1 Álggahus ja čoahkkáigeassu
Gieldda- ja guovludepartementa ovddida
láhkarievdadusaid evttohusa láhkii suoidnemánu 12.b. 1987 nr. 56
Sámedikki ja eará sámi riektedilálašvuođaid birra (sámeláhka), §
2-6 Sámi jienastuslogu birra.
Sámelága § 2-6 láhkavuođđuda sámi jienastuslogu
ásaheami ja mearrida eavttuid go galgá sáhttit gáibidit iežas
čálihuvvot jienastuslohkui. Sámediggeválgii lea
jienastanvuoigatvuohta buohkain geat sáhttet oassálastit
suohkanválgii ja geat čužžot orrunsuohkana sámi jienastuslogus, vrd
sámelága § 2-5. Seammaládje eaktuda válgadohkálašvuohta ja
evttohanriekti Sámediggeválgii ahte gullevaš olmmoš lea čálihuvvon
válgabiirre sámi jienastuslohkui.
čáliheapmi sámi jienastuslohkui § 2-6 vuođul
eaktuda ahte persovdna ieš gáibida dan seammás go duođašta ahte
atná iežas leat sápmelažžan, ja geas lea juogo a)sámegiella
ruovttugiellan, dahje b) lea váhnen, áhkku/áddjá dahje
máttaráhkku/máttaráddjá geas lea sámegiella ruovttugiellan, dahje
c) lea mánná persovdnii gii čuožžu dahje lea čužžon sámi
jienastuslogus.
Gáibádusa ahte čálihuvvot sámi jienastuslohkui
galgá doaibmi láhkamearrádusaid mielde ovddidit orrunsuohkanii mii
ráhkada sámi jienastuslogu suohkana álbmotregisttara, maŋemus
válgga sámi jienastuslogu ja čálihemiid ja sihkkumiid gáibádusaid
vuođul mat leat boahtán maŋemus válgaáigodagas. Láhkarievdadusas
lea áigumuš rievdadit nu ahte Sámediggái galgá ovddidit gáibádusa
čálihuvvot sámi jienastuslohkui, ja Sámedikkis galgá dás duohko
leat ovddasvástádus čálihit ja sihkkut gáibádusaid vuođul maid
vuostáiváldá.
Departemeanta ovddida seammás evttohusa
rievdadit § 2-6 dálá goalmmát lađđasa dainna áigumušain ahte addit
Sámediggái válddi mieđihit geavahit sámi jienastuslogu, earret eará
dutkamii.