3 Ekonomalaš ja hálddatlaš váikkuhusat
Hálddatlaš čuovvoleami ja ovttasadjái čohkkema
sámi jienastuslogu čáliheamis boahtá Sámediggi dahkat ovttas
Álbmotregistrerema guovddáškantuvrrain. Lassigoluid meroštallet
šaddat sullii 0,5 milj. ruvnno jahkásaččat. Supmi gokčet Sámedikki
bušeahta bokte.
Sámelága evttohuvvon rievdadus gáibida ahte
Sámedikki válgaláhkaásahusa ferte seammaládje ođastit. Láhkaásahusa
rievdadus dahkkojuvvo lagas ovttasbarggus Sámedikkiin.
Gielda-ja guovludepartemeanta
á v ž ž u h a :
ahte Don Majestéhta dohkkehat ja vuolláičálát
ovdanbiddjon proposišuvnna evttohusa Stuoradiggái dahkat
láhkarievdadusaid geassemánu 12.b.1987 nr. 56 láhkii Sámedikki ja
eará sámi riektedilálašvuođaid birra (sámeláhka).
Mii HARALD, Norgga gonagas,
n a n n e t :
Stuoradiggi galgá mearridit láhkarievdadusa
geassemánu 12.b.1987 nr. 56 láhkii Sámedikki ja eará sámi
riektedilálašvuođaid birra (sámeláhka) ovdanbiddjojuvvon evttohusa
vuođul.
Evttohus láhkii rievdadit
geassemánu 12.b. 1987 nr.56 lága Sámedikki ja eará sámi
riektedilálašvuođaid birra (sámeláhka).
I
Lágas geassemánu 12.b. 1987 nr. 56 Sámedikki ja
eará sámi riektedilálašvuođaid birra (sámeláhka) galgá § 2-6
čuodjat:
§ 2-6 Sámi jienastuslohku
Buohkat geat duođaštit ahte sii atnet iežaset
leat sápmelažžan, ja geain lea juogo
a) sámegiella ruovttugiellan, dahje
b) lea dahje lea leamaš váhnen, áhkku/áddjá
dahje máttaráhkku/máttaráddjá geas lea sámegiella ruovttugiellan,
dahje
c) lea mánná persovdnii gii čuožžu dahje lea
čužžon jienastuslogus sáhttet gáibidit čálihuvvot
sámi jienastuslohkui.
Galgá váldit oktavuođa Sámedikkiin go áigu gáibidit čálihuvvot
sámi jienastuslohkui.
Sámediggi ráhkada sámi jienastuslogu álbmotregisttara,
maŋemus válgga sámi jienastuslogu ja čálihemiid ja sihkkumiid
gáibádusaid vuođul mat leat boahtán maŋemus válgaáigodagas.
Sámi jienastuslogu galgá čálihit suohkaniid vuođul.
Go persovdna lea čálihuvvon sámi
jienastuslohkui, de sáhttá dan registreret álbmotregisttarii. Dát
registreren galgá leat olámuttos dušše dan eiseváldái mas lea
ovddasvástádus čađahit Sámedikki válgga, dahje go
Sámediggi dan lea mieđihan.
Sáhttá EDB:in čállit sámi jienastuslogu.
II
Dát láhka lea dakkaviđe fámus.