О.Уляшевлöн сiдз шусяна «мöвпъяс» йылысь

Тавося кос му тöлысьö «Войвыв кодзув» журналын петiс Олег Уляшевлöн «Орöм вужъясысь кыöм кыввор» статья, юргижöд улас содтöма: «Цыпанов Е., Безносикова Л. Выль коми кыввор. Сыктывкар. 2005» видлалöм бöрын чужöм мöвпъяс». Тайö гижöд йывсьыс вöлi пасйöма «Коми му» газетса öти номерын журнал петтöдзыс на. Миянлы зэв окота вöлi тöдмавны, мый йылысь гижö уджъёртным (ми сыкöд уджалам öти Институтын, пырам туялысьяслöн öти сöветö). Выль кыввор (лексика) чукöртам дас воысь унджык нин, йöзöдлiм «Выль коми кыввор» 1997-1998 да 1999 воясö, но тайö уджъяс йывсьыс О.Уляшев миянлы ни öти кыв эз на шулы, нинöм эз юавлы. Эз немтор йöзöдлы и газет-журналъясын, тöдöмысь, сэки уджсö абу аддзылöма. Öнi жö чайтiм, гашкö, мися, выль кывъяс, фольклористикаысь да этнографияысь выль коми терминъяс вöзъяс.

Журнал петöм бöрас гижöдсö сылысь лыддим да шемöсö усим: кывтуялан наука ни материал боксяньыс нинöм выльыс да киö босьтанаыс гижöд пöжалысьыслöн абу. Став мöвпъясыс сылöн вöлöмны дзик öтпöлöсöсь: выль кывворыс пö коми кывйын ковтöм да нинöм бурсö оз вай. Гижöдас авторыс лёкöдö и кыв материалсö, и кыввор лöсьöдысь-паськöдысьяссö. Сорсьöма и небöг нимсö пасйигöн, а статьяыс тырöма лöглунöн, ковтöм агрессияöн.

Быд литературнöй кыв сöвмигöн кадысь кадö пансьывлö выль кывъяс вöсна вен. Тайö быть лоанатор. И медводз сы вöсна, мый öтияс артмöдöны выль кывъяссö, мöдъяс сувтöны налы паныд. Татшöм веныс, бура кö подулалöма, отсалö бöрйыны кывлы коланасö. Нöшта нин сэк, кор вензьöны ышнясьтöм, вежавидзысь йöз, кывсö пыдiсянь гöгöрвоысьяс да гöгöрбок донъявны кужысьяс. И зэв лёк, кор венö кутчысьöны ошйысьысь, вылö пуксьысь йöз, кор татшöм уль пöжасъяссö гижöны дилетантъяс, лингвистикаын абу специалистъяс, унатор гöгöрвотöм йöз. Сэки веныс векджык пöрö зык-шумö. Буретш тадзи позьö гöгöрвоны О.Уляшевлысь гижöдсö.

Позис эськö унатор не пуктыны пыдди О.Уляшевлöн статьяысь; вежöра мортöс, дерт, оз ылöд сылöн гижöдыс; век жö лыддям коланаöн вочавидзны – а друг кодкö и збыльысь эскас Олег Ивановичлы – ciйö жö филологияса кандидат. Но филологияыс öд зэв паськыдтор; кывтуялöм да фольклористика, литературоведение да источниковедение ёна нин разалöмаöсь, а Олег Иванович коми кывсö некор эз туявлы.

Кыв-мöд лоö шуны статья гижысьлöн тöдöмлун йылысь. Сiйö ёна велöдö кыв туялысьясöс – словаръясöн вöдитчыны, и комиöн сёрнитны, и кывтö дöзьöритны... А тыдовтчö, мый университетын велöдчигас ачыс пель пöвнас кывзöма кывтуялан курсъяссö либо унатор нин вунöдöма.

Босьтам кöть татшöмтор: О.Уляшев, тыдалö, оз тöд, мый словаръяс дасьтöм-тэчöм – лингвистикалöн торъя юкöн да нимыс сылöн лексикография. И сы выло колö уна кад да тöдöмлун, гашкö, и унджык на семиотикаын нырччöм дорысь. Казьтыштам, мый эз öтдортны тайö кывкутана уджсö нималана туялысьяс Д.Н.Ушаков, А.П.Евгеньева, С.И.Ожегов, О.С.Ахманова, Н.М.Шанский, В.И.Лыткин, Е.С.Гуляев, Д.Фокош-Фукс, Й.Вихманн да уна-уна мукöд. А В.И.Даль 50 во чöж öктiс кывъяс, кöть и уна мукöдтор кужлiс вöчны.

Нималана туялысьяс лыддьöны, мый словар – кывлöн рöмпöштан, сы серти донъявсьö кывлöн озырлуныс да аслыспöлöслуныс, воссьö сылöн вежсьöмыс да войтырлöн историяыс. Быд сикас кывчукöрыс колö, тшöтш и неологизмъясöн тöдмöданаыс. И сöмын О.Уляшев лыддьö «Выль кыввор» сяма уджъяссö дзик ковтöмöн: 1700 чукöртöм юркывйысь абу пасйöма ни öти лöсялана-туянатор!

1983 воын академик Б.А.Серебренников волiс Сыктывкарö да сёрнитiс Кыв, литература да история институтса уджалысьяс водзын. Лыддьöдлiс сiйö могъяссö, кодъясöс колö збыльмöдны коми кыв туялысьяслы. Медшöр да медводдза могöн сiйö индiс кывчукöръяс дасьтöм.

Тыдалö, кывчукöрлысь тöдчанлунсö буретш гöгöрвоöм понда век на вичмöдлiсны сьöм кывкудъяс дасьтöм да лэдзöм вылö миян республикаса министерствояс, торйöн кö, культура да национальнöй политика министерство, йöзöс велöдан да вылыс тöдöмлунъяс министерство. Сьöмöн отсалiсны и Россияса кывкутысь котыръяс – небöг лэдзан Федеральнöй уджтас да Федеральнöй торъямога уджтас серти, а сiдзжö гуманитарнöй наукалöн фонд. Миянлысь öтувъя бöръя небöгсö йöзöдöм вылас сьöмсö лишöдiс Финляндияысь М.А.Кастрен котыр. Öти сайын аттьöалам котырсаöс тайö зэв колана отсöгысь.

Сёрнитны кö «Выль кыввор» йылысь, колö пасйыны, мый сiйö абу мукöд кывчукöр кодь удж, тайö – рочöн кö, новая лексика, неологизмъяс фонд. Филологлы зэв ясыд, мый небöгсö абу дасьтöма кывчукöръяслöн стрöг принципъяс серти. Сiйö лоана кывчукöръяслы лес (мöд ногöн кö, материал, подув). Сэтчö öктöма выль да выльмöдöм кывъяс, кодъяс чужисны бöръя кадö комифилъяс зiльöмöн. «Выль кыввор» небöг водзкывйын сiдзи и пасйöма: «Сылöн шöр могыс юöртана, абу донъялана; олöмыс да кывйöн вöдитчан практикаыс ачыс вочасöн бöръяс медколана да медлöсялана кывворсö». А сэсся нин быд коми морт – аслас видзöдлас, сямлун, кывлысь аскиа лунсö гöгöрвоöм серти – бöръяс, вöдитчыны-ö тайö выльторнас. Мырдöн некод оз тшöкты йöзсö (шуам, Уляшевöс ли кодöс ли) сэтысь пырысьтöм-пыр ставсö пыртны сёрни-гижöдö.

О.Уляшев абу гöгöрвоöма тшöтш, кытысь лои босьтöма небöгö чукöртöм материалсö. Небöгö öктöм быд вылькыв бöрын пасйöма, кодi сiйöн вöдитчöма да кутшöм гижöдысь босьтöма, быд видлöг бöрын скобкаын сетöма ним-ов либö газет-журнал да мукöд татшöм пасъянтор. Сiдз, нывбур, райкар – Ю.Васютовлöн; быгылъ, иналун, ожман, öдйöа – Г.Юшковлöн; кывпас – Н.Куратовалöн; анытуй, мортлун – В.Лодыгинлöн; кывкуд, небöгкуд, подувму, подувйöз, кывбуркуд – Е.Игушевлöн; йöзсикас, мувый, кывбуравны – Г.Беляевлöн; вежлöг – Г.Некрасовалöн; нимвежтас – Г.Федюнёвалöн; мичкыв – В.Мартыновлöн; няньпиян – И.А.Куратовлöн да с.в. Дерт жö, кызвыныс гижысь войтырлöн да кыв туялысьяслöн. И кодi на пöвстысь оз куж сёрнитны коминас, кыдз оз öтчыд пасйы О.Уляшевыс? Г.Юшков, Е.Цыпанов, В.Тимин? Мыйла абу урчитöма да стöча индöма, кодöс кутö тöд вылас статья гижысьыс?

Видлалана гижöдас эм уна нелючкитор. Коми лингвистикалысь зумыд тöдтöмлун вöснаыс О.Уляшев унатор гижöма шыбöльöн, тöдтöг, дзуглалöмöн. Статья медводдза лист бокас шуöма, кызьöд-комынöд вояссянь пö öнiя гижöдö кольöма «кызь гöгöр кыв» (62 л.б.). Збыльысьсö 20–30 вояссянь кольöма ёна унджык, сэтысь миян культураыс дзоньнас петö да сэкся рокöс вылас кутчысьö-олö.

Зэв паныд О.Уляшев мыйлакö улмö кывлы; войдöр комияс тадзи шулывлöмаöсь яблöк. Улмöыс пырлöма булгар (важ чуваш) кывйысь, XIX нэмын Г.С.Лыткин на пасйöма аслас кывчукöрас. Но О.Уляшев тайö кывсö видлалiгöн веськыда сöрöма, абутöмторсö гижöма: «Лыткиныс босьтöма кывсö Н.Поповлöн ки помысь гижöм словарысь, а Поповыс лöсьöдлiс словарсö Вöлöгдаын кызвынсö зюздинса коми да сэтшöм-татшöм шойданникъяс кыв подув вылын» (64 л.б.). Збыльысь жö вöвлöм штабс-капитан Николай Павлович Попов (1801–1873) аслас уджъёртъясыскöд 20 воысь дырджык лöсьöдлöма нёль тома роч-коми кывчукöрсö сэкся Усть-Сысольскын буретш миян зырян-коми йöз сёрниысь. Тайö ыджыд уджас 70 сюрс гöгöр кыв. Сылысь фотокопиясö ньöбöмаöсь да вайöмаöсь республикаса войтырлöн библиотекаö. Чайтсьö, мый улмö кыв лöсялас важ олöм-вылöм йылысь роман-повесьтъясын сэкся коми сёрни серпасалöм могысь.

Да, тыдалö, О.Уляшевлы абу тырмöма кадыс бурджыка тöдмасьны кутшöмсюрö коми гижöдъясöн. Сiдз, абу лыддьöма аслас земляк П.Шаховлысь «Вежон кежлö том кадö» небöг да синчöжöсь кыв гöгöрвоöдö сöмын сiдз, кутшöм вежöртас тöдса сылы. Да и мыгöрлэптöм дöзмöдö О.Уляшевöс. Пасъям, мый тайö выль кывсö артмöдысьыс пeтic вермысьöн бодибилдинг кыв комиöдан венласьöмын. Кывъяссö бöрйис комиссия. Та йылысь юöртлiс «Коми му» газет. Руочи, рубöж, кидöс кывъяс паныдасьлöны зэв тöдчана да лыддьысьысьлы сьöлöм вылö воана «Бива» романын. И сэн жö нималана коми гижысь Г.Юшков гöгöрвоöдö найöс лист бок помын (видзöд «Войвыв кодзув», 1996, 2 №, 13 л.б.). Статьяын сорсялöмöн пасйöма и коми гижысьясöс: В.Куратовлысь киллюшка кыв сюйöма Г.Юшковлы. А вот лёк дук петан розь кывйитлöс ёна воöма сьöлöс вылас! Сiйöс кывлöма, буракö, Г.Г.Бараксановлöн лекцияысь. Кöть тайö кывйитлöсыс абу öнiя кадся некутшöм кывчукöрын, бöбйöдлö лыддьысьысьöс да пыртö «сöдз коми пыдöсысь» кыпöдöмтор лыдö.

Шемöс босьтö: филологöс кезйöдлö кывйын выльтор чужöм-писькöдчöмысь да сiйöс öтлаö чукöртöмысь. Бара жö лоö юöртны, мый кыв туялысьяс-лексикографъяс быдлаын вöчöны татшöм удж. Сiдз, немеч кывъясысь мездысигöн да ас кыв водзö сöвмöдöм ради Венгрияын артмöдöмаöсь-лöсалöмаöсь 10 сюрс гöгöр кыв. Абу повзьöмаöсь кыв выльмöмысь, вуж орöмысь. Роч языковедъяс чукöртöны да быд во йöзöдöны выль кывъяссö 1971 восянь «Новое в русской лексике» небöгъясын; быд петасын налöн 1500-2000 гöгöр кыв да кывйитлöс. Финляндияын йöзöдöма 6000 кывъя Uusi sanasto – 80 (Выль кыввор – 80) нима кывкуд. И оз кывсьы, мый кодкö пинь мурч курччымöн скöрмö татшöмторсьыс. Оз эндöдны чукöртан уджсö и Марий Элын. Сiдз, проф. И.Г.Иванов йöзöдiс торъя небöг, кытчö öктöма кык сюрс сайö вылькыв да кывйитлöс. А мыйысь мыжмисны «Выль кыввор» дасьтысьяс? Выльторсö öктöмысь? Небöг лэдзöмысь? Али лыддьысьысьöс тöдмöдны зiльöмсьыс?

Чуйман, кыдзи филолог вермö вежньöдлыны выль кывъяслысь юкöнъяссö. Весиг школаын велöдчысь висьталас: вежлöг кыв артмöма абу веж да лöг кыввужъясысь, а вежлавны кыввужйысь -öг суффикс отсöгöн.

Уна выльтор позьö артмöдны и -mac суффикс отсöгöн; йöз сёрниын и гижöд кывйын эмöсь изьватас, мутас, гöгöртас, рудовтас торъякывъяс. Сiдзкö, и уджтас кывйыс бура лöсялö да шогмö «программа» вежöртасын. О.Уляшев дзик сорлалöмöн юкö кывсö удж да mac юкöнъяс вылö, уджыслы пö лоö тас, пом (62 л.б.). Эжва йывса олысьяс, Уляшев ног кö чайтны, нимтöмаöсь асьнысö эжватас нимöн, медым висьтавны, мый сэтчöс йöзыслы пом лоö? А неватас, изьватас кутшöм пом урсалöны?

Важся кывъяслöн вежöртас вежсьöмыс – гижöд кыв сöвмöм-выльмöмын быть лоанатор, рочöн кö, объективная закономерность. И джынвыйö комиöдöм, и гижанног вежöм лыддьыссьö лингвистикаын кыв озырмöдан да сöвмöдан, терминъяс урчитан туйöн. Тайö абу öмöй тöдса филологъяслы?

О.Уляшев ошйысьö коми кыв бура тöдöмöн. Тадзи вермас шуны ас йывсьыс выль кывъяс лöсьöдысь-тэчысь быд морт. Но дзик быдтор некод оз тöд. Тшöтш И О.Уляшев. Сiдз, сiйö абу кывлöма, мый увтыр кывйöн Луза-Летка гöгöрса олысьяс вöдитчöны «колена, чалльöг», рочöн кö «потомки» вежöртасын. Сiдзкö, неуна вежыштöмöн увтыр бура шогмö «династия» вежöртасын вöзйöм вылö, кор тöдчöдсьö кöленаысь кöленаö уджын кужанлун рöдйöм-вуджöм.

Збыльтор шуö О.Уляшев: кыв-вор тöдса комилы сёрнитан сям, сёрнитны кужöм вежöртасын. Сэк жö сылысь юкöнъяссö öтлаын гижöмыс сетö позянлун вежны кывлысь вежöртассö. Позьö чайтны, «лексика» вежöртасын кыввор – лöсьыда артмöмъяс лыдын. (Колана мында лексикатöгыд он на и варовит!) Татшöм йитöдыс и öтлаын гижана войтов «судорога» да торйöн гижсяна вой тöв «северный ветер» костын. Кужöмöн тэчöма да бура шогмöма и, шуам, ловбус, ваюксянiн, ловру, кыпыдавны, медшöртор, чунöк (босьтöма И.Г.Торопов гижöдъясысь), кыка, лигыш, лёквыв, öдйöа, шöрöвыйöасъны (Г.А.Юшковлöн), лымань, эсканпас (И.И.Размановлöн), ылдöс, йиджтас, чутiк-гаг (В.Тиминлöн) да уна мукöд.

Зэв нимкодь, мый вöлiны да эмöсь сэтшöм гижысьяс, кыдзи В.Т.Чисталёв, П.Г.Доронин, Я.М.Рочев, Г.А.Юшков, И.Г.Торопов, В.В.Тимин, В.Е.Напалков да мукöд; налысь висьт-романъяссö любö лыддьыны: сэтшöм мича, сöдз, абу дiлькваян кывйöн гижöма найöс Мудзлытöг корсьысьöмöн, выль кывъяс тэчöмöн öнiя гижысьяс озырмöдöны кывнымöс да оз лэдзны косьмыны сылы. Öти сайын казьтыштам, мый В.Тиминлöн «Ракета видзöдö енэжö» небöгын бергалö 100 гöгöр выль кыв да кывйитлöс.

Позьö сöмын ошкыны и теле- да радиожурналистъясöс – оз öтдортны коми гижысьяслысь выль кывъяссö да. Öд найö – миян кывйын выльторсö нимöдысьяс да йöз вежöрöдз вайöдысьяс.

Ошкана и сiйö, мый коми филологъяс-велöдысьяс оз вунöдны «медбöръя коми лингвистъяслысь» – В.А.Молодцовлысь, В.И.Лыткинлысь, И.И.Размановлысь кыв терминъяс – сёрникузя, чута чутiк, кадакыв, эмакыв, уначута, кывбöр, горöдан пас, кывтор да св. – да паськыда вöдитчöны вузын велöдiгöн (О.Уляшев коддьöмъяс чайтöны найöс öнiя лöсьöдöмторйöн).

Оз ков бöбйöдлыны журнал лыддьысьясöс да петкöдлыны абутöм тöдöмлунтö: «Став мирын метро, а миян лоö мупытштуй. Мед ставлöн Конституция, а миян лоö оланподув!» – гораа пасйöма статьяын (65 л.б.). Збыль вылас дзик мöдтор: венгръяслöн эм метро и foldalatti (буретш мупытштуй), эстъяслöн метро кывкöд орччöн maa-lune. raudtee – мупытшса кöрттуй; венгр кывйын конституция шусьö Alkotmany, немеч кывйын Verfassung, фин кывйын perustuslaki «подув оланпас», эстъяслöн – латинскöйкöд орччöн эм и артмöдöм кыв – pohiseadus да св.

Коми кыв йылысь Уляшевлысь дзугъяс видлалöм бöрын быть колö шуыштны и сылöн ышнясьöм йылысь. Татшöм тешитчана-вышшитчана гижöдсö коминад некытысь эг лыддьывлöй. О.Уляшев кодöскö öтторъя велöдö, видö, дивитö, мыжалö вылiсянь индалiг. Сöмын кодöс? Тöдöмысь, выль кывъяс лöсьöдысьясöс да сыöн вöдитчысьясöс: «Выль кыввор» чукöртысьясöс, термино-орфографическöй комиссияын зiльысьясöс, быд гижысь-журналистöс, кодi лысьтöма шуны мыйкö выль ног, вöвлытöм на кыв пыртны. Татшöм йöзсö О.Уляшев шуö «вакомистъясöн», «кывтшупысьясöн», «кыв сузлялысьясöн», «орöм вужъя, зiль да ловъя кыв тöдöмöн дзескöдтöм йöзöн», кеслö пиньсö «Выль кыввор» небöг вылö да нимтö сiйöс «коми кыв виан, некытчö шогмытöм кывворöн». Содтам та дорö: миян пиысь некöд оз падмöд О.Уляшевöс гижны да йöзöдны колана небöгъяссö. Мед босьтчас да гижас кутшöмкö гырысьджык удж – öнöдз на эз кывсьыв, кöнi бусöссьöны сылöн «коланаджык» книгаясыс.

Гöгöрвоана, öнöдз на коми кывйын абу ставыс лючки-бур. Оз на тырмы кывйöн вöдитчысьяслöн сёрнитан культураыс. Тшöкыда на радио да телевидение пыр сёрнитысьлысь (абу журналистлысь) позьö кывны: поздравляйта пятое мая праздникöн, приведита примеръяс, сочинитöма песняяс да св. Тайöс стöча пасйö и статья гижысьыс. Абу ставыс шыльыд-мольыд и выль кывъяс тэчöмын, абу став вöзйöмторйыс лючки. (Шуам, позьö öти кывйö воны О.Уляшевкöд ямкерка кыв кузя.) «Выль кывворö» öктöмъяс пöвстысь, дерт жö, оз ставыс мусмы коми войтырлы, оз ставыс вужъясь гижöд кывйö. Век жö нимкодь, мый буретш «вакомистъяс» – кывсö збыльысь радейтысьяс – уна вын пуктöны сы могысь, медым кывным дыр на олiс-вылiс. Найö гöгöрвоöны, мый коми кывйыс – абу öти мортлöн, абу öти грезд (да градйöр) гöгöрса сёрни. И кöть кодсюрö омöльтö да вöйпö налысь зiльöмсö, чайтсьö, найö оз на усьны ловнас да коми кывсö кутасны водзö сöвмöдны да выльмöдны.

Бöркыв пыдди кöсъям тöдчöдны öтитöр: мусярвывса быд кыв сöвмö-вежсьö. Бöръя кадö тшöтш и коми кывворыс пондiс паськавны вель öдйö, и тайö оз быдöнлы во сьöлöм вылас. Татшöм йöз лыдысь и Уляшев Олегыс вöлöма – сылы муса важ, вежсьöмъястöм кывйыс. Сöмын лöг гижöдъяснад, уджъёртъяс вылö усьласьöмъяснад коми кывтö он сöвмöд ни он видз. Дзик весьшöрö сiйö пыртö выль кыввор артмöдысь-вöзйысьясöс чужан кывлы лёквöчысь лыдö. Коми кыв вылö мöд видзöдласа йöзсö да налысь мöвпъяссö колö пыдди пуктыны, а оз лёкöдны. Кыв выльмöдысьясыс тшöтш асвыйöна коми йöз, найö зiльöны тэчны ён вынйöра чужан кыв, ёна водзö видзöдöмöнджык.

РЕЗЮМЕ:
Статья Е.А. Цыпанова и Л.М. Безносиковой «Пороча, язык не сохранить, ни развить» является ответом на критическую заметку О.И. Уляшева в адрес лингвистов. Авторы убеждают читателей в необоснованности критики Олега Уляшева, отмечают многие неточности при работе со словарями. Лингвисты еще раз акцентируют внимание на том, что цель изданного ими словаря – ознакомительная, что жизнь сама подскажет подходящую лексику, и никто не пытается навязывать населению неологизмы. Одновременно авторы подчеркивают, что процессом образования новых слов занимаются видные деятели культуры, писатели, а не единичные люди.
В завершении статьи говорится: «Только ненавистными статьями, нападками на коллег коми язык невозможно ни развить и не сохранить. Совершенно напрасно он включает людей, создающих и рекомендующих новые слова, в число недоброжелателей родного языка. Людей с иными взглядами на развитие коми языка и их мысли надо уважать, а не срамить. Те, кто обновляет язык, тоже до корней своих коми люди, они стремятся построить устойчивый родной язык, глядя далеко в будущее».