2.10 álgoálbmotbuhtadus,
ILO-konvenšuvnna nr. 169
artihkal 15 nr. 2
Sámedikkis leat dál
konsultašuvnnat Ealáhus-
ja gávpedepartemeanttain ođđa
minerálalága
birra. Sámediggái
lea áibbaš dárbbašlaš ahte
láhka galgá leat čielgasit álbmotrievttálaš rámmaid
siskkobealde.
Sámediggi čujuha
dasa ahte Sámi vuoigatvuođalávdegoddi
juo NAČ 1994: 4 kapihttalis
8 evttohii konkrehta njuolggadusaid mat galge suodjalit sápmelaččaid ávnnaslaš kulturvuđđosa,
dás maiddái njuolggadusaid
ahte sámi beroštusat galge
guldaluvvot ja deattuhuvvot, ja ahte galggai beassat gieldit sisabahkkema
vissis áigái. Finnmárkkulága
bokte evttohii dattetge Sámediggi
daid njuolggadusaid mat maŋŋá váldojuvvojedje
mielde bákteláhkii,
oassin ollislaš finnmárkkuláhkabargui.
Sámediggi lei dán
barggus áibbas čielggas
das ahte vuoigatvuođagažaldagat minerálaid
ektui dattetge galget čovdojuvvot
iehčanas ollislaš proseassas,
mas earret eará finnmárkkulága geográfalaš ráddjejumit
eai galgan jotkojuvvot.
Sámediggi oaivvilda ahte
uhcimusčovdosa oassin ferte
oažžut mielde
láhkii mearrádusaid
mat gáibidit ahte galgá sohppojuvvot
ovttamielalašvuohta konsultašuvnnaid
bokte Sámedikkiin minerálaid
iskkademiid ja roggamiid oktavuođas
go dat dahket váddáseabbon sápmelaččaide
joatkit ávkkástallama
guoskevaš guovlluiguin,
ja go dát ávkkástallan mearkkaša
hui ollu sámi kultuvrii. Dát
maid ferte gehččojuvvot bággolotnunmearrádusaid
ektui. Dakkár mearrádus
livččii čielgaseamos
vuohki sihkkarastit ahte láhka
ii rihko ILO-konvenšuvnna
nr. 169 artihkkaliid 6, 7 ja 15 geatnegasvuođaid
ii ge SP artihkkala 27 geatnegasvuođaid,
gč. 1. artihkkala.
ILO-konvenšuvnna artihkkala
15 nr. 2 vuođul lea stáhta
geatnegahttojuvvon ásahit
konsultašuvdnaortnegiid álgoálbmogiiguin
vai lea vejolaš čielggadit
sáhttet go ja man muddui sáhttet álgoálbmogiid beroštumit
vahágahttojuvvot go sin
eatnamiid eatnanvuloš resurssat
dahje eará resurssat iskkaduvvojit
dahje go daiguin ávkkástallojuvvo.
Artihkal 15 nr. 2 lea erenoamáš guovdil
ozolaš minerálaid
ja oljju ja gássa oktavuođas.
Sivvan lea go stáhta čuoččuha
oamastanvuoigatvuođa ozolaš minerálaide. Mearrádus
lea maid erenoamáš guovdil
báktelága
báktefriijavuođa
prinsihpa ektui mii oanehaččat
dadjá ahte buohkain lea vuoigatvuohta šerpet,
ohcat rogganreivve ja ohcat mihtiduvvot eatnama, gč. báktelága §§ 3 – 7 šerpema
birra, §§ 8 – 22
mihtideami birra, ja §§ 23 – 39a
rogganlobi birra. Lea maid vejolaš ahte
artihkal 15 (2) sáhttá leat
guovdil mearavuloš resurssaid
ektui dakkár guovlluin dahje dakkár
guovlluid olggobealde main doaimmahuvvo sámi
riddo- ja vuotnaguolásteapmi.
ILO-konvenšuvnna nr.
169 artihkkala 15 (2) ráđđádallangeatnegasvuohta
lea viidát go 6. artihkkala ráđđádallangeatnegasvuohta. ONa álgoálbmotjulggaštusa
32. artihkal nr. 2 cealká maiddái
ahte dárbbašuvvojit
konsultašuvnnat vai sáhttá fidnet
friija dieđihuvvon mieđáhusa,
erenoamážit minárálaid
roggama ja daiguin ávkkástallama
oktavuođas. Dan lassin lea
artihkkalis 15 nr. 2 mearrádus álgoálbmotbuhtadusa
birra mii lea leamaš dehálaš Sámediggái.
Nu mo báktelága § 42
mearrádus lea hámuhuvvon
maŋŋágo finnmárkkuláhka
dohkkehuvvui, de galgá bajiduvvon
eanaeaiggátdivat dušše
biddjojuvvot ruvkkiide mat leat Finnmárkkuopmodaga
etanama alde. ILO-konvenšuvnna
nr. 169 artihkkala 15 (2) vuođul
ii leat mihkkege mii dadjá ahte sámi
báikegottiin maidda lea
addojuvvon oamastanvuoigatvuohta finnmárkkulága kapihtal
5 vuođul, ii leat maiddái
vuoigatvuohta ovdduide ja buhtadussii ruvkedoaimmaid geažil
daid báikegottiid guovlluin.
ILO-konvenšuvnna nr. 169
artihkkala 14 (2) geatnegasvuođa
oktavuođas dovdáhit álgoálbmogiid
oamastan- ja geavahanvuoigatvuođaid,
gč. finnmárkkulága
kapihttala 5 dálá vuoigatvuođaid
kártema ja dohkkeheami birra,
livččii
jearggaheapmin lágas bidjat
bajiduvvon eanaeaiggátdivada
go eana gullá Finnmárkkuopmodahkii,
muhto ii fal dalle go eana sirdojuvvo dasa gii lea dovdáhuvvon rivttes
eaiggádin nu go sámi
gilisearvi. Artihkal 15 (2) ii bija maidege gáibádusaid
dasa ahte álgoálbmot
galgá leat mielde oamasteamen
guovllu jus das maiddá galgá leat vuoigatvuohta
ovdduide ja buhtadussii. Danne lea govttolaš ahte
maiddái joavkkuin maidda leat
dovddastuvvon geavahanvuoigatvuođat vissis
meahcceávkkástallanvugiide,
nu go ovdamearkka dihtii boazodoalus, maiddái lea
vuoigatvuohta ovdduide ja buhtadussii. Ii ge leat daddjojuvvon mihkkege
artihkkalis 15 (2), gč.
artihkkala 13 (2), mii mearkkašivččii
ahte dat geográfalaš doaibmaguovlu
gosa dovddastuvvojit ovddut ja buhtadus, livččii gáržžit
go dain eará osiin artihkkalis
15, mii ii leat ráddjejuvvon
daidda guovlluide gos álgoálbmogiid eaiggáduššanvuoigatvuođat
galget dohkkehuvvot, muhto maiddái
gustojit daidda guovlluide gos geavahanvuoigatvuohta galgá sihkkarastojuvvot.
Artihkal 15 (2) ovdduid ja buhtadusa birra gusto danne maiddái
geavahanvuoigatvuođalaččaide,
nu go boazodoalliide ja báikegottiide.
Danne oaidná Sámediggi
dárbun ahte mearrádus álgoálbmotbuhtadusa
birra hámuhuvvo nu ahte
dat guoská sihke eaiggádiidda
ja geavahanvuoigatvuođalaččaide árbevirolaš sámi
guovllus. Dan oktavuođas
lea Sámedikki čielga
oaidnu ahte ferte leat Sámediggi
sámiid álbmotválljen orgánan
mii hálddaša álgoálbmotbuhtadusa
foandan dahje sullasažžan
vai dat boahtá buorrin daidda
sápmelaččaide
ja báikegottiide geaidda
dat guoská.
Departemeantta oaidnu lea uhccán
rievdan dan rájes go konsultašuvdnaproseassa álggahuvvui.
Dás lea erenoamážit
sáhka dain mearrádusain
main lea stuorra mearkkašupmi
Sámediggái,
nu go mieđihit ahte konsultašuvdnageatnegasvuohta
galgá mearriduvvot lágain,
ahte sámi deastagat galget
vuhtiiváldojuvvot olggobealde
Finnmárkku, ahte álgoálbmotbuhtadus
galgá ásahuvvot
ja ahte galgá leat vejolašvuohta
oažžut
mearriduvvot buhtaduseavttuid ja ILO-konvenšuvnna
nr.169 siskkáldahttima.
Ii ge leamaš olus ovdáneapmi
diehtojuohkimis/gulahallamis ealáhusovddidanrámmaid
birra ođasmuvakeahtes resurssaid
oktavuođas, das maiddái
minerálaid oktavuođas.
Nu mo ášši
dál lea, rievdatkeahtes
oaivilat ja vuordimis stuorra váilevašvuođat
lágas sámi vuoigatvuođaid
ja beroštumiid ektui, de
ii sáhte Sámediggi
mieđihit láhkaevttohussii.
