Sevewgh yn-bann an baner 7/30/2006 Godros dhe vaner Pyran dhiworth an Governans Yma kaskyrgh nowydh awos bos erbynn an lagha sevel baner Pyran heb kummyas. Dell hevel, an rol vaneryow re beu nowydhys, ha nyns usi agan baner a Gernow ena! Herwydh lavar an lagha y'n eur ma, res yw dhyn degemmeres kummyas agan konsel leel neyjya an baner Gwynn ha Du drefenn bos 'avisyans'. Digummyas yw sevel baner Jori, Andrew, Kembra ha Europ. Awos hemma, yma kaskyrgh skrifa lytherow dhe'n governans may fo an lagha chanjys. Yn mysk an re neb re skrifas dhe Yvette Cooper, Menystrores Towlenna, yw Dr Nigel Hicks ha Michael Chappell. I re leveris dhedhi bos savla an baner pur dhe-les y'n dydhyow ma yn Kernow. Unn lyther re dherivas bos Kernow Tyller Ertaj an Bys lemmyn, hag yth esa rann vras an ombrofyans selys war agan gonisogeth Keltek, gans Baner Pyran a-vel merk bras anodho. Ytho, pyth a yllydh tejy dh'y wul? Wel, ty a allsa dannvon lyther dhe'n governans, ha sevel dha vaner Pyran moy ughel es kyns, keffrys ha brassa es kyns. Awos skila laghyl, res porres yw dhymm avisya dhis a gavoes 'kummyas' mar nag eus hwans dhis a vos erbynn an lagha(!!!!) Skrif dhe: Yvette Cooper M.P, Minister for Planning, House of Commons, London, SW1A 0AA Skrifor(es) rag Displegyans an Taves Kernewek 6/29/2006 Gradh F £13,845 - £17,985 p.a. Kamp: 1884 Chons pur dhe les vydh hemma dhe gemmeres rann yn projekt nowydh a wra displêgya an taves Kernewek dres an diw vlydhen a vynn dos. Yth eson ni ow hwilas skrifor/skrifores igor ha fur a yll lavurya yn kompoes ha gweres dhe'n Soedhek Displêgyans gans an hwel. Dyskys a vydhydh bys yn 'Nivel A' po neppyth a'n par. Parys a vydhydh bos charjys gans kemmys a hwel a vo yn ordena an soedhva ha kuntellyansow. Termyn vydh dhis kavoes skians nowydh ha kemmeres agas rann yndella yn rewlia an projekt. Skians yn kever rewlia muna a via dhe les ha res porres vydh handla pub par a dus. Provyes veu mona rag an hwel ma gans Commission an U.E. ha Governans an Gwlaskor Unyes keffrys ha Konsel Pow Kernow. Ev a dhur bys yn mis Metheven 2008 mes yma govenek dhyn pesya pell mars yw dâ an hwel. Kows/ Skrif dhe Jenefer Lowe mars yw dâ genes kavoes kedhlow pella : 01872 323465 po e-bost: jlowe@cornwall.gov.uk Paperyow ha kedhlow pella a vydh kevys gans Asrann an Pennrewler, Hêl an Pow, Truru TR1 3AY, tel: 01872 323293, email:cedrecruit@cornwall.gov.uk po skrif der an kesroesweyth orth www.cornwall.gov.uk/vacancies ha meneges an niver kampoella. Diwettha dydh: 11ves Gortheren 2006 Jenefer Lowe Soedhek an Taves Kernewek Dalvenie House Hêl an Pow, Truru TR1 3AY Plg: 01872 323465 E-bost: jlowe@cornwall.gov.uk An Gov 2006 6/15/2006 Perthewgh kov a 27ves a vis Metheven yn Lannaghevrenn Rag an kynsa prys yn nebes blydhynyow, hwarvosow An Gov a vydh ordenys gans pobel Lannaghevren. Yma hwans dhedha bos an darvos gonisogethek dre vras ha heb bos politek. Rag hemma, ymons orth y ordena aga honan. An jydh a dhalleth 7 eur war an 27ves a vis Metheven gans solempnyta berr orth an delow. Ena, y fydh Neil Davey ha Hilary Coleman ow ledya keskerdh dhe’n plen, le may fydh ken solempnyta orth an kovmen, gorrys yn y le nans yw 40 blydhen hevlyna. Y fydh kevarwoedhys gans an Bardh Meur Rod Lyon. Ni a wra perthi kov a Frank Curnow keffrys, neb a wrug meur a-barth Lannaghevren. Wosa hemma, Neil ha Hilary a wra ledya pubonan dhe hel an dreveglos le may fydh keskan, gwari (an huni kynsa) ha fylm. An gorthugher a worfenn gans pastiow orth kost a £2.50. Kedhlow pella gans Karen Richards 01326 280 864 Erthygel lyver-termyn 'Quest' 6/10/2006 Breus Rod Lyon, Bardh Meur Yth esa marth genev vy pan wrugavy settya ow dewlagas an seythun ma war erthygel y'n lyver-termyn 'Quest', (dyllans Nr.92, Hav 2006). Martesen yth en vy gokki ha my dhe brederi dell wrussa merwel empouregyeth y'n RU, mes kepar dell wrugavy dyski a'n erthygel ma, yth yw hwath byw ha yagh yn-mysk nebes. Yth yw ewn yn tevri rag pyw pynag a vo dhe surhe bos y daves y honan gwithys, mes nyns yw y negys dhe assaya dystrewi, dampnya po mellya yn tavosow a dus erell, po a vroyow erell. Gans taves dewisys a'n denma - Sowsnek - ow koedha a-les dre ramasek drog, kammlytherennans, ha fowt a skians a boyntyans, y fia milweyth gwell mar kwruga trelya y dhewlagas troha'n re yn Pow Sows usi ow tystrewi y daves ev, ha gasa yn kres an re na yn Kernow a vynn pesya gans aga thaves - taves nag yw y negys. Klykkyewgh war an skeusenn gans an boton deghow, ha selwel dhe'th restell 'skeusennow'... hag ena gwelewgh an erthygel. Piw a vynnsa protestya gans unnyans gans an taves Bretonek? 5/12/2006 Yma keskerdh bras an mis Gortheren ma yn Roazhon 3a a vis Metheven veu ordenys a-vel prys keskerdh bras yn Roazhon/Rennes a-barth an taves Bretonek. Milyow a dus a vydh ena rag diskwedhes fatell vynnsens kavoes moy a alloes gans Breten Vyghan yn kever an media poblek, hênez an pow ha'n taves. Yma an movyans Bretonek ow hwilas gwasketh an governans rag na vynnsens gul travyth heb ynnyadow an par. Yth esen vy war agas pysi leverel dhymm mar mynnowgh hwi kemmeres rann an keskerdh a-barth ha Kernow ha skoedhya an taves Bretonek yndella. Dâ via gweles nebes Kernowyon yn stretys ynwedh. Rag godhvos pella: dannvon e-bost dhe Neil po kuzulpo mirewegh orthan wiasva ma Pennweythresek nowydh dhe Gonsel Kernow 5/1/2006 An kynsa benyn veu dewisys: Sheila Healy Sheila Healy, pennwethresek servadow a soedhva an governans y’n tir kres west Pow Sows, yw henwys pennweythresek nowydh a Gonsel Kernow. Hi yw an venyn gynsa dhe wul an ober na a-ban dhallathas nans yw 117 blydhen. Hi re oberis yn soedh ughel yn lies awtorita y’n Tir Kres, keffrys ha Walsall Metropolitan Borough Council, le mayth o hi pennweythresek a Jallenj an Sita, urdhyans meur dastisplegyans, ha lywydh yeghes Walsall. Hi a dheuth ha bos lywydh korforethek an kyrghynnedh 1997 dhe gonsel nowydh ‘unitary’ dhe Telford ha Wrekin. Wosa henna gelwys penn o hi dhe’n Lywydheth Governans an Gemmynnieth, hag ena soedh ughel dhe’n Ajenteth Gwellhe ha Displegya y’n Tir Kres West. Gelwys lywydh ranndirell o hi a Bolisi Governans Leel y’n Tir Kres West, kyns es dos ha bos pennweythresek servadow. Yma dhe Sheila BA ha MA yn Stus Sosyel hag Erbys dhe Gollji an Drynses, Dulynn. Hi re wrug ober ombrofyek ynwedh: kaderyores a skol gynsa veur ha lywydh a’n Virva Art ‘Ikon’. Heb mar y fydh meur a dus ow kovynn prag nag esa person konnyk lowr dhiworth Kernow neb a allsa gul an ober ma, hag a vydh nebonan dhiworth Pow Sows kres owth oberi herwydh bodh an dus omma. Res yw leverel nag yw an pennweythresek soedh polytek. Res yw dhedhi gul hi ober herwydh rewl an gonseloryon. Dell yw apert, yma les dhedhi an artys ha dastisplegyans. Govenek a’gan beus hi dhe usya an godhvos ma a-barth tenkys splann a Gernow. Soedhek an taves yw henwys 4/1/2006 Nyns yw ervirys kynsa jorna a hwel Jenefer Lowe Dewisys yn kolonnek veu Jenefer Lowe a seyth ombrofyer neb eth dhe'n keswelyow dhe dhiwedh a vis Meurth. Herwyth Konsel Kernow, na hwath nyns yw dydh dalleth a'y soedh ervirys. Aswonnys yw Jenefer a-vel Kernewegores ha Kembregores, kyns Soedhek Artys Kernow, ha kevarwoedhyades an bagas dons 'Ros Keltek'. Gonis a wra hi rag eth blydhen yn unn gevarwoedhya strateji an taves, gonis gans pub bagas an taves, ha dre dhisplegya projektys may hallo bos aswonnvos efanna a Gernewek. Piw a'n jeves lowr a vona dhe brena Kernewegva? 3/19/2006 Yw an termyn devedhys may fo edhomm a dowlenna tyller hag ynno Kernewek kewsys a-vel taves byw? Gwren ni mires war-rag deg-blydhen po diw ha tybi a-dro dhe dermyn mayth eus dhyn Kernewegva yn Kernow. Martesen y fydh unn anedha ogas dhe Druru, ha ken le y'n est yn ogas dhe Lyskerrys. Nyns yw bras hwath, martesen marnas pymthek chi perghennys gans Kernewegoryon, unn gerneweger a byw an gwerthji, ha neb den freth a-dryv dhe'n bar y'n tavern keffrys. Pandra yw an pyth dhe wul may fo chons a weles an hunros ma ow tos ha bos an gwiryoneth? Martesen yma edhomm dhyn a neb den rych yn neb pow y'n bys gans kerensa Kernow ha mona lowr dhodho may fo selys an kynsa Kernewegva. An arghans a brensa chiow yn neb unn dreveglos yn ogas dhe gresenn ober kepar ha Truru, ha prena diwotti ynwedh. Nyns eus meur a jons a gavoes arghans lowr dhiworth agan governans rag hemma, mes mars eus mona privedh, y fia chons a wobrena annedhow orth pris isel dhe dus a allsa previ i dhe dhevnydhya an taves yn feur. Nena y fia chons a selya kemmynieth. Mos erbynn an fros 3/8/2006 Yma Kernewek ow tiskwedhes an fordh Yma agan taves Kernewek ni ow kwaya erbynn tu an tavosow nebes kowsys erell. Ymons ow merwel skon warlergh an pyth a veu skrifys yn 'Le Monde' a-dhiwedhes. Yma moy a-vel hwegh mil taves war an nor y'n eur ma, mes an brassa rann anedha a vydh parys dhe verwel kyns nepell... MARS YW GWIR oll ansempel a veu menegys gans Colette Grinevald a'n Pennskol Lyon-II. Yma hi ow leverel fatell vydh kellys a-dro dhe gans taves yn Europ herwydh atlas gans UNESCO hag yn-mysk an re na vydh kevys an taves Bretonek. An moyha a vydh kellys yn Australi hag a-berth y'n powyow Ameryka, north ha soth. Yma hi ow meneges an 300 taves neb esa yn Pow Ameryka (henn yw an Statys Unyes) kyns devedhyans an dus Europ. Na vydh moy a-vel pymp orth diwedh a'n kansblydhen. Prag yndella? Yma hi ow meneges ystynn an tavosow bras dhe bobell oll an bys ma rag gul aga negys. Hwath arta yma hi ow kewsel a-dro dhe rann an stat. Unn taves hebken yw synsys vas rag unnses an wlas. Yw hemma gwir? - Nag yw! Nyns yw sertan rag chanjys yw maner ha spyrys meur a dus lemmyn. Ymons ow erya erbynn mernans aga thavosow ha parys yns dhe usya an kesroesweyth ha teknoloji nowydh y'ga battel. Ymons ow protestya meur a dhesyr dhe'ga hewsel. Henna yw dhe leverel dell allsa bos agan yeth ni mes onan an re na a vydh sawyes ha'n re erell a allsa pur dha mires orthyn ni mar pydh neppyth gwrys dhe'ga gwitha. Avisyans soedhek an taves 2/8/2006 An konsel re dhallathas an proses a avonsya an taves LYWYDH DISPLEGYANS KERNEWEK Gradh K £27,759 - £33,984 an vlydhen Kamp: 1415 Yma displegyans an taves Kernewek war an treudhow. . Warlergh y aswonnvos gans Governans an RU 2002 a-vel yeth nebes kewsys po taves ranndirel, kernewegoryon ha’n governans a Gernow re dhellos strateji rag y dhisplegyans. Yth eson ow hwilas lywydh effeythadow a woer gwruthyl displegyans an Taves Kernewek herwydh an Strateji. Y fydh degre dhis ha perthyans a lywa project sewenyek, ha godhvos kennertha ha dos erbynn tus dhiworth an rannow ombrofyek, poblek ha privedh. Y fydh dhe’n lywydh omgemmeryans a’n korf nowydh ‘Keskowethyans an Taves Kernewek’, ha ty a vydh skoedhyes gans Konsel Kernow. Selys a vydhydh dhe Hel Kernow yn Truru. Yma arghans dhe’n soedh dhiworth an Kommyshon Europek, Governans an RU ha Konsel Kernow bys yn mis Metheven 2008. Byttegyns, nyns yw hemma saw kynsa savla an arghans, ha herwyth y sewen, govenek a’gan beus bos an project gwithys y’n termyn a dheu. Form ombrofyans ha kedhlow pella a yll bos kevys dhiworth Asrann an Pennlywydh, Hel Kernow, Truru TR1 3AY, plg: 01872 323293, ebost: cedrecruit@cornwall.gov.uk po y hyllir ombrofya war-linenn dre weles an wiasva ha meneges an kampoellans. Dydh degea: 28ves a vis Hwevrer 2006 Lyther an vlydhen nowydh 12/29/2005 Agan pennskrifer a vir warlergh dhe 2005 ha war-rag dhe 2006 Ass o blydhen marthus dhe'n taves Kernewek unnweyth arta. Mir warlergh ha ty a wel pygemmys mildir kales yw tremenys. Piw a bredersa nans yw pymp blydhen ni dhe dybi a-dro dhe spena mona a'n Governans hag Amkan Onan a gansow a vilyow a beunsow. Yth esa keskusulyans dhe Dremogh orth diwedh an hav neb a ros kowsva dhe Gernewegoryon. Kres a hemma o an Strateji, hag yma owth effeythya y'n eur ma. Mar mynnir gweles an pyth re dreylyas, nyns eus kudynn y weles mar mirir orth arwoedhyow-fordh diwyethek a-dro dhe Gerrier hag yma moy a gowethasow ow kul bri a Gernewek yn Kernow. Byttegyns, hwath yma dadhelva poeth a-dro dhe by par a'n taves yw gwell rag devnydh soedhogyl. Mes res yw dhyn ni oll perthi kov bos Kernewek unn taves, na peswar, ha ny wren ni movya war-rag mars eus kas yntredhon ni. Preder a-dro dhe omdhoen Jowan Bolitho tremenys, hag enora y gov dre vos leun a breder, kuvter hag omdhoen vas. Mar kwren ni yndella, y fia chons a avonsyans gwell yn 2006. PanKeltek: peswarra gwaynyans dhe Gernow 2006? 12/21/2005 Galow ter dhe vagasow rokk Kernewek Kernow re waynyas an PanKeltek rag an teyr blydhen tremenys. An goel keswlasek ma a denn ilewydhyon ha skriforyon kanow dhiworth Kernow, Breten Vyghan, Manow, Alban ha Kembra. Yma dhe Gernow bri lemmyn a-vel an pow neb eus edhomm a fetha. Ytho, res yw dhyn gul gwell es kyns. Yth eson ow hwilas kan, ha mar kyllyn, band keffrys, neb a garsa mos dhe'n Goel PanKeltek yn Letterkenny, Iwerdhon, ynter 18ves ha 23ves a vis Ebryll 2006. Res yw bos an gan kenys yn Kernewek dhe'n goel. Byttegyns na vydh problem mars eus neppyth dhywgh skrifys der Sowsnek, ni a allsa hy threylya ha dh'gas gweres gans leveryans. Ni a garsa gwaynya yn fen rag an peswarra blydhen. Mars owgh hwi an person, gwrewgh kestava orth: Anne Kennedy Truscott 7 Trevecca Cottages Lyskerrys Kernow PL14 6RH Tel: 01579 343 447 / 07764 303638 E-bostl Anne DIWEDH. Notennow. * An piwas yn Iwedhon yw a-dro dhe €1500 (£967). * Yma nebes gweres arghansek dhiworth skorenn Kernow. * Res yw bos an gan skifys a-nowydh ha heb bos dyllys nefra kyns der sidi, snod, plasenn po kargans war-nans. Bardh Meur kyns a verow 12/5/2005 Trist yw gans An Buro derivas kyns Bardh Meur John Bolitho dhe verwel. Ni a garsa pysi a-barth y deylu ha kowetha y'n termyn ma. Hedhyw vyttin y ferwis kyns Bardh Meur a Gernow, John Bolitho. Ev a verwis wosa strivya erbynn kanker an kolodhyon. Ni a wre tybi ev dhe dhos ha bos gwell gans dyghtyans kymyk, byttegyns, ev a dheuth ha bos gweth y'n dydhyow tremenys ha merwel an myttin ma. Genys veu 1929 ha dos ha bos ilowydh neb a wre kana der an bellwolok rag lies blydhen. Perthi kov anodho a wren hag ev o kana, kepar dell ywa y'n skeusenn ma kemmerys dhe dharvos Kowethas an Yeth hevlyna. My (Matthew Clarke) o fest lowen ev dhe dhos genev dhe Iwerdhon hevlyna keffrys ha gweles Kernow ow kwaynya an PanKeltek arta. Skoedhyer lel an PanKeltek ova. Ev a dheuth ha bos bardh 1981, hag o Bardh Meur 2000 - 2003. Kellys heb bos ankevys vydh. Derivas a-dro dhe avonsya an strateji 11/15/2005 Kslr Loveday Jenkin re ros an nowyttha nowodhow a-dro dhe worra an strateji yn y le Panel Avisya an Taves Kernewek Selys veu hemma a-vel bagas gweythya gans an Kessedhek Hwithra Omglywans-Da hag ena daswrys a-vel Panel Avisya Portfolio ragov may hylliv ughweles kollenwelans an strateji rag an Taves Kernewek yn Kerrier. Ober an panel erbynn an prys ma a vydh avisys yn derivas dhe’n kabynet 15ves a vis Du, ytho omma ny wrav vy kewsel yn town marnas dre leverel awos bos konnygyon yn-mes gorrys war an panel, possybyl yw kavoes unnverheans war unn form a dreylyans Kernewek rag an brassa rann a arwoedhyow stret, neb a vydh po nowydhys po drehevys rag an kynsa prys. Mars eus moy es unn form, res vydh dhe gonsel an dre po an blyw ervira yntredha. Godhvos gras a wren dhe ober an panel ha hebdha ny via an treylyansow ma ha heb kost keworrys dhe’n konsel keffrys. An gonnygyon yn-mes re ros oll aga thermyn heb charj ha res yw dhymm godhvos gras dhedha rag pub ober gwrys gansa bys y’n prys ma. An re ma yw: Bardh Meur Kernow Rod Lyon; kaderyer Cossell an Taves Bernard Deacon; Kaderyer Agan Tavas Craig Weatherhill; ha Pol Hodge dhiworth Kesva an Taves. Yma yntredha meur a wodhvos a henwyn tylleryow ha formow hengovek an taves, hag adhyskadow fest re bia hag I owth oberi warbarth may hallo bos profys dhyn treylyansow skwir. Keffrys ha treylyansow henwyn stret, provya re wrussens treylyansow a bub gonis agan konsel, mar mynn tus aga usya, ha lowen vydh an panel gul oberennow treylya byghan rag rannow erell an konsel rag projektow arbennik pan vo edhomm. Kowethyans an Taves Kernewek Hemm yw an Bagas Lywya treus-Kernow ha dhodho an galloes delivra Strateji an Taves Kernewek neb a veu desinys wosa keskows gans an ranndiryow. Govenek a’gan beus a £600,000 dres teyr blydhen dhiworth an Governans hag Amkan Onan. Rann an mona ma a vydh usys may hyllyn arveth Soedhek an Taves Kernewek gans skoedhyans an soedhva, ha’n mona gesys a wra provia arghans rag towlennow delivra an strateji. Konsel Kernow a vydh perghenn an bojet ha’n arvethor, ha ny vydh kost dhe eseli erell an kowethyans neb a wra ughweles an bojet ha delivri. Y fydh kannas dhe bub konsel ranndirek, ha henwys ov gans an lywydh a-vel kannas Kerrier. Formow refrons servadow re beu desinys ha dell vo govenek dhyn, oberysi a vydh arvethys y’n misyow ow tos. My re wovynnas orth pub synsyer portfolio dhe hwithra may fia kostow pella ragdha awos kollenwelans an Strateji. Pennrewler pellwolok a gews erbynn polisi Frynkek yn Breten Vyghan 11/9/2005 An keswel veu dyllys y'n lyver termyn Bretonek a-vri. 1a Mis Gwynngala, Patrick Le Lay neb yw pennrewler kanel veur bellwolok TF1, a wrug skwattya an pennlinennow wosa keswel onest gans an lyver termyn 'Bretons'. Ev a gews erbynn an governans Pow Frynk ha'ga glannheans ethnek an bobell Bretonek, keffrys ha'ga folisiow kresek, ha fatell wra ev omglywes kepar hag estren yn y wlas y honan. Lowender Pyran 2005 10/25/2005 Lowender splann o unnweyth arta Lowender Peran re dheuth dh'y benn unnweyth arta, hag ass o an goel marthus arta. Ni a welas donsyow ha klywes ilow dhiworth pub pow Keltek. Yth esa chons splann ynwedh a brena taklow Kernewek. Kowethas an Yeth Kernewek a'n jeva stall y'n varghas Keltek. Da o gweles kemmys dhe brenassa. Lowender Peran a'n jeva stall ow kwertha sidiow an bagasow ow performya. Y'ga mysk yth esa sidi nowydh a ganow gans Brian Webb. Splann yw goslowes orth 'Ow Avon Splann' ha kenys gans an den neb a's skrifas. Dydh a-barth Fundyans an Yeth Kernewek 10/13/2005 Denise Chubb re ros dhyn derivadow a-dro dhe hwarvos a-les Denise Chubb a dheriv orthyn ni: Y fydh dydh a-barth Fundyans an Yeth Kernewek dhe Gresenn Kernow 26ves a vis Du ynter 10 - 2.eur. Arethor: Davyth Hicks. Skoedhyas gans Europ. Goel Fylm ha Pellwolok Geltek 10/2/2005 Galow dhe ombrofysi dannvon aga fylmow An kampus nowydh Tremogh dhe Bennskol Kollji Aberfal a vydh an tyller rag an 27ves Goel Fylm ha Pellwolok. Govenek a'gan beus a chonsow rag roesweythya gans ayrgylgh attes ha kuv. Yma formow ombrofya hag ombrofya warlinenn dhe www.celticfilm.co.uk