3 Ekonomalaš ja hálddatlaš váikkuhusat
Sámedikki áirasiid logu lasihit 39 rájes 43
rádjái dagaha 2005 bušeahttajahkái kr 400 000 lassigoluid ja dasto
sullii kr 800 000 lassigoluid jahkásaččat. Departemeanta lea dán
meroštallamis bidjan vuođđun ahte lassin Sámedikki
vuođđudančoahkkimii 2005 golggotmánus, čađahuvvo dievasčoahkkin
2005 skábmamánus komitea- ja joavkočoahkkimiiguin. Muđui lea
departemeanta bidjan vuođđun ahte válgaáigodagas čađahuvvojit, nugo
ovdal, njeallje dievasčoahkkima jahkásaččat. Sámedikki
válgalávdegoddi juohká dássenmandáhtaid ja buot sadjásaš
áirasiid.
Evttohus rievdadit sámelága § 2-4 gáibida
seammalágan ođasteami Sámedikki válgga láhkaásahusas.
Gielda- ja guovlodepartemeanta
á v ž ž u h a :
Ahte Gonagaslaš Májestehta dohkkehat ja
vuolláičálát proposišuvnaevttohusa mii lea ovdanbiddjon
Stuoradiggái lága rievdadit geassemánu 12.b.1987 nr. 56 lága
Sámedikki ja eará sámi riektedilálašvuođaid birra (sámelága).
Mii HARALD, Norgga gonagas,
n a n n e t :
Stuoradiggi bivdojuvvo dahkat mearrádusa láhkii
ahte rievdadit geassemánu 12.b. 1987 nr. 56 lága Sámedikki ja eará
sámi riektedilálašvuođaid birra (sámeláhka) mielddus evttohusa
vuođul.
Evttohus láhkii rievdadit
geassemánu 12.b. 1987 nr. 56 lága Sámedikki ja eará sámi
riektedilálašvuođaid birra (sámeláhka)
I
Geassemánu 12.b. 1987 nr. 56 lágas Sámedikki ja
eará sámi riektedilálašvuođaid birra (sámeláhka) galgá § 2- 4 ođđa
nubbi lađas leat ná:
«Dasa lassin válljejuvvojit 4 dássenmandáhtat maid juohká dan
njealji válgabiirii mat leat ožžon eanemus dohkkehuvvon jienaid
válggas. Sámedikki válgalávdegoddi nammada dássenmandáhtaid ja buot
sadjásaš áirasiid.»
II
Dát láhka biddjojuvvo fápmui dakkaviđe.