ᐅᖃᐅᓯᓕᕆᓂᕐᒧᑦ ᑭᒡᒐᖅᑐᖅᑎᐅᑉ ᐱᓕᕆᐊᒃᓴᕆᔭᖏ

ᐅᖃᐅᓯᓕᕆᓂᕐᒧᑦ ᑭᒡᒐᖅᑐᖅᑎ ᐱᓕᕆᐊᒃᓴᖃᖅᐳᖅ ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᓄᓇᕗᒻᒥ ᓴᐳᒻᒥᔭᐅᓂᖏᓐᓂᒃ ᓴᖅᑭᔮᖅᑎᑕᐅᓂᖅᓴᐅᔭᕆᐊᖃᕐᓂᖏᓐᓂᒡᓗ. ᐃᒪᐃᓕᐅᖅᖢᓂ ᐱᓕᕆᕙᒃᐸᐃᑦ:
ᐅᖃᖅᑕᕐᕕᐅᔪᓐᓇᕐᓂᖓ ᐊᑲᖅᓴᖏᔾᔪᑎᓂᒃ ᐅᖃᐅᓰᑦ ᒥᒃᓵᓄᑦ: ᐅᖃᐅᓯᓕᕆᓂᕐᒧᑦ ᑭᒡᒐᖅᑐᖅᑎ ᐅᖃᕐᕕᐅᕙᒃᐳᖅ ᑕᑎᒋᔭᐅᓪᓗᓂ ᐊᑲᖅᓴᖏᔾᔪᑕᐅᔪᓂᒃ ᐅᖃᐅᓰᑦ ᒥᒃᓵᓄᑦ ᑭᒃᑯᑐᐃᓐᓇᕐᓂᑦ. ᖃᐅᔨᓇᓱᒃᐸᒃᖢᓂᓗ ᐱᔪᓐᓇᐅᑎᐅᔪᑦ ᐅᖃᐅᓰᑦ ᒥᒃᓵᓄᑦ ᐊᑐᖅᑕᐅᑦᑎᐊᕐᓂᖏᑉᐸᑕ ᒪᓕᒡᓗᒋᑦ ᐃᓕᓴᕆᔭᐅᓯᒪᔪᑦ ᐅᖃᐅᓯᕐᓄᑦ ᒪᓕᒐᖏᑕ ᐃᓗᐊᓃᑦᑐᑦ. ᐅᖃᐅᓯᓕᕆᓂᕐᒧᑦ ᑭᒡᒐᖅᑐᑎ ᑎᒃᑯᐊᖅᑕᐅᓯᒪᔫᒐᓗᐊᖅ ᒪᓕᒐᓕᐅᖅᑎᓄᑦ ᑭᓯᐊᓂ ᐃᓛᒃᑰᖅᖢᓂ ᒐᕙᒪᒃᑯᓐᓂᑦ ᐊᐅᓚᑦᑐᖅ.
ᖃᐅᔨᓴᖅᑎᐅᓂᖅ: ᐅᖃᐅᓯᓕᕆᓂᕐᒧᑦ ᑭᒡᒐᖅᑐᖅᑎ ᐃᖅᑲᓇᐃᔭᖅᑎᖏᓪᓗ ᖃᐅᔨᓴᖅᐸᒃᐳᑦ ᓄᓇᕗᑦ ᒐᕙᒪᒃᑯᖏᑕ ᐱᕙᓪᓕᐊᓂᕆᔭᖏᓐᓂᒃ ᐱᔭᕆᐊᓕᖏᑦ ᒪᓕᒃᖢᒋᑦ ᓄᓇᕗᒻᒥ ᐃᓕᓴᕆᔭᐅᓯᒪᔪᑦ ᐅᖃᐅᓰᑦ ᒪᓕᒐᖓᑕ ᒥᒃᓵᓄᑦ. ᐅᑯᐊ ᑎᑎᕋᖅᓯᒪᔪᑦ ᒪᓕᒃᖢᒋᑦ: ᐃᓕᓴᕆᔭᐅᓯᒪᔪᑦ ᐅᖃᐅᓯᕐᓄᑦ ᒪᓕᒐᑦ, ᐱᓇᓱᐊᖅᑕᕗᑦ (ᕿᖓᐅᒻᒥ ᐋᖅᑭᑦᑕᐅᓯᒪᔪᑦ), ᓄᓇᕗᒻᒥ ᓄᓇᑖᕐᓂᒃᑯᑦ ᐊᖏᕈᑎ, ᑭᒃᑯᑐᐃᓐᓇᕐᓄᑦ ᐱᔪᓐᓇᐅᑎᐅᔪᖅ ᐊᒻᒪ ᐃᓱᒪᖅᓱᕈᓐᓇᕐᓂᐅᔪᖅ ᐱᖁᔭᖅ ᑲᓇᑕᒥ.
ᐅᖃᐅᔾᔨᒋᐊᖅᑎᐅᓂᖓ ᖃᓄᐃᓕᐅᕆᐊᖃᖅᑐᓂᒃ ᐅᖃᐅᓯᓕᕆᓂᕐᒧᑦ ᑲᒥᓯᓇᐅᑉ: ᐅᖃᐅᓯᓕᕆᓂᕐᒧ ᑭᒡᒐᖅᑐᖅᑎᐅᑉ ᐊᒡᓚᒡᕕᖓ ᐱᓕᕆᕝᕕᑑᕗᖅ ᓄᓇᕗᒻᒥ ᑐᕌᖓᑐᐃᓐᓇᓪᓚᕆᒃᖢᓂᒃ ᐅᖃᐅᓯᓕᕆᓂᕐᒧᑦ ᐱᔾᔪᑎᖃᖅᑐᓂᒃ. ᑕᐃᒪᙵᓕᒫᖅ ᓄᓇᓕᖕᓂᑦ ᑐᓴᕋᓱᐊᖏᓐᓇᖅᐸᒃᑐᖅ, ᖃᐅᔨᓴᕆᐊᓕᖕᓂᒡᓗ ᖃᐅᔨᓴᖅᐸᒃᖢᓂ, ᐊᑐᐊᒐᐃᓪᓗ ᐋᖅᑭᒋᐊᓖᑦ ᐱᓕᕆᕙᓪᓕᐊᓪᓗᒋᑦ, ᑐᓂᓯᔪᓐᓇᖅᐸᒃᐳᓪᓗ ᒪᓕᒐᓕᐅᖅᑎᒃᑯᓐᓄᑦ, ᓄᓇᕗᑦ ᒐᕙᒪᒃᑯᖏᓐᓄᓪᓗ ᐊᑐᓕᖁᔭᖏᓐᓂᒃ ᐋᖅᑭᒋᐊᕈᑎᑦᑎᐊᕙᐅᓂᖅᐹᖑᒐᔭᙳᐊᖅᑐᓂᒃ ᐅᖃᐅᓰᑦ ᐱᓪᓗᒋᑦ ᓄᓇᕗᒻᒥ.
ᐅᖃᐅᓯᕐᒥᒃ ᓴᖅᑭᔮᖅᑎᑦᑎᒋᐊᒃᑲᓐᓂᕐᓂᖅ: ᐅᖃᐅᓯᓕᕆᓂᕐᒧᑦ ᑭᒡᒐᖅᑐᖅᑎ ᐱᒻᒪᕆᐅᔪᒥᒃ ᑲᒪᒋᔭᖃᖅᐳᖅ ᐅᖃᐅᓰᑦ ᒥᒃᓵᓄᑦ ᐱᓕᕆᐊᖑᔭᕆᐊᓖᑦ ᐱᓪᓗᒋᑦ ᖃᐅᔨᔭᐅᒃᑲᓐᓂᖁᓪᓗᒋᓪᓗ ᑭᒃᑯᓕᒫᓄᑦ. ᐅᖃᐅᓯᓕᕆᓂᕐᒧᑦ ᑭᒡᒐᖅᑐᖅᑎ ᓂᐱᒋᔭᐅᕗᖅ ᐅᖃᐅᓯᖃᖅᑐᓄᑦ ᐃᓕᓴᕆᔭᐅᓯᒪᔪᓂᒃ ᓄᓇᕗᒻᒥ. ᑭᒃᑯᑐᐃᓐᓇᕐᓂᒃ ᒐᕙᒪᒃᑯᓐᓂᒡᓗ ᑐᑭᓯᐅᒪᑎᑦᑎᑦᑎᐊᕋᓱᒃᐸᒃᖢᓂ ᐱᔪᒪᔭᐅᔪᓂᒃ ᐱᔪᓐᓇᕐᓂᕆᔭᐅᔪᓂᒡᓗ. ᑐᓴᐅᒪᑎᑦᑎᑦᑎᐊᕆᐊᖃᕆᕗᕐᓗ ᑭᒃᑯᑐᐃᓐᓇᕐᓂᒃ ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᒥᒃᓵᓅᓕᖓᔪᓕᒫᓂᒃ.
ᐅᓂᒃᑳᓕᐅᕐᓂᖅ: ᐅᖃᐅᓯᓕᕆᓂᕐᒧᑦ ᑭᒡᒐᖅᑐᖅᑎ ᐅᓂᒃᑳᓕᐅᖅᐸᒃᐳᖅ ᐊᕐᕌᒍᑕᒫᑦ ᒪᓕᒐᓕᐅᖅᑎᒃᑯᓐᓄᑦ, ᐊᑐᓕᖁᔭᒥᓂᒃ ᑐᓂᓯᕙᒃᖢᓂ ᐱᐅᓯᒋᐊᕈᑎᐅᔪᓐᓇᖅᑐᓂᒃ ᐱᓕᕆᐊᖑᔪᓄᑦ ᐱᔨᑦᑎᕋᐅᑎᐅᔪᓄᓪᓗ ᐃᓕᓴᕆᔭᐅᓯᒪᔪᑦ ᐅᖃᐅᓰᑦ ᐊᑐᖅᖢᒋᑦ.
ᐅᖃᐅᓯᓕᕆᓂᕐᒧᑦ ᑭᒡᒐᖅᑐᖅᑎᐅᑉ ᐱᓕᕆᐊᒃᓴᕆᙱᑕᖏᑦ

ᐅᖃᐅᓯᓕᕆᓂᕐᒧᑦ ᑭᒡᒐᖅᑐᖅᑎ ᑮᓇᐅᔭᖅᑖᖅᑎᑦᑎᔨᐅᙱᓚᖅ ᐅᖃᐅᓰᑦ ᒥᒃᓵᓄᑦ ᐱᓕᕆᐊᖑᔪᓄᑦ. 

ᐅᖃᐅᓯᓕᕆᓂᕐᒧᑦ ᐊᒡᓚᒡᕕᒃ ᑐᑭᓕᐅᕆᓂᕐᒧᑦ ᑐᓵᔨᐅᓂᕐᒧᓪᓘᓐᓃᑦ ᑲᒪᔨᐅᙱᓚᖅ. ᓄᓇᕗᑦ ᒐᕙᒪᒃᑯᖏᑕ ᑕᒪᓐᓇ ᐱᓕᕆᐊᒃᓴᕆᕚ ᐅᖃᐅᓯᓕᕆᕝᕕᒃᑯᑎᒍᑦ ᐃᓕᖅᑯᓯᓕᕆᔨᒃᑯᓐᓂ