2 Láhkaevttohusa duogáš
Dálá boazodoalloláhka mearriduvvui
1978:s. Láhka ođasmahttojuvvui 1996:s. Ođasmahttinbarggu
duogážin ledje resursadilálašvuođat
Finnmárkkus, riektedilálašvuođat
Lulli-Trøndelága/Hedmárkku boazodoalloguovllus
ja sámepolitihkalaš ovdáneapmi
man olis čuovui ahte Sámediggi oaččui
válddi nammadit miellahtuid stivrenorgánaide.
Lei unnán sáhka stivrejumi, hálddašeami
ja siskkáldas dilálašvuođaid
birra.
Jagi 1998/99 boazodoallošiehtadallamiid
oktavuođas gáibidii Norgga Boazosápmelaččaid Riikkasearvi
ahte ásahuvvo boazodoalloláhkalávdegoddi oppalaččat
guorahallat boazodoallolága. Dasto sohppojuvvui álggahit
ođasmahttinbarggu mearrádusaid hárrái
mat gusket stivrejupmái, hálddašeapmái
ja boazodoalu siskkáldas áššiide. Eaktuduvvui
ahte vuđolaš riektegažaldagaid
galgá ođđa sámevuoigatvuođalávdegoddi
guorahallat. Dát bođii ovdan Sd.prp.
nr 49 (1997 – 1998)
Boazodoallošiehtadusa
birra dáinna lágiin (dás
jorgaluvvon):
«Departemeanta eaktuda dán vuođul
ahte boazodoallolága rievdadeapmi, boazodoalu vuđolaš
riektegažaldagaid hárrái,
ferte vuos árvvoštallot Sámevuoigatvuođalávdegotti viidáset
barggus. Dat lea hui áigeáddjás
proseassa. Almmotge lea čielggas ahte lea sihke sávahahtti
ja dárbbašlaš rievdadit
ja ođasmahttit lága mearrádusaid hálddašeami
ja siskkáldas beliid hárrái.»
Skábmamánu 5. beaivvi 1998 nammadii
Eanandoallodepartemeanta láhkalávdegotti
mii oaččui dán mandáhta:
«Lávdegoddi galgá
guorahallat geassemánu 9. beaivvi 1978 Boazodoallolága
dainna ulbmiliin ahte rievdadit mearrádusaid dán hárrái:
Boazodoalu stivrejupmi ja hálddašeapmi.
Boazodoalu siskkáldas dilálašvuođat, dás
maiddái ovttaskas boazoeaiggádiid
riektedilálašvuohta.»
Lávdegoddái nammaduvvojedje čuovvovaš
olbmot:
Professor dr. juris Kirsti Strøm
Bull, Oslo
Boazoeaiggát Johan Mathis Turi, Guovdageaidnu
Boazoeaiggát Inger Anita Smuk, Unjárga
Boazoeaiggát John Henrik Eira, Kárášjohka
Boazoeaiggát Aud Renander, Rennebu
Boazoeaiggát Betty Kappfjell, Grane
Boazoeaiggát Karen Marie Eira Buljo, Guovdageaidnu
Advokáhtta Erik Keiserud, Bærum
Ekspedišuvdnahoavda Arne G. Arnesen, Ski
Boazodoallohoavda Jon Meløy, Kárášjohka
Seniordutki dr. art. Nils Oskal, Guovdageaidnu
Professor dr. juris Kirsti Strøm Bull nammaduvvui lávdegotti
jođiheaddjin.
Aud Renander luobai lávdegottis 2000 giđa.
Su sadjái ii nammaduvvon oktage, go árvvoštallui
ahte lávdegoddi lea ollen nu guhkás bargguin
ahte ii leat ulbmillaš nammadit ođđa
lahtu. Lávdegoddi jotkkii barggus dainna 10 báhcán miellahtuin.
Lávdegoddi geigii evttohusas njukčamánu
15. beaivvi 2001. Čielggadeapmi lea prentejuvvon
NOU 2001:35. Muđui láhkalávdegotti
barggu duogáža hárrái čujuhuvvo čielggadeami čuoggái
2.1.