Sámedikke doaimma birra 2001

4.1 Mánáidgárddit

Sámediggi válddii 1.1.2001 badjelasas dikšut erenoamáš doarjaga sámi mánáidgárddiide. Dasa lea Sámediggi válbmen ođđa njuolggadusaid mat bohte fápmui 1.1.2002. Maiddái nannejuvvui Sámedikki ruđalaš nákca fievrridit diehtojuohkin- ja bagadandoaimmaid sámi mánáidgárddiide ja mánáidgárddiide gos sámi mánát vázzet. Lea Sámedikki ovddasvástádus vuolggahit ja ovddidit Mánáid- ja bearašdepartemeantta golmmajahkásaš kválitehta buoridanfiggamuša mánáidgárddi sektoras.

Mánáidgárddiid bargit berrejit hálddášit sámigiela ja dovdat sámi kultuvrra dasgo dát gelbbolašvuohta lea mearrideaddji eaktun jos sámi mánáidgárddit galget nagudit nannet ja ovdánahttit gielaset ja iešvuođaset. Mánáid- ja bearašdepartemeanta áigu ovttas Sámedikkiin čielggadit stipeandagažaldaga sámi studeanttaide geat leat čađaheamen ovdaskuvlaoahpu. Dasalassin galget dievasmahttin- ja joatkkaoahpahusvuolggaheamit suokkarduvvot sámi mánáidgárddiid bargiid gaskkas. Nu maddái dárogielat mánáidgárddiin gos leat sámemánát. Dát doaibma čatnasa departemeantta golmmajahkásaš kválitehta buoridanfiggamuššii. Dákko čujuhuvvo St.dieđahussii nr. 55 (2000–2001) Sámepolitihka birra ja St. dieđahussii nr 34 (2001–2002) Kválitehta ođasmahttin. Sámi alitoahpu ja dutkama birra.

Lea stuorra dutkandárbu sámi servodagain bajásšaddandiliid ja sosiala oktavuođaid hárrái. Danne leage dárbbašlaš ja dehálaš čohkket lasi máhtu ja dieđu mánáidgárddis sámemáináid šaddanšilljun. Mánáid- ja bearašdepartemeanta hálida geahčadit dáid dárbbuid bálddalagaid golmmajahkásaš kválitehtafiggamušain.