St.dieđ. nr. 7 (2006-2007)
Čujuhuvvo Sámedikki jahkedieđáhusa 2.14.1 kap.
Sámediggi máinnaša WTO-šiehtadallamiid mat leat jođus. Eanandoallo- ja biebmodepartemeanta áigu deattuhit ahte ráđđehusa ovdii bohtet hástalusat maid šiehtadallamat WTO:s bohciidahttet offensiivvalaččat. Oktilaččat barget olahan dihtii šiehtadallanbohtosa mii sihkarasttášii doaibmi eanandollui vuđđosa miehtá riikka. Šiehtadallamat leat dál bisánan. Go šiehtadallamat fas jotkojuvvojit, ja šiehtadallanboađus lea gárvvis, de heivehuvvo politihkka ja váikkuhanoamit nuppástuhttojit nu ahte eanandoallopolitihka ulbmiliid juvssašii. Sámediggi meannuda mielkeearreortnega ja atná fuola ahte lasihuvvojit mielkeearit sámi guovlluide. Eanandoallo- ja biebmodepartemeanta čujuha dasa ahte bealit dán jagáš eanandoallojahkeloahpparehkegis, doaibmabidjun nannet gussamielkebuvttadeami Finnmárkkus, sohpe ahte várrejuvvo 1 milj. lihtera earremearri mii várrejuvvo mielkebuvttadeapmái fylkkas, vrd. šiehtadallamiid loahppabeavdegirjji 4 čuo.
Sámediggi lea čujuhan ahte ásahus ferte leat fárus jahkásaš eanandoallošiehtadallamiin olu árabut go ovdal. Eanandoallo- ja biebmodepartemeanta čujuha cuoŋománu 22.b. 2004 čoahkkimii Sámedikki áirasiiguin, gos lei ovttaoaivilvuohta lágidit čoahkkima gaskal Sámedikki ja departementta ovdal juohke eanandoalloloahpparehkega. Dákkár čoahkkima áigi sáhttá heivehuvvot Sámedikki dáhtuide. Eanandoallo- ja biebmodepartemeanta oaivvilda čoahkkima galgat vuođđuduvvot čálalaš evttohusas Sámedikkis dakkár fáttáiguin maid dáhtošii departemeanttain digaštallat. Departemeanta áigu muđui čujuhit Sámedikki ja stáhtaráđi gaskasaš cuoŋománu 5.b. 2006 čoahkkimii, mas lei digaštallan Sámedikki evttohusain dán jagáš eanandoalloloahpparehkegii.
Arbeids- og sosialdepartementet, postboks 8019 Dep, 0030 Oslo | Telefon: 22 24 90 90. | E-post: | Org. nr 983887457 Nettredaktør: Jan Richard Kjelstrup, ansvarlig redaktør: Nina Kraugerud Ertzaas
