Sámedikki 2009 doaimma birra

3.3 Sámi statistihkka

Čujuhuvvo Sámedikki jahkedieđáhusa kapihttalii 2.15.4.

Statistihka fágalaš analysajoavku ásahuvvui ovttasráđiid Sámedikkiin jagi 2006 ja ulbmil lei nannet dieđuid árvvoštallama ja mearrideami vuođđun erenoamážit stáhta eiseválddiid ja Sámedikki gaskasaš ráđđádallamiid oktavuođas. Joavkku doaibmamearrádus lea juohke jagi almmuhit raportta mas leat guovdilis ovdánandovdomearkkaid visogovva ja analysa sámi servodagas. Raporta biddjojuvvo ráđđádallamiid vuođđun. Joavkku nuppi raportta «Sámi logut muitalit 2» (2009) bohtosat čájehit čuovvovačča:

• Eai leat gávnnahuvvon čielga erohusaid sápmelaččaid dearvvašvuođas ja dáža ássiid dearvvašvuođas, nu go lea dieđihuvvon muhtun eará álgoálbmogiid hárrái. Muđuid leat sámit eambbo duhtameahttumat dearvvašvuođalágádussii go dážat.

• Bargiid lohku lea njiedjan vuođđoealáhusain boazodoalus, eanadoalus ja guolástusas sámi ássanguovlluin maŋimus logijagiid.

• Áigodaga 2006 – 2009 njiejai 593 oahppiin daid vuođđoskuvlaoahppiid lohku geat ožžo oahpu Sámegielas nubbigiellan, dat mearkkaša ahte fága massii 29 pst oahppiin maŋimus golmma jagis.

• Oahppodássi olbmuin gaskal 24 ja 65 jagi geat ásset SOF-guovllus (Guovllus mas Sámediggi addá doarjagiid sámi ealáhusdoaimmaide) čájeha ahte leat eanebut geat eai čađat joatkkaoahpu go dat geat riikkas gaskamearálaččat eai čađat joatkkaoahpu. Nuppe dáfus lea dán guovllus daid nissoniid lohku geat leat čađahan universitehta- ja allaskuvlaoahpu, viehka allat. Lohku lea alit go riikka gaskamearri guovllu boaittobeliin, muhto dat lea veaháš unnit go riikka gaskamearri čoahkkebáikkiin. Albmáid oassi guđiin lea universitehta- ja allaskuvlaoahppu dán guovllus lea unnit go riikka gaskamearri, erenoamážit čoahkkebáikkiin.

Ođasmahttin-, hálddahus- ja girkodepartemeanta doarju jahkásaččat Sámi statistihka fágalaš analysajoavkku barggu ja Statistihkalaš guovddášdoaimmahaga barggu sámi statistihkalaš jahkegirjji ráhkadeamis mii ilbmá juohke nuppi jagi.