean fitnan Makedonias , dasgo mun áiggun dušše mátkkoštit Makedonia čađa .
Muhto din luhtte gal bisánan muhtun áiggi , vaikko olles dálvvi ge . Dasto dii sáhttibehtet ráhkkanahttit mu mátkái , gosa dal vulggežan .
Dán vuoro in áiggo dušše finadit din luhtte go manan meattá , muhto doaivvun beassat bisánit muhtun áigái , jos Hearrá dáhttu .
Efesosas mun orun hellodagaid rádjái , dasgo doppe leat rabas uvssat ja ollu bargu munnje , muhto leat maiddái ollu vuostálastit .
Jos Timoteus boahtá , de atnet fuola ahte son lea oadjebas din luhtte .
Dasgo son doaimmaha Hearrá barggu nugo mun ieš ge . Dan dihtii ii galgga oktage badjelgeahččat su .
Veahkehehket su joatkit mátkkis ráfis , vai son beassá máhccat mu lusa .
Mun ja oskuvieljat leat vuordimin su .
Min oskuvielja Apollosa mun lean ávžžuhan sakka vuolgit din lusa eará oskuvieljaiguin , muhto ii son dáhto vuolgit dál ; son boahtá go oažžu dili .
Gohcet , bissot nanusin oskkus , lehket jálut ja gievrrat !
Dahket buot ráhkisvuođas .
Oskuguoimmit , mun rávven din : Dii diehtibehtet ahte Stefanasa bearaš lei vuosttaš šaddu sin gaskkas geat dahke jorgalusa Akaias , ja ahte sii leat bálvališgoahtán bassi olbmuid viššalit .
Galgabehtet dii ge leat vuolibuččat dakkár olbmuide ja juohkehažžii gii bargá ja rahčá singuin .
Mun lean ilus go Stefanas ja Fortunatus ja Akaikos leat boahtán .
Sii leat geahpedan ohcalumi din maŋŋái ja arvvosmahttán mu ja din .
Atnet dakkáriid árvvus .
Asia eanangotti searvegottit celket didjiide dearvvuođaid .
Akvila ja Priska ja searvegoddi mii čoaggana sudno vissui , celket didjiide váimmolaš dearvvuođaid Hearrá nammii .
Buot oskuguoimmit celket dearvvuođaid .
Dearvvahallet guhtet guimmiideattet bassi cummáin !
Mun , Bávlos , čálán dáid dearvvuođaid gieđainan .
Jos guhtege ii ráhkis Hearrá , de lehkos garuhuvvon !
Marana ta !
Hearrá Jesusa árbmu lehkos dinguin !
Mu ráhkisvuohta lea dinguin buohkaiguin geat lehpet Kristus Jesusis .
Dearvvuođat Bávlosis , gii Ipmila dáhtu mielde lea Jesus Kristusa apoasttal , ja min oskuvieljas Timoteusis Ipmila searvegoddái Korintas ja buot bassi olbmuide miehtá Akaia .
Árbmu lehkos dinguin ja ráfi Ipmilis , Áhčisteamet , ja Hearrás Jesus Kristusis !
Máidnojuvvon lehkos Ipmil ja Hearrámet Jesus Kristusa Áhčči , árkkálmastinvuođa Áhčči ja buot jeđđehusa Ipmil !
Son jeđđe min buot min áŧestusain dainna jeđđehusain man mii ieža leat ožžon Ipmilis vai mii gis sáhtášeimmet jeđđet sin geat leat buot lágán áŧestusain .
Dasgo nugo mii leat valljogasat ožžon oasi Kristusa gillámušain , nu mii maiddái oažžut valljugasat dan jeđđehusa man Kristus addá .
Jos mii áŧestuvvat , de dat šaddá didjiide jeđđehussan ja bestojupmin .
Jos mii jeđđejuvvot , de dalle maiddái dii ge jeđđejuvvobehtet ja nanusmuvvabehtet gierdat daid seammá gillámušaid maid mii ge fertet gillát .
Mii luohttit nannosit didjiide , dasgo mii diehtit ahte nugo dis lea oassi gillámušas , nu dis lea maiddái oassi jeđđehusas .
Oskuguoimmit , mii dáhtošeimmet din diehtit makkár áŧestusaid mii vásiheimmet Asia eanangottis .
Dat ledje nu badjelmearálaš lossadat ahte mii velá eahpidišgođiimet gájošeimmet go heaggamet ge .
Mii navddiimet iežamet juo dubmejuvvon jápmimii , amamet šat luohttit alcceseamet , muhto Ipmilii , guhte bajásčuoččáldahttá jábmiid .
Ja son gájui min stuora heakkaheađis , ja son dahká dan fas .
Sutnje mii dorvvastit ahte son ain gádju min .
Maiddái dii ge galgabehtet veahkehit min rohkosiiddádetguin , vai eatnagat giitalivčče Ipmila dan árpmu ovddas man mii leat ožžon go eatnagat leat rohkadallan min ovddas .
Dát lea min rápmi , nugo min oamedovdu duođašta ahte mii leat eallán dáppe máilmmis , ja erenoamážit din gaskkas , bassivuođas ja duođalašvuođas mii boahtá Ipmilis .
Ii aivve olmmošlaš viisodat leat láiden min , muhto Ipmila árbmu .
Das maid mii čállit didjiide ii leat eará oaivil go dat maid dii ieža sáhttibehtet lohkat ja áddet .
Ja mun doaivvun ahte dii áddebehtet ollásit dan maid gal lehpet juo ádden muhtun muddui , ahte mii leat din rápmi ja dii lehpet min rápmi Hearrá Jesusa beaivvi .
Dáinna luohttámušain mun dáhtton vuolgit vuos din lusa vai dii oččošeiddet ođđa duođaštusa Ipmila árpmus .
Mun dáhtton galledit din sihke Makedoniai mátkkoštettiin ja doppe máhcadettiin vai dii livččiidet dasto sáhttán ráhkkanahttit mu Judea mátkái .
Go dáhtton dán , guovttádasten go mun dalle ?
Vai leat go mu áigumušat dušše iežan dáhtu mielde , nu ahte mieđihan go duođaid dáhtun biehttalit ?
Ipmil sáhttá duođaštit ahte mii eat mieđit ja biehttal oktanaga .
Dasgo Ipmila Bárdni , Jesus Kristus , gean mii leat sárdnidan didjiide , mun , Silvanus ja Timoteus , son ii seaguhan mieđiheami ja biehttaleami , muhto sus lei álo mieđiheapmi .
Dasgo buot Ipmila lohpádusat , man eatnagat dat ležžet , leat nannejuvvon su siste .
Danne mii maiddái cealkit Ipmilii gudnin su bokte : Amen .
Ipmil ieš čatná min ja din nannosit Kristusii ja vuoiddada min . Son lea maiddái merken min seaillainis ja addán midjiide Vuoiŋŋas dáhkádussan min váimmuide .
Mun gohčun Ipmila duođašteaddjin ja bijan heaggan nannejupmin dasa ahte seastin dihtii din lean maŋidan mátkán Korintii .
Ii leat nu ahte mii dáhtošeimmet mearridit din oskku , muhto mii leat bargoguoimmit guđet bargat didjiide illun . Dii han bissubehtet oskkus .
Mun ledjen mearridan ahte in vuolgge oktii vel din lusa jos dat dagaha didjiide morraša .
Dasgo jos mun buvttán didjiide morraša , gii dalle illudahtášii mu earet go dat gean mun lean dagahan morrašii ?
Ja aiddo dan dihtii mun čállen nugo čállen , amaset sii geat galge illudahttit mu , buktit munnje morraša go mun boađán . Ja mun luohtán didjiide buohkaide ja dieđán ahte mu illu lea maiddái din .
Mun čállen didjiide stuora morrašis ja váibmobákčasis ja ollu gatnjaliiguin .
In mun čállán buktin dihtii didjiide morraša , muhto vai dii áddešeiddet man čiekŋalit mun ráhkistan din .
Jos muhtun lea buktán morraša nubbái , de son ii leat buktán morraša dušše munnje , muhto didjiide buohkaide , goitge muhtun muddui , aman dadjat menddo ollu .
Muhto dákkár olbmui lea doarvái dat ráŋggáštus man eatnasat dis leat juo addán sutnje . Dál galgabehtet baicca addit sutnje ándagassii ja jeđđet su amas áibbas vuodjut morrašii .
Danne mun rávven din ain čájehit sutnje stuora ráhkisvuođa .
Aiddo dan dihtii mun čállen ge didjiide vai oččošin diehtit lehpet go gulolaččat juohke láhkái .
Sutnje geasa dii addibehtet ándagassii , attán mun ge ándagassii .
Ja go lean addán ándagassii , jos mus oppa leažžá ge mihkkege mas addit ándagassii , de lean addán ándagassii din dihtii Kristusa muođuid ovddas amas Sáhtán beassat beahttit min .
Dasgo mii diehtit makkár juonat sus leat .
Go mun bohten Troasii sárdnidit Kristusa evangeliuma , de Hearrá rabai munnje uvssa .
Mun in dattege ráfáiduvvan , dasgo mun in gávdnan oskuvielljan Titusa doppe .
Danne dahken sidjiide dearvvuođaid ja jotken Makedoniai .
Muhto giitu lehkos Ipmilii , guhte álo addá midjiide oasi Kristusa vuoitufárus ja diktá min juohke báikái viiddidit dieđu su birra dego njálgga hája .
Dasgo mii leat Kristusa njálgga hádja mii badjána Ipmila ovdii ; dan hája dovdet sihke sii geat bestojuvvojit , ja sii geat mannet gáđohussii ; sidjiide geat mannet gáđohussii , mii leat jápminhádja mii doalvu jápmimii , muhto sidjiide geat bestojuvvojit , mii leat eallinhádja mii doalvu eallimii .
Gii sáhttá dán dahkat ?
Dasgo mii eat leat nugo eatnagat geat verrošit Ipmila sániin , muhto danne go Ipmil lea vuolggahan min , mii sárdnidit dan duođalaččat Kristusa bálvaleaddjin Ipmila muođuid ovddas .
Rábmogoahtit go mii fas iežamet ?
Dahje dárbbašit go mii gal máidnungirjjiid didjiide dahje dis , nugo muhtumat ?
Eat dárbbaš , dii lehpet ieža min máidnungirji , čállojuvvon min váimmuide , ja buot olbmot sáhttet dovdat ja lohkat dan .
Lea čielggas ahte dii lehpet Kristusa girji man Ipmil lea oskkildan midjiide čállit . Dat ii leat čállojuvvon bleahkain , muhto ealli Ipmila Vuoiŋŋain , ii geađgetávvaliidda , muhto olbmuid váimmuide .
Dákkár dorvu Ipmilii boahtá Kristusis .
Ii leat nu ahte mis livččii fápmu jurddašit maidege dego dat boađášii alddámet .
Min fápmu boahtá Ipmilis guhte attii midjiide návccaid bálvalit ođđa lihtu , mii ii leat vuođđuduvvon bustávaide , muhto Vuigŋii .
Dasgo bustávva goddá , muhto Vuoigŋa dahká eallin .
Juo jápmima bálvalusas man mearrádusat ledje čullojuvvon bustávaiguin geađgái , lei dakkár hearvásvuohta ahte israellaččat eai duddon geahččat Movssesa muođuide ; dat báite nu garrasit , vaikko dat hearvásvuohta lei nohkavaš .
Man ollu eanet hearvásvuohta lea ge Vuoiŋŋa bálvalusas !
Jos duođaid dubmehusa bálvalusas lei nu ollu hearvásvuohta , man ollu eanet hearvásvuohta de fertešii leat vanhurskkisvuođa bálvalusas ? Duođaid , dat mas oktii lei hearvásvuohta , lea manahan hearvásvuođas danne go dál lea boahtán hearvásvuohta mii lea mihá stuorit .
Dasgo jos das mii jávkkai , lei hearvásvuohta , man ollu eanet hearvásvuohta de lea ge das mii bistá .
Go mis nappo lea dakkár doaivu , de mii leat roahkkadat . Mii eat daga nugo Movsses gii bijai liinni muođuid ovdii amaset israellaččat oaidnit mo dat mii lei jávkamin , nogai .
Muhto sin miella buoššuduvvui . Dát liidni lea báhcán sadjásis gitta otná beaivvi rádjái go sii lohket boares lihtu girjjiid , dasgo dušše Kristus váldá dan eret .
Duođaid , vel otná beaivvi ge lea liidni sin váimmuid alde álo go Movssesa láhka lohkkojuvvo .
Muhto go sii jorgalit Hearrá guvlui , de liidni váldojuvvo eret .
Hearrá lea Vuoigŋa , ja doppe gos Hearrá Vuoigŋa lea , doppe lea friddjavuohta .
Ja mii buohkat geat geahččat govččakeahtes muođuiguin Hearrá hearvásvuođa dego speadjalis , nuppástuvvat seammá hearvásvuođa govvan , hearvásvuođas hearvásvuhtii . Dát boahtá Hearrás gii lea Vuoigŋa .
Dan dihtii go Ipmil árpmustis lea bidjan min dán bálvalussii , de mii eat hearddohuva .
Mii hilgut buot suollemas ja heahpatlaš daguid . Eat geavat gávvilvuođa eat ge nuppástuhte Ipmila sáni ge . Mii baicca almmuhit rahpasit duohtavuođa , ja dat lea min duođaštus juohkehažžii , guhte guorahallá oamedovddus Ipmila muođuid ovddas .
Jos min evangelium oppa leažžá ge čihkosis , de dat lea čihkosis sidjiide geat mannet gáđohussii .
Dasgo dálá máilmmi ipmil lea čalmmehuhttán eahpeoskkolaččaid miela amaset oaidnit čuovgasa mii báitá Kristusa hearvásvuođa evangeliumis , Kristusa , guhte lea Ipmila govva .
Eat mii sárdnit iežamet , muhto Jesus Kristusa Hearrán ja min gis din bálvaleaddjin Jesusa dihtii . Dasgo Ipmil guhte celkkii : « Báitos čuovga seavdnjadasas » , son lea maiddái diktán čuovgasa báitit min váimmuide , vai diehtu Ipmila hearvásvuođa birra báittášii Jesus Kristusa muođuin .
Muhto dát dávvir mis lea láirálihtis , vai šaddá čielggasin ahte dákkár stuora fápmu boahtá Ipmilis , ii ge mis alddámet .
Mii áŧestuvvat juohke láhkái , muhto eat hearddohuva ; mii leat ráđeheamit , muhto eat doaivvoheamit ; mii leat doarrádallojuvvon , muhto eat guđđojuvvon ; mii leat časkojuvvon eatnamii , muhto eat duššaduvvon .
Mii guoddit álo Jesusa jápmima iežamet rupmašis , vai Jesusa eallin ge almmustuvašii min rupmašis .
Dasgo velá dan botta ge go mii leat ain eallimin , mii addojuvvot álelassii jápmimii Jesusa dihtii vai Jesusa eallin ge almmustuvašii min nohkavaš rupmašis .
Min siste bargá nappo jápmin , muhto din siste eallin .
Mis lea seammá oskku Vuoigŋa , nugo lea čállojuvvon : Mun oskon , danne sárdnon .
Mii ge oskut , ja danne mii sárdnut .
Mii han diehtit ahte son guhte bajásčuoččáldahtii Hearrá Jesusa , bajásčuoččáldahttá min ge suinna ja divvu min dinguin iežas ovdii .
Buot dát dáhpáhuvvá din dihtii vai árbmu álo viidánivččii ja giitalus lassánivččii valjit Ipmilii gudnin .
Danne mii eat arvvahuva .
Vaikko velá min olgguldas olmmoš billistuvvo ge , de min siskkildas olmmoš ođasmahttojuvvo almmatge beaivvis beaivái .
Dat áŧestusat maid mii dál fertet guoddit , leat geahppasat , ja buktet midjiide agálaš hearvásvuođa valljugas riggodaga . Ii mis leat čalmmiid ovddas dat mii lea oinnolaš , muhto dat mii lea oaidnemeahttun .
Dasgo dat mii lea oinnolaš , bistá muhtun áiggi , muhto dat mii lea oaidnemeahttun , bistá agálaččat .
Mii han diehtit ahte jos min eatnanlaš viessu , min goahti , gaikkoduvvo ge , de mis lea almmis viessu mii boahtá Ipmilis , agálaš viessu , mii ii leat huksejuvvon gieđaiguin .
Dáppe ealedettiineamet mii šuohkkit ja áibbašit gárvvohuvvot almmálaš viesuineamet .
Dasgo go mii leat gárvvohuvvon dainna , de eat leat šat álás .
Nu guhká go mii ássat dan goađis , mii šuohkkit váivvisteamet . Eat mii dáhto nuolahuvvot , muhto baicca gárvvohuvvot vai eallin njielašii dan mii lea jámolaš .
Aiddo dán várás Ipmil lea gárvvistan min ja dáhkádussan son lea addán midjiide Vuoiŋŋa .
Dan dihtii mii leat álo dorvvolaččat , vaikko diehtit ge ahte mii eat leat Hearrá luhtte nu guhká go min ruoktu lea rumaš .
Dasgo mii vádjolit oskkus , oainnekeahttá .
Mii leat goit dorvvolaččat , vaikko milloseabbot guođášeimmet rupmaša ja dáhtošeimmet leat ruovttus Hearrá luhtte .
Danne mii viggat leat sutnje dohkálaččat , leažžat dal ruovttus dahje eret .
Dasgo mii buohkat galgat boahtit Kristusa duopmostuolu ovdii , gos juohkehaš oažžu dan mielde maid lea dahkan dán eallimis , lehkoset dal buorit dahje bahát .
Danne go mii nappo dovdat Hearrá balu , mii geahččalit hálahit olbmuid . Ipmil gal dovdá min dakkárin go mii duođaid leat , ja mun doaivvun ahte dii ge duođaid dovdabehtet min nu .
Mii eat rámit iežamet fas didjiide , muhto mii dáhttut addit didjiide vejolašvuođa rábmot iežadet min dihtii vai dii sáhtášeiddet vástidit sidjiide geat rábmojit olbmo olgguldas hámi , eai ge dan mii lea olbmo váimmus .
Jos mii leažžat mielaid haga , de dat lea Ipmila dihtii .
Jos mii leažžat olles mielain , de dat lea din dihtii .
Dasgo Kristusa ráhkisvuohta geatnegahttá min . Mii han diehtit ahte jos okta lea jápmán buohkaid ovddas , de sii buohkat leat jápmán .
Ja son jámii buohkaid ovddas amaset sii geat leat eallimin šat eallit alcceseaset , muhto sutnje guhte jámii ja bajásčuoččáldahttojuvvui sin ovddas .
De mii eat šat árvvoštala geange olmmošlaččat .
Ja jos mii vel livččiimet ge dovdan Kristusa nu , de eat šat daga dan .
Dalle juohkehaš guhte lea Kristusis , lea ođđa sivdnádus . Boares dilli lea vássán , ođđa dilli lea boahtán .
Muhto buot dát boahtá Ipmilis guhte soabahii min iežainis Kristusis ja oskkildii midjiide soabahusa bálvalusa .
Kristusis Ipmil soabahii máilmmi iežainis , ii ge son logahallan sidjiide sin rihkkumiid ; midjiide son oskkildii sága dan soabahusa birra .
Mii leat dalle Kristusa áirasat , nu ahte lea dego Ipmil ieš rávvešii din min bokte .
Mii átnut Kristusa beales : Soabadehket Ipmiliin !
Ipmil lea min dihtii dahkan suddun su guhte ii dovdan suttu , vai mii su siste oččošeimmet Ipmila vanhurskkisvuođa .
Ipmila bargoguoibmin mii rávvet dál din ge amadet duššás váldit vuostái Ipmila árpmu .
Dasgo son cealká : Mun gullen du rohkosa rivttes áigái ja veahkehin du bestojumi beaivvi .
Gehččet , dál lea rivttes áigi , dál lea bestojumi beaivi !
Eat mii áiggoše vearránahttit olbmuid mange láhkái amas min bálvalus láitojuvvot .
Muhto juohke láhkái mii čájehit iežamet Ipmila bálvaleaddjin : Mii gierdat áŧestusaid , heađi ja balu , cábmojumi , giddagasa ja vuostálastima , garra barggu , idjagohcima ja nealggi ; mii leat buhttásat , mis lea diehtu , gierdavašvuohta ja ustitlašvuohta , mis lea Bassi Vuoigŋa , duođalaš ráhkisvuohta , duohtavuođa sátni ja Ipmila fápmu .
Vanhurskkisvuohta lea min vearju man mii geavahit sihke falleheapmái ja suodjaleapmái , gudnis ja eahpegudnis , go mis beaggá sihke buorre ja bahá ; mii navdojuvvot fillejeaddjin , muhto mii sárdnut duođa ; mii leat dovdameahttumat , muhto buohkat dovdet min ; mii leat lahka jámi , muhto mii goit eallit ; mii leat illástuvvon , muhto eat leat goit goddojuvvon ; mii moraštit , muhto leat álo ilus ; mii leat geafit , muhto riggudahttit olusiid ; mis ii leat mihkkege , muhto mis lea almmatge buot .
Korintalaččat , mii leat sárdnon njulgestaga didjiide ja leat rabastan váimmuideamet .
Mii eat leat dahppan váimmuideamet didjiide , muhto dii lehpet dahppan váimmuideattet midjiide .
Bálkkašeapmin dása , mun sártnun didjiide nugo mánáidasan , rabastehket dii ge váimmuideattet !
Allet mana eahpeoskkolaččaiguin ovttaide áissáide !
Dasgo mii dahkamušaid lea vanhurskkisvuođas lágahisvuođain , ja mii servvolašvuođaid lea čuovgasis seavdnjadasain ?
Mo ba Kristus ja Beliar sáhttiba leat ovtta oaivilis ? Mii ovttastahttá oskkolačča eahpeoskkolaččain ?
Mo Ipmila tempel ja eahpeipmilat sáhttet soabadit ?
Dasgo mii leat ealli Ipmila tempel , nugo Ipmil lea cealkán : Mun áiggun ássat ja vádjolit sin gaskkas ; mun dáhtun leat sin Ipmil , ja sii leat mu álbmot .
Danne Hearrá cealká : Vulget eret sin searvvis , sierranehket sis , allet guoskkat maidege buhtismeahttumiid !
Dalle mun válddán din vuostái ; mun áiggun leat din áhčči , ja dii lehpet mu bártnit ja nieiddat . Nu cealká Hearrá , Buotveagalaš .
Ráhkkásiiddán , go mis leat dákkár lohpádusat , de buhtistehkot iežamet buot das mii sáhttá duolvvidit rupmaša ja sielu , ja Ipmila balus ollašuhttot min bassindahkkojumi .
Addet midjiide saji váimmusteattet !
Mii eat leat verrošan geainnage , eat ge leat vahágahttán dahje beahttán geange .
Mun in cealkke dán dubmen dihtii din . Mun han lean juo cealkán ahte dii lehpet min váimmus jogo mii jápmit dahje eallit .
Mun luohtán didjiide ja rámádalan dis .
Dii lehpet addán munnje valjit jeđđehusa , ja mun lean ožžon badjelmearálaš ilu buot min áŧestusain .
Go mii bođiimet Makedoniai , de eat ožžon veaháge mášu . Buot lágán áŧestusat , olgguldas riiddut ja siskkáldas balut baicca deaividedje min .
Muhto Ipmil guhte jeđđe dorvvohemiid , jeđđii min ge go divttii Titusa boahtit min lusa . Mii oaččuimet jeđđehusa das go son bođii , muhto maiddái das go son ieš lei ožžon jeđđehusa din luhtte .
Son muitalii mo dii áibbašehpet oaidnalit muinna , moraštehpet mu dihtii ja bealuštehpet mu stuora áŋgirvuođain , nu ahte mun illosin velá eanebut .
Vaikko mun velá moraštahtten ge din ovddit girjjiinan , de in gáđa go čállen dan .
Jos ovdal leaččan gáhtan dan , danne go dieđán ahte dat girji moraštahtii din , vaikko vel oanehis áigái ge , de dál gal lean ilus , in danne go dii šattaidet morrašii , muhto danne go moraš doalvvui din jorgalussii .
Dii šattaidet morrašii Ipmila dáhtu mielde ; mii nappo eat leat dahkan didjiide maidege vahágiid .
Moraš mii lea Ipmila dáhtu mielde , duddjo jorgalusa ja doalvu bestojupmái , ja dan ii gáđa oktage .
Muhto máilmmi moraš duddjo jápmima .
Gehččet maid dat moraš mii lea Ipmila dáhtu mielde , lea duddjon din siste : Dat dagai din duođalaččabun buot áššiin ja geargadeabbon bealuštit iežadet ; dat suhttada ja baldá din , dat boktá ohcaleami mu maŋŋái , din áŋgirvuođa ja hálu ráŋggáštit dan mii ii leat riekta .
Dii lehpet juohke láhkái čájehan ahte dii lehpet sivaheamit dán áššis .
Go mun čállen didjiide , de in čállán su dihtii gii dagai veriid , in ge su dihtii gii gillái veriid , muhto vai dii oainnášeiddet Ipmila ovddas man čieŋal lea din áŋgirvuohta min guovdu .
Buot dát lea arvvosmahttán min .
Ja mii illudeimmet velá sakka eambbo go oinniimet Titusa nu ilus . Dii lehpet buohkat arvvosmahttán su .
Mun in dárbbašan heahpanit go lean rábmon din sutnje .
Muhto nugo mii álo leat cealkán duohtavuođa didjiide , de lea maiddái dat maid mii leat cealkán Titusii , čájehuvvon duohtan .
Su váibmu lieggana go son muitá man gulolaččat dii leiddet , ja mo dii válddiidet su vuostái baluin ja doarggistemiin .
Mun illudan das ahte sáhtán luohttit didjiide juohke dáfus .
Oskuguoimmit , mii dáhttut muitalit didjiide dan árpmu birra man Ipmil lea čájehan Makedonia searvegottiide .
Geahččalusain ja áŧestusain sis lei badjelmearálaš illu , ja vaiko sii elle čiekŋalis geafivuođas , de sii ledje riggát ja árvasat .
Dasgo sii adde váriset mielde , ja juoba badjel váriset ja eaktodáhtolaččat ; dan mun sáhtán duođaštit .
Sii átno mis váimmolaččat beassat mielde oktasaš bálvalussii bassi olbmuid várás .
Eai ge sii dahkan duššefal nu mo mii doaivvuimet , muhto ovddimustá sii adde iežaset Hearrái , ja dasto midjiide , nugo Ipmil dáhttu .
Danne mii siđaimet Titusa ollašuhttit dan ruhtačoaggima man son lei juo álggahan din gaskkas .
Dis han lea buot nu valjis : osku , sárdnideapmi , diehtu , buot áŋgirvuohta ja ráhkisvuohta midjiide . De šaddet dii ge árvvasin go addibehtet dán attáldaga !
Dát maid mun cealkkán , ii leat gohččun , muhto mun namuhan earáid áŋgirvuođa iskkadallat lea go din ráhkisvuohta duođalaš .
Dii han dovdabehtet Hearrámet Jesus Kristusa árpmu ; son lei rikkis muhto din dihtii šattai váivvážin , vai dii rikkošeiddet su váivvášvuođa bokte .
Mun cealkkán dál oaivilan mii sáhttá leat didjiide ávkin . Diibmá álggiidet bures dán barggu ja dis lei buorre dáhttu .
Ollašuhttet dál dan barggu vai sáhtášeiddet ollašuhttit dan seammá buriin dáhtuin go álggaheiddet dan , ja addet váriideattet mielde .
Jos mii addit buriin dáhtuin váriideamet mielde , de attáldaga árvu mihtiduvvo dan ektui mii mis lea , ii ge dan ektui mii mis ii leat .
In mun oaivvil ahte go earáid dilli buorrána de din dilli hedjonivččii , muhto ahte livččii seammá buorre dilli .
Dán vuoru dis lea valljivuohta ja sáhttibehtet veahkehit earáid vádjitvuođa . Nuppi vuoru sis lea valljivuohta ja sáhttet veahkehit din go dis lea vádjitvuohta .
Nu šattašii buohkaide seammá dilli , nugo lea čállojuvvon : Sus gii čokkii ollu , ii lean liiggás , ii ge sus gii čokkii uhcán , váilon mihkkege .
Giitu lehkos Ipmilii gii bovttii seammá áŋgirvuođa Titusa váibmui go mis ge lea din guovdu !
Son mieđihii go mii siđaimet veahki , ja ieš son lei nu áŋgir ahte mielastis vulggii din lusa .
Su mielde mii vuolggahit dan oskuvielja gean evangeliuma barggu buot searvegottit rábmojit . Ii ge dušše dan , muhto searvegottit leat maiddái válljen su vuolgit min mielde mátkeguoibmin dainna skeaŋkkain man mii doaimmahit Hearrá gudnin ja čájehit min buori dáhtu .
Mii dáhttut vealtat buot moaitámušain dán stuora ruhtaveahki hárrái man mii doaimmahit . Midjiide lea deaŧalaš dahkat dan mii lea riekta , ii dušše Hearrá čalmmiid ovddas , muhto maiddái olbmuid čalmmiid ovddas ge .
Dán guoktá mielde mii vuolggahit velá ovtta oskuvieljaineamet ; su áŋgirvuođas leat mii dávjá ja máŋgga láhkái oaidnán ovdamearkkaid .
Sus lea nana luohttámuš didjiide , ja dan dihtii son lea dál velá áŋgiret .
Muitet ahte Titus lea mu bargoguoibmi ja veahkki din luhtte . Ja duot eará oskuvieljat leaba searvegotti áirasat Kristusa gudnin .
Čájehehket dan dihtii sidjiide din ráhkisvuođa , ja diktet sin ja buot searvegottiid oaidnit ahte mii eat leat duššiid dihtii rábmon din .
In mun dárbbaš čállit didjiide dan veahki birra mii lea bassi olbmuid várás , dasgo mun dieđán man geargadat dii lehpet veahkehit , ja mun lean rábmon din makedonialaččaide cealkkedettiin ahte dii akaialaččat leiddet juo diibmá gárvásat .
Ja dat áŋgirvuohta man dii lehpet čájehan , lea šaddan arvvosmahttojupmin olusiidda .
Dál mun vuolggahan oskuvieljaid din lusa amas min rápmi din hárrái šaddat duššin ja vai dii livččiidet gárvásat , nugo mun lean cealkán .
Dasgo jos muhtun makedonialaččat boađášedje mu fárus ja gávnnašedje din ráhkkankeahttájin , de dat šattašii midjiide heahpadin , ja velá didjiide ge , go mii leat luohttán didjiide .
Dan dihtii mun atnen dárbbašlažžan bivdit oskuvieljaid mannat din lusa min ovdal ja ovddalgihtii gárvvistit dan attáldaga man dii lehpet lohpidan , vai dat livččii gárvvis ja čájehivččii ahte dii addibehtet árvasit , ehpet ge hánástala .
Muhto muitet : Dat gii gilvá hátnásit , láddje hátnásit , ja dat gii gilvá valljugasat , láddje ge valljugasat .
Addos juohkehaš váimmus mielde , allos vuostemielain dahje bákkus , dasgo Ipmil ráhkista ilolaš addi .
Ja Ipmilis lea fápmu addit didjiide árvasit buot su árpmus , vai dis álelassii ja juohke dáfus livččii buot maid dárbbašehpet , ja sáhtášeiddet dahkat buot buori , nugo lea čállojuvvon : Son addá árvasit gefiide , su vanhurskkisvuohta bissu agálašvuhtii .
Son guhte addá gilvái gilvagiid , ja láibbi maid borrat , son addá didjiide ge gilvagiid , diktá daid šaddat eatnatgeardásažžan ja dahká din vanhurskkisvuođa šattu stuorisin .
Dii šaddabehtet juohke dáfus rikkisin vai attášeiddet árvasit , ja dát árvvasvuohta duddjo giitalusaid Ipmilii go mii buktit skeaŋkka .
Dasgo dát bálvalus man dii ollašuhttibehtet dainna vehkiin , ii leat dušše bassi olbmuid dárbui , muhto maiddái rikkisvuohta mii dagaha olbmuid giitalit Ipmila .
Dainna vehkiin dii čájehehpet sidjiide ahte gudnejahttibehtet Ipmila go gulolaččat dovddastehpet Kristusa evangeliuma ja árvasit juogadehpet singuin ja buohkaiguin .
Danne sii maiddái rohkadallet din ovddas ja ohcalit din dan valljugas árpmu dihtii man Ipmil lea addán didjiide .
Ipmilii lehkos giitu cealkemeahttun attáldagas ovddas !
Mun , Bávlos , gii lean gul nu vuollegaš go lean din luhtte , muhto roahkkat go lean eará báikkis , nugo daddjo , mun rávven din Kristusa iežas vuollegašvuođain ja su buorrevuođain : Allet bágge mu čájehit mu isitvuođa go boađán din lusa , nugo mun áiggun čájehit sidjiide geat dadjet ahte mii eallit nugo dán máilmmi olbmot .
Mii gal eallit dán máilmmis , muhto mii eat soađa máilmmálaš láhkái .
Dasgo min vearjjut eai gula dán máilbmái , muhto dain lea Ipmila fápmu duššadit latniid .
Mii duššadit jierpmi árvalusaid ja buot čeavlás jurdagiid mat čuožžilit Ipmila dieđu vuostái , ja mii váldit fáŋgan juohke jurdaga ja bidjat dan jeagadit Kristusa .
Mii leat gárvásat ráŋggáštit buot eahpegulolašvuođa , nu fargga go din gulolašvuohta lea šaddan ollisin .
Dii dušše geahččabehtet olgguldas hámi !
Jos oktage leš vissis ahte son gullá Kristusii , de berre jurddašit ahte mii ge gullat Kristusii , seammá láhkái go son .
Jos mun ilá sakka rábmošin dan fápmudusa man Hearrá lea addán midjiide , fápmudusa nannet din ii ge gaikut din , de in šattaše heahpadin .
In mun čále dáid girjjiid dego hálidivččen balddihit din .
Muhtumat han dadjet : « Son čállá áŋgirit ja garrasit girjjiinis , muhto go ieš boahtá , de gal lea headju , ii ge oktage beroš su sártnis . »
Áddejehkos dat gii oaivvilda dan , ahte nugo mii dadjat didjiide girjjiineamet go leimmet eret , nu mii áigut dahkat go leat din luhtte .
Mii eat duostta lohkat iežamet sin searvái dahje veardidit iežamet singuin geat rábmojit iežaset .
Sii geavahit iežaset mihttun ja veardidit iežaset iežaineaset . Muhto dát dušše čájeha sin jierpmehisvuođa .
Mii eat dáhto rábmot iežamet mearehis láhkái , muhto mii dahkat dan dan mihtu mielde man Ipmil ieš lea addán midjiide , ahte mii olahivččiimet din .
Mii eat lávke min barggu rájiid badjel , nugo dagašeimmet jos eat livčče olahan din .
Muhto mii han leimmet vuosttažat geat bukte didjiide Kristusa evangeliuma .
Mii eat rábmo iežamet earáid barggus mii lea dahkkon olggobealde min barggu rájiid .
Muhto go din osku stuorru , de mis lea dat doaivva ahte min bargu din gaskkas ovdánivččii dan mihtu mielde mii lea biddjojuvvon midjiide .
Dalle mii sáhtášeimmet sárdnidit evangeliuma dain guovlluin mat leat din ge dobbelis rábmokeahttá iežamet dan barggus maid earát juo leat dahkan .
Dat guhte dáhttu rábmot , rámidehkos son Hearrá .
Dasgo dat gii rábmo iežas , ii ánssáš rámi , muhto dat gean Hearrá rábmo .
Mun sávašin ahte dii gierddašeiddet mus veahá jallavuođa ! Várra dii gierdabehtet ge dan !
Dasgo mun áŋgirušan din dihtii Ipmila iežas áŋgirvuođain .
Mun han lean lohpádallan din ovtta áidna irgái , Kristusii , ja mun dáhtun addit din sutnje dego buhtes nieidda .
Muhto mun balan ahte nugo gearpmaš fillii Eva gávvilvuođainis , nu din miella ge billašuvvá ja dii massibehtet duođalaš ja buhtes searvevuođa Kristusiin .
Dasgo jos muhtun boahtá ja sárdnida didjiide eará Jesusa go dan gean mii leat sárdnidan , dahje jos dii oažžubehtet eará vuoiŋŋa go dan maid juo lehpet ožžon , dahje jos dii vuostáiváldibehtet eará evangeliuma go dan maid juo lehpet vuostáiváldán , de dii gal áinnas gierdabehtet dan !
Mun in ane iežan guđege láhkái heajubun go dat mahkáš alla apoastalat .
Vaikko mun in leat sárdnás sárdnideaddji , de mus lea diehtu , ja dán mun lean álo ja buot gažaldagain buktán din ovdii .
Suddudin go mun go vuolidin iežan , ja sárdnidin didjiide Ipmila evangeliuma nuvttá , vai dii bajiduvvošeiddet ?
Mun lean dego rievidan eará searvegottiid go vuostáiválden sis bálkká vai beasašin bálvalit din .
Muhto go mun ledjen din luhtte ja gillájin vádjitvuođa , de in šaddan noađđin geasage din gaskkas , dasgo vieljat geat bohte Makedonias , adde munnje buot maid mun dárbbašin .
Juohke láhkái geahččalin vealtat šaddamis didjiide noađđin , ja dan mun áiggun álo dahkat .
Nu duođaid go Kristusa duohtavuohta lea mu siste , ii oktage Akaia guovllus beasa váldit dán rámi mus eret !
Manne ?
Mahká danne go in ráhkis din ?
Ipmil diehtá ahte mun ráhkistan din .
Dan maid mun dagan , áiggun joatkit aman addit liibba dakkáriidda geat vigget rábmot ahte sii leat nugo mii .
Sii leat vearri apoastalat , behtolaš bargit , geat dahkaluddet Kristusa apoasttalin .
Dat ii leat imaš , dasgo velá Sáhtán ge dahkaluddá čuovgasa eŋgelin .
Danne ii leat imaš ahte maiddái su bálvaleaddjit dahkaluddet vanhurskkisvuođa bálvaleaddjin .
Muhto sin loahppa šaddá sin daguid mielde .
Mun cealkkán fas : Allos oktage atno mu jallan . Muhto jos velá nu livččii ge , de diktet mu leat jalla vai mun ge beasašin veahá rábmot !
Dasgo dat maid mun dál cealkkán go rábmon , ii leat Hearrá dáhtu mielde , muhto muhtun lágán jallavuohta .
Muhto go nu olusat rábmojit olbmuid láhkái , de mun ge dáhtun dahkat dan .
Dii geat lehpet nu jierpmálaččat , gierdabehtet áinnas jallaid .
Dasgo dii han gierdabehtet ahte earát dahket din šlávvan , rievidit din , váldet din gitta , meannudit čeavlájit dinguin ja doškot din ámadadjui .
Heahpadis ferten dovddastit ahte mii leat leamaš menddo heajut dahkat dakkáriid !
Muhto dan maid earát dustet rábmot – dál mun sártnun jallavuođas – dan mun ge duosttan rábmot .
Leat go sii hebrealaččat ? Nu lean mun ge ! Leat go sii israellaččat ? Nu lean mun ge ! Leat go sii Abrahama nálli ? Nu lean mun ge !
Leat go sii Kristusa bálvaleaddjit ? Mun sártnun dego jalla go cealkkán ahte dan mun lean velá eambbo .
Mun lean bargan eambbo go sii , lean leamaš giddagasas dávjjit , lean gillán eambbo cápmáhallama ja lean dávjá leamaš heakkaváras .
Juvddálaččain mun lean viđa geardde ožžon golbmalogiovcci huškkastaga . Mun lean spihččejuvvon golbmii , oktii lean geđgejuvvon , golbmii lean leamaš čázeheađis , oktii rievddadin olles jándora ábi alde , čađat lean leamaš jođus , heakkaheađis eanuin , rievváriid gaskkas , heađis álbmotguimmiid ja olgoriikkalaččaid searvvis , heađis gávpogiin , meahcis , meara alde ja heađis vearri ustibiid gaskkas .
Mun lean bargan rahčan , dávjá lean gohcán , lean gillán nealggi ja goikku , dávjá atnán borakeahttáivuođa ja gollon biktasiid haga .
Dasa lassin deaddá moraš mu juohke beaivvi buot searvegottiid ovddas .
Jos oktage jorrala , de dat čuohcá munnje ge .
Jos oktage vearránahttojuvvo , de mun buolán siskkáldasan .
Jos mun galggašin rábmot , de rábmošin headjuvuohtan .
Mun in gielis , dan diehtá Ipmil , Hearrámet Jesusa Áhčči , guhte lea rámiduvvon agálaččat !
Go mun ledjen Damaskusis , de gonagas Aretasa eananhearrá fáktehii gávpoga váldin dihtii mu gitta .
Muhto mun luitojuvvojin gore siste gávpotmuvrra olggobeallái muhtun luŋkaráigge ja nu bessen su gieđain .
Mun ferten rábmot , vaikko dat ii leat masage ávkin . Mun muitalan dál daid oainnáhusaid ja almmustusaid mat leat boahtán Hearrás .
Mun dovddan muhtun olbmo guhte eallá Kristusis , gii rohttašuvai goalmmát albmái njealljenuppelot jagi dás ovdal , leaččai go rupmašis vai rupmaša olggobealde , dan in dieđe , muhto Ipmil diehtá dan .
Muhto dan mun dieđán ahte dát olmmái rohttašuvai Paradiásii , leaččai go rupmašis vai rupmaša olggobealde , dan in dieđe , muhto Ipmil diehtá dan , ja doppe son gulai cealkemeahttun sániid maid olbmos ii leat lohpi cealkit .
Dákkár olbmá mun áiggun rábmot , muhto iežan in dáhto rábmot , earet headjuvuohtan .
Muhto vaikko vel dáhtošin ge rábmot , de in goittotge livčče jalla , dasgo mun cealkkán duohtavuođa .
Muhto in mun daga dan amas oktage atnit mu alibun go oaidná ja gullá mu leamen .
Aman čeavlástallat daiguin alla almmustusaiguin mun lean ožžon seahčagasa oažžásan , Sáhtána eŋgela gii bagada mu aman čeavlugoahtit .
Golbmii mun ánuhin Hearrás váldit mus dan eret , muhto son vástidii : « Mu árbmu lea dutnje doarvái , dasgo mu fápmu ollašuvvá headjuvuođas . »
Danne mun hálidan mielastan rábmot headjuvuohtan vai Kristusa fápmu orošii mu siste .
Kristusa dihtii mun lean duhtavaš go lean headju , go hiddjiduvvon , go áŧestuvvon , go doarrádallojuvvon ja go lean váttis dilis .
Dasgo dalle go mun lean headju , de lean gievra .
Mun gal lean leamaš dego jalla !
Muhto dii han lehpet bággen mu dasa , dii guđet livččiidet galgan addit munnje rámi , dasgo in mun leat álggage heajut go dat mahkáš alla apoastalat , vaikko in leat ge mihkkege .
Mearkkaid mat duođaštit ahte mun lean apoasttal , lean dahkan stuora gierdavašvuođain din gaskkas : mearkadaguid , oavdudaguid ja fámolaš daguid .
Man láhkái dii leiddet heajubut go eará searvegottit , earet go dan ahte in leat leamaš dis noađđin ?
Addet munnje ándagassii dan vearrivuođa !
Goalmmádassii mun lean dál ráhkkaneamen vuolgit din lusa . Mun in áiggo leat didjiide noađđin , dasgo mun in bivdde dan mii dis lea , muhto din iežadet !
Ii han mánáid geatnegasvuohta leat čohkket opmodagaid vánhemiidda , muhto vánhemiid geatnegasvuohta lea čohkket mánáide .
Mun áiggun áinnas oaffaruššat din ovddas buot mii mus lea , velá iežan ge .
Ráhkkistehpet go dii mu unnibut , danne go mun ráhkistan din nu ollu ?
Muhtumat dis dadjet ahte soaitá leat nu ahte mun in váivvidan din , muhto mun lean mahkáš šluohkis ja lean vuoitán din behttosiin .
Lean go mun ávkkástallan dinguin ovttage olbmo bokte gean mun lean vuolggahan din lusa ?
Mun ávžžuhin Titusa vuolgit ja vuolggahin nuppi oskuvielja su mielde .
Lea go Titus ávkkástallan dinguin ?
Ean go moai leat bargan seammá vuoiŋŋas , ean go vácce seammá luottaid ?
Dii várra lehpet dál juo guhká jurddašan ahte mii leat bealušteamen iežamet din vuostái .
Eat , mii sárdnut Ipmila muođuid ovddas , Kristusa bálvaleaddjin .
Ja buot dáhpáhuvvá , ráhkkásiiddán , vai dii nanosmahttojuvvošeiddet .
Dasgo mun balan ahte go boađán , de in gávnna din dakkárin go hálidivččen , ja ahte dii gávdnabehtet mu dakkárin go ehpet dáhtoše .
Mun balan ahte gávnnan bealkkuid , gáđašvuođa , suhtu , iešbeaivválašvuođa , sealggebeale sárdnuma , bealljesavkkástallama , čeavláivuođa ja moivvi .
Vare Ipmil ii vuolidivčče mu din dihtii go mun fas boađán din lusa , ja vare mun beasašin morašteamis sin dihtii geat leat suddudan ovdal , eai ge leat vel ge jorgalan buhtismeahttun ja fuorás ja nuoskkes eallimisttiset .
Dál mun lean boahtimin goalmmádassii din lusa , dasgo : « Guovtti dahje golmma duođašteaddji sániiguin lea juohke ášši nannejuvvon . »
Mun lean juo ovdal rávven din ja cealkkán dál ge vaikko lean eret , sihke sidjiide geat leat suddudan ja buot earáide : Go mun boađán , de in seastte geange .
Dii han gáibidehpet duođaštusa das ahte Kristus sárdnu mu siste .
Son ii doaimma din gaskkas headjuvuođastis , muhto fámustis .
Son russiinávlejuvvui headjuvuođas , muhto son eallá Ipmila fámus , ja mii gis leat heajut su siste , muhto mii eallit din gaskkas suinna Ipmila fámus .
Guorahallet iežadet vádjolehpet go dii oskkus ; geahččalehket iežadet !
Ehpet go dovdda ahte Jesus Kristus lea din siste ?
Muđuid meaddádehpet . Mun doaivvun ahte dii áddebehtet ahte mii eat leat meaddádan .
Mii rohkadallat Ipmilii amadet dahkat maidege baháid , eat ge dan dihtii vai mii ieža orošeimmet dohkálaččat , muhto vai dii dagašeiddet buriid , vaikko orošii ge leamen ahte mii eat livčče dohkálaččat .
Dasgo mii eat veaje maidege duohtavuođa vuostái , muhto dušše duohtavuođa beale .
Mii illudit go mii ieža leat heajut ja dii lehpet gievrrat .
Ja aiddo dán mii rohkadallat ge , ahte dii šattašeiddet ollisin .
Danne mun čálán dán ovdal go boađán din lusa , aman dasto dárbbašit rávvet din garrasit dainna fámuin man Hearrá lea addán munnje nannemii ii ge gaikkodeapmái .
Loahpas , oskuguoimmit , illudehket !
Dahket buot rivttes ortnegis , vurkejehket mu rávvagiid , lehket ovttamielalaččat , ellet ráfis , de ráhkisvuođa ja ráfi Ipmil lea dinguin . Dearvvahallet guhtet guimmiideattet bassi cummáin !
Buot bassi olbmot dáppe celket didjiide dearvvuođaid .
Hearrá Jesus Kristusa árbmu , Ipmila ráhkisvuohta ja Bassi Vuoiŋŋa servvolašvuohta lehkos dinguin buohkaiguin !
Dearvvuođat Bávlosis , apoastalis , gii ii leat ožžon apoasttaldoaimmas olbmuin ii ge guđege olbmo bokte , muhto Jesus Kristusis ja Ipmil Áhčis , guhte bajásčuoččáldahtii su jábmiid luhtte .
Mun ja buot oskuvieljat guđet leat muinna dáppe , cealkit dearvvuođaid Galatia searvegottiide .
Árbmu lehkos dinguin ja ráfi Ipmilis , Áhčisteamet , ja Hearrás Jesus Kristusis , guhte attii iežas min suttuid ovddas vai beasttášii min eret dálá bahás máilmmis , Ipmila , Áhččámet , dáhtu mielde .
Sutnje lehkos gudni álo ja agálašvuhtii ! Amen .
Mun imaštan go dii nu johtilit lehpet jorgaleamen eret sus guhte rávkkai din Kristusa árpmuin ja lehpet jorgalan eará evangeliumii , vaikko eará evangelium ii oppa leat ge . Muhtumat leat dušše čádjidahttimin din ja dáhttot jorgut Kristusa evangeliuma .
Muhto jos velá mii dahje muhtun almmi eŋgel sárdnidišgoađášii didjiide eará evangeliuma go dan maid mii leat sárdnidan didjiide , de lehkos son garuhuvvon !
Mii leat cealkán dan ovdal , ja dál mun geardduhan dan : Jos oktage sárdnidišgođeš didjiide eará evangeliuma go dan maid dii lehpet vuostáiváldán , de lehkos son garuhuvvon !
Lean go dál oččodeamen olbmuid dohkkeheami vai Ipmila dohkkeheami ?
Lean go viggamin dahkat olbmuid miela mielde ?
Jos ain livččen dahkamin olbmuid miela mielde , de in livčče Kristusa bálvaleaddji .
Oskuguoimmit , mun dáhkidan didjiide ahte dat evangelium man mun lean sárdnidan , ii leat olbmuid hutkamuš .
In han mun leat dan ovttage olbmos ožžon ge , ii ge gii ge leat oahpahan dan munnje , muhto Jesus Kristus almmustahtii dan munnje .
Dii han lehpet gullan mo mun vádjolin dan áiggi go ellen juvddálaš oskkus , man garrasit mun doarrádallen Ipmila girku ja geahččalin duššadit dan .
Juvddálašvuođas mun ledjen vel áŋgiret go eatnagat mu álbmoga iežan ahkásaččain ja áŋgiruššen máddariid oahpahemiid beale vel garraseabbot .
Muhto Ipmil , guhte válljii mu juo eatniheakkas ja rávkkai mu árpmustis , mearridii almmustahttit Bártnis munnje , vai mun sárdnidivččen evangeliuma su birra báhkiniidda .
Dalle mun in vuos ohcan ráđi oaččis ja varas in ge vuolgán bajás Jerusalemii sin lusa geat ledje apoastalat mu ovdal .
Muhto mun vulgen Arabiai , ja dasto máhccen Damaskusii .
Easkka golbma jagi maŋŋil mannen Jerusalemii oahpásmuvvat Kefasiin , ja mun orron su luhtte vihttanuppelot beaivvi .
Eará apoastaliid mun in oaidnán , dušše Jáhkoba , Hearrá vielja .
Ipmila muođuid ovddas mun duođaštan ahte dat maid mun čálán dás , ii leat gielis !
Dasto vulgen Syriai ja Kilikiai .
Kristusa searvegottit Judeas eai dovdan mu velá dalle .
Sii ledje dušše gullan ahte son guhte ovdal doarrádalai min , sárdnida dál dan oskku man geahččalii duššadit , ja sii rámidedje Ipmila mu dihtii .
Njealljenuppelot jagi maŋŋil mannen fas bajás Jerusalemii Barnabasain , ja mus lei maiddái Titus fárus .
Ipmila almmustusa mielde mun mannen dohko ja čilgejin sidjiide , erenoamážit sidjiide geat adnojuvvojedje alla árvvus , dan evangeliuma man mun sárdnidan báhkiniid gaskkas .
Dasgo in hálidan ahte mun viegašin dahje livččen viehkan duššás .
Muhto ii oppa Titus ge , gii lei mu fárus , bággejuvvon birračuohpahuvvot vaikko son lei greikalaš .
Dát gáibádus bođii muhtun vearri oskuvieljain geat ledje njáhkan sisa iskkadit dan friddjavuođa mii mis lea Kristus Jesusis , vai oččošedje dahkat min šlávvan .
Muhto sidjiide mii eat vuollánan eat bottoža ge , vai evangeliuma duohtavuohta bisošii din luhtte .
Ja sii geat adnojuvvojedje árvvus – munnje ii mearkkaš maidege mat sii ležžet , dasgo Ipmil ii geahča olbmo hámi beallái – dát olbmot eai gáibidan mus maidege eambbo .
Sii baicca oidne ahte munnje lea oskkilduvvon sárdnidit evangeliuma sidjiide geat eai leat birračuhppojuvvon , nugo Biehtárii lea oskkilduvvon sárdnidit evangeliuma sidjiide geat leat birračuhppojuvvon .
Dasgo son guhte attii Biehtárii fámu leat apoasttalin sidjiide geat leat birračuhppojuvvon , lea maiddái dahkan mu ge báhkiniid apoasttalin .
Ja go Jáhkot , Kefas ja Johanas , geat adnojit searvegotti doarjjan , árvidedje makkár árpmu mun ledjen ožžon , de geigejedje munnuide Barnabasain olgeš gieđa searvevuođa mearkan , vai moai manašeimme báhkiniid lusa , ja sii sin lusa geat leat birračuhppojuvvon .
Muhto sii dáhtto munno muitit sin gefiid , ja dan mun lean álelassii viggan dahkat .
Muhto go Kefas dasto bođii Antiokiai , de láiten su almmolaččat , dasgo son lei meannudan boastut .
Dasgo ovdal go geatge bohte Jáhkoba luhtte , de Biehtár boradii báhkiniiguin .
Muhto go sii bohte , de geassádii eret ja doalahii sierra , danne go son balai sis geat ledje birračuhppojuvvon .
Maiddái eará juvddálaš oskuvieljat guoktilušše oktan suinna , nu ahte velá Barnabas ge rohttašuvai mielde seammá guoktilašvuhtii .
Muhto go oidnen ahte sin dagut eai lean evangeliuma duohtavuođa mielde , de celken Kefasii buohkaid gullut : « Go don gii leat juvddálaš , ealát báhkinlaš it ge juvddálaš vieru mielde , mo de sáhtát bágget báhkiniid eallit juvddálaš vieru mielde ? »
Mii leat juvddálaččat riegádeamis , eat ge báhkinlaš suttolaččat .
Muhto mii diehtit ahte olmmoš ii dahkkojuvvo vanhurskkisin dušše danne go dat dahká dan maid láhka gáibida , muhto go osku Jesus Kristusii .
Danne mii ge leat oskugoahtán Kristus Jesusii vai mii dahkkojuvvošeimmet vanhurskkisin oskumiin Kristusii , eat ge dahkamiin láhkadaguid . Dasgo ii oktage olmmoš dahkkojuvvo vanhurskkisin láhkadaguid dahkamiin .
Muhto jos mii ge adnojuvvot suttolažžan go mii viggat šaddat vanhurskkisin Kristusis , ii go Kristus dalle leat šaddan suttu bálvaleaddjin ?
Ii eisege !
Jos mun huksen fas dan maid lean gaikkodan , de čájehan iežan láhkarihkGon Aiddo láhka lea dahkan dan ahte mun lean jápmán lágas eret , vai mun ealášin Ipmila ovddas .
Mun lean russiinávlejuvvon Kristusiin ; in mun eale šat ieš , muhto Kristus eallá mu siste .
Dan eallima man dál ealán dáppe eatnama alde , ealán oskkus Ipmila Bárdnái guhte ráhkistii mu ja attii iežas mu dihtii .
Mun in hilggo Ipmila árpmu ; dasgo jos láhka attášii vanhurskkisvuođa , dalle gal Kristus livččii jápmán duššás .
Jierpmehis galatialaččat !
Gii lea fillen din ?
Russiinávlejuvvon Jesus Kristus han lea čielgasit govviduvvon din čalmmiid ovdii !
Vástidehket munnje dán jearaldaga : Oaččuidet go Vuoiŋŋa danne go dagaidet daid daguid maid láhka gáibida , vai danne go oskkuidet dasa maid gulaidet ?
Mo dii sáhttibehtet leat nu jierpmeheamit ?
Dii álggaheiddet Vuoiŋŋas ; áigubehtet go dál ollašuhttit oaččis ?
Lehpet go vásihan buot dán duššás , jos dat duođaid lei duššás ?
Addá go Ipmil didjiide Vuoiŋŋa ja dahká oavdudaguid din gaskkas , danne go dii dahkabehtet dan maid láhka gáibida , vai danne go oskubehtet dan evangeliumii maid lehpet gullan ?
Gehččet Abrahama : Son jáhkii Ipmila , ja danne Ipmil anii su vanhurskkisin .
Aiddo dán mun dáhtun din diehtit ahte sii geat oskot , leat Abrahama mánát .
Čála einnostii ahte Ipmil áiggui dahkat báhkiniid vanhurskkisin go sii oskot , ja dat almmuhii dán evangeliuma ovddalgihtii Abrahamii : Du siste buressivdniduvvojit buot álbmogat .
Danne buressivdniduvvojit buot oskkolaččat oktan Abrahamain guhte oskkui .
Muhto sii geat luhttet láhkadaguide , leat garuhusa vuolde . Dasgo lea čállojuvvon : Garuhuvvon lehkos juohkehaš guhte ii jeagat buot dan mii lea čállojuvvon láhkagirjái , ii ge daga dan mielde .
Lea čielggas ahte Ipmil ii daga vanhurskkisin ovttage dušše danne go dat čuovvu lága . Dasgo lea čállojuvvon : Vanhurskkis oažžu eallit go osku .
Muhto láhka han ii duddjo maidege oskku várás , muhto cealká : Dat guhte doallá lága báhkkomiid , oažžu das eallima .
Kristus osttii min friddjan lága garuhusas go ieš garuhuvvui min dihtii . Dasgo lea čállojuvvon : Garuhuvvon lehkos juohkehaš guhte heaŋggastuvvo murrii .
Dát dáhpáhuvai vai álbmogat Jesus Kristusa bokte oččošedje Abrahamii lohpiduvvon buressivdnádusa , ja vai mii oččošeimmet lohpiduvvon Vuoiŋŋa go oskut .
Oskuguoimmit , mun sártnun olbmuid vuogi mielde : Ii oktage sáhte fámuhuhttit dahje nuppástuhttit olbmo testamentta go dat lea lágalaš .
Lohpádusat addojuvvojedje Abrahamii ja su nállái .
Ii leat čállojuvvon « su náliide » , mii mearkkašivččii eatnagiidda , muhto dás celkojuvvo ovttaidlogus ; « su nállái » , ja dat lea Kristus .
Mun oaivvildan nappo dán : Láhka mii bođii njeallječuođigolbmalot jagi maŋŋil , ii sáhte duššadit testamentta man Ipmil juo lei nannen , nu ahte lohpádus fámuhuhttojuvvo .
Jos árbi boađášii lágas , de ii han dat dalle boađáše lohpádusas . Muhto Ipmil goittotge attii árbbi Abrahamii danne go lei lohpidan dan .
Manne de láhka addojuvvui ?
Dat addojuvvui čájehit mii rihkkun lea , dassá go boađášii dat nálli mii lei ožžon lohpádusa .
Láhka addojuvvui eŋgeliid ja gaskaolbmá bokte .
Muhto gaskaolmmái ii dárbbašuvvo go lea dušše okta bealli , ja Ipmil lea okta .
Lea go láhka dalle Ipmila lohpádusaid vuostái ?
Ii eisege !
Jos livččii addojuvvon dakkár láhka mii dahká eallin , de oččošeimmet vanhurskkisvuođa lágas .
Muhto čála cealká ahte oppa máilbmi lea biddjon suttu fámu vuollái , vai dat mii lea lohpiduvvon addojuvvošii sidjiide geat oskot Jesus Kristusii .
Ovdal go osku bođii , mii leimmet giddejuvvon lága vuollái dego fáŋggat dassážii go osku almmustuvvá .
Dan láhkái lei láhka min bagadeaddji dassážii go Kristus bođii , vai osku dagašii min vanhurskkisin .
Dál go osku lea boahtán , de mii eat leat šat bagadeaddji vuolde .
Dasgo dii lehpet buohkat Ipmila mánát go oskubehtet Kristus Jesusii .
Buohkat dii geat lehpet gásttašuvvon Kristusii , lehpet gárvodan Kristusiin .
Dás ii leat juvddálaš dahje greikalaš , šlávva dahje isit , olmmái ii ge nisu , dasgo dii lehpet buohkat okta Kristus Jesusis .
Jos dii gullabehtet Kristusii , de lehpet Abrahama nálli ja árbbolaččat lohpádusa mielde .
Mun oaivvildan ahte nu guhká go árbbolaš ii leat ollesahkásaš , de ii leat erohus su ja šláva gaskkas , vaikko son lea ge olles opmodaga isit .
Son lea hovdejeddjiid ja dállodolliid vuolde gitta dan áiggi rádjái man su áhčči lea mearridan .
Nu lea maiddái minguin : Go mii eat lean ollesahkásaččat , de leimmet dán máilmmi álgofámuid šlávat .
Muhto go áigi dievai , de Ipmil vuolggahii Bártnis , nissonis ja lága vuložin riegádan , oastit friddjan sin geat ledje lága vuložat , vai mii oččošeimmet máná vuoigatvuođa .
Danne go dii ge lehpet mánát , lea Ipmil vuolggahan min váimmuide Bártnis Vuoiŋŋa , gii čuorvu : « Abba , Áhčážan ! »
Dan dihtii don it leat šat šlávva , muhto mánná .
Ja go leat mánná , de lea Ipmil dahkan du árbbolažžan .
Dan áiggi go dii ehpet dovdan Ipmila , bálvaleiddet ipmiliid mat duohtavuođa mielde eai leat ipmilat .
Muhto dál go lehpet dovddiidan Ipmila , ja erenoamážit go Ipmil dovdá din , mo de sáhttibehtet fas máhccat dán máilmmi heajos ja geahnohis álgofámuide ?
Hálidehpet go fas šaddat daid šlávvan ?
Dii váldibehtet vuhtii erenoamáš beivviid , mánuid , áiggiid ja jagiid .
Mun balan ahte mun lean rahčan duššás din dihtii !
Oskuguoimmit , mun bivddán din : Šaddet mu lágánin , dasgo mun lean šaddan din lágánin .
Dii ehpet leat dahkan munnje maidege veriid .
Dii han diehtibehtet ahte mun ledjen buohcamin go vuosttáš geardde sárdnidin evangeliuma didjiide .
Mu rumašlaš headjuvuohta ii goit fillen din badjelgeahččat dahje fasttášit mu , muhto dii vuostáiválddiidet mu dego Ipmila eŋgela , dego Kristus Jesusa .
Gosa lea dál šaddan din stuora illu ?
Mun sáhtán duođaštit ahte dii livččiidet dalle áinnas roggan alddádet čalmmiid ja addán munnje , jos dat livččii lean vejolaš .
Muhto lean go mun dál šaddan din vašálažžan go lean cealkán didjiide duohtavuođa ?
Dat áŋgirvuohta maid earát čájehit didjiide , ii leat buorre . Sii hálidit dušše rátkit din vai dii čuovvugoađášeiddet sin .
Lea álo buorre áŋgiruššat dan mii lea buorre , ii ge dušše dalle go mun lean din luhtte . Mánážiiddán , mun ferten fas riegádahttit din ávttaiguin dassážii go Kristusa hápmi ollašuvvá din siste !
Vare mun dál livččen din luhtte ja gávnnašin rivttes sárdnunvuogi , dasgo in dieđe maid galggašin dahkat dinguin !
Celket munnje , dii geat hálidehpet leat lága vuložin , ehpet go guldal lága ?
Dasgo lea čállojuvvon ahte Abrahamas ledje guokte bártni , nubbi šlávvanissoniin ja nubbi gis friddja nissoniin .
Šlávvanissona bárdni riegádii luonddu vuogi mielde , friddja nissona bárdni riegádii Ipmila lohpádusa mielde .
Dás lea čiekŋalet oaivil . Dát guokte nissona ovddasteaba guokte lihtu .
Nubbi lea Sinaivári lihttu , ja dat riegádahttá mánáidis šlávvavuhtii ; dat lea Hagar .
« Hagar » mearkkaša Sinaivári Arabias , ja dat vástida dálá Jerusalema mii eallá šlávvavuođas oktan mánáidisguin .
Muhto dat Jerusalem mii lea almmis , lea friddja ; dat lea min eadni . Dasgo lea čállojuvvon : Illut , don šattoheapmi , gii it riegádahte , ávvut ja čuorvvo don , geas eai leat ávttat ! Dasgo oktonas nissonis leat eanet mánát go sus geas lea boadnjá .
Ja dii , oskuguoimmit , lehpet lohpádusa mánát nugo Issát .
Muhto seammá láhkái go son gii lei riegádan luonddu vuogi mielde , dalle doarrádalai su gii lei riegádan Vuoiŋŋas , nu lea odne ge . Muhto maid čála cealká ?
Áje eret šlávvanissona ja su bártni !
Dasgo šlávvanissona bárdni ii eisege oaččo juogadit árbbi friddja nissona bártniin .
Oskuguoimmit , mii eat leat nappo šlávvanissona , muhto friddja nissona mánát .
Dán friddjavuođa várás Kristus lea dahkan min friddjan .
Bissot dan dihtii nanusin , allet ge divtte ovttage bágget din fas šlávvageassá vuollái .
Mun , Bávlos , cealkkán didjiide : Jos dii diktibehtet iežadet birračuhppojuvvot , de Kristus ii leat didjiide álggage ávkin .
Mun deattuhan vel juohkehažžii guhte diktá iežas birračuhppojuvvot , ahte son lea geatnegas doallat olles lága .
Dii geat ohcabehtet vanhurskkisvuođa lágas , lehpet earuhuvvon Kristusis ; dii lehpet jorralan eret árpmus .
Muhto mii oskut ja vuordit Vuoiŋŋas ahte oččošeimmet vanhurskkisvuođa mii lea min doaivu .
Jos mii leat Kristus Jesusis , de ii leat deaŧalaš leat go birračuhppojuvvon vai eat , muhto deaŧalaš lea osku mii almmustuvvá ráhkisvuođas .
Dii vádjolišgođiidet nu bures .
Gii hehttii din čuovvumis duohtavuođa ?
Son gii rávkkai din , ii leat sártnuhan din dása .
Unna suvrradáiggáš suvrudahttá olles dáiggi !
Hearrá lea addán munnje dan luohttámuša din hárrái ahte dii ehpet dáhto oaivvildit eará go mun .
Dat guhte čádjidahttá din , oažžu duomus , gii dal juo leažžá .
Oskuguoimmit , jos leažžá nu ahte mun ain lean sárdnideamen birračuohpahusa , manne de doarrádallojuvvon ?
Dalle han ruossa vearránus livččii váldojuvvon eret .
Vare gáldešedje iežaset , sii geat čádjidahttet din !
Oskuguoimmit , dii han lehpet rávkojuvvon friddjavuhtii .
Allet fal divtte friddjavuođa šaddat oačči ággan , muhto bálvalehket guhtet guimmiideattet ráhkisvuođas .
Dasgo olles láhka ollašuvvá dán ovtta báhkkomis : Don galggat ráhkistit lagamuččat nugo iežat .
Muhto go dii snealkubehtet ja hámsubehtet guhtet guimmiideattet , de váruhehket , amadet loahpas duššadit guhtet guimmiideattet !
Mun cealkkán : Vádjolehket Vuoiŋŋas amadet duhtadit oačči anistumiid .
Dasgo oačči anistumit vuostálastet Vuoiŋŋa , ja Vuoigŋa vuostálastá oačči .
Dat sohtet guhtet guimmiideaset vuostái , nu ahte dii ehpet beasa dahkat dan maid hálidehpet .
Jos Vuoigŋa láide din , de ehpet leat lága vuložat .
Lea čielggas mat oačči dagut leat : fuorrávuohta , buhtismeahttunvuohta , badjelmearálašvuohta , eahpeipmilbálvaleapmi ja noidošeapmi , vašálašvuohta , riidaleapmi , udnohisvuohta , moarri , gážžárvuohta , soahpameahttunvuohta , sierrasearvádallan , gáđašvuohta , gárremat , borešvuohta ja eanet dakkárat .
Nugo ovdal juo lean várren : Sii geat dahket dakkáriid , eai árbe Ipmila riikka .
Muhto Vuoiŋŋa šaddu lea ráhkisvuohta , illu , ráfi , guhkesmielalašvuohta , ustitlašvuohta , buorrevuohta , oskkáldasvuohta , vuollegašvuohta ja mearálašvuohta .
Láhka ii leat dakkáriid vuostái .
Sii geat gullet Kristusii , leat russiinávlen oaččiset oktan himuiguin ja anistumiiguin .
Jos mii eallit Vuoiŋŋas , de vádjolehkot ge Vuoiŋŋas .
Allot váinnut guoros gudni , allot ge hástal guhtet guimmiideamet ja šatta gáđašin .
Oskuguoimmit , jos oktage gávnnahalaš dahkamis veriid , de fertebehtet dii geain lea Vuoigŋa , bagadit su vuollegašvuođain .
Várut , amat don ge geahččaluvvot .
Guddet guhtet guimmiideattet nođiid , ja ollašuhttet dainna lágiin Kristusa lága .
Dat guhte gáddá iežas maninge , vaikko ii leat mihkkege , beahttá iežas .
Guorahallos juohkehaš duššefal iežas daguid , de son sáhttá čeavlástallat das mii son ieš lea , ii ge dárbbaš veardidit iežas earáiguin , dasgo juohkehaš galgá guoddit iežas noađi .
Dat geasa oahpahuvvo Ipmila sátni , juogadehkos buot buriid oahpaheddjiinis .
Allet čádjádala !
Ipmil ii divtte bilkidit iežas . Olmmoš láddje dan maid gilvá .
Dat guhte gilvá oažžásis , láddje gáđohusa oaččis ; dat guhte gilvá Vuigŋii , láddje agálaš eallima Vuoiŋŋas .
Allot váibba dahkamis buriid .
Jos mii eat vuollán , de mii oažžut láddjet go áigi dievvá .
Dahkkot buriid buohkaide nu guhká go lea áigi , ja eanemusat sidjiide geaid osku ovttasta minguin .
Gehččet makkár stuora bustávaiguin mun čálán gieđainan didjiide ! Sii geat bággejit din birračuohpahit iežadet , leat dakkárat geat dáhttot háhkat alcceseaset olgguldas gudni vai veltet doarrádallojuvvomis Kristusa ruossa dihtii .
Eai sii ge jeagat lága geat diktet iežaset birračuhppojuvvot , muhto sii dáhttot din birračuhppojuvvot , vai sáhtášedje čeavlástallat dainna mii lea dáhpáhuvvan din rupmašiidda .
Muhto mun in goassege dáhto rábmot maidege eará go min Hearrá Jesus Kristusa ruossa , masa máilbmi lea russiinávlejuvvon mu dáfus , ja mun máilmmi dáfus .
Birračuohpahus dahje birračuohpakeahttáivuohta ii leat deaŧalaš , muhto deaŧalaš lea ahte lea ođđa sivdnádus .
Ráfi ja váibmoláđisvuohta lehkos singuin geat vádjolit dán njuolggadusa mielde , ja Ipmila Israeliin !
Dás duohko ii oktage oaččo šat givssidit mu , dasgo mus leat Jesusa mearkkat iežan rupmašis .
Oskuguoimmit , min Hearrá Jesus Kristusa árbmu lehkos din vuoiŋŋain !
Amen .
Dearvvuođat Bávlosis , Ipmila dáhtu mielde Jesus Kristusa apoasttal , Efesosa bassi olbmuide , geat oskot Kristus Jesusii .
Árbmu lehkos dinguin ja ráfi Ipmilis , Áhčisteamet , ja Hearrás Jesus Kristusis !
Rámiduvvon lehkos Ipmil ja Hearrámet Jesus Kristusa Áhčči , guhte Kristusis lea buressivdnidan min buot Vuoiŋŋa almmálaš buressivdnádusain .
Son lea válljen min Kristusis juo ovdal go máilbmi vuođđuduvvui , vai mii livččiimet basit ja láitemeahttumat su ovddas .
Ráhkisvuođastis son lea ovddalgihtii mearridan min oažžut máná vuoigatvuođa iežas luhtte Jesus Kristusa bokte . Dát lei su árpmolaš dáhtu ja buori miela mielde , vai su árpmu hearvásvuohta rámiduvvošii , dat man son attii midjiide ráhkis Bártnis bokte .
Su varas mis lea lonástus ja suttuid ándagassii addojupmi . Nu rikkis lea Ipmila árbmu man son valljugasat lea golggahan midjiide ja addán midjiide buot viisodaga ja jierbmáivuođa .
Son lea almmuhan midjiide dáhtus čiegusvuođa man son ieš lei mearridan ovddalgihtii , ahte galggai ollašuhttit áigumušas go áigi dievai : Son dáhtui ovttastahttit buot Kristusis , buot dan mii lea almmis ja eatnama alde .
Su siste mii leat maiddái ožžon árbeoasi , mii geat ovddalgihtii leimmet mearriduvvon dasa , dasgo son duddjo buot iežas áigumuša ja dáhtu mielde , vai mii šattašeimmet rámádussan su hearvásvuhtii , mii geat ovdal juo leat dorvvastan Kristusii .
Su siste dii ge lehpet oskugoahtán go gulaidet duohtavuođa sáni , bestojumádet evangeliuma , Su siste dii lehpet ožžon seailan , Bassi Vuoiŋŋa , gii lei lohpiduvvon .
Son lea min árbbi dáhkádus , ahte Ipmila álbmot lonistuvvo , su hearvásvuođa rámádussan .
Go mun lean gullan din oskku birra Hearrá Jesusii ja din ráhkisvuođa birra buot bassi olbmuide , de in heaitte giitimis Ipmila din ovddas go muittán din rohkosiinnán .
Mun rohkadalan ahte Hearrámet Jesus Kristusa Ipmil , hearvásvuođa Áhčči , attášii didjiide viisodaga ja almmustusa Vuoiŋŋa , vai dii dovddašeiddet su .
Vare son attášii čuovgasa din váimmu čalbmái , vai dii áddešeiddet makkár doivui son lea rávkan din , man rikkis ja hearvás árbbi son addá bassi olbmuidasas , ja man mihtitmeahttun stuoris su fápmu lea min gaskkas geat oskut . Seammá veagalaš fámuin son duddjui Kristusis go bajásčuoččáldahtii su jábmiid luhtte ja bijai su olgeš gieđas beallái almmis , buot oaivámuččaid ja válddiid bajábeallái , buot fámuid ja hearrávuođaid bajábeallái ja buot namaid bajábeallái mat sáhttet namuhuvvot , eai duššefal dálá máilmmis , muhto maiddái boahtte máilmmis ge .
Ipmil bijai buot su julggiid vuložin ja attii su girkui buot diŋggaid oaivin , su guhte ráđđe buot . Girku lea Kristusa rumaš ja su dievasvuohta , su gii deavdá buot mii lea .
Dii leiddet jápmán rihkkumiiddádet ja suttuideattet dihtii go eliidet dálá máilmmi vieruid mielde ja jeagadeiddet áimmu fámuid oaivámučča , dan vuoiŋŋa mii dál duddjo eahpegulolaččain .
Oktii mii buohkat leimmet dego sii ; mii čuovuimet oaččálaš anistumiid ja dagaimet oačči ja jurdagiiddámet dáhtu mielde . Nu mii leimmet luonddusteamet Ipmila moari vuolde , nugo buot earát ge .
Muhto Ipmil , geas lea valljugasat váibmoláđisvuohta , lea ráhkistan min nu stuora ráhkisvuođain ahte son dagai min eallin oktan Kristusiin , vaikko mii leimmet jápmán rihkkumiiddámet dihtii . Árpmus dii lehpet bestojuvvon .
Kristus Jesusis son bajásčuoččáldahtii min oktan suinna ja attii midjiide ge saji almmis , ja nu son dáhtui čájehit buot boahtte áiggiide man valljugas rikkis su árbmu ja buorrevuohta lea , dat man son attii midjiide Kristus Jesusis .
Dasgo árpmustis Ipmil lea beastán din go oskubehtet .
Bestojupmi ii leat din iežadet dahku , muhto Ipmila attáldat .
Dat ii leat olbmuid daguid duohken , amas oktage čevllohallat .
Dasgo mii leat Ipmila dahku , son lea sivdnidan min Kristus Jesusis buriide daguide , maid Ipmil juo ovdal lea bidjan gárvvisin midjiide , vai mii vádjolivččiimet daid siste .
De muitet ahte dii leiddet báhkinat riegádeamis ja gohčoduvvuidet birračuohpakeahttájin , – nu gohčodit din , sii geat gohčodit iežaset birračuhppojuvvon olmmožin , danne go olbmo gieđain sii leat rumašlaččat birračuhppojuvvon . Muitet ahte dii dalle leiddet Kristusa haga . Dii leiddet Israela álbmoga vuoigatvuođaid olggobealde , ii ge dis lean oassi lihtuin ja daid lohpádusain , ja dii eliidet dán máilmmis doaivaga ja Ipmila haga .
Muhto dál , Kristus Jesusis , lehpet dii geat ovdal leiddet guhkkin eret , boahtán lahka Kristusa varas .
Dasgo son lea min ráfi .
Son dagai goappašagaid , báhkiniid ja juvddálaččaid , oktan , ja rupmašis addimiin son gaikkodii vašálašvuođa muvrra mii earuhii sin .
Son heaittihii lága oktan báhkkomiiguin ja njuolggadusaiguin , vai son ieš dagašii alddis dan guoktása oktan ođđa olmmožin ja nu duddjošii ráfi .
Ovtta rupmašis son soabahii dan guoktá Ipmiliin go son jámii ruossa alde ja nu gottii vašálašvuođa .
Son bođii ja sárdnidii ráfi didjiide geat leiddet guhkkin eret , ja sidjiide geat ledje lahka .
Dasgo su dihtii sáhttit sihke mii ja dii beassat ovtta Vuoiŋŋas Áhči lusa .
Dii nappo ehpet leat šat amas olbmot ja vierrásat , muhto dii lehpet Ipmila olbmuid siidaguoimmit ja gullabehtet Ipmila dáluolbmuide .
Dii lehpet huksejuvvon apoastaliid ja profehtaid vuođu ala , man čiehkageađgi lea Kristus Jesus ieš .
Son doallá oppa viesu čoahkis vai dat šattašii Hearrá bassi tempelin , ja su siste dii ge huksejuvvobehtet Ipmila vuoiŋŋalaš viessun .
Dan dihtii mun , Bávlos , gii dál lean Jesus Kristusa fáŋgan din báhkiniid dihtii , sojaldahtán čippiidan . Dii han lehpet gullan Ipmila árpmu doaimma birra , mii addojuvvui munnje din várás .
Dát čiegusvuohta dieđihuvvui munnje almmustusas , nugo lean juo čállán oanehaččat .
Ja go dii lohkabehtet dan , de árvidehpet man bures mun dovddan Kristusa čiegusvuođa .
Dat ii almmustuvvan ovddit buolvvaid olbmuide , muhto dál lea Vuoigŋa almmustahttán dán čiegusvuođa su bassi apoastaliidda ja profehtaide ahte maiddái báhkinat ge Jesus Kristusa dihtii leat ožžon oasi árbbis evangeliuma bokte ; sii leat seammá rupmaša lahtut ja leat dan lohpádusa oasálaččat .
Ja dán evangeliuma bálvaleaddjin mun šadden go Ipmil stuora fámustis attii munnje árpmus attáldahkan .
Mun , guhte lean heajumus Ipmila bassi olbmuid gaskkas , lean ožžon árpmu sárdnidit báhkiniidda evangeliuma Kristusa árvitmeahttun riggodaga birra ja almmuhit buohkaide Ipmila čihkkojuvvon áigumuša , dan čiegusvuođa mii agálašvuođa rájes lea leamaš Ipmilis , gii sivdnidii buot .
Nu almmustuvvá dál Ipmila eatnatgeardásaš viisodat girku bokte almmiid oaivámuččaide ja fámuide .
Dát lea Ipmila agálaš áigumuša mielde , man son ollašuhtii Kristus Jesusis , Hearrásteamet .
Su siste ja oskkodettiin sutnje mii sáhttit boahtit Ipmila ovdii roahkkatvuođain ja luohttevašvuođain . Dan dihtii mun ánun din amadet hearddohuvvat , vaikko mun ferten gillát áŧestusaid din dihtii .
Dat han lea didjiide gudnin !
Dan dihtii mun sodjalahtán čippiidan Áhči ovddas , gii lea sin buohkaid áhčči geat gohčoduvvojit mánnán almmis ja eatnama alde .
Vare son geas lea nu cealkemeahttun hearvásvuohta , nannešii din siskkáldas olbmo fámuinis ja Vuoiŋŋainis , vai Kristus ásašii din váimmuin go dii oskubehtet .
Ja vare ráhkisvuohta livččii din ruohtas ja vuođđu , vai dii áddegoađášeiddet Kristusa ráhkisvuođa govdodaga ja guhkkodaga , allodaga ja čikŋodaga , ja oahpašeiddet dovdat maiddái dan , mii manná buot dieđu badjel , dassážii go oppa Ipmila dievasvuohta deavdá din .
Son guhte duddjo min siste fámuinis , ja sáhttá dahkat valljugasabut go dan maid mii sáhttit rohkadallat ja áddet , sutnje lehkos gudni girkus ja Kristus Jesusis buot buolvvaid čađa álo ja agálašvuhtii ! Amen .
De mun , guhte lean fáŋgan Hearrá dihtii , rávven din eallit dohkálaččat din rávkojumi mielde . Lehket álo ustitlaččat , vuollegaččat ja guhkesmielalaččat vai gierdabehtet guhtet guimmiideattet ráhkisvuođas .
Vigget várjalit Vuoiŋŋa oktavuođa dainna ráfiin mii čatná din oktii : okta rumaš ja okta Vuoigŋa , nugo lea dat okta doaivu ge masa dii lehpet rávkojuvvon .
Okta lea Hearrá , okta osku , okta gásta , okta Ipmil ja buohkaid Áhčči , guhte ráđđe buohkaid , doaibmá buohkaid bokte ja lea buohkaid siste .
Muhto juohkehaš mis lea ožžon dan árpmu man Kristus lea mihtidan .
Dan dihtii celkojuvvo : Son manai bajás allagassii ja doalvvui fánggaid mielddis sálašin , son attii olbmuide attáldagaid .
Go celkojuvvo ahte son manai bajás , ii go dat mearkkaš ahte son vuos njiejai gitta eatnama vuolimus čiekŋalasa rádjái ?
Ja son gii njiejai , lea dat seammá guhte manai guhkás bajás buot almmiid bajábeallái vai son deavddášii buot .
Son ásahii muhtumiid apoasttalin , muhtumiid profehtan , muhtumiid evangelistan , muhtumiid báimmanin ja oahpaheaddjin , vai sii ráhkkanahtášedje bassi olbmuid bálvalussii , ja nu huksešedje Kristusa rupmaša , dassážii go mii buohkat ollet oskku searvevuhtii ja Ipmila Bártni dovdamuššii , ja mii rávásmuvvat ja juksat Kristusa dievasvuođa .
De mii eat leat šat mánát geaid buotlágán oahppobiekkat suhpodit ja rievddahit duohko deike , ja geat jorralit go fillejeaddji ja gávvilis olbmot juonastit minguin .
Muhto ráhkisvuođas mii galgat čuovvut duohtavuođa ja juohke dáfus stuorrut nu ahte mii ovttastahttojuvvot Kristusiin guhte lea oaivi .
Son bidjá oktii olles rupmaša ja doallá dan čoahkis buot suonaiguin , nu ahte juohke lađas bargá dan maid juo galgá ge , ja nu rumaš stuorru ja huksejuvvo ráhkisvuođas .
De mun várren din duođalaččat Hearrá nammii : Allet šat eale báhkiniid láhkái !
Sin jurdagat leat gurrosat , sin jierbmi sevnnjodahtton , ja dat eallin man Ipmil addá , lea amas sidjiide . Dasgo sii eai dovdda su ja sin váimmut leat buoššuduvvon .
Heahpankeahttá sii addet iežaset nuoskivuhtii ja ellet buhtismeahttunvuođas ja ruhtaváibmilvuođas juohke dáfus .
Muhto dakkárin dii ehpet leat oahppan dovdat Kristusa ! Dii han lehpet gullan su birra ja su siste oahpahuvvon dan duohtavuođa mielde mii Jesusis lea .
Allet vádjol ovddeš láhkái , muhto nullet eret boares luonddu mii lea duššamin behtolaš anistumiid dihtii .
Ođasmuvvet vuoiŋŋas ja mielas ja gárvodehket ođđa olbmo , guhte lea sivdniduvvon Ipmila gova mielde eallit vanhurskkis ja duohta bassi eallima .
Dan dihtii , hilgádehket giellásiin ! Sárdnot duođa , juohkehaš lagamužžasis , dasgo mii han leat guhtet guimmiideamet lahtut .
Jos suhttabehtet , de allet suddut , ja sohpet riiddodet ovdal go beaivváš luoitáda .
Allet atte liibba beargalahkii .
Suola ii galgga šat suoládit , muhto bargat rahčat gieđaidisguin , vai sus livččii maid addit daidda geat dárbbašit dan .
Allet divtte unohis ságaid boahtit njálmmisteattet , muhto sárdnot dušše dan mii duddjo buori ja lea illun sidjiide guđet guldalit .
Allet moraštahte Ipmila Bassi Vuoiŋŋa gean dii lehpet ožžon seailan gitta lonástusa beaivái .
Hilgot juohke lágán bahčavuođa , hohppuivuođa , vaši , riidaleami ja bilkideami ja buot bahávuođa .
Lehket baicca buorit guhtet guimmiidasadet ; lehket váibmoláđđásat ja addet ándagassii guhtet guimmiidasadet nugo Ipmil ge lea addán didjiide ándagassii Kristusis .
Atnet nappo Ipmila ovdagovvan , dii geat lehpet su ráhkis mánát .
Vádjolehket ráhkisvuođas , nugo Kristus ge lea ráhkistan min ja addán iežas min dihtii attáldahkan , njuovvanoaffarin mii lea Ipmila miela mielde .
Furrošeapmi , juohke lágán buhtismeahttunvuohta dahje ruhtaváibmilvuohta eai galgga oppa namuhuvvot ge din gaskkas ; dakkárat eai heive Ipmila bassi olbmuide . Šleidošeapmi , árvvohis ságat ja snoallan ge leat heivemeahttumat .
Giitet baicca Ipmila !
Dii han diehtibehtet bures ahte Kristusa ja Ipmila riikka ii oaččo árbet oktage furrošeaddji , buhtismeahttun dahje ruhtaváibmil , gii dien láhkái bálvala eahpeipmila .
Allet divtte geange fillet din duššálaš sániiguin !
Dasgo buot dát dagahit ahte Ipmila moarri deaivá buohkaid guđet eai jeagat su .
Allet servvoštala singuin !
Oktii dii ge leiddet seavdnjadas , muhto dál dii lehpet Hearrá čuovggas .
Vádjolehket dasto čuovgasa mánnán ! Dasgo čuovgasa šattut leat buorrevuohta , vanhurskkisvuohta ja duohtavuohta . Guorahallet mii lea Hearrá miela mielde !
Allet searvva seavdnjadasa šattohis daguide , muhto ráŋgot baicca daid albmosii . Dakkáriid maid muhtumat dahket čihkosis , lea heahpatlaš vel namahit ge .
Muhto go čuovggas almmustahttá visot , de dat boahtá albmosii , ja buot mii boahtá albmosii , lea čuovggas .
Dan dihtii celkojuvvo ge ná : Morit , don oađđi ! Bajásčuožžil jábmiid luhtte , de Kristus čuvge du
De váruhehket dárkilit mo dii vádjolehpet , ehpet jierpmehis olmmožin , muhto jierpmálažžan .
Atnet juohke vuogas liibba ávkin , dasgo dát leat bahás beaivvit .
Allet leage jallat , muhto áddejehket Hearrá dáhtu . Allet juhkaluva viinnis , dasgo das boahtá gudnehis eallin .
Muhto diktet baicca Vuoiŋŋa deavdit iežadet , ja sárdnot guhtet guoibmáseattet sálmmaiguin ja giittuslávlagiiguin ja vuoiŋŋalaš lávlagiiguin ; lávlot ja čuojahehket váimmusteattet Hearrái !
Giitet álo Ipmil Áhči buot áššiin Hearrámet Jesus Kristusa nammii .
Lehket guhtet guimmiideattet vuolibuččat gudnejahtedettiin Kristusa !
Áhkát , lehket boatnjáidet dego Hearrá iežas vuolibuččat .
Dasgo boadnjá lea áhká oaivi , nugo Kristus lea girku oaivi ; son lea beastán dan , dasgo dat lea su rumaš .
Nugo girku lea Kristusa vuolibuš , nu lehkoset áhkát ge juohke dáfus boatnjáideaset vuolibuččat .
Boatnját , ráhkistehket áhkádet , nugo Kristus ráhkistii girku ja attii iežas dan ovddas vai son basuhivččii ja buhtistivččii dan čáziin ja sániin .
Nie son dáhtui bidjat girku hearvásin iežas ovdii , almmá duolva dielkku , roavčči dahje mange dakkáračča haga , vai dat livččii bassi ja láitemeahttun .
Seammá láhkái boatnját leat geatnegasat ráhkistit áhkáset dego iežaset rupmaša .
Dat guhte ráhkista áhkás , ráhkista iežas . Ii oktage vašut iežas rupmaša , muhto biebmá ja dikšu dan nugo Kristus ge girku . Dasgo mii leat su rupmaša lahtut .
Dan dihtii boadnjá guođđá áhčis ja eatnis ja bissu áhkás luhtte , ja dat guovttis šaddaba oktan oažžin .
Dát čiegusvuohta lea stuoris ; ja mun oaivvildan Kristusa ja girku .
Muhto dat guoská maiddái didjiide ge ahte juohkehaš galgá ráhkistit áhkás dego iežas , ja áhkká gis galgá atnit árvvus boatnjás .
Mánát , jeagadehket vánhemiiddádet Hearrá dihtii , dasgo dat lea riekta .
« Don galggat gudnejahttit áhčát ja eatnát » , dát lea vuosttaš báhkkon masa gullá lohpádus : « vai dutnje geavašii bures ja don ealášit guhká eatnama alde » .
Áhčit , allet suhttat mánáideattet , muhto bajásgesset ja rávvejehket sin Hearrá dáhtu mielde .
Šlávat , jeagadehket eatnanlaš isidiiddádet baluin ja doarggistemiin ja duođalaš váimmuin , dego Kristusa . Allet guoktiluša ja njálggástala olbmuiguin , muhto lehket Kristusa bálvaleaddjit geat dahkabehtet Ipmila dáhtu oppa sielus .
Bálvalehket áŋgirvuođain dego livččiidet Hearrá šlávat , ehpet ge olbmuid šlávat .
Dii diehtibehtet ahte juohkehaš oažžu bálkká Hearrás jos son dahká buori , leažžá dal friddja dahje šlávva .
Isidat , meannudehket šlávaiguin seammá láhkái , allet ge áitte sin !
Dii diehtibehtet ahte sis ja dis lea seammá Hearrá almmis , ii ge son geahča olbmo hámi beallái .
Loahpas : Šaddet gievran Hearrás ja su veagalaš fámus !
Gárvodehket Ipmila vearjosujiiguin , vai nagadivččiidet vuostálastit beargalaga gávvilis fallehemiid .
Dasgo eat mii soađa oačči ja vara vuostái , muhto oaivámuččaid ja fámuid vuostái , máilmmi hearráid vuostái guđet ráđđejit dán áiggi seavdnjadasas , almmiid bahávuođa vuoigŋaveagaid vuostái .
Gárvodehket dan dihtii Ipmila vearjosujiid , vai veajášeiddet vuostálastit go bahás beaivi boahtá ja bissut čuoččat go lehpet vuoitán buot .
De bissot nanusin , boahkánastet duohtavuođain , ja gárvodehket vanhurskkisvuođa ruovdegárvvuin , ja atnet julggiin gáman dan geargatvuođa maid ráfi evangelium addá .
Loktejehket álo oskku galbba mainna sáhttibehtet čáskadit buot bahákasa buolli njuolaid . Atnet bestojumi oaivesuoji ja Vuoiŋŋa miehki mii lea Ipmila sátni .
Rohkadaladettiin átnot Ipmilis veahki , ja rohkadallet álelassii Vuoiŋŋas !
Gohcet ja bissot nanusin rohkadallamiin buot Ipmila olbmuid ovddas .
Rohkadallet maiddái mu ovddas ge ahte munnje addojuvvošedje rivttes sánit go raban njálbmán , vai mun sáhtášin roahkkatvuođain sárdnidit evangeliuma čiegusvuođa , man áirras mun lean dáppe giddagasas ge .
Rohkadallet ahte mun oččošin roahkkatvuođa sárdnut nu mo galggan .
Vai dii ge dieđášeiddet makkár dilis mun lean ja mo mus manná , de Tykikos muitala didjiide buot . Son lea min ráhkis oskuviellja ja oskkáldas bálvaleaddji Hearrás .
Aiddo dan dihtii mun vuolggahan su din lusa vai dii dieđášeiddet mo min dilli lea , ja vai son árvvosmahtášii din váimmuid fas .
Ráfi lehkos oskuguimmiiguin , ja ráhkisvuohta ja osku mii boahtá Ipmil Áhčis ja Hearrás Jesus Kristusis !
Árbmu lehkos buohkaiguin geat ráhkistit Hearrámet Jesus Kristusa nohkameahttun ráhkisvuođain !
Dearvvuođat Bávlosis ja Timoteusis , Jesus Kristusa bálvaleddjiin , buot Filippi bassi olbmuide guđet leat Kristus Jesusis , oktan searvegotti gehččiiguin ja bálvaleddjiiguin .
Árbmu lehkos dinguin ja ráfi Ipmilis , Áhčisteamet , ja Hearrás Jesus Kristusis !
Mun giittán álelassii Ipmilan go mun muittán din . Juohke háve go mun rohkadalan din buohkaid ovddas , de dagan dan iluin , danne go dii lehpet leamaš oasálaččat evangeliuma barggus vuosttaš beaivvi rájes gitta dássážii .
Ja mun lean vissis das ahte son guhte álggahii buori dagu din siste , ollašuhttá dan gitta Jesus Kristusa beaivvi rádjái .
Lea riekta ahte mun jurddašan nu din buohkaid birra .
Dasgo mun guottán din váimmustan , ja dii lehpet buohkat seammá árpmu oasálaččat go mun , leaččan dal guoddimin láhkkiid dahje bealušteamen ja nannemin evangeliuma .
Ipmil lea mu duođašteaddji das mo mun áibbašan din buohkaid Kristus Jesusa njuoras ráhkisvuođain .
Ja dát lea mu rohkos ahte din ráhkisvuohta lassánivččii dieđu ja árvádusa hárrái , vai dii áddešeiddet dan mii lea mávssolaš ja livččiidet buhttásat ja láitemeahttumat Kristusa beaivvi rádjái , dievva vanhurskkisvuođa šattuin , maid Jesus Kristus duddjo , Ipmilii gudnin ja máidnumin .
Oskuguoimmit , mun dáhtun din diehtit ahte dat mii lea dáhpáhuvvan munnje , lea leamaš evangeliumii ovdáneapmin .
Lea šaddan dovddusin buot ladnesoalddáhiidda ja earáide ahte mun guottán láhkkiidan Kristusa dihtii . Mu fáŋgavuohta lea nannen eanas oskuguimmiid oskku Hearrái , nu ahte sii leat ožžon stuorit roahkkatvuođa sárdnidit sáni balakeahttá .
Muhtumat gal sárdnidit Kristusa gáđašvuođa ja riiddu dihtii , muhto earát dahket dan buriin dáhtuin ge , ja sii sárdnidit ráhkisvuođain , danne go dihtet ahte mun lean biddjojuvvon giddagassii bealuštit evangeliuma .
Dat earát sárdnidit Kristusa bajidan dihtii iežaset , eai ge sis leat duođalaš áigumušat , dasgo sii navdet ahte sáhttet dahkat mu fáŋgavuođa losibun .
Muhto maid dat dahká ?
Kristus goittot sárdniduvvo , lehkos dal behtolašvuođain dahje duohtavuođain , ja das mun illudan .
Muhto mun áiggun ain illudit dasgo mun dieđán ahte dát šaddá munnje bestojupmin , danne go dii rohkadallabehtet mu ovddas ja Jesus Kristusa Vuoigŋa lea addon munnje veahkkin .
Ja mus lea dat vuordámuš ja doaivva ahte mun in šatta heahpadii mange áššis , muhto ahte mun dál , nugo álo ovdal ge , oaččun roahkkatvuođa hearvásmahttit Kristusa iežan rupmašis , šattaš go eallimis dahje jápmimis .
Dasgo munnje eallin lea Kristus ja jápmin lea vuoitu .
Muhto jos mun bázán ge dása eallit ja dat livččii ávkin mu bargui , de in dieđe goappá vállježan .
Mun geasuhuvvon goappašiid beallái : Mun hálidivččen vuolgit dáppe eret ja leat Kristusiin , dasgo dat livččii buot buoremus .
Muhto din dihtii lea dárbbašlaš bissut heakkas . Dás mun lean vissis ,
ja danne dieđán ahte ealán ain dáppe ja bisun din buohkaid luhtte vai dii ovdánivččiidet ja illudivččiidet oskkus . Ja go mun boađán fas din lusa , de dii oažžubehtet vel eambbo siva illudit Kristus Jesusis mu dihtii .
Ellet fal dakkár eallima mii dohkke Kristusa evangeliumii , nu ahte mun – jogo dal bođežan ja ieš oinnežan din , dahje leaččan eret – beasan gullat ahte dii bissubehtet nannosit ovtta vuoiŋŋas , nu ahte soahtabehtet ovttain sieluin evangeliuma oskku beales , ehpet ge bala vuostálastiineattet mange láhkái .
Dát lea mearka Ipmilis sidjiide ahte gáđohus vuordá sin , ja bestojupmi din .
Dasgo Kristusa dihtii dii lehpet ožžon árpmu ehpet dušše oskut sutnje , muhto velá gillát ge su dihtii .
Dii soahtabehtet dan seammá soađi man lehpet oaidnán mu soahtamin , ja man dál gullabehtet ahte lean ain soahtamin .
Jos dasto Kristusis lea jeđđehus , ráhkislaš árvvosmahttin , searvevuohta man Vuoigŋa addá , ja jos lea njuorasvuohta ja árkkálmastinvuohta din gaskkas , de dahket dál mu ilu ollisin : Atnet searvevuođa ovttain ráhkisvuođain , ovttain jurdagiin ja mielain .
Allet daga maidege dušše vuovdnáivuođa ja guoros gudneáŋgirvuođa dihtii , muhto lehket ustitlaččat ja atnet earáid alibun go iežadet .
Allet jurddaš dušše iežadet ávkki , muhto maiddái earáid ávkki .
Čájehehket seammá miellalági go Kristus Jesusis lei !
Son lei Ipmila hápmásaš , muhto ii atnán sálašin leat Ipmila láhkásaš .
Son luobai buot das mii sus lei , válddii šláva hámi ja šattai olbmuid láhkásažžan .
Son elii nugo olmmoš olbmuid gaskkas ; son vuolidii iežas ja lei gulolaš jápmima rádjái , velá ruossa jápmima rádjái .
Dan dihtii lea Ipmil bajidan su allagii ja addán sutnje nama buot namaid badjel , vai juohke čibbi sodjalahttošii Jesusa nammii , almmis , eatnama alde ja eatnama vuolde , ja juohke njuovčča dovddastivččii ahte Jesus Kristus lea Hearrá , Ipmil Áhččái gudnin !
Ráhkkásiiddán , nugo dii álo lehpet leamaš gulolaččat go mun ledjen din luhtte , de lehket dađe gulolaččabut dál go mun lean eret , ja barget baluin ja doarggistemiin vai bestojuvvošeiddet !
Dasgo Ipmil lea dat gii duddjo din siste dan ahte dii sihke dáhttubehtet ja dahkabehtet su buori dáhtu mielde .
Dahket buot nimmorkeahttá ja ággakeahttá , vai dii livččiidet láitemeahttumat ja buhttásat , Ipmila máinnehis mánát , gasku gážžáris ja jorggu sohkagotti . Das dii báitibehtet dego čuovggat máilmmis go doallabehtet gitta eallima sánis .
De mun oaččun dan rámi Kristusa beaivvi ahte in leat bargan in ge rahčan duššás .
Vaikko vel mu varra ge golggahuvvošii go mun buvttán ovdan din oskku oaffarin Ipmilii , de mun dattege illudan ja ávvudan dinguin buohkaiguin .
Illudehket ja ávvudehket dii ge seammá láhkái muinna !
Luohtedettiin Hearrái Jesusii mun doaivvun fargga beassat vuolggahit Timoteusa din lusa , vai mun ge roahkasmuvašin go gulan didjiide ságaid .
Mus ii leat oktage su lágán gii sáhttá nu duođalaččat atnit dis fuola .
Dasgo buohkat earát bivdet dušše iežaset ávkki , eai ge dan mii gullá Jesus Kristusii .
Muhto dii diehtibehtet man luohtehahtti Timoteus lea .
Son lei dego bárdni gii veahkeha áhčis , go moai ovttas bálvaleimme evangeliuma .
Mun doaivvun ahte sáhtášin vuolggahit su din lusa nu fargga go oainnán mo manná mu áššiin .
Ja mun luohtán Hearrái ahte mun ge fargga beasan boahtit .
Mun lean maiddái mearridan vuolggahit Epafroditusa din lusa . Son lea mu oskuviellja , mu bargoguoibmi ja soahteguoibmi gean dii vuolggaheiddet veahkehit mu dalle go mun dárbbašin .
Son lea áibbašan din ja muosehuvai danne go dii leiddet gullan ahte son lei buohcamin .
Buozus son duođaid ge lei , lahka jámi . Muhto Ipmil árpmihii su , ii ge dušše su , muhto maiddái mu , aman oažžut morraša morraša ala .
Dan dihtii anán ge dađe deaŧaleabbon vuolggahit su din lusa , vai dii beasašeiddet illudit go oaidnibehtet su fas , ja mun ge livččen uhcit morrašis .
Vuostáiváldet su Hearrá nammii stuora iluin , ja atnet gudnis su lágán olbmuid . Dasgo son lei Kristusa barggu dihtii lahka jámi go son ii seastán heakkas geahččalettiin veahkehit mu dainna mainna ieža ehpet sáhttán veahkehit mu .
Muđuid , oskuguimmiidan : Illudehket Hearrás !
Mun in váibba geardduheames dan maid ovdal lean cealkán , ja dat addá didjiide oadjebasvuođa .
Váruhehket beatnagiin , bahás bargiin , sis geat gáldejit iežaset .
Dasgo mii leat albma birračuhppojuvvon olbmot , mii geat bálvalit Ipmila Vuoiŋŋa vehkiin , ja mis lea rápmi Jesus Kristusis , eat ge luohte alcceseamet . Dattege maiddái mun ge sáhtášin luohttit alccesan .
Jos oktage oaivvildeažžá ahte sáhttá luohttit alccesis , de mun sáhtán dan vel eanebut .
Dasgo mun birračuhppojuvvojin gávccát beaivvi , gulan Israela álbmogii ja Benjamina čerdii , lean hebrealaš riegádan hebrealaččain , lága čuovvumis ledjen farisealaš , doarrádallen girku áŋgirvuođain ja ledjen láitemeahttun lága čuovvumis .
Muhto buot dan mii ovdal lei munnje vuoitu , anán dál vahágin Kristusa dihtii .
Duođaid , mun anán maiddái buot vahágin dan ektui mii lea ollu eanet veara , ahte dovddan Jesus Kristusa , mu Hearrá .
Su dihtii mun lean massán buot , ja anán dan duššin vai oččošin Kristusa vuoitun ja beasašin gullat sutnje .
In fal iežan vanhurskkisvuođain , mii boahtá lágas , muhto dainna vanhurskkisvuođain mii boahtá oskkus Kristusii , man Ipmil addá sidjiide geat oskot .
Mu áidna dáhttu lea dovdat Kristusa ja su bajásčuožžileami fámu ja šaddat oasálažžan su gillámušaide , vai šattašin su láhkásažžan go jámán nugo son jámii . Vare mun ge olahivččen bajásčuožžileami jábmiid luhtte !
Mun in oaivvil ahte lean juo olahan buot dán dahje lean šaddan ollisin , muhto mun vikkan fáhtet dan , danne go Kristus Jesus lea fáhten mu .
Oskuguoimmit , mun in jáhke iežan vel fáhten dan . Muhto dán mun dagan : Mun vajáldahtán dan mii lea maŋábealde ja faŋuhan dan mii lea ovddabealde , ja viegan mihttomeari guvlui vai vuoittášin dan bálkkašumi allagasas masa Ipmil lea rávkan min Kristus Jesusis .
Jurddašehkot buohkat nu , mii geat leat ollásat .
Ja jos dii jurddašehpet maidege eará láhkái , de Ipmil čielggada dan ge didjiide .
Jotkot ovddosguvlui dan luotta mielde man mii leat čuvvon dán rádjái !
Oskuguoimmit , atnet dii ge mu ovdagovvan , ja váldet vuhtii sin geat čuvvot dan ovdamearkka man mii leat addán didjiide .
Mun lean dávjá cealkán didjiide ja dál ferten geardduhit gatnjaliiguin ahte olusat ellet Kristusa ruossa vašálažžan .
Sin loahppa lea gáđohus , čoavji lea sin ipmil ja sii atnet heahpatvuođa gudnin danne go sii beroštit dušše das mii gullá dán máilbmái .
Muhto min vánheneanan lea albmi , ja doppe mii vuordit vuolás Hearrá Jesus Kristusa beastin .
Son nuppástuhttá min nohkavaš rupmaša ja dahká dan iežas hearvásin dahkkojuvvon rupmaša láhkásažžan dainna fámuin mainna son bidjá buot iežas vuollái .
Oskuguimmiidan , geaid mun ráhkistan ja áibbašan , mu illu ja mu vuoitokruvdnu , bissot nappo nanusin Hearrás , ráhkkásiiddán !
Mun rávven Euodia ja Syntyke : Soabadeahkki Hearrás !
Ja de bivddán du ge , oskkáldas Synzygos , veahkehit dán guoktá , dasgo soai leaba soahtan evangeliuma ovddas muinna , Klemensiin ja mu eará bargoguimmiiguin , geaid namat leat čállojuvvon eallima girjái .
Illudehket álelassii Hearrás !
Vel oktii cealkkán : Illudehket !
Dovdoset buot olbmot ahte dii lehpet láđđásat .
Hearrá lea lahka !
Allet ane morraša mastege ! Buktet baicca buot dárbbuideattet ovdan Ipmilii rohkadallamiin ja ánodemiin giitevašvuođain !
De Ipmila ráfi , mii manná buot jierpmi badjel , várjala din váimmuid ja jurdagiid Kristus Jesusis .
Loahpas , oskuguoimmit : Váldet vuhtii buot dan mii lea duohta , gudnálaš , riekta ja buhtis , buot dan mii lea ráhkistan ja gudnejahttin veara , juohke buori dábi ja buot mii ánssáša rámi !
Dahket dan maid lehpet oahppan ja vuostáiváldán , oaidnán ja gullan mus.
De ráfi Ipmil lea dinguin .
Hearrá lea addán munnje dan stuora ilu ahte dii fas lehpet ealljáruššan atnit mus fuola .
Dii lehpet gal dahkan dan ovdal ge , muhto dalle dis ii lean vejolašvuohta dahkat maidege .
Mun in cealkke dán danne ahte mus livččii váilon mihkkege , dasgo mun lean oahppan duhtat dasa mii mus lea .
Mun dieđán maid mearkkaša eallit geafivuođas ja maiddái valljivuođas .
Mun lean duođaid muosáhan buot , sihke nelgon ja borran gallás , eallán sihke valljivuođas ja vádjitvuođas .
Buot nagadan su siste guhte dahká mu gievran .
Dattege dii lehpet dahkan bures go veahkeheiddet mu áŧestusain .
Dii filippilaččat diehtibehtet ahte go mun sárdnidišgohten evangeliuma ja vulgen Makedonias , de leiddet áidna searvegoddi mii veahkehii mu mu sisaboađuiguin ja olggosgoluiguin .
Jo dalle go ledjen Tessalonikas , dii sáddiidet munnje eanet go oktii daid maid mun dárbbašin .
Duođaid , mun in váinnut din attáldagaid , muhto mun sávan dan ahte din bargu šattašii didjiide vel stuorit vuoitun .
Mun lean ožžon buot maid lehpet addán munnje , ja dál mus lea vallji .
Mus lea eanet go dárbbašan dál go lean ožžon dan maid dii leiddet bidjan munnje Epafroditusa mielde . Dat lei dego njálggahájat oaffar maid Ipmil vuostáiváldá iluin , ja mii lea su miela mielde .
Mu Ipmil addá didjiide buot maid dárbbašehpet hearvás riggodagainis Kristus Jesusis .
Min Ipmilii ja Áhččái lehkos gudni álo ja agálašvuhtii ! Amen .
Celket dearvvuođaid juohke bassi olbmui gii lea Kristus Jesusis .
Oskuguoimmit geat leat muinna dáppe , celket didjiide dearvvuođaid .
Ja buot Ipmila olbmot celket didjiide dearvvuođaid , erenoamážit sii geat leat keaisára bálvalusas .
Hearrámet Jesus Kristusa árbmu lehkos din vuoiŋŋain !
Dearvvuođat Bávlosis , gii Ipmila dáhtu mielde lea Kristus Jesusa apoasttal , ja min oskuvieljas Timoteusis Kolossa bassi olbmuide , min oskuguimmiide geat oskot Kristusii .
Árbmu lehkos dinguin ja ráfi Ipmilis , Áhčisteamet !
Mii álelassii giitit Ipmila , Hearrámet Jesus Kristusa Áhči , go mii rohkadallat din ovddas . Dasgo mii leat gullan din oskku birra Kristus Jesusii ja dan ráhkisvuođa birra mii dis lea buot bassi olbmuide , dan mii boahtá dan doaivvus mii lea vurkejuvvon didjiide almmis .
Dán doaivvu birra dii gulaidet juo dalle go didjiide sárdniduvvui duohtavuođa sátni , go evangelium bođii din lusa .
Dát evangelium šaddada šattuid ja viidána miehtá máilmmi , ja nu dat lea dahkan din luhtte ge gitta dan beaivvi rájes go dii beasaidet gullat Ipmila árpmu birra ja dovddiideiddet dan nu mo dat duođaid lea .
Dán dii beasaidet oahppat min ráhkis bargoguoimmis Epafrasas , gii lea oskkáldas Kristusa bálvaleaddji min dihtii .
Son lea maiddái muitalan midjiide dan ráhkisvuođa birra man Vuoigŋa lea duddjon dis .
Dan dihtii mii eat leat heaitán rohkadallamis din ovddas gitta dan beaivvi rájes go mii gulaimet din birra .
Min rohkos lea ahte dii oččošeiddet diehtit ollásit Ipmila dáhtu ja oččošeiddet buot vuoiŋŋalaš viisodaga ja áddejumi . Mii rohkadallat ahte sáhtášeiddet vádjolit dohkálažžan Hearrái , ja juohke dáfus dahkat dan mii lea su miela mielde go dii šaddadehpet šattuid buot buriid daguiguin ja dovdiidehpet Ipmila čiekŋaleabbot .
Vare buot su hearvásvuođa fápmu nannešii din nu ahte dii álo livččiidet gierdavaččat ja guhkesmielalaččat .
Giitet iluin Áhči gii lea dahkan din dohkálažžan oažžut oasi bassi olbmuid árbbis mii lea čuovgasa riikkas .
Dasgo son lea gádjon min seavdnjadasa válddis ja sirdán min ráhkis Bártnis riikii , son gii lea min lonástus , suttuid ándagassii addojupmi .
Son lea oaidnemeahttun Ipmila govva , vuosttašriegádeaddji , ovdal buot sivdnádusa . Dasgo su siste sivdniduvvui buot , buot mii lea almmis ja eatnama alde , oinnolaš ja oaidnemeahttun , truvnnut ja hearrávuođat , oaivámuččat ja fámut – buot lea sivdniduvvon su bokte ja su várás .
Son lea ovdal buot , ja buot bissu su siste .
Son lea rupmaša oaivi , ja su rumaš lea girku .
Son lea álgu , vuosttašriegádeaddji jábmiid gaskkas , vai son juohke dáfus livččii vuosttamuš . Dasgo su siste Ipmil dáhtui orrut oppa dievasvuođainis , ja su bokte soabahit buot sivdnádusa iežainis , buot mii lea eatnama alde ja almmis , go son varainis ruossa alde dagai ráfi .
Oktii dii ge leiddet vierrásat Ipmilii ja leiddet su vašálaččat go eliidet bahás daguideattet mielde . Muhto dál son lea soabahan din iežainis , go Kristus gillái jápmima eatnanlaš rupmašisttis vai son sáhtášii doalvut din iežas muođuid ovdii bassin , vigiheapmin ja láitemeahttumin .
Dii galgabehtet fal bissut oskkus , nana vuođu alde , gáiddakeahttá dan doaivagis man oaččuidet go gulaidet evangeliuma . Dát evangelium lea sárdniduvvon buot sivdnádusaide almmi vuolde , ja mun , Bávlos , lean šaddan dan bálvaleaddjin .
Dál mun illudan go gillán din dihtii .
Dan mii velá váilu Kristusa áŧestusain , mun ollašuhtán iežan rupmašis su rupmaša dihtii , mii lea girku .
Dán bálvaleaddjin mun lean šaddan go Ipmil lea addán munnje dállodoalli doaimma din gaskkas : ollašuhttit Ipmila sáni bálvalusa dievaslaččat .
Dát čiegusvuohta lea leamaš čihkosis áiggi álggu rájes ja buot buolvvaide , muhto dál Ipmil lea almmustahttán dan bassi olbmuidasas .
Sidjiide Ipmil hálidii dieđihit man hearvái ja rikkis dát čiegusvuohta lea báhkiniidda : Kristus din gaskkas , hearvásvuođa doaivva !
Su mii sárdnidit , ja mii cuiget ja oahpahit juohkehačča buot viisodagain vai veahkehivččiimet juohke olbmo šaddat ollisin Kristusis .
Dán várás mun ražan ja soađan su fámuin guhte fámolaččat duddjo mu siste .
Mun dáhtun din diehtit man garrasit mun soađan din ovddas ja Laodikea olbmuid ja buot earáid ovddas geat eai leat vel oaidnán mu muođus muhtui . Mun sávan ahte sin váimmut arvvosmahttojuvvošedje , nu ahte ráhkisvuohta ovttastahtášii sin ja sii ollešedje čiekŋalis ja rikkis áddejupmái ja dovdui Ipmila čiegusvuođa birra , mii lea Kristus . Dasgo su sisa leat čihkkojuvvon buot viisodaga ja dieđu dávvirat .
Dán mun cealkkán amas oktage beahttit din fillejeaddji sániiguin .
Dasgo vaikko mun ieš in leat rumašlaččat din lahka , de vuoiŋŋastan lean din luhtte , ja mun illudan go oainnán buori ortnega ja nana oskku Kristusii mii lea din gaskkas .
Go dii lehpet vuostáiváldán Kristusa Hearrán , de vádjolehket su siste . Ruohtastuvvet sutnje ja huksejehket su ala ! Bissot nannosit oskkus nugo lehpet oahpahuvvon , ja giitalehket Ipmila valljugasat !
Váruhehket amas oktage giellat din máilmmálaš viisodagain ja duššálaš behtolašvuođain mat čuvvot olbmuid árbevieruid ja bohtet dán máilmmi álgofámuin , eai ge Kristusis .
Dasgo su siste orru rumašlaččat oppa ipmilvuođa dievasvuohta , ja su siste dii ge lehpet ožžon oasi dán dievasvuođas , dasgo son lea buot oaivámuččaid ja fámuid oaivi .
Su siste lehpet dii ge birračuhppojuvvon , ehpet olbmo gieđain , muhto Kristusa birračuohpahusain , dalle go nuolaidet eret suttolaš rupmaša .
Dasgo gásttas dii hávdáduvvuidet suinna , ja gásttas dii bajásčuoččáldahttojuvvuidet ge suinna go oskkuidet Ipmila fápmui mii bajásčuoččáldahtii Kristusa jábmiid luhtte .
Dii leiddet jápmán rihkkumiiddádet ja birračuohpakeahtes dilidet dihtii . Muhto Ipmil dagai din ge eallin oktan Kristusiin go attii midjiide buohkaide buot min suttuid ándagassii . Son sihkui eret vealgegirjji mii lei min vuostái buot dan gáibádusaiguin ja válddii dan eret go návlii dan russii .
Son vearjjohuhtii oaivámuččaid ja fámuid ja boalggahii sin albmosii go son Kristusis vuittii sin .
Danne ii oktage oaččo dubmet din dan dihtii maid borrabehtet dahje juhkabehtet , ii ge allabasiid , mánnovuođu dahje sábbáha dihtii .
Buot dát leat dušše dan suoivvan mii boahtá , muhto duohtavuohta lea Kristus ja su rumaš .
Din vuoitobálkkašumi ii oaččo váldit oktage , gii čuoččuha vearri vuollegašvuođa ja eŋgeliid bálvaleami .
Dakkár olbmot guorahallet álo iežaset oainnáhusaid ja čeavlástallet almmá siva haga máilmmálaš jurdagiiddisetguin eai ge doala gitta sus gii lea oaivi . Son fuolaha oppa rupmaša ja čatná dan oktii lađđasiiguin ja suonaiguin , nu ahte dat šaddá nu mo Ipmil diktá dan šaddat .
Jos dii Kristusiin lehpet jápmán eret dán máilmmi álgofámuin , manne ain eallibehtet dego gulašeiddet dán máilbmái ja doalašeiddet dan gohččumiid : « Ale váldde » , « ale máistte » , « ale guoskkat » ?
Buot leat dakkárat mat geavahuvvojit ja dasto duššet . Dát leat dušše olbmuid báhkkomat ja oahppu .
Dakkár iešráhkaduvvon ipmilbálvalus , vearri vuollegašvuohta ja rupmaša givssideapmi gal sáhttet adnojuvvot viissisvuohtan , muhto dain ii leat mihkkege gudniid , dat duhtadit dušše oaččálaš himuid .
Go dii dal lehpet bajásčuoččáldahtton Kristusiin , de ohcet dan mii lea badjin , gos Kristus lea čohkkámin Ipmila olgeš gieđa bealde .
Váinnuhehket dan mii lea badjin , allet ge dan mii lea eatnama alde .
Dii han lehpet jápmán , ja din eallin lea čihkkojuvvon Kristusiin Ipmilii .
Muhto go Kristus , din eallin , almmustuvvá , de dii ge almmustuvvabehtet suinna hearvásvuođas .
Jámihehket dalle buot eatnanlašvuođa din siste : furrošeami , nuoskivuođa , oaččálaš himuid , bahás anistumi ja ruhtaváibmilvuođa mii lea eahpeipmilbálvaleapmi .
Dákkáriid dihtii Ipmila moarri deaivida eahpegulolaččaid . Sin searvvis vádjoleiddet maiddái dii ge dalle go eliidet dáin suttuin .
Muhto dál fertebehtet guođđit buot dáid : moari , hohppuivuođa , bahávuođa , bilkideami ja fasttes ságaid . Allet ge gielis guhtet guimmiidasadet !
Dasgo dii lehpet nuollan eret boares luonddu ja dan daguid ja gárvodan ođđa olbmuin mii álo ođasmahttojuvvo nu ahte oahppá dovdat Ipmila ja šaddá sivdnideaddjis gova mielde .
De ii leat šat greikalaš dahje juvddálaš , birračuhppojuvvon dahje birračuohpakeahtes olmmoš , barbára , skytalaš , šlávva dahje friddja , muhto Kristus lea buot ja buohkaid siste .
Go dii lehpet Ipmila válljejuvvon , bassi ja ráhkistuvvon olbmot , de gárvodehket dan dihtii njuoras árkkálmastinvuođain , buorrevuođain , ustitlašvuođain , vuollegašvuođain ja gierdavašvuođain , nu ahte dii gierdabehtet guhtet guimmiideattet ja addibehtet ándagassii guhtet guoibmáseattet , jos nuppis leš váidámuš nuppi vuostái .
Nugo Hearrá lea addán ándagassii didjiide , nu galgabehtet dii ge addit ándagassii guhtet guoibmáseattet .
Muhto ovddimustá , gárvodehket ráhkisvuođain mii lea ollisvuođa báddi .
Ráđđejehkos Kristusa ráfi din váimmuin , dasgo dasa dii lehpet rávkojuvvon ovtta ja seammá rupmaša lahttun .
Ja lehket giitevaččat !
Orros Kristusa sátni valljugasat din gaskkas .
Oahpahehket ja cuiggodehket guhtet guimmiideattet buot viissisvuođain . Lávlot Ipmilii giitevaš váimmus sálmmaid , giittuslávlagiid ja vuoiŋŋalaš lávlagiid .
Buot maid dii dahkabehtet , sániin dahje daguin , dahket dan Hearrá Jesusa nammii giittedettiin Ipmil Áhči su bokte .
Áhkát , lehket boatnjádet vuolibuččat , nugo lea vuogas sidjiide geat oskot Hearrái .
Boatnját , ráhkistehket áhkádet , allet ge leage boarkkat sutnje .
Mánát , jeagadehket vánhemiiddádet juohke dáfus , dasgo dat lea Hearrá dáhtu mielde .
Áhčit , allet álo háhtte mánáideattet amaset hearddohuvvat .
Šlávat , jeagadehket eatnanlaš isidiiddádet juohke dáfus . Allet leage guoktilaččat , dego sii geat vigget dohkket olbmuide , muhto jeagadehket sin vuoigatlaš ja duođalaš váimmuiguin Hearrá balus .
Buot maid dii dahkabehtet , dahket dan oppa sielus , dii han bálvalehpet Hearrá ehpet ge olbmuid . Dii diehtibehtet ahte Hearrás dii oažžubehtet árbbi bálkán .
Bálvalehket Hearrá Kristusa . Son gii lea dahkan veriid , oažžu das ráŋggáštusa .
Dasgo Ipmil ii geahča olbmo hámi beallái .
Isidat , meannudehket šlávaideattetguin vuoigadis ja govttolaš láhkái , dasgo dii diehtibehtet ahte dis ge lea Hearrá almmis .
Lehket bissovaččat rohkosis , gohcet ja rohkadallet ja giitet Ipmila !
Rohkadallet min ovddas ge , ahte Ipmil rabašii sánis uvssa , vai mii beasašeimmet sárdnidit Kristusa čiegusvuođa , man dihtii mun dál lean giddagasas . Rohkadallet ahte mun almmuhivččen dan čiegusvuođa nugo berren .
Meannudehket viisásit singuin geat leat olggobealde , ja atnet ávkin juohke vuogas liibba .
Lehkoset din sánit álelassii ustitlaččat , seaguhuvvon sálttiin , vai dii áddešeiddet mo berre vástidit juohkehažžii .
Tykikos muitala didjiide buot mii guoská munnje . Son lea ráhkis oskuviellja ja oskkáldas bálvaleaddji ja bargoguoibmi Hearrá barggus .
Mun vuolggahan su din lusa aiddo danne vai dii beasašeiddet gullat ságaid midjiide , ja ahte son arvvosmahtášii din váimmuid .
Su mielde vuolggahan Onesimusa , oskkáldas ja ráhkis oskuvielja , gii lea okta dis .
Soai sáhttiba muitalit didjiide buot mii lea dáhpáhuvvan dáppe .
Aristarkos , mu fáŋgaguoibmi , cealká didjiide dearvvuođaid , ja nu dahká maiddái Markus , Barnabasa vuosttaš vilbealli .
Dii lehpet juo ožžon gohččumiid su birra ; vuostáiváldet su bures jos boahtá .
Jesus , gii maiddái gohčoduvvo Justusin , cealká maid dearvvuođaid .
Dát golmmas leat áidna birračuhppojuvvon olbmát geat leat ovttas muinna Ipmila riikka barggus , ja sii leat leamaš munnje stuora jeđđehussan .
Epafras , Jesus Kristusa bálvaleaddji , gii lea okta dis , cealká didjiide dearvvuođaid .
Son soahtá álo din ovddas rohkosiinnis , vai dii bisošeiddet ollisin ja juohke dáfus geargadin dahkat Ipmila dáhtu .
Mun duođaštan ahte son lea bargamin váibbakeahttá din ovddas ja sin ovddas geat ásset Laodikeas ja Hierapolisas .
Min ráhkis Lukas , doavttir , cealká didjiide dearvvuođaid , ja maiddái Demas .
Celket dearvvuođaid Laodikea oskuguimmiide , nu maiddái Nymfai ja dan searvegoddái mii čoaggana su vissui .
Go dii lehpet lohkan dán girjji , de atnet fuola ahte dat lohkkojuvvo maiddái Laodikea searvegottis , ja ahte dii gis lohkabehtet dan girjji man lean sádden Laodikeai .
Celket Arkipposii : Muitte doaimmahit dan bálvalusbarggu man Hearrá lea addán dutnje .
Mun , Bávlos , čálán dása dáid dearvvuođaid gieđainan : Allet vajáldahte mu láhkkiid !
Árbmu lehkos dinguin !
Dearvvuođat Bávlosis , Silvanusis ja Timoteusis Tessalonika searvegoddái , mii eallá Ipmil Áhčis ja Hearrás Jesus Kristusis .
Árbmu ja ráfi lehkos dinguin !
Mii giitit álo Ipmila din buohkaid ovddas go muitit din rohkadusaineamet . Ipmila ja Áhči muođuid ovddas mii álo muittašit mo din osku duddjo buriid daguid , mo dii bargabehtet ráhkisvuođas ja mo dii lehpet gierdavaččat doaivagis Hearrámet Jesus Kristusii .
Ipmil ráhkista din , oskuguoimmit , ja mii diehtit ahte dii lehpet válljejuvvon .
Dasgo min evangelium ii boahtán din lusa dušše sániiguin , muhto maiddái fámuin , Bassi Vuoiŋŋain ja nana vissisvuođain .
Dii diehtibehtet ieža mo mii eliimet din dihtii go leimmet din luhtte .
Dii čuovuidet min ja maiddái Hearrá ovdamearkka , ja vaikko dis lei stuora áŧestus , de dii válddiidet vuostái sáni dainna iluin maid Bassi Vuoigŋa addá .
Nu šattaidet ovdagovvan buohkaide geat oskot , sihke Makedonias ja Akaias .
Dasgo Hearrá sátni lea dis viidánan dego skájanas , ii ge dušše Makedoniai ja Akaiai , muhto juohke sajis din osku Ipmilii lea šaddan dovddusin , nu ahte mii eat dárbbaš sárdnut das maidege .
Sii muitalit ieža mo dii vuostáiválddiidet min ja mo dii jorggiheiddet Ipmila guvlui eahpeipmiliin eret , bálvalit ealli ja duohta Ipmila ja vuordit almmis su Bártni , Jesusa , gean Ipmil bajásčuoččáldahtii jábmiid luhtte , su guhte gádju min boahttevaš moaris .
Oskuguoimmit , dii han diehtibehtet ieža ahte min galledeapmi din luhtte ii lean duššás .
Vaikko mii leimmet gillán ja illástuvvon Filippis nugo diehtibehtet , de Ipmil attii midjiide roahkkatvuođa sárdnidit evangeliumis didjiide , fuolakeahttá garra vuostehágus .
Mii eat sárdnidan didjiide čádjideamis , buhtismeahttun áigumušas eat ge behtolašvuođas .
Muhto Ipmil lea atnán min dohkálažžan nu ahte evangelium lea oskkilduvvon midjiide . Go mii sárdnut , de eat sártno vai dohkkešeimmet olbmuide , muhto baicca Ipmilii guhte guorahallá min váimmuid .
Dasgo mii eat goassege viggan oalgguhit din sániiguin , nugo diehtibehtet , eat ge čiegus ávkkástallamiin , das lea Ipmil min duođašteaddji . Mii eat bivdán gudni olbmuin , eat dis eat ge earáin , vaikko mii livččiimet sáhttán gáibidit dan árvvu mii mis lea Kristusa apoasttalin , muhto mii leimmet baicca láđđásat didjiide .
Dego njamaheaddji eadni dikšumin mánáidis , mii hálideimmet njuoras ráhkisvuođas addit didjiide eat dušše Ipmila evangeliuma , muhto maiddái iežamet heakka . Dasgo dii lehpet šaddan ráhkisin midjiide .
Oskuguoimmit , dii han muitibehtet mo mii barggaimet ražaimet . Mii barggaimet ijatbeaivvi amamet šaddat didjiide noađđin go sárdnideimmet Ipmila evangeliuma didjiide .
Dii han lehpet duođašteaddjit dasa , ja nu lea Ipmil ge , ahte min eallin din gaskkas guđet oskubehtet , lei bassi , vuoigatlaš ja láitemeahttun .
Dii diehtibehtet maiddái ahte mii dagaimet dinguin juohkehaččain nugo áhčči dahká mánáidisguin .
Mii rávviimet ja jeđđiimet din ja ávžžuheimmet din eallit dohkálažžan Ipmilii , gii rávká din riikasis ja hearvásvuohtasis .
Dan dihtii mii heaittekeahttá giitalit Ipmila go dii vuostaiválddiidet Ipmila sáni man dii gulaidet min sárdnideamen didjiide , ehpet olbmuid sátnin , muhto danin mii dat duođaid lea , Ipmila sátnin , mii maiddái duddjo din siste guđet oskubehtet .
Oskuguoimmit , didjiide lea dáhpáhuvvan dat seammá mii dáhpáhuvai Judeas Ipmila searvegottiide , daidda mat gullet Kristus Jesusii .
Dasgo dii lehpet gillán dan seammá iežadet riikkaguimmiin maid sii leat gillán juvddálaččain , sii geat godde Hearrá Jesusa ja profehtaideaset ja leat doarrádallan min .
Sii eai leat Ipmila miela mielde ja leat buot olbmuid vuostái , dasgo sii hehttejit min sárdnideames báhkiniidda , amaset dat bestojuvvot .
Dan láhkái sii álelassii devdet suttuideaset mihtu .
Muhto moarri lea juksan sin ge ollásit .
Oskuguoimmit , oanehis áigái mii earuhuvvuimet dis , muhto dušše olgguldasat , eat ge min váimmuin . Mii ohcaleimmet din ja duođaid hálideimmet oaidnalit dinguin .
Danne dáhtuimet boahtit din lusa , ja mun , Bávlos , geahččalin oktii ja guktii , muhto Sáhtán hehttii min .
Gii lea min doaivva , illu ja vuoitokruvdnu Hearrámet Jesusa ovddas go son boahtá , jos ehpet dii ?
Duođaid , dii lehpet min gudni ja illu !
Dan dihtii , go mii eat šat sáhttán gierdat dán , de mearrideimmet báhcit Atenii iehčanassii
ja vuolggaheimmet Timoteusa din lusa , min oskuvielja ja Ipmila bargoguoimmi Kristusa evangeliuma bálvalusas .
Son galggai nannet ja arvvosmahttit din oskku ,
amas oktage jorralit dáin áŧestusain .
Dii han ieža diehtibehtet ahte dát leat biddjojuvvon min ala .
Juo dalle go mii leimmet din luhtte , de celkkiimet didjiide ovddalgihtii ahte mii áŧestuvvat . Nu geavai ge , nugo diehtibehtet .
Dan dihtii go mun in gierdan šat vuordit , de vuolggahin Timoteusa din lusa oažžut čielgasa din oskkus , lei go geahččaleaddji veadján fillet din , nu ahte min bargu lei duššás .
Dál lea Timoteus aiddo máhccan din luhtte ja lea buktán buriid ságaid din oskku ja ráhkisvuođa birra . Son muitala ahte dii čađat jurddašehpet min iluin ja áibbašehpet oaidnit min fas , seammá láhkái go mii gis áibbašit oaidnit din .
Dan dihtii , oskuguoimmit , lea din osku arvvosmahttán min buot min áŧestusain ja heđiin . Dál mii duođaid eallit fas go mii diehtit ahte dii bissubehtet nanusin Hearrás .
Mo mii sáhtášeimmet ge doarvái giitit Ipmila din dihtii , buot dan ilu ovddas man dii lehpet addán midjiide ja mii deavdá min Ipmila muođuid ovddas . Ijatbeaivvi mii átnut beassat fas oaidnalit dinguin ja addit didjiide dan mii velá váilu din oskkus .
Vare Ipmil ieš , Áhččámet , ja Hearrámet Jesus láidestivččii min din lusa !
Ja vare Hearrá lasihivččii ja riggodahtášii din ráhkisvuođa guhtet guimmiidasadet ja buohkaide , nugo mis ge lea ráhkisvuohta didjiide , vai din váimmut nannejuvvošedje , ja dii livččiidet láitemeahttumat bassivuođas min Ipmila ja Áhči ovddas , go Hearrámet Jesus boahtá oppa bassi veagainis .
Dasto velá , oskuguoimmit , go dii lehpet oahppan mis mo dii galggašeiddet vádjolit Ipmila miela mielde , nugo juo dahkabehtet ge , de mii ávžžuhit ja rávvet din Hearrá Jesusa nammii ain ovdánit das .
Dii han diehtibehtet makkár gohččumiid mii attiimet didjiide Hearrá Jesusa nammii .
Dasgo Ipmila dáhttu lea ahte dahkkojuvvobehtet bassin , nu ahte fasttášehpet furrošeami , ja ahte juohkehaš ádde mo son oažžu áhkás bassivuođas ja gudnis , ii ge anistumi himuin dego báhkinat guđet eai dovdda Ipmila .
Son dáhttu maiddái ahte ii oktage daga veriid oskuguoibmásis dahje beahte su dákkár áššiin .
Hearrá ráŋggášta buot dakkáriid , nugo mii ovdal juo leat cealkán ja nannosit duođaštan didjiide .
Dasgo Ipmil ii rávkan min buhtismeahttunvuhtii , muhto bassivuhtii .
Dan dihtii , dat guhte hilgu dán rávvaga , ii hilggo olbmo , muhto Ipmila , guhte addá didjiide Bassi Vuoiŋŋas .
Vieljalaš ráhkisvuođa hárrái ii dárbbaš čállit didjiide , dasgo dii lehpet ieža oahppan Ipmilis ráhkistit guhtet guimmiideattet . Dii čájehehpet dán ráhkisvuođa buot oskuguimmiide oppa Makedonias .
Dattege mii movttiidahttit din , oskuguoimmit , ovdánit velá eambbo ja atnit gudnin eallit ráfálaččat , fuolahit iežadet áššiid ja bargat gieđaideattetguin , nugo mii leat gohččon din .
Go vádjolehpet nu , de vuoitibehtet árvvu dain olbmuin guđet leat olggobealde , ehpet ge dárbbaš geange veahki .
Oskuguoimmit , mii dáhtošeimmet din diehtit mii dáhpáhuvvá sidjiide geat leat oađđán jápmimii , amadet moraštit nugo dat geat leat almmá doaivaga haga .
Jos mii oskut ahte Jesus lea jápmán ja bajásčuožžilan , de mii maiddái oskut ahte Ipmil oktan suinna doalvu eallimii sin geat leat oađđán jápmimii .
Dán mii cealkit didjiide Hearrá sátnin : Mii geat dál leat eallimin ja báhcit dassážii go Hearrá boahtá , eat eisege boađe sin ovdal geat leat oađđán jápmimii .
Dasgo go gohččun čuodjá , ja váldoeŋgela jietna gullo ja Ipmila báson skádjá , dalle Hearrá ieš njiedjá almmis ja vuosttažin bajásčuožžilit sii geat leat jápmán Kristusis . Oktan singuin rohttašuvvat dalle balvvaid sisa mii guđet leat eallimin ja leat báhcán , vai deaivvadit Hearráin áimmus .
Dalle mii oažžut álelassii leat Hearrá luhtte .
De jeđđejehket guhtet guimmiideattet dáiguin sániiguin !
Muhto áiggiid ja bottuid birra ii dárbbaš čállit didjiide , oskuguoimmit . Dasgo dii han diehtibehtet bures ahte Hearrá beaivi boahtá dego suola ihkku .
Go olbmot dadjet : « Ráfi ja oadjebasvuohta ! » de heavahus fáhkkestaga deaivvaha sin , dego ávttat áhpehis nissona . Eai ge sii eisege beasa báhtarussii .
Muhto oskuguoimmit , dii ehpet leat seavdnjadasas , ja danne beaivi ii boađe fuomáškeahttá din badjelii dego suola .
Dii han lehpet buohkat čuovgasa mánát ja beaivvi mánát ; eat ge mii leat ija dahje seavdnjadasa mánát .
Allot dasto oađe nugo dat earát , muhto gohccot ja bissot čielggusin .
Sii geat ođđet , ođđet ihkku , ja sii geat juhket iežaset gárremiidda , dahket dan ihkku .
Muhto bissot čielggusin , mii geat gullat beaivái , ja atnot oskku ja ráhkisvuođa ruovdegárvun ja bestojumi doaivaga oaivesuodjin .
Dasgo Ipmil ii leat mearridan min šaddat moari vuollái , muhto vuoitit bestojumi Hearrámet Jesus Kristusa bokte . Son jámii min ovddas vai mii , gozedettiin dahje oađedettiin , ealášeimmet suinna .
Dan dihtii , arvvosmahttet ja nanosmahttet guhtet guimmiideattet , nugo dahkabehtet ge .
Oskuguoimmit , mii bivdit din atnit árvvus sin geat rahčet din gaskkas , sin geat leat din ovddasčuožžut Hearrás ja cuiggodit din .
Ráhkistehket sin ja atnet sin erenoamáš alla árvvus sin barggu dihtii .
Dollet ráfi guhtet guimmiideattetguin !
Oskuguoimmit , mii rávvet din : Cuiggodehket šlárvvaid , jeđđejehket hearddohemiid , atnet fuola heajuin , ja lehket gierdavaččat buohkaide .
Váruhehket amas oktage mávssahit bahá baháin , muhto bivdet álelassii dahkat buori guhtet guimmiidasadet ja buohkaide .
Lehket álo ilolaččat , rohkadallet heaittekeahttá , giitet Ipmila juohke dilis !
Dát lea Ipmila dáhttu din hárrái Kristus Jesusis .
Allet čáskat Vuoiŋŋa , allet badjelgeahča profehtastallama , muhto guorahallet buot ja dollet gitta das mii lea buorre , ja fasttášehket juohke lágán bahávuođa .
Vare ráfi Ipmil basuhivččii din ollásit ja várjalivččii oppa din vuoiŋŋa , sielu ja rupmaša láitemeahttumin dassážii go Hearrámet Jesus Kristus boahtá .
Son guhte rávká din , lea oskkáldas ; son maiddái dahká dan .
Oskuguoimmit , rohkadallet min ovddas !
Celket dearvvuođaid buot oskuguimmiide bassi cummáin !
Hearrá dáhtu mielde mun gohčun din lohkat dán girjji buot oskuguimmiide .
Hearrámet Jesus Kristusa árbmu lehkos dinguin !
Dearvvuođat Bávlosis , Silvanusis ja Timoteusis Tessalonika searvegoddái , mii eallá Ipmilis , Áhčisteamet , ja Hearrás Jesus Kristusis .
Árbmu lehkos dinguin ja ráfi Ipmilis , Áhčisteamet , ja Hearrás Jesus Kristusis !
Mii fertet álo giitit Ipmila din ovddas , oskuguoimmit , nugo lea riekta , dasgo din osku stuorru ahte stuorru , ja din juohkehačča ráhkisvuohta lassána .
Danne mii sáhttit sárdnut rámiin eará Ipmila searvegottiin din gierdavašvuođa ja oskku birra , mii dis lea buot doarrádallamiin ja áŧestusain maid dii fertebehtet gierdat .
Dát duođašta ahte Ipmila duopmu lea vuoigatlaš , ahte son atná din dohkálažžan Ipmila riikii , man dihtii dii dál gillábehtet .
Ipmila čalmmiin lea vuoigatlaš mávssahit áŧestusaid sidjiide guđet áŧestit din . Muhto buohkaide geat áŧestuvvet , sihke didjiide ja midjiide , son addá vuoiŋŋadusa , go Hearrá Jesus almmustuvvá almmis oktan fámolaš eŋgeliiddisguin . Son boahtá dollanjuokčamiiguin ja mávssaha sidjiide geat eai dovdda Ipmila , eai ge jeagat Hearrámet Jesusa evangeliuma .
Sin ráŋggáštussan šaddá agálaš gáđohus guhkkin eret Hearrá muođuid ovddas ja earru su hearvásvuođas ja fámus , dan beaivvi go son boahtá vuostáiváldit bassi olbmuidis rámádusa ja buohkaid gudni geat oskot . Sin gaskkas lehpet dii ge , dasgo dii lehpet oskon min duođaštussii .
Dan dihtii mii álo rohkadallat din ovddas ahte Ipmileamet dagašii din dohkálažžan dan rávkojupmái man lehpet ožžon sus , ja attášii didjiide fámu ollašuhttit buot buriid áigumušaid ja oskku daguid , vai Hearrámet Jesusa namma hearvásin dahkkojuvvošii din siste ja dii su siste , Ipmileamet ja Hearrámet Jesus Kristusa árpmu mielde .
Mii bivdit din , oskuguoimmit , go guoská Hearrámet Jesus Kristusa boahtimii ja mo mii čoagganit su lusa , ahte ehpet moivašuvaše ehpet ge suorganivčče , jos muhtun čujuhivččii guđege einnostussii , sátnái dahje girjái mii mahkáš boahtá mis , ja dajašii ahte Hearrá beaivi lea juo boahtán .
Allet divtte ovttage beahttit din mange láhkái ! Dasgo jorraleapmi ferte vuos boahtit ja lágahis olmmoš almmustuvvat , gáđohusa bárdni , vuostálasti , gii bajida iežas buot dan badjel mii gohčoduvvo ipmilin ja bassin , ja gii maiddái čohkkeda Ipmila tempelii ja dahká iežas ipmilin .
Ehpet go muitte ahte mun celken dán go ledjen din luhtte ?
Dii maiddái diehtibehtet mii dál caggá su , nu ahte son almmustuvvá easkka dalle go su áigi dievvá .
Lágahisvuođa čiegusvuohta lea juo doaibmamin , muhto dat mii ain váilu , lea ahte son gii ain caggá , jávkaduvvo .
Dalle almmustuvvá lágaheapmi , gean Hearrá Jesus goddá njálmmis vuoiŋŋanasain ja duššada go son boahtá hearvásvuođastis .
Lágaheapmi boahtá Sáhtána fámuin ja duddjo vearri mearkkaid ja oavdudaguid . Buot lágán vearrivuođain son fille sin geat mannet gáđohussii , danne go sii eai leat ráhkistan eai ge vuostáiváldán duohtavuođa , mii livččii beastán sin .
Danne Ipmil vuolggaha fámolaš čádjádusa sidjiide , vai sii oskugoađášedje giellásiidda ja dubmejuvvošedje , buohkat sii geat eai oskon duohtavuhtii , muhto illudedje vearrivuođas .
Oskuguoimmit , dii geaid Hearrá ráhkista , mii leat geatnegasat álelassii giitit Ipmila din ovddas , dasgo Ipmil válljii din vuosttaš šaddun sin gaskkas geat bestojuvvojit go Vuoigŋa basuha din ja dii oskubehtet duohtavuhtii .
Dása son rávkkai din dan evangeliuma bokte man mii sárdnidit , vai dii oččošeiddet Hearrámet Jesus Kristusa hearvásvuođa .
Bissot dan dihtii nanusin , oskuguoimmit , ja vurkejehket dan maid lehpet ožžon ja oahppan mis , go mii sárdnideimmet dahje čáliimet didjiide .
Hearrámet Jesus Kristus ieš ja Ipmil , Áhččámet , gii lea ráhkistan min ja árpmustis addán midjiide agálaš jeđđehusa ja buori doaivvu , jeđđejehkos din váimmuid ja nannejehkos din nu ahte álo sárdnubehtet ja dahkabehtet dan mii lea buorre !
Loahpas , oskuguoimmit : Rohkadallet min ovddas ahte Hearrá sátni leavašii jođánit ja gudnejahttojuvvošii , nugo din gaskkas ge . Ja rohkadallet ahte mii gáddjojuvvošeimmet gážžáris ja bahás olbmuin , dasgo eai buohkat oskko .
Muhto Hearrá lea oskkáldas , ja son nanne din ja várjala din bahás .
Oskkodettiin Hearrái mii luohttit dasa ahte dii sihke dál ja boahtteáiggis dahkabehtet dan maid mii gohččut din .
Hearrá láidešii din váimmuid Ipmila ráhkisvuhtii ja Kristusa gierdavašvuhtii !
Oskuguoimmit , mii gohččut din Hearrá Jesus Kristusa nammii geassádit eret juohke oskuguoimmis guhte vádjola joavdelasvuođas , ii ge dan oahpu mielde man vuostáiválddiidet mis .
Dii diehtibehtet ieža mo galggašeiddet čuovvut min ovdamearkka .
Dasgo mii eat eallán joavdelasvuođas din luhtte , eat ge borran nuvttá geange láibbi , muhto barggaimet ijatbeaivvi givssiin ja rahčamiin amamet šaddat geasage dis noađđin .
Mis livččii gal vuoigatvuohta oažžut dárbbu mielde , muhto mii dáhtuimet addit didjiide ovdamearkka , vai dii sáhtášeiddet čuovvut min .
Dasgo juo dalle go mii leimmet din luhtte , de attiimet didjiide dán gohččuma ahte dat guhte ii dáhto bargat , ii oaččo borrat ge .
Mii han leat gullan ahte muhtumat din searvvis vádjolit joavdelasvuođas eai ge bargga , muhto seahkanit áššiide mat eai gula sidjiide .
Dakkáriid mii gohččut ja ávžžuhit Hearrá Jesus Kristusa nammii bargat siivvus ja borrat iežaset láibbi .
Muhto oskuguoimmit , allet váibba dahkamis buriid .
Jos muhtun ii jeagat dan maid mii leat čállán dán girjái , de fuomášehket gii son lea , allos ge dis lehko suinna dahkamuš , vai son heahpana .
Allet fal dattege ane su vašálažžan , muhto cuigejehket su nugo oskuguoimmi .
Vare son , ráfi Hearrá , attášii didjiide ráfis , álelassii ja juohke láhkái .
Hearrá lehkos dinguin buohkaiguin !
Mun , Bávlos , čálán dáid dearvvuođaid gieđainan .
Dát lea buot girjjiid dovdomearka ; nu mun čálán .
Hearrámet Jesus Kristusa árbmu lehkos dinguin buohkaiguin !
Dearvvuođat Bávlosis , Kristus Jesusa apoastalis , gean Ipmil , beastámet , ja Kristus Jesus , doivomet , lea gohččon dasa , Timoteusii , mu rivttes oskubárdnái .
Árbmu , váibmoláđisvuohta ja ráfi Ipmil Áhčis ja Kristus Jesusis , Hearrásteamet !
Go mun vulgen Makedoniai , de bivden du báhcit Efesosii , vai don gielddášit muhtumiid buktimis vearri oahpuid dahje doahttaleames cukcasiid ja loahppameahttun sohkaloguid .
Dat dagahit dušše nággoáššiid eai ge ovddit Ipmila áigumušaid , mat leat oskku várás .
Muhto dán gohččuma ulbmil lea dat ráhkisvuohta mii boahtá buhtes váimmus , buori oamedovddus ja duođalaš oskkus .
Muhtumat leat láhppon eret dán ulbmilis ja leat jorgalan dušši ságaide .
Sii hálidit leat láhkaoahpaheaddjit , muhto eai ádde dan maid ieža dadjet eai ge dan maid čuoččuhit nannosit .
Muhto mii diehtit ahte láhka lea buorre go dat dušše geavahuvvo rievttuid . Mii ipmirdit ahte láhka ii leat addojuvvon vanhurskásiid várás , muhto láhkarihkkuid ja gáhtameahttumiid , ipmilmeahttumiid ja suttolaččaid , eahpebasiid ja máilmmálaččaid várás , dakkáraččaid várás geat sorbmejit áhčiset dahje eatniset , olmmošgoddiid várás , furrošeddjiid várás dahje olbmáid várás geat nuskošit olbmáiguin , šlávvagávppašeddjiid ja gielástalliid várás ja sin várás geat vurdnot vearreváli , ja buohkaid várás geat muđuid leat dearvvaš oahpu vuostái .
Nu sárdnu hearvás ja ávdugas Ipmila evangelium , mii lea oskkilduvvon munnje .
Mun giittán Hearrámet Kristus Jesusa gii lea dahkan mu gievran , danne go son anii mu luohtehahttin ja bijai mu bálvalussasis . Ovdal mun ledjen bilkideaddji , doarrádalli ja veahkaválddálaš .
Muhto mun ožžon váibmoláđisvuođa , dasgo eahpeoskkustan in diehtán maid mun dahken .
Ja min Hearrá árbmu lea leamaš munnje cealkemeahttun stuoris ja lea Kristus Jesusis addán munnje oskku ja ráhkisvuođa .
Dát sátni lea jáhkehahtti ja vuostáiváldin veara , ahte Kristus Jesus bođii máilbmái beastit suttolaččaid , ja sin gaskkas mun lean stuorimus .
Muhto dan dihtii mun ožžon váibmoláđisvuođa , vai Kristus Jesus čájehivččii aiddo mus mii lea su stuora guhkesmielalašvuohta , ovdagovvan sidjiide geat oskugohtet sutnje ja ožžot agálaš eallima .
Agálaš gonagas , guhte lea nohkameahttun , oaidnemeahttun , áidna Ipmil , sutnje lehkos máidnun ja gudni álo ja agálašvuhtii ! Amen .
Dán gohččuma , bárdnán Timoteus , mun oskkildan dutnje daid profehtalaš sániid mielde mat oktii celkojuvvojedje du badjelii , vai don daiguin soađašit buori soađi oskkuin ja buriin oamedovdduin .
Muhtumat leat hilgon buori oamedovddu , ja nu leat heavahan oskkuset .
Sin gaskkas leaba Hymenaios ja Aleksandros , geaid mun lean addán Sáhtánii vai soai oahpašeigga orrut bilkitkeahttá Ipmila .
Dál mun rávven din ovddimustá buktit ovdan átnumiid ja rohkosiid , ovddasrohkosiid ja giitalusaid buot olbmuid ovddas . Dát sátni lea jáhkehahtti . Rohkadallet gonagasaid ovddas ja buohkaid ovddas geain lea mearridanváldi , vai mii beasašeimmet eallit jaskes ja ráfálaš eallima , ipmilbalolašvuođas ja gudnálašvuođas .
Dákkár rohkos lea buorre ja dohkálaš Ipmilii , min beastái , guhte dáhttu buot olbmuid bestojuvvot ja dovddiidit duohtavuođa .
Dasgo Ipmil lea okta ja okta lea gaskaolmmái Ipmila ja olbmuid gaskkas , olmmoš Kristus Jesus , guhte attii iežas lonástussan buohkaid ovddas .
Dát lei duođaštus go rivttes áigi dievai , ja dan duođaštusa várás mun lean biddjojuvvon sárdnideaddjin ja apoasttalin . Dát lea duohta , mun in gielis . Mun lean biddjon álbmogiid oskku ja duohtavuođa oahpaheaddjin .
Dan dihtii mun dáhtun ahte juohke báikkis gos olbmát rohkadallet , de loktejit buhtistuvvon gieđaideaset ja rohkadallet suhtu ja soahpameahttunvuođa haga .
Seammá láhkái dáhtun nissoniid gárvodit heivvolaš biktasiiguin , viivvolašvuođas ja vuollegašvuođas ; sin čiŋat eai galgga leat čiŋahuvvon vuovttat , gollit , bearralat dahje divrras biktasat , muhto buorit dagut , nugo heive nissoniidda geat dáhttot adnojuvvot ipmilbalolažžan .
Nisu galgá jaskadit diktit iežas oahpahuvvot buot vuollegašvuođain .
Mun in suova nissona leat oahpaheaddjin , ii ge son galgga ráđđet olbmá ; son galgá orrut jávohaga .
Dasgo Áttán sivdniduvvui vuos ja dasto Eva .
Ii ge Áttán fillejuvvon , muhto nisu divttii iežas fillejuvvot ja rihkui báhkkoma .
Muhto son bestojuvvo go riegádahttá mánáid , jos bissu oskkus ja ráhkisvuođas ja eallá bassivuođas siivvut .
Searvegotti geahčči galgá leat láitemeahttun , ovtta nissona boadnjá , juguheapmi , mášolaš , gudnálaš , guosseláđis , buorre oahpaheaddji , ii ge jugeš dahje cábmálas , muhto láđis , ii ge riidui dahje ruhtaváibmil .
Son galgá hovdet dálus bures ja gudnálašvuođain bajásgeassit mánáidis gulolašvuhtii .
Jos muhtun ii veaje hovdet dálus , mo son de veajášii dikšut Ipmila searvegotti ?
Son ii galgga leat dahkan jorgalusa easkkabáliid , amas goarggastallagoahtit ja šaddat beargalaga duomu vuollái .
Sus galgá leat buorre beaggin sin gaskkas ge geat leat searvegotti olggobealde , amas son šaddat bilkun ja sorrot beargalaga gillii .
Seammá láhkái searvegotti bálvaleaddjit galget leat gudnálaččat , sii eai galgga sárdnut guvttiin njuokčamiin , eai galgga leat viidneváibmilat eai ge geahččalit ohcat iežaset ávkki vearrivuođain .
Sis galgá leat oskku čiegusvuohta buhtes oamedovddus .
Muhto geahččaluvvojehkoset vuos sii ge , ja jos sii ležžet láitemeahttumat , de bálvalehkoset .
Seammá láhkái áhkát ge galget leat gudnálaččat , eai galgga sárdnut sealggebeale , muhto galget leat juguheamit ja oskkáldasat juohke dáfus .
Searvegotti bálvaleaddji galgá leat ovtta nissona boadnjá , ja son galgá rávvet mánáidis ja hovdet dálus bures .
Dasgo dat geat leat doaimmahan bálvalusaset bures , ožžot alla árvvu ja stuora roahkkatvuođa oskkusteaset Kristus Jesusii .
Dán mun čálán dutnje , vaikko mun doaivvun ge fargga beassat boahtit du lusa .
Muhto jos mun ádjánan , de don dieđát dál mo galgá meannudit Ipmila viesus , mii lea ealli Ipmila searvegoddi , duohtavuođa doarjja ja vuođđu .
Mii dovddastit ahte ipmilbalolašvuođa čiegusvuohta lea stuoris : Son almmustuvai olmmožin , son dahkkojuvvui vanhurskkisin Vuoiŋŋa fámus , eŋgelat oidne su , son sárdniduvvui álbmogiidda , sutnje oskojuvvui miehtá máilmmi , ja son váldojuvvui bajás hearvásvuhtii .
Vuoigŋa cealká čielgasit ahte maŋimuš áiggiid muhtumat jorralit eret oskkus ja doahttalit fillejeaddji vuoiŋŋaid ja bahá vuoiŋŋaid oahpuid . Dakkár oahput bohtet gielis guoktilaččain geaid oamedovdu lea merkejuvvon boaldomearkkain .
Sii gildet olbmuid náitaleames ja borramis muhtun borramušaid maid Ipmil lea sivdnidan vai sii geat oskot ja leat dovddiidan duohtavuođa , válddášedje daid giitalusain vuostái .
Dasgo buot maid Ipmil lea sivdnidan , lea buorre , ii ge dárbbaš hilgut maidege go dat váldojuvvojit vuostái giitalusain . Ipmila sátni ja rohkos basuha daid .
Go don oahpahat dán oskuguimmiide , de leat Kristus Jesusa buorre bálvaleaddji , ja dat čájeha ahte don leat ožžon biepmu oskku sániin ja buori oahpus maid don leat čuvvon .
Muhto hilggo máilmmálaš cukcasiid mat leat dušše guoros ságat .
Hárjehala baicca ipmilbalolašvuođa , dasgo rumašlaš hárjehallan lea dušše veaháš ávkin , muhto ipmilbalolašvuohta lea ávkkálaš juohke dáfus ja das lea lohpádus , sihke dán eallimii ja dasa mii boahtá .
Dát sátni lea jáhkehahtti , vuostáiváldin veara .
Dan dihtii mii rahčat ja hiddjiduvvot . Mii leat bidjan doivomet ealli Ipmilii guhte lea buot olbmuid beasti , erenoamážit sin guđet oskot .
Gohčo ja oahpat dán !
Ale divtte geange badjelgeahččat iežat nuorravuođat dihtii , muhto leage oskkolaččaid ovdagovvan sániin ja daguin , ráhkisvuođas , oskkáldasvuođas ja buhtisvuođas .
Loga bassi čállagiid searvegoddái , rávve ja oahpat , gitta dassážii go mun boađán .
Ale vajáldahte dan árpmuattáldaga mii dus lea ja mii addojuvvui dutnje go profehtat sárdno ja vuorrasat bidje gieđaid du ala .
Guorahala dárkilit dáid , biso dain , vai buohkat oidnet du ovdáneami .
Váldde vára alddát ja oahpahusastat .
Biso dáin áššiin !
Dasgo go don dan dagat , de beasttát sihke iežat ja sin geat gullet du
Ale cuiggot vuoras olbmá garrasit , muhto rávve su dego áhči , nuorat olbmáid dego vieljaid , boares nissoniid dego etniid ja nuorra nissoniid dego oappáid , ja daga dan buhtisvuođas .
Ane árvvus leaskkaid geat duođaid leat leaskkat .
Muhto jos leaskkas leat mánát dahje áhkkobat , de ohpposet sii vuos eallit ipmilbalolaččat iežaset bearrašis ja máksit dan maid sii leat velggolaččat vánhemiiddáseaset . Dasgo dát lea dohkálaš Ipmilii .
Áibbas okto báhcán leaskanisu lea bidjan doaivagis Ipmilii ja bissu rohkadallamis ja čuorvumis ijatbeaivvi .
Muhto son guhte duhtada iežas hálidusaid , lea eallinaga jápmán .
Rávve leaskkaid dása ge vai sii livčče láitemeahttumat .
Jos muhtun ii ane fuola fulkkiinis ja erenoamážit dáluolbmuinis , de son lea biehttalan oskku ja lea vearrát go eahpeoskkolaš .
Leaskan sáhttá adnojuvvot dušše dat guhte lea deavdán guhttalogi jagi ja lea leamaš ovtta boatnjá áhkká .
Son ferte leat dovddus buriin daguin , ja das ahte lea bajásgeassán mánáid , leamaš guosseláđis , bassan bassi olbmuid julggiid , veahkehan heađáláččaid ja viggan dahkat buriid juohke dáfus .
Muhto ale dohkket nuorra leaskkaid , dasgo go himut giktaluvvojit nu ahte sii vajáldahttet Kristusa , de náitalstuvvagohtet . Dalle sii ožžot dan duomu ahte sii leat rihkkon vuosttaš lohpádusaset .
Dasa lassin sii ohppet viehkat joavdelassan viesuid mielde .
Eai ge dušše dan , muhto ohppet maiddái šláttardit ja šloahpardit ja hállet heivemeahttumiid .
Dan dihtii mun dáhtun nuorra leaskkaid náitalit ođđasis , riegádahttit mánáid ja fuolahit dáluset , amaset sii addit vuostálastái liibba bilkidit sin .
Muhtumat han leat juo jorgalan eret ja čuovvulan Sáhtána .
Jos oskkolaš nissonis leat leaskkat iežas luhtte , de fuolahehkos son sin allos ge váivvidehko searvegotti , mii berre fuolahit daid leaskkaid guđet duođaid leat leaskkat .
Vuorrasat geat leat buorit ovddasčuožžut , ánssášit guovttegeardásaš gudni , erenoamážit sii geat rahčet sárdnidemiin ja oahpahemiin .
Dasgo čála cealká : Ale čana vuovssá njálmmi go dat lea ráidnemin gortniid , ja : Bargi ánssáša bálkkás .
Ale vuostáiváldde váidalusaid vuorrasa vuostái muđuid go leat guokte dahje golbma duođašteaddji .
Cuiggot buohkaid gullut sin guđet ellet suttus , earáide váruhussan .
Ipmila , Jesus Kristusa ja válljejuvvon eŋgeliid ovddas mun gohčun du duođalaččat ahte don jeagadat dáid rávvagiid heivetkeahttá daid geange beallái , ja dagakeahttá maidege iežat miela mielde .
Ale bija gieđaidat jurdilkeahttá geange ala , ale ge searvva earáid suttuide . Doala iežat buhtisin .
Ale šat juga dušše čázi , muhto návddaš veaháš viinni čoavjját ja dávjjes buozalvasaidat dihtii .
Muhtun olbmuid suttut leat albmosat ja ožžot duomuset ovddalgihtii ; earáid suttuid duomut čuvvot easkka maŋŋil .
Seammá láhkái buorit dagut ge leat albmosat , ja dat mat eai leat buorit , eai sáhte čihkkojuvvot .
Buohkat geat leat šlávvageassá vuolde , galget atnit isidiiddiset gudnis nu mo sii ánssášit , amas Ipmila namma ja oahppu bilkiduvvot .
Ja šlávat geain leat oskkolaš isidat , eai galgga badjelgeahččat sin danne go sii leat oskuvieljat .
Sii galget baicca bálvalit sin velá áŋgireabbot , danne go sii geat atnet ávkin sin buriid daguid leat oskkolaš ja ráhkis vieljat .
Oahpat ja rávve nu .
Dat guhte oahpaha amas oahpu ii ge čuovo Hearrámet Jesus Kristusa dearvvaš sániid ja dan oahpu mii gullá ipmilbalolašvuhtii , son lea goargat ii ge ádde maidege .
Son lea dušše giivvis nákkuid ja digaštallamiid maŋŋái , ja dás boahtá gáđašvuohta , riidu , eaddudeapmi , bahás jurdagat earáid birra ja čađat bealku olbmuid gaskkas geat leat manahan jierpmi ja láhppán duohtavuođa , go oaivvildit ahte ipmilbalolašvuohta sáhttá šaddat vuoitun .
Duođaid , ipmilbalolašvuohta oktan duhtavašvuođain lea stuora vuoitu . Dasgo guorosgieđaid mii bođiimet máilbmái , ja guorosgieđaid mii guođđit dan .
Go mis lea borramuš ja biktasat , de mii oažžut leat duhtavaččat .
Muhto sii geat rikkustuvvet , šaddet geahččalusaide ja darvánit gielaide ja jorralit ollu jallas ja duššadeaddji anistumiide mat dolvot olbmuid heavahussii ja gáđohussii .
Dasgo ruhtaváibmilvuohta lea buot bahávuođa ruohtas . Váinnuhettiin ruđaid muhtumat leat čádjádallan oskkus eret , ja sii leat dagahan alcceseaset ollu bákčasiid .
Muhto don , Ipmila olmmoš , báhtar buot dáin ja váinnut vanhurskkisvuođa , ipmilbalolašvuođa , oskku , ráhkisvuođa , gierdavašvuođa ja vuollegašvuođa .
Soađa oskku buori soađi ja vuoitte agálaš eallima masa don rávkojuvvojit go dovddastit buori dovddastusa máŋgga duođašteaddji gullut .
Ipmil , geas boahtá buot eallin , ja Kristus Jesus , guhte duođaštii buori dovddastusa Pontius Pilatusa ovddas , leaba mu duođašteaddjit go mun gohčun du : Ollašuhte doaimmat duolvameahttumin ja láitemeahttumin gitta dassážii go Hearrámet Jesus Kristus almmustuvvá . Dan son čájeha midjiide go áigi dievvá , son gii lea ávdugas ja áidna ráđđejeaddji , gonagasaid gonagas ja hearráid Hearrá . Son lea áidna jápmemeahttun ja ássá čuovgasis gosa ii beasa oktage , su ii oktage olmmoš leat oaidnán ii ge sáhte oaidnit .
Sutnje lehkos gudni ja agálaš fápmu ! Amen .
Rávve sin geat leat riggát dán máilmmis amaset sii čeavlástallagoahtit ja bidjat doaivageaset nohkavaš riggodahkii , muhto baicca Ipmilii . Son addá midjiide valljugasat buot buriidis , vai mii beassat návddašit daid .
Rávve sin dahkat buriid , riggut buriin daguin , leat buorredáhtolaččat ja mielas juogadit earáiguin .
Dan láhkái sii čohkkejit alcceseaset dávvira mii lea buorre vuođđu boahttevaš áiggiide , nu ahte sii sáhtášedje dohppet duođalaš eallima .
Ráhkis Timoteus , várjal dan mii lea oskkilduvvon dutnje !
Jorgal eret máilmmálaš ja guoros sárdnumis ja dain nákkáhallamiin mat bohtet das mii mahkáš gohčoduvvo diehtun .
Muhtun olbmot leat dorvvastan dasa ja leat láhppon eret oskkus .
Árbmu lehkos dinguin !
Dearvvuođat Bávlosis , Kristus Jesusa apoastalis , gii Ipmila dáhtu mielde lea rávkojuvvon sárdnidit lohpiduvvon eallima mii lea Kristus Jesusis , Timoteusii , mu ráhkis bárdnái .
Árbmu , váibmoláđisvuohta ja ráfi lehkos duinna Ipmil Áhčis ja Hearrásteamet Jesus Kristusis !
Mun giittán Ipmila gean mun bálvalan buhtes oamedovdduin nugo mu máddarat leat dahkan , go mun muittán du álo rohkosiinnán , ijatbeaivvi .
Mun muittán du gatnjaliid ja áibbašan oaidnit du , vai illu deavddášii mu .
Mun maiddái muittán du duođalaš oskku mii lei juo áhkustat Loisas ja eatnistat Eunikes , ja mun lean vissis ahte dat lea maiddái dus.
Danne muittuhan dutnje ahte fas buolláhivččet dan árpmuattáldaga man Ipmil attii dutnje go mun bidjen gieđaidan du ala !
Dasgo Ipmil ii addán midjiide balešvuođa vuoiŋŋa , muhto fámu , ráhkisvuođa ja jierbmáivuođa vuoiŋŋa .
Ale dasto heahpanatta duođaštusas Hearrámet birra , ale ge mus gii lean fáŋga su dihtii , muhto gillá don ge váivvi evangeliuma dihtii dainna fámuin man Ipmil addá .
Son lea beastán min ja rávkan min bassi rávkojumiin , ii min daguid mielde , muhto iežas dáhtu ja dan árpmu mielde man son attii ovdal buot áiggiid , midjiide Kristus Jesusis , ja mii dál lea almmustuvvan go beastámet Kristus Jesus lea boahtán .
Son lea duššadan jápmima ja almmustahttán eallima ja nohkameahttunvuođa evangeliumiin , man sárdnideaddjin , apoasttalin ja oahpaheaddjin mun lean biddjojuvvon .
Dan dihtii mun ferten gillát buot dáid , muhto mun in heahpanatta , dasgo mun dieđán geasa mun oskGon Mun lean vissis das ahte sus lea fápmu várjalit dan mii lea oskkilduvvon munnje , dassážii go dat beaivi boahtá .
Ane ovdagovvan daid dearvvaš sániid maid don leat gullan mus , ja biso nanusin dan oskkus ja ráhkisvuođas mii mis lea Kristus Jesusis .
Várjal Bassi Vuoiŋŋain gii orru min siste , dan buori mii lea oskkilduvvon dutnje .
Nu go don dieđát , buohkat Asia eanangottis leat jorgalan mus eret , maiddái Fygelos ja Hermogenes .
Vare Hearrá livččii váibmoláđis Onesiforosa dállui , dasgo son lea dávjá árvvosmahttán mu , ii ge son heahpanaddan mu láhkkiin .
Go son bođii Romai , de baicca ozai mu áŋgirit dassážii go gávnnai . Vare Hearrá attášii su gávdnat Hearrá váibmoláđisvuođa duon beaivvi !
Don dovddat ieš buoremusat mo son veahkehii Efesosas .
Gievrudehkos Kristus Jesus árpmuinis du , bártnážan .
Oskkil dan maid don leat gullán mus ollu duođašteddjiid gullut , luohtehahtti olbmuide geat máhttet oahpahit earáid .
Gillá don ge dego Jesus Kristusa buorre soalddát .
Ii oktage soalddát divtte iežas sorrat beaivválaš doaimmaide jos dáhtoš dohkket sutnje gii bálkáhii su .
Ii ge oktage gilvvohalli vuoitte vuoitokruvnnu jos ii čuvoš njuolggadusaid .
Eanadoalli gii lea dahkan buot barggu , galgá vuosttažin oažžut šattuid .
Smiehta daid sániid maid mun cealkkán !
Dasgo Hearrá addá dutnje jierpmi áddet buot .
Muitte Jesus Kristusa gii mu evangeliuma mielde lea bajásčuoččáldahttojuvvon jábmiid luhtte ja lea Dávveda nális .
Dan evangeliuma dihtii mun gillán ja lean maiddái čadnojuvvon dego vearredahkki .
Muhto Ipmila sátni ii leat čadnojuvvon .
Danne gierddan buot sin ovddas geat leat válljejuvvon , vai sii ge Kristus Jesusis oččošedje bestojumi ja agálaš hearvásvuođa .
Dát sátni lea jáhkehahtti :
Jos mii leat jápmán suinna , de beassat maiddái eallit suinna . Jos mii gierdat , de beassat maiddái ráđđet suinna . Jos mii biehttalit su , de son ge biehttala min . Jos mii leat oskkáldasmeahttumat , de son lea almmatge oskkáldas , dasgo ii son sáhte biehttalit iežas .
Muittut buohkaide dán ja gieldde sin duođalaččat Ipmila muođuid ovddas riidaleames ja nákkáhallamis .
Dat ii leat masage ávkin , muhto šaddá baicca heavvun sidjiide geat gullet .
Vikka čájehit iežat luohtehahttin Ipmila ovddas , bargin guhte ii dárbbaš heahpanaddat mastege , muhto oahpaha rievttuid duohtavuođa sáni .
Vealtta máilmmálaš ja guoros ságain . Dasgo dát dolvot olbmuid eanet ipmilmeahttunvuhtii , ja sin sánit viidánit dego guohcageapmi .
Sin searvái gullaba Hymenaios ja Filetos .
Soai leaba láhppon eret duohtavuođas go čuoččuheaba ahte bajásčuožžileapmi lea juo leamaš , ja nu soai loaktiba muhtun olbmuid oskku .
Muhto Ipmila nana vuođđu bissu , ja das lea seaila masa lea čállojuvvon : Hearrá dovdá olbmuidis , ja : Heitos vearrivuođas juohkehaš guhte dovddasta Hearrá nama .
Stuora viesus eai leat dušše golle- ja silbalihtit , muhto maiddái muorra- ja láirálihtit , muhtumat mávssolaš atnui ja muhtumat beaivválaš atnui .
Dat gii buhtista iežas buot diekkáriin maid mun lean namuhan , šaddá mávssolaš lihttin , basuhuvvon ja ávkkálaš dálu isidii , gárvvistuvvon buori atnui .
Báhtar nuorravuođa anistumiin , ja váinnut vanhurskkisvuođa , oskku , ráhkisvuođa ja ráfi singuin geat čurvot Hearrá buhtes váimmus .
Muhto hilggo jallas , joavdelas digaštallamiid , dasgo don dieđát ahte dat dagahit riidduid .
Hearrá bálvaleaddji ii galgga riidalit , muhto leat láđis buohkaide . Son galgá leat buorre oahpaheaddji ja gierdat baháid . Son galgá bagadit láđisvuođain sin geat bidjet vuostái .
Ipmil soaitá addit sidjiide jorgalusa vai sii dovdagohtet duohtavuođa ja vai sii čielggašedje ja beasašedje beargalaga gielas , masa sii leat gillojuvvon dahkat su dáhtu .
Muitte dan , ahte maŋimuš beivviid bohtet váttis áiggit .
Dalle olbmot šaddet iešráhkisin , ruhtaváibmilin , rábmájin , čeavlájin , bilkideaddjin , jeaguheapmin vánhemiiddáseaset , giitemeahttumin , eahpebassin , ráhkismeahttumin ja soahpameahttumin , šluččuheaddjin , veahkaválddálažžan , goavvin , buot buriid vašálažžan , behtolažžan , hohppujin , goarggastallin .
Sii ráhkistit návddašemiid eanebut go Ipmila .
Olgguldasat sis gal lea ipmilballu , muhto sii biehttalit dan fámu .
Jorgal eret dákkár olbmuin !
Sin searvái gullet dakkárat geat njáhket viesuide ja fillejit nissoniid geain leat lossa suttunoađit ja geat diktet anistumiid stivret iežaset ja geat álo hálidit oahppat , muhto eai goassege dovddit duohtavuođa .
Nugo Jannes ja Jambres nággiiga Movssesa vuostái , de dát olbmot ge nággejit duohtavuođa vuostái .
Sii leat manahan jierpmi , ja sin osku lea dohkkemeahttun .
Muhto sii eai dađe eambbo menestuva , dasgo buohkaide šaddá almmusin man jierpmeheamit sii leat , nugo geavai duon guoktásii .
Muhto don leat čuvvon mu oahpaheami , eallinvuogi , áigumuša , oskku , guhkesmielalašvuođa , ráhkisvuođa , gierdavašvuođa , doarrádallojumi ja gillámušaid , mat dáhpáhuvve munnje Antiokias , Ikonionas ja Lystras , maid ihkinassii doarrádallojumiid mun lean gierdan .
Muhto Hearrá lea gádjon mu buot dain eret .
Buohkat geat dáhttot eallit ipmilbalolaš eallima Kristus Jesusis , doarrádallojuvvojit .
Muhto bahás olbmot ja behtolaččat mannet bahás ain vearrábui .
Sii fillejit ja fillehallet .
Muhto biso don das maid leat oahppan ja masa leat nannosit oskon .
Don han dieđát geas don leat oahppan . Gitta mánnávuođat rájes leat dovdan bassi čállagiid mat sáhttet addit dutnje viisodaga mii doalvu bestojupmái jos oskkut Kristus Jesusii .
Ipmil lea bosson Vuoiŋŋas oppa čállagii , ja dat lea ávkkálaš oahpaheapmái ja cuoigumii , neavvumii ja vanhurskkisvuođa bagadussii , vai dat olmmoš gii gullá Ipmilii , šattašii ollisin ja dohkálažžan dahkat buot buriid daguid .
Mun gohčun du duođalaččat , Ipmila ja Jesus Kristusa muođuid ovddas , guhte boahtá dubmet elliid ja jábmiid , nu duođaid go son boahtá oinnolaččat ja ráhkada riikkas : Sárdnit sáni , leažžá dal heivvolaš dahje heivemeahttun áigi , cuiggot , moaitte , movttiidahte , oahpat sin gierdavaččat !
Dasgo áigi boahtá go olbmot eai šat gierdda gullat dearvvaš oahpu , muhto váldet ovtta nuppi oahpaheaddji alcceseaset mielaset mielde , dasgo sii dáhttot gullat dan mii čagarduhttá bealji .
Sii jorgalahttet beljiideaset eret duohtavuođas cukcasiidda .
Muhto leage don gozeš juohke dáfus , gierdda gillámušaidat , daga evangelistta doaimma ja ollašuhte bálvalusat .
Dál mun juo oaffaruššojuvvon , ja mu jápmin lahkana .
Mun lean soahtan buori soađi , ollašuhttán mátkán ja seailluhan oskon .
Dál mu vuordá vanhurskkisvuođa vuoitokruvdnu , man Hearrá , vanhurskkis duopmár , addá munnje dan beaivvi , ii duššefal munnje , muhto sidjiide buohkaide geat áibbašit su boahtima .
Doama boahtit fargga mu lusa .
Dasgo Demas guđii mu danne go son ráhkistišgođii dálá máilmmi .
Son manai Tessalonikai , Kreskens lea mannan Galatiai , Titus Dalmatiai .
Dušše Lukas lea mu luhtte .
Váldde Markusa mielde go boađát , dasgo son lea munnje ávkin mu bálvalusas .
Tykikosa mun lean vuolggahan Efesosii .
Go boađát , de buvtte mátkegávtti man mun guđđen Karposa duohkái Troasii , ja maiddái girjjiid ge , erenoamážit pergamentagearuid .
Veaikerávdi Aleksandros lea dahkan munnje ollu baháid .
Hearrá mávssahehkos sutnje su daguid mielde .
Várut sus don ge , dasgo son lea garrasit vuostálastán min sárdnideami .
Vuosttaš geardde go mun bealuštin iežan dikkis , de ii oktage čuožžilan ja veahkehan mu . Buohkat guđđe mu .
Vare dat ii logahallošii sidjiide !
Muhto Hearrá veahkehii mu ja gievrudii mu ollašuhttit sáni sárdnideami , vai buot báhkinat beasašedje gullat dan . Ja mun gáddjojuvvojin ledjona njálmmis .
Hearrá gádju mu maiddái buot bahás ja doalvu mu almmálaš riikasis .
Sutnje lehkos gudni álo ja agálašvuhtii ! Amen .
Cealkke dearvvuođaid Priskai ja Akvilai ja Onesiforosa bearrašii .
Erastos bázii Korintii , ja Trofimosa mun guđđen Miletosii go son buohccái .
Doama boahtit ovdal dálvvi .
Eubulos , Pudens , Linos , Klaudia ja buot oskuguoimmit celket dutnje dearvvuođaid .
Hearrá lehkos du vuoiŋŋain !
Árbmu lehkos dinguin !
Dearvvuođat Bávlosis , Ipmila bálvaleaddjis ja Jesus Kristusa apoastalis , gii lea vuolggahuvvon ovddidit oskku Ipmila válljen olbmuide ja oahpahit sin dovdat dan duohtavuođa mii addá ipmilbalolašvuođa ja agálaš eallima doaivvu .
Ipmil guhte ii sáhte gielistit , lea lohpidan dan agálaš áiggiid rájes , ja go áigi dievai , de son almmustahtii sánis dan sártnis mii lea oskkilduvvon munnje Ipmila , beastámet , gohččuma mielde . Dearvvuođat Titusii , mu rivttes bárdnái oktasaš oskkus .
Árbmu ja ráfi Ipmil Áhčis ja beastisteamet Kristus Jesusis !
Mun guđđen du Kretai vai don gárvvistivččet daid áššiid mat ain váilo ,
ja bijašit vuorrasiid virgái juohke gávpogii , nugo mun lean gohččon du. Vuoras galgá leat láitemeahttun , ovtta nissona boadnjá , sus galget leat oskkolaš mánát guđet eai leat váidaluvvon gudneheapmin eai ge gážžárin .
Ipmila dállodoallin searvegotti geahčči galgá leat láitemeahttun , ii allamielalaš , ii hohppui , ii jugeš , ii cábmálas ii ge dakkár gii geahččala vuoitit ruđaid vearrivuođain . Son galgá leat guosseláđis , buorredáhtolaš , mášolaš , rehálaš , ipmilbalolaš ja loaitu .
Son galgá doallat gitta oahpu luohtehahtti sánis , nu ahte son sáhttá sihke rávvet dearvvaš oahpu mielde ja cuiggodit sin geat nággejit su vuostái .
Dasgo leat ollu gážžárat , erenoamážit sin gaskkas geat leat birračuhppojuvvon . Sii viiddidit duššiságaid ja behttet olbmuid .
Don fertet buođđut sin njálmmi , dasgo sii moivašuhttet olles bearrašiid go vearri vuoittu dihtii oahpahit dan maid eai galggaše .
Muhtun kretalaš , muhtun sin iežaset profehtain , lea dadjan : « Kretalaččat leat álo leamaš giellásat , bahás spiret , vuovdájat ja láikkit ! »
Dát duođaštus doallá deaivása .
Cuiggot sin dan dihtii garrasit , vai sis šaddá dearvvaš osku , ja amaset doahttalit juvddálaš cukcasiid ja báhkkomiid mat bohtet olbmuin geat leat jorgalan eret duohtavuođas .
Buot lea buhtis buhttásiidda , muhto buhtismeahttumiidda ja eahpeoskkolaččaide ii mihkkege leat buhtis , go velá sin jierbmi ja oamedovdu ge lea buhtismeahttun .
Sii čuoččuhit ahte sii dovdet Ipmila , muhto daguideasetguin sii biehttalit su .
Sii leat fasttit ja eahpegulolaččat , eai ge veaje dahkat maidege buriid .
Muhto sártno don dan mii soahpá dearvvaš ohppui , ahte boares olbmát galget leat juguheamit , gudnálaččat ja mášolaččat ja dearvašat oskkus , ráhkisvuođas ja gierdavašvuođas .
Seammá láhkái galget boares nissonat eallit nu mo heive bassi olbmuide , eai galgga sárdnut sealggebealde eai ge leat viidneváibmilat , muhto galget oahpahit buori , nu ahte sii sáhttet oahpahit nuorra nissoniid ráhkistit boatnjáset ja mánáideaset , eallit mášolažžan ja buhtisin , ja nu ahte leat buorit dálueamidat ja leat boatnjáideaset vuolibuččat , amas Ipmila sátni bilkiduvvot .
Rávve seammá láhkái nuorra olbmáid eallit mearálaččat . Leage ieš sidjiide ovdamearkan buriid daguiguin !
Lehkos du oahpaheapmi buhtis ja gudnálaš , geavat dearvvaš ja luohtehahtti sániid , nu ahte vuostálasti šaddá heahpadin danne go son ii sáhte dadjat min birra maidege baháid .
Šlavat galget leat isidiiddiset vuolibuččat juohke dáfus ja nággekeahttá dahkat sin miela mielde .
Sii eai galgga doaladit alcceseaset maidege , muhto álo čájehit duohta oskkáldasvuođa , vai sii juohke dáfus sáhttet leat Ipmila , beastámet , oahpu čikŋan .
Dasgo Ipmila árbmu lea almmustahttojuvvon bestojupmin buot olbmuide .
Dat bagada min vealtat ipmilmeahttunvuođas ja máilmmálaš anistumiin ja eallit gudnálašvuođas , vuoigatlašvuođas ja ipmilbalolašvuođas dálá máilmmis , dan botta go mii vuordit ahte min ávdugas doaivva ollašuvvá , ja ahte min stuora Ipmil ja beasti Jesus Kristus ihtá hearvásvuođas .
Dasgo son attii iežas min ovddas vai lonistivččii min buot vearredaguin ja buhtistivččii min vai mii livččiimet su iežas álbmot mii áŋgirit dahká buriid daguid .
Sártno ná , ávžžut ja cuiggot isitvuođain .
Ale divtte geange badjelgeahččat iežat !
Muittut sidjiide ahte sii leat oaivámuččaid ja eiseválddiid vuolibuččat , ja ahte galget jeagadit sin ja leat gárvásat dahkat buot mii lea buorre .
Sii eai galgga bilkidit earáid eai ge leat riidui , muhto leat láđđásat ja vuollegaččat buot olbmuide .
Dasgo mii ge leimmet oktii jierpmeheamit ja eahpegulolaččat ; mii leimmet čádjidan ja juohke lágán anistumiid ja himuid šlávat ; mii eliimet bahávuođas ja gáđašvuođas , vašuhuvvuimet ja vašuheimmet guhtet guimmiideamet .
Muhto go min Ipmila ja beasti buorrevuohta ja ráhkisvuohta olbmuide almmustuvai , de son besttii min , ii min vanhurskkis daguid dihtii , muhto váibmoláđisvuođas dihtii ; son besttii min dainna lávgguin mas Bassi Vuoigŋa riegádahttá min ođđasis ja ođasmahttá min .
Son lea valljugasat golggahan Vuoiŋŋa min badjelii Jesus Kristusa , beastámet , bokte , vai mii su árpmus dahkkojuvvošeimmet vanhurskkisin ja doivomet mielde árbešeimmet agálaš eallima .
Dát sátni lea jáhkehahtti .
Mun dáhtun du čuoččuhit dán nannosit vai sii geat leat oskugoahtán Ipmilii , vikkašedje dahkat buriid daguid .
Buot dát lea buorre ja ávkkálaš olbmuide .
Muhto vealtta jallas nákkuin , sohkalogahallamiin ja riidduin ja digaštallamis láhkagažaldagain , dasgo dakkárat leat ávkkiheamit ja duššit .
Hilggo dan olbmo gii buktá vearri oahpu , go don leat cuiggodan su oktii dahje guktii . Don han dieđát ahte dakkár olmmoš lea jorggiidan .
Son sudduda ja lea dubmen iežas .
Go mun vuolggahan Artemasa dahje Tykikosa du lusa , de doama boahtit mu lusa Nikopolisii , dasgo mun lean mearridan orrut doppe dán dálvvi .
Ráhkkanahte láhkadovdi Zenasa ja Apollosa bures mátkái , amas sudnos váilut mihkkege .
Ohpposet maiddái min olbmot dahkat buriid daguid ja veahkehit doppe gos dárbbašuvvo , amas sin eallin leat šattuid haga .
Buohkat dáppe mu luhtte celket dutnje dearvvuođaid .
Cealkke dearvvuođaid sidjiide geat ráhkistit min seammá oskkus .
Árbmu lehkos dinguin buohkaiguin !
Dearvvuođat Bávlosis , Kristus Jesusa fáŋggas , ja min oskuvieljas Timoteusis , min ráhkis bargoguoibmái Filemonii , min oskuoabbái Appiai , min soahteguoibmái Arkipposii ja dan searvegoddái mii čoaggana du vissui .
Árbmu lehkos dinguin ja ráfi Ipmilis , Áhčisteamet , ja Hearrás Jesus Kristusis !
Mun giittán álo Ipmila go muittán du rohkadusainan . Dasgo mun gulan mo don ráhkistat buot bassi olbmuid ja oskkut Hearrá Jesusii .
Mun rohkadalan ahte min oktasaš osku attášii dutnje áddejumi buot daid buriid birra mat mis leat Kristusis .
Du ráhkisvuohta lea leamaš munnje stuora illun ja jeđđehussan , dasgo don , oskuviellja , leat arvvosmahttán bassi olbmuid váimmuid .
Vaikko mus livččii roahkkatvuohta Kristusis mearridit maid don galggat dahkat , de mun almmatge ávžžuhan du danne go ráhkistan du , mun , Bávlos , guhte lean vuoras olmmoš ja dál maiddái Kristus Jesusa fáŋga .
Mun ávžžuhan du , bárdnán Onesimosa beales , gean mun lean riegádahttán dáppe fáŋgavuođastan . Oktii son lei ávkkeheapmi dutnje , muhto dál son lea ávkkálaš sihke dutnje ja munnje .
Go mun dál vuolggahan su ruovttoluotta du lusa , de lea dego vuolggahivččen váibmon .
Mun livččen áinnas doallan su dáppe iežan luhtte , vai son du sajis livččii sáhttán bálvalit mu dál go mun ferten guoddit láhkkiid evangeliuma dihtii .
Muhto almmá du mieđiheami haga in dáhtton dahkat maidege , amas dat buorre maid don dagat , boahtit bákkus , muhto iežat dáhtus .
Soittii son váldojuvvot dus eret oanehassii vai don oččošit su ruoktot agibeaivái , it ge šat šlávvan , muhto ollu eanebun : ráhkis oskuvielljan .
Son lea munnje hui ráhkis , muhto dutnje vel ráhkkáseabbo , sihke olmmožin ja vielljan Hearrás .
Jos don dál anát mu oskuguoibmin , de vuostáiváldde su dego mu iežan .
Jos son leažžá dahkan maidege veriid du vuostái dahje leažžá dutnje maidege velggolaš , de bija dan mu vealgegirjái !
Dán čálán mun , Bávlos , gieđainan : Gal mun mávssán !
Mun sáhtášin váikko cealkit ahte don leat munnje velá iežat ge velggolaš .
Oskuviellja , vare veahkehivččet mu dáinna lágiin Hearrás !
Illudahte mu váimmu Kristusis !
Mun čálán dutnje danne go luohtán dasa ahte don jeagadat mu . Mun dieđán gal ahte don dagat velá eanet go maid mun siđan .
Ja okta ášši velá : Ráhkkanahte maiddái munnje orrunsaji , dasgo mus lea dat doaivva ahte dii ovddasrohkadusaideattetguin oččošeiddet mu fas ruovttoluotta .
Epafras , mu fáŋgaguoibmi Kristus Jesusis , cealká didjiide dearvvuođaid , nu maiddái Markus , Aristarkos , Demas ja Lukas , mu bargoguoimmit .
Hearrámet Jesus Kristusa árbmu lehkos din vuoiŋŋain !
Ipmil lea máŋgii ja máŋgga láhkái dolin sárdnon min máddariidda profehtaidis bokte , muhto dáid maŋimuš beivviid son lea sárdnon midjiide Bártnis bokte , gean lea bidjan buot árbejeaddjin ja gean bokte lea maiddái sivdnidan máilmmi .
Son lea Ipmila hearvásvuođa čuovgadas , su luonddu duohta govva , ja fámolaš sániinis son bisuha buot .
Go son ieš lei buhtistan min suttuin , de čohkánii Allatvuođa olgeš gieđa beallái allagasas .
Nu son lea šaddan sakka stuoribun go eŋgelat ja árben hearváset nama go sii .
Dasgo Ipmil ii leat goassege cealkán guđege eŋgelii : Don leat mu bárdni , mun lean riegádahttán du odne .
Ii ge son leat cealkán : Mun lean su áhčči , ja son lea mu bárdni .
Muhto go Ipmil fas bidjá vuosttašriegádeaddjis máilbmái , de son cealká : Buot Ipmila eŋgelat gopmirdehkoset su .
Ja eŋgeliid birra son cealká ná : Son dahká eŋgeliiddis bieggan ja bálvaleddjiidis dollanjuovččan .
Muhto Bártnis birra son cealká : Ipmil , du truvdnu bissu agálašvuhtii , ja vanhurskkisvuođa soabbi lea du riikka soabbi .
Don ráhkistit vanhurskkisvuođa ja vašuhit vearrivuođa .
Dan dihtii , Ipmil , lea du Ipmil vuoiddadan du ilu oljjuin , du , eanebut go du guimmiid .
Son cealká maiddái : Don , Hearrá , leat álggu rájes vuođđudan eatnama , ja almmit leat du gieđa dahku .
Dat duššet , muhto don bisut .
Dat oamásmuvvet nugo bivttas , don giesat daid čoahkkái nugo olgogávtti .
Dat molsojuvvojit nugo bivttas , muhto don leat seammá , du jagit eai noga .
Lea go Ipmil goassege cealkán guđege eŋgelii : Čohkán mu olgeš gieđa beallái , dassážii go bijan du vašálaččaid du julggiid vuložin .
Eai go buot eŋgelat leat bálvaleaddji vuoiŋŋat guđet leat vuolggahuvvon bálvalit daid guđet árbejit bestojumi ?
Dan dihtii mii fertet dađe buorebut váldit vuhtii dan , maid mii leat gullan , amamet rievdat meattá rávnnji mielde .
Jos velá dat ge sátni man eŋgelat sárdno , ollašuvai , nu ahte juohke vearredahku ja eahpegulolašvuohta oaččui ánssášuvvon bálkkás , mo mii dasto sáhtášeimmet vealtat ráŋggáštusas , jos eat beroš nu stuora bestojumis , man Hearrá ieš vuosttažin sárdnidii ?
Sii guđet gulle su duođaštusa nannejedje dan bestojumi duohtan midjiide , ja Ipmil ieš nannii sin duođaštusaid mearkkaiguin ja oavdudaguiguin ja máŋggalágán fámolaš daguiguin , ja juogadii Bassi Vuoiŋŋa attáldagaid dáhtus mielde .
Ipmil ii leat bidjan eŋgeliid vuolibužžan dan boahttevaš máilmmi man birra mii sárdnut .
Muhto muhtun lea duođaštan ná : Mii lea olmmoš , go anát su muittus , dahje olbmobárdni , go anát sus fuola ?
Oanehassii don dahket su eŋgeliid vuolibužžan , don kruvnnidit su hearvásvuođain ja gudniin , bidjet buot su julggiid vuložin .
Go son nappo bijai buot olbmo vuložin , de ii čuoldán maidege eret .
Dál eat vel oainne ahte buot livččii biddjojuvvon su vuložin . Mii oaidnit goittot Jesusa guhte oanehassii lei eŋgeliid vuolibuš , muhto gillámušas ja jápmimis dihtii lea dál kruvnniduvvon hearvásvuođain ja gudniin .
Árbmugas Ipmila dáhttu lei ahte Jesus galggai muosáhit jápmima buohkaid ovddas .
Go son guhte lea sivdnidan ja vuođđudan buot , dáhtui doalvut eatnat mánáid hearvásvuhtii , de fertii gillámušaiguin dahkat ollisin su guhte doalvu sin bestojupmái .
Dasgo son guhte dahká bassin , ja sii guđet dahkkojuvvojit bassin , leat buohkat ovtta áhčis ; danne son ii heahpanatta ge gohčodeames sin vielljanis go cealká : Mun gulahan du nama vieljaidasan ja máinnun du searvegottis .
Son cealká maiddái : Mun dorvvastan sutnje .
Ja dasto cealká : Dá mii leat , mun ja dat mánát , geaid Ipmil lea addán munnje .
Go juo dát mánát leat oasálaččat oaččis ja varas , de seammá láhkái son ge lea oasálaš das . Nu son fámohuhtii jápmimiinnis su geas lea jápmima váldi , beargalaga , ja luittii luovus buohkaid guđet jápmima balus leat eallinagiset leamaš šlávvan .
Ii son leat atnimin fuola eŋgeliin , muhto Abrahama nális .
Danne son fertii juohke dáfus šaddat vieljaidis láhkásažžan , vai sáhtášii váibmoláđis ja oskkáldas bajimušbáhppan Ipmila ovddas soabahit álbmogis suttuid .
Go son ieš lea gillán ja geahččaluvvon , de sáhttá veahkehit daid guđet geahččaluvvojit .
Dan dihtii , bassi oskuguoimmit , guđet lehpet oasálaččat almmálaš rávkojumis , gehččet Jesusii gean mii dovddastit apoasttalin ja bajimušbáhppan .
Son lei oskkáldas Hearrái guhte ásahii su , nugo Movsses lei oskkáldas oppa Ipmila viesus , muhto Jesus lea ánssášan ollu stuorit gudni go Movsses , nugo viesu huksejeaddji ge gudnejahttojuvvo eambbo go viessu .
Juohke viesu lea soamis huksen , muhto Ipmil lea huksen buot .
Ja Movsses lei gal oskkilduvvon bálvaleaddji oppa Ipmila viesus duođaštit dan , mii maŋŋil galggai sárdniduvvot .
Muhto Kristus lea nugo bárdni gean háldui lea oskkilduvvon Ipmila viessu .
Dát viessu leat mii , jos mii loahpa rádjái bissut nannosit dan roahkkatvuođas ja rámis maid min doaivva addá midjiide .
Dan dihtii , nugo Bassi Vuoigŋa cealká : Jos dii otná beaivvi gullabehtet su jiena , de allet buoššut váimmuideattet nugo dalle go čuožžileiddet mu vuostái , daid beivviid go geahččaleiddet mu meahcis . Doppe din vánhemat bidje mu geahččalussii ja hástaledje mu , vaikko ledje njealljelot jagi oaidnán mu daguid .
Dan dihtii mun moaráhuvven dan sohkagoddái ja celken : Álelassii sii čádjádallet váimmusteaset , eai ge dovdda mu geainnuid .
De mun vurdnon moaristan : Sii eai goassege beasa mu vuoiŋŋadussii .
Váruhehket , oskuguoimmit , amas ovttasge dis leat bahás ja eahpeoskkolaš váibmu nu ahte son jorrala ealli Ipmilis eret .
Muhto rávvejehket guhtet guimmiideattet juohke beaivvi nu guhká go sánit « otná beaivi » lea fámus , amas oktage dis jorralit suttu fillehussii ja buoššut .
Mii han leat šaddan oasálažžan Kristusii , jos loahpa rádjái bissut nannosit dan luohttámušas mii mis lei juo álggu rájes .
Čállagiin nappo celkojuvvo : Jos dii otná beaivvi gullabehtet su jiena , de allet buoššut váimmuideattet nugo dalle , go čuožžileiddet mu vuostái .
Geat dat ledje guđet gulle , muhto almmatge stuimmáskedje ?
Eai go dat lean buohkat geaid Movsses doalvvui eret Egyptas ?
Geaidda lei Ipmil moaris njealljelot jagi ?
Ii go daidda geat suddudedje ja geaid rupmašat dasto báhce meahccái ?
Ja geaidda son vuortnui ahte eai sii beasa su vuoiŋŋadussii ?
Ii go dat guoskan daidda guđet ledje eahpegulolaččat ?
Mii nappo fuomášit ahte sin eahpeosku hehttii sin beassamis vuoiŋŋadussii .
Nu guhká go mis ain lea lohpádus beassat Ipmila vuoiŋŋadussii , de váruhehkot amas oktage dis báhcit mátkkis !
Dasgo buorre sáhka lea sárdniduvvon midjiide nugo sidjiide . Sii eai goittotge atnán makkárge ávkki dan sánis maid gulle , dasgo eai vuostáiváldán dan oskkus .
Muhto mii guđet oskut , beassat lohpiduvvon vuoiŋŋadussii , nugo son lea cealkán : Ja mun vurdnon moaristan : Sii eai goassege beasa mu vuoiŋŋadussii . Nu son celkkii , vaikko su dagut leat leamaš gárvásat máilmmi vuođđudeami rájes .
Čihččet beaivvi birra han lea celkojuvvon ná : Čihččet beaivvi Ipmil vuoiŋŋastii buot das maid son lei dahkan .
Muhto celkojuvvo maiddái : Sii eai goassege beasa mu vuoiŋŋadussii .
Lea goittot vissis ahte muhtumat besset dohko .
Sii geaidda buorre sáhka sárdnojuvvui vuosttažin , eai beassan dohko eahpegulolašvuođaset dihtii .
Dan dihtii Ipmil mearrida ođđa beaivvi , mii lea « otná beaivi » , ja son cealká ollu maŋŋelis Dávveda bokte nugo lea namuhuvvon ovdalis : Jos dii otná beaivvi gullabehtet su jiena , de allet buoššut váimmuideattet .
Jos Josva livččii dolvon sin dan vuoiŋŋadussii , de Ipmil ii livčče maŋŋelis namuhan eará beaivvi .
Ipmila álbmogis lea nappo ain vuordagis sábbátvuoiŋŋadus .
Dat guhte lea beassan su vuoiŋŋadussii , oažžu vuoiŋŋastit buot daguinis nugo Ipmil ge vuoiŋŋastii .
Viggot mii ge beassat dan vuoiŋŋadussii , amas oktage jorralit seammá eahpegulolašvuođa dihtii .
Ipmila sátni lea ealli ja fámolaš ja bastileabbo go guovtteávjjot miehkki .
Dat čuohpasta nu čiekŋalii ahte ludde sielu ja vuoiŋŋa , lađđasiid ja ađđamiid ja dubme váimmu jurdagiid ja árvalusaid .
Ipmilis ii sáhte čiehkat ovttage sivdnádusa . Buot lea álás ja rabas su čalmmiid ovddas geasa mii fertet dahkat logu .
Go juo mis lea stuora bajimušbáhppa , Jesus , Ipmila Bárdni , guhte lea mannan almmiid čađa , de bissot nannosit dán dovddastusas .
Ii mis leat dakkár bajimušbáhppa guhte ii sáhte árkkálmastit min headjuvuođa , muhto dakkár guhte lea seammá láhkái geahččaluvvon go mii ge , dattege suttu haga .
Loaiddastehkot dan dihtii roahkkatvuođain árpmu truvnnu ovdii , vai oččošeimmet váibmoláđisvuođa ja árpmu , nu ahte gávnnašeimmet veahki rivttes áigái .
Juohke bajimušbáhppa gii válljejuvvo olbmuid gaskkas , ásahuvvo ovddastit sin Ipmila ovddas ja buktit attáldagaid ja oaffariid sin suttuid ovddas .
Danne go son lea ieš ge headju , de son sáhttá leat váibmoláđis diehtemeahttun ja čádjideaddji olbmuide ,
ja dan headjuvuođas dihtii son galgá oaffaruššat suttuoaffariid sihke iežas ja álbmoga ovddas .
Dán árvvu ii oktage váldde alccesis , muhto bajimušbáhpa rávká Ipmil , nugo son rávkkai Arona ge .
Seammá láhkái ii Kristus ge bajidan iežas bajimušbáhppan , muhto su bajidii son guhte celkkii sutnje : Don leat mu bárdni , mun lean riegádahttán du odne .
Ja nuppi sajis : Don leat báhppa agálašvuhtii , Melkisedeka báhppavuođa mielde .
Go Jesus elii dáppe eatnama alde , de oaffarušai rohkosiid ja ánui čuorvasiiguin ja gatnjaliiguin veahki sus , geas lei fápmu beastit su jápmimis , ja son gullojuvvui ipmilbalolašvuođas dihtii .
Vaikko son lei Bárdni , de fertii oahppat gulolašvuođa gillámušastis .
Go son lei dahkkojuvvon ollisin , de buvttii agálaš bestojumi buohkaide guđet jeagadit su ,
ja Ipmil gohčodii su bajimušbáhppan Melkisedeka báhppavuođa mielde .
Dán birra mii sáhttit cealkit ollu , muhto lea lossat čilget dan didjiide , dasgo dii lehpet šaddan hilljánin gullat .
Dii livččiidet galgan šaddat oahpaheaddjin áigá juo , muhto dii dárbbašehpet gis ieža muhtuma gii oahpahivččii didjiide Ipmila sáni álgoáššiid .
Dii lehpet šaddan dakkárin geat dárbbašehpet fas mielkki , ehpet ge gierdda álbmás biepmu .
Dasgo juohkehaš guhte ain bibmojuvvo milkkiin , lea ain mánná , ii ge sáhte áddet vanhurskkisvuođa sáni .
Muhto álbmás biebmu lea olles olbmuide geat leat hárjehan iežaset dasa ja oahppan earuhit buori bahás .
Guđđot nappo dan maid álggus oahpaimet Kristusa birra , ja jotkot rávis olbmuid oahpaheami .
Eat mii áiggo ođđasit ásahit vuođu go oahpahišgoahtit dakkár áššiid nugo jorgalusa jápmadaguin eret , oskku Ipmilii ,
gástta , gieđaidbidjama , jábmiid bajásčuožžileami ja agálaš duomu .
Dán mii dáhttut dahkat , jos Ipmil dan sálle .
Dasgo go olbmot oktii leat čuvgejuvvon ja muosáhan almmálaš attáldaga , šaddan oasálažžan Bassi Vuoiŋŋas ,
muosáhan Ipmila buori sáni ja vásihan boahttevaš máilmmi fámuid ,
muhto de leat luohpan oskkusteaset , dalle lea veadjemeahttun oahpistit sin ođđaset jorgalussii . Dasgo sii ieža russiinávlejit fas Ipmila Bártni ja dahket su buohkaid bilkun !
Go eanan njammá dan arvvi mii dávjá njuoskada dan ja addá gilviidasas šattu , de dat oažžu Ipmila buressivdnádusa .
Muhto jos dat šaddada bastilislánjáid ja gáskálasaid , de dat ii dohkke masage ja lea garuhusa lahka ja loahpas boldojuvvo .
Mii leat goit vissásat das ahte din dilli , ráhkkásiiddámet , lea buoret , ja ahte bestojupmi vuordá din , vaikko mii sárdnut ge ná .
Ii han Ipmil leat vanhurskkismeahttun nu ahte vajáldahtášii din barggu ja dan ráhkisvuođa maid lehpet čájehan sutnje , go lehpet bálvalan su bassi olbmuid ja ain bálvalehpet sin .
Mii dáhtošeimmet juohkehačča dis ain čájehit seammá áŋgirvuođa loahpa rádjái dassá go din doaivva ollašuvvá ,
amadet šaddat fuollameahttumin , muhto vai čuovvubehtet sin ovdamearkka guđet oskot ja vurdet gierdavaččat ja danne árbejit dan maid Ipmil lea lohpidan .
Go Ipmil attii lohpádusa Abrahamii , de vuortnui iežas nammii , dasgo ii lean oktage su stuorit , gean nammii son livččii vurdnon .
Son vuortnui : « Duođaid , mun buressivdnidan du valljugasat ja lasihan du náli » .
Abraham vurddii gierdavaččat ja oaččui dan mii lei lohpiduvvon sutnje .
Olbmot gal vurdnot soapmása nammii gii lea iežaset stuorit , ja válli nanne ášši ja loahpaha buot nákkuid .
Dan dihtii Ipmil nannii lohpádusas váliin go hálidii čájehit čielgasit sidjiide geaidda lohpádus guoská , ahte su árvalus ii nuppástuva .
Dát guokte rievdameahttun ášši mat dáhkidit ahte Ipmil ii gielis , roahkasmahttet min guđet leat báhtaran su dorvui , ja arvvosmahttet min doallat gitta dan doaivagis mii lei lohpiduvvon midjiide .
Dat doaivva lea min sielu áŋkkur .
Dat lea nanus ja vissis ja ollá gitta ovdaloavdaga siskkobeallái . Dohko Jesus manai min ovddasmannin , go son šattai bajimušbáhppan gean báhppavuohta lea agálaš , Melkisedeka báhppavuođa mielde .
Dát Melkisedek lei Salema gonagas ja Alimus Ipmila báhppa .
Son bođii Abrahama ovddal ja buressivdnidii su go dát lei boahtimin ruoktot maŋŋil go lei vuoitán gonagasaid .
Abraham attii sutnje logádasa buot sállašisttis .
Melkisedeka namma mearkkaša ovddimustá vanhurskkisvuođa gonagas , ja dasto son lea Salema gonagas , mii mearkkaša ráfi gonagas .
Sus ii leat áhčči , ii eadni ii ge sohkalohku , ii ge su eallinbeivviin leat álgu ii ge loahppa .
Son lea Ipmila Bártni láhkásaš , ja son bissu álelassii báhppan .
Fuomášehket man stuoris son lea .
Velá máttaráhččámet Abraham ge attii sutnje buoremus oasi sállašisttis logádassan .
Dat Levi maŋisboahttit guđet leat ásahuvvon báhppan , galget lága mearrádusa mielde čoaggit logádasaid álbmogis , álbmotguimmiineaset , guđet leat maiddái Abrahama nális .
Muhto Melkisedek guhte ii lohkkojuvvon sin sohkagoddái , válddii logádasa Abrahamas ja buressivdnidii su , vaikko Abraham lei juo ožžon Ipmila lohpádusaid .
Lea čielggas ahte buressivdnideaddjis lea alit árvu go das gii oažžu buressivdnádusa .
Muđuid gal jámolaš olbmot čogget logádasaid , muhto dál válddii logádasaid vuostái olmmái guhte čállagiid duođaštusaid mielde eallá agálaččat .
Velá Levi ge , logádasaid čoaggi , mávssii muhtun láhkái ieš logádasa Abrahama bokte .
Vaikko son ii lean vel riegádan , de lei goit máddaris Abrahama alimiin dalle go Melkisedek bođii Abrahama ovddal .
Jos juo Levi soga báhppavuohta , man vuođul Israela álbmogii addojuvvui láhka , livččii dolvon ollisvuhtii , manne dalle dárbbašii vel čuožžilit nubbi báhppa , gean báhppavuohta lea Melkisedeka báhppavuođa mielde ii ge Arona ?
Jos báhppavuohta nuppástuvvá , de láhka ge ferte nuppástuvvat .
Son geas dás lea sáhka , gullá eará čerdii , mas ii leat oktage doaimmahan áltárbálvalusa .
Buohkat han dihtet ahte Hearrámet boahtá Juda čearddas , ii ge Movsses leat sárdnon maidege dán čeardda báhppavuođa birra .
Buot dát šaddá ain čielgaseabbon go čuožžila Melkisedeka láhkásaš ođđa lágán báhppa , guhte ii leat šaddan báhppan olmmošlaš lága árbenjuolggadusaid mielde , muhto nohkameahttun eallima fámus .
Su birra lea duođaštuvvon : Don leat báhppa agálašvuhtii , Melkisedeka báhppavuođa mielde .
Nu heaittihuvvo ovddit mearrádus , dasgo dat lei heittot ja ávkkeheapmi , ii han láhka leat ollašuhttán maidege . Dan sadjái mii leat ožžon buorebu , doaivaga mii addá midjiide vejolašvuođa lahkanit Ipmilii .
Dát dáhpáhuvai Ipmila váli mielde .
Levi sohkagotti olbmát šadde báhppan váli haga , muhto Jesusa báhppavuohta nannejuvvui váliin , dáiguin sániiguin : Hearrá lea vurdnon ii ge gáđa dan : Don leat báhppa agálašvuhtii .
Dás mii oaidnit man ollu buorebun lea šaddan dat lihttu man Jesus dáhkida .
Eará báhpaid mearri lea dađistaga lassánan go jápmin lea hehtten sin joatkimis báhppan .
Muhto Jesus bissu agálašvuhtii , dasgo su báhppavuohta lea nohkameahttun .
Danne son sáhttá ollásit beastit sin guđet su bokte bohtet Ipmila lusa , go son eallá agálašvuhtii ja rohkadallá sin ovddas .
Dákkár bajimušbáhpa mii dárbbašeimmet gii lea bassi , vigiheapmi , duolvatkeahttá , earuhuvvon suttolaččain ja aliduvvon almmiid badjel .
Son ii dárbbaš eará bajimušbáhpaid láhkái beaivválaččat oaffaruššat vuos iežas suttuid ovddas ja dasto álbmoga suttuid ovddas .
Dasgo son lea juo gearddi oaffaruššan , go oaffarušai iežas .
Láhka ásaha bajimušbáhppan olbmuid guđet leat heajut , muhto váli sátni mii bođii lága maŋŋil , ásaha bajimušbáhppan Bártni guhte agálaš áigái lea dahkkojuvvon ollisin .
Váldoášši mas dál lea sáhka , lea dát : Mis lea dakkár bajimušbáhppa guhte čohkká almmis Allatvuođa truvnnu olgeš bealde . Son doaimmaha báhpabálvalusa bassi báikkis , duohta lihttogoađis , man ii leat ceggen olmmoš , muhto Hearrá ieš .
Juohke bajimušbáhppa lea biddjojuvvon oaffaruššat Ipmilii sihke attáldagaid ja njuovvanoaffariid , ja danne lei dárbbašlaš ahte maiddái min bajimušbáhpas lei juoga man sáhtii buktit oaffarin .
Jos son livččii eatnama alde , de son ii livčče oppa báhppa ge , dasgo dáppe leat juo dakkárat guđet oaffaruššet lága mielde .
Sin bálvalus lea goittot dušše almmálaš bálvalusa govva ja suoivva , nugo celkojuvvui Movssesii ge go son galggai cegget lihttogoađi : « Ane fuola das ahte dagat buot dan ovdagova mielde mii čájehuvvui dutnje vári alde . »
Muhto min bajimušbáhppa lea ožžon sakka stuorit doaimma , go son maiddái lea buoret lihtu gaskaolmmái , dakkár lihtu mii lea vuođđuduvvon buoret lohpádusaid ala .
Dasgo jos juo vuosttaš lihttu livččii leamaš láitemeahttun , de ii livčče dárbbašuvvon ođđa lihttu .
Dasgo Ipmil láitá álbmogis go cealká : Gehččet , beaivvit bohtet , cealká Hearrá , go mun dagan ođđa lihtu Israela viesuin ja Juda viesuin . Dat ii leat seammá lágán lihttu go dat man mun dahken sin máddariiguin dalle go válden sin gihtii ja dolvon sin eret Egyptas .
Sii eai bisson mu lihtus , ja danne in mun ge atnán fuola sis , cealká Hearrá .
Muhto dán lihtu mun dagan Israela álbmogiin daid beivviid maŋŋil , cealká Hearrá : Mun bijan lágaidan sin millii ja čálán daid sin váimmuide .
Mun lean sin Ipmil , ja sii leat mu álbmot .
Dalle ii oktage šat oahpat ránnjás , ii ge oktage oahpat álbmotguoimmis sániiguin : « Oahpa dovdat Hearrá . » Dalle sii buohkat , uhcimusas stuorimussii , dovdet mu .
Mun attán ándagassii sin vearredaguid in ge šat goassege muitte sin suttuid .
Sártnodettiinis ođđa lihtu birra Ipmil čájeha ahte vuosttaš lihttu lea boarásmuvvan .
Ja dat mii boarásmuvvá ja oamásmuvvá , lea juo nohkagoahtimin .
Vuosttaš lihtus ledje nappo ipmilbálvalusa njuolggadusat ja bassi báiki dáppe eatnama alde .
Ceggejuvvui goahti man ovddimus lanjas ledje ginttaljuolgi , beavdi ja oaffarláibbit . Dán oasi gohčodedje bassin . Nuppi ovdaloavdaga duohken lei dat latnja man gohčodedje buot basimussan .
Doppe lei golle suovasáltár ja lihtu árka , mii lei skoađastuvvon golliin .
Árkkas lei gollelihti man siste lei mánna , Arona soabbi mas šadde iđut , ja lihtu távvalat .
Árkka bajábealde ledje hearvásvuođa kerubat suoivanastimin soabahansaji .
Buot dán ii dárbbaš dál čilget nu dárkilit .
Nu lea nappo buot ásahuvvon .
Goađi ovddimus lanjas fitnet báhpat beaivválaččat go doaimmahit ipmilbálvalusa .
Muhto goađi nuppi latnjii beassá dušše bajimušbáhppa , ja son ge dušše oktii jagis . Dalle sus ferte álo leat mielde varra man son oaffaruššá iežas ja álbmoga meaddádusaid ovddas maid sii leat dahkan diehtemeahttunvuođas .
Nu Bassi Vuoigŋa čájeha ahte geaidnu buot basimussii ii leat vel rahppojuvvon , nu guhká go goađi ovddimus latnja bissu .
Buot dát govvida dálá áiggi : Attáldagat ja oaffarat gal buktojuvvojit , muhto dat eai sáhte dahkat ollisin su guhte oassálastá ipmilbálvalussii vai su oamedovdu buhtásmuvašii .
Dát leat dušše olgguldas ásahusat , nugo biebmo- , juhkamuš- ja juohke lágán buhtistannjuolggadusat ge , ja bissot dušše dassážii go rivttes lágádus ásahuvvo .
Muhto go Kristus bođii dálá buriid bajimušbáhppan , de manai stuorit ja dievasleabbo goađi čađa , mii ii leat dahkkojuvvon gieđaiguin , ii ge gula sivdniduvvon máilbmái .
Son manai dušše oktii sisa buot basimussii , ii bohkáid ja burrogálbbiid varain , muhto iežas varain , ja nu son lea buktán midjiide agálaš lonástusa .
Jos juo bohkáid ja vuovssáid varra ja guigguid gunat mat riškkuhuvvojit buhtismeahttumiid ala , buhtistit olbmuid olgguldasat , de dađe buorebut buhtista ge Kristusa varra ! Agálaš vuoiŋŋas bokte son lea oaffaruššan iežas láitemeahttun oaffarin Ipmilii ja buhtista min oamedovddu jápma daguin eret vai mii sáhtášeimmet bálvalit ealli Ipmila .
Dan dihtii Kristus lea boahtán ođđa lihtu gaskaolmmájin vai sii guđet leat rávkojuvvon , oččošedje lohpiduvvon agálaš árbbi , go son jápmimiinnis lonistii dain rihkkumiin mat ledje dahkkojuvvon vuosttaš lihtu áiggi .
Dasgo gos testamenta lea , galgá álo sáhttit duođaštit duohtan testamentta dahkki jápmima .
Testamenta han boahtá fápmui easkka go dan dahkki jápmá ; nu guhká go dan dahkki eallá , dat ii leat fámus .
Danne ii vuosttaš lihtu ge sáhttán ásahit vara haga .
Go Movsses lei lohkan oppa álbmogii buot lága báhkkomiid , de válddii burrogálbbiid ja bohkáid vara ja čázi , skárllatrukses ulluid ja issopa ja riškkuhii daid lága girjji ja oppa álbmoga ala ja celkkii : « Dát lea dan lihtu varra man Ipmil lea dahkan dinguin . »
Seammá láhkái son riškkuhii varain lihttogoađi ja buot gaskaomiid mat adnojuvvojit ipmilbálvalusas .
Lága mielde goasii buot buhtistuvvo varain , dasgo ándagassii addojupmi ii leat , jos ii golggahuvvo varra .
Almmálaš diŋggaid govat fertejit nappo buhtistuvvot dáinna lágiin , muhto almmálaš diŋggat ieža fertejit buhtistuvvot ain buoret oaffariiguin .
Dasgo Kristus ii mannan bassi báikái mii lea dahkkojuvvon gieđaiguin . Dat lea dušše duohta bassi báikki govva . Son baicca manai albmái vai loaiddastivččii Ipmila muođuid ovdii min ovddas .
Ii son mannan albmái oaffaruššat iežas eatnat gerddiid , nugo bajimušbáhppa dahká juohke jagi go doalvu buot basimussii vara mii ii leat iežas varra .
Muđuid han Kristus livččii galgan gillát jápmima máŋgga geardde máilmmi vuođđudeami rájes .
Muhto dál son lea boahtán máilbmái dušše oktii , áiggiid loahpas , sihkkut eret suttu oaffariinnis .
Juohke olbmo oassi lea oktii jápmit ja dasto dubmejuvvot . Seammá láhkái Kristus lea oktii oaffaruššojuvvon vai válddášii eret eatnagiid suttuid , ja son almmustuvvá nuppi geardde , ja dalle ii šat suttu dihtii , muhto beastit sin guđet leat vuordimin su .
Lágas lea nappo dušše boahtteáiggi buriid suoivva , ii ge daid duohta govva .
Seammá oaffarat oaffaruššojuvvojit álelassii jagis jahkái , muhto láhka ii sáhte goassege dahkat ollisin sin guđet loaiddastit daiguin Ipmila muođuid ovdii .
Muđuid han oaffaruššan livččii loahpahuvvon .
Jos ipmilbálvalusa oassálastit livčče juo oktii buhtistuvvon , de sis eai livčče šat suttut oamedovddu alde .
Muhto oaffarat baicca muittuhit suttuid jahkásaččat , dasgo lea veadjemeahttun ahte vuovssáid ja bohkáid varra válddášii eret suttuid .
Danne Kristus cealká boađedettiinis máilbmái : Njuovvanoaffariid ja attáldagaid don it hálidan , muhto don dahket munnje rupmaša .
Boaldinoaffarat ja suttuoaffarat eai lean du miela mielde .
Dalle mun celken : Geahča , mun lean boahtán , nugo mu birra lea čállojuvvon girjegerrui , ollašuhttit du dáhtu , Ipmil .
Son cealká nappo vuos : « Njuovvanoaffariid ja attáldagaid , boaldinoaffariid ja suttuoaffariid don it dáhtton , dat eai lean du miela mielde » , vaikko dat oaffaruššojuvvojit lága mielde .
Muhto dasto son cealká : « Geahča , mun lean boahtán ollašuhttit du dáhtu . »
Son nappo heaittiha ovddit lágádusa ja ásaha nuppi .
Dán dáhtu mielde mii leat dahkkojuvvon bassin dušše ovttain áidna oaffariin , go Jesus Kristusa rumaš oaffaruššojuvvui .
Juohke báhppa doaimmaha beaivválaččat ipmilbálvalusa ja oaffaruššá álo seammá oaffariid , mat eai goit sáhte goassege váldit eret suttuid .
Kristus lea oaffaruššan ovtta suttuoaffara mii bissu agálaččat ja lea čohkánan Ipmila olgeš gieđa beallái .
Doppe son ain vuordá dassážii go su vašálaččat biddjojuvvojit su julggiid vuložin , dasgo son lea dušše ovttain oaffariin dahkan agálaččat ollisin sin guđet dahkkojuvvojit bassin .
Dán duođašta midjiide maiddái Bassi Vuoigŋa .
Vuos ná : Dán lihtu mun dagan singuin daid beivviid maŋŋil , cealká Hearrá : mun bijan lágaidan sin váimmuide ja čálán daid sin millii .
Ja dasto : Sin suttuid ja vearredaguid mun in áiggo muitit šat goassege .
Gos suttut leat ándagassii addojuvvon , doppe suttuoaffarat eai šat dárbbašuvvo .
Oskuguoimmit , mis lea nappo roahkkatvuohta Jesusa vara bokte loaiddastit buot basimussii . Son lea rahpan midjiide ođđa , ealli geainnu mii manná ovdaloavdaga čađa , mii lea su rumaš .
Go mis lea dakkár stuora báhppa gean háldui lea oskkilduvvon Ipmila viessu , de loaiddastehkot buot basimussii duođalaš váimmuin ja oskku vissisvuođas , nu ahte min váibmu lea riškkuhuvvon buhtisin bahás oamedovddus ja rumaš bassojuvvon buhtes čáziin .
Dollot nannosit gitta doaivagis man mii dovddastit , dasgo dat guhte lea addán midjiide lohpádusa , lea oskkáldas .
Vuhtiiváldot guhtet guimmiideamet ja ávžžuhehkot guhtet guimmiideamet ráhkisvuhtii ja buriide daguide .
Allot hilggo searvegoddámet čoagganemiid , nugo muhtumiin lea vierru , muhto arvvosmahttot guhtet guimmiideamet , dađe eanebut go oaidnibehtet beaivvi lahkaneamen .
Jos mii suddudit mieleavttus vel dalle ge go leat oahppan dovdat duohtavuođa , de ii leat šat mihkkege oaffariid mii soabahivččii min suttuid . Dalle vuordá hirbmatlaš duopmu ja buolli áŋgirvuohta mii duššada daid , guđet čužžot Ipmila vuostái .
Son guhte hilgu Movssesa lága , dubmejuvvo jápmimii árkkálmastinvuođa haga guovtti dahje golmma duođašteaddji sáni mielde .
Man ollu garraset ráŋggáštusa ánssáša ge din mielas son guhte duolbmá Ipmila Bártni julggiidis vuollái ja eahpegudnejahttá lihtu vara , mainna son ieš lea dahkkojuvvon bassin , ja heahppašuhttá árpmu Vuoiŋŋa !
Mii han dovdat su guhte lea cealkán : « Munnje gullá mávssaheapmi , ja mun áiggun mávssahit » , ja maiddái : « Hearrá dubme álbmogis . »
Suorggatlaš lea gahččat ealli Ipmila gieđaide .
Muitet mo lei ovdal , dalle go dii leiddet aiddo beassan čuovgasii .
Dalle dii gierddaidet ollu garra gillámušaid .
Muhtumiin hiddjidedje ja áŧestedje din earáid oaidnut , ja muhtumiin dii leiddet oasálaččat guimmiideattet garra oasis .
Dii gilláidet daiguin guđet ledje giddagasas , dii dohkkeheiddet iluin ahte din opmodat rivvejuvvui , dasgo diđiidet ahte oamastehpet buoret opmodaga mii bistá .
Allet nappo bálkes eret roahkkatvuođadet , dasgo dat oažžu stuora bálkká .
Dii dárbbašehpet stuora gierdavašvuođa , vai sáhtášeiddet ollašuhttit Ipmila dáhtu ja oažžut dan mii lea lohpiduvvon didjiide . Dasgo : Oanehis áigi vel , dušše oanehis áigi , de boahtá son guhte galgá boahtit , ii ge son ádján .
Mu vanhurskkis bálvaleaddji oažžu eallit go osku , muhto jos luohpá , de mu siellu ii dohkket su .
Mii eat gula sidjiide guđet geassádit ja mannet gáđohussii , muhto sidjiide guđet oskot ja bestet sieluset .
Osku lea vissisvuohta das mii doivojuvvo , ja dorvu das mii ii oidno .
Dan oskku dihtii máddarat ožžo buori duođaštusa .
Oskku dihtii mii áddet ahte máilbmi lea sivdniduvvon Ipmila sáni bokte , nu ahte oinnolaš lea riegádan oaidnemeahttumis .
Oskku dihtii Abel oaffarušai Ipmilii buoret oaffara go Kain ja oaččui Ipmilis dan duođaštusa ahte lei vanhurskkis su attáldagaid dihtii .
Oskkodettiin son sárdnu vel dál ge vaikko lea jápmán .
Oskku dihtii Henok váldojuvvui eret , amas oaidnit jápmima .
Dasto son ii lean šat , dasgo Ipmil válddii su eret .
Ovdal go váldojuvvui eret , de son lei ožžon duođaštusa ahte dohkke Ipmilii .
Oskku haga lea almmatge veadjemeahttun dohkket sutnje .
Dat guhte loaiddasta Ipmila ovdii , ferte oskut ahte Ipmil lea ja ahte son bálkkaša sin guđet ohcet su .
Oskku dihtii Noa oaččui almmuhusa Ipmilis das mii ii lean vel oaidnimis , ja ipmilbalolašvuođastis son ráhkadii árkka beastit buot su dálu olbmuid .
Oskku dihtii son šattai máilmmi duopmun ja árbii ieš dan vanhurskkisvuođa mii boahtá oskkus .
Oskku dihtii Abraham lei gulolaš go rávkojuvvui .
Son vulggii dan eatnamii mii lei lohpiduvvon sutnje árbeeanan . Son vulggii mátkái dieđekeahttá gosa lei mannamin .
Oskku dihtii Abraham ásaiduvai vierisin lohpádusa eatnamii ja orui doppe gođiin Issáhiin ja Jáhkobiin , guđet leigga seammá lohpádusa árbbolaččat . Dasgo Abraham vurddii dan gávpoga mas lea nana vuođđu ja man Ipmil lea huksen ja sivdnidan .
Oskku dihtii Sárá oaččui vel fámu šaddat áhpeheapmin , vaikko su sahkaneami áigi lei juo vássán , go son anii luohtehahttin su gii lei lohpidan .
Dan dihtii bohte dan ovtta olbmás , velá boarásmuvvan olbmás , maŋisboahttit nu eatnagat go almmi násttit ja nu lohkameahttumat go mearragátti sáttočalmmit .
Oskkus dát buohkat jápme oaččokeahttá dan mii lei lohpiduvvon sidjiide .
Sii ledje dušše guhkkin oaidnán dan ja dearvvahan dan iluin ja dovddastan ahte ledje guossit ja vierrásat eatnama alde .
Dat guđet sárdnot ná , čájehit iežaset áibbašeami vánheneatnamii .
Muhto jos sin jurdagiin livččii leamaš dat eanan gos ledje vuolgán , de gal livčče sáhttán máhccat dohko .
Muhto sii váinnuhedje buorebu , almmálaš vánheneatnama .
Dan dihtii ii Ipmil ge heahpanatta sis , muhto suovvá sin gohčodit iežas Ipmilin , dasgo son lea gárvvistan gávpoga sin várás .
Oskku dihtii Abraham buvttii Issáha oaffarin go geahččaluvvui .
Son lei gárvvis oaffaruššat áidna bártnis , vaikko lei ožžon lohpádusaid , ja sutnje lei celkojuvvon : « Issáha nálli gohčoduvvo du mánnán . »
Dasgo son jurddašii ahte Ipmilis lea fápmu bajásčuoččáldahttit vel jábmi ge , ja nu son oaččui bártnis ruovttoluotta , bajásčuožžileami veardádusgovvan .
Oskku dihtii Issát buressivdnidii Jáhkoba ja Esaua , boahtteáiggi várás .
Oskku dihtii Jáhkot buressivdnidii guktuid Jovsseha bártniid go lei jápmimin , ja rohkadalai njahkut soabbegeaži vuostái .
Oskku dihtii Jovsset sártnui , go lei lahka jámi , ahte Israela álbmot vuolgá oktii eret Egyptas ja mearridii mii su dávttiiguin galggai dahkkojuvvot .
Oskku dihtii Movssesa vanhenguovttos aniiga bártniska čihkosis golbma mánu . Soai oinniiga ahte mánná lei čáppis , eaba ge ballan gonagasa gohččumis .
Oskku dihtii Movsses biehttalii rávis olmmožin gohčoduvvomis farao nieidda bárdnin .
Son anii buorebun gillát oktan Ipmila álbmogiin go ohcat suttu návddašeami oanehis boddii .
Son anii Kristusa hiddjádusa stuorit riggodahkan go Egypta dávviriid , dasgo son vurddii lohpiduvvon bálkkašumi .
Oskku dihtii son vulggii Egyptas ii ge ballan gonagasa moaris .
Son bisui nanusin dego livččii oaidnán su guhte lea oaidnemeahttun .
Oskku dihtii son ásahii beassážiid ja riškkuhii vara amas sorbmejeaddji eŋgel guoskkahit israellaččaid vuosttašriegádeddjiid .
Oskku dihtii israellaččat manne Ruksesmeara čađa dego goike eatnama mielde , muhto go egyptalaččat geahččaledje dan , de heavvanedje .
Oskku dihtii Jeriko muvrrat gahčče go álbmot lei vázzán daid birra čieža beaivvi .
Oskku dihtii fuorrá Rahab vealttai jápmimis oktan eahpegulolaččaiguin , dasgo son lei váldán dihtošteddjiid vuostái ráfiin .
Maid ba dása vel lasihivččen ?
Mus nogašii áigi , jos muitalivččen Gideona , Baraka , Samsona ja Jefta , Dávveda , Sámmola ja profehtaid birra .
Oskku dihtii sii vuite riikkaid , doalahedje rievtti ja besse oaidnit lohpádusaid ollašuvvamin .
Sii notke ledjoniid njálmmi , jáddadedje njivžu dola ja garve miehki ávjju .
Sii ledje heajut , muhto givro , šadde fámolažžan soađis , ja báhtarahtte vašálaččaid veagaid .
Muhtun nissonat ožžo jábmiideaset eallin ruovttoluotta go sii bajásčuožžiledje .
Earát biinniduvvojedje ja biehttaledje gáddjojuvvomis , danne go hálidedje buoret bajásčuožžileami .
Earát fas muosáhedje bilkku ja roaiskkáid , velá láhkkiid ja giddagasa ge .
Sin geađgádedje jámas , sahájedje guovtti oassái ja sorbmejedje mihkiin .
Sii fertejedje johtalit sávzza- ja gáiccanáhkit gárvun , sii gillájedje vádjitvuođa , áŧestuvvojedje ja illástuvvojedje .
Sii ledje menddo buorit dán máilbmái , ja nuba sii fertejedje vádjolit mehciin ja váriin ja ássat bákteráiggiin ja eananrokkiin .
Ja vaikko dát buohkat leat ožžon buori duođaštusa go osko , de almmatge eai ožžon dan mii lei lohpiduvvon .
Dasgo Ipmil lei vurken ain buorebu min várás , amaset sii šaddat ollisin min haga .
Go min birra leat nu stuora joavku duođašteaddjit , de biddjot eret buot nođiid mat hehttejit min ja suttu mii nu álkit cieggá midjiide .
Vihkot áŋgirvuođain gitta loahpa rádjái dan gilvvu mii mis lea ovddabealde , geahčadettiin Jesusii , guhte ásaha ja ollašuhttá oskku , ja guhte boahttevaš ilu dihtii gierddai ruossa gillámušaid beroškeahttá heahpadis ja dál čohkká Ipmila truvnnu olgeš bealde .
Jurddašehket su guhte gierddai suttolaččaid garra vuostehágu amadet massit roahkkatvuođadet ja hearddohuvvat .
Dii ehpet leat vel šaddan golggahit varaidet soađis suttu vuostái .
Dii lehpet vajáldahttán dán rávvaga mii sárdnu didjiide nugo mánáide : Mánážan , ale uhcáš Hearrá bagadusa , ale hearddohuva go son bagada du , dasgo gean Hearrá ráhkista , su son bagada , ja son risse juohkehačča gean váldá mánnánis .
Din gillámušat leat bagadussan .
Ipmil meannuda dinguin nugo mánáidisguin .
Sáhttá go leat dakkár mánná , gean ii áhčči bagadivčče ?
Jos dii nappo ehpet leat bagaduvvon , nugo buohkat earát , de dii lehpet juolgemánát ehpet ge rivttes mánát .
Go min eatnanlaš áhčit bagadedje min , de mii aniimet sin árvvus .
Eat go mii vel ollu eanebut galggaše leat vuoiŋŋalaš Áhččámet vuolibužžan , vai eallit .
Dasgo min áhčit bagadedje min dušše oanehis áiggi várás ja nugo sin mielas orui buorre , muhto Ipmil dahká dan midjiide ávkin vai mii šattašeimmet oasálažžan su bassivuhtii .
Buot bagadus gal orru leamen eambbo morašin go illun nu guhká go dat bistá , muhto dat šaddada ráfi ja vanhurskkisvuođa sis guđet leat bagaduvvon .
Nannejehket nappo váiban gieđaid ja vuoimmehuvvan čippiid !
Johtet njulges bálgáid , amas skierpmá juolgi vealččihit , muhto vai dat buorrána .
Váinnuhehket ráfi buohkaiguin ja dan bassivuođa man haga ii oktage oaččo oaidnit Hearrá .
Váruhehket amas oktage báhcit oaseheapmin Ipmila árpmus , amas mihkkege vahátlaš bahčavuođa ruohttasiid beassat šaddat ja mirkkohit eatnagiid .
Váruhehket , amas oktage dis eallit furrodagas dahje eahpebassivuođas nugo Esau , guhte ovtta mállása ovddas vuvddii vuosttašriegádeaddji vuoigatvuođas .
Dii han diehtibehtet ahte go son dasto dáhtui buressivdnádusa , de hilgojuvvui .
Vaikko son bivddii dan čieru , de ii beassan dahkat buorádusa .
Ehpet dii leat boahtán dakkár vári lusa man sáhttá guoskkahit gieđain , gos lea njuoršudolla , čáhppes balva , seavdnjatvuohta ja riđđudálki , ehpet dohko gos gullui básoniid čuodjan ja jietna mii sártnui nu ahte guldaleaddjit biehttaledje gullamis dan .
Dasgo sii eai gierdan gullat dán gohččuma : « Jos velá spire ge guoská várrái , de dat galgá geađgáduvvot . »
Dat oainnáhus lei nu suorggatlaš ahte Movsses ge celkkii : « Mun balan sakka ja doarggistan . »
Muhto dii lehpet boahtán Sionvári vuollái , ealli Ipmila gávpogii , almmálaš Jerusalemii . Doppe leat duháhiid mielde eŋgelat , ávvudančoagganeapmi ja vuosttašriegádeddjiid searvegoddi , dat , geaid namat leat čállojuvvon almmi girjjiide .
Doppe lea Ipmil , buohkaid duopmár , ja sin vuoiŋŋat guđet leat vanhurskásat ja dahkkojuvvon ollisin , ja doppe lea Jesus , ođđa lihtu gaskaolmmái , ja riškkuhanvarra mii sárdnu beaktileabbot go Abela varra .
Váruhehket amadet hilgut su guhte sárdnu !
Jos sii eai vealtan ráŋggáštusas guđet hilgot su guhte sártnui ipmillaš sániid eatnama alde , de dađe vissáseabbot mii eat vealtta das jos jorgalit sus eret gean sánit bohtet almmis .
Dalle su jietna lihkahii eatnama , ja dál son lea lohpidan : « Oktii vel lihkahan eatnama , in ge dušše dan , muhto maiddái almmi . »
Dát sánit « oktii vel » mearkkašit ahte buot mii lea sivdniduvvon , lihkkasa ja sirdašuvvá , vai dat mii ii lihkkas , bisošii .
Go mii oažžut riikka mii ii lihkkas , de lehkot dan dihtii giitevaččat ja bálvalehkot Ipmila su dáhtu mielde ipmilbalolašvuođas ja balus , dasgo min Ipmil lea loaktevaš dolla .
Bisuhehket vieljalaš ráhkisvuođa .
Allet vajáldahte čájeheames guosseláđisvuođa , dasgo dainna lágiin muhtumat leat váldán guossin eŋgeliid dieđekeahttá dan .
Muitet fáŋggaid , dego livččiidet sin fáŋgaguoimmit ; muitet sin geat illástuvvet , dego din iežadet rumaš illástuvašii .
Atnoset buohkat náittosdili gudnis , ja lehkos náittosseaŋga duolvatkeahttá , dasgo Ipmil dubme furrošeddjiid ja náittosdili rihkkuid .
Lehkos din eallingeardi ruhtaváibmilvuođa haga , muhto duhtet dasa mii dis lea .
Dasgo Ipmil lea ieš cealkán : « Mun in eisege guođe du , in goassege hilggo du »
Dan dihtii mii sáhttit cealkit dorvvolaš mielain : Hearrá lea mu veahkeheaddji , in mun bala .
Maid olmmoš sáhtášii dahkat munnje ?
Muitet oaivámuččaideattet guđet leat sárdnidan didjiide Ipmila sáni .
Atnet muittus mo sii elle ja jápme , ja váldet sin oskku ovdagovvan .
Jesus Kristus lea seammá ikte , odne ja agálašvuhtii .
Allet divtte buot lágán vieris oahpuid doalvut iežadet čádjádussii .
Min váimmut galget nanosmuvvat árpmus , eai biepmuin , mas eai geatge leat ožžon ávkki .
Mis lea alddámet áltár , ja dan oaffaris eai oaččo borrat sii guđet bálvalit lihttogoađis .
Dii han diehtibehtet ahte go bajimušbáhppa doalvu elliid vara buot basimussii suttuid soabaheami dihtii , de dáid elliid gorudat boldojuvvojit šilju olggobealde .
Danne maiddái Jesus gillái ja jámii gávpotpoartta olggobealde , vai basuhivččii iežas álbmoga varainis .
Vulgot nappo su lusa šilju olggobeallái ja guddot alddiineamet su heahppašuhttima .
Ii han mis leat dáppe bissovaš gávpot , muhto mii vuordit ja áibbašit dan gávpogii mii boahtá .
Lehkot dan dihte su bokte álelassii oaffaruššamin Ipmilii giittusoaffara , daid baksamiid šattu , mat dovddastit su nama .
Allet ge vajáldahte dahkamis buori ja addimis oamisteattet , dasgo dakkár oaffarat leat dohkálaččat Hearrái .
Lehket oaivámuččaidasadet gulolaččat , doahttalehket sin . Sii gozihit din sieluid , dasgo oktii sii šaddet dahkat logu dis buohkain .
Diktet sin dahkat bargguset iluin , ii šuohkki , dasgo dat livččii didjiide vahágin .
Rohkadallet min ovddas .
Mii leat vissásat das , ahte min oamedovdu lea buhtis – mii han dáhttut álo vádjolit riekta .
Erenoamážit danne bivddán dis ovddasrohkosa vai dađe farggabut beasašin ruovttoluotta din lusa .
Ráfi Ipmil , guhte agálaš lihtu oaffarvara bokte lea bajásčuoččáldahttán jápmimis dan stuora sávzageahčči , Hearrámet Jesusa , addos didjiide buriid attáldagaid , nu ahte sáhttibehtet ollašuhttit su dáhtu .
Dahkos son ieš mis dan mii lea su miela mielde , son ja Jesus Kristus .
Su lea gudni álo ja agálašvuhtii .
Amen .
Oskuguoimmit , bivddán din gierdat dáid rávasániid , lean han čállán áibbas oanehaččat .
Sáhtán vel muitalit didjiide ahte din oskuviellja Timoteus lea luitojuvvon luovus . Jos son boahtá áiggil , de válddán su mielde go boađán din lusa .
Dearvvuođat buot din oaivámuččaide , dearvvuođat buot bassi olbmuide .
Dearvvuođaid sáddejit didjiide dat vieljat , guđet leat Italias eret .
Árbmu lehkos dinguin buohkaiguin !
Dearvvuođat Jáhkobis , Ipmila ja Hearrá Jesus Kristusa bálvaleaddjis , dan guoktenuppelot čerdii mat ellet biđgosis .
Oskuguimmiidan , atnet dan aivve illun go šaddabehtet juohke lágán geahččalusaide .
Dasgo dii diehtibehtet ahte go osku geahččaluvvo , de dat duddjo gierdavašvuođa .
Muhto šaddadehkos gierdavašvuohta ollislaš dagu , vai dii livččiidet ollásat ja ollislaččat ii ge dis váilloše mihkkege .
Muhto jos ovttasge dis váilloš viisodat , de átnos dan Ipmilis guhte addá buohkaide mielastis ja soaimmakeahttá .
Muhto bivdos son oskkus , almmá eahpádusa haga .
Dasgo dat guhte eahpida , lea dego meara bárru , man biegga lihkaha ja doalvu .
Dakkár olmmoš ii sáhte vuordit oažžut maidege Hearrás , go son lea nu guovttemielat ja stáđismeahttun vádjoleamistis .
Rámidehkos vuoliduvvon oskuguoibmi iežas das ahte son lea aliduvvon , muhto rikkis fas das ahte son lea váivváš , dasgo son goldná dego lieđđi suinniid gaskkas .
Beaivváš badjána boaldi báhkainis ja goldnada suinniid , lieđit gahččet , ja buot daid čábbodat jávká .
Seammá láhkái rikkis ge goldná gasku buot doaimmaidis .
Ávdugas son gii gierdá geahččalusaid .
Dasgo go son lea geahččaluvvon , de oažžu eallima kruvnnu man Ipmil lea lohpidan sidjiide geat ráhkistit su .
Allos daddjo oktage gii geahččaluvvo : « Ipmil han geahččala mu . »
Dasgo bahá ii geahččal Ipmila , ii ge Ipmil ieš geahččal ovttage .
Muhto juohkehaš geahččaluvvo , go su iežas anistupmi geassá ja giktala su .
Go anistupmi lea sahkanan , de das riegáda suddu , ja go suddu lea láddan , de das riegáda jápmin .
Allet čádjádala , ráhkis oskuguimmiidan !
Juohke buorre attáldat ja juohke olles attáldat boahtá badjin čuovgasa Áhčis , gean luhtte ii mihkkege nuppástuva ii ge čuovga molsašuva seavdnjadiin .
Iežas dáhtu mielde son lea riegádahttán min duohtavuođa sániin , vai mii livččiimet su sivdnádusa vuosttaš šaddu .
Ráhkis oskuguimmiidan , muitet dán : Lehkos juohkehaš johtil gullat , muhto hillján sárdnut ja hillján suhttat . Dasgo olbmo suhttu ii duddjo dan mii lea vuoigat Ipmila ovddas .
Bidjet dasto eret buot buhtismeahttunvuođa ja bahávuođa mii lea nu valljugas , ja váldet vuollegašvuođain vuostái dan sáni mii lea gilvojuvvon didjiide , ja mas lea fápmu beastit din sielu .
Dahket dan maid sátni cealká , allet ge duššefal gula dan , muđuid beahttibehtet iežadet .
Dasgo dat gii gullá sáni ii ge daga dan mielde , lea olbmá láhkásaš gii geahččá ámadajus speadjalis : Son geahčada gal iežas , muhto vázzila ja vajáldahttá dakkaviđe makkár son lea .
Muhto son guhte guorahallá friddjavuođa olles lága ja bissu das , ii vajáldahte dan maid gullá , muhto dahká dan mielde .
Son šaddá ávdugassan dagustis . Jos guhtege din gaskkas navdá iežas Ipmila bálvaleaddjin , muhto ii veaje doallat njuokčamis lávžžis , de son beahttá iežas ja su ipmilbálvalus lea dušši .
Ipmilbálvalus mii lea buhtis ja láitemeahttun Ipmila ja Áhči čalmmiin , lea veahkehit oarbásiid ja leaskkaid sin heađis ja várjalit iežas duolvatmeahttumin máilmmis .
Oskuguimmiidan , dii guđet oskubehtet Hearráseamet Jesus Kristusii , hearvásvuođa Hearrái , allet geahča olbmo hámi beallái .
Jurddašehket ahte din čoakkalmassii boahtá olmmái gii lea gárvodan čáppa biktasiiguin ja geas lea gollen suorpmas , ja nubbi gis gii lea geafi ja gárvodan duolva biktasiiguin .
Almma dii anášeiddet stuorit árvvus su geas leat čáppa biktasat ja dajašeiddet : « Čohkket dása , dá lea buorre sadji » , muhto geafes olbmui dii dajašeiddet : « Čuoččo duos » , dahje : « Čohkán dása láhttái mu julggiid gurrii » . Ehpet go dii dalle ráhkat earu iežadet gaskii ? Ehpet go dii dalle leat šaddan duopmárin geain leat bahás jurdagat ?
Gullet , ráhkis oskuguimmiidan : Ii go Ipmil leat válljen sin geat leat geafit dán máilmmis , vai šaddet rikkisin oskkus ja árbejit dan riikka man son lea lohpidan sidjiide geat ráhkistit su ?
Muhto dii badjelgeahččabehtet geafes olbmuid !
Eai go jur riggát soardde din ja gease din dikki ovdii ?
Eai go jur sii bilkit dan buori nama mii lea celkojuvvon din badjelii ?
Jos dii ollašuhttibehtet čállaga gonagaslaš lága : Don galggat ráhkistit lagamuččat nugo iežat , dalle dahkabehtet riekta .
Muhto jos dii geahččabehtet olbmo hámi beallái , de suddudehpet , ja láhka váidá din láhkarihkGon Dasgo son guhte muđuid doallá olles lága , muhto rihkku ovtta báhkkoma , lea rihkkon buot báhkkomiid .
Dasgo son guhte celkkii : It galgga rihkkut náittosdili , son celkkii maiddái : It galgga goddit .
Vaikko don it rihko náittosdili , muhto gottát , dalle leat goit láhkarihkku .
Sárdnot ja dahket nugo sii guđet dubmejuvvojit friddjavuođa lága mielde .
Dasgo duopmu lea váibmoláđismeahttun sutnje guhte ieš ii leat váibmoláđis , muhto váibmoláđisvuohta birge duomus .
Oskuguimmiidan , mii ávkkiid lea jos muhtun dadjá ahte sus lea osku , jos sus eai leat dagut ?
Sáhttá ba dakkár osku beastit su ?
Jurddašehket jos muhtun vieljas dahje oappás eai leat biktasat ii ge beaivválaš biebmu . Jos dalle muhtun dis dadjá sidjiide : « Mannet dearvan , biktalehket iežadet ja boradehket gallás » , muhto ii atte sidjiide dan maid rumaš dárbbaša , mii ávkkiid das lea ?
Nu lea maiddái oskkuin : Jos das eai leat dagut , de dat lea iešalddes jápmán .
Muhtun veadjá dadjat : « Dus lea osku , mus gis dagut » .
Čájet munnje dasto oskkot daguid haga , de mun gis čájehan dutnje oskon daguidanguin .
Don oskkut ahte Ipmil lea okta . Dat lea buorre .
Maiddái bahá vuoiŋŋat oskot dan ja doarggistit !
It go dieđe , jallas olmmoš , ahte osku daguid haga lea jápmán ?
Ii go min áhčči Abraham dahkkojuvvon vanhurskkisin daguidis dihtii go son vel bártnis Issáha ge bijai oaffaráltára ala ?
Don oainnát ahte osku duddjui oktan su daguiguin , ja su osku šattai ollisin daguin .
Ja nu ollašuvai dát čálasátni : Abraham jáhkii Ipmila , ja danne Ipmil anii su vanhurskkisin , ja son gohčoduvvui Ipmila ustibin .
Dii nappo oaidnibehtet ahte olmmoš adnojuvvo vankurskkisin daguidis dihtii ii ge dušše oskku dihtii .
Ii go lean nu fuoráin Rahabiin ge ?
Son dahkkojuvvui vanhurskkisin daguidis dihtii , danne go son vuostáiválddii áirasiid ja doalvvui sin olggos gávpogis eará geainnu .
Dasgo nugo rumaš lea jápmán vuoiŋŋa haga , nu lea maiddái osku ge jápmán daguid haga .
Oskuguimmiidan , alloset gallis dis šaddo oahpaheaddjin , dasgo dii diehtibehtet ahte mii dubmejuvvot garraseabbot go earát . Buohkat han mii guossalit dávjá .
Dat guhte ii guossal sárdnumiin , lea olles olmmái , ja nagada doallat olles rupmašis lávžžis .
Mii han bidjat njálbmeruovddi hestii vai dat jeagada min , ja dalle mii sáhttit stivret heastta .
Velá stuora skiippaid ge , maid garra biekkat dolvvodit , sáhttá stivrejeaddji stivret uhca stivrranaččain gosa dáhttu .
Nu lea maiddái njuokčamiin ; dat lea uhca lahtoš , muhto sáhttá rábmot sakka .
Smávva dolaš sáhttá buolláhit stuora vuovddi !
Maiddái njuovčča lea dolla ; min lahtuid gaskkas dat lea dego vearrivuođa máilbmi .
Dat nuoskkida olles rupmaša ja buolláha eallima rieggá , ja helvet gis buolláha njuokčama .
Olmmoš sáhttá dápmat ja lea juo dápman buot eará sivdnádusaid , sihke spiriid ja lottiid , njoammuid ja guliid .
Muhto njuokčama ii veaje oktage olmmoš dápmat ; dat lea dápmameahttun ja bahá , ja dan dievva lea goddi mirkko .
Dainna mii rámidit Hearrá ja Áhči , ja dainna mii garuhit olbmuid guđet leat sivdniduvvon Ipmila gova mielde .
Seammá njálmmis boahtá sihke rámádus ja garuhus .
Oskuguimmiidan , nu dat ii galgga leat !
Golgá ba gal buorre ja rihča čáhci seammá ádjagis ?
Oskuguimmiidan , sáhttet go fiikkonmuoras šaddat oljošattut , dahje viidnemuoras fiikkonat ? Ii ge sálteádjagis golgga sáivačáhci .
Gii lea din gaskkas viissis ja jierpmálaš ? Čájehehkos son daguidisguin dan vuollegašvuođa mii gullá viisodahkii .
Muhto jos dis lea bahča gáđašvuohta ja riidalanhállu váimmus , de allet rábmo iežadet allet ge gielis duohtavuođa vuostái .
Dakkár viisodat ii boađe badjin , muhto lea eatnanlaš , oaččálaš ja boahtá bahá vuoiŋŋas .
Dasgo doppe gos gáđašvuohta ja riidalanhállu ráđđe , doppe lea moivi ja buot bahá .
Muhto dat viisodat mii boahtá badjin , lea ovddimustá buhtis , dasto ráfálaš , láđis ja guoibmái , dan dievva lea váibmoláđisvuohta ja buorit šattut , dat lea bealatkeahttá ja duođalaš .
Ja vanhurskkisvuođa siepmanat gilvojuvvojit ráfi dahkun ja dat addet šattuid sidjiide geat duddjojit ráfi .
Mas boahtá buot soahti ja riidu din gaskkas ?
Ii go dat boađe himuin mat sohtet din lahtuin ?
Dii anistuvvabehtet , muhto ehpet oaččo maidege .
Dii goddibehtet ja gáđaštehpet , muhto ehpet vuoitte maidege .
Dii riidalehpet ja soahtabehtet , muhto ehpet oaččo maidege , danne go dii ehpet rohkadala .
Vaikko dii rohkadallabehtet , de ehpet goit oaččo maidege , danne go dii rohkadallabehtet boastut ; dii hálidehpet dušše loaktit buot iežadet himuid mielde .
Dii oskkáldasmeahttumat ! Ehpet go dieđe ahte ustitvuohta máilmmiin lea vašálašvuohta Ipmila vuostái ?
Dat gii dáhttu leat máilmmi ustit , šaddá Ipmila vašálažžan .
Dahje gáddibehtet go ahte čála sárdnu duššás go cealká : Áŋgirvuođain Ipmil áibbaša dan vuoiŋŋa man lea diktán orrut min siste .
Muhto stuorit lea dat árbmu man son addá .
Dan dihtii celkojuvvo Lehket dalle Ipmilii vuolibuččat !
Muhto vuostálastet beargalaga , de son báhtara eret din luhtte .
Doalahehket Ipmila lahka , de son gis bissu din lahka .
Buhtistehket gieđaideattet , dii suttolaččat , ja basuhehket váimmuideattet , dii guovttemielagat !
Váidalehket ja moraštehket , čirrojehket !
Nuppástuvvos din boagusteapmi morašin ja din illu šlundivuohtan .
Vuolidehket iežadet Hearrá ovddas , de son bajida din .
Oskuguoimmit , allet sártno baháid guhtet guimmiideattet birra .
Dat guhte sárdnu baháid oskuvieljas birra dahje dubme oskuvieljas , sárdnu baháid lága birra ja dubme lága .
Muhto jos don dubmet lága , dalle it leat lága čuovvu , muhto dan dubmejeaddji .
Lea dušše okta láhkaaddi ja duopmár , son geas lea fápmu sihke beastit ja duššadit .
Muhto mii don leat , gii dubmet lagamuččat ?
Gullet dál , dii geat dadjabehtet : « Odne dahje ihttin mii áigut vuolgit duon dahje don gávpogii ja orrut doppe jagi , gávppašit ja dinet ruđaid ! » Ehpet han dii dieđe makkár din eallin leažžá ihttin !
Dii han lehpet dušše suovva mii oidno oanehis áiggi ja de jávká .
Dii galggašeiddet baicca dadjat : « Jos Hearrá dáhttu , de mii beassat eallit ja sáhttit dahkat dán dahje duon . »
Muhto dii rábmobehtet iežadet ja goarggastallabehtet .
Buot diekkár rápmi boahtá bahás .
Dat gii diehtá maid buriid galggašii dahkat , ii ge dattege daga dan , son sudduda .
Gullet dii riggát : Čirrot ja luibmet buot daid vártnuhisvuođaid dihtii mat deaividit din !
Din riggodat guohcaga , ja muohcu borrá din biktasiid ;
din gollit ja silbbat giimmagit , ja daid giimma duođašta din vuostái ja loaktá din rupmašiid dego dolla .
Maŋimuš áiggiid dii lehpet čohkken dávviriid alcceseattet .
Muhto dat bálká man dii lehpet rievidan dain bargiin geat láddjejedje din bealdduid , čuorvu albmái , ja ládjobargiid čuorvvas lea ollen Hearrái Sebaotii .
Dii lehpet eallán hávskodagain ja duhtadan hálidusaideattet eatnama alde ja buoidudahttán váimmuideattet njuovvanbeaivái .
Dii lehpet dubmen ja goddán vanhurskása , ii ge son vuostálastte din .
Lehket nappo gierdavaččat , oskuguoimmit , dassážii go Hearrá boahtá !
Eanadoalli vuordá gierdavaččat eatnama divrras šattu dassážii go eana lea ožžon čakčaarvvi ja giđđaarvvi .
Lehket maiddái dii ge gierdavaččat ja nannejehket váimmuideattet , dasgo Hearrá boahtin lea lahka .
Oskuguoimmit , allet váidal guhtet guimmiideattet , amadet dubmejuvvot .
Duopmár čuožžu uvssa ovddas .
Oskuguimmiidan , gillámuša ja gierdavašvuođa dáfus atnet ovdamearkan profehtaid geat sárdnidedje Hearrá nammii .
Mii máidnut ávdugassan sin geat leat gierdavaččat .
Dii lehpet gullan Joba gierdavašvuođa birra ja lehpet oaidnán mo Hearrá divttii geavvat sutnje loahpas . Dasgo Hearrá lea rikkis árbmugasvuođas ja árkkálmastinvuođas .
Muhto ovddimustá , oskuguimmiidan , allet vuortno , allet almmi bokte , allet ge eatnama bokte dahje mange eará bokte .
Go mieđihehpet , de dadjet dušše : Juo ! – go biehttalehpet , de dadjet dušše : Ii ! amas duopmu deaividit din !
Jos oktage din gaskkas gillá , de rohkadallos . Jos oktage lea buori mielas , de lávlos máidnunlávlagiid .
Jos oktage din gaskkas lea buohcamin , de rávkos lusas searvegotti vuorrasiid , ja sii galget rohkadallat su ovddas ja vuoiddadit su oljjuin Hearrá nammii .
Dalle oskku rohkos beastá buohcci , ja Hearrá čuoččáldahttá su .
Jos son lea suddudan , de sutnje addojuvvo ándagassii .
Dan dihtii dovddastehket suttuideattet guhtet guoibmáseattet ja rohkadallet guhtet guimmiideattet ovddas vai dii dearvvašmahttojuvvošeiddet .
Vanhurskkis olbmo rohkos lea fámolaš ja duddjo ollu .
Elia lei seammálágán olmmoš go mii . Son rohkadalai duođalaččat ahte ii arvváše , ii ge eatnama ala arván bealnjealját jahkái .
De son rohkadalai fas , ja albmi attii arvvi , ja eanan šaddadii fas šattuid .
Oskuguimmiidan , jos muhtun dis čádjida duohtavuođas eret , ja nubbi eará jorgalahttá su , de dihtos ahte dat guhte jorgalahttá suttolačča eret čádjádusa geainnus , beastá su sielu jápmimis ja gokčá eatnat suttuid .
Dearvvuođat Biehtáris , Jesus Kristusa apoastalis , sidjiide geat ellet vierisin biđgosis miehtá Pontosa , Galatia , Kappadokia , Asia eanangotti ja Bitynia , ja geaid Ipmil Áhčči áigumušas mielde lea válljen ja Bassi Vuoigŋa lea vihahan , vai sii jeagadivčče Jesus Kristusa ja riškkuhuvvošedje su varain .
Árbmu ja ráfi šaddos valljugasat didjiide !
Máidnojuvvon lehkos Ipmil , Hearrámet Jesus Kristusa Áhčči !
Stuora váibmoláđisvuođastis son lea riegádahttán min ođđasis ja addán midjiide ealli doaivvu go bajásčuoččáldahtii Jesus Kristusa jábmiid luhtte . Nu mii oažžut nohkameahttun , duolvatmeahttun ja goldnameahttun árbbi mii lea vurkejuvvon albmái din várás geaid Ipmila fápmu bisuha oskkus , vai dii oččošeiddet bestojumi mii lea juo gárvvis almmustuvvat maŋimuš áiggi .
Ávvudehket dan dihtii , vaikko dii dál oanehis áiggi šaddabehtet gillát máŋgga lágán geahččalusaid vai din osku geahččaluvvošii .
Velá nohkavaš golli ge geahččaluvvo dolas , ja din osku mii lea sakka mávssoleabbo , ferte maiddái geahččaluvvot , vai dat šattašii máidnojupmin ja hearvásvuohtan ja gudnin go Jesus Kristus almmustuvvá .
Su dii ráhkistehpet , vaikko ehpet leat oaidnán su ; sutnje dii oskubehtet , vaikko dál ehpet oainne su , ja dii ávvudehpet cealkemeahttun hearvásmahttojuvvon iluin , dasgo dii olahehpet oskkodet mihttomeari , mii lea sieluid bestojupmi .
Dát bestojupmi lea dat maid profehtat ohce ja guorahalle go sii einnostedje dan árpmu man dii galggaidet oažžut .
Sii suokkardedje man dahje makkár áigái čujuhii Kristusa Vuoigŋa guhte lei sin siste , go son einnostii Kristusa gillámušaid ja daid čuovvovaš hearvásvuođa .
Sidjiide almmuhuvvui ahte eai sii bálval iežaset , muhto baicca din .
Dán sága dii lehpet gullan sis geat sárdnidedje evangeliuma didjiide Bassi Vuoiŋŋas , guhte lea vuolggahuvvon almmis .
Buot dán hálidivčče eŋgelat ge beassat oaidnit .
Dan dihtii bidjet boahkána alimiiddádasadet , gohcet , lehkoset din jurdagat gárvásat !
Bidjet doivvodet nannosit dan árbmui mii addojuvvo didjiide go Jesus Kristus almmustuvvá .
Lehket jegolaš mánát , allet ge šat divtte anistumiideattet báidnit din nugo ovdal , go eliidet diehtemeahttunvuođas .
Nugo son lea bassi guhte rávkkai din , nu šaddos bassin oppa din eallin ge .
Dasgo lea čállojuvvon : Lehket basit , dasgo mun lean bassi .
Jos dii rohkosiinnádet gohčodehpet áhččin su guhte dubme juohkehačča su daguid mielde geahčakeahttá olbmo hámi , de ellet ipmilbalolažžan dan áiggi go ain lehpet dáppe vierisin .
Dii diehtibehtet ahte lehpet lonistuvvon duššálaš eallimisttádet man lehpet ožžon máddariin , ehpet nohkavaš hattiin , silbbaiguin dahje golliiguin , muhto Kristusa divrras varain , dego máinnehis ja vigihis lábbá varain .
Son lei válljejuvvon dása ovdal go máilbmi vuođđuduvvui , muhto din dihtii son lea almmustuvvan easkka dál áiggiid loahpas .
Su bokte dii lehpet oskugoahtán Ipmilii guhte bajásčuoččáldahtii su jábmiid luhtte ja attii sutnje hearvásvuođa , nu ahte dii oskkusteattet bidjabehtet doaivaga Ipmilii .
Go dii jeagadettiin duohtavuođa lehpet buhtistan silodet eallit duohta vieljalaš ráhkisvuođas , de ráhkistehket guhtet guimmiideattet duođalaččat ja buhtes váimmus !
Dii han lehpet riegádan ođđasis , ehpet nohkavaš , muhto nohkameahttun gilvagis , Ipmila sánis , mii eallá ja bissu agálaččat . Dasgo olmmoš lea dego suoidni , ja buot su hearvásvuohta dego rássi .
Suoidni goldná , ja rássi gahččá , muhto Hearrá sátni bissu agálašvuhtii .
Dát sátni lea sárdniduvvon didjiide evangeliumis .
Bidjet dan dihtii eret buot bahávuođa , behttosa ja guoktilašvuođa , gáđašvuođa ja sealggebealdesárdnuma .
Áibbašehket sáni čielga , vuoiŋŋalaš mielkki dego njuoratmánát , vai dii sturošeiddet dainna ja bestojuvvošeiddet .
Dii han lehpet máistán Hearrá buorrevuođa .
Bohtet su lusa , ealli geađggi lusa , man olbmot gal leat hilgon , muhto man Ipmil lea válljen ja atná gudnis .
Šaddet ieža ge ealli geađgin geat huksejuvvobehtet vuoiŋŋalaš viessun ja bassi báhppagoddin , ja buktet ovdan vuoiŋŋalaš oaffariid mat leat dohkálaččat Ipmilii Jesus Kristusa dihtii .
Dasgo čállagis čuožžu : Geahča , mun bijan Sionii čiehkageađggi mii lea válljejuvvon ja mávssolaš . Dat guhte osku sutnje , ii eisege heahppašuva .
Dát geađgi lea nappo mávssolaš didjiide geat oskubehtet .
Muhto sidjiide geat eai oskko , lea dat geađgi man huksejeaddjit hilgo , šaddan váldočiehkageađgin , norddastusgeađgin ja vearránusa báktin .
Sii jorralit go eai jeagat sáni , ja nu sin oassin lea mearriduvvon ge .
Muhto dii lehpet válljejuvvon sohka , gonagaslaš báhpat , bassi álbmot , Ipmila iežas álbmot , vai dii sárdnidivččiidet su burrodagaid , su guhte rávkkai din seavdnjadasas ovddolaš čuovgasasas .
Ovdal dii ehpet lean álbmot , muhto dál lehpet Ipmila álbmot .
Ovdal dii leiddet árpmu haga , muhto dál lehpet gávdnan árbmugasvuođa .
Ráhkkásiiddán , mun bivddán din , geat orrubehtet vierisin dáppe vierroriikkas : Doalahehket iežadet eret oaččálaš anistumiin mat sohtet sielu vuostái .
Ellet bures báhkiniid gaskkas , vai sii go sárdnot baháid din birra ja gohčodit din bahádahkkin , oainnášedje din buriid daguid ja rámidivčče Ipmila dan beaivvi go son oahppaladdá sin .
Lehket Hearrá dihtii juohke máilmmálaš ásahusa vuolibuččat , lehkos dal keaisár gii lea bajimuš , dahje eananhearrát geaid son lea vuolggahan ráŋggáštit bahádahkkiid , muhto rámidit sin geat dahket buori .
Dasgo dat lea Ipmila dáhttu ahte dii galgabehtet dahkat buori ja ná jávohuhttit jallas ja jierpmehis olbmuid njálmmi .
Lehket vuolibuččat nugo friddja olbmot , allet fal geavat friddjavuođa ággan dahkat bahá , muhto geavahehket dan nugo Ipmila bálvaleaddjit !
Atnet buohkaid árvvus , ráhkistehket oskuguimmiid , ballet Ipmilis , atnet keaisára árvvus !
Bálvaleaddjit , lehket isidiiddádet vuolibuččat ja atnet sin árvvus , allet duššefal daid geat leat buorit ja láđđásat , muhto daid ge geat leat gážžárat .
Lea didjiide árbmun ahte gierdabehtet sivakeahtes gillámušaid danne go din oamedovdu lea čadnojuvvon Ipmilii .
Lea go mihkkege rámiid ahte dii gierdabehtet ráŋggáštusa go lehpet dahkan veriid ?
Muhto jos dii gierdabehtet gillámušaid go lehpet dahkan dan mii lea riekta , de oažžubehtet Ipmila árpmu .
Dán várás dii rávkojuvvuidet , dasgo maiddái Kristus gillái din dihtii ja attii didjiide ovdamearkka vai dii čuvošeiddet su luottaid .
Son ii dahkan suttu , ii ge su njálmmis lean behtolašvuohta .
Ii son bealkán go bealkkahalai , ii ge áitán go gillái , muhto attii iežas su háldui guhte dubme vanhurskásit .
Son guttii ieš rupmašiinnis min suttuid ruossamurrii vai mii jámášeimmet eret suttus ja ealášeimmet vanhurskkisvuođa ovddas .
Su háviid dihtii dii lehpet dearvvašmahttojuvvon .
Dii leiddet nugo čádjidan sávzzat , muhto lehpet dál jorgalan sutnje gii lea din sieluid báimman ja geahčči .
Seammá láhkái lehket dii áhkát boatnjáideattet vuolibuččat vai maiddái dat olbmát geat eai jeagat sáni , vuitojuvvošedje sániid haga áhkáideaset eallinlági bokte , go sii oidnet mo dii eallibehtet buhtisvuođas ja ipmilbalolašvuođas .
Allet čiŋat olgguldasat , nugo vuoktabárgidemiin , gollečiŋaiguin dahje čáppa biktasiiguin .
Muhto lehkos din nohkameahttun čikŋa siskkáldas čiegus olmmoš geas lea vuollegis ja ráfálaš miella ; dát lea mávssolaš Ipmilii .
Dasgo nu čiŋahedje iežaset dovle bassi nissonat geat bidje doaivageaset Ipmilii .
Sii ledje boatnjáideaset vuolibuččat , nugo Sárá jeagadii Abrahama ja gohčodii su hearrán .
Dii lehpet dál šaddan su mánnán , jos dii dahkabehtet dan mii lea buorre , ehpet ge divtte geange baldit din .
Seammá láhkái galgabehtet dii boatnját eallit áhkáineattet nugo lehpet oahppan , go son lea rašit bealli , ja gudnejahttit su , dasgo son ge árbe árpmu ja eallima .
Dahket dán , amaset din rohkosat hehttejuvvot .
Loahpas : Lehket buohkat ovttamielalaččat , juogadehket ilu ja morraša , ráhkistehket oskuguimmiideattet , lehket váibmoláđđásat ja vuollegaččat .
Allet mávssat bahá baháin dahje bealkku bealkkuin , muhto baicca buressivdnádusain . Dasgo dii lehpet ieža rávkojuvvon árbet buressivdnádusa .
Guhte dáhttu ráhkistit eallima ja oaidnit buriid beivviid , doalahehkos njuokčamis eret bahás ja baksamiiddis eret behtolaš ságain , jorgalehkos eret bahás ja dahkos buori , ohcos ráfi ja doarrádallos dan !
Dasgo Hearrá čalmmit čuvvot vanhurskásiid , ja su bealjit gullet sin rohkosa .
Muhto Hearrá jorgala muođuidis sin vuostái geat dahket bahá .
Gii sáhttá vahágahttit din , jos dii áŋgiruššabehtet dan mii lea buorre ?
Muhto jos gillábehtet vanhurskkisvuođa dihtii , de lehpet ávdugasat .
Allet bala sis , allet ge suorgan , muhto basuhehket Kristusa Hearrán váimmuineattet ja lehket álo gárvásat vástidit juohkehažžii gii bivdá din čilget dan doaivaga mii dis lea .
Muhto vástidehket vuollegašvuođain ja ipmilbalolašvuođain ja buriin oamedovdduin , vai heahppašuvašedje sii geat sárdnot baháid din birra ja bilkidit din go dii eallibehtet rievttuid Kristusis .
Lea buoret dahkat buori ja gillát , jos nu leažžá Ipmila dáhttu , go gillát bahádaguid dihtii .
Dasgo Kristus ieš gillái oktii jápmima suttuid dihtii ; vanhurskkis gillái vanhurskkismeahttumiid ovddas vai son dolvvošii din Ipmila lusa .
Su rumaš goddojuvvui , muhto Vuoigŋa dagai su eallin .
Ja nu son manai ja sárdnidii vuoiŋŋaide mat ledje fáŋgavuođas .
Dat ledje eahpegulolaččat dolin Noa beivviid go Ipmil gierdavašvuođastis vurddii dan botta go árka huksejuvvui .
Dušše soapmásat , namalassii gávccis , bestojuvvojedje árkkas , go čáhci guttii dan .
Dát čáhci vástida gástta mii dál beastá din .
Dat ii buhtis rupmaša olgguldas duolvvas , muhto lea buori oamedovddu lihttu Ipmiliin .
Dii bestojuvvobehtet danne go Jesus Kristus lea bajásčuožžilan , son guhte lea mannan bajás albmái ja dál čohkká Ipmila olgeš gieđa bealde , maŋŋil go eŋgelat , válddit ja fámut leat biddjojuvvon su vuollái .
Go Kristus nappo lea gillán rumašlaččat , de vearjudehket iežadet seammá jurdagiin , ahte dat guhte gillá rumašlaččat lea beassan suttus ,
amas šat čuovvut oaččálaš anistumiid dan áiggi go eallá dáppe máilmmis , muhto čuovvu Ipmila dáhtu .
Lea didjiide doarvái go dii vássán áiggi lehpet eallán nugo báhkinat dáhttot , ja lehpet vádjolan nuoskivuođas , anistumiin , viidnejuhkamis , borešvuođas ja gárremiin ja heahpatlaš eahpeipmilbálvaleamis .
Dál sii imaštallet go dii ehpet šat bálkestahte iežadet dán gudnehis rávdnjái , ja sii bilkidit din .
Muhto sii fertejit dahkat logu sutnje guhte lea gárvvis dubmet elliid ja jábmiid .
Dasgo dan dihtii lea evangelium sárdniduvvon jábmiide ge , vai sii ealášedje Vuoiŋŋas , nugo Ipmil ge eallá , vaikko sii , go elle dán máilmmis , ožžo seammá duomu go buot olbmot .
Buot diŋggaid loahppa lea lahka .
Lehket dan dihtii jierpmálaččat ja čilgosat , vai sáhttibehtet rohkadallat .
Buot ovddimustá ráhkistehket njuorrasit guhtet guimmiideattet , dasgo ráhkisvuohta gokčá eatnat suttuid .
Lehket guosseláđđásat guhtet guimmiidasadet nimmorkeahttá .
Bálvalehket guhtet guimmiideattet , juohkehaš dainna árpmuattáldagain man lea ožžon , nugo buorit dállodoallit geat hálddašit Ipmila máŋggalágáš árpmu .
Dat guhte sárdnida , sárdnidehkos Ipmila sániiguin . Ja dat guhte bálvala , bálvalehkos dainna givrodagain man Ipmil addá , vai Ipmil gudnejahttojuvvošii juohke dáfus Jesus Kristusa bokte .
Sutnje gullá hearvásvuohta ja fápmu álo ja agálašvuhtii ! Amen .
Ráhkkásiiddán , allet imaštala dan geahččalusa dola man čađa dii fertebehtet mannat , dego didjiide dáhpáhuvašii mihkkege apmasiid .
Illudehket go dis lea oassi Kristusa gillámušain , vai ávvudivččiidet iluin go su hearvásvuohta almmustahttojuvvo .
Ávdugasat dii lehpet jos bilkiduvvobehtet Kristusa nama dihtii , dasgo din badjel lea hearvásvuođa Vuoigŋa , Ipmila Vuoigŋa .
Allos oktage dis gillájehko danne go son lea sorbmejeaddji , suola dahje vearredahkki , dahje danne go son bahkke eará olbmuid áššiide .
Muhto jos son gillá danne go lea kristtalaš , de allos heahpanaddo , muhto gudnejahttos Ipmila dainna namain .
Dasgo dál lea áigi boahtán go duopmu álggahuvvo , ja dat álggahuvvo Ipmila viesus .
Muhto jos dat álggahuvvo min luhtte , mo lea dalle sin loahppa geat eai jeagat Ipmila evangeliuma ?
Ja jos vanhurskkis olmmoš illá bestojuvvo , mo de geavvá ipmilmeahttumii ja suttolažžii ?
Dan dihtii galget sii geat gillájit Ipmila dáhtu mielde , addit sieluset oskkáldas sivdnideaddji háldui ja dahkat buori .
Mun rávven din vuorrasiid , mun gii ieš lean vuoras ja Kristusa gillámušaid duođašteaddji ja geas maiddái lea oassi dan hearvásvuođas mii almmustuvvá : Gehččet Ipmila ealu mii lea oskkilduvvon didjiide ! Áimmahuššet dan , allet bákkuin , muhto eaktodáhtolaččat , nugo Ipmil dáhttu . Allet daga dan bahá vuoittu dihtii , muhto buorredáhtolašvuođain .
Allet ráđđe hearrávuođain dan searvegotti mii lea oskkilduvvon didjiide , muhto lehket ealu ovdamearkan .
Ja go váldobáimman almmustuvvá , de oažžubehtet hearvásvuođa vuoitokruvnnu mii ii goassege golnna .
Seammá láhkái galgabehtet dii nuorat leat vuorrasiiddádet vuolibuččat .
Cogget vuollegašvuođa gárvvuid , bálvalettiin guhtet guimmiideattet . Dasgo Ipmil lea čeavlás olbmuid vuostái , muhto vuollegaččaide son addá árpmu .
Vuolidehket dasto iežadet Ipmila fámolaš gieđa vuollái , vai son bajidivččii din go áigi dievvá . Bálkestehket buot morrašiiddádet su ala , dasgo son atná dis fuola .
Lehket čilgosat ja gohcet !
Din vuostálasti , beargalat , johtá dego gillju ledjon ozadettiin muhtuma gean njielastit .
Vuostálastet su nana oskkus !
Dii han diehtibehtet ahte din oskuguoimmit dáppe dán máilmmis deaivvahallet seammá gillámušaide .
Oanehis áiggi dii fertebehtet gillát , muhto buot árpmu Ipmil , guhte Kristus Jesusis lea rávkan din agálaš hearvásvuohtasis , gárvvistehkos , nannejehkos , gievrudehkos ja nanosmahttos din .
Su lehkos fápmu agálašvuhtii .
Silvanusa vehkiin , gean mun anán luohtehahtti oskuvielljan , mun lean čállán dán oanehis girjji mas lean árvvosmahttán din ja duođaštan ahte dát lea Ipmila duohta árbmu . Bissot nannosit das !
Babylona searvegoddi , mii lea válljejuvvon nugo dii , cealká didjiide dearvvuođaid . Nu dahká bárdnán Markus ge .
Dearvvahallet guhtet guimmiideattet ráhkisvuođa cummáin !
Ráfi lehkos dinguin buohkaiguin geat gullabehtet Kristusii !
Dearvvuođat Simmon Biehtáris , Jesus Kristusa bálvaleaddjis ja apoastalis , sidjiide geat leat ožžon seammá mávssolaš oskku go mii , Ipmileamet ja beastámet Jesus Kristusa vanhurskkisvuođas .
Árbmu ja ráfi lehkos valljugasat dinguin go dovdabehtet Ipmila ja Hearrámet Jesusa !
Su ipmilvuođa fápmu lea addán midjiide buot mii doalvu eallimii ja ipmilbalolašvuhtii go mii dovdat su guhte rávkkai min hearvásvuođainis ja fámuinis .
Ná mii maiddái leat ožžon su divraseamos ja stuorimus lohpádusaid , vai dii oččošeiddet oasi ipmilvuođa lundui ja beasašeiddet dán máilmmi heavahusas mii boahtá anistumis .
Dán dihtii vigget áŋgirit čájehit oskkusteattet duođalašvuođa , duođalašvuođas rivttes dieđu dieđus mearálašvuođa , mearálašvuođas gierdavašvuođa , gierdavašvuođas ipmilbalolašvuođa , ipmilbalolašvuođas vieljalaš ráhkisvuođa , ja vieljalaš ráhkisvuođas ráhkisvuođa buohkaide .
Go dis buot dát leat valljugasat , de din diehtu Hearrámet Jesus Kristusa birra ii leat duššás , muhto šaddada šattuid .
Muhto juohkehaš geas dát váilu , lea nu lahkaoaidnit ahte ii oainne ja lea vajáldahttán ahte son lea buhtistuvvon ovddeš suttuinis .
Dan dihtii , oskuguoimmit , vigget velá áŋgireabbot nannet iežadet rávkojumi ja válljejumi !
Jos dahkabehtet dán , de ehpet goassege guossal . Dalle addojuvvo didjiide rabas ja friddja geaidnu Hearrámet ja beastámet Jesus Kristusa agálaš riikii .
Dan dihtii dáhtun álo muittuhit didjiide buot dáid , vaikko dii dovdabehtet daid ja lehpet nannejuvvon dan duohtavuođas mii lea addojuvvon didjiide .
Mu mielas lea riekta boktit din muittuhusaidanguin , nu guhká go mun orun dán rupmaša goađis .
Mun han dieđán ahte mun fargga guođán goahtán , nugo Hearrámet Jesus Kristus lea dieđihan munnje .
Muhto mun vikkan bargat nu ahte dii álo muittášeiddet dan maid mun lean cealkán , maŋŋil ge go mun lean vuolgán .
Dasgo eai mis lean hutkojuvvon cukcasat mielas go dieđiheimmet didjiide Hearrámet Jesus Kristusa fámu ja boahtima . Muhto mii leimmet čalmmálaš duođašteaddjit ja oinniimet su ipmilvuođa fámu . Dasgo son oaččui gudni ja hearvásvuođa Ipmil Áhčis dalle go sutnje bođii jietna alimus hearvásvuođas : « Dát lea mu Bárdni gean mun ráhkistan ; son lea mu miela mielde . »
Mii gulaimet ieža dán jiena mii čuojai almmis , go mii leimmet suinna bassi váris .
Dan dihtii mii sáhttit vel nannoseabbot luohttit dan profehtasátnái , ja dii dahkabehtet bures go váldibehtet dan vuhtii .
Dasgo dat lea dego lámpá mii čuovgá sevdnjes báikkis , dassážii go beaivi čuvggoda ja guovssonásti badjána din váimmuide .
Muhto jurddašehket ovddimustá dan ahte ii oktage iešalddes máhte čilget profehtalaš einnostusaid mat čužžot čállagis .
Dasgo ii goassege leat oktage profehtalaš sátni buktojuvvon danne go olmmoš ieš dáhtui dan , muhto Bassi Vuoigŋa lea jođihan olbmuid sárdnut sániid mat bohte Ipmilis .
Muhto Israela álbmogis ledje maiddái vearri profehtat , nugo maiddái din gaskii bohtet vearri oahpaheaddjit geat suoli buktet duššadeaddji vearri oahpuid , ja velá biehttalit ge dan Hearrá gii lea oastán sin luovusin . Dainna lágiin sii fargga dolvot iežaset gáđohussii .
Olusat čuvvot sin nuoskkes eallima , ja duohtavuođa geaidnu bilkiduvvo sin dihtii .
Sii leat ruhtaváibmilat ja muitalit giellásiid vai sii din geažil dinešedje ruđaid . Muhto sin badjelis lea juo guhká leamaš duopmu , ja gáđohus vuordá sin .
Dasgo Ipmil ii seastán daid eŋgeliid guđet suddudedje , muhto bálkestii sin čiekŋalassii , gos sii leat čadnojuvvon seavdnjadasa láhkkiiguin duomu rádjái .
Ii son seastán ovddeš máilmmi ge , muhto várjalii dušše Noa , vanhurskkisvuođa sárdnideaddji , ja čieža eará go buvttii stuora dulvvi ipmilmeahttumiid máilbmái .
Sodoma ja Gomorra gávpogiid son dubmii gáđohussii ja bolddii daid gutnan váruhussan ipmilmeahttumiidda das mii vuordá sin .
Muhto son gájui vanhurskkis Lota , gean lágahis olbmuid nuoskkes eallin váivvidii . Dasgo beaivvis beaivái dát vanhurskkis siellu giksašuvai go son šattai orrut sin gaskkas , ja oinnii ja gulai sin lágahis daguid .
Hearrá nappo diehtá mo gádjut ipmilbalolaččaid geahččalusas , muhto ipmilmeahttumiid fas doallat fáŋgavuođas gitta duopmobeaivvi ráŋggáštusa rádjái , ja erenoamážit sin geat vádjolit oačči nuoskkes anistumi mielde ja badjelgehččet Hearrá ráđđenválddi .
Dát olbmot leat vuovdnájat ja iešráđálaččat , eai ge bala bilkideames vuoiŋŋafámuid .
Muhto dát olbmot guđet bilkidit dan maid eai dovdda , leat dego jierpmehis spiret , maid luondu lea mearridan bivdojuvvot ja goddojuvvot . Sii duššet ge nugo spiret ja ožžot vearrivuođa bálkká vearrivuođaset dihtii .
Sii liikojit jugástallat beaiveguovdil . Sii leat heahpadin ja boalgan didjiide go sii boradit dinguin behtolaš vuovdáivuođain .
Sii leat álo geahččamin nissoniidda himu čalmmiiguin eai ge goassege gallán suddudeames .
Sii fillejit olbmuid geat eai velá leat nannosat ja máhttet duođaid háhkat alcceseaset buot dan maid váibmu hálida .
Dasgo sii leat guođđán njulges geainnu , ja leat čádjádallan go sii čuvvot seammá luotta go Bileam , Bosora bárdni , gii anii fuola dušše dan bálkkás man oažžu vearrivuođain .
Muhto son cuiggoduvvui rihkkumis dihtii ; gielahis ásen sártnui olbmo jienain ja eastadii profehta dahkamis jallavuođaid .
Dát olbmát leat dego čázehis ádjagat ja dego balvvat maid riđđubiegga dolvvoda , ja čáhppadeamos seavdnjadas vuordá sin .
Dasgo sii sárdnot čeavlás ja guoros sániid , ja oaččálaš himuiguin ja nuoskivuođain sii fillejit earáid geat aiddo leat beassan eret dakkáriin geat ellet čádjádusain .
Sii lohpidit sidjiide friddjavuođa , muhto ieža sii leat heavahusa šlávat . Dasgo olmmoš lea su šlávva gii lea vuoitán su .
Jos sii leat beassan dán máilmmi nuoskivuođas go leat oahppan dovdat Hearrámet ja beastámet Jesus Kristusa , muhto dasto fas sorrojit dasa ja vuoittahallet , de sin maŋit dilli lea vearrát go sin ovddit dilli .
Sidjiide livččii buoret jos eai livčče oppa dovdagoahtán ge vanhurskkisvuođa geainnu , go ahte sii vuos ohppet dovdat dan ja de jorgalit eret bassi báhkkomis mii addojuvvui sidjiide .
Dalle lea sidjiide geavvan nugo sátnevádjasiin daddjo : Beana máhccá vuovssanassasis , ja : Bassojuvvon spiidni fierada rábáhis .
Ráhkkásiiddán , dát lea dál nubbi girji man mun čálán didjiide . Dáiguin girjjiiguin mun hálidan boktit din vuoigatlaš miela go muittuhan didjiide dan maid bassi profehtat ovdal leat cealkán , ja Hearrámet ja Beastámet báhkkoma man dii lehpet ožžon bassi apoastaliinnádet .
Ovddimustá galgabehtet diehtit ahte maŋimuš beivviid bohtet bilkideaddjit geat ellet anistumiideaset mielde ja dadjet : « Lea go son mahkáš máhccan , nugo lohpidii ?
Dasgo min máddarat leat jápmán , ja buot han lea nugo lea leamaš sivdnideami rájes . »
Muhto sii geat čuoččuhit diekkáriid , vajáldahttet ahte dovle ledje almmit ja eanan maid Ipmila sátni sivdnidii čázis ja čáziin .
Ja čáziin duššaduvvui ge vuosttaš máilbmi dalle go dulvi bođii .
Muhto Ipmil lea seammá sániin vurken dáláš almmiid ja eatnama duopmobeaivvi dola várás , go ipmilmeahttumat duššaduvvojit .
Ráhkkásiiddán , allet vajáldahte ahte Hearrái lea okta beaivi dego duhát jagi ja duhát jagi dego okta beaivi .
Ii leat nu mo muhtumat oaivvildit ahte Hearrá lea njoahci ollašuhttit lohpádusas , muhto son lea baicca gierdavaš dinguin , dasgo son ii dáhto ovttage mannat gáđohussii , muhto buohkaid dahkat jorgalusa .
Hearrá beaivi boahtá dego suola .
Dalle almmit duššet stuora šlámain , almmigáhppálagat bullet ja šolget , ja eanan ja buot maid olbmot leat dahkan das , boldojuvvo .
Go buot dál duššá , man bassi ja ipmilbalolaš berrešii ge dalle din eallin leat , go dii vuordibehtet ja hoahpuhehpet Ipmila beaivvi boahtima . Dalle almmit cahkkehuvvojit ja almmigáhppálagat bullet ja šolget .
Muhto su lohpádusa mielde mii vuordit ođđa almmiid ja ođđa eatnama gos vanhurskkisvuohta orru .
Dan dihtii go dii , ráhkkásiiddán , vuordibehtet dán , de vigget eallit nu ahte Hearrá gávnnašii din buhtisin ja láitemeahttumin ja dis livččii ráfi .
Ja atnet dan din bestojupmin go Hearrá gierdavašvuođastis ádjána boahtimis , nugo min ráhkis oskuviellja Bávlos ge lea čállán didjiide , dan viisodaga mielde mii addojuvvui sutnje .
Dán birra son sárdnu maiddái buot girjjiinis main son guorahallá dáid gažaldagaid .
Dain leat muhtun áššit mat leat lossadat áddet , ja diehtemeahttun ja nanusmeahttun olbmot botnjet daid , ja nu sii dahket eará čállosiiguin ge , ja dat šaddá sidjiide heavvun .
Ráhkkásiiddán , go dii dál diehtibehtet dán ovddalgihtii , de váruhehket amaset ipmilmeahttun olbmuid nuoskivuođat čádjidahttit din , nu ahte jorralehpet eret din nana dilis .
Muhto ovdánehket Hearrámet Jesus Kristusa árpmus ja dieđus .
Sutnje lehkos gudni , dál ja agálašvuhtii ! Amen .
Mii duođaštit dan mii lea leamaš álggu rájes , dan man mii leat gullan , dan man mii leat oaidnán čalmmiideametguin , dan man mii leat geahčadan ja man min gieđat leat guoskkahan : eallima sáni .
Ja eallin almmustuvai ; mii leat oaidnán dan ja duođaštit dan ja sárdnidit didjiide agálaš eallima , mii lei Áhči luhtte ja almmustuvai midjiide .
Mii sárdnidit didjiide maiddái dan man mii leat oaidnán ja gullan , vai dis ge livččii searvevuohta minguin , geain maiddái lea searvevuohta Áhčiin ja su Bártniin Jesus Kristusiin .
Ja mii čállit dán vai min illu livččii ollis .
Dát lea dat sáhka man mii leat gullan sus ja sárdnidit didjiide : Ipmil lea čuovggas , ii ge su siste leat mihkkege seavdnjadasaid .
Jos mii dadjat ahte mis lea searvevuohta suinna , muhto vádjolit seavdnjadasas , de mii gielistit eat ge čuovo duohtavuođa .
Muhto jos mii vádjolit čuovgasis , nugo son ieš ge lea čuovgasis , de mis lea searvevuohta guhtet guimmiideametguin , ja su Bártni Jesusa varra buhtista min buot suttus .
Jos mii dadjat ahte mis ii leat suddu , de beahttit iežamet , ii ge duohtavuohta leat min siste .
Jos mii dovddastit suddomet , de son lea oskkáldas ja vanhurskkis , ja addá midjiide min suttuid ándagassii ja buhtista min buot vearrivuođas .
Jos mii dadjat ahte eat leat suddudan , de mii dahkat su gielisteaddjin ii ge su sátni leat min siste .
Mánážiiddán , dán mun čálán didjiide amadet suddudit .
Muhto jos muhtun sudduda , de mis lea Áhči luhtte bealušteaddji , Jesus Kristus , guhte lea vanhurskkis .
Son lea min suttuid soabahus , ii ge dušše min , muhto oppa máilmmi .
Das mii diehtit ahte mii dovdat su , go mii doallat su báhkkomiid .
Dat guhte dadjá ahte son dovdá su ii ge dattege doala su báhkkomiid , son gielista , ii ge duohtavuohta leat su siste .
Muhto Ipmila ráhkisvuohta lea ollašuvvan su siste guhte doahttala su sáni .
Dás mii diehtit ahte mii leat su siste .
Dat guhte dadjá ahte son bissu su siste , lea ieš geatnegas eallit nu mo son elii .
Ráhkkásiiddán , dat báhkkon man mun čálán didjiide , ii leat ođas , muhto boares báhkkon mii dis lea leamaš juo álggu rájes .
Dát boares báhkkon lea dat sátni man dii lehpet gullan .
Dattege lea ođđa báhkkon man mun čálán didjiide , go dat lea ollašuvvan su siste ja din siste . Dasgo seavdnjadas gáidá eret , ja duohta čuovggas báitá juo .
Dat guhte dadjá ahte son lea čuovgasis , muhto vašuha oskuguoimmis , son lea ain seavdnjadasas .
Dat guhte ráhkista oskuguoimmis , bissu čuovgasis ii ge vearránahte geange .
Muhto dat guhte vašuha oskuguoimmis , lea seavdnjadasas ja vádjola seavdnjadasas . Ii son oainne gosa manná , dasgo seavdnjadas lea čalmmehuhttán su .
Mánát , mun čálán didjiide , dasgo din suttut leat ándagassii addojuvvon su nama dihtii .
Áhčit , mun čálán didjiide , dasgo dii dovdabehtet su gii lea leamaš álggu rájes .
Nuorat , mun čálán didjiide , dasgo dii lehpet vuoitán bahákasa .
Mánážat , mun lean čállán didjiide , dasgo dii dovdabehtet Áhči .
Áhčit , mun lean čállán didjiide , dasgo dii dovdabehtet su gii lea álggu rájes .
Nuorat , mun lean čállán didjiide , dasgo dii lehpet gievrrat , Ipmila sátni bissu din siste , ja dii lehpet vuoitán bahákasa .
Allet ráhkis máilmmi , allet ge dan mii lea máilmmis !
Jos guhtege ráhkista máilmmi , de Áhči ráhkisvuohta ii leat su siste .
Dasgo buot mii lea dán máilmmis , oaččálaš anistupmi ja čalmmiid anistupmi ja goargadis eallin , ii boađe Áhčis , muhto máilmmis .
Ja máilbmi duššá buot himuidisguin , muhto dat guhte dahká Ipmila dáhtu , bissu agálašvuhtii .
Mánážat , dál lea maŋimuš diibmu .
Dii lehpet gullan ahte Antikristus boahtá , ja ollu antikristusat leat juo boahtán .
Dan dihtii mii diehtit ahte lea maŋimuš diibmu .
Sii leat vuolgán min luhtte , muhto sii eai gula min searvái .
Jos sii gulašedje min searvái , de livčče bisson min luhtte . Dan láhkái galggai čielgat ahte eai buohkat sis gula min searvái .
Muhto dii lehpet ožžon vuoiddadusa sus guhte lea bassi , ja dan dii buohkat diehtibehtet .
In mun čále didjiide danne go dii ehpet dovddaše duohtavuođa , muhto danne go dovdabehtet dan ja diehtibehtet ahte duohtavuođas ii boađe mihkkege giellásiid .
Gii livččii gielisteaddji earet su guhte biehttala ahte Jesus lea Kristus ?
Son lea Antikristus , son guhte biehttala Áhči ja Bártni .
Juohkehaččas guhte biehttala Bártni , ii leat Áhčči ge , muhto guhte dovddasta Bártni , sus lea maiddái Áhčči .
Diktet dan maid lehpet gullan álggu rájes , bissut din siste .
Jos dat maid dii lehpet gullan álggu rájes , bissu din siste , de dii ge bissubehtet Áhčis ja Bártnis .
Ja dát lea dat lohpádus man son lea addán midjiide : agálaš eallin .
Dán mun lean čállán sin birra geat čádjidahttet din .
Muhto din siste bissu dat vuoiddadus man dii lehpet ožžon sus , ehpet ge dárbbaš geange oahpahit din .
Dasgo dat vuoiddadus oahpaha didjiide buot ja sárdnu duođa ja lea giellása haga .
Bissot dasto su siste , nu mo su vuoiddadus lea oahpahan didjiide .
Mánát , bissot dál su siste vai mii livččiimet roahkkadat go son almmustuvvá , eat ge šattaše heahpadii go son boahtá .
Jos dii diehtibehtet ahte son lea vanhurskkis , de áddebehtet maiddái ahte juohkehaš guhte doahttala vanhurskkisvuođa , lea riegádan sus .
Gehččet man nana ráhkisvuođa Áhčči lea čájehan midjiide , ahte mii gohčoduvvot Ipmila mánnán , ja su mánát han mii leat ge .
Máilbmi ii dovdda min , danne go dat ii dovdda su .
Ráhkkásiiddán , dál mii leat Ipmila mánát , muhto ii leat velá almmustuvvan manin mii šaddat .
Mii diehtit ahte go son almmustuvvá , de mii šaddat su láhkásažžan , dasgo mii oažžut oaidnit su nugo son lea .
Juohkehaš gii bidjá dán doaivaga sutnje , buhtista iežas , nugo Kristus ge lea buhtis .
Juohkehaš guhte dahká suttu , rihkku lága , dasgo suddu lea láhkarihkGon Ja dii diehtibehtet ahte son almmustuvai váldit eret min suttuid , ii ge su siste leat suddu .
Ii oktage guhte bissu su siste , suddut .
Ii oktage guhte suddut , leat oaidnán su ii ge dovdan su .
Mánát , allet divtte geange čádjidahttit din !
Son guhte dahká dan mii lea riekta , lea vanhurskkis , nugo Kristus ge lea vanhurskkis .
Dat guhte dahká suttu , boahtá beargalagas , dasgo beargalat lea suddudan álggu rájes .
Danne Ipmila Bárdni almmustuvai vai son duššadivččii beargalaga daguid .
Ii oktage guhte lea riegádan Ipmilis , daga suttu , dasgo dat gilvva man Ipmil lea gilván su sisa , bissu su siste .
Son ii sáhte šat suddudit , dasgo son lea riegádan Ipmilis .
Dan láhkái čájehuvvo geat leat Ipmila mánát ja geat leat beargalaga mánát : Ii oktage guhte ii doahttal vanhurskkisvuođa ii ge ráhkis oskuguoimmis , boađe Ipmilis .
Dasgo dát lea dat sáhka man dii lehpet gullan álggu rájes , ahte mii galgat ráhkistit guhtet guimmiideamet .
Mii eat galgga leat Kain láhkásaččat , guhte bođii bahákasas ja sorbmii vieljas .
Ja manne son sorbmii vieljas ?
Danne go su iežas dagut ledje bahát , muhto su vielja dagut ledje vuoigatlaččat .
Oskuguoimmit , allet ovddoš jos máilbmi vašuha din .
Mii han diehtit ahte mii leat mannan jápmimis eallimii , dasgo mii ráhkistit oskuguimmiid .
Dat guhte ii ráhkis , bissu jápmimis .
Juohkehaš guhte vašuha oskuguoimmis , lea olmmošgoddi , ja dii diehtibehtet ahte ii ovttage olmmošgoddis leat agálaš eallin iežas siste .
Das mii leat oahppan mii lea ráhkisvuohta , go Jesus attii heakkas min ovddas .
De mii ge leat geatnegasat addit heaggamet oskuguimmiid ovddas .
Jos geasge lea buot maid son dárbbaša dán máilmmis , ja oaidná oskuguoimmi gillámin , muhto dahppá váimmus sutnje , mo Ipmila ráhkisvuohta sáhttá bissut su siste ?
Mánát , allot ráhkis dušše sániiguin dahje njuokčamiin , muhto daguiguin ja duohtavuođas .
Das mii diehtit ahte mii leat duohtavuođas , ja mii sáhttit oadjudit váimmuideamet su muođuid ovddas . Jos velá váibmu dubme min , de Ipmil lea stuorit go min váibmu ja diehtá buot .
Ráhkkásiiddán , jos min váibmu ii dubme min , de mis lea roahkkatvuohta Ipmila ovddas .
Ja maid ihkinassii mii bivddežit , mii oažžut sus , danne go mii doallat su báhkkomiid ja dahkat dan mii lea su miela mielde .
Ja dát lea su báhkkon , ahte mii galgat oskut su Bártni Jesus Kristusa nammii ja ráhkistit guhtet guimmiideamet , nugo son gohčui min .
Dat guhte doallá su báhkkomiid , bissu Ipmilis , ja Ipmil bissu su siste .
Ja dan ahte son bissu min siste , mii diehtit Vuoiŋŋas gean son lea addán midjiide .
Ráhkkásiiddán , allet oskko juohke vuigŋii , muhto guorahallet vuoiŋŋaid , bohtet go dat Ipmilis ! Dasgo máilbmái leat mannan ollu vearri profehtat .
Das dii sáhttibehtet dovdat Ipmila Vuoiŋŋa : Juohke vuoigŋa mii dovddasta ahte Jesus Kristus lea boahtán olmmožin , boahtá Ipmilis . Muhto ii oktage vuoigŋa mii ii dovddas Jesusa , boađe Ipmilis .
Dat lea Antikristusa vuoigŋa , man dii lehpet gullan ahte boahtá . Ja dat lea dál juo máilmmis .
Muhto dii , mánážat , boahtibehtet Ipmilis ja lehpet vuoitán vearri profehtaid . Dasgo son guhte lea din siste , lea stuorit go son guhte lea máilmmis .
Sii bohtet máilmmis , danne sii sárdnot nugo máilbmi , ja máilbmi guldala sin .
Muhto mii boahtit Ipmilis , ja dat guhte dovdá Ipmila , guldala min ; dat guhte ii boađe Ipmilis , ii guldal min .
Dás mii dovdat duohtavuođa vuoiŋŋa ja čádjádusa vuoiŋŋa .
Ráhkkásiiddán , ráhkistehkot guhtet guimmiideamet ! Dasgo ráhkisvuohta boahtá Ipmilis , ja juohkehaš guhte ráhkista , lea riegádan Ipmilis ja dovdá Ipmila .
Dat guhte ii ráhkis , ii dovdda Ipmila , dasgo Ipmil lea ráhkisvuohta .
Nu lea Ipmila ráhkisvuohta almmustuvvan min gaskii ahte son vuolggahii áidnoriegádan Bártnis máilbmái vai mii ealášeimmet su bokte .
Ráhkisvuohta ii leat dat ahte mii leat ráhkistan Ipmila , muhto ahte son lea ráhkistan min ja vuolggahan Bártnis min suttuid soabahussan .
Ráhkkásiiddán , jos Ipmil lea ráhkistan min nu , de mii ge leat geatnegasat ráhkistit guhtet guimmiideamet .
Ii oktage leat goassege oaidnán Ipmila , muhto jos mii ráhkistit guhtet guimmiideamet , de Ipmil bissu min siste , ja su ráhkisvuohta ollašuvvá min siste .
Dan ahte mii bissut su siste ja son bissu min siste , mii diehtit das go son lea addán midjiide Vuoiŋŋastis .
Mii leat oaidnán ja duođaštit ahte Áhčči lea vuolggahan Bártnis máilmmi beastin .
Ipmil bissu su siste guhte dovddasta ahte Jesus lea Ipmila Bárdni , ja son bissu Ipmilis .
Mii dovdat dan ráhkisvuođa man Ipmil lea addán midjiide , ja mii oskut dasa .
Ipmil lea ráhkisvuohta , ja dat guhte bissu ráhkisvuođas , bissu Ipmilis , ja Ipmil bissu su siste .
Nu lea ráhkisvuohta ollašuvvan min siste ahte mis lea roahkkatvuohta duopmobeaivvi , dasgo nugo son lea , nu leat maiddái mii ge dán máilmmis .
Ráhkisvuođas ii leat ballu , muhto ollislaš ráhkisvuohta jávkada balu .
Dasgo ballu buktá ráŋggáštusa , ja ráhkisvuohta ii leat ollašuvvan su siste guhte ballá .
Mii ráhkistit danne go son vuos ráhkistii min .
Jos guhtege dajaš ahte son ráhkista Ipmila , muhto dattege vašuha oskuguoimmis , de son lea gielis .
Dasgo son guhte ii ráhkis oskuguoimmis gean lea oaidnán , ii sáhte ráhkistit Ipmila gean ii leat oaidnán .
Ja dán báhkkoma mii leat ožžon sus : Dat guhte ráhkista Ipmila , galgá maiddái ráhkistit oskuguoimmis .
Juohkehaš guhte osku ahte Jesus lea Kristus , lea riegádan Ipmilis . Ja juohkehaš guhte ráhkista Áhči , ráhkista maiddái su gii sus lea riegádan .
Das mii diehtit ahte mii ráhkistit Ipmila mánáid , go mii ráhkistit Ipmila ja doallat su báhkkomiid .
Dasgo dát lea ráhkisvuohta Ipmilii , ahte mii doallat su báhkkomiid .
Eai ge su báhkkomat leat lossadat . Buot mii lea riegádan Ipmilis , vuoitá máilmmi . Ja dat mii lea vuoitán máilmmi , lea min osku .
Gii eará vuoitá máilmmi go dat guhte osku ahte Jesus lea Ipmila Bárdni ?
Son , Jesus Kristus , lea dat guhte bođii čázi ja vara bokte , ii dušše čázi , muhto čázi ja vara bokte .
Ja Vuoigŋa ieš lea duođašteaddji , dasgo Vuoigŋa lea duohtavuohta .
Leat golbma duođašteaddji : Vuoigŋa , čáhci ja varra , ja dát golmmas duođaštit ovtta jitnii .
Mii han dohkkehit olbmuid duođaštusa , ja Ipmila duođaštus lea nannoset . Dasgo dat lea Ipmila duođaštus Bártnis birra .
Guhte osku Ipmila Bárdnái , sus lea alddis duođaštus .
Muhto dat guhte ii oskko Ipmilii , lea dahkan su gielisin go ii leat oskon Ipmila iežas duođaštussii Bártnis birra .
Ja dát lea duođaštus , ahte Ipmil lea addán midjiide agálaš eallima , ja dát eallin lea su Bártnis .
Sus geas lea Bárdni , lea eallin , muhto sus geas ii leat Ipmila Bárdni , ii leat eallin .
Dán mun lean čállán didjiide geat oskubehtet Ipmila Bártni nammii vai dii dieđášeiddet ahte dis lea agálaš eallin .
Ja mis lea dat roahkkadis luohttámuš sutnje ahte son gullá min jos mii átnut sus juoidá mii lea su dáhtu mielde .
Ja go mii diehtit ahte son gullá min maid ihkinassii mii ánožit sus , de mii maiddái diehtit ahte mii leat juo ožžon dan man mii leat bivdán sus .
Jos muhtun oaidná oskuguoimmis dahkamin suttu mii ii doalvvo jápmimii , de rohkadallos su ovddas , ja nu son oažžu eallit . Dát guoská sidjiide geaid suttut eai doalvvo jápmimii .
Leat maiddái suttut mat dolvot jápmimii , muhto dakkár suttuid dihtii in gohčo din rohkadallat .
Buot vearrivuohta lea suddu , muhto leat dakkár suttut ge mat eai doalvvo jápmimii .
Mii diehtit ahte ii oktage guhte lea riegádan Ipmilis , suddut .
Bárdni guhte lea riegádan Ipmilis , várjala su , nu ahte bahákas ii guoskkat su .
Mii diehtit ahte mii boahtit Ipmilis , ja ahte olles máilbmi orru bahávuođas .
Mii diehtit maiddái ahte Ipmila Bárdni lea boahtán , ja ahte son lea addán midjiide jierpmi vai mii dovdat su guhte lea duohta . Ja mii leat su siste guhte lea duohta , go mii leat su Bártnis , Jesus Kristusis .
Son lea duohta Ipmil ja agálaš eallin .
Mánát , váruhehket eahpeipmiliin !
Dearvvuođat vuorrasis válljejuvvon áhkkái ja su mánáide geaid mun ráhkistan duohta ráhkisvuođain , in ge duššefal mun , muhto buohkat geat leat dovddiidan duohtavuođa .
Mii ráhkistit sin duohtavuođa dihtii mii bissu min siste ja lea minguin agálašvuhtii .
Árbmu , váibmoláđisvuohta ja ráfi Ipmil Áhčis ja Jesus Kristusis , Áhči Bártnis , lehkos minguin duohtavuođas ja ráhkisvuođas .
Mun illudin sakka go oidnen ahte muhtumat du mánáin vádjolit duohtavuođas dan báhkkoma mielde man mii leat ožžon Áhčis .
Ja dál mun bivddán du , áhkká , in ge dego čálášin ođđa báhkkoma , muhto dan mii mis lea leamaš álggu rájes , ahte mii galgat ráhkistit guhtet guimmiideamet .
Ja ráhkisvuohta lea dát , ahte mii vádjolit su báhkkomiid mielde .
Dán báhkkoma dii lehpet gullan álggu rájes : Dii galgabehtet vádjolit ráhkisvuođas .
Dasgo máilmmis leat dál jođus eatnat fillejeaddjit , dakkárat geat eai dovddas ahte Jesus Kristus lea boahtán olmmožin .
Dat lea fillejeaddji ja Antikristus !
Váruhehket , amadet massit dan maid lehpet vuoitán barggodet bokte , muhto vai oažžubehtet olles bálkká .
Ii ovttasge guhte gáidá eret Kristusa oahpus , ii ge biso das , leat Ipmil .
Muhto guhte bissu su oahpus , sus lea sihke Áhčči ja Bárdni .
Jos muhtun boahtá din lusa ii ge buvtte mielddis dán oahpu , de allet vuostáiváldde su ruovttuineattet , allet ge sáva sutnje buresboahtima .
Dasgo dat guhte sávvá sutnje buresboahtima , šaddá bahá daguide servvolažžan .
Vaikko mus livččii vel ollu čállit didjiide , de in hálit dahkat dan báhpáriin ja bleahkain .
Muhto mun doaivvun beassat boahtit ja háleštit dinguin muođus muhtui , vai min illu šattašii ollisin .
Du válljejuvvon oappá mánát celket dutnje dearvvuođaid .
Dearvvuođat vuorrasis ráhkis Gaiusii gean mun ráhkistan duohta ráhkisvuođain .
Ráhkkásan , mun sávan ahte don juohke dáfus ealášit bures ja livččet dearvvaš , nugo maiddái du siellu lea .
Mun illudin sakka go oskuvieljat bohte ja duođaštedje man oskkáldas don leat duohtavuhtii , ahte don vádjolat duohtavuođas .
Ii mihkkege illudahte mu eanet go gullat ahte mu mánát vádjolit duohtavuođas .
Ráhkkásan , don leat oskkáldas buot das maid don dagat oskuvieljaide , vaikko sii velá leat vierrásat .
Searvegotti ovddas sii leat duođaštan du ráhkisvuođa birra .
Lea buorre jos don veahkehivččet sin joatkit mátkki , nugo Ipmil dáhttu .
Sii han leat vuolgán Nama dihtii , eai ge sii leat váldán vuostái veahki báhkiniin .
Danne mii leat geatnegasat veahkehit sin , vai mii beassat leat duohtavuođa bargoguoimmit .
Mun lean čállán muhtun sániid searvegoddái .
Muhto Diotrefes gii áinnas háliidivččii leat ovddimus sin searvvis , ii dohkket min .
Dan dihtii , go mun boađán , de mun áiggun muittuhit sutnje su daguid , mo son gilvá bahás ságaid min birra .
Ii ge das galle . Ieš son ii dohkket oskuvieljaid , ja go earát dáhttot dahkat dan , de son hehtte sin ja ádjá sin olggos velá searvegottis .
Ráhkkásan , ale ane bahá ovdagovvan , muhto buori !
Dat guhte dahká buori , boahtá Ipmilis .
Dat guhte dahká bahá , ii leat oaidnán Ipmila .
Demetrios oažžu buori duođaštusa buohkain , maiddái duohtavuođas alddis .
Mii ge duođaštit , ja don dieđát ahte min duođaštus lea duohta .
Vaikko mus livččii vel ollu čállit dutnje , de in hálit čállit bleahkain ja peannain .
Mun doaivvun oaidnit du fargga , vai moai besse sártnodit muođus muhtui .
Ráfi lehkos duinna !
Ustibat celket dearvvuođaid .
Cealkke dearvvuođaid ustibiidda , juohkehažžii sis .
Dearvvuođat Judasis , Jesus Kristusa bálvaleaddjis ja Jáhkoba vieljas , sidjiide geaid Ipmil Áhčči lea rávkan , geaid son ráhkista ja várjala Jesus Kristusa várás .
Váibmoláđisvuohta , ráfi ja ráhkisvuohta šaddoset valljugasat din oassái !
Ráhkkásiiddán , go mun áŋgirvuođain čálán didjiide min oktasaš bestojumi birra , de mun anán dárbbašlažžan rávvet din soahtat dan oskku ovddas mii oktii lea addojuvvon bassi olbmuide .
Dasgo din gaskii leat njáhkan muhtun olbmot guđet áigá juo leat mearriduvvon dupmui .
Sii leat ipmilmeahttumat ja botnjet min Ipmila árpmu vai besset eallit nuoskivuođas , ja sii biehttalit min áidna ráđđejeaddji ja Hearrá , Jesus Kristusa .
Mun dáhtun muittuhit didjiide , vaikko dii juo diehtibehtet buot dan , mo Hearrá besttii álbmoga eret Egyptas , muhto dasto duššadii sin geat eai oskon .
Ja daid eŋgeliid geat eai várjalan alla árvvuset , muhto guđđe orrunsajiset , daid son doallá čatnosis seavdnjadasas agálaš láhkkiiguin duomu stuora beaivvi rádjái .
Nu geavai maiddái Sodomain ja Gomorrain ja daid ránnjágávpogiiguin , gos olbmot jorgaledje nuoskivuhtii ja ohce sohkabealálaš bonjuvuođaid nugo dát eŋgelat .
Dál sii leat várrehusa ovdamearkan go sii ráŋggáštuvvojit agálaš dolain .
Nu gis dahket dát olbmot ge ; go sii rohttašuvvet de nuoskkidit rupmaša , badjelgehččet ipmilvuođa válddi ja bilkidit vuoiŋŋafámuid .
Ii váldoeŋgel Mikael ge duostan cealkit bilkádusduomu dalle go lei nákkáhallamin beargalagain Movssesa rupmaša alde , muhto son dušše celkkii : « Hearrá ráŋggáštehkos du ! »
Muhto dát olbmot gal bilkidit dan maid eai dovdda , ja dainna maid sii ipmirdit luonddu mielde , dego jierpmehis spiret , sii bilidit iežaset .
Vuoi sin !
Sii leat čuovvugoahtán Kaina luotta ja leat vuoittuset dihtii addán iežaset Bileama čádjádussii ja duššaduvvojit nugo Korah su gážžárvuođa dihtii .
Dát olbmot leat dego heahpatdielkkut go sii balakeahttá oassálastet din ráhkisvuođamállásiin ja fuolahit dušše iežaset .
Sii leat arvvehis balvvat maid biegga dolvvoda . Sii leat šattohis muorat čakčat , guovtti geardái jápmán ja gaikojuvvon ruohttasiiguin .
Sii leat máraideaddji meara bárut ja daid soktagierragat čájehit sin heahpada ; sii leat láhppon násttit , maid agálaš idjaseavdnjadas lea vuordimin .
Aiddo sin birra lei ge Henok , Áttáma maŋisboahtti čihččet buolvvas , einnosteamen go celkkii : « Geahča , Hearrá boahtá duháhiid bassi veagaiguin doallat duomu buohkaid badjel ja ráŋggáštit buot ipmilmeahttumiid sin gaskkas sin ipmilmeahttun daguid ovddas , ja buot garra sániid ovddas maid dát ipmilmeahttun suttolaččat leat sárdnon su vuostái . »
Sii nimmorit ja váidalit heajos oasiset , muhto ellet anistumiideaset mielde . Sii sárdnot čeavlás sániid ja ávkkiset dihtii guoktiluššet olbmuiguin .
Muhto dii , ráhkkásiiddán , muitet daid sániid maid min Hearrámet Jesus Kristusa apoastalat leat sárdnon .
Sii sárdno didjiide ahte maŋimuš áiggi bohtet bilkideaddjit geat vádjolit ipmilmeahttun anistumiideaset mielde .
Dát leat sii geat sirrejit olbmuid ; sii leat máilmmálaččat ja sis váilu Vuoigŋa .
Muhto dii , ráhkkásiiddán , huksejehket iežadet basimus oskkudet ala ja rohkadallet Bassi Vuoiŋŋas .
Bissot Ipmila ráhkisvuođas vuorddedettiin Hearrá Jesus Kristusa váibmoláđisvuođa mii addá didjiide agálaš eallima .
Lehket váibmoláđđásat sidjiide geat eahpidit ; bestet sin go rohttebehtet sin eret dolas .
Muhto lehket earáide váibmoláđđásat , dievva balus , nu ahte fasttášehpet velá gávttiid ge main leat oaččálašvuođa dielkkut .
Sutnje geas lea fápmu várjalit din jorraleamis eret ja bidjat din hearvásvuođas ovdii , láitemeahttumin ja dievva ávus , áidna Ipmilii , min beasti Jesus Kristusa , Hearrámet , bokte , sutnje gullá gudni ja allatvuohta , váldi ja fápmu , ovdal buot áiggiid , dál ja agálaš áigái ! Amen .
Dát lea Jesus Kristusa almmustus , man Ipmil attii sutnje vai son čájehivččii bálvaleddjiidasas dan mii fargga galgá dáhpáhuvvat .
Son vuolggahii eŋgelis dieđihit dan bálvaleaddjásis Johanassii , guhte dál duođašta Ipmila sáni ja Jesus Kristusa duođaštusa , buot dan maid son lea oaidnán .
Ávdugas son guhte lohká dáid einnostusa sániid jitnosit , ja ávdugasat sii guđet gullet daid ja vurkejit dan mii dasa lea čállojuvvon , dasgo áigi lea lahka .
Dearvvuođat Johanasas Asia eananguovllu čieža searvegoddái .
Árbmu lehkos dinguin ja ráfi sus guhte lea ja guhte lei ja guhte boahtá , ja čieža vuoiŋŋas guđet čužžot su truvnnu ovddas , ja Jesus Kristusis . Son lea luohtehahtti duođašteaddji , vuosttašriegádeaddji jábmiid gaskkas ja eatnama gonagasaid oaivámuš .
Son ráhkista min ja lea varainis čoavdán min buot suttuin ja lea dahkan min gonagaslaš álbmogin ja Ipmila , Áhčis , báhppan .
Sutnje gullá gudni ja fápmu álo ja agálašvuhtii . Amen .
Geahča , son boahtá balvvaiguin ! Juohke čalbmi oaidná su , maiddái dat mat leat rehtten su , ja buot eatnama čearddat luoibmagohtet su dihtii .
Nu šaddá , amen !
Mun lean Alfa ja Omega , álgu ja loahppa , cealká Hearrá Ipmil , Buotveagalaš , guhte lea ja guhte lei ja guhte boahtá .
Mun , vielljadet Johanas , gii Jesusis lean oasálaš seammá áŧestusaide , riikii ja gierdavašvuhtii go dii ge . Mun ledjen gártan Patmos-nammasaš sullui danne go ledjen sárdnidan Ipmila sáni ja duođaštan Jesusa birra .
Hearrá beaivvi bođii Vuoigŋa mu badjelii , ja mun gullen alla jiena iežan duohken , mii čuojai dego báson . Dat celkkii : « Čále girjái dan maid oainnát ja sádde girjji dán čieža searvegoddái : Efesosii , Smyrnai , Pergamonii , Tyatirai , Sardesii , Filadelfiai ja Laodikeai . »
Mun jorggihin geahččat gii munnje sárdnu .
Ja go jorggihin , de oidnen čieža gollelámppá , ja lámppáid gaskkas muhtuma gii lei olbmobártni láhkásaš , guhkes gákti badjelis ja ratti birra golleboagán .
Su oaivi ja vuovttat čeaskájedje dego vilges ullut , dego muohta , ja su čalmmit ledje dego njuoršu dolla ; su juolggit šearrájedje dego veaiki mii lea áhcagaston áššus , ja su jietna lei dego máraideaddji čázit .
Olgeš gieđas son doalai čieža nástti , ja su njálmmis geaigái bastilis , guovtteávjjot miehkki . Su ámadadju šearrái dego gaskabeaibeaivváš .
Go mun oidnen su , de gahččen su julggiid ovdii dego jábmi .
Muhto son bijai olgeš gieđas mu ala ja celkkii : Ale bala !
Mun lean vuosttamuš ja maŋimuš , dat guhte eallá .
Mun ledjen jápmán , muhto geahča , mun ealán álo ja agálašvuhtii ja mus leat jápmima ja jábmiidriikka čoavdagat .
Čále dan maid don oainnát , dan mii lea dál ja dan mii boahtá dás duohko .
Don oidnet čieža nástti mu olgeš gieđas ja čieža gollelámppá , ja dát lea daid čiegusvuohta : Čieža nástti leat čieža searvegotti eŋgelat , ja čieža lámppá leat dat čieža searvegotti .
Čále Efesosa searvegotti eŋgelii : Ná cealká son guhte doallá čieža nástti olgeš gieđastis , ja guhte váccaša čieža gollelámppá gaskkas : Mun dieđán du daguid , du rahčama ja du gierdavašvuođa .
Don it gierdda bahás olbmuid , don leat geahččalan sin geat gohčodit iežaset apoasttalin vaikko eai leat , ja don leat gávnnahan sin gielisteaddjin .
Don leat gierdavaš ; don leat gierdan ollu mu nama dihtii it ge leat váiban .
Muhto dan in dus dohkket ahte don leat luohpan vuosttaš áiggi ráhkisvuođat .
Muitte mas don leat jorralan , jorgal ja daga fas vuosttaš áiggi daguidat !
Muhto jos it jorgal , de mun boađán fargga du ala ja sirddán du lámppá eret sajistis .
Muhto dákko don ánssášat rámi , ahte don vašuhat nikolaoslaččaid daguid , maid mun ge vašuhan .
Geas ležžet bealjit , son gullos maid Vuoigŋa cealká searvegottiide !
Guhte vuoitá , su mun suovan borrat eallima muoras , mii lea Ipmila paradiásis .
Čále Smyrna searvegotti eŋgelii : Ná cealká vuosttamuš ja maŋimuš , son guhte lei jápmán , muhto eallái fas : Mun dieđán du áŧestusa ja váivvášvuođa , muhto don leat rikkis .
Ja mun dieđán mo sii hiddjidit du , sii geat gohčodit iežaset juvddálažžan , vaikko eai leat , muhto sii leat Sáhtána synagoga .
Ale bala das maid šattat gillát !
Beargalat bálkesta muhtumiid dis giddagassii , geahččaluvvot , ja logi beaivái dii gártabehtet áŧestusaide .
Leage oskkáldas gitta jápmima rádjái , de mun attán dutnje eallima kruvnnu .
Geas ležžet bealjit , son gullos maid Vuoigŋa cealká searvegottiide !
Nubbi jápmin ii eisege vahágahte su guhte vuoitá .
Čále Pergamona searvegotti eŋgelii : Ná cealká son geas lea bastilis guovtteávjjot miehkki : Mun dieđán gos don orut , doppe gos Sáhtána truvdnu lea .
Dattege don doalahat mu nama , it ge leat biehttalan oskumis munnje , it velá daid beivviid ge go Antipas , mu oskkáldas duođašteaddji , časkojuvvui jámas din luhtte , doppe gos Sáhtán orru .
Muhto dan in dus dohkket ahte du luhtte leat muhtumat geat dollet gitta Bileama oahpus , su gii oahpahii Balakii čádjidahttit israellaččaid , nu ahte sii borre eahpeipmiliidda oaffaruššon bierggu , ja furrošedje .
Du luhtte leat maiddái muhtumat geat dollet gitta nikolaoslaččaid oahpus .
Jorgal !
Muđuid boađán fargga du ala ja soađan sin vuostái njálbmán mihkiin .
Geas ležžet bealjit , son gullos maid Vuoigŋa cealká searvegottiide !
Sutnje guhte vuoitá , attán čiegus mánna borrat ja vilges geađggi , ja geađgái lea čállojuvvon ođđa namma man ii dovdda oktage eará go son gii oažžu dan .
Čále Tyatira searvegotti eŋgelii : Ná cealká Ipmila Bárdni , gean čalmmit leat dego njuoršu dolla ja juolggit dego áhcagasti veaiki : Mun dieđán du daguid , du ráhkisvuođa , du oskku , du bálvalusa ja du gierdavašvuođa . Du maŋimuš dagut leat eanebut go vuosttaš dagut !
Muhto dan in dus dohkket ahte don suovat nissona Jesabela joatkit daguidis , su gii gohčoda iežas profehtan , muhto gii oahpainis fille mu bálvaleddjiid furrošit ja borrat bierggu mii lea oaffaruššon eahpeipmiliidda .
Mun lean addán sutnje áiggi dahkat jorgalusa , muhto son ii dáhto jorgalit fuorrávuođastis .
Dál mun njeaiddán su seaŋgabuohccin , ja sii geat rihkkot náittosdili suinna , bohtet stuora áŧestussii jos eai jorgal eret su daguin .
Su mánáid mun sorbmen rohttudávddain .
Nu bohtet buot searvegottit diehtit ahte mun dat lean gii suokkardan manimuččaid ja váimmuid , ja mun mávssahan juohkehažžii su daguid mielde .
Muhto didjiide eará tyatiralaččaide geat ehpet čuovo dan oahpu ehpet ge leat dovdan dan maid muhtumat gohčodit Sáhtána čikŋodahkan , didjiide mun cealkkán : Mun in bija ođđa noađi din ala .
Dollet dattege gitta das mii dis lea , dassážii go mun boađán .
Sutnje guhte vuoitá ja váldá vuhtii mu daguid gitta loahpa rádjái , mun attán fámu ráđđet álbmogiid . Son guođoha sin ruovdesoppiin ja cuvke sin dego láirálihtiid .
Son oažžu seammá fámu go mun lean ožžon Áhčistan , ja mun attán sutnje guovssonástti .
Geas ležžet bealjit , son gullos maid Vuoigŋa cealká searvegottiide !
Čále Sardesa searvegotti eŋgelii : Ná cealká son geas leat Ipmila čieža vuoiŋŋa ja čieža nástti : Mun dieđán du daguid .
Don beakkát leat eallimin , muhto don leat jápmán .
Morit ja nanne dan mii velá lea báhcán ja dan mii lei juo jápmimin !
Dasgo mun lean gávnnahan ahte du dagut eai dohkke Ipmila čalmmiin .
Muitte maid don gullet ja vuostáiváldet ! Vurke dan ja jorgal !
Jos don it goze , de mun boađán dego suola , it ge don dieđe guđe diimmu mun boađán du ala .
Muhto dus leat Sardesis soapmásat geat eai leat duolvvidan biktasiiddiset , ja sii besset vádjolit muinna vilges biktasiin , dasgo sii leat dohkálaččat dasa .
Guhte vuoitá , gárvvohuvvo vilges biktasiidda , in ge mun goassege sihko su nama eallima girjjis , muhto dovddastan su nama Áhččán ja su eŋgeliid ovddas .
Geas ležžet bealjit , son gullos maid Vuoigŋa cealká searvegottiide !
Čále Filadelfia searvegotti eŋgelii : Ná cealká son guhte lea bassi ja duođalaš , geas lea Dávveda čoavdda , son guhte rahpá nu ahte ii oktage sáhte dahppat , ja dahppá nu ahte ii oktage sáhte rahpat : Mun dieđán du daguid , ja mun lean bidjan du ovdii rahppojuvvon uvssa , man ii oktage sáhte dahppat .
Mun dieđán ahte dus lea unnán fápmu ja leat dattege vurken mu sáni it ge leat biehttalan mu nama .
Muhto mun divttán muhtumiid boahtit Sáhtána synagogas , sin geat gielistit ja gohčodit iežaset juvddálažžan , vaikko eai leat .
Mun divttán sin boahtit ja luoitádit du julggiid ovdii vai sii ipmirdit ahte mun ráhkistan du
Danne go don leat vurken mu sáni gierdavašvuođa birra , áiggun mun gáhttet du ja beastit du geahččalusa bottus eret mii čuohcá oppa máilbmái , vai dat geahččala sin geat ásset eatnama alde .
Mun boađán fargga .
Doala gitta das mii dus lea , amas oktage váldit du vuoittu kruvnnu !
Su guhte vuoitá , mun dagan Ipmilan tempela čuoldan , ii ge son goassege gártta vuolgit doppe .
Sutnje mun čálán Ipmilan nama ja Ipmilan gávpoga nama , ođđa Jerusalema , mii njiedjá almmis Ipmilan luhtte , ja mun čálán maiddái iežan ođđa nama sutnje .
Geas ležžet bealjit , son gullos maid Vuoigŋa cealká searvegottiide !
Čále Laodikea searvegotti eŋgelii : Ná cealká son guhte lea Amen , luohtehahtti ja duođalaš duođašteaddji , Ipmila sivdnádusa álgu : Mun dieđán du daguid ; it don leat galmmas it ge liekkas .
Vare livččet jogo galmmas dahje liekkas !
Muhto don leat loikkas , it galmmas it ge liekkas . Danne mun vuovssán du njálmmistan .
Don rámohalat : « Mun lean rikkis , mus lea vallji ii ge mus váillo mihkkege . »
Muhto don it dieđe ahte aiddo don leat vártnuheapmi , váivván , geafi , čalmmeheapme ja álás .
Danne ávžžuhan du : Oastte mus dolas buhtistuvvon golli , vai don rikkošit ; ja oastte vilges biktasiid ja gárvot daiguin vai čiegašit álás heahpadat ; ja oastte vuoidasa čalmmiidasat , vai oainnášit .
Mun ráŋggun ja bagadan buohkaid geaid mun ráhkistan .
Leage áŋgir ja jorgal !
Mun čuoččun uvssa ovddas ja goalkkuhan .
Jos guhtege gullá mu jiena ja rahpá uvssa , de mun manan sisa su lusa ja boradan suinna , ja son borada muinna .
Su guhte vuoitá , mun divttán čohkkát muinna truvnnustan , nugo mun lean vuoitán ja čohkánan Áhčiinan su truvdnui .
Geas ležžet bealjit , son gullos maid Vuoigŋa cealká searvegottiide !
Dasto mun oidnen dán : Albmái lei rahppojuvvon uksa . Ja dat jietna man mun ovdal ledjen gullan sárdnumin munnje básonjietnan , celkkii : « Boađe deike bajás , de čájehan dutnje mii dás duohko dáhpáhuvvá . »
Dan seammás bođii Vuoigŋa mu badjelii ja mun oidnen truvnnu almmis ja muhtuma čohkkámin truvnnus .
Son gii lea čohkkámin das , šearrá dego jaspis- ja karneolgeađgi , ja truvnnu birra lea arvedávgi mii lea dego smarágda .
Truvnnu birra leat njealljegoalmmátlohkái eará truvnnu , ja dain čohkkájit njealljegoalmmátlohkái vuorrasa , geain ledje vilges biktasat badjelis ja gollekruvdnu oaivvis .
Truvnnus šleđgot álddagasat ja jullet bávkasat ja baján , ja truvnnu ovddas bullet čieža spáidara , mat leat Ipmila čieža vuoiŋŋa .
Truvnnu ovddas šealgá kristálla láhkásaš lásemearra .
Aiddo truvnnu ovddas ja truvnnu birra leat njeallje sivdnádusa , main leat dievva čalmmit ovddabealde ja maŋábealde .
Vuosttaš sivdnádus lea ledjona láhkái , nubbi lea vuovssá láhkái , goalmmádis lea dego olbmo ámadadju , ja njealját lea girdi goaskima láhkái .
Dan njealji sivdnádusas leat ieš guđesge guhtta soajá main leat dievva čalmmit goappašiid bealde .
Ijatbeaivvi dat čurvot bisánkeahttá : Bassi , bassi , bassi lea Hearrá Ipmil , Buotveagalaš , guhte lei ja guhte lea ja guhte boahtá .
Juohke háve go dat njeallje sivdnádusa máidnot , gudnejahttet ja giitet su gii čohkká truvnnus , su guhte eallá álo ja agálašvuhtii , de dat njealljegoalmmatlohkái vuorrasa luoitádit su ovdii guhte čohkká truvnnus , ja rohkadallet su guhte eallá agálaččat .
Sii bidjet kruvnnuideaset truvnnu ovdii ja čurvot : Hearrámet ja Ipmileamet , don leat dohkálaš vuostáiváldit buot máidnuma , gudni ja fámu .
Dasgo don leat sivdnidan buot ; du dáhtu mielde dat šadde ja sivdniduvvojedje .
De mun oidnen ahte sus gii čohkkái truvnnus , lei girjegearru olgeš gieđas . Dasa lei čállojuvvon siskkobeallái ja olggobeallái , ja dat lei giddejuvvon čiežain seaillain .
Ja mun oidnen fámolaš eŋgela gii čuorvvui alla jienain : « Gii lea dohkálaš rahpat girjegearu ja doadjit dan seaillaid ? »
Muhto ii lean almmis ii ge eatnama alde dahje eatnama vuolde oktage gii livččii sáhttán rahpat girjji dahje geahččat dan .
Dalle mun čirron bahččagit danne go ii oktage lean dohkálaš rahpat girjji dahje geahččat dan .
Muhto okta vuorrasiin celkkii munnje : « Ale čiero !
Dasgo Juda čeardda ledjon , Dávveda vesá , lea vuoitán vuoigatvuođa rahpat girjji ja doadjit dan čieža seailla . »
De mun oidnen lábbá čuožžumin aiddo truvnnu ja dan njealji sivdnádusa ovddas ja vuorrasiid gaskkas , ja dat lei dego njuvvojuvvon .
Das ledje čieža čoarvvi ja čieža čalmmi , ja čalmmit leat Ipmila čieža vuoiŋŋa mat leat vuolggahuvvon miehtá máilmmi .
Láppis bođii su lusa gii lea čohkkámin truvnnus , ja válddii vuostái girjji su olgeš gieđas .
Go dat válddii girjji , de dat njeallje sivdnádusa ja dat njealljegoalmmátlot vuorrasa luoitádedje Lábbá ovdii . Juohkehaččas lei hárpa ja gollelihtiid dievva oaffarsuovas , Ipmila olbmuid rohkosat .
Ja sii lávlo ođđa lávlaga : Don leat dohkálaš váldit girjji vuostái ja doadjit dan seaillaid . Dasgo don leat njuvvojuvvon ja leat varainat oastán friddjan Ipmilii olbmuid buot čearddain ja gielain , sogain ja álbmogiin .
Don leat dahkan sin gonagaslaš álbmogin ja Ipmileamet báhppan , ja sii leat gonagasat eatnama alde .
Oainnáhusastan mun gullen eatnat eŋgeliid jiena geat čužžo truvnnu ja dan njealji sivdnádusa ja vuorrasiid birra – sin lohku lei logiduháhat logiduháhiid mielde , duháhat duháhiid mielde . Dat čurvo alla jienain : Láppis mii lea njuvvojuvvon lea dohkálaš oažžut buot fámu ja riggodaga , viisodaga ja givrodaga , gudni ja hearvásvuođa ja máidnuma .
Ja mun gullen juohke sivdnádusa almmis cealkimin ja eatnama alde , eatnama vuolde ja meara alde , buot mii doppe leažžá : Sutnje guhte čohkká truvnnus , sutnje ja Lábbái , gullá buot máidnun ja gudni , hearvásvuohta ja fápmu álo ja agálašvuhtii .
Dat njeallje sivdnádusa vástidedje : Amen .
Ja vuorrasat luoitádedje ja rohkadalle .
De mun oidnen Lábbá rahpamin vuosttaža dan čieža seaillas , ja mun gullen ovtta dan njealji sivdnádusas čuorvumin bajánjienain : « Boađe ! »
Ja oainnáhusastan mun oidnen vilges heastta , ja dan riidejeaddjis lei dávgi . Sutnje addojuvvui vuoitokruvdnu , ja vuoitin son vulggii vai vuoittášii fas .
Go Láppis dojii nuppi seailla , de gullen nuppi sivdnádusa cealkimin : « Boađe ! »
Dalle bođii nubbi heasta mii lei buolli ruoksat . Dan riidejeaddjái addojuvvui fápmu váldit ráfi eret máilmmis vai olbmot sorbmešedje guhtet guimmiideaset , ja sutnje addojuvvui stuora miehkki .
Go Láppis dojii goalmmát seailla , de mun gullen goalmmát sivdnádusa cealkimin : « Boađe ! »
De oidnen čáhppes heastta , ja dan riidejeaddjis lei veakta gieđas .
Ja mun gullen jiena dego dan njealji sivdnádusa gaskkas cealkimin : « Čorpmadievva nisut ovtta denara ovddas ! Golbma čorpmadievva bivggit ovtta denara ovddas ! Muhto ale vahágahte oljju ja viinni ! »
Go Láppis dojii njealját seailla , de gullen njealját sivdnádusa jiena cealkimin : « Boađe ! »
De oidnen guvges heastta . Dan riidejeaddji namma lei Jápmin , ja jábmiidriika čuovui su .
Sidjiide addojuvvui fápmu ráđđet njealjádas eatnamis , fápmu goddit mihkiin , nelggiin , rohttodávddain ja eatnama spiriid vehkiin .
Go Láppis dojii viđat seailla , de mun oidnen áltára vuolde sin sieluid geat ledje sorbmejuvvon Ipmila sáni ja duođaštusaset dihtii .
Sii čurvo alla jienain : « Man guhká áiggut vuordit , bassi ja duođalaš ráđđejeaddji , ovdal go dubmet ja mávssahat min vara eatnama ássiide ? »
Juohkehažžii sis addojuvvui vilges bivttas , ja sii gohččojuvvojedje vuordit veaháš áiggi velá , dassážii go sin bálvalanguimmiid ja vieljaid lohku dievvá , sin geat galge goddojuvvot seammá láhkái go sii ieža .
De mun oidnen Lábbá doadjimin guđat seailla .
Dalle bođii hirbmat eatnandoarggástus . Beaivváš čáhpodii dego čáhppes morašbivttas , ja mánnu ruvssodii varraruoksadin .
Almmi násttit gahčče eatnamii dego láttakeahtes fiikkonat gahččet muoras garra bieggan .
Albmi jávkkai oidnosis dego girjegearru mii gissojuvvo , ja juohke várri ja juohke suolu sirdásii báikkistis . Eatnama gonagasat , alla hearrát , soahteoaivámuččat , riggát ja sii geain lea váldi , juohke šlávva ja juohke friddja olmmoš , čiehkádedje ráiggiide ja bákteskurččuide . Ja sii dadje váriide ja bávttiide : « Gahččet min badjelii ja čihket min su muođuid ovddas guhte čohkká truvnnus , ja Lábbá moaris . Dasgo sudno moari stuora beaivi lea boahtán , ja gii dalle sáhttá bissut ? »
Dasto mun oidnen njeallje eŋgela čuožžumin eatnama njealji čiegas ja doallamin eatnama njeallje biekka , amas biegga bossut eatnama dahje meara badjel dahje muoraid njeaiga .
Ja mun oidnen velá ovtta eŋgela badjáneamen iđitroađis ealli Ipmila seaillain . Son čuorvvui alla jienain dan njealji eŋgelii geaidda lei addojuvvon fápmu vahágahttit eatnama ja meara : « Allet vahágahte eatnama allet ge almmi allet ge muoraid ovdal go mii bidjat seailla min Ipmila bálvaleddjiid gállui . »
Ja mun gullen sin logu geat ledje seilejuvvon .
Dat ledje čuođinjealljeloginjealljeduhát buot Israela čearddain . Juda čearddas guoktenuppelotduháha ledje seilejuvvon , Rubena čearddas guoktenuppelotduháha , Gada čearddas guoktenuppelotduháha , Ašera čearddas guoktenuppelotduháha , Naftali čearddas guoktenuppelotduháha , Manasse čearddas guoktenuppelotduháha , Simmona čearddas guoktenuppelotduháha , Levi čearddas guoktenuppelotduháha , Jissakara čearddas guoktenuppelotduháha , Sebulona čearddas guoktenuppelotduháha , Jovsseha čearddas guoktenuppelotduháha , ja Benjamina čearddas guoktenuppelotduháha .
Oainnáhusastan mun oidnen joavkku mii lei nu stuoris ahte ii oktage sáhttán lohkat dan , buot álbmogiin ja čearddain ja buot sogain , ja sii sárdno buot máilmmi gielaid .
Sii čužžo truvnnu ja Lábbá ovddas , vilges biktasat badjelis ja pálbmaoavssit gieđas .
Ja sii čurvo alla jienain : Bestojupmi boahtá min Ipmilis gii čohkká truvnnus , ja Lábbás .
Buot eŋgelat čužžo truvnnu ja vuorrasiid ja dan njealji sivdnádusa birra , ja sii luoitádedje truvnnu ovdii gopmut ja gudnejahtte Ipmila cealkkedettiin : Amen !
Buot máidnun ja hearvásvuohta ja viisodat , giittus ja gudni , fápmu ja givrodat gullá Ipmilasamet álo ja agálašvuhtii . Amen !
De muhtun vuorrasiin jearai mus : « Geat leat dát vilgesbivttasolbmot , ja gos sii bohtet ? »
Mun vástidin : « Hearrá , don dieđát dan . »
Ja son celkkii munnje : « Dát leat sii geat leat beassan stuora áŧestusas , ja geat leat bassan biktasiiddiset ja vilggodahttán daid Lábbá varas .
Danne sii čužžot dál Ipmila truvnnu ovddas ja bálvalit su ijatbeaivvi su tempelis , ja son guhte čohkká truvnnus , cegge goađis sin badjelii .
Eai sii nealggo šat eai ge goikka , ii beaivváš ii ge goardi báhkka givssit sin .
Dasgo Láppis , guhte čuožžu truvnnu ovddas , lea sin báimman ja láide sin ealli čázi ádjagiidda , ja Ipmil sihkku eret juohke gatnjala sin čalmmiin . »
Go Láppis dojii čihččet seailla , de jaskkodii albmi birrasiid diibmobeallái .
De oidnen dan čieža eŋgela geat ledje čuožžumin Ipmila ovddas , ja sidjiide addojuvvojedje čieža básona .
Bođii vel okta eŋgel , gii čuoččastii áltára gurrii golle suovaslihtti gieđas .
Sutnje addojuvvojedje ollu suovvasat maid son galggai oaffaruššat golleáltárii truvnnu ovddas oktan buot bassi olbmuid rohkosiiguin .
Eŋgela gieđas badjánii Ipmila ovdii suovvasiid suovva oktan bassi olbmuid rohkosiiguin .
De eŋgel válddii suovaslihti , devddii dan áltára dolain ja bálkestii dola eatnamii .
Dalle baján čeargugođii , álddagasat šleađgugohte ja eanan doarggistišgođii .
Dat čieža eŋgela geain ledje čieža básona , ráhkkanedje čuojahit .
Vuosttaš eŋgel bosádii básona .
Dalle bohte čuorbmasat ja dolla , ja daid seahká varra , ja dat gahčče eatnamii . Goalmmádas eatnamis bulii , ja goalmmádas muorain bulle oktan buot ruonas suinniiguin .
Nubbi eŋgel bosádii básona .
Dalle ravggai merrii juoga mii lei dego stuora buolli várri . Goalmmádas mearas šattai varran , ja goalmmádas buot meara heakkalaččain jápme , ja goalmmádas skiippain dušše .
Goalmmát eŋgel bosádii básona .
Dalle gahčai almmis stuora násti , mii bulii dego spáiddar , ja dat devddii goalmmádasa jogain ja čáhceádjagiin .
Dán nástti namma lea rihča urttas , ja goalmmádas čázis rihčagii ; ja ollu olbmot jápme dan čázis , dasgo dat lei mirkohuvvan .
Njealját eŋgel bosádii básona .
Dalle deaivvahalai goalmmádas beaivvážis ja mánus ja násttiin , ja goalmmádas dain sevnnjodii , beaivi massii goalmmádasa čuovggastis ja seammá láhkái idja ge .
De oidnen goaskima girdimin allin almmi vuolde , ja mun gullen dan biškumin alla jienain : « Vuoi , vuoi , vuoi sin geat orrot eatnama alde , go velá golbma eŋgela fargga čuojahit básoniiddiset . »
Viđat eŋgel bosádii básona .
Dalle oidnen nástti mii lei gahččan almmis eatnamii .
Dasa addojuvvui čiekŋalasa gáivvo čoavdda .
Ja go dat rabai čiekŋalasa gáivvo , de badjánii suovva dego stuora oapmanis , ja suovva sevnnjodahtii beaivváža ja áimmu .
Suovas bohte rásselohkut mat lávde miehtá eatnama , ja daidda addojuvvui seammá fápmu go eatnama skorpiovnnaide .
Daidda celkojuvvui ahte eai oaččo vahágahttit eatnama suinniid dahje eará ruonas šattuid dahje muoraid , muhto dušše daid olbmuid geain ii leat Ipmila seaila gállusteaset .
Dat eai oaččo goddit sin , muhto dušše biinnidit sin vihtta mánu . Ja biidnu lea dego olmmoš livččii čuggehallan skorpiovdnii .
Daid beivviid olbmot ohcet jápmima , muhto eai gávnna .
Sii áibbašit jápmima , muhto jápmin báhtara sis .
Rásselohkut ledje dego soahtái ráhkkanahttojuvvon heasttat .
Dain lei oaivvis juoga dego golle rássekruvdnu , ja daid ámadadju lei dego olbmo ámadadju .
Daid vuovttat ledje dego nissonolbmo vuovttat , daid bánit dego ledjonbánit ja daid raddesuodji dego ruovdegárvu .
Daid soajáid jietna lei dego ollu ruohtti heasttaid ja soahtevovnnaid julla .
Daid seibbiin lei seahčagas dego skorpiovnnain , ja dat galge vahágahttit olbmuid viđa mánu áiggi .
Daid gonagassan lei čiekŋalasa eŋgel , hebreagillii Abaddon ja greikkagillii Apollyon .
Vuosttaš vuoi-čuorvvas lea vássán , muhto bohtet velá guokte .
Guđat eŋgel bosádii básonis .
Dalle gullen jiena njealji čoarvvis golleáltáris , mii lea Ipmila muođuid ovddas .
Jietna celkkii guđat eŋgelii geas lei báson : « Luoitte dan njeallje eŋgela mat leat čatnagasas stuora Eufrateanu gáttis . »
Ja dat njeallje eŋgela luitojuvvojedje , dat geat ledje gárvásat dán boddui , beaivái , dán mánnui ja jahkái , vai besset goddit goalmmádasa olbmuin .
Soahteveaga riidejeddjiid lohku lei guoktelotduhát geardde logiduhát ; mun gullen daid logu .
Ja dákkár heasttaid ja riidejeddjiid mun oidnen oainnáhusastan : Riidejeddjiin ledje ruovdegárvvut mat ledje dollaruoksadat , čohkkesalihat ja riššafiskadat ; heasttaid oaivvit ledje dego ledjonoaivvit , ja daid njálmmis njivžžui dolla , borggistii suovva ja rišai rišša .
Dáinna golmmain givssiin , dolain ja suovain ja riššain , mat bohte heasttaid njálmmis , goddojuvvui goalmmádas olbmuin .
Dasgo heasttaid fápmu lei njálmmis , muhto maiddái daid seaibbis , dasgo daid seaibi lei dego gearpmaš mas lea oaivi , ja seibbiin dat vahágahtte olbmuid .
Muhto eará olbmot geat eai jápmán dain givssiin , eai jorgalan eret das maid ledje ráhkadan gieđaideasetguin , eai ge heaitán bálvaleames bahá vuoiŋŋaid ja eahpeipmilgovaid mat ledje ráhkaduvvon gollis , silbbas , veaikkis , geađggis ja muoras , daid mat eai oainne eai ge gula eai ge vácce .
Sii eai jorgalan eret sorbmemis ja noidodagas , eai fuorrávuođas eai ge suolavuođas .
Dasto mun oidnen fas eará fámolaš eŋgela njiedjamin almmis . Sus lei balva gárvun , ja arvedávgi lei su oaivvi birra .
Su ámadadju lei dego beaivváš ja su juolggit dego dollabáccit . Gieđas sus lei uhca lebbejuvvon girjegeroš .
Son bijai olgeš juolggis meara ala ja guruda fas eatnama ala ja čurvii alla jienain , dego gillju ledjon .
Go son lei čurven , de sárdno čieža bajána čeargu jienain .
Go dat ledje sárdnon , de mun áigon čálligoahtit , muhto mun gullen almmis jiena mii celkkii : « Bija seailla dasa maid dat čieža bajána celke , ale ge čále dan muitui ! »
Ja eŋgel gean mun oidnen čuožžumin meara ja eatnama alde , loktii olgeš gieđas almmi guvlui ja vuortnui su nammii guhte eallá álo ja agálašvuhtii , su nammii guhte sivdnidii almmi ja buot mii das lea ja eatnama ja buot mii das lea ja meara ja buot mii das lea : « Áigi lea nohkan .
Muhto daid beivviid go čihččet eŋgela jietna gullo , ja son čuojaha básonis , de Ipmila čiegusvuohta lea ollašuvvan , nugo son lea almmuhan bálvaleddjiidasas , profehtaide . »
Dat jietna man mun ledjen gullan almmis , sártnui fas munnje : « Mana ja váldde rabas girjji dan eŋgela gieđas guhte čuožžu meara ja eatnama alde . »
Mun mannen eŋgela lusa ja sihten su addit munnje girjegearu .
Son celkkii munnje : « Váldde dan ja bora !
Dat šaddá rihčan du čoavjjis , muhto njálggisin dego honnet du njálmmis . »
De válden uhca girjegeroža eŋgela gieđas ja borren dan . Njálmmis dat lei njálggis dego honnet , muhto go ledjen njielastan dan , de boaldigođii čoavjji .
Munnje celkojuvvui : « Don galggat ain profehtastallat mo geavvá álbmogiidda ja sogaide , gielaide ja ollu gonagasaide . »
Munnje addojuvvui soabbelágán mihttomuorra , ja munnje celkojuvvui : « Čuožžil ja mihtit Ipmila tempela ja áltára ja loga sin geat rohkadallet doppe !
Muhto mana tempela ovdašilju meattá , ale mihtit dan , dasgo dat lea addojuvvon báhkiniidda , ja sii dulbmet bassi gávpoga julggiideaset vuollái njealljelogiguokte mánu áiggi .
Mun attán fámu guovtti duođašteaddjásan , gárvodan horstabiktasiiguin , profehtastallat duhátguoktečuođiguhttalot beaivvi . »
Duođašteaddjit leat dat guokte oljomuora ja guokte lámppá mat čužžot eatnama hearrá ovddas .
Jos giige dáhttu vahágahttit daid , de boahtá daid njálmmis dolla mii duššada daid vašálaččaid .
Nu galgá jápmit juohkehaš guhte dáhttu vahágahttit daid !
Dain lea fápmu giddet almmi , amas arvit dan áiggi go dat profehtastallet , ja dain lea fápmu dahkat čázi varran , ja fápmu časkit eatnama juohkelágán givssiiguin , nu dávjá go dáhttot .
Go dat leat geargan duođašteamis , dalle boahtá beahtu bajás čiekŋalasas soahtat daid vuostái , ja dat vuoitá daid ja goddá daid .
Daid rupmašat báhcet dan stuora gávpoga geainnu ala , dan mii vuoiŋŋalaččat gohčoduvvo Sodoman ja Egyptan , doppe gos maiddái daid Hearrá russiinávlejuvvui .
Ollu sogaid , čearddaid , gielaid ja álbmogiid olbmot oidnet daid rupmašiid veallámin das bealnjealját beaivvi , ii ge oktage beasa hávdádit daid .
Eatnama ássit illudit ja ávvudit daid vuorbbi dihtii ja sáddejit attáldagaid guhtet guimmiidasaset . Dasgo dát guokte profehta leat leamaš stuora giksin eatnama ássiide .
Muhto bealnjealját beaivvi geažes bođii Ipmilis sudnuide eallima vuoigŋa ; soai čuožžileigga ja čuoččuiga julggiideaskka alde , ja dat geat oidne sudno , ballagohte sakka .
De soai gulaiga almmis alla jiena mii celkkii sudnuide : « Boahtti deike bajás ! »
Ja soai manaiga bajás albmái balvva siste vašálaččaideaskka oaidnut .
Dan seammás bođii stuora eatnandoarggástus , ja logádas gávpogis duššai . Čiežaduhát olbmo dušše eatnandoarggástusas , ja sii geat báhce , suorganedje ja gudnejahttigohte almmi Ipmila .
Nubbi vuoi-čuorvvas lea vássán , muhto goalmmát vuoi-čuorvvas boahtá fargga .
Čihččet eŋgel bosádii básonis .
De gullojedje almmis alla jienat mat celke : Máilmmi gonagasváldi gullá dál min Hearrái ja sutnje gean son lea vuoiddadan , ja son ráđđe álo ja agálašvuhtii .
Dalle dat njealljegoalmmátlot vuorrasa geat čohkkájedje truvnnuineaset Ipmila ovddas , luoitádedje gopmut ja gudnejahtte Ipmila ja celke : Mii giitit du , Hearrá Ipmil , Buotveagalaš , guhte leat ja ledjet , danne go don leat čájehan stuora fámot ja leat ráđđegoahtán .
Álbmogat moaráhuvve , muhto dál lea du moarri boahtán , dat áigi go jábmit dubmejuvvojit , áigi go bálkkášat bálvaleddjiidat , profehtaid , bassi olbmuid ja sin geat ballet du namas , smávváid ja stuorráid , ja duššadat sin geat duššadit eatnama .
Almmis rahpasii Ipmila tempel , ja lihtu árka bođii oidnosii su tempelis .
De álddagasttii , baján čearggui , eanan doarggistii ja stuora čuorbmasat gahčče .
De oidnui almmis stuora mearka : Nisu geas lei beaivváš gárvun ; mánnu lei su julggiid vuolde ja oaivvis guoktenuppelot nástti kruvdnun .
Son lei máná vuostái ja huikkii mánnáheađis ja riegádahttinávttain .
Maiddái nubbi mearka oidnui almmis : Stuora dollarukses guovdi , mas ledje čieža oaivvi ja logi čoarvvi , ja kruvdnu guđege čieža oaivvis .
Seibbiinis dat njámastii goalmmádasa násttiin ja bálkestii eatnamii .
Guovdi čuoččui riegádahtti nissona ovddabealde , vai beasašii njielastit máná dan seammás go dat lea riegádan .
Ja nisu riegádahtii bárdnemáná , guhte oktii guođoha buot álbmogiid ruovdesoppiin .
Ja mánná rohttejuvvui bajás Ipmila lusa ja su truvdnui .
Muhto nisu báhtarii meahccái , muhtun báikái man Ipmil lei gárvvistan sutnje , vai son bibmojuvvošii doppe duhátguoktečuođiguhttalogi beaivvi .
De buollái soahti almmis : Mikael oktan eŋgeliiddisguin soađáskii guovddi vuostái .
Guovdi ja dan eŋgelat sohte , muhto dat vuoittáhalle , ii ge sis lean šat mihkkege sajiid almmis .
Dat stuora guovdi , boares gearpmaš , bálkestuvvui olggos , dat guhte gohčoduvvo beargalahkan ja Sáhtánin ja fille oppa máilmmi ; dat bálkestuvvui eatnamii oktan eŋgeliiddisguin .
Ja mun gullen alla jiena cealkimin almmis : « Bestojupmi ja fápmu ja riika gullá dál min Ipmilii , ja váldi sutnje gean son lea vuoiddadan .
Dasgo min vieljaid guoddaleaddji , guhte guoddalii sin min Ipmila ovddas ijatbeaivvi , lea bálkestuvvon vuolás .
Sii leat vuoitán su Lábbá varain ja sániideasetguin maid sii duođaštedje .
Eai sii seastán heakkaset , muhto ledje gárvásat velá jápmit ge .
De ávvudehket , almmit ja almmi ássit !
Muhto vuoi eatnama ja meara ! Dasgo beargalat lea boahtán vuolás din lusa , ja su moarri lea stuoris , danne go son diehtá ahte sus lea dušše oanehis áigi velá . »
Go guovdi oinnii ahte lei bálkestuvvon eatnamii , de dat doarrádalai nissona gii lei riegádahttán bárdnemáná .
Muhto nissonii addojuvvojedje stuora goaskima soaját , vai son girddášii dorvobáikásis meahccái gos bibmojuvvo , ovtta áiggi ja guokte áiggi ja áigebeali , guhkkin eret gearbmašis .
Gearpmaš šávgalii njálmmistis čázi johkan nissona maŋŋái , vai rávdnji dolvvošii su .
Muhto eanan veahkehii nissona ja rabastii njálmmis ja njielastii joga man guovdi lei šávgalan njálmmistis .
Guovdi moaráskii nissonii ja vulggii soahtat su eará mánáid vuostái geat čuvvot Ipmila báhkkomiid ja dollet gitta Jesusa duođaštusas .
De guovdi čuoččastii mearragáddái .
Dalle oidnen go mearas badjánii beahtu .
Das ledje logi čoarvvi ja čieža oaivvi , ja čorvviin das ledje logi kruvnnu ja juohke oaivvis bilkádusa namma .
Beahtu man mun oidnen , lei leopárdda láhkásaš , muhto dan juolggit ledje dego guovžžas ja dan njálbmi dego ledjonis .
Guovdi attii dasa fámus ja truvnnus ja stuora válddi .
Okta dan oivviin lei ožžon jápminhávi , muhto hávvi savvui , ja oppa máilbmi ovddošii beađu ja čuovvugođii dan .
Olbmot gopmirdedje guovddi danne go lei addán behtui fámu , ja sii gopmirdedje beađu ge ja dadje : « Gii lea beađu láhkásaš , ja gii sáhttá soahtat dan vuostái ? »
Behtui addojuvvui njálbmi mii sárdnu stuora , bilkideaddji sániid , ja dat oaččui fámu dahkat dan njealljelogiguokte mánu .
Dat rabai njálmmis bilkidit Ipmila ja bilkidišgođii su nama , su viesu ja buohkaid geat orrot almmis .
Dasa addojuvvui vuoigatvuohta soahtat bassi olbmuid vuostái ja vuoitit sin , ja maiddái fápmu ráđđet juohke čeardda , álbmoga , giela ja soga .
Ja buot eatnama ássit gopmirdit dan , buohkat geaid namma ii leat máilmmi vuođđudeami rájes leamaš čállojuvvon eallima girjái , njuvvojuvvon Lábbá girjái .
Geas ležžet bealjit , son gullos dán : Jos guhtege galggaš fáŋgavuhtii , de šaddá fáŋgavuhtii ! Jos guhtege galggaš goddot mihkiin , de son goddojuvvo mihkiin !
Dás dárbbašuvvo bassi olbmuin gierdavašvuohta ja osku .
De oidnen nuppi beađu badjáneamen eatnamis . Das ledje guokte čoarvvi dego lábbás , muhto dat sártnui dego guovdi .
Dat geavaha vuosttaš beađu fámu dan čalmmiid ovddas ja bidjá eatnama ja dan ássiid gopmirdit vuosttaš beađu , mas jápminhávvi buorránii .
Dat dahká stuora oavdumearkkaid ja oažžu velá dola ge gahččat almmis eatnamii olbmuid oaidnut .
Dat čádjidahttá eatnama ássiid daiguin mearkkaiguin maid dat oažžu fámu dahkat beađu čalmmiid ovddas .
Ja dat gohčču eatnama ássiid ráhkadit dan beađu čuolahusgova mii lei hávvádahttojuvvon mihkiin , muhto ealáskii .
Dasa addojuvvui fápmu bossut heakka beađu govvii , nu ahte dat máhttá velá sárdnut ge , ja gottihit buohkaid geat eai bálval dan .
Dat bágge buohkaid , smávváid ja stuorráid , riggáid ja gefiid , isidiid ja šlávaid , bidjat mearkka olgeš gihtii dahje gállui , amas oktage oažžut oastit dahje vuovdit , jos sus ii leat dát mearka , beađu namma dahje dan nama lohku .
Dás dárbbašuvvo viisodat !
Geas lea jierbmi , rehkenastos beađu logu , dasgo dat lea muhtun olbmo lohku , ja dát lohku lea 666 .
Oainnáhusastan mun oidnen Lábbá čuožžumin Sionváris , ja oktan suinna ledje čuođinjealljeloginjealljeduhát olbmo geain lei su namma ja su Áhči namma čállojuvvon gállui .
Almmis gullen jiena mii lei dego máraideaddji čáhci ja bajána čeargun , ja jietna man mun gullen , lei dego hárpačuojaheddjiid čuojaheapmi .
Truvnnu ovddas , ja dan njealji sivdnádusa ja vuorrasiid ovddas sii lávlo ođđa lávlaga , man ii giige sáhttán oahppat earet go dat čuođinjealljeloginjealljeduháha , geat leat ostojuvvon friddjan eatnamis .
Sii eai leat nuoskkidan iežaset nissoniiguin , dasgo sii leat dego guoskkakeahtes nieiddat .
Sii čuvvot Lábbá gosa ihkinassii dat manaš .
Sii leat ostojuvvon friddjan olbmuid gaskkas Ipmila ja Lábbá vuosttaš šaddun .
Sin njálmmis ii leat behtolašvuohta , sii leat láitemeahttumat .
De mun oidnen fas eará eŋgela girdimin guhkkin badjin almmi vuolde .
Sus lei agálaš evangelium sárdnidit eatnama ássiide , buot álbmogiidda ja čearddaide , gielaide ja sogaide . Son čuorvvui alla jienain : « Ballet Ipmilis ja addet sutnje gudni ! Dasgo dál lea su duomu áigi boahtán .
Rohkadallet su guhte lea sivdnidan almmi ja eatnama , meara ja ádjagiid ! »
Dasto bođii nubbi eŋgel guhte čuorvvui : « Gahččan , gahččan lea stuora Babylon , duot fuorrá , mii fastivuođainis lea jugahan moari viinni buot álbmogiidda . »
Sudno maŋŋil bođii goalmmát eŋgel gii celkkii alla jienain : « Jos giige gopmirda beađu ja dan čuolahusgova ja bidjá dan mearkka gállosis dahje giehtasis , de son ge gártá juhkat Ipmila moari viinnis , mii lea leikejuvvon láivutkeahttá su vaši gerrii ; ja son givssiduvvo dolain ja riššain bassi eŋgeliid ja Lábbá muođuid ovddas .
Suovva mii boahtá sin givssis , badjána álo ja agálašvuhtii ; ii ihkku ii ge beaivet leat vuoiŋŋadus sis geat gopmirdit beađu ja dan čuolahusgova dahje sis geat váldet dan nama mearkan . »
Dás dárbbašuvvo bassi olbmuid gierdavašvuohta , sin geat dollet gitta Ipmila báhkkomiin ja oskkus Jesusii .
Mun gullen dál almmis jiena mii celkkii : « Čále : Ávdugasat dat jábmit geat dás duohko jápmet Hearrá oapmin .
Vuoigŋa cealká : Ávdugasat sii leat . Sii besset vuoiŋŋastit rahčamušaineaset , dasgo sin dagut čuvvot sin . »
Oainnáhusastan mun oidnen dán : Lei vilges balva , ja balvva alde čohkkái muhtun olbmobártni láhkásaš . Sus lei gollekruvdnu oaivvis ja bastilis sirpe gieđas .
Ja nubbi eŋgel bođii olggos tempelis ja čuorvvui alla jienain sutnje gii lei čohkkámin balvva alde : « Bija sirppe čuohppat , dasgo dál lea láju áigi ; eatnama šattut leat láddan . »
Dat gii lei čohkkámin balvva alde , bijai sirppe mannat eatnama mielde , ja eatnama šattut čuhppojuvvojedje .
Dál bođii nubbi eŋgel gis olggos almmi tempelis . Sus lei maid bastilis sirpe .
De bođii áltáris ge eŋgel , ja sus lei fápmu ráđđet dola .
Son čuorvvui alla jienain eŋgelii geas lei bastilis sirpe : « Bija bastilis sirppet čuohppat eatnama viidnegárddi šattuid , dasgo dan viidnemuorjjit leat láddan ! »
Eŋgel bijai sirppe mannat eatnama mielde , čuohpai eatnama viidnegárddi šattuid ja bálkestii daid Ipmila moari stuora viidneduolmmahahkii .
Viidneduolmmahat dulbmojuvvui gávpoga olggobealde , ja das golggai varra , nu ahte duhátguhttačuođi stadia duohken dat olii heasttaid bákki rádjái .
Dasto mun oidnen almmis eará stuora ja ovddolaš mearkka : Čieža eŋgela čiežain maŋimuš givssiin , dasgo daiguin Ipmila moarri ollašuvvá .
Ja mun oidnen dego lásemeara , mas šealggáhalai dolla , ja lásemeara gáttis oidnen čuožžumin sin geat ledje vuoitán beađu , dan čuolahusgova ja dan nama logu .
Sis leat Ipmila hárppat gieđas , ja sii lávlot Movssesa , Ipmila bálvaleaddji lávlaga , ja Lábbá lávlaga : Stuorrát ja ovddolaččat leat du dagut , Hearrá Ipmil , Buotveagalaš !
Vanhurskásat ja vuoigatlaččat leat du geainnut , don álbmogiid gonagas .
Guhte ii galggaše ballat dus , Hearrá , ja gudnejahttit du nama ?
Dasgo aivvefal don leat bassi . Buot álbmogat bohtet gopmirdit du du muođuid ovddas , dasgo du vanhurskkis duomut leat almmustuvvan .
Dás maŋŋil mun oidnen dán : Almmi tempel , duođaštusa goahti , rahppojuvvui . Olggos bohte dat čieža eŋgela dainna čiežain givssiin , ja sis ledje buhtes , vilges biktasat badjelis ja golleboagán ratti birra .
Okta dan njealji sivdnádusas attii dan čieža eŋgelii čieža gollegeara maid dievva lei Ipmila moarri , su guhte eallá álo ja agálašvuhtii .
Ja Ipmila hearvásvuođa ja fámu suovva devddii tempela , nu ahte ii oktage sáhttán mannat tempela sisa ovdal go čieža eŋgela čieža givssi ledje ollašuvvan .
Mun gullen tempelis alla jiena mii celkkii dan čieža eŋgelii : « Vulget ja gurrejehket Ipmila moari čieža geara eatnama ala ! »
Vuosttaš eŋgel manai ja gurrii gearas eatnama ala .
De ihte bávččas , várka , siedjabuhkkot daidda olbmuide geain lei beađu mearka ja geat gopmirdedje dan gova .
Nubbi eŋgel gurrii gearas merrii .
De mearra šattai dego jábmi varran , ja buot meara heakkalaččat jápme .
Goalmmát eŋgel gurrii gearas jogaide ja ádjagiidda .
De čáhci šattai varran , ja mun gullen čáziid eŋgela cealkimin : « Vanhurskkis leat don guhte leat ja ledjet , don bassi , guhte leat cealkán daid duomuid .
Sii leat golggahan bassi olbmuid ja profehtaid vara , ja danne don leat addán sidjiide vara juhkat .
Dan sii leat ánssášan . »
Ja mun gullen áltára cealkimin : « Duođaid , Hearrá Ipmil , Buotveagalaš , vuoiggalaččat ja vanhurskásat leat du duomut ! »
Njealját eŋgel gurrii gearas beaivvážii .
De beaivváš oaččui fámu boaldit olbmuid dolainis , ja olbmot bulle garra báhkas .
Dattege sii bilkidedje Ipmila nama , su gean fámus dát givssit leat . Sii eai jorgalan nu ahte livčče addán Ipmilii gudni .
Viđat eŋgel gurrii gearas beađu truvdnui .
De beađu riika šattai seavdnjadassii , ja olbmot gáske njuokčamiiddiset bákčasa dihtii ja bilkidedje almmi Ipmila bákčasiiddiset ja buhkkuideaset dihtii , muhto eai jorgalan daguineaset .
Guđat eŋgel gurrii gearas stuora Eufratetnui .
Dan čázit goike , ja nu válmmaštuvai geaidnu nuortagonagasaide .
Ja mun oidnen guovddi njálmmis , beađu njálmmis ja vearri profehta njálmmis boahtimin golbma buhtismeahttun vuoiŋŋa , mat ledje cubbuid láhkái .
Dát leat beargalagaid vuoiŋŋat mat dahket oavdumearkkaid . Dat vulget buot máilmmi gonagasaid lusa čohkket sin soahtái Ipmila , Buotveagalačča , stuora beaivvi .
« Geahča , mun boađán dego suola .
Ávdugas son guhte gohcá ja várjala biktasiiddis , amas johtit álásin ja čájehit heahpadis . »
Vuoiŋŋat čohkkejedje gonagasaid dan báikái mii hebreagillii gohčoduvvo Harmageddonin .
Čihččet eŋgel gurrii gearas áibmui .
Ja tempela truvnnus gullui alla jietna mii celkkii : « Dat lea dáhpáhuvvan ! »
De gaske álddagasat ja čergo dierbmát ja baján , ja šattai nu garra eatnandoarggástus ahte dakkár ii leat leamaš nu guhká go olbmot leat eallán eatnama alde .
Stuora gávpot luoddanii golmma oassái , ja álbmogiid gávpogat gahčče .
Ipmil ii lean vajáldahttán stuora Babylona , muhto attii dasa geara mas lei su moari ja vaši viidni .
Juohke suolu jávkkai , eai ge várit oidnon šat .
Ja almmis gahčče olbmuid ala stuora čuođibuddásaš čuorbmasat .
Muhto sii bilkidedje Ipmila dan givssi dihtii man čuorbmasat dagahedje , dasgo giksi lei issoras .
Okta dan čieža eŋgelis geain ledje čieža geara , bođii mu lusa ja celkkii : « Boađe , mun čájehan dutnje makkár duomu oažžu stuora fuorrá , gii čohkká stuora čáziid lahka .
Máilmmi gonagasat leat furrošan suinna , ja eatnama ássit leat oaivvahuvvan su fuorrávuođa viinnis . »
Vuoigŋa devddii mu , ja eŋgel doalvvui mu meahccái .
Doppe mun oidnen nissona čohkkámin skárllatrukses beađu sealggis . Bilkideaddji namat ledje čállon miehtá beađu , ja das ledje čieža oaivvi ja logi čoarvvi .
Nissonis ledje badjelis purpur- ja skárllatrukses biktasat , ja son lei čiŋahuvvon golliin ja divrras geđggiiguin ja bearraliiguin .
Gieđastis son doalai gollegeara man dievva lei su furrodaga fastivuohta ja buhtismeahttunvuohta .
Su gállui lei čállojuvvon namma mas lei čiegus oaivil : « Stuora Babylon , buot fuoráid ja eatnama fastivuođaid eadni . »
Ja mun oidnen ahte nisu lei gárihuvvan bassi olbmuid ja Jesusa duođašteddjiid varas .
Mun imaštallen go oidnen su .
Muhto eŋgel celkkii munnje : « Manne don imaštalat ?
Mun muitalan dutnje nissona ja beađu čiegusvuođa , dan mii lea guoddimin su , ja mas leat čieža oaivvi ja logi čoarvvi .
Beahtu man oidnet , lea leamaš , muhto dál ii leat šat .
Dat badjána čiekŋalasas , ja manná hevvui .
Ja sii geat orrot eatnama alde , ja geaid namat eai leat leamaš čállojuvvon eallima girjái máilmmi vuođđudeami rájes , sii hirpmástuvvet go oidnet beađu mii lea leamaš ii ge leat šat , vaikko dat boahtá fas .
Dás dárbbašuvvo jierbmi ja viisodat .
Čieža oaivvi mearkkašit čieža vári maid alde nisu lea čohkkámin .
Dat mearkkašit maiddái čieža gonagasa : Viđas sis leat juo gahččan , okta ráđđe ain dál ja okta ii leat velá boahtán , ja go son boahtá , de son ráđđe dušše oanehis áiggi .
Beahtu ieš , mii lea leamaš ii ge leat šat , lea gávccát gonagas , muhto dan seammás dat lea okta dan čiehččasis ja manná hevvui .
Logi čoarvvi maid don oidnet , leat logi gonagasa geat eai leat velá beassan ráđđet , muhto oktan beađuin sii ožžot gonagasválddi ovtta diibmui .
Oktii ráđiid sii addet fámuset ja válddiset behtui .
Sii soahttájit Lábbá vuostái , muhto Láppis vuoitá sin , dasgo dat lea hearráid hearrá ja gonagasaid gonagas , ja suinna vuitet sii geat leat rávkojuvvon , válljejuvvon ja oskkáldasat . »
Eŋgel sártnui fas munnje : « Čázit maid don oidnet , gos fuorrá čohkká , leat álbmogat ja olmmošjoavkkut ja sogat ja gielat .
Ja logi čoarvvi maid don oidnet , ja beahtu , vašuhišgohtet fuorá , dahket su báljisin ja álásin , borret su oačči ja boldet su gutnan dolas .
Dasgo Ipmil bidjá sin váibmui ollašuhttit áigumušas , nu ahte sii oktii ráđiid addet válddiset behtui , dassážii go Ipmila sátni ollašuvvá .
Ja nisu gean don oidnet , lea dat stuora gávpot mii ráđđe eatnama gonagasaid . »
Dasto mun oidnen vuot ovtta eŋgela njiedjamin almmis stuora fámuin , ja su hearvásvuohta čuvgii oppa eatnama .
Son čuorvvui alla jienain : « Gahččan , gahččan lea stuora Babylon !
Dat lea šaddan buot bahá vuoiŋŋaid orrunsadjin , buhtismeahttun vuoiŋŋaid suodjin , buot buhtismeahttun ja fasttes lottiid suodjin .
Dán fuorá viinnis , moari viinnis , leat buot sogat juhkan , máilmmi gonagasat leat furrošan suinna , ja máilmmi gávpeolbmát leat riggon su badjelmearálaš eallimis . »
De mun gullen almmis eará jiena mii celkkii : Vulget eret , guđđet su , dii geat lehpet mu álbmot , amadet šaddat oasálažžan su suttuide ja amadet deaivvahallat su givssiide .
Dasgo su suttuid guhpá ollá gitta albmái , ja Ipmil muitá buot su vearrivuođaid .
Mákset sutnje nugo son ieš lea máksán earáide , mávssahehket sutnje guovttegeardásaččat su daguid mielde , ja njorrejehket sutnje gearddi bahččagat juhkamuša dan gerrii masa son ieš lea njorren .
Addet sutnje seammá ollu givssi ja morraša go son ieš lea návddašan hearvásvuođa ja badjelmearálašvuođa .
Son cealká váimmustis : « Dás čohkkán truvnnus dego dronnet , leaska in leat , morraša in goassege dovdda . »
Danne su deaividit seammá beaivvi buot su givssit , jápmin , moraš ja nealgi , ja son boldojuvvo dolas .
Dasgo fámolaš lea Hearrá Ipmil guhte lea dubmen su .
Máilmmi gonagasat geat leat suinna furrošan ja leaicidan , čirrot ja luibmet su dihtii , go oidnet suova badjáneamen go son buollá . Sii čužžot guhkkin eret su givssi balus , ja sii fuikot : « Vuoi , vuoi du , stuora gávpoga , Babylona fámolaš gávpoga ! Ovtta diimmus bođii du duopmu . »
Maiddái máilmmi gávpeolbmát čirrot ja moraštit su , danne go ii oktage šat oastte sin gálvvuid : eai golliid , silbbaid , divrras geđggiid , bearraliid , fiinna liinniid , purpuriid , silkkiid , skárllagiid , eai ge mange lágán njálggahájat muoraid , eai mange lágán elefántabátnedujiid eai ge divrrasmuorradujiid , eai veaike- , ruovdeeai ge marmordujiid , eai kanelaid eai ge eará máistagiid , suovvasiid , hádjavuoidasiid eai ge suovastanbihkaid , eai viinni eai ge oljju , eai fiinna jáffuid eai ge nisuid , eai šibihiid , sávzzaid , heasttaid , vovnnaid eai ge šlávaid , olbmuid oktan rupmašiin ja sieluin .
Šattuid maidda don oppa sielustat anistuvvet don leat láhppán , buot du fávruvuođa ja goargatvuođa don leat massán it ge goassege gávnna daid šat .
Daid gálvvuid gávppašeaddjit geat leat riggon fuorá eallimis , čužžot guhkkin eret su givssi balus . Sii čirrot ja luibmet ja celket : « Vuoi , vuoi du , stuora gávpoga ! Don ledjet gárvodan fiinna liinniin ja purpuriin ja skárllagiin ja čiŋahuvvon golliiguin ja divrras geđggiiguin ja bearraliiguin !
Ovtta diimmus lea dát stuora riggodat duššan . »
Buot skiippahoavddat ja borjjasteaddjit , mearraolbmát ja sii geat barget meara alde , čužžo guhkkin eret ja čurvo go oidne suova badjáneamen go son bulii : « Gos lea dán stuora gávpoga veardásaš ? »
Ja sii gilve muolddaid oaivviset ala ja čurvo čieru ja luoimma : « Vuoi , vuoi stuora gávpoga , gos buohkat geain lea skiipa meara alde , leat riggon su divrras dávviriid dihtii !
Ovtta diimmus dat lea duššan . »
Illut su gahččamis , albmi , ja illudehket bassi olbmot , profehtat ja apoastalat !
Dasgo Ipmil lea dubmen su gii dubmii din .
De fámolaš eŋgel loktii geađggi mii lei millogeađggi stuoru , bálkestii dan merrii ja celkkii : « Nu bálkestuvvo fáhkkestaga stuora gávpot Babylon ii ge dat goassege šat gávdno .
Hárpačuojaheddjiid ja lávluid lávlagat , njurggonasčuojaheddjiid ja básončuojaheddjiid musihkka ii goassege šat gullo du siste . Ii leat goassege šat giehtaduojár du siste .
Ii goassege šat gullo millu jurra du siste . Ii goassege šat báitte lámppá čuovga du siste . Eai goassege šat gullo irggi ja moarsi jienat du siste .
Dasgo du gávpeolbmát ledje máilmmi válddálaččat , ja don geidet álbmogiid noidodagainat .
Gávpogis lei profehtaid ja bassi olbmuid varra , buohkaid varra geat leat sorbmejuvvon eatnama alde . »
Dasto mun gullen dego stuora joavkku almmis čuorvumin alla jienain : Halleluja !
Bestojupmi , gudni ja fápmu gullá Ipmilasamet , dasgo duođalaččat ja vanhurskásat leat su duomut .
Son lea dubmen stuora fuorá , guhte bilidii eatnama fuorrávuođainis , ja son lea mávssahan fuorrái bálvaleddjiidis vara .
Sii čurvo fasttain : Halleluja !
Fuorá dolas badjána suovva álo ja agálašvuhtii .
Njealljegoalmmátlot vuorrasa ja njeallje sivdnádusa luoitádedje eatnamii ja rohkadalle Ipmilii gii čohkká truvnnus , ja sii celke : « Amen .
Halleluja ! »
Ja truvnnus gullui jietna : « Máidnot Ipmileamet , buot su bálvaleaddjit , dii geat ballabehtet sus , sihke unnit ja stuorrát ! »
De mun gullen dego stuora joavkku ja dego máraideaddji čáziid boršuma ja garra bajána čearguma . Dat čurvo : Halleluja !
Dasgo Hearrá Ipmileamet , Buotveagalaš , lea šaddan gonagassan .
Illudehkot ja ávvudehkot ja addot sutnje gudni ! Dasgo lábbá heajaid áigi lea boahtán ! Su moarsi lea ráhkkanan , sutnje addojuvvojedje buhtes liidnebiktasat gárvun .
Liidnebiktasat leat bassi olbmuid vanhurskkis dagut .
Ja eŋgel celkkii munnje : « Čále : Ávdugasat sii geat leat bovdejuvvon Lábbá headjamállásiidda . »
De son lasihii : « Dát leat Ipmila duohta sánit . »
Mun luoitádin su julggiid ovdii rohkadallat su , muhto son celkkii munnje : « Ale daga nu !
Mun lean dušše Ipmila bálvaleaddji nugo don ge ja du oskuguoimmit , sii geat dollet gitta Jesusa duođaštusas .
Rohkadala Ipmila ! »
– Jesusa duođaštus lea profehtastallama vuoigŋa .
De mun oidnen almmi rabasin , ja doppe mu ovddas lei vilges heasta .
Riidejeaddji namma lea « Oskkáldas ja Duođalaš » , dasgo son dubme ja soahtá vanhurskkisvuođain .
Su čalmmit leat dego buolli dolla , ja oaivvis sus leat máŋga kruvnnu , ja sutnje lea čállojuvvon namma man dušše son ieš dovdá .
Son lea gárvodan varas buonjostuvvon biktasiiguin , ja su namma lea Ipmila Sátni .
Almmi soahteveagat čuvvot su vilges heasttaiguin , gárvodan fiinna , vilges ja buhtes liidnebiktasiiguin .
Ja su njálmmis geaigá bastilis miehkki mainna son sáhttá časkit álbmogiid . Son stivre sin ruovdesoppiin ja duolbmá viidneduolmmahaga man dievva lea moari viidni , Ipmila , buotveagalačča , vašši .
Su biktasii ja alimiidda lea čállojuvvon namma : Gonagasaid Gonagas ja Hearráid Hearrá .
De mun oidnen eŋgela čuožžumin beaivvážis . Son čuorvvui alla jienain buot lottiide mat girdet allin almmi vuolde : « Bohtet deike , čoahkkanehket Ipmila stuora guossemállásiidda ! Dii beassabehtet borrat gonagasaid , soahteoaivámuččaid ja fámolaččaid oačči , heasttaid ja daid riidejeddjiid oačči , buot olbmuid oačči , isidiid ja šlávaid , mánáid ja rávis olbmuid . »
De oidnen beađu ja máilmmi gonagasaid oktan soahteveagaideasetguin čoagganan soahtat riidejeaddji ja su veagaid vuostái .
Muhto beahtu dohppejuvvui gitta oktan dainna vearri profehtain guhte dagai oavdumearkkaid beađu ovddas ja daiguin čádjidahtii buohkaid geat válde beađu mearkka ja gopmirdedje dan čuolahusgova .
Goappašagat bálkestuvvuiga eallinaga dollajávrái mii buollá riššain .
Earát goddojuvvojedje dainna mihkiin mii boahtá riidejeaddji njálmmis , ja buot lottit borre gallás sin oaččis .
De mun oidnen eŋgela njiedjamin almmis čiekŋalasa čoavdda ja stuora láhkkit gieđas .
Son dohppii guovddi , boares gearbmaša , mii lea beargalat ja Sáhtán , ja čanai dan duhát jahkái . Eŋgel bálkestii su čiekŋalassii , lohkkadii ja seilii uvssa , amas dat šat fillet álbmogiid , ovdal go dat duhát jagi leat vássán .
Das maŋŋil dat galgá luitojuvvot luovus oanehassii .
De mun oidnen truvnnuid , ja sidjiide geat čohkkededje daidda , addojuvvui dubmenfápmu .
Mun oidnen maiddái sin sieluid geat ledje steavliduvvon Jesusa duođaštusa ja Ipmila sáni dihtii , ja oidnen buohkaid geat eai lean gopmirdan beađu dahje dan čuolahusgova eai ge lean bidjan dan mearkka gállui eai ge gihtii .
Sii eallájedje ja ráđđejedje Kristusiin dan duhát jagi .
Muhto eará jábmit eai eallán ovdal go duhát jagi ledje vássán .
Dát lea vuosttaš bajásčuožžileapmi .
Ávdugas ja bassi son geas lea oassi vuosttaš bajásčuožžileamis .
Nuppi jápmin ii sáhte sin sorbmet , muhto sii šaddet Ipmila ja Kristusa báhppan ja ráđđejit suinna duhát jagi .
Go duhát jagi leat vássán , de Sáhtán luitojuvvo giddagasastis .
Son vuolgá čádjidahttit njealji máilmmečiega álbmogiid , Goga ja Magoga , ja čohkket sin soahtái , ja sin lohku lea dego mearragátti sáddot .
Sii gorgŋot eatnama alla duolbadassii ja birastahttet bassi olbmuid siidda ja ráhkistuvvon gávpoga .
Muhto almmis gahččá dolla mii duššada sin .
Beargalat gii čádjidahtii sin , bálkestuvvo dolla- ja riššajávrái , gos maiddái beahtu ja vearri profehta leaba . Doppe sii givssiduvvojit ijatbeaivvi álo ja agálašvuhtii .
De mun oidnen stuora , vilges truvnnu ja su gii lei čohkkámin das .
Eanan ja albmi báhtaredje su muođuid ovddas eai ge dat šat dihtton .
Ja mun oidnen jábmiid , sihke stuorráid ja unniid čuožžumin truvnnu ovddas . Girjjit rahppojuvvojedje , maiddái nubbi girji , eallima girji .
Ja jábmit dubmejuvvojedje dan mielde mii lei čállojuvvon girjjiide , iešguhtege daguidis mielde .
Mearra attii dál jábmiidis ruoktot , ja jápmin ja jábmiid riika attii ruoktot daid jábmiid geat ledje doppe , ja juohkehaš dubmejuvvui daguidis mielde .
De jápmin ja jábmiid riika bálkestuvvui dollajávrái , ja dollajávri lea nubbi jápmin .
Ja jos muhtun ii lean čállojuvvon eallima girjái , de son bálkestuvvui dollajávrái .
De mun oidnen ođđa almmi ja ođđa eatnama , dasgo ovddit albmi ja ovddit eanan lei nohkan , ii ge mearra lean šat .
Ja mun oidnen bassi gávpoga , ođđa Jerusalema , njiedjamin almmis , Ipmila luhtte , válmmaštuvvon ja čiŋahuvvon dego moarsi irggis várás .
Ja mun gullen truvnnus alla jiena cealkimin : « Geahča , Ipmila orrunsadji lea olbmuid luhtte . Son orru sin searvvis , ja sii leat su álbmot , ja Ipmil ieš lea sin luhtte .
Son sihkku eret juohke gatnjala sin čalmmiin , ii ge jápmin leat šat , ii ge moraš ii ge bárgun ii ge giksi .
Dasgo dat mii lei ovdal , ii leat šat . »
Son guhte čohkká truvnnus , celkkii munnje : « Geahča , mun dagan buot ođasin . »
Ja son jotkkii : « Čále ! Dasgo dát leat luohtehahtti ja duohta sánit . »
Son celkkii vel munnje : « Dat lea ollašuvvan !
Mun lean Alfa ja Omega , álgu ja loahppa .
Sutnje geas lea goiku , mun attán juhkat eallima čázi ádjagis vaikko son ii ánssášivčče dan .
Son guhte vuoitá , árbe buot , ja mun lean su Ipmil ja son lea mu bárdni .
Muhto árggit , oskkáldasmeahttumat , fasttit , sorbmejeaddjit , furrošeaddjit , noidošeaddjit , eahpeipmilbálvaleaddjit ja buot gielisteaddjit ožžot saji dan jávrris mii buollá dolain ja riššain ; dat lea nubbi jápmin . »
Okta dan čieža eŋgelis geain ledje čieža geara maid dievva ledje čieža maŋimuš givssi , bođii mu lusa ja celkkii : « Boađe , mun čájehan dutnje moarsi , Lábbá áhká . »
Vuoigŋa devddii mu ja eŋgel doalvvui mu stuora , alla vári ala ja čájehii munnje bassi gávpoga , Jerusalema , mii njiejai almmis , Ipmila luhtte .
Das lei Ipmila hearvásvuohta ja dat šearrái dego divraseamos geađgi , dego kristállačuvges jaspis .
Dan birra lei stuora , alla muvra mas ledje guoktenuppelot poartta ja guoktenuppelot eŋgela čuožžumin poarttaid guoras , ja Israela čearddaid namat ledje čállojuvvon poarttaide .
Golbma poartta ledje nuorttas guvlui , golbma davás guvlui , golbma lulás guvlui ja golbma oarjjás guvlui .
Ja gávpotmuvrras ledje guoktenuppelot vuođđogeađggi , ja daidda ledje čállojuvvon Lábbá guoktenuppelot apoastala namat .
Eŋgelis gii sártnui muinna , lei gollemihttosoabbi gávpoga ja dan poarttaid ja muvrraid mihtideami várás .
Gávpot lei njealječiegat , seammá guhkki go govdat .
Son mihtidii gávpoga soppiin ; dan guhkkodat , govdodat ja allodat lei seammá stuoris : guoktenuppelotduhát stadia .
Son mihtidii maiddái gávpotmuvrra ; dat lei čuođinjealljeloginjeallje állana allat olbmuid mihtu mielde , mii maiddái lea eŋgeliid mihttu .
Muvra lei ráhkaduvvon jaspisis , ja gávpot buhtes gollis , mii lei dego šelges láse .
Gávpotmuvrra vuođđogeađggit ledje čiŋahuvvon juohke lágán divrras geđggiiguin .
Vuosttaš vuođđogeađgi lei jaspis , nubbi safira , goalmmát kalsedona , njealját smarágda , viđat sardonyksa , guđat karneola , čihččet krysolihtta , gávccát berylla , ovccát topasa , logát krysoprasa , oktanuppelogát hyasinta , guoktenuppelogát ametysta .
Dat guoktenuppelot poartta ledje guoktenuppelot bearrala , juohke poarta ráhkaduvvon ovtta bearralis .
Gávpoga geaidnu lei ráhkaduvvon gollis , buhtis dego čađačuovgi láse .
Mun in oaidnán ovttage tempela gávpogis , dasgo Hearrá Ipmil , Buotveagalaš , oktan Lábbáin lea gávpoga tempel .
Gávpot ii dárbbaš čuovgga beaivvážis ii ge mánus , dasgo Ipmila hearvásvuohta čuvge dan , ja Láppis lea dan čuovga . Álbmogat vádjolit gávpoga čuovggas , ja máilmmi gonagasat buktet dohko hearvásvuođaideaset .
Gávpoga poarttat eai goassege dahppojuvvo beaivet , ii ge idja šat leat .
Buot álbmogiid hearvásvuođat ja riggodagat buktojuvvojit gávpogii , muhto ii mihkkege buhtismeahttumiid beasa sisa , ii ge oktage fastivuođa ja giellása bálvaleaddji , muhto dušše sii geaid namma lea čállojuvvon Lábbá eallima girjái .
De eŋgel čájehii munnje eallima čázi eanu mii šealgá dego kristálla , ja golgá Ipmila ja Lábbá truvnnus .
Gávpoga váldogeainnu ja eanu gaskkas lea eallima muorra mii šaddada šattuid guoktenuppelot geardde ja addá šattuidis juohke mánus .
Ja muora lasttain ožžot álbmogat dearvvašvuođa .
Ii mihkkege garuhusaid leat šat .
Ipmila ja Lábbá truvdnu lea gávpogis , ja su bálvaleaddjit bálvalit su .
Sii ožžot oaidnit Ipmila muođuid , ja su namma lea sin gállus .
Idja ii leat šat , eai ge sii dárbbaš lámppá dahje beaivváža čuovgga , dasgo Hearrá Ipmil lea sin čuovga .
Ja sii ráđđejit álo ja agálašvuhtii .
Eŋgel celkkii munnje : « Dát leat luohtehahtti ja duohta sánit .
Hearrá guhte lea profehtaid vuoiŋŋa Ipmil , lea vuolggahan eŋgelis čájehit bálvaleddjiidasas dan mii fargga dáhpáhuvvá .
Geahča , mun boađán fargga .
Ávdugas dat guhte vurke dán girjji profehtalaš sániid . »
Mun , Johanas , lean dat guhte lean gullan ja oaidnán buot dán .
Go mun ledjen gullan ja oaidnán dan , de luoitádin rohkadallat dan eŋgela guhte lei čájehan munnje dan .
Muhto son celkkii munnje : « Ale daga nu !
Mun lean dušše bálvaleaddji nugo don ja du vieljat , profehtat , ja sii geat vurkejit dán girjji sániid .
Rohkadala Ipmila ! »
Ja son celkkii munnje : « Ale bija seailla dán girjji profehtalaš sániide , dasgo áigi lea lahka .
Ellos vearredahkki ain vearrivuođas , šaddos buhtismeahttun ain buhtismeahttumin . Doahttalehkos vanhurskkis ain vanhurskkisvuođa , ja ovdánehkos bassi olmmoš ain bassivuođas . »
« Geahča , mun boađán fargga ja buvttán bálkán ja mávssán juohkehažžii su daguid mielde .
Mun lean Alfa ja Omega , vuosttaš ja maŋimuš , álgu ja loahppa .
Ávdugasat sii geat leat bassan biktasiiddiset vai sii ožžot vuoigatvuođa borrat eallima muoras ja mannat poarttaid čađa gávpogii .
Muhto olggobealde leat beatnagat , noidošeaddjit , furrošeaddjit , olmmošgoddit , eahpeipmilbálvaleaddjit ja buohkat geat ráhkistit ja doahttalit giellásiid .
Mun , Jesus , lean vuolggahan eŋgelan din lusa duođaštit dán searvegottiin .
Mun lean Dávveda vesá ja sohka , šerres guovssonásti . »
Vuoigŋa ja moarsi cealkiba : « Boađe ! »
Ja dat guhte gullá dán , celkos : « Boađe ! »
Dat guhte goiká , bohtos , ja dat guhte dáhttu , ožžos eallima čázi nuvttá .
Mun duođaštan juohkehažžii guhte gullá dán girjji profehtalaš sániid : Jos giige lasiha maidege , de Ipmil bidjá su ala daid givssiid maid birra dán girjjis lea čállojuvvon .
Jos giige váldá eret ovttage dán girjji profehtalaš sániin , de Ipmil váldá sus eret su oasi eallima muoras ja bassi gávpogis , maid birra dán girjjis lea čállojuvvon .
Son guhte duođašta dán , cealká : « Duođaid , mun boađán fargga . »
Amen . Boađe , Hearrá Jesus !
Hearrámet Jesus Kristusa árbmu lehkos buohkaiguin !