Johan Turi birra neahttačájáhus In muitte leaččan go ovdal dán birra muitalan, muhto. Sámi arkiiva ja Norgga Arkivverket lea goit ráhkadan davvisámegillii neahttačájáhusa dan oktavuođas go lea 100 jagi dan rájes go Johan Turi girji Muitalus sámiid birra almmuhuvvui vuosttaš geardde. Dan gávdná dáppe. Álgu lea buorre. Livččii baicca oba somá jus ođasmahtáše dieđuid jus gávdnet ođđa dieđuid! De han šattašii dakkár čoakkáldat mas oahppit ja studeanttat sáhttet ohcat dieđuid. Šattašii ealli neahttasiidun jus nu sáhttá dadjat. Eašš, in muitán gilkorastit dán čállosa. Dál suige leat dat maid Lagt inn av Sánis sáhkan kl. 23:50 1 kommentarer Koblinger til dette innlegget Send dette via e-postBlogg dette!Del på TwitterDel på Facebook Etiketter: davvisámegiella, dološ girji, neahttasiidu, ohcangáldu 9. okt. 2011 Sámegiella ja bloggengiella Lean dávjjibut ja dávjjibut álgán smiehttat mii dat lea mii mearrida guđe gillii olbmot bloggejit, ja earenoamážit go sápmelaččat/sámegielagat bloggejit. Leat oalle ollu sápmelaččat mat bloggejit, earenoamážit nuorat. Muhtin bloggaid čuovun dássedit, earáid guovlalan duollet dálle, ja muhtimiid lean dušše muhtomin lohkan, go lean deaivan guovlalit dan bloggai. Bloggat maid leat oalle máŋggaláganat: árgabeaivvi birra, eallima birra ja smiehttamušat eallima birra, politihka birra, fitnuideaset birra. Lea dušše okta bloggenfáddá mii lea oalle dábálaš goit Norgga bealde, man birra in leat báljo gávdnan sápmelaččaid bloggain, fágadidaktihkka. Máŋgii boahtá ge jurdda manne nu máŋggas vállljejit čállit dáro/ruoŧa/suomagillii ovdal go sámegillii. Na dien suomagiela in dieđe, go in máhte dan mađege ahte máhtán lohkat ja ipmirdit sisdoalu. Dan dihte maid in dieđe leat go sápmelaččat geat čállet vai earát. Duođasge in dieđe eará suomabeale blogga go Sámedikki ságadoalli, dan dihte go son čállá maiddái davvisámegillii. Mii dat lea dasto mii mearrida guđege čállingiela válljema? Manne válljejit čállit sámegillii, dárogillii/ruoŧagillii, suomagillii dahje vaikko ruoššagillii? (In dieđe leat go nu galle eará sápmelačča go Rauna Kuokkanen gii čállá eará gielaide. Duohtavuođas in leat gillen iskat.) Mearrida go dat ahte geaidda guhtege čállá? Geaid sii dáhttot oláhit iežaset čállosiiguin? Movt dát váikkuha sin giellaválljema? Sámepolitihkkárat gal dieđusge háliidit joksat iežaset válljejeddjiid, ja go dilli lea nu ahte eai buohkat hálddaš buot sámegielaid, de válljejit giela man buohkat ipmirdit. Vai? Dien dáfus gal Klemetti Näkkäläjärvi bargá nu go sárdnida. Son čállá iežas blogga guovtti giillii vaikko lea eambbo bargu. Ja diesa gal liikon. Jus galgá vuoruhit sámegiela, de ferte daguiguin maid dán čájehit. Muhto naba earát? Movt sii leat válljen giela? Manne leat válljen nu go leat válljen? Ja manne mun dán smiehtan??? Lagt inn av Sánis sáhkan kl. 19:30 1 kommentarer Send dette via e-postBlogg dette!Del på TwitterDel på Facebook 29. juni 2011 Stávvaliid birra ja movt stávvaljuohkima sáhttá gullat Stávvaliidda máhttit juohkit sániid lea oalle dárbbašlaš go galgá čállit sámegiela. Suomagiela álgooahpahusas lea stávvaljuohkin leamaš hirbmat dábálaš. Sihke čállima ja lohkama leat oahpahan stávvaliiguin. Seamma prinsihpa berrešii atnit maiddái sámegiela lohkan- ja čállinoahpahusas. Ággan dasa lea ahte sámegielas leat ollu guhkes sánit, guovddáškonsonánttaid dássemolsašupmi nubbi. Muhtin stávvaljuoguid lea váddáseabbo go earáid gullat. Dalle lea buorre vuohki guldalit movt njálmmi siste leat njuovčča, bánit ja vuoiŋŋanas go olle stávvala lohppii. Jus mat it dieđe sihkkarit galgá go leat -lg- vai -lgg- go galggat čállit mun vuolggán. Dalle dajat sáni vuosttaš stávvala, /vuolg-/. Go ollet vuosttaš stávvala lohppii, de bisánat ja guldalat njálmmis movt lea vuoiŋŋanas. Vuoiŋŋanas lea bisánan, ja ii gullo jietna ge. Njuovčča lea maŋŋeguomi vuostá, nu go juo lea go dadjá -g-. Dát mearkkaša ahte ovddit stávvala loahpas lea -g-, nappo lea vuosttaš stávval vuolg-, ja nubbi stávval lea -gán. Jus geahččalat baicca mun vulgen, de oainnát ahte boađus lea earalágán. Go ollet vuosttaš stávvala lohppii, de gulat ahte vuoiŋŋanas boahtá, ja lea maid jietna. Njuovčča lea l-posišuvnnas. Mu vásáhus lea ahte mánát dávjá dárbbašit eambbo hárjehallat stávvaljuohkima gullat dalle go vuoiŋŋanas bissehuvvo vuosttaš stávvala loahpas, degomat b, c, č, d, g, k, p, t, z, ž. Orru ahte jiena gullan lea meastta áidna strategiija čállimii. Muhto fas go leat fuobmán movt njálmmi siste sáhttá guldalit jietnadagaid - ja oidnet oktavuođa čállingillii - de manná geahppaseappot hárjehallat čállit. Lagt inn av Sánis sáhkan kl. 00:21 0 kommentarer Send dette via e-postBlogg dette!Del på TwitterDel på Facebook 15. juni 2011 Geahččalatta mis dán - Båmma Dá lea neahttasiidu mas beasat oahppat muhtin lullisámegielsániid. Oahpponeavvu lea jurddašuvvon várra lullisámegiela oahpahalliid váste, muhtin sániid hárjehallat. Sánit leat bohccuid, eanadagaid, ja duodjenamahusat. Sáhtát guldalit lohkkojuvvon sániid vel. Guldal, geahča ja loga - de oainnát ahte davvisámegielas ja lullisámegielas leat ollu ovttaláganvuođat, vaikko hupmangielaiguin lea váttis gulahallat. Lagt inn av Sánis sáhkan kl. 19:54 0 kommentarer Koblinger til dette innlegget Send dette via e-postBlogg dette!Del på TwitterDel på Facebook Etiketter: lullisámegiella, ohcangáldu, sámegiella, tearbmalistu Sáhkavuorut sámegillii - ja sámegiela ovddideapmi Maŋemus beivviid lea NRK Sápmi lokten ášši go sámegielat sámediggeáirasat hupmet dárogiela Sámedikki sárdnestuolus. Mun maid imaštalan giellaválljema. Dieđusge, dárogielat áirasat han gal fertejit dárustit, ii dan sáhte vuordit ahte sii beaivvis nubbái ohppet sámegiela. In imaštala dan ge jus Áili Keskitalo ja Ann Mari Thomassen ákkastallaba ahte ferteba dárustit go lea sáhka váttis áššiin. Na... veahá gal suoli imaštalan, muhto dohkkehan sudno ákkastallama. Mii dáidit buohkat geahččalan amas gillii čilget áššiid maidda eat riekta gávnna sániid. De gal lea álkit dorvvastit dan gillii maid máhttá bures. De gal liikojin Laila Susanne Vars jurdagii ahte galgá hupmat nu ahte áhkku maid ipmirda, ja dieđusge sámegillii. Die leat muhtin sámediggeáirasat geat leat almmolaččat dadjan juoidá sin giellaválljema birra. Lea ge deaŧalaš muitit rámidit sin geat duođaid dollet sáhkavuoruideaset sámegillii, juohke háve, beroškeahttá áššis. In leat čuvvon dárkilit Sámedikki dievasčoahkkimiid, nu ahte in sáhte maidege jietnadit dan birra gii dahká nu ja gii ii. Muhto sii leat mielde čájeheame álbmogii ahte sámegillii sáhttá áššiid ovddidit, ja ođđa vuogádagaid ásahit. Eai dáidde ieža dan birra jurddašan, eai várra earát ge, ahte sii leat nuppiid giellamodeallat. Movt jur giellamodeallan? Sámegiella lea hálddahusgiellan ja politihkkengiellan oalle ođđaáigásaš. Dat lea ovdal váldán, ja ain dál váldá majoritehtagielain ovdamearkkaid movt galgá dadjat dihto áššiid vai šaddá čielggas nuppiide mii oaivvilduvvo. Go sámegielat áirras dadjá juoidá sámegillii de dát čájeha ahte sámegillii maid sáhttá hálddašit ja mearridit. Lokte giela árvvu. Ja jus deaivá vel hui vuohkkasit dadjat, de soaitá dát dadjanmálle adnot nuppes ovdamearkan dasa movt dien ášši sáhttá dadjat, nu ahte šaddá čielggasin (ja čielga sámegillii). Ja go boahtá čálalaččat, de lea vel buoret vejolašvuohta ahte dadjanvuohki cieggá vuos hálddahusbargiide, ja nu gilvojuvvo earáide maid. Buohkat geat leat čállán reivviid, áššebáhpiriid dahje fágateavsttaid leat máŋgii jurddašan movt duon dahje dán sáhttá dadjat. Dávjá ohcet girjjiin maid vuogas ovdamearkkaid. Ja jorgaleaddjit goit álo leat sátne- ja dadjanmálleozus. Juste seamma proseassa dáhpáhuvvá dárogielagiid gaskkas ja dárogillii maid. Erohus lea dušše ahte dárogiela dadjanvugiid ovdamearkkaid gávdná juohke sajis. Ja dadjanvugiid ja sániid oahpahallagohtet dárogielat mánát dallánaga go leat oahppan vuosttaš sániid lohkat. Juohke skuvlagirjjis maid sii lohket, de ohppet sii ođđa sániid ja dadjanvugiid. Omd. ii boađe automáhtalaččat dárogielat mánáide ahte mii lea sirkel, kvadrat, bergart, lungeblære. Sii fertejit daid sániid oahppat dárogillii, seammaládje go sámegielat mánát galggaše daid oahppat sámegillii. Erohus lea vuosttažettiin dat ahte go dárogielat máná oahppodiibmu lea nohkan, ja son manná olggos uvssas, de leat sus máŋga milliovnna vejolašvuođa fas lohkat sániid juogo iežaset oahppogirjjis dahje eará dárogielat girjjis dahje interneahttasiiddus man lea fuobmán lohkagoahtit. Go sámegielat mánná lea oaidnán sániid gierdu, dássesiiddot njealječiegat, báktešládja, geahpesbullji ja son lea mannan uvssa olggos - ja oahpaheaddji sihkkon távvala - de ii dáidde sániid šat oaidnit. Jus mánás lea dat lihkku ahte lea oahppogirji masa dát sánit leat čállon, de dieđusge beassá das logadit dan. (Jus gille maŋŋel skuvlla lohkat oahppogirjji) Vátnásat leat dat girjjit main sámegillii dáid birra čilgejuvvojit muđui. Sis leat váile logenáre vejolašvuođa deaivvadit sániin maŋŋel go leat oahppan daid. (Ok, in leat lohkan juste galle, muhto unnán leat goit.) Lea go imaš go váhnemat bihkot váttisin sámegielat oahppogirjjiid? Lea go imaš go oahppit lohket váttisin sámegielsániid? Eat leat mii sámit nu ollugat ahte sáhttit dodjit earáide ovddidit sámegiela. Mun ja don (dahje dii) gii dán logat, mii dat fertet dan ovddidit. Juohkehaš máhttá ja sáhttá dan dahkat. Sámedikkepolitihkkárat geat sámástit almmolaččat, barget buoridit sámegiela árvvu, dušše dainna go hupmet sámegiela. Dáhttu šaddá dahkun. Earret eará geahččalan dáinna bloggain oažžut sámegiela oidnosii. Leat vel moadde eará bloggejeaddji geat dan dahket. Sin lean bidjan juo iežan bloggalistui. Sávvamis dađistaga gávnnan eambbo bloggejeddjiid geat čállet sámegillii. Lagt inn av Sánis sáhkan kl. 06:04 0 kommentarer Koblinger til dette innlegget Send dette via e-postBlogg dette!Del på TwitterDel på Facebook Etiketter: giellagáhtten, giellapolitihkka, sámegiella 12. juni 2011 Movt sápmelaš gullá Sámegielas lea gullat sátni mas leat máŋga mearkkašumi. Nu ii leat buot eará gielain. Muhtin vierrogielaide daddjošii gullan auditiivvalaš, kinestehtalaš dahje taktiila dovddan. Auditiivvalaš dovdda lea dat maid beljiiguin gullá, dábálaččat juogalágan jietna. (Balánsa maid lea beljiid siste, muhto gohčoduvvo earán dovddan.) Kinestehtalaš dovdda lea dat go mii gullat movt min lahtut leat, sihke movt lahtut leat eará lahtuid ektui ja movt dat lihkadit, namalassii dehkiid ja suonaid lihkastagat. Balánsa lea maid kinestehtalaš dovdda. (Ja dál leat dat bealjit maid mielde.) Taktiila dovdda fas lea go mii gullat liikkiin (dahje omd. njálmme siste) go juoga midjiide guoská. Go olmmoš gullá bákčasa, de in dieđe sihkkarit manin dovddan dan gohčodit eará gielaide. Muhto sámegillii gullá go omd. čoavji lea bávččas, dávttit dahje deahkit bávččastit. Bákčasat leat maid oba máŋggaláganat, muhto dan birra gal ferte eambbo čállit eará teavsttas. Lagt inn av Sánis sáhkan kl. 20:31 0 kommentarer Koblinger til dette innlegget Send dette via e-postBlogg dette!Del på TwitterDel på Facebook Etiketter: davvisámegiella, sátni 28. mai 2011 Ii oidnon fal ii garjá ge. Amma leat dien dadjanvuogi gullan máŋgii? Leat go jurddašan dárkilit manne olbmot nie dadjet? Garjá čuvvoda eará stuorebuš elliid ja lottiid, dego ealggaid, bohccuid, riebaniid, goaskiniid ja eará elliid main sáhttá oažžut biepmu. Mu ipmárdusa mielde ferte garjá borrame gáhkiriid, go gos ealga, doppe maid garjá. Ja nuppegežiid, gos garjá rágáda, doppe gal lea ealga maid. Dahje eará ealli. Garjá gal álo ráhku go olmmoš lahkona. Garjjá bargu lea suodjalit ealli man čuvvoda. Dalle sus lea sierra vuohki rágádit. Garjjás leat máŋga jietnadanmálle, dan mielde maid áigu muitalit. Muhtomin go humada eará garjjáiguin, de iešguđetládje jietnadallá. Galggat guldalit go garjját humadit gaskaneaset. Go oahppagoađát garjjáid giela, (ii fal garjjágiela - dat lea juoga eará) de šaddá hui somá guldalit sin. Sámegillii leat iešguđet sánit garjjá jietnadanmálliide. Dá leat muhtimat maid lean gávdnan Konrad Nielsena sátnegirjjis "Lappisk (samisk) ordbok" (KN): Gáhkut (KN sv. gakkot) harke; P også om kråken, når den låter som om den harket op ngt. Gálgat (KN sv. gal'gât) Ráhkut (KN sv. rakkot) Ruŋkit (KN sv. ruŋ'ket ~ kruŋ'ket (Muhto dan hámis čujuha KN ruŋ'ket-sátnái.) Kluŋkit Gávdnojit sihkkarit eambbo sánit maid. Lagt inn av Sánis sáhkan kl. 15:39 Send dette via e-postBlogg dette!Del på TwitterDel på Facebook 20. mai 2011 Rosa-blogga Heihei, odne lean mun nai šaddan rosa-bloggejeaddji. Dat bloggat dat leat vissa hui bivnnuhat. Ja jus mun dáinna lágiin oaččun ollu lohkkiid ja sin (loga: du) vel beroštit sámegielas, na mannes ii? Diet "rosa" han livččii muđui rievttimielde čuvgesruoksat. Muhto leabat dat nu feansi (eŋg. fancy) dadjat "čuvgesrukses vebbačálus"? Gal dat veahá muddu ja mearri ferte dál modearna áiggis :-) Lagt inn av Sánis sáhkan kl. 23:25 Send dette via e-postBlogg dette!Del på TwitterDel på Facebook Etiketter: summal Knud Leem čilgen Finnmárkku sámiid birra Knud Leem lei dološ dutki gii dutkkai sápmelaččat. Erenoamážit Finnmárkkus. Jagis 1767 son čálii girjji "Beskrivelse over Finmarkens Lapper, deres tungemaal, levemaade og forrige afgudsdyrkelse" čilgenhussan Danmárkku-Norgga gonagassii. Ja don beasat maid dan lohkat nuvttá Google-booksas. Mu mielas lei veahá váttis lohkat, go lea čállon gohtalašbustávaiguin dáro/dánskagillii. Dat giella lea maid hui amas, go lea čállojuvvon dološmállet gillii, dološ čállinvuohkái. Muhto muhtin čáppa beaivvi go lea hirbmat buorre áigi, de áiggun lohkat. Dáidet gávdnot hearvás ságat ja čuoččuhusat sámiid birra. Knud Leem lea eambbo maid čállán, earret eará sátnegirjji. Dan ferten muhtin beaivvi ohcat nago dette gávdno nuvttá interneahtas. Lagt inn av Sánis sáhkan kl. 21:05 0 kommentarer Koblinger til dette innlegget Send dette via e-postBlogg dette!Del på TwitterDel på Facebook Etiketter: dološ girji, Knud Leem 19. mai 2011 Mannan dego Noá garjá... Gal don fal dieđát movt de lea, go lea mannan dego Noá garjá? Jus it: Dát dadjanmálle vuolgá Biibbala muitalusas Noá ja su árkka birra (1. Mos 8, 7, dahje neahttabiibbalis) Ipmil han gohčui Noá dahkat stuora fatnasa, árkka, masa galggai váldit juohke ealli šlájas moadde ja iežas olbmuid go galggai šaddat suttu ulli. Dasto arvvii guuuuhká. Go vuos buohkat ledje čohkkádan árkkas bealgávccát mánu (hirbmat gierdevaš olbmot ja eallit gal, muhto maid bahal dihte), de cohkkui árka, ja Noá luittii garjjá olggos ihkkonráigge. Garjá várra livččii galgan boahtit fas ruovttoluotta muitalit makkár lea olggobealde, muhto maid bat dat? Ii hal dat gal šat oba boahtán ge árkka lusa, ii ge muitalan makkárge ságaid, muhto girddašii miehtá, gitta dassážii go goikkai eanan. (Ja gearddi goit garjá ge nu mášai ahte ii muitalatta buot maid oaidná. Galggašii nu máššat vel ealgabivddu áigge nai) Na dat lei goit de mannan dego Noá garjá. Dán áigge maid lávejit dadjat olbmuid birra nie, go jávket eai ge boađe. Eandalii jus galggaše fas boahtit dahje máhccat mohkistis. Lagt inn av Sánis sáhkan kl. 20:51 Send dette via e-postBlogg dette!Del på TwitterDel på Facebook Etiketter: Biibbal, dadjanmálle, davvisámegiella, garjá, sámegiella Ii leat dehálaš gii mun lean. Ja gos mun lean. Dušše čálán, ja don logat jus háliidat. Giitu go it valdde divttaid iežat dihorii, muhto báicce vurket daid iežat váibmui.. Dikta maid lean áigá čállán. Lea imáš, muittán dego livččen ikte čállán maid lean jurddašan go dán lean čállán. Ja ii dat leat vel duvdon, muhto varrage lean oahppan dainna eallit. Dahje lean goit oahppame dainna eallit. Sávvamis. Juoga ládje goit. Lávejit lohkat jahki ii leat jagi viellja. Muhto sáhttá maid varra lohkat ahte beaivi ii leat beaivvi viellja. Ja diibmu ii leat diimmu viellja. Movt sáhttá nu rievddihit. Nu jođánit. Olbmo dovddut. Olbmo máilbmi. Olbmo ilbmi. olbmo miella. Hálbbes jietnagirji, vuosttáš jietnagirji Dakkár girjjit maid earát leat lohkán báddái vai don ieš it galgga dárbbašit daid bustávaid lohkat. Don čohkkedat dušše stullui, ja guldalat. Gávdnojit máŋggaláganat, dakkár mas lea čuojanas, dakkárat mat leat CD’áin ja dakkárat mat leat MP3 CD áin. Mun lean jurddašan ahte mun galggašin maid diekkára gullat soames háve. Muhto oalle divrasat dat leat go neahtas galgá oastit. Muhto dal ledjen Samvirkes, dahje Coop’as dáppe Guovdageainnus. Doppe ledje dakkárat hui hálbái. Muhto MP3’eš, nu ahte ferten gal ieš bidjat daid iežan Ipodai dahje juoga nie. Muhto in go mun gal dan nagot! Ja heive hui bures dal go áiggošin álgit vázzit skuvlii, de mun sáhtán dan gullat seammás. Sahkki makkár girji? “The Secret Life of Bees” maid Sue Monk Kidd lea čállán. Ledje 5 iešguđetlágan jietnagirjji Coop’as. Ja mun válljejin dien. In dieđe gal nu olu dan birra. Dieđán dušše ahte lea ráhkaduvvon filbma das. Šaddá somá lohkat....ii fal lohkat muhto GULLAT dan girjji. De beasan varra diehtit liikon go mun jietnagirjjiide. Vai oahpan go dušše ahte in liikon dan dihto girjái? Oaidnit leaš šattan go oba ge gullat dan, go ii hal dat leat sihkar ahte mun vel ge šattan vázzigoahtit bargui... Čállán Elle kl. 19:10 1 kommentarer 23.09.09 Platespiller- Pláhtta čuojanas? Mii dat lea sámegillii? Pláhtta čuojanas? Hmmm.... Mus goit lea dakkár. Ja mun nu liikon dasa. Lea somá bidjat pláhta jorrat, dat jorrá ja jorrá ja musihkka čuodjá lanjas. S-O-M-Á! Ja dasa lassin mus leat aivve dakkár eará musihkat maid čuojahan dainna. Go eai han mus leat gal pláhtat dain ođđa šuoŋain. Olu ovddeš musihkat doppe gal gullojit. Mus lea earret eará Áillohačča pláhtta maid “Juoigamat”. Jazz pláhtat, ja maid Elvis! Elvis!! In gula muđui gostege. Ja soaitá ge danne maid lea nu somá dan pláhtta čuojanasa bidjat čuodjat go juo gullo dakkár musihkka das maid in muđui gula nu olu... Muhto lea mus gal Marit Larsen maid. Dat lei divrras oasttit áibbas ođđa pláhta, muhto lei dan veara. Dasto; Rema 1000 leat ođđa eaiggádat/hoavddat. Ovdal leigga guokte nissonolbmo, dal leaba guokte dievdoolbmo geat hoideba min ráhkis rámbuvrra Rema 1000. Na mii han leat don dolin juo gávppašan dieppe, dan rájes go das lei namma Hættas landhandel, 1-2-3 Bravo, Spar ja dal Rema! Ja dan gova mun govvestin duo go ledjen doppe: Čájeha go diet govva ahte dal leat dievddut “In charge”? Hui máŋga iešguđetlágan vuollagat. Dutnje gii daid háliidat. Muhto dal ii leat šat áigi, ferten molsut pláhta. Ii okta pláhtta čuoja nu guhka... Čállán Elle kl. 16:49 2 kommentarer 16.09.09 Studeantan ruovttubáikkis Leat studeantan ruovttubáikkis lea varra oalle earálágan go leat studeantan eará báikkis. Studeanttat geat leat juo moanat jagiid studeren Sámi Allaskuvllas leat munnje muitalan ahte dávjá sii vigget lágidit studeanttaide deaivvademiid, muhto dain ii šatta mihkkege go dušše 3-4 ain bohtet. Ja ahte dat dieđus ii movttiidahte sin bargat šat dađi eambbo dainna. Dan gal ipmirdan. Muhto nuppi bealis de ipmirdan maid sin geat leat bajásšaddan dáppe, ja geat lohkagohtet sámi allaskuvllas. Sii han dovdet Guovdageainnu gilis measta juohke čiega, ja sis hui sihkkarit leat olu olbmát juo, ja dieđusge fuolkkit ja oahppasat geaiguin ovttastallet. Sis dáidá iežaset biras (nu go dáčča lohka, nettverk!), ja de varra ii leat sis dárbu daid studeantta hommáide? Mun studeregoađán dal Sámi Allaskuvllas. Mun lean bajásšaddan Guovdageainnus. Mun orun ruovttus. Dárbbašan go mun daid studeantta hommáid? Dárbbašit go studeantta hommát mu? Go lohken Romssas de mun goit dárbbašin studeanttahommáid, dáppe in vel dieđe. Mun ledjen goit otne doppe meahccetuvrras eará easkaálgi studeanttaiguin. Mu mielas gal lei somá! Váikko eai lean nu ollugat boahtán (imáš? Sii eai varra diehtán ahte doppe lei nuvttá biebmu!), ja eske beaivet oidnen skuvllas olu guovdageaidnulašstudeanttaid geat eai lean boahtán dan deaivvadeapmái. Muhto, mii leimmet eará báikki studeanttat, ja maid dáppe olbmot, ja MIS goit lei somá. Illudan dakkár eará studeanta hommáide. Ferten gal mieđihit ahte in mun ge áigon álggos vuolgit dohko. Go mus rievtti miel ledje olu eará doaimmat dáppe ruovttus. Ja die jahkán ge ággan manne mii, ruovttus orru – báikkálaš studeanttat – eat leat nu čeahpit sosialiseret. Mis leat nu olu eará doaimmat vel lassin. Ruovttuin. Bearrašiiguin, fulkkiiguin ja olbmáiguin. Mu mielas mii gal fertet beassat daid doaimmaid doaimmahit, go jahkán ollugiidda lea nu, ahte dát leat maid ákkat manin mii justte ruovttubáikkisteamet leat háliidan studeret! (In dan gal oaivvil ahte eará guovllu studeanttain eai leat dat hommát, sis gal maid leat váikko man olu doaimmat, muhto jahkán dat lea eará ládje. Soaitá. Ii soaitte nu.) Aŋkke, gal mii báikki olbmot, studeanttat, galggašeimmet gal studeanttabirrásis maid leat oassin. Amma nu? ;-) Mun áiggun goit geahččalit joksat sihke studeantta lágidemiid, ja iežan ruovttu ja ruovttubáikki doaimmaid. Oaidnit leaš, nagodan go mun dan! Otne lei mis vuosttáš logaldallan. Guokte diimmu dan fágas mas mun galggan lohkat 10 čuoggá. Hm.. orui goit ok fága diet, ja aŋkke HUI dehálaš juohke ohppui, dahje fágii maid maŋŋá áigu lohkat. Dieđalaš Čállin lea namma. Otne logai logaldalli juoidá maid mun bidjen muitui: Son gii giela máhttá lea fámolaš! Dat lea duohtavuohta De viššá!!!!! Čállán Elle kl. 19:00 1 kommentarer 15.09.09 Guokte balddonasa! Ikte lei ja odne lea/lei “beaivi maid lean vuordán aht’ vuordán”. Iluin ja baluin. Ikte devden mun vihttagoalmmátlot jagi. G-U-O-K-T-E-L-O-G-I ja vel V-I-H-T-T-A!!! Orru gal mu mielas oalle olu. Jahkán mus lea dakkár 25 jagi kriisa!! Ha-ha! Muhto jahkán ahte dan birra čilget... ii heive deike. Nubbi balddonas, lei otná beaivvi dáhpáhus. Skuvlaálgin! Balddonas? Jua, munnje goit. Lean eallán juo nu guhka, na nugo logat das badjelis, olles 25 jagi. Ja in leat vel naga ge oahpu gazzan. Joatkkaskuvllain gal lean geargan, muhto “That’s it”!. Doavtterskuvllas ledjen jagi, dalle mun galgen doavttirin šaddat, Oalle jođánit gávnnahin ahte in mun makkárge doavttirin gal šatta. Die ii lean mu geaidnu, ii lean dat maid mun háliidin. Ja jahkán dat gal lei buorre buohkaide, mat dal eai dárbbaš mu pasieantan šaddat! Ná, ja dalle mun lohken vel ex-phil go lei oassi vuosttáš jagi profešuvnna oahpus. Ja die de oainnát. Die lea maid mun lean lohkan skuvllaid. Oalle unnán! Lea go imáš ahte balan jamas go soames namuha skuvlla munnje? Mu mielas goit ii leat! Mus lea varra dat nu gohčoduvvon skuvla fobiija!! Jus fal dat leačča juoga. Na mu máilmmis goit lea dat juoga. Juoga mii lea oalle mihá nanus maid. Ja go olbmot hupmet muinna, de eai jáhke ahte mus ii leat oahppu obanassiige, imáš! Maŋemus áiggiid lean ges muitalan oahppasiidda, go jerret maid DÁL áiggun bargat, ahte lean álgime lohkat Sáme -giela ja girjjálašvuođa Bachelora. Dahje nu go duođai lea “Bacheloroahppu sámegielas ja sámi girjjálašvuođas”(In mun oro diehtime dan rievttes nama, dien nama fertejin Sámi Allaskuvlla siidduin viežžat!:p) . Go muitalan dan oahpu birra; de lea čuovvolangažaldat olbmuin “Mii don de šattat?” dahje “Maid ban dainna?” dahje “Manne?”. Juo, lean mun dien jearran alddan maid máŋgii. Vástádusat; “In dieđe mii šattan! Oahpu goit oaččun.” – “Na dainna mun sáhtán sihkkarit olu osiin sámi servvodagas bargat! Jahkán aŋkke adnot!” – “Manne? Danne go dá lea mas mun beroštan. Giella. Sámegiella. Girjjálašvuohta. Danne!” Olbmot geat leat dovdan mu guhka dahje dovdet mu bures, dihtet ahte lean veháš dakkár “giella-freaka”, dahje beroštan eambbo gielas go earát (na ii gal eambbo go buohkat, muhto eambbo go ollugat). Ja hui dávjá dolket oahppasat munnje go mun álo divun sin ja iežan giela, ja go álo álggán digaštallat manin mii lohkat ná eat ge nuo, ja manin galggašii ná iige nuo lohkat! Muhto lihkkus dan “giella-frekas” leat olu eará “giella-freak” olbmát maid, oalle lunddolaš dat jahkán. Lean maid beassan iežan giellaberoštumiin bargat Sámi Radios gos ovdal bargen. Go ráhkadeimme bargoskihpárin “Giella Gáren” radio ráiddu. Dan sáhtát gullat dáppe http://www1.nrk.no/nett-tv/klipp/300702 (In ipmir manne dal in máhte ráhkadit leaŋkka!) Goitge; sihke ivttá ja otná beaivvi lean ceavzán. Devden 25 jagi, ja otne ledjen ain heakkas. Ledjen otne vuosttáš beaivvi skuvllas, ja lean ain heakkas. Ja lei mu mielas somá. Na somá lei goit dan skuvllas. Illudan oaidnit movt šaddá, ja ceavzzán go. Ja lean go ain lihka mielas dan ohppui jagi geahčen go maid dal lean. De nie! Somá lei maid go Allaskuvlla rektor logai; “Jus eallin ja dearvvuohta!” rahpansártnistis otne. Na- a, nu lea ge, jus eallin ja dearvvuohta de mun deavddan vel eambbo jagit ja boarásnuvan eambbo aht- eambbo (26-27-30(!!) jna.). Ja gaccan eambbo aht eambbo oahpu (bachelor – master – doavttirgráda(!!)). De nie! Ná, die lei jus eallin ja dearvvuohta...ja lohkanmokta! Čállán Elle kl. 18:56 0 kommentarer 09.09.09 Otná dáhton Ii go son čakča leat dat buorre bloggenáigi. Soaitá, ii soaitte. Otná jurdda lea goit dan otná dáhtona birra, lea go erenoamáš beaivi dušše dan dihte go dáhton lea 09.09.09. Gullen radios, Sámi Radios ahte otne náitalit váikko man oallugat. Bistá go son náittosdilli guhkit go dakkár somás dáhtona náitala? Hehe. Soaitá nu. Na dalle hal fertešii doapmat gávdnat alccesis guoimmi vai beassá náitalit boahtte jagi (10.10.10) dahje maŋit jagi (11.11.11). Muhto jahkán maid ahte livčče lihka erenoamáš jus náitalivčče ja dáhton livčče 20.10.2010, ii bat dat livčče čaffat? Gullen maid ahte olbmot leat doivon ahte máilbmi loahppa lea otne. Na, geahčan laseráigge, ii oro oidnome gostege máilmmi loahppa gal. Beaivváš baicce báittaša. Soaitá ahte máilbmi loahppa boahtá easka 10.10.10 dahje jagi maŋŋá? Dat gii ealla beassá dan vásihit. Aŋkke, dat dáhton lei goit dan háve nu erenoamáš ahte mun fertejin čálistit iežan bloggii. Vai mun ge dan erenoamáš 09.09.09 lean čálistan juoidá deike.